ܛܟܣܐ ܕܘܥܕܗ ܕܠܡܐܢܐ
ܢܽܘܗܳܪܳܐ
ܒܠܺܠܝܳܐ ܕܰܬܪܶܝܢ ܒܫܰܒܳܐ ܕܚܰܫܳܐ ܦܳܪܽܘܩܳܝܳܐ ܒܳܬܰܪ ܬܶܫܡܶܫܬܳܐ ܕܬܰܪܬܶܝܢ ܕܠܺܠܝܳܐ ܥܳܐܠܺܝܢ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܠܡܰܕܒܚܳܐ ܘܠܳܒܫܺܝܢ ܛܶܟܣܰܝ̈ܗܽܘܢ ܘܛܳܥܢܺܝܢ ܠܰܨܠܺܝܒܳܐ ܘܠܶܐܘܰܢܓܶܠܝܽܘܢ ܘܡܰܪ̈ܘܚܳܬܳܐ ܘܦܺܝܪܡܳܐ ܘܢܳܦܩܺܝܢ ܒܬܰܪܥܳܐ ܓܰܪܒܝܳܝܳܐ ܘܟܳܪܟܺܝܢ ܕܳܪܳܐ (ܗ̄ ܕ̄ ܟܪܽܘܟܝܳܐ) ܡܛܰܟܣܳܐܺܝܬ ܥܕܰܡܳܐ ܕܡܳܛܶܝܢ ܠܰܩܕܳܡ ܬܰܪܥܳܐ ܕܡܰܕܒܚܳܐ. ܘܒܰܙܒܰܢ ܟܪܽܘܟܝܳܐ ܐܳܡܪܺܝܢ ܒ̈ܳܬܶܐ ܗܳܠܶܝܢ ܟܰܕ ܗܶܢܽܘܢ ܘܥܰܡܳܐ ܛܳܥܢܺܝܢ ܩܶܪ̈ܝܽܘܢܶܐ.
ܩܠܐ: ܒܩ̄ ܦܶܬܓܳܡܳܐ ܝܰܒܶܒܘ̱ ܬܶܫܒܽܘܚܬܳܐ
ܐܰܘܕܰܘ ܠܡܳܪܝܳܐ ܕܛܳܒܽ ܗ̱ܘ ܘܰܠܥܳܠܡ ܪ̈ܰܚܡܰܘܗ̱ܝ «ܡܙܡ̄ ܩܝܙ:ܐ»
ܘܰܥܕܶܗ ܕܰܠܡܺܐܢܳܐ ܠܚܰܝ̈ܶܐ ܡܰܢܰܥ ܠܰܢ܆ ܘܠܰܩܝܳܡܬܳܐ ܫܒܺܝܚܬܳܐ ܕܰܡܫܺܝܚܳܐ ܦܳܪܽܘܩܰܢ܆ ܕܗܽܘܝܽܘ ܡܕܰܒܪܳܢܳܐ ܕܒܶܪ̈ܝܳܬܳܐ ܘܣܳܥܽܘܪܳܐ ܕܰܐܝܠܶܝܢ ܕܰܐܠܺܝܨܺܝܢ܆ ܕܗܽܘ ܢܰܫܘܶܐ ܠܰܢ ܒܛܰܝܒܽܘܬܶܗ܆ ܕܢܶܚܙܶܝܘܗ̱ܝ ܠܺܠܝܳܐ ܕܬܶܕܡܽܘܪܬܳܐ܆ ܕܒܶܗܽ ܗ̱ܘ ܟܰܘ̈ܟܒܶܐ ܕܢܽܘܗܪܳܐ ܡܰܨܡܚܺܝܢ ܡܶܢ ܓܰܘ ܡܰܝ̈ܳܐ ܪ̈ܽܘܚܳܢܳܝܶܐ܀
ܢܺܐܡܰܪ ܐܺܝܣܪܳܐܝܶܠ ܕܰܠܥܳܠܰܡ ܪ̈ܰܚܡܰܘܗ̱ܝ «ܡܰܙܡ̄ ܩܝܙ܆ܒ»
ܘܰܥܕܶܗ ܕܰܠܡܺܐܢܐ ܬܰܪܥܰܐ ܗ̱ܘ ܫܰܪܺܝܪܳܐ܆ ܘܡܰܥܰܠܬܳܐ ܕܰܠܘܳܬ ܚܰܫܳܐ ܦܳܪܽܘܩܳܝܳܐ܆ ܕܗܽܘܝܽܘ ܡܚܰܣܝܳܢܳܐ ܕܫܽܘܪ̈ܥܳܬܰܢ܆ ܘܫܳܒܽܘܩܳܐ ܕܟܽܠܗܶܝܢ ܚܰܘ̈ܒܳܬܰܢ. ܫܗܰܪܘ̱ ܐܳܘ ܨܰܝ̈ܳܡܶܐ ܕܗܳܐ ܡܛܳܐ ܚܰܬܢܳܐ ܕܡܰܘܪܶܒ ܟܠܺܝ̈ܠܰܝܟܽܘܢ ܢܶܚܰܫ ܥܰܡܶܗ ܒܚܰܫܶܗ ܕܥܰܠ ܐܰܦܰܝ̈ܢ ܕܢܶܚܕܶܐ ܥܰܡܶܗ ܒܝܰܘܡܳܐ ܕܰܩܝܳܡܬܶܗ܀
ܐܰܘܕܰܘ ܠܰܐܠܳܗ ܐܰܠܳܗܺܝ̈ܢ ܕܰܠܥܳܠܰܡ ܪ̈ܰܚܡܰܘܗ̱ܝ «ܡܰܙܡ̄܆ ܩܠܗ܆ܒ»
ܡܳܐ ܫܰܦܺܝܪ ܗ̱ܘܳܐ ܠܺܠܝܳܐ ܕܘܰܥܕܶܗ ܕܦܳܪܽܘܩܰܢ. ܘܰܫܒܺܝܚ ܣܰܓܺܝ ܘܰܡܝܰܬܰܪ ܘܰܡܠܶܐ ܟܽܠ ܫܽܘܦܪ̈ܺܝܢ܆ ܕܗܳܐ ܟܢܺܝܫܺܝܢ ܒܶܗ ܣܳܒ̈ܶܐ ܘܰܛܠܳܝ̈ܶܐ܆ ܘܰܒܢܰܗܺܝܪ̈ܶܐ ܙܳܡܪܺܝܢ ܬܶܫܒܽܘܚܬܳܐ܆ ܡܨܰܒܬܳܐ ܒܶܗ ܡܰܥܡܽܘܕܺܝܬܳܐ ܐܰܝܟ ܟܰܠܬܳܐ ܫܒܺܝܚܬܳܐ ܘܝܳܗܒܳܐ ܚܰܝ̈ܶܐ ܠܰܐܝܠܶܝܢ ܕܒܳܗ̇ ܥܳܡܕܺܝܢ܀
ܬܰܟܫܶܦܬܳܐ
ܫܽܘܒܚܳܐ ܠܛܳܒܳܐ ܕܰܒܝܰܕ ܚܽܘܒܶܗ܆ ܓܠܳܐ ܬܶܫܒܽܘܚܬܶܗ ܠܰܒܢܰܝ̈ܢܳܫܳܐ. ܒܪܳܐ ܡܶܢ ܥܰܦܪܳܐ ܟܝܳܢܳܐ ܡܠܺܝܠܳܐ܆ ܘܨܰܒܬܶܗ ܒܢܰܦܫܳܐ ܡܳܪܰܬ ܓܰܙ̈ܶܐ. ܘܣܳܡ ܝܺܕܰܥܬܳܐ ܒܦܰܓܪܳܐ ܕܐ̱ܢ̈ܳܫܳܐ܆ ܕܟܽܠܳܗ̇ ܒܪܺܝܬܳܐ ܫܽܘܒܚܶܗ ܬܶܙܡܰܪܝ̱. ܬܰܘ݉ ܡܰܠܳــ̈ـܠܶܐ ܙܡܰܪܘ̱ ܠܶܗ ܫܽܘܒܚܳܐ܆ ܥܰܕܠܳܐ ܢܶܕܡܰܟ ܫܶܢܰܬ ܡܰܘܬܳܐ. ܒ݉ܠܺܠܝܳܐ ܕܰܐܪܺܝܟ ܢܶܬܕܟܰܪ ܠܡܰܘܬܳܐ܆ ܕܒܳܠܶܡ ܠܦܽܘܡܰܢ ܘܰܡܫܰܬܶܩ ܠܰܢ. ܟܺܐܢ̈ܶܐ ܕܰܫܗܰܪܘ̱ ܒܠܰܝ̈ܠܰܘܳܬܳܐ܆ ܐܳܦ ܟܰܕ ܡܺܝܬܺܝܢ ܚܰܝ̈ܶܐ ܐܶܢܽܘܢ. ܘܒܺܝ̈ܫܶܐ ܕܰܛܠܰܡܘ̱ ܫܽܘܒܚܶܗ ܕܡܳܪܗܽܘܢ܆ ܘܳܐܦܶܢ ܚܰܝܺܝ̈ܢ ܡܺܝ̈ܬܶܐ ܐܶܢܽܘܢ. ܢ݉ܥܺܝܪܺܝܘܗ̱ܝ ܠܗܰܘܢܰܢ ܠܰܨ̈ܠܰܘܳܬܳܐ܆ ܘܰܠܙܽܘܡܳܪ̈ܶܐ ܕܪܽܘܚܳܐ ܕܩܽܘܕܫܳܐ. ܘܢܶܗ݉ܘܶܐ ܚܰܒܪ̈ܶܐ ܠܰܒܬܽܘ̈ܠܳܬܳܐ܆ ܚܰܟܺܝ̈ܡܳܬܳܐ ܕܩܰܠܶܣ ܡܳܪܰܢ. ܕܰܒܗܰܘ ܠܺܠܝܳܐ ܕܡܰܪܗܶܒ ܥܳܠ̈ܡܶܐ܆ ܟܰܕ ܥܺܝܪܺܝܢܰܢ ܢܶܚܙܶܝܘܗ̱ܝ ܠܚܰܬܢܳܐ. ܘܠܳܐ ܢܶܬܛܰܒܰܥ ܒܰܪ̈ܓܺܝܓܳܬܳܐ܆ ܘܢܶܙܡܰܪ ܫܽܘܒܚܶܗ ܒܝܰܘܡܳܐ ܕܕܳܢܰܚ܀
ܘܟܰܕ ܡܳܛܶܝܢ ܠܰܬܪܰܥ ܡܰܕܒܚܳܐ ܡܫܰܪܶܐ ܟܳܗܢܳܐ
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘܬܳܐ
ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܰܢ ܘܰܥܕܳܐ ܕܚܰܝ̈ܶܐ ܘܰܠܡܺܐܢܳܐ ܕܟܽܠ ܛܳܒ̈ܳܬܳܐ܆ ܕܰܒܡܶܐܬܺܝܬܳܟ ܫܒܺܝܚܬܳܐ ܕܬܰܪܬܶܝܢ ܢܶܦܽܘܩ ܠܽܐܘܪܥܳܟ ܒܠܰܡܦܺܐܕ̈ܶܐ ܕܟܰܝ̈ܳܐ ܕܰܡܠܶܝܢ ܡܶܫܚܳܐ ܕܙܰܕܺܝܩܽܘܬܳܐ܆ ܘܢܶܫܬܘܶܐ ܠܰܚܙܳܬܳܟ ܐܰܠܳܗܳܝܬܳܐ ܟܰܕ ܕܳܠܩܺܝܢ ܠܰܡܦܺܐܕܰܝ̈ܢ ܘܓܰܠ̈ܝܳܢ ܐܰܦܰܝ̈ܢ܆ ܘܗܰܒ ܠܰܢ ܕܰܒܥܺܝܪܽܘܬܳܐ ܘܙܰܗܝܽܘܬܳܐ ܘܕܰܟܝܽܘܬܳܐ ܢܣܰܟܶܐ ܠܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܢܝܳܢܳܐ ܕܪܰܚܶܡܥܠܰܝ
ܒܩ̄: ܫܡܰܝ̈ܳܢܶܐ ܫܽܘܒܚܳܐ
ܗܳܐ ܓܢܽܘܢܳܐ ܡܛܰܝܰܒ ܚܳܐܰܪ܆ ܠܰܕܢܳܗܪܺܝܢ ܠܰܡܦܺܐܕܰܝ̈ܗܽܘܢ. ܕܡܳܐ ܕܳܐܬܶܐ ܚܰܬܢܳܐ ܕܢܶܥܽܘܠ܆ ܥܰܡܶܗ ܢܶܥܠܽܘܢ ܠܰܓܢܽܘܢܳܐ܀
ܗܳܐ ܚܰܬܢܳܐ ܡܰܛܺܝ ܕܢܺܐܬܶܐ܆ ܦܽܘܩܘ̱ ܠܽܐܘܪܥܶܗ ܒܠܰܡܦܺܝ̈ܕܰܝܟܽܘܢ. ܟܰܕ ܡܶܨܛܰܒ̈ܬܳܢ ܢܰܦ̈ܫܳܬܟܽܘܢ܆ ܒܰܥ̈ܒܳܕܶܐ ܕܙܰܕܺܝܩܽܘܬܳܐ܀
ܟܽܠܢܳܫ ܢܶܚܽܘܪ ܒܰܩܢܽܘܡܶܗ܆ ܘܠܳܐ ܢܶܥܽܘܠ ܒܡܳܐܢ̈ܶܐ ܨ̈ܳܐܶܐ. ܕܠܳܐ ܢܶܚܙܶܝܘܗ̱ܝ ܚܰܬܢܳܐ ܘܢܶܪܓܰܙ܆ ܘܰܠܒܰܪ ܡܶܢ ܬܰܪܥܳܐ ܢܰܦܩܺܝܘܗ̱ܝ܀
ܫܽܘܒܚܳܐ
ܚܛܳܗܰܝ̈ܢ ܡܳܪܝ̱ ܒܳܟ ܢܶܬܚܰܣܽܘܢ܆ ܘܒܳܟ ܢܶܬܕܰܟ̈ܝܳܢ ܬܺܐܪ̈ܳܬܰܢ܆ ܘܒܳܟ ܢܶܬܩܰܕ̈ܫܳܢ ܢܰܦ̈ܫܳܬܰܢ܆ ܘܢܶܚܕܶܐ ܥܰܡ ܚܰܟܺܝ̈ܡܳܬܳܐ܀
ܡܫܰܡܫܳܢܳܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀
ܦܪܽܘܡܝܽܘܢ
ܟܳܗܢܳܐ: ܬܶܫܒܽܘܚܬܳܐ ܠܗܰܘ ܠܡܺܐܢܳܐ ܕܫܰܝܢܳܐ ܕܒܶܗ ܠܰܐܝ̈ܳܐ ܘܰܡܛܰܪ̈ܦܰܝ ܒܰܚܛܺܝܬܳܐ ܐܶܫܟܰܚܘ̱ ܠܢܰܦ̈ܫܳܬܗܽܘܢ ܢܝܳܚܳܐ܆ ܠܗܰܘ ܢܰܘܚܳܐ ܒܗܺܝܠܳܐ ܕܒܶܗ ܛܥܺܝ̈ܢܰܝ ܡܰܘ̈ܒܠܶܐ ܝܰܩܺܝܪ̈ܳܬܳܐ ܕܢܳܡܽܘܣܳܐ ܩܢܰܘ ܚܽܘܪܳܪܳܐ܆ ܠܗܰܘ ܚܰܬܢܳܐ ܕܪܰܘܡܳܐ ܕܰܒܬܽܘ̈ܠܳܬܳܐ ܚܰܟܺܝ̈ܡܳܬܐ ܙܰܡܶܢ ܠܰܚܠܽܘܠܶܗ܆ ܘܠܰܡܦܺܐܕ̈ܶܐ ܢܰܗܺܝܪ̈ܶܐ ܦܩܰܕ ܠܡܰܢܗܳܪܽܘ ܩܕܳܡܰܘܗ̱ܝ܆ ܘܰܒܥܺܝܪܽܘܬܳܐ ܢܣܰܟ̈ܝܳܢ ܠܶܗ܆ ܘܒܰܙܗܺܝܪܽܘܬܳܐ ܘܕܰܟܝܽܘܬܳܐ ܘܰܚܘܺܝܚܽܘܬܳܐ ܢܶܫܗܪ̈ܳܢ ܩܕܳܡܰܘܗ̱ܝ܆ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀
ܣܶܕܪܳܐ
ܡܫܺܝܚܳܐ ܐܰܠܳܗܳܐ ܕܺܝܠܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܗܰܘ ܠܡܺܐܢܳܐ ܕܫܰܝܢܳܐ ܘܒܶܝܬ ܨܰܘܒܳܐ ܕܰܢܝܳܚܳܐ ܘܰܒܗܺܝܠܳܐ ܘܰܡܫܰܝܢܳܐ܆ ܗܰܘ ܛܳܒܳܐ ܕܓܳܠܘ̱ ܪ̈ܰܚܡܰܘܗ̱ܝ ܡܬܽܘ̈ܡܳܝܶܐ ܥܰܠ ܓܒܺܝܠܬܶܗ ܘܠܳܐ ܣܰܝܒܰܪ ܕܢܶܚܣܰܪ ܗܳܢܳܐ ܟܽܠܶܗ ܥܒܳܕܳܐ ܕܺܐܝ̈ܕܰܘܗ̱ܝ܆ ܗܰܘ ܪܳܥܝܳܐ ܛܳܒܳܐ ܕܰܢܦܰܩ ܒܰܒܥܳܬܳܐ ܕܥܶܪܒܳܐ ܐܰܒܺܝܕܳܐ܆ ܘܶܐܫܟܚܶܗ ܠܙܽܘܙܳܐ ܗܰܘ ܡܰܠܟܳܝܳܐ ܕܰܛܡܺܝܪ ܗ̱ܘܳܐ ܒܚܰܫ̈ܶܐ ܕܰܚܛܺܝܬܳܐ ܘܡܰܪܩܶܗ ܘܕܰܟܝܶܗ ܒܟܽܘܪܳܐ ܕܡܰܥܡܽܘܕܺܝܬܳܐ ܘܰܐܩܢܝܶܗ ܫܽܘܦܪܶܗ ܗܰܘ ܩܰܕܡܳܝܳܐ܆ ܗܳܫܳܐ ܡܳܪܝܳܐ ܐܰܠܳܗܳܐ ܚܰܪܰܪ ܓܡܺܝܪܳܐܺܝܬ ܠܢܰܦ̈ܫܳܬܰܢ ܡܶܢ ܨܳܐܽܘܬܳܐ ܕܰܚܛܺܝܬܳܐ܆ ܘܠܳܐ ܢܶܗܘܶܐ ܡܫܰܠ̈ܚܶܐ ܡܶܢ ܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ܆ ܐܶܠܳܐ ܐܰܫܘܳܐ ܠܰܢ ܕܢܶܗܘܶܐ ܢܰܘ̈ܣܶܐ ܕܟܰܝ̈ܳܐ ܠܰܐܠܳܗܽܘܬܳܟ܆ ܘܗܰܒ ܠܰܢ ܕܡܳܐ ܕܳܐܬܶܐ ܐܰܢ̱ܬ ܒܡܶܐܬܺܝܬܳܟ ܫܒܺܝܚܬܳܐ ܕܬܰܪܬܶܝܢ ܥܰܡ ܗܳܠܶܝܢ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܢܶܦܽܘܩ ܠܽܐܘܪܥܳܟ ܒܠܰܡܦܺܐܕ̈ܶܐ ܦܰܐܝ̈ܳܐ ܕܰܡܠܶܝܢ ܡܶܫܚܳܐ ܕܙܰܕܺܝܩܽܘܬܳܐ܆ ܘܠܳܐ ܬܰܫܡܰܥ ܠܰܢ ܒܰܪ̱ܬ ܩܳܠܳܐ ܕܳܐܡܪܳܐ ܕܙܶܠܘ̱ ܠܟܽܘܢ ܡܶܢܝ̱ ܠܺܝ̈ܛܶܐ ܠܳܐ ܝܳܕܰܥ ܐ̱ܢܳܐ ܠܟܽܘܢ܆ ܘܠܳܐ ܡܳܪܝ̱ ܢܦܽܘܫ ܒܬܶܡܗܳܐ ܘܰܒܟܰܪܝܽܘܬܳܐ܆ ܘܠܳܐ ܢܶܗܘܶܐ ܢܽܘܟܪ̈ܳܝܶܐ ܡܶܢ ܚܰܓܳܐ ܦܰܐܝܳܐ ܕܰܓܢܽܘܢܳܟ܆ ܐܶܠܳܐ ܐܰܫܘܳܐ ܠܰܢ ܕܟܰܕ ܕܳܠܩܺܝܢ ܠܰܡܦܺܐܕܰܝ̈ܢ ܘܙܳܥܩܺܝܢ ܫܺܝܦܽܘܪ̈ܰܝܢ ܢܶܫܬܘܶܐ ܠܰܚܙܳܬܳܟ ܐܰܠܰܗܳܝܬܳܐ܆ ܘܬܰܡܳܢ ܒܡܶܫܬܽܘܬܳܐ ܪܚܺܝܡܬܳܐ ܒܰܣܡܳܟܳܐ ܕܰܩܪ̈ܰܝܳܐ ܕܺܝܠܳܟ ܢܶܬܒܰܣܰܡ ܥܰܠ ܦܳܬܽܘܪܳܐ ܗܰܘ ܡܠܶܐ ܓܶܐܘ̈ܳܬܳܐ܆ ܘܰܐܫܘܳܐ ܕܥܰܡ ܗܰܝܡܳܢܽܘܬܳܐ ܬܪܺܝܨܬܳܐ ܢܡܰܢܰܥ ܠܰܠܡܺܐܢܳܐ ܕܺܝܠܳܟ ܪܽܘܚܳܢܳܝܳܐ ܘܰܠܒܶܝܬ ܢܰܘܚܳܐ ܕܟܽܠܗܽܘܢ ܩܰܕܺܝ̈ܫܰܝܟ܆ ܘܰܠܥܺܕܬܳܟ ܩܰܕܺܝܫܬܳܐ ܕܰܒܟܽܠܳܗ̇ ܬܺܒܶܝܠ ܪܰܡܪܶܡ ܩܰܪܢܳܗ̇ ܒܬܶܫ̈ܒܚܳܬܳܟ܆ ܘܰܐܥܬܰܪܶܝܗ̇ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ܆ ܘܰܚܠܳܦ ܠܰܡܦܺܐܕ̈ܶܐ ܗܳܠܶܝܢ ܕܰܛܥܺܝܢܳܐ ܒܺܐܝܕܶܝ̈ܗ̇܆ ܒܡܶܐܬܺܝܬܳܟ ܕܬܰܪܬܶܝܢ ܬܶܦܽܘܩܝ̱ ܠܽܐܘܪܥܳܟ ܗܺܝ ܘܰܒܢܶܝ̈ܗ̇ ܒܠܰܡܦܺܐܕ̈ܶܐ ܪ̈ܽܘܚܳܢܳܝܶܐ ܘܰܒܢܰܚ̈ܬܶܐ ܕܫܳܘܶܝܢ ܠܡܶܫܬܽܘܬܳܟ܆ ܘܟܰܕ ܒܥܳܠܡܳܐ ܗܳܢܳܐ ܡܢܰܛܰܪ ܐܰܢ̱ܬ ܠܳܗ̇ ܡܶܢ ܟܽܠܗܽܘܢ ܝܽܘܠ̈ܦܳܢܶܐ ܡܫܰܚܠ̈ܦܶܐ܆ ܘܰܡܫܰܪܰܪ ܐܰܢ̱ܬ ܫܶܬܶܐܣܶܝ̈ܗ̇ ܥܰܠ ܫܽܘܥܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ܆ ܘܟܰܕ ܡܰܡܠܶܟ ܒܳܗ̇ ܫܰܝܢܳܐ ܘܰܫܠܳܡܳܐ ܕܡܶܢܳܟ܆ ܬܶܥܒܶܕ ܥܺܐܕ̈ܶܐ ܕܚܰܕ̈ܘܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ܆ ܐܰܪܺܝܡ ܩܰܪܢܳܗ̇ ܘܪܰܡܪܶܡ ܪܺܝܫܳܗ̇܆ ܐܰܘܪܶܒ ܛܽܘܢ̈ܒܶܝܗ̇ ܘܫܰܪܰܪ ܣܶܟܶܝ̈ܗ̇܆ ܐܰܩܺܝܡ ܒܳܗ̇ ܥܰܡܽܘܕܳܐ ܕܰܨܠܺܝܒ ܢܽܘܗܪܳܐ܆ ܐܰܝܟܰܢܳܐ ܕܠܳܐ ܡܶܙܕܰܥܙܥܳܢܺܝܬܳܐ ܬܶܗܘܶܐ ܡܶܢ ܓ̈ܰܠ̱ܠܶܐ ܕܚܰܢܦܽܘܬܳܐ܆ ܐܰܩܺܝܡ ܒܳܗ̇ ܪ̈ܳܥܰܘܳܬܳܐ ܕܢܶܪܥܽܘܢܳܗ̇ ܥܺܝܪܳܐܺܝܬ ܘܰܚܦܺܝܛܳܐܺܝܬ܆ ܘܠܰܠܡܺܐܢ̈ܶܐ ܕܫܰܝܢܳܐ ܢܡܰܢܥܽܘܢܳܗ̇܆ ܩܰܕܶܫ ܠܟܳܗ̈ܢܶܐ ܕܺܝܠܳܗ̇ ܐܰܝܟܰܢܳܐ ܕܙܰܗܝܳܐܺܝܬ ܢܫܰܡܫܽܘܢ ܩܕܳܡܰܝܟ܆ ܘܠܰܡܫܰܡ̈ܫܳܢܶܝܗ̇ ܙܰܗܳܐ ܐܰܝܟܰܢܳܐ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܒܕܽܘܒܳܪ̈ܶܐ ܡܰܠܐܰܟܳܝ̈ܶܐ ܢܕܰܝܪܽܘܢ ܘܰܢܗܰܠܠܽܘܢ ܒܓܽܘ̈ܕܶܝܗ̇ ܩܰܕܺܝ̈ܫܳܬܳܐ܆ ܘܕܰܒܰܪ ܠܰܒܢܶܝ̈ܗ̇܆ ܣܰܡܶܟ ܠܣܳܒܶܝ̈ܗ̇܆ ܘܥܰܕܰܪ ܠܰܥܠܰܝ̈ܡܶܝܗ̇܆ ܘܫܰܟܶܢ ܠܗܽܘܢ ܚܰܝܠܳܐ ܕܡܶܢܳܟ ܐܰܝܟܰܢܳܐ ܕܠܳܐ ܡܶܨ̈ܛܰܠܝܳܢܶܐ ܢܶܗܘܽܘܢ ܠܫܽܘܪ̈ܥܳܬܳܐ܆ ܫܰܘܫܶܛ ܠܰܛܠܳܝ̈ܶܐ ܒܬܰܪܒܺܝܬܳܐ ܛܳܒܬܳܐ܆ ܠܥܳܠܡܳܐ ܟܽܠܶܗ ܚܬܽܘܡ ܒܰܨܠܺܝܒܳܟ ܙܰܟܳܝܳܐ܆ ܠܰܟܪ̈ܺܝܗܶܐ ܐܰܣܳܐ܆ ܠܰܐܠܺܝ̈ܨܶܐ ܐܰܪܘܰܚ܆ ܠܡܶܣ̈ܟܺܢܶܐ ܘܰܠ̈ܝܰܬܡܶܐ ܘܠܰܐܪ̈ܡܠܳܬܳܐ ܩܰܝܶܡ ܘܥܰܕܰܪ܆ ܠܰܫ̈ܒܰܝܳܐ ܦܪܽܘܩ܆ ܠܰܐܣܺܝܪ̈ܶܐ ܫܪܺܝ܆ ܠܰܡܒܰܕܪ̈ܶܐ ܟܰܢܶܫ܆ ܐܰܝܟܰܢܳܐ ܕܟܽܠ ܩܰܘ̈ܡܳܢ ܘܡܽܘ̈ܫܚܳܢ ܢܶܨܛܰܝܒܽܘܢ ܠܓܰܘ ܥܽܘܒܳܗ̇ ܘܢܶܬܡܰܢܥܽܘܢ ܠܰܠܡܺܐܢܳܐ ܗܰܘ ܡܚܰܪܰܪ ܡܶܢ ܟܺܐܡܽܘ̈ܢܶܐ ܘܡܰܚܫܽܘ̈ܠܶܐ ܕܝܰܡ̱̈ܡܶܐ܆ ܗܰܒ ܠܰܢ ܕܰܒܕܰܟܝܽܘܬܳܐ ܢܶܬܛܰܝܰܒ ܠܰܪܘܳܙܳܐ ܘܠܰܦܨܺܝܚܽܘܬܳܐ ܕܰܩܝܳܡܬܳܐ ܕܺܝܠܳܟ ܗܳܝ ܕܺܐܝܬܶܝܗ̇ ܠܡܺܐܢܳܐ ܕܚܰܕܽܘܬܳܐ ܘܕܰܫܠܳܡܳܐ ܘܫܽܘܠܳܡܳܐ ܕܰܐܓܽܘܢܳܐ ܗܳܢܳܐ ܪܽܘܚܳܢܳܝܳܐ܆ ܘܒܳܗ̇ ܒܰܩܝܳܡܬܳܐ ܕܺܝܠܳܟ ܢܶܬܦܨܰܚ ܥܰܡ ܓܽܘ̈ܕܶܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ܆ ܘܥܰܡܗܽܘܢ ܢܶܬܛܰܝܰܒ ܠܰܠܡܺܐܢܳܐ ܕܺܝܠܳܟ ܗܰܘ ܕܚܰܝ̈ܶܐ܆ ܗܰܘ ܕܒܶܗ ܢܝܳܚܬܳܐ ܛܽܘܒܬܳܢܺܝܬܳܐ ܡܶܬܝܰܗܒܳܐ ܠܗܳܢܽܘܢ ܕܰܦܠܰܚܘ̱ ܒܟܰܪܡܳܟ ܪܽܘܚܳܢܳܝܳܐ܆ ܘܟܰܕ ܒܠܰܡܦܺܐܕ̈ܶܐ ܕܢܽܘܗܪܳܐ ܡܶܬܬܰܨܡܚܺܝܢܰܢ ܢܫܰܒܰܚ ܠܛܰܝܒܽܘܬܳܐ ܕܺܝܠܳܟ ܘܕܰܐܒܽܘܟ ܘܰܕܪܽܘܚܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ܀
ܩܠܐ ܒܩ̄: ܩܽܘܩܳܝܳܐ
ܝܳܐܶܐ ܗ̱ܘܳܐ ܠܰܒܬܽܘ̈ܠܳܬܳܐ ܟܰܕ ܠܰܡܦܺܝ̈ܕܶܐ ܛܥܶܢ̈ܝ̱܆ ܘܡܶܢ ܕܰܐܘܚܰܪ ܚܰܬܢܳܐ ܕܢܺܐܬܶܐ ܢܳܡ̈ܝ̱ ܟܽܠܗܶܝܢ ܘܰܕܡܶܟ̈ܝ̱. ܚܰܡܶܫ ܡܶܢܗܶܝܢ ܣܰܓܺܝ ܣܰܟ̈ܠܳܢ ܗ̱ܘܰܝ̈܆ ܘܚܰܡܶܫ ܡܶܢܗܶܝܢ ܛܳܒ ܚܰܟܺܝ̈ܡܳܢ ܗ̱ܘܰܝ̈܆ ܘܰܗܘܳܐ ܩܳܠܳܐ ܬܰܩܺܝܦܳܐ ܕܗܳܐ ܚܰܬܢܳܐ ܐܳܬܶܐ܆ ܚܰܟܺܝ̈ܡܳܬܳܐ ܥܰܠ̈ܝ̱ ܥܰܡܶܗ ܘܣܰܟ̈ܠܳܬܳܐ ܐܶܣܬܠܺܝ̈ܝ̱ ܗ̄ ܡܳܪܰܢ ܚܽܘܣ ܥܠܰܝܢ܀
ܫܽܘܒܚܳܐ
ܢܶܙܥܩܽܘܢ ܝܰܘܡܳܢ ܫܺܝܦܽܘܪ̈ܶܐ ܐܰܠܳܗܳܝ̈ܶܐ. ܘܰܕܠܳܐ ܫܶܠܝܳܐ ܢܚܰܓܶܐ ܠܶܗ ܠܘܰܥܕܶܗ ܕܰܡܪܰܝܡܳܐ܆ ܕܒܶܗ ܐܶܬܬܢܺܝܚܢܰܢ܆ ܡܶܢ ܓ̈ܰܠ̱ܠܶܐ ܫܓܺܝ̈ܫܶܐ܆ ܒܢܰܘܚܳܐ ܕܺܐܝܬܰܘܗ̱ܝ ܩܝܳܡܬܶܗ ܕܺܝܚܺܝܕܳܐ܆ ܘܥܰܡ ܚܰܕܽܘܬܳܐ ܢܶܫܬܰܥܶܐ ܬܶܕܡܪ̈ܳܬܶܗ ܕܡܳܪܝܳܐ܆ ܕܰܒܚܽܘܒܶܗ ܐܶܬܳܐ ܘܦܰܪܩܰܢ ܘܠܰܠܡܺܐܢܳܐ ܐܰܫܘܰܝܢ ܗ̄ ܫܽܘܒܚܳܐ ܠܫܳܠܽܘܚܶܗ܀
ܒ̈ܳܬܶܐ ܕܚܰܫܳܐ
ܒܪܺܝܟ ܡܳܪܝ̱ ܚܰܫܳܟ ܕܰܗܘܳܐ ܚܠܳܦܰܝܢ܆ ܒܪܺܝܟ ܡܽܘܟܳܟܳܟ ܡܶܛܽܠܳܬܰܢ܀
ܠܡܺܐܢܳܐ ܕܚܰܝ̈ܶܐ ܐܺܝܬܰܘܗ̱ܝ ܚܰܫܶܗ܆ ܕܒܰܪ ܐܰܠܳܗܳܐ ܠܰܕܚܳܐܰܪ ܒܶܗ܆ ܘܡܶܬܒܰܩܶܐ ܒܶܗ. ܕܰܐܝܟܰܢ ܚܰܘܺܝ܆ ܐܳܦ ܐܰܠܶܦ ܠܰܢ ܥܒ̈ܳܕܶܐ ܛܳܒ̈ܶܐ܆ ܚܽܘܒܳܐ ܘܪ̈ܰܚܡܶܐ ܘܣܰܒܪܳܐ ܛܳܒܳܐ܀
ܒܰܒܬܽܘ̈ܠܳܬܳܐ ܨܳܪ ܘܚܰܘܺܝ ܠܰܢ܆ ܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ܆ ܬܰܘ ܢܶܬܕܰܡܶܐ܆ ܘܡܶܫܚܳܐ ܢܶܣܰܒ܆ ܥܒ̈ܳܕܶܐ ܛܳܒ̈ܶܐ ܕܥܰܡܶܗ ܕܚܰܬܢܳܐ܆ ܢܶܥܽܘܠ ܠܰܥܕܶܝܢ ܗܳܝ ܕܰܠܥܳܠܰܡ܀
ܫܽܘܒܚܳܐ ܢܰܣܶܩ ܠܚܰܬܢܳܐ ܕܚܳܕܶܐ܆ ܕܟܽܠܗܽܘܢ ܥܰܡ̱̈ܡܶܐ ܥܰܡܶܗ ܢܶܚܕܽܘܢ܆ ܒܓܰܘ ܡܶܫܬܽܘܬܶܗ܆ ܘܡܶܛܽܠ ܗܳܕܶܐ܆ ܕܰܢܚܰܦܶܛ ܠܰܢ ܕܥܰܡܶܗ ܢܶܚܕܶܐ܆ ܨܳܪ ܠܰܢ ܛܽܘܦܣܳܐ ܕܰܒܬܽܘ̈ܠܳܬܳܐ܀
ܡܳܐ ܕܕܳܝܢܰܬ ܠܶܗ ܠܥܰܡܳܐ ܕܕܳܢܽܘܟ܆ ܠܕܺܝܢܳܐ ܥܰܡܰܢ ܡܳܪܝ̱ ܠܳܐ ܬܶܥܽܘܠ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ̱ ܝܰܥܩܽܘܒ
(ܕܥܰܠ ܒܬܽܘ̈ܠܳܬܳܐ)
ܡܰܬܠܳܐ ܪܰܒܳܐ ܟܰܕ ܡܰܠܶܦ ܗ̱ܘܳܐ ܒܰܪ ܐܰܠܳܗܳܐ܆ ܕܒܶܗ ܢܰܘܕܰܥ ܠܰܢ ܥܰܠ ܡܶܐܬܺܝܬܶܗ ܘܛܶܒܳܐ ܕܽܐܘܪܚܶܗ܆ ܗܳܟܰܢ ܕܳܡܝܳܐ ܡܰܠܟܽܘܬܳܐ ܠܰܡ ܗܳܝ ܕܰܫܡܰܝܳܐ܆ ܠܰܒܬܽܘ̈ܠܳܬܳܐ ܥܣܰܪ ܕܰܢܣܰܒ̈ܝ̱ ܗ̱ܘܰܝ̈ ܠܰܡܦܺܐܕܰܝ̈ܗܶܝܢ܆ ܘܰܢܦܰܩ̈ܝ̱ ܠܽܐܘܪܥܶܗ ܕܚܰܬܢܳܐ ܡܰܠܟܳܐ ܕܢܶܥ̈ܠܳܢ ܥܰܡܶܗ܆ ܠܒܶܝܬ ܡܶܫܬܽܘܬܳܐ ܗܳܝ ܕܰܡܛܰܝܒܳܐ ܠܟܽܠ ܩܰܕܺܝ̈ܫܶܐ܀
ܫܽܘܒܚܳܐ ܠܰܐܒܳܐ ܕܨܳܪܶܗ ܠܥܳܠܡܳܐ ܒܰܒܬܽܘ̈ܠܳܬܳܐ܆ ܘܣܶܓܕܬܳܐ ܠܰܒܪܳܐ ܕܗܽܘ ܥܒܰܕ ܗܽܘ ܠܶܗ ܚܰܬܢܳܐ ܕܩܽܘܫܬܳܐ܆ ܬܰܘܕܺܝ ܠܪܽܘܚܳܐ ܕܰܠܕܰܟ̈ܝܳܬܳܐ ܘܚܰܟܺܝ̈ܡܳܬܳܐ܆ ܡܰܥܶܠ ܥܰܡܶܗ ܠܰܓܢܽܘܢ ܢܽܘܗܪܳܐ ܡܠܶܐ ܚܰܕ̈ܘܳܬܳܐ܆ ܘܰܠܣܰܟ̈ܠܳܬܳܐ ܛܳܪܶܕ ܡܰܣܠܶܐ ܕܠܳܐ ܢܶܬܩܰܒ̈ܠܳܢ܆ ܘܚܰܕܽ ܗ̱ܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀
ܙܽܘܡܳܪܳܐ
ܐܰܨܕܶܬ ܪܶܥܝܳܢܝ̱ ܕܶܐܬܒܰܩܶܐ܆ ܒܚܰܫܶܗ ܪܰܒܳܐ ܕܦܳܪܽܘܩܰܢ܆ ܟܰܕ ܩܳܐܶܡ ܒܶܝܬ ܓܰܝ̈ܳܣܶܐ. ܘܰܡܒܰܙܚܺܝܢ ܒܶܗ ܟܳܦܽܘܪ̈ܶܐ܆ ܗܳܐ ܚܰܢܳܢ ܡܶܬܠܰܚܰܡ ܠܶܗ ܘܩܰܝܳܦܳܐ ܕܰܡܒܰܙܰܚ ܒܶܗ܆ ܒܪܺܝܟ ܚܰܫܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܡܶܛܽܠܬܰܢ܀
ܩܶܪ̈ܝܳܢܶܐ:
ܐܶܪܰܡܝܳܐ. ܝܚ: ܝܚ ــ ܟܒ Jeremiah 18:18-22
ܦܪܰܟܣܺܝܣ. ܓ: ܟܒ ــ ܟܘ Acts 3:22-26
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ.
ܗ: ܝܒ ـ ܝܕ Hebrew 5:12-14
ܚܰܝܳܒܺܝܢ ܗ̱ܘܰܝܬܽܘܢ ܓܶܝܪ ܡܰܠ̈ܦܳܢܶܐ ܠܡܶܗܘܳܐ: ܡܶܛܽܠ ܕܙܰܒܢܳܐ ܠܟܽܘܢ ܒܝܽܘܠܦܳܢܳܐ܂ ܗܳܫܳܐ ܕܶܝܢ ܬܽܘܒ ܣܢܺܝܩܺܝܢ ܐܢ݈ܬܽܘܢ ܕܬܺܐܠܦܽܘܢ܇ ܐܰܝܠܶܝܢ ܐܶܢܶܝܢ ܟܬܺܝ̈ܒܳܬܳܐ ܩܰܕܡܳܝ̈ܳܬܳܐ ܕܪܺܝܫ ܡܶܠܰܘ̈ܗ݈ܝ ܕܰܐܠܳܗܳܐ. ܘܰܗܘܰܝܬܽܘܢ ܠܟܽܘܢ ܣܢܺܝ̈ܩܶܐ ܥܰܠ ܚܰܠܒܳܐ ܘܠܳܐ ܥܰܠ ܡܶܐܟܽܘܠܬܳܐ ܫܰܪܺܝܪܬܳܐ. ܟܽܠܢܳܫ ܕܶܝܢ ܕܡܶܐܟܽܘܠܬܶܗ ܚܰܠܒܳܐ ܗ݈ܘ: ܠܳܐ ܡܰܦܰܣ ܒܡܶܠܬܳܐ ܕܟܺܐܢܽܘܬܳܐ܁ ܡܶܛܽܠ ܕܫܰܒܪܳܐ ܗ݈ܘ܂ ܕܰܓܡܺܝܪ̈ܶܐ ܗ݈ܝܺ ܕܶܝܢ ܡܶܐܟܽܘܠܬܳܐ ܫܰܪܺܝܪܬܳܐ ܐܰܝܠܶܝܢ ܕܡܶܛܽܠ ܕܰܡܕܰܪܫܺܝܢ܇ ܐܶܬܢܰܦܰܩܘ ܪ̈ܶܓܫܰܝܗܽܘܢ ܠܡܶܦܪܰܫ ܛܳܒܬܳܐ ܘܒܺܝܫܬܳܐ܀
ܗܽܘܠܳܠܳܐ ܘܦܶܬܓܳܡܳܐ
ܦܬܰܚ ܠܺܝ ܬܰܪ̈ܥܶܐ ܕܙܰܕܺܝܩܽܘܬܳܐ. ܕܶܐܥܽܘܠ ܒܗܽܘܢ ܘܰܐܘܕܶܐ ܠܡܳܪܝܳܐ ܗ̄
ܐܶܘܰܢܓܶܠܝܽܘܢ ܒܡܰܬܰܝ
(ܟܗ: ܐ ـ ܝܓ Matthew 25:1-13)
ܗܳܝܕܶܝܢ ܬܶܬܕܰܡܶܐ ܡܰܠܟܽܘܬܳܐ ܕܰܫܡܰܝܳܐ ܠܰܥܣܰܪ ܒܬܽܘ̈ܠܳܢ. ܗܳܢܶܝܢ ܕܰܢܣܰܒ̈ܝ̱ ܠܰܡܦܺܕܰܝ̈ܗܶܝܢ܁ ܘܰܢܦܰܩ̈ܝ̱ ܠܽܐܘܪܰܥ ܚܰܬܢܳܐ ܘܟܰܠܬܳܐ. ܚܰܡܶܫ ܕܶܝܢ ܡܶܢܗܶܝܢ ܚܰܟܺܝ̈ܡܳܢ ܗ݈ܘܰܝ̈ ܘܚܰܡܶܫ ܣܰܟ̈ܠܳܢ. ܘܗܳܢܶܝܢ ܣܰܟ̈ܠܳܬܳܐ܂ ܢܣܰܒ̈ܝ̱ ܠܰܡܦܺܕܰܝ̈ܗܶܝܢ܂ ܘܠܳܐ ܢܣܰܒ̈ܝ̱ ܥܰܡܗܶܝܢ ܡܶܫܚܳܐ. ܗܳܢܶܝܢ ܕܶܝܢ ܚܰܟܺܝ̈ܡܳܬܳܐ܂ ܢܣܰܒ̈ܝ̱ ܡܶܫܚܳܐ ܒܡܳܐܢ̈ܶܐ܂ ܥܰܡ ܠܰܡܦܺܕܰܝ̈ܗܶܝܢ. ܟܰܕ ܐܰܘܚܰܪ ܕܶܝܢ ܚܰܬܢܳܐ܂ ܢܳܡ̈ܝ̱ ܟܽܠܗܶܝܢ܂ ܘܰܕܡܶܟ̈ܝ̱. ܘܰܒܦܶܠܓܶܗ ܕܠܺܠܝܳܐ ܗܘܳܬ ܩܥܳܬܳܐ. ܗܳܐ ܚܰܬܢܳܐ ܐܳܬܶܐ ܦܽܘܩܘ ܠܽܐܘܪܥܶܗ. ܗܳܝܕܶܝܢ ܩܳܡ ܟܽܠܗܶܝܢ ܒܬܽܘ̈ܠܳܬܳܐ ܗܳܠܶܝܢ. ܘܬܰܩܶܢ̈ܝ̱ ܠܰܡܦܺܕܰܝ̈ܗܶܝܢ. ܐܳܡܪ̈ܳܢ ܕܶܝܢ ܗܳܢܶܝܢ ܣܰܟ̈ܠܳܬܳܐ ܠܚܰܟܺܝ̈ܡܳܬܳܐ: ܗܰܒܶܝ̈ܢ ܠܰܢ ܡܶܢ ܡܶܫܚܟܶܝܢ܂ ܕܗܳܐ ܕܥܶܟܘ ܠܗܽܘܢ ܠܰܡܦܺܕܰܝ̈ܢ܂ ܥܢܰܝ̈ ܗܳܠܶܝܢ ܚܰܟܺܝ̈ܡܳܬܳܐ ܘܳܐܡܪ̈ܳܢ. ܠܡܳܐ ܠܳܐ ܢܶܣܦܰܩ ܠܰܢ ܘܰܠܟܶܝܢ. ܐܶܠܳܐ ܙܶܠܶܝ̈ܢ ܠܘܳܬ ܐܰܝܠܶܝܢ ܕܰܡܙܰܒܢܺܝܢ. ܘܰܙܒܶܢܶܝ̈ܢ ܠܟܶܝܢ. ܘܟܰܕ ܐܶܙܰܠ̈ܝ̱ ܠܡܶܙܒܰܢ܆ ܐܶܬܳܐ ܚܰܬܢܳܐ܂ ܘܰܐܝܠܶܝܢ ܕܰܡܛܰܝ̈ܒܳܢ ܗ݈ܘܰܝ̈܂ ܥܰܠܝ̈ ܥܰܡܶܗ܁ ܠܒܶܝܬ ܚܠܽܘܠܳܐ ܘܶܐܬܬܚܶܕ ܬܰܪܥܳܐ. ܒܚܰܪܬܳܐ ܕܶܝܢ ܐܶܬܰܝ̈ ܐܳܦ ܗܳܢܶܝܢ ܒܬܽܘ̈ܠܳܬܳܐ ܐ݈ܚܪ̈ܳܢܝܳܬܳܐ܂ ܘܳܐܡܪ̈ܳܢ: ܡܳܪܰܢ ܡܳܪܰܢ ܦܬܰܚ ܠܰܢ! ܗܽܘ ܕܶܝܢ ܥܢܳܐ ܘܶܐܡܰܪ ܠܗܶܝܢ: ܐܰܡܺܝܢ ܐܳܡܰܪ ܐ݈ܢܳܐ ܠܟܶܝܢ܆ ܕܠܳܐ ܝܳܕܰܥ ܐ݈ܢܳܐ ܠܟܶܝܢ. ܐܶܬܬܥܺܝܪܘ ܗܳܟܺܝܠ. ܕܠܳܐ ܝܳܕܥܺܝܢ ܐܢ݈ܬܽܘܢ ܠܝܰܘܡܳܐ ܗܰܘ܂ ܘܠܳܐ ܠܫܳܥܬܳܐ܀
ܩܠܐ ܒܩ̄: ܩܽܘܩܰܠܝܽܘܢ ܫܬܺܝܬܳܝܳܐ
ܡܳܪܝܳܐ ܫܡܰܥ ܨܠܽܘܬܝ̱ ܗ̄ ܘܰܓܥܳܬܝ̱ ܠܘܳܬܟ ܬܶܥܽܘܠܝ܀
ܕܰܓܡܰܪܘ̱ ܒܬܽܘܢܳܢܳܐ ܝܰܘ̈ܡܰܝ ܗ̄ ܘܓܰܪ̈ܡܰܝ ܚܘܰܪܘ̱ ܐܰܝܟ ܡܰܘ̈ܩܕܶܐ܀
ܩܠܐ ܒܩ̄: ܩܽܘܡ ܦܰܘܠܳܘܣ ܫܒܺܝܥܳܝܳܐ
ܦܬܰܚ ܠܺܝ ܡܳܪܝ. ܬܰܪܥܳܟ ܡܠܶܐ ܪ̈ܰܚܡܶܐ܆ ܐܰܝܟ ܕܰܦܬܰܚܬ ܩܽܘܕܡܰܬ ܚܰܛܳܝܬܳܐ܆ ܩܰܒܶܠ ܡܶܢܝ̱ ܕܶܡ̈ܥܶܐ ܕܝܳܗܶܒ ܐ̱ܢܳܐ܆ ܘܗܰܒ ܐܰܢ̱ܬ ܠܺܝ ܫܽܘܒܩܳܢܳܐ ܕܚܰܘ̈ܒܶܐ܆ ܠܳܟ ܡܰܝ̈ܳܐ ܚܰܝ̈ܶܐ܆ ܫܶܩܠܶܬ ܗ̱ܘܺܝܬ ܒܰܠܘܺܝܬܝ̱ ܕܠܳܐ ܐܶܒܥܶܐ ܬܰܡܳܢ܆ ܡܰܝ̈ܳܐ ܡܶܢ ܐܰܒܪܰܡ܆ ܕܰܫܡܺܝܥ ܠܺܝ ܫܰܪܒܶܗ ܕܥܰܬܺܝܪܳܐ܆ ܟܰܕ ܫܶܐܠ ܗ̱ܘܳܐ ܡܰܝ̈ܳܐ ܒܪܺܝܫ ܚܶܨܪܶܗ܀
ܬܽܘܒ ܡܰܩܦܺܝܢ ܠܩ̈ܳܠܶܐ ܗܳܠܶܝܢ:
ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܆ ܘܡܶܢ ܒܶܝܬ ܓܰܙܳܟ ܪ̈ܰܚܡܶܐ ܫܳܐܶܠ ܐ̱ܢܳܐ. ܚܰܛܳܝܳܐ ܐ̱ܢܳܐ ܕܰܫ̈ܢܰܝܳܐ ܣܛܺܝܬ ܡܶܢ ܐܽܘܪܚܳܟ. ܗܰܒ ܠܺܝ ܕܰܐܘܕܶܐ ܒܰܚ̈ܛܳܗܰܝ ܘܶܐܥܒܰܪ ܡܶܢܗܽܘܢ܆ ܘܺܐܚܶܐ ܒܛܰܝܒܽܘܬܳܟ܀
ܒܰܬܪܰܥ ܡܰܢ ܢܺܐܙܰܠ ܢܶܩܽܘܫ܆ ܐܶܠܳܐ ܒܬܰܪܥܳܟ ܚܰܢܳܢܳܐ ܡܳܪܰܢ. ܘܡܰܢܽܘ ܐܺܝܬ ܠܰܢ ܕܰܢܦܺܝܣܳܟ ܥܰܠ ܣܰܟܠܽܘܬܰܢ܆ ܐܶܢ ܪ̈ܰܚܡܰܝܟ ܠܳܐ ܢܦܺܝܣܽܘܢܳܟ܆ ܡܰܠܟܳܐ ܕܡܰܠ̈ܟܶܐ ܣܳܓܕܺܝܢ ܠܺܐܝܩܳܪܶܗ܀
ܫܽܘܒܚܳܐ
ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܆ ܗܘܺܝ ܠܰܢ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ܆ ܡܶܢ ܒܺܝܫܳܐ ܘܚܰܝ̈ܠܰـܘܳܬܶܗ ܕܡܰܩܪܶܒ ܥܰܡܰܢ. ܒܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ܆ ܡܳܐ ܕܡܶܬܦܰܪܫܺܝܢ ܛܳܒ̈ܶܐ ܡܶܢ ܒܺܝ̈ܫܶܐ܀
ܡܶܢ ܥܳܠܰܡ
ܢܶܗܘܶܐ ܩܳܠܳܐ ܕܰܨܠܽܘܬܰܢ ܩܠܺܝܕܳܐ ܕܦܳܬܰܚ ܬܰܪ̈ܥܶܐ ܕܰܫܡܰܝܳܐ܆ ܘܢܺܐܡܪܽܘܢ ܪ̈ܰܒܰܝ ܡܰܠܰܐܟ̈ܶܐ ܡܶܢ ܣܶܕܪ̈ܰܝܗܽܘܢ: ܟܡܳܐ ܒܰܣܺܝܡ ܩܳܠ ܥܰܦܪ̈ܳܢܶܐ܆ ܕܡܳܪܝܳܐ ܡܦܰܢܶܐ ܒܰܥܓܰܠ ܫ̈ܶܐܠܳܬܗܽܘܢ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ̱ ܐܰܦܪܶܝܡ
ܡܳܪܰܢ ܐܶܬܪܰܚܰܡܥܠܰܝܢ܆ ܡܳܪܰܢ ܩܰܒܶܠ ܬܶܫܡܶܫܬܰܢ܆ ܫܰܕܰܪ ܠܰܢ ܡܶܢ ܒܶܝܬܓܰܙܳܟ܆ ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀
ܒܠܺܠܝܳܐ ܢܰܘܕܽܘܢ ܬܰܚ̈ܬܳܝܶܐ܆ ܒܥܺܝܪܽܘܬܳܐ ܥܰܡ ܥܶܠܳܝ̈ܶܐ܆ ܘܢܰܣܩܽܘܢ ܩܳܠܰܝ̈ ܬܶܫܒܽܘܚܬܳܐ܆ ܠܥܺܝܪܳܐ ܕܡܶܡܬܽܘܡ ܠܳܐ ܕܳܡܶܟ܀
ܥܺܝܪܽܘܬܳܐ ܕܰܒܬܽܘ̈ܠܳܬܳܐ܆ ܚܰܟܺܝ̈ܡܳܬܳܐ ܫܰܟܶܢ ܠܰܢ܆ ܕܡܳܐ ܕܳܐܬܶܝܬ ܒܦܶܠܓܶܗ ܕܠܺܠܝܳܐ܆ ܥܰܡܳܟ ܢܶܥܽܘܠ ܠܰܓܢܽܘܢܳܐ܀
ܘܡܶܚܕܳܐ ܒܳܪܟܺܝܢ ܩܕܳܡ ܬܰܪܥܳܐ ܕܡܰܕܒܚܳܐ ܟܽܠܗܽܘܢ ܘܓܳܠܶܝܢ ܪ̈ܺܝܫܰܝܗܽܘܢ ܘܐܳܡܪܺܝܢ ܒܠܶܒܳܐ ܚܢܺܝܓܳܐ ܐܰܪܒܥܺܝܢ ܙܰܒܢܺܝ̈ܢ:
ܩܽܘܪܝܶܐܠܰܝܣܳܘܢ܀ ܡܳܪܰܢ ܐܶܬܪܰܚܰܡܥܠܰܝܢ܀ ܡܳܪܰܢ ܚܽܘܣ ܘܪܰܚܶܡܥܠܰܝܢ܀ ܡܳܪܰܢ ܥܢܺܝܢ ܘܪܰܚܶܡܥܠܰܝܢ܀
ܒܟܽܠ ܙܒܰܢ̱ܬܳܐ ܣܳܝܡܺܝܢ ܒܽܘܪܟܳܐ ܥܕܰܡܳܐ ܠܰܐܪܥܳܐ. ܒܳܬܰܪܟܶܢ ܐܳܡܪܺܝܢ ܒܚܰܫܳܐ ܘܟܰܪܝܽܘܬܳܐ ܘܰܬܘܳܬܳܐ ܬܠܳܬ ܙܰܒܢܺܝ̈ܢ:
ܥܰܠ ܗܰܘ ܬܰܪܥܳܐ ܒܰܪܳܝܐ܆ ܝܳܬܶܒ ܗ̱ܘܳܐ ܫܶܡܥܽܘܢ ܘܒܳܟܶܐ܆ ܪܰܒܺܝ ܦܬܰܚ ܬܰܪܥܳܟ܆ ܕܶܐܢܰܐ ܗ̱ܘ ܬܰܠܡܺܝܕܳܟ܆ ܫܡܰܝܳܐ ܘܰܐܪܥܳܐ ܥܠܰܝ ܢܶܒܟܽܘܢ܆ ܕܰܩܠܺܝ̈ܕܶܐ ܕܡܰܠܟܽܘܬܳܐ ܐܰܘܒܕܶܬ܀
ܗܳܝܕܶܝܢ ܩܳܪܶܒ ܟܳܗܢܳܐ ܠܘܳܬ ܬܰܪܥܳܐ ܟܰܕ ܐܰܚܺܝܕ ܒܺܐܝܕܶܗ ܨܠܺܝܒܳܐ܆ ܘܢܳܩܶܫ ܘܳܐܡܰܪ:
ܡܳܪܰܢ ܡܳܪܰܢ ܡܳܪܰܢ ܦܬܰܚ ܠܰܢ ܬܰܪܥܳܟ܀
ܗܳܪܟܳܐ ܡܰܢܗܪܺܝܢ ܠܢܰܗܺܝܪ̈ܶܐ܆ ܘܡܶܚܕܳܐ ܡܶܬܦܬܰܚ ܘܺܐܠܳܐ ܘܥܳܐܠܺܝܢ ܠܡܰܕܒܚܳܐ ܟܰܕ ܐܳܡܪܺܝܢ܆
ܛܽܘܒܰܝܗܽܘܢ ܠܥܰܒ̈ܕܶܐ ܛܳܒ̈ܶܐ ܡܳܐ ܕܳܐܬܶܐ ܡܳܪܗܽܘܢ. ܡܶܫܟܰܚ ܠܗܽܘܢ ܟܰܕ ܥܺܝܪܺܝܢ ܘܰܒܟܰܪܡܶܗ ܦܳܠܚܺܝܢ. ܐܳܣܰܪ ܚܰܨܰܘ̈ܗ̱ܝ ܘܰܡܫܰܡܶܫ ܠܗܽܘܢ. ܕܰܠܐܝܺܘ ܥܰܡܶܗ ܡܶܢ ܨܰܦܪܳܐ ܠܪܰܡܫܳܐ. ܐܰܒܳܐ ܡܰܣܡܶܟ ܦܰܠܳܚܰܘ̈ܗ̱ܝ ܘܰܒܪܳܐ ܡܫܰܡܶܫ ܠܗܽܘܢ. ܪܽܘܚ ܩܽܘܕܫܳܐ ܦܰܪܰܩܠܺܝܛܳܐ ܟܠܺܝܠܰܝ̈ܗܽܘܢ ܓܳܕܠܳܐ ܗ̄ ܘܣܳܝܡܳܐ ܒܪ̈ܺܝܫܰܝܗܽܘܢ܀
ܘܩܳܪܶܝܢ ܡܺܐܡܪܳܐ ܕܡܳܪܝ̱ ܐܺܝܘܰܢܢܺܝܣ ܕܥܰܠ ܢܰܗܺܝܪ̈ܶܐ. ܘܰܡܬܰܪܓܡܺܝܢ ܥܰܠ ܢܺܝܫܳܐ ܕܝܰܘܡܳܐ.
ܫܠܶܡ ܛܶܟܣܳܐ ܕܘܰܥܕܶܗ ܕܰܠܡܺܐܢܳܐ