ܛܟܣܐ ܕܫܝܓܬܐ ܐ̱ܪܙܢܝܬܐ
ܫܡܳܗ̈ܶܐ ܕܰܫܠܺܝ̈ܚܶܐ
ܐ܇ ܫܶܡܥܽܘܢ ܦܶܛܪܳܘܣ. ܒ܇ ܐܰܢܕܪܶܐܘܳܣ ܐܰܚܽܘܗ̱ܝ. ܓ܇ ܝܰܥܩܽܘܒ ܒܰܪ ܙܰܒܕܰܝ. ܕ܇ ܝܽܘܚܰܢܳܢ ܐܰܚܽܘܗ̱ܝ. ܗ܇ ܦܺܝܠܺܝܦܳܘܣ. ܘ܇ ܒܰܪ ܬܽܘܠܡܰܝ. ܙ܇ ܬܳܐܘܡܰܐ. ܚ܇ ܡܰܬܰܝ. ܛ܇ ܝܰܥܩܽܘܒ ܒܰܪ ܚܰܠܦܰܝ. ܝ܇ ܬܰܕܰܐܳܘܣ.1 ܝܐ܇ ܫܶܡܥܽܘܢ ܩܢܳܢܳܝܳܐ. ܝܒ܇ ܝܺܗܽܘܕܳܐ ܐܰܚܽܘܗ̱ܝ ܕܝܰܥܩܽܘܒ.2 ܝܓ܇ ܡܰܬܺܝܰܐܣ.
1: ܬܰܕܰܐܽܘܣ ܘܺܝܗܽܘܕܳܐ ܐܰܚܽܘܗ̱ܝ ܕܝܰܥܩܽܘܒ ܚܰܕ ܐܶܢܽܘܢ
2: ܗܳܢܳܐ ܘܬܰܕܰܐܳܘܣ ܚܰܕ ܐܶܢܽܘܢ
ܢܽܘܗܳܪܳܐ
ܗܳܢܽܘܢ ܠܰܡ ܕܰܡܛܰܝܒܺܝܢ ܠܡܶܬܬܫܳܓܘ ܢܶܬܒܽܘܢ ܥܰܠ ܬܪܶܥܣܰܪ ܟܽܘܪ̈ܣܰܘܳܬܳܐ ܩܕܳܡ ܡܰܕܒܚܳܐ ܟܰܕ ܓܠܶܝܢ ܪ̈ܺܝܫܰܝܗܽܘܢ ܘܰܐܦܰܝ̈ܗܽܘܢ ܠܡܰܕܢܚܳܐ ܘܟܽܠ ܚܰܕ ܡܶܢܗܽܘܢ ܩܶܪܝܽܘܢܳܐ ܕܢܰܗܺܝܪ ܐܰܚܺܝܕ ܒܐܺܝܕܶܗ. ܘܒܰܡܨܰܥܬܳܐ ܠܰܩܢܳܐ ܘܰܐܒܪܺܝܩܳܐ ܕܡܰܝ̈ܳܐ ܢܶܬܬܣܺܝܡܽܘܢ. ܗܰܘ ܕܶܝܢ ܕܠܰܫܝܳܓܬܳܐ ܗܳܕܶܐ ܡܫܰܡܠܶܐ ܐܶܢ ܪ̈ܺܝܫܟܳܗܢܶܐ ܗ̱ܘܽ ܐܰܘ ܩܰܫܺܝܫܳܐ܆ ܢܶܬܶܒ ܥܰܠ ܟܽܘܪܣܝܳܐ ܒܣܶܛܪܶܗ ܕܶܐܘܰܢܓܶܠܝܽܘܢ ܕܒܰܦܢܺܝܬܳܐ ܬܰܝܡܢܳܝܬܳܐ. ܘܢܶܬܒܽܘܢ ܠܰܫܝܳܓܬܳܐ ܐܰܪܒܥܳܐ ܩܰܫܺܝ̈ܫܶܐ. ܐܰܪܒܥܳܐ ܡܫܰܡ̈ܫܳܢܶܐ ܘܰܐܪܒܥܳܐ ܐܰܦܽܘܕܝܰܩ̈ܢܽܘ. ܘܟܰܕ ܡܫܰܪܶܝܢ ܒܗܽܘܠܳܠܳܐ ܕܶܐܘܰܢܓܶܠܝܽܘܢ܆ ܢܶܬܶܒ ܗܰܘ ܕܰܡܫܰܡܠܶܐ ܠܰܫܝܳܓܬܳܐ ܗܳܕܶܐ ܥܰܠ ܟܽܘܪܣܝܳܐ ܥܕܰܡܳܐ ܕܢܺܐܡܰܪ ܩܳܪܽܘܝܳܐ ܕܶܐܘܰܢܓܶܠܝܽܘܢ «ܘܩܳܡ ܡܶܢ ܚܫܳܡܺܝܬܳܐ» ܗܳܝܕܶܝܢ ܡܫܰܪܶܐ ܒܰܫܝܳܓܬܳܐ ܡܶܢ ܙܥܽܘܪܳܐ ܥܕܰܡܳܐ ܠܪܰܒܳܐ܆ ܘܡܶܢ ܦܢܺܝܬܳܐ ܬܰܝܡܢܳܝܬܳܐ ܥܕܰܡܳܐ ܕܢܶܡܛܶܐ ܠܗܳܝ ܓܰܪܒܝܳܝܬܳܐ.
ܫܶܡܥܽܘܢ ܦܶܛܪܽܘܣ: ܐܺܝܬܰܘܗ̱ܝ ܪܰܒܳܐ ܕܰܫܠܺܝ̈ܚܶܐ. ܘܰܐܝܟ ܪܶܥܝܳܢܳܐ ܕܐ̱ܢܳܫܺܝ̈ܢ܆ ܕܫܶܡܥܽܘܢ ܕܝܰܬܺܝܒ ܠܰܫܝܳܓܬܳܐ܆ ܙܳܕܶܩ ܕܢܶܗܘܶܐ ܟܳܗܢܳܐ ܡܙܰܘܓܳܐ ܘܠܰܘ ܕܰܝܪܳܝܳܐ ܒܬܽܘܠܳܐ. ܘܗܰܘ ܕܰܡܫܰܡܠܶܐ ܠܬܶܫܡܶܫܬܳܐ ܕܰܫܝܳܓܬܳܐ ܡܫܺܝܓ ܠܪܶܓܠܳܐ ܕܝܰܡܺܝܢܳܐ ܕܟܽܠ ܚܰܕ ܡܶܢܗܽܘܢ ܘܰܡܟܰܦܰܪ ܠܳܗ̇ ܒܫܽܘܫܶܦܳܐ ܕܰܟܒܺܝܢ ܒܚܰܨܰܘ̈ܗ̱ܝ ܟܶܢ ܪܳܫܶܡ ܥܠܶܝܗ̇ ܐܳܬܳܐ ܕܰܨܠܺܝܒܳܐ ܒܡܶܫܚܳܐ. ܟܶܢ ܡܢܰܫܶܩ ܠܳܗ̇ ܘܰܡܫܰܢܶܐ ܠܘܳܬ ܐ̱ܚܪܺܢܳܐ܀
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܝܰܕ ܫܝܳܓܬܳܐ ܕܡܰܝ̈ܳܐ ܗܳܠܶܝܢ ܢܶܬܡܪܶܩ ܘܢܶܬܕܰܟܶܐ ܡܶܢ ܟܽܠܳܗ̇ ܡܰܪܺܝܪܽܘܬܳܐ ܘܒܺܝܫܽܘܬܳܐ ܕܳܐܟܶܠܩܰܪܨܳܐ. ܘܡܶܢ ܟܽܠܳܗ̇ ܨܳܐܽܘܬܳܐ ܘܛܽܘܠܫܳܐ ܕܰܚܛܺܝܬܳܐ܆ ܘܚܰܪܰܪ ܠܰܢ ܡܶܢ ܚܰܫ̈ܶܐ ܕܰܚܣܳܡܳܐ ܘܪܳܡܽܘܬܳܐ ܘܪܽܘܓܙܳܐ ܘܣܶܢܶܐܬܳܐ ܟܽܠܶܗ ܙܰܒܢܳܐ ܕܚܰܝܰܝ̈ܢ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܢܝܳܢܳܐ ܕܪܰܚܶܡܥܠܰܝ
ܩܠܐ ܒܩ̄: ܐܶܡܳܐ ܕܟܺܝܬܳܐ
ܗܰܘ ܕܰܣܪ̈ܳܦܶܐ ܒܕܶܚܠܳܐ ܡܩܰܕܫܺܝܢ ܠܶܗ܆ ܝܰܘܡܳܢ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ ܐܰܫܺܝܓ܆ ܪܰܚܶܡܥܠܰܝܢ ܐܰܠܳܗܳܐ܀
ܗܰܘ ܕܢܽܘܪ̈ܳܢܶܐ ܠܳܐ ܡܨܶܝܢ ܚܳܙܶܝܢ ܠܶܗ܆ ܝܰܘܡܳܢ ܐܰܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܪܰܚܶܡܥܠܰܝܢ ܐܰܠܳܗܳܐ܀
ܗܰܘ ܕܰܡܥܰܛܰܦ ܢܽܘܪܳܐ ܘܓܰܘܙܰܠܬܳܐ܆ ܚܙܰܩ ܣܶܕܽܘܢܳܐ ܘܰܐܫܺܝܓ ܠܬܰܠܡܺܝ̈ܕܰܘܗ̱ܝ܆ ܪܰܚܶܡܥܠܰܝܢ ܐܰܠܳܗܳܐ܀
ܫܽܘܒܚܳܐ
ܫܽܘܒܚܳܐ ܠܰܐܒܳܐ ܕܫܰܕܰܪ ܠܺܝܚܺܝܕܶܗ. ܘܶܐܬܳܐ ܘܰܐܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܪܰܚܶܡܥܠܰܝܢ ܐܰܠܳܗܳܐ܀
ܕܰܐܠܳܗܝ̱ ܐܰܠܳܗܝ̱
ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ
ܒܪܺܝܟ ܕܰܐܪܡܺܝ ܡܰܝ̈ܳܐ ܒܠܰܩܢܳܐ܆ ܘܰܐܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܘܶܐܡܰܪ ܠܗܽܘܢ ܕܗܳܢܳܐ ܛܽܘܦܣܳܐ܆ ܗܘܰܝܬܽܘܢ ܥܳܒܕܺܝܢ ܠܰܚ̈ܕܳܕܶܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀
ܡܰܟܺܝܟܳܐܺܝܬ ܐܶܬܚܰܫܰܚ. ܦܳܪܽܘܩܰܢ ܥܰܡ ܬܰܠܡܺܝ̈ܕܰܘܗܝ܆ ܘܶܐܡܰܪ ܠܗܽܘܢ ܕܚܽܘܪܘ̱ ܒܺܝ ܘܝܺܠܰܦ܆ ܕܢܺܝܚ ܐ̱ܢܳܐ ܘܡܰܟܺܝܟ ܐ̱ܢܳܐ ܒܠܶܒܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀
ܫܽܘܒܚܳܐ
ܐܶܡܰܪ ܫܶܡܥܽܘܢ ܠܰܡܫܺܝܚܳܐ܆ ܠܥܳܠܰܡ ܪ̈ܶܓܠܰܝ ܠܳܐ ܡܫܺܝܓ ܐܰܢ̱ܬ܆ ܘܶܐܡܰܪ ܡܳܪܰܢ ܕܶܐܢ ܠܳܐ ܬܶܬܫܺܝܓ܆ ܐܳܦܠܳܐ ܡܢܳܬܳܐ ܐܺܝܬ ܠܳܟ ܥܰܡܝ̱܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀
ܫܡܰܝ̈ܳܐ ܡܶܫܬܰܥܶܝܢ (ܡܙܡܘܪܐ ܝܛ.ܐ)
ܒܩ̃: ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ
ܫܽܘܒܚܳܐ ܠܡܽܘܟܳܟܳܟ ܡܳܪܰܢ܆ ܕܥܺܝܪ̈ܶܐ ܒܪܰܘܡܳܐ ܡܫܰܡܫܺܝܢ ܠܳܟ܆ ܘܰܥܨܳܟ ܚܽܘܒܳܟ ܘܶܐܬܬܰܚܬܺܝܬ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܆ ܩܳܡܬ ܘܰܐܪܡܺܝܬ ܡܰܝ̈ܳܐ ܒܠܰܩܢܳܐ܆ ܘܰܐܫܺܝܓܬ ܪ̈ܶܓܠܶܐ ܕܬܰܠܡܺܝ̈ܕܰܝܟ܆ ܠܳܟ ܬܶܫܒܽܘܚܬܳܐ ܕܶܐܬܰܝܬ ܠܡܽܘܟܳܟܳܐ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀
ܫܽܘܒܚܳܐ
ܒܡܰܝ̈ܳܐ ܫܺܝ̈ܛܶܐ ܘܰܙܥܽܘܪ̈ܶܐ܆ ܡܰܫܚܳܗ̇ ܦܳܪܽܘܩܰܢ ܠܥܺܕܬܶܗ܆ ܘܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܆ ܗܺܝ ܘܝܰܠܕܶܝ̈ܗ̇ ܥܕܰܡܳܐ ܠܥܳܠܰܡ܆ ܒܪܺܝܟܽ ܗ̱ܘ ܪܳܡܳܐ ܕܶܐܬܬܰܚܬܺܝ܆ ܘܰܐܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܠܶܗ ܬܶܫܒܽܘܚܬܳܐ ܕܶܐܬܳܐ ܠܡܽܘܟܳܟܳܐ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀
ܕܬܶܫܒܽܘܚܬܳܐ ܚܕܰܬܳܐ (ܡܙܡܘܪܐ ܩܡܛ.ܐ ـ ܛ)
ܒܩ̃: ܝܰܘܡܳܢܳܐ
ܝܰܘܡܳܢܳܐ܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܆ ܬܗܰܪܘ̱ ܗ̱ܘܰܘ ܘܶܐܬܕܰܡܰܪܘ̱. ܒܗܰܘ ܥܶܕܳܢܳܐ ܕܰܚܙܰܐܘܽܗ̱ܝ ܗ̱ܘܰܘ ܠܡܳܪܳܐ ܕܟܽܠܳܐ. ܕܰܡܚܳܐ ܣܶܕܽܘܢܳܐ ܒܚܰܨܰܘ̈ܗ̱ܝ. ܘܰܡܫܺܝܓ ܠܬܰܠܡܺܝ̈ܕܰܘܗ̱ܝ܀
ܝܰܘܡܳܢܳܐ܆ ܬܗܰܪܘ̱ ܟܶܢ̈ܫܶܐ ܥܶܠܳܝ̈ܶܐ܆ ܘܓܽܘ̈ܕܶܐ ܕܡܰܠܰܐܟ̈ܶܐ܆ ܕܰܚܙܰܘ ܠܢܽܘܪܳܐ ܠܒܺܝܟܳܐ ܠܰܩܢܳܐ ܘܪ̈ܶܓܠܶܐ ܡܫܺܝܓܳܐ܆ ܕܥܰܦܪ̈ܳܢܶܐ ܕܰܓܒܰܠ̈ܝ̱ ܐܺܝܕܰܘ̈ܗ̱ܝ܆ ܫܽܘܒܚܳܐ ܠܡܽܘܟܳܟܶܗ܀
ܐܶܡܰܪ ܫܶܡܥܽܘܢ ܠܳܐ ܡܳܪܝ̱ ܠܳܐ ܡܳܪܝ̱܆ ܡܫܺܝܓ ܐܰܢ̱ܬ ܠܺܝ܆ ܙܰܘܥܰܐ ܗ̱ܘ ܠܺܝ ܪܰܒܳܐ܆ ܕܰܬܫܺܝܓ ܪ̈ܶܓܠܰܝ ܐܰܝܟ ܕܳܐܡܰܪ ܐܰܢ̱ܬ ܦܰܢܺܝ ܡܳܪܰܢ܆ ܕܶܐܢ ܠܳܐ ܫܳܡܰܥ ܐܰܢ̱ܬ ܫܶܡܥܽܘܢ܆ ܬܰܠܡܺܝܕܝ̱ ܠܳܐ ܐܺܝܬܰܝܟ܀
ܡܫܰܡܫܳܢܳܐ: ܣܛܳܘܡܶܢ ܩܰܠܳܘܣ ܩܽܘܪܝܶܠܰܝܣܳܘܢ܀
ܦܪܽܘܡܝܽܘܢ
ܟܳܗܢܳܐ: ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܰܟܝܳܢܶܗ ܕܶܐܬܬܰܚܬܺܝ ܠܡܽܘܟܳܟܳܐ ܒܨܶܒܝܳܢܶܗ܆ ܘܩܰܒܶܠ ܥܠܰܘܗ̱ܝ ܘܰܣܒܰܠ ܟܽܠܗܶܝܢ ܐ̱ܢܳܫܳܝ̈ܳܬܳܐ ܒܰܚܢܳܢܶܗ. ܘܫܰܡܠܺܝ ܡܕܰܒܪܳܢܽܘܬܳܐ ܕܰܚܠܳܦܰܝܢ ܒܛܰܝܒܽܘܬܶܗ܆ ܘܰܐܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ ܒܡܽܘܟܳܟܶܗ܆ ܘܰܐܠܶܦ ܐܶܢܽܘܢ ܐ̱ܪܳܙܳܐ ܟܰܣܝܳܐ ܕܡܶܬܢܰܚܬܳܢܽܘܬܶܗ ܘܝܰܗܒ ܠܗܽܘܢ ܦܽܘܩܕܳܢܳܐ ܕܰܫܪܳܪܳܐ ܕܢܰܫܠܡܽܘܢ ܠܥܺܕܬܶܗ܆ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܰܫܝܳܓܬܳܐ ܐ̱ܪܳܙܳܢܳܝܬܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܡܳܪܰܢ ܝܶܫܽܘܥ ܡܫܺܝܚܳܐ ܐܰܠܳܗܳܐ ܡܶܠܬܳܐ܆ ܡܳܪܳܐ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ ܢܽܘܪܳܐ ܐܳܟܶܠܬܳܐ ܕܚܰܝ̈ܠܰܘܳܬܳܐ ܢܽܘܪ̈ܳܢܳܝܶܐ ܟܳܘܙܺܝܢ ܕܰܢܚܽܘܪܽܘܢ ܠܘܰܥܕܳܐ ܕܺܐܝܩܳܪܶܗ ܘܰܨܒܳܐ ܕܗܰܕܳܡ̈ܶܐ ܕܒܶܣܪܳܐ ܢܶܬܥܰܛܰܦ ܒܰܚܢܳܢܶܗ܆ ܗܰܘ ܕܰܡܫܰܡܫܺܝܢ ܠܶܗ ܥܶܠܳܝ̈ܶܐ ܒܕܶܚܠܬܳܐ ܘܟܳܦܺܝܢ ܐܰܦܰܝ̈ܗܽܘܢ ܩܽܘܕܡܰܘܗ̱ܝ ܒܙܰܘܥܬܳܐ܆ ܪܺܝܫܳܐ ܕܚܰܝ̈ܶܐ ܘܰܐܠܳܗܳܐ ܕܟܽܠ܆ ܐܰܢ̱ܬ ܒܪ̈ܰܚܡܰܝܟ ܨܒܰܝܬ ܕܬܰܪܟܶܢ ܪܺܝܫܳܟ ܩܕܳܡ ܥܰܦܪܳܐ ܓܒܺܝܠܬܳܐ ܕܺܐܝ̈ܕܰܝܟ ܘܰܬܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܝܟ܆ ܘܝܰܗܒܬ ܠܰܢ ܛܽܘܦܣܳܐ ܫܰܪܺܝܪܳܐ ܕܡܽܘܟܳܟܳܟ ܕܒܶܗ ܢܶܪܕܶܐ. ܗܰܘ ܕܚܰܘܺܝܬ ܠܰܢ ܐܽܘܪܚܳܐ ܗܳܕܶܐ ܕܰܡܝܰܒܠܳܐ ܠܰܢ ܠܘܳܬ ܕܡܽܘܬܳܐ ܕܡܰܟܺܝܟܽܘܬܳܟ ܦܳܪܽܘܩܳܝܬܳܐ܆ ܫܰܟܶܢ ܠܰܢ ܠܥܰܒ̈ܕܶܐ ܕܺܝܠܳܟ ܕܰܟܢܺܝܫܺܝܢ ܩܕܳܡܰܝܟ܆ ܕܰܒܝܰܕ ܡܰܝ̈ܳܐ ܗܳܠܶܝܢ ܙܥܽܘܪ̈ܶܐ ܕܰܒܗܽܘܢ ܡܫܺܝܓܺܝܢܰܢ ܪ̈ܶܓܠܶܐ ܕܰܚ̈ܕܳܕܶܐ܆ ܟܰܕ ܡܫܰܡܠܺܝܢܰܢ ܛܽܘܦܣܳܐ ܕܡܽܘܟܳܟܳܟ܆ ܢܶܬܡܰܪ̈ܩܳܢ ܢܰܦ̈ܫܳܬܰܢ ܡܶܢ ܟܽܠܳܗ̇ ܨܳܐܽܘܬܳܐ ܘܛܽܘܠܫܳܐ ܘܫܽܘܚܬܳܐ ܕܰܚܛܺܝܬܳܐ܆ ܘܰܐܫܘܳܐ ܠܰܢ ܕܟܰܕ ܒܥܰܝܢܳܐ ܢܰܗܺܝܪܬܳܐ ܕܬܰܪܥܺܝܬܳܐ ܡܶܬܒܰܩܶܝܢܰܢ ܒܡܰܟܺܝܟܽܘܬܳܟ ܘܰܒܡܶܬܢܰܚܬܳܢܽܘܬܳܟ ܕܰܠܘܳܬܰܢ܆ ܢܶܫܕܶܐ ܡܶܢܰܢ ܟܽܠܳܗ̇ ܪܳܡܽܘܬܳܐ ܘܰܡܫܰܩܠܽܘܬܳܐ ܘܚܰܫ̈ܶܐ ܡܨܰܥܪ̈ܶܐ ܗܳܠܶܝܢ ܕܰܐܥܶܠ ܐܳܟܶܠܩܰܪܨܳܐ ܥܰܠ ܓܶܢܣܰܢ ܒܝܰܕ ܢܶܟܠܶܗ ܡܰܪܺܝܪܳܐ܆ ܘܢܶܠܒܰܫ ܟܽܠܳܗ̇ ܡܰܟܺܝܟܽܘܬܳܐ ܘܒܰܣܺܝܡܽܘܬܳܐ ܘܚܽܘܒܳܐ ܫܰܪܺܝܪܳܐ. ܗܳܠܶܝܢ ܕܟܰܕ ܫܰܡܠܺܝܬ ܐܰܠܶܦܬ ܠܰܢ ܕܢܶܥܒܶܕ ܗܳܟܰܢܳܐ ܕܰܟܝܳܐܺܝܬ ܘܩܰܕܺܝܫܳܐܺܝܬ ܐܰܝܟ ܕܰܦ̇ܐܶܐ ܠܬܰܠܡܺܝ̈ܕܶܐ ܫܰܪܺܝܪ̈ܶܐ ܘܳܐܦ ܠܥܰܒ̈ܕܶܐ ܕܺܝܠܳܟ ܡܗܰܝܡ̈ܢܶܐ܆ ܘܰܢܫܰܡܠܶܐ ܥܽܘܗܕܳܢܳܐ ܕܚܰܫܳܟ ܦܳܪܽܘܩܳܝܳܐ ܘܰܕܡܰܘܬܳܟ ܡܰܥܒܶܕ ܚܰܝ̈ܶܐ܆ ܘܰܢܥܰܕܥܶܕ ܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ܆ ܘܢܰܣܶܩ ܠܳܟ ܫܽܘܒܚܳܐ ܘܺܐܝܩܳܪܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܩܽܘܩܳܝܳܐ
ܡܳܐ ܫܰܦܺܝܪ ܗ̱ܘܳܐ ܗܰܘ ܪܰܡܫܳܐ ܕܫܰܡܶܫ ܒܶܗ ܡܳܪܰܢ܆ ܟܰܕ ܥܳܐܠܺܝܢ ܗ̱ܘܰܘ ܬܰܠܡܺܝ̈ܕܶܐ ܚܰܕ ܚܰܕ ܠܰܫܝܳܓܬܳܐ. ܩܳܝܡܳܐ ܢܽܘܪܳܐ܆ ܘܰܠܒܺܝܟܳܐ ܠܰܩܢܳܐ܆ ܘܰܡܚܳܐ ܗ̱ܘܳܐ ܓܶܝܪ. ܣܶܕܽܘܢܳܐ ܒܚܰܨܰܘ̈ܗ̱ܝ܆ ܬܶܗܪܳܐ ܪܰܒܳܐ ܒܗܳܝ ܫܳܥܬܳܐ ܕܠܳܐ ܝܺܩܶܕ ܝܽܘܕܳܐ܆ ܟܰܕ ܩܰܪܶܒ ܠܶܗ ܦܳܪܽܘܩܰܢ ܡܰܝ̈ܳܐ ܠܰܫܝܳܓܬܳܐ ܗ̄ܘܗ̄܀
ܫܽܘܒܚܳܐ
ܟܽܠܗܽܘܢ ܟܶܢ̈ܫܶܐ ܕܰܫܡܰܝܳܐ ܬܗܰܪܘ̱ ܗ̱ܘܰܘ ܒܗܳܕܶܐ܆ ܕܰܐܠܳܗܳܐ ܘܒܰܪ ܐܰܠܳܗܳܐ ܗܰܘ ܡܰܠܟܳܐ ܡܫܰܒܚܳܐ܆ ܗܰܘ ܕܠܶܗ ܟܳܦܳܐ܆ ܟܽܠ ܒܪܽܘܟ ܕܒܰܫܡܰܝܳܐ܆ ܘܕܰܐܪ̈ܥܳܢܳܝܶܐ܆ ܘܕܰܠܬܰܚܬ ܡܶܢ ܐܰܪܥܳܐ܆ ܢܚܶܬ ܘܰܐܪܡܺܝ ܡܰܝ̈ܳܐ ܒܠܰܩܢܳܐ ܘܰܐܫܺܝܓ ܪ̈ܶܓܠܶܐ܆ ܕܬܰܠܡܺܝ̈ܕܰܘܗ̱ܝ ܒܰܚܫܳܡܺܝܬܳܐ ܘܪܰܘܡܳܐ ܘܥܽܘܡܩܳܐ ܬܗܰܪܘ ܗ̄ܘܗ̄܀
ܥܶܛܪܳܐ
ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܕܐ̱ܪܳܙܳܐ ܕܚܽܘܒܳܐ ܫܰܪܺܝܪܳܐ ܘܰܡܫܰܡܠܝܳܐ ܐܰܫܠܶܡܬ ܠܰܢ. ܘܰܠܗܳܢܳܐ ܐܰܢ̱ܬ ܠܳܟ ܩܰܕܶܡܬ ܚܰܘܺܝܬ ܘܛܰܦܶܣܬ. ܘܰܕܢܶܫܬܰܥܒܰܕ ܠܰܚ̈ܕܳܕܶܐ ܘܰܢܫܰܡܶܫ ܦܰܐܝܽܘܬ ܐܰܠܳܗܳܐܺܝܬ ܐܰܠܶܦܬ. ܐܰܢ̱ܬ ܗܳܟܺܝܠ ܡܳܪܝܳܐ ܒܛܰܝܒܽܘܬܳܐ ܕܺܝܠܳܟ ܩܰܒܶܠܳܝܗ̱ܝ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ. ܘܚܰܠܶܠ ܘܰܡܪܽܘܩ ܠܰܢ ܒܙܽܘܦܳܐ ܡܕܰܟܝܳܢܳܐ ܕܪ̈ܰܚܡܰܝܟ ܡܶܢ ܨܳܐܽܘܬܳܐ ܘܛܽܘܠܫܳܐ ܕܰܚܛܺܝܬܳܐ. ܘܰܐܫܘܳܐ ܠܰܢ ܕܢܶܓܡܽܘܪ ܘܰܢܫܰܡܠܶܐ ܦܽܘܩܕܳܢܰܝ̈ܟ ܐܰܠܳܗܳܝ̈ܶܐ ܒܚܽܘܒܳܐ ܗܰܘ ܕܚܰܝܠܳܐ ܩܰܕܺܝܫܳܐ ܠܘܶܐ ܠܶܗ ܘܰܒܬܰܪܥܺܝܬܳܐ ܡܰܟܺܝܟܬܳܐ. ܘܠܳܐ ܡܚܰܝ̈ܒܶܐ ܢܶܫܬܟܰܚ ܒܝܰܘܡܳܐ ܗܰܘ ܕܚܺܝܠܳܐ ܕܦܽܘܪܥܳܢܳܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܩܠܐ ܒܩ̄: ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ
ܟܽܠ ܐܰܝܢܳܐ ܕܠܳܐ ܡܠܶܐ ܚܽܘܒܳܐ ܘܗܰܝܡܳܢܽܘܬܳܐ ܠܳܐ ܢܶܩܪܽܘܒ ܢܰܫܺܝܓ. ܕܠܳܐ ܢܰܫܺܝܓ ܦܰܓܪܳܐ ܒܡܰܝ̈ܳܐ ܘܢܰܦܫܳܐ ܒܚܰܘ̈ܒܶܐ. ܢܰܦܫܳܐ ܘܦܰܓܪܳܐ ܘܪܶܥܝܳܢܳܐ ܒܚܰܕ ܨܶܒܝܳܢܳܐ ܢܫܺܝܓܽܘܢ ܫܰܘܝܳܐܺܝܬ܀
ܫܽܘܒܚܳܐ
ܚܙܰܘ ܬܰܠܡܺܝ̈ܕܶܐ ܠܳܐ ܬܰܒܣܽܘܢ ܥܰܠ ܦܽܘܩܕܳܢܰܘ̈ܗ̱ܝ ܕܡܳܪܝܳܐ ܒܰܣܺܝܡܳܐ. ܕܦܰܩܶܕ ܕܰܬܫܺܝܓܽܘܢ ܪ̈ܶܓܠܶܐ ܕܰܟ̈ܢܰܘܳܬܟܽܘܢ. ܘܟܽܠ ܐܰܝܢܳܐ ܕܠܳܐ ܡܶܬܡܰܟܰܟ ܠܳܐ ܫܳܘܶܐ ܠܺܝ ܕܢܶܗܘܶܐ ܬܰܠܡܺܝܕܳܐ܀
ܡܰܕܪܳܫܳܐ ܒܩ̄: ܩܽܘܡ ܦܰܘܠܳܘܣ
ܐܶܬܟܰܢܰܫܘ̱ ܪܰܒܳܐ ܘܬܰܠܡܺܝ̈ܕܰܘܗ̱ܝ܆ ܠܥܶܠܺܝܬܳܐ ܕܢܶܓܡܽܘܪ ܦ̈ܶܠܳܐܬܳܐ܆ ܘܡܰܟܶܟ ܗ̱ܘܳܐ ܢܰܦܫܶܗ ܥܰܙܺܝܙܳܐ܆ ܘܶܐܬܬܰܚܬܺܝ ܠܣܳܟܳܐ ܕܡܽܘܟܳܟܳܐ܆ ܗܰܘ ܡܳܪܳܐ ܕܟܽܠܳܐ܆ ܘܰܐܠܳܗܳܐ ܕܥܰܠ ܟܽܠ܆ ܓܢܺܝܙܳܐ ܕܡܶܫܬܰܒܰܚ܆ ܒܓܺܝ̈ܓܠܶܐ ܚܰܝ̈ܳܬܳܐ܆ ܨܒܳܐ ܢܚܰܘܶܐ ܐܽܘܪܚܳܐ ܕܡܽܘܟܳܟܳܐ܆ ܠܬܰܠܡܺܝ̈ܕܰܘܗ̱ܝ ܕܢܶܪܕܽܘܢ ܒܥܶܩ̈ܒܳܬܶܗ܀
ܓܒܳܐ ܐܶܢܽܘܢ ܠܶܐܡܪ̈ܶܐ ܬܰܡܺܝ̈ܡܶܐ܆ ܫܰܦܺܝܪ̈ܶܐ ܦܫܺܝ̈ܛܶܐ ܕܠܳܐ ܡܽܘܡܳܐ܆ ܘܰܨܒܳܐ ܗ̱ܘܳܐ ܒܪܶܚܡܰܬ ܐ̱ܢܳܫܽܘܬܶܗ܆ ܕܰܐܝܟ ܫܶܡܫܳܐ ܢܶܗܘܽܘܢ ܢܰܗܺܝܪܺܝܢ܆ ܘܝܰܗܒ ܗ̱ܘܳܐ ܒܺܐܝ̈ܕܰܝܗܽܘܢ܆ ܚܰܝ̈ܠܶܐ ܘܳܐܣ̈ܘܳܬܳܐ܆ ܘܶܐܫܬܰܘܕܺܝ ܗ̱ܘܳܐ ܠܗܽܘܢ ܕܰܪ̈ܓܶܐ ܘܫܽܘ̈ܠܛܳܢܶܐ܆ ܘܡܳܐ ܕܳܐܬܶܐ ܒܚܰܝܠܳܐ ܘܬܶܫܒܽܘܚܬܳܐ܆ ܐܳܦ ܗܶܢܽܘܢ ܢܶܗܘܽܘܢ ܕܰܝ̈ܳܢܶܐ܀
ܗܳܝ ܢܽܘܪܳܐ ܚܰܝܬܳܐ ܘܰܫܓܺܝܪܬܳܐ܆ ܕܠܶܓܝܽܘ̈ܢܶܐ ܕܢܽܘܪܳܐ ܡܫܰܡܫܺܝܢ ܠܳܗ̇܆ ܩܕܳܡ ܥܰܦܪܳܐ ܫܺܝܛܳܐ ܓܗܺܝܢܳܐ ܗ̱ܘܳܬ܆ ܘܰܡܦܺܝܣܳܐ ܕܰܬܫܺܝܓ ܠܶܗ ܪ̈ܶܓܠܰܘܗ̱ܝ܆ ܗܰܘ ܕܰܛܥܺܝܢܺܝܢ ܠܶܗ܆ ܟܪ̈ܽܘܒܶܐ ܘܰܣܪ̈ܳܦܶܐ. ܘܓܺܝܓ̈ܠܶܐ ܚܰܝ̈ܳܬܳܐ܆ ܡܩܰܕܫܺܝܢ ܠܺܐܝܩܳܪܶܗ܆ ܩܕܳܡ ܫܶܡܥܽܘܢ ܡܰܪܟܶܢ ܗ̱ܘܳܐ ܪܺܝܫܶܗ. ܫܽܘܒܚܳܐ ܠܶܗ ܕܰܟܡܳܐ ܐܶܬܡܰܟܰܟ܀
ܐܳܘ ܗܰܘܢܳܐ ܐܰܝܟܳܐ ܚܳܐܰܪ ܐܰܢ̱ܬ܆ ܒܥܳܒܽܘܕܳܐ ܘܡܳܪܳܐ ܕܬܶܫܒܽܘܚܬܳܐ܆ ܒܡܰܪܟܰܒܬܳܐ ܕܚܺܝܠܬܳܐ ܕܰܟܪ̈ܽܘܒܶܐ܆ ܐܰܘ ܗܳܪܟܳܐ ܒܰܝܢܳܬ ܬܰܠܡܺܝ̈ܕܶܐ܆ ܒܗܰܘ ܥܽܘܒܳܐ ܪܰܒܳܐ܆ ܐܰܘ ܗܳܪܟܳܐ ܕܰܡܫܺܝܓ܆ ܪ̈ܶܓܠܶܐ ܕܬܰܠܡܺܝܕܳܐ܆ ܘܡܰܫܠܶܡ ܠܶܗ ܠܡܰܘܬܳܐ܆ ܛܰܝܒܽܘܬܶܗ ܐܰܪܟܶܢܬܶܗ ܠܗܳܕܶܐ܆ ܚܠܳܦ ܐܳܕܳܡ ܕܢܶܬܦܢܶܐ ܠܝܳܪܬܽܘܬܶܗ܀
ܒ̈ܳܬܶܐ ܕܚܰܫܳܐ
ܒܪܺܝܟ ܡܳܪܝ ܚܰܫܳܟ ܕܰܗܘܳܐ ܚܠܳܦܰܝܢ܆ ܒܪܺܝܟ ܡܽܘܟܳܟܳܟ ܕܡܶܛܽܠܳܬܰܢ܀
ܒܗܳܢܳܐ ܝܰܘܡܳܐ ܫܩܰܠ ܣܶܕܽܘܢܳܐ܆ ܒܰܪ ܐܰܠܳܗܳܐ ܘܰܡܚܳܐ ܒܚܰܨܰܘ̈ܗ̱ܝ܆ ܘܰܐܫܺܝܓ ܘܟܰܦܰܪ܆ ܪ̈ܶܓܠܶܐ ܕܥܰܒ̈ܕܰܘܗ̱ܝ܆ ܚܰܝܶܠ ܘܕܰܟܺܝ ܘܰܡܪܰܩ ܐܶܢܽܘܢ܆ ܘܥܰܠ ܦܳܬܽܘܪܶܗ ܐܰܣܡܶܟ ܐܶܢܽܘܢ܀
ܢܰܣܶܩ ܫܽܘܒܚܳܐ ܠܰܐܒܳܐ ܓܢܺܝܙܳܐ܆ ܘܢܶܣܓܽܘܕ ܠܰܒܪܳܐ ܕܡܰܟܶܟ ܢܰܦܫܶܗ ܘܰܐܫܺܝܓ ܪ̈ܶܓܠܶܐ܆ ܕܰܬܪܶܥܣܰܪܬܳܐ܆ ܘܫܰܡܠܺܝ ܟܽܠܳܗ̇ ܡܕܰܒܪܳܢܽܘܬܳܐ܆ ܘܰܠܪܽܘܚܩܽܘܕܫܳܐ ܟܠܺܝܠ ܩܽܘ̈ܠܳܣܶܐ܀
ܡܳܐ ܕܕܳܝܢܰܬ ܠܶܗ ܠܥܰܡܳܐ ܕܕܳܢܽܘܟ܆ ܠܕܺܝܢܳܐ ܥܰܡܰܢ ܡܳܪܝ ܠܳܐ ܬܶܥܽܘܠ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ̱ ܝܰܥܩܽܘܒ
ܡܫܺܝܚܳܐ ܕܶܐܬܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܽܘܬܳܐ܀
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀
ܐܰܫܺܝܓ ܡܳܪܰܢ ܪ̈ܶܓܠܶܐ ܕܫܶܡܥܽܘܢ ܐܰܝܟܰܢ ܕܰܨܒܳܐ܆ ܘܰܩܪܶܒܘ̱ ܟܽܠܗܽܘܢ ܒܺܐܝܕܳܐ ܒܺܐܝܕܳܐ ܨܶܝܕ ܦܳܪܽܘܩܰܢ܆ ܡܰܪܟܶܢ ܪܺܝܫܶܗ ܐܰܝܟ ܕܰܒܨܺܝܪܳܐ ܩܕܳܡ ܬܰܠܡܺܝ̈ܕܰܘܗ̱ܝ܆ ܡܫܺܝܓ ܪ̈ܶܓܠܰܝܗܽܘܢ ܕܰܒܡܽܘܟܳܟܶܗ ܪܰܡܪܶܡ ܐܶܢܽܘܢ܀
ܫܽܘܒܚܳܐ ܠܰܐܒܳܐ ܕܰܓܒܳܐ ܫܠܺܝ̈ܚܶܐ ܡܶܢ ܫܽܘܪܳܝܳܐ܆ ܘܣܶܓܕܬܳܐ ܠܰܒܪܳܐ ܕܰܒܡܽܘܟܳܟܶܗ ܪܰܡܪܶܡ ܐܶܢܽܘܢ܆ ܬܰܘܕܺܝ ܠܪܽܘܚܳܐ ܕܰܡܠܳܐ ܐܶܢܽܘܢ ܟܽܠ ܚܶܟ̈ܡܳܬܳܐ܆ ܘܰܥܠܰܝܢ ܪ̈ܰܚܡܶܐ ܒܰܨ̈ܠܰܘܳܬܗܽܘܢ ܒܟܽܠ ܥܶܕ̈ܳܢܺܝܢ܀
ܙܽܘܡܳܪܳܐ ܒܩ̄: ܐܰܨܶܕܬ ܪܶܥܝܳܢܝ̱
ܐܙܶܠ ܥܰܠ ܚܡܺܝܫܳܝܳܐ ܕܣܶܒܠܬܳܐ ܕܡܳܪܝ ܐܰܦܪܶܝܡ: ܐܰܨܶܕ ܗܰܘܢܳܟ ܚܰܟܺܝܡܳܐ
ܡܳܪܶܐ ܪܰܘܡܳܐ ܐܶܬܡܰܟܰܟ܆ ܘܰܐܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܘܣܰܚܦܳܗ̇ ܠܪܳܡܽܘܬܶܗ ܕܒܺܝܫܳܐ܆ ܘܰܐܠܶܦ ܠܰܢ ܡܰܟܺܝܟܽܘܬܳܐ܀ ܒܪܺܝܟ ܚܰܫܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܕܡܶܛܽܠܳܬܰܢ ܗ̄܀
ܩܶܪ̈ܝܳܢܶܐ:
ܡܰܦܩܳܢܳܐ. ܠܕ: ܝܚ ـ ܟܘ Exodus 34:18-26
ܣܳܦܪܳܐ ܕܒ̄ ܕܡܠܟ̈ܐ. ܟܓ: ܟܐ ـ ܟܗ II Kings 23:21-25
ܐܶܫܰܥܝܳܐ. ܢܢ: ܕ ـ ܝ Jesaiah 50:4-10
ܐ ܦܶܛܪܽܘܣ. ܓ: ܝܙ ـ ܟܒ I Peter 3:17-22
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ.
ܝ: ܟܐ ـ ܟܛ Hebrew 10:21-29
ܐܰܚ̈ܰܝ܆ ܘܺܐܝܬ ܠܰܢ ܟܽܘܡܪܳܐ ܪܰܒܳܐ ܥܰܠ ܒܰܝܬܶܗ ܕܰܐܠܳܗܳܐ. ܢܶܩܪܽܘܒ ܗܳܟܺܝܠ ܒܠܶܒܳܐ ܫܰܪܺܝܪܳܐ ܘܰܒܬܽܘܟܠܳܢܳܐ ܕܗܰܝܡܳܢܽܘܬܳܐ܇ ܟܰܕ ܪܣܺܝܣܺܝܢ ܠܶܒܰܘ̈ܳܬܰܢ ܘܰܕܟܶܝܢ ܡܶܢ ܬܺܐܪܬܳܐ ܒܺܝܫܬܳܐ. ܘܡܰܣܚܰܝ ܦܰܓܪܰܢ ܒܡܰܝ̈ܳܐ ܕܟܰܝ̈ܳܐ. ܘܰܢܚܰܡܣܶܢ ܒܬܰܘܕܺܝܬܳܐ ܕܣܰܒܪܰܢ ܘܠܳܐ ܢܶܨܛܠܶܐ. ܡܗܰܝܡܰܢ ܗ݈ܘܽ ܓܶܝܪ ܡܰܢ ܕܰܡܠܰܟ ܠܰܢ. ܘܰܢܚܽܘܪ ܚܰܕ ܒܚܰܕ܆ ܒܓܽܘܪܳܓܳܐ ܕܚܽܘܒܳܐ ܘܕܰܥܒ̈ܳܕܶܐ ܛܳܒ̈ܶܐ. ܘܠܳܐ ܢܶܗܘܶܐ ܫܳܒܩܺܝܢ ܟܢܽܘܫܝܰܢ܇ ܐܰܝܟ ܕܺܐܝܬ ܥܝܳܕܳܐ ܠܐ݈ܢܳܫ ܐ݈ܢܳܫ܆ ܐܶܠܳܐ ܒܥܰܘ ܚܰܕ ܡܶܢ ܚܰܕ܇ ܝܰܬܺܝܪܳܐܝܺܬ ܟܡܳܐ ܕܚܳܙܶܝܬܽܘܢ ܕܰܩܪܶܒ ܝܰܘܡܳܐ ܗܰܘ. ܐܶܢ ܓܶܝܪ ܒܨܶܒܝܳܢܶܗ ܢܶܚܛܶܐ ܐ݈ܢܳܫ ܡܶܢ ܒܳܬܰܪ ܕܩܰܒܶܠ ܝܺܕܰܥܬܳܐ ܕܰܫܪܳܪܳܐ܆ ܠܰܝܬ ܡܶܟܺܝܠ ܕܶܒܚܬܳܐ ܕܬܶܬܩܰܪܰܒ ܚܠܳܦ ܚܛܳܗ̈ܶܐ. ܐܶܠܳܐ ܥܬܺܝܕ ܗ݈ܘܽ ܕܺܝܢܳܐ ܕܚܺܝܠܳܐ. ܘܰܛܢܳܢܳܐ ܕܢܽܘܪܳܐ ܕܳܐܟܶܠ ܠܰܒܥܶܠܕܒܳܒ̈ܶܐ. ܐܶܢ ܓܶܝܪ ܐܰܝܢܳܐ ܕܰܥܒܰܪ ܥܰܠ ܢܳܡܽܘܣܳܐ ܕܡܽܘܫܶܐ܁ ܥܰܠ ܦܽܘܡ ܬܪܶܝܢ ܘܰܬܠܳܬܳܐ ܣܳܗܕܺܝ̈ܢ ܕܠܳܐ ܪ̈ܰܚܡܺܝܢ ܡܳܐܶܬ܆ ܟܡܳܐ ܣܳܒܪܺܝܢ ܐܢ݈ܬܽܘܢ ܝܰܬܺܝܪܳܐܝܺܬ ܡܣܳܡ ܒܪܺܫܳܐ ܢܩܰܒܶܠ ܐܰܝܢܳܐ ܕܕܳܫܶܗ ܠܰܒܪܶܗ ܕܰܐܠܳܗܳܐ. ܘܰܚܫܰܒ ܕܡܳܐ ܕܕܺܝܰܬܺܩܺܐ ܕܺܝܠܶܗ ܐܰܝܟ ܕܟܽܠܢܳܫ܁ ܕܒܳܗ ܐܶܬܩܰܕܰܫ. ܘܨܰܥܰܪ ܠܪܽܘܚܳܐ ܕܛܰܝܒܽܘܬܳܐ܀
ܙܽܘܡܳܪܳܐ ܕܰܩܕܳܡ ܐܶܘܰܢܓܶܠܝܽܘܢ
ܐܰܫܺܝܓܶܬ ܕܰܟܝܳܐܺܝܬ ܐܺܝ̈ܕܰܝ. ܘܶܐܬܟܰܪܟܶܬ ܠܡܰܕܒܚܳܟ ܗ̄ܘܗ̄܀
ܐܶܘܰܢܓܶܠܝܽܘܢ ܕܝܽܘܚܰܢܳܢ
(ܝܓ. ܐ܆ ܝܛ John 13:1-19)
ܩܕܳܡ ܕܶܝܢ ܥܺܐܕܳܐ ܕܦܶܨܚܳܐ. ܝܳܕܰܥ ܗ݈ܘܳܐ ܝܶܫܽܘܥ ܕܰܡܛܳܬ ܫܳܥܬܳܐ܇ ܕܰܢܫܰܢܶܐ ܡܶܢ ܗܳܢܳܐ ܥܳܠܡܳܐ ܠܘܳܬ ܐܰܒܽܘܗ݈ܝ. ܘܰܐܚܶܒ ܠܕܺܝܠܶܗ ܕܰܒܗܳܢܳܐ ܥܳܠܡܳܐ. ܘܰܥܕܰܡܳܐ ܠܚܰܪܬܳܐ܂ ܐܰܚܶܒ ܐܶܢܽܘܢ܀ ܘܟܰܕ ܗܘܳܬ ܚܫܳܡܺܝܬܳܐ܆ ܪܡܶܐ ܗ݈ܘܳܐ ܠܶܗ ܠܣܳܛܳܢܳܐ ܒܠܶܒܶܗ ܕܺܝܗܽܘܕܳܐ܂ ܒܰܪ ܫܶܡܥܽܘܢ ܣܟܰܪܝܽܘܛܳܐ܂ ܕܢܰܫܠܡܺܝܘܗ݈ܝ܀ ܗܽܘ ܕܶܝܢ ܝܶܫܽܘܥ܆ ܡܶܛܽܠ ܕܝܳܕܰܥ ܗ݈ܘܳܐ ܕܟܽܠ ܡܶܕܶܡ ܝܰܗ݈ܒ ܐܰܒܳܐ ܒܺܐܝ̈ܕܰܘܗ݈ܝ܆ ܘܰܕܡܶܢ ܐܰܠܳܗܳܐ ܢܦܰܩ ܘܰܠܘܳܬ ܐܰܠܳܗܳܐ ܐܳܙܶܠ܆ ܩܳܡ ܡܶܢ ܚܫܳܡܺܝܬܳܐ ܘܣܳܡ ܢܰܚ̈ܬܰܘܗ݈ܝ܂ ܘܰܫܩܰܠ ܣܶܕܽܘܢܳܐ ܡܚܳܐ ܒܚܰܨܰܘ̈ܗ݈ܝ. ܘܰܐܪܡܺܝ ܡܰܝ̈ܳܐ ܒܰܡܫܳܓܬܳܐ܀
ܘܟܰܕ ܟܳܗܢܳܐ ܕܩܳܪܶܐ ܠܶܐܘܰܢܓܶܠܝܽܘܢ ܐܳܡܰܪ ܗܳܠܶܝܢ: ܫܳܠܶܐ ܥܕܰܡܳܐ ܕܰܢܩܽܘܡ ܗܰܘ ܕܰܡܫܰܡܠܶܐ ܠܬܶܫܡܶܫܬܳܐ ܕܰܫܝܳܓܬܳܐ ܘܰܢܣܺܝܡ ܢܰܚܬܰܘ̈ܗ̱ܝ. ܘܢܶܡܚܶܐ ܣܶܕܽܘܢܳܐ ܒܚܰܨܰܘ̈ܗ̱ܝ. ܟܶܢ ܢܫܰܪܶܐ ܥܕܰܡܳܐ ܠܦܶܬܓܳܡܳܐ ܕܳܐܡܰܪ:
ܘܰܐܪܡܺܝ ܡܰܝ̈ܳܐ ܒܰܡܫܳܓܬܳܐ
ܟܶܢ ܢܶܫܠܶܐ ܟܽܠܳܢܳܐܺܝܬ. ܘܢܰܪܡܶܐ ܡܫܰܡܠܝܳܢܳܐ ܕܬܶܫܡܶܫܬܳܐ ܡܰܝ̈ܳܐ ܒܠܰܩܢܳܐ.
ܪܺܝܫ ܟܳܗ̈ܢܶܐ ܡܨܰܠܶܐ ܨܠܽܘܬܳܐ ܗܳܕܶܐ ܥܰܠ ܡܰܝ̈ܳܐ ܘܬܳܠܶܐ ܩܳܠܶܗ:
ܗܰܒ ܠܰܢ ܡܳܪܝܳܐ ܐܰܠܳܗܳܐ ܕܢܶܫܡܰܥ ܠܡܶܠܰܝ̈ܟ ܚܰܝ̈ܳܬܳܐ ܘܰܒܡܰܟܺܝܟܽܘܬܳܐ ܢܶܦܠܽܘܚ ܒܟܰܪܡܳܟ ܦܽܘܠܚܳܢܳܐ ܕܙܰܕܺܝܩܽܘܬܳܐ܆ ܘܢܶܫܦܰܪ ܩܕܳܡܰܝܟ ܒܝܕ ܕܰܢܫܰܡܶܫ ܛܽܘܦܣܳܟ ܟܰܕ ܡܫܺܝܓܺܝܢܰܢ ܠܰܚ̈ܕܳܕܶܐ܆ ܐܰܝܟܰܢܳܐ ܕܚܰܘܺܝܬ ܠܰܢ ܟܰܕ ܐܰܪܡܺܝܬ ܡܰܝ̈ܳܐ ܒܰܡܫܳܓܬܳܐ ܘܰܐܫܺܝܓܬ ܪ̈ܶܓܠܶܐ ܕܬܰܠܡܺܝ̈ܕܰܝܟ ܫܰܪܺܝܪ̈ܶܐ܆ ܘܶܐܬܝܰܒܰܠ ܛܽܘܦܣܳܐ ܗܳܢܳܐ ܕܡܰܟܺܝܟܽܘܬܳܐ ܒܶܝܬ ܟܽܠܗܽܘܢ ܬܰܠܡܺܝ̈ܕܶܐ ܩܰܕܺܝ̈ܫܶܐ܆ ܐܺܝܢ ܡܳܪܝܳܐ ܐܰܠܳܗܳܐ ܐܳܦ ܠܰܢ ܐܰܫܘܳܐ ܒܰܚܢܳܢܳܟ ܕܢܶܬܕܰܡܶܐ ܒܡܰܟܺܝܟܽܘܬܳܟ܆ ܘܢܶܬܡܢܶܐ ܒܰܡܢܺܝ̈ܚܳܢܰܝܟ ܘܢܶܬܬܫܺܝܓ ܡܶܢ ܟܽܠܳܗ̇ ܨܳܐܽܘܬܳܐ ܕܰܚܛܺܝܬܳܐ ܒܡܰܝ̈ܳܐ ܗܳܠܶܝܢ܀
ܥܰܡܳܐ: ܐܰܡܺܝܢ܀
ܡܫܰܡ̈ܫܳܢܶܐ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܪܺܝܫ ܟܳܗ̈ܢܶܐ ܟܰܕ ܓܗܺܝܢ
ܡܳܪܝܳܐ ܐܰܠܳܗܳܐ ܝܶܫܽܘܥ ܡܫܺܝܚܳܐ ܒܪܳܐ ܘܡܶܠܬܳܐ ܕܰܐܠܳܗܳܐ ܐܰܒܳܐ܆ ܗܰܘ ܕܶܐܬܺܝܠܶܕܬ ܡܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܝܺܠܺܝܕܽܘܬܳܐ ܟܺܝܬ ܠܳܐ ܡܶܬܦܰܫܩܳܢܺܝܬܳܐ ܘܟܽܠܳܗ̇ ܡܕܰܒܪܳܢܽܘܬܳܐ ܦܳܪܽܘܩܳܝܬܳܐ ܒܰܩܢܽܘܡܳܟ ܫܰܡܠܺܝܬ܆ ܐܰܝܟܰܢܳܐ ܕܠܰܢ ܚܰܛܳܝ̈ܶܐ ܥܰܒܕܰܝ̈ܟ ܬܚܰܪܰܪ ܡܶܢ ܥܰܒܕܽܘܬܳܐ ܕܳܐܟܶܠܩܰܪܨܳܐ܆ ܐܰܢ̱ܬ ܥܒܶܕ ܠܡܰܝ̈ܳܐ ܗܳܠܶܝܢ ܐܰܝܟ ܡܰܝ̈ܳܐ ܕܰܒܗܽܘܢ ܐܰܫܺܝܓܬ ܠܪ̈ܶܓܠܶܐ ܕܬܰܠܡܺܝ̈ܕܰܝܟ܀
ܘܬܳܠܶܐ ܩܳܠܶܗ
ܐܰܢ̱ܬ ܓܶܝܪ ܟܰܕ ܥܳܒܽܘܕܳܐ ܐܺܝܬܰܝܟ ܕܟܽܠܳܗ̇ ܒܪܺܝܬܳܐ ܡܶܬܚܰܙܝܳܢܺܝܬܳܐ ܟܺܝܬ ܘܠܳܐ ܡܶܬܚܰܙܝܳܢܺܝܬܳܐ܆ ܘܒܰܫܡܰܝܳܐ ܡܶܢ ܪ̈ܶܒܘܳܬܳܐ ܕܡܰܠܰܐܟ̈ܶܐ ܥܰܡ ܐܰܒܳܐ ܘܪܽܘܚܳܐ ܡܶܫܬܰܒܰܚ ܐܰܢ̱ܬ܆ ܠܰܒܥܳܬܶܗ ܕܥܶܪܒܳܐ ܐܰܒܺܝܕܳܐ ܐܶܬܰܝܬ. ܘܥܰܠ ܟܰܬܦ̈ܳܬܳܟ ܩܰܕܺܝ̈ܫܳܬܳܐ ܐܰܢ̱ܬ ܛܥܶܢܬܳܝܗ̱ܝ ܘܰܠܒܶܝܬ ܐܰܒܽܘܟ ܐܰܥܶܠܬܳܝܗ̱ܝ. ܘܗܳܫܳܐ ܡܳܪܝܳܐ ܐܰܠܳܗܳܐ ܒܰܪܶܟ ܠܟܽܠܰܢ ܥܰܒܕܰܝ̈ܟ ܡܫܺܝ̈ܓܳܢܶܐ ܘܡܶܬܬܫܺܝ̈ܓܳܢܶܐ ܘܳܐܦ ܠܰܐܝܠܶܝܢ ܕܩܳܪܒܺܝܢ ܠܡܰܝ̈ܳܐ ܗܳܠܶܝܢ ܒܗܰܝܡܳܢܽܘܬܳܐ܆ ܘܰܢܕܰܟܽܘܢ ܡܶܢܰܢ ܠܫܽܘܚܬܳܐ ܕܰܚܛܺܝܬܳܐ ܘܰܠܟܽܠ ܙܢܳܐ ܠܳܐ ܢܳܡܽܘܣܳܝܳܐ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܡܰܩܶܦ ܩܳܪܽܘܝܳܐ ܕܶܐܘܰܢܓܶܠܝܽܘܢ ܘܳܐܡܰܪ:
ܘܫܰܪܺܝ ܠܰܡܫܳܓܽܘ ܪ̈ܶܓܠܶܐ ܕܬܰܠܡܺܝ̈ܕܰܘܗ݈ܝ. ܘܰܡܫܰܘܶܐ ܗ݈ܘܳܐ ܒܣܶܕܽܘܢܳܐ ܕܰܡܚܶܐ ܒܚܰܨܰܘ̈ܗ݈ܝ:
ܗܳܪܟܳܐ ܡܫܰܪܶܐ ܪܺܝܫ ܟܳܗ̈ܢܶܐ ܠܰܡܫܳܓܽܘ ܠܪ̈ܶܓܠܶܐ ܕܝܰܬܺܝܒܺܝܢ ܠܡܶܬܬܫܳܓܽܘ ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ ܟܰܕ ܡܫܰܡ̈ܫܳܢܶܐ ܡܙܰܡܪܺܝܢ ܒ̈ܳܬܶܐ ܗܳܠܶܝܢ:
ܩܠܐ ܒܩ̄: ܬܗܰܪ ܓܰܒܪܺܐܝܶܠ
ܬܗܰܪ ܓܰܒܪܺܐܝܶܠ܆ ܘܙܳܥ ܘܶܐܬܕܰܡܰܪ ܡܺܝܟܳܐܝܶܠ܆ ܘܰܢܦܰܠ ܙܰܘܥܳܐ ܒܣܶܕܪ̈ܰܝܗܽܘܢ܆ ܕܰܚܙܰܐܘܽܗ̱ܝ ܠܗܰܘ ܢܽܘܪܳܢܳܐ܆ ܕܰܓܗܺܝܢ ܘܰܡܫܺܝܓ ܪ̈ܶܓܠܶܐ ܕܬܰܠܡܺܝ̈ܕܰܘܗ̱ܝ܆ ܪܰܡܝܳܐ ܢܽܘܪܳܐ ܒܓܰܘ ܠܰܩܢܳܐ܆ ܘܥܰܦܪ̈ܳܢܶܐ ܒܓܰܘܳܗ̇ ܡܫܺܝܓܺܝܢ܆ ܫܽܘܒܚܳܐ ܠܡܽܘܟܳܟܶܗ܆ ܕܝܰܗܒ ܠܰܢ ܛܽܘܦܣܳܐ ܒܰܩܢܽܘܡܶܗ܆ ܕܗܳܟܢܳܐ ܗܘܰܝܬܽܘܢ ܥܳܒܕܺܝܢ܆ ܐܰܟܡܳܐ ܕܶܐܢܳܐ ܠܟܽܘܢ ܥܶܒܕܶܬ܀
ܐܰܫܺܝܓ ܠܟܽܠܗܽܘܢ܆ ܬܰܠܡܺܝ̈ܕܶܐ ܚܰܕ ܒܳܬܰܪ ܚܰܕ܆ ܡܶܢ ܙܥܽܘܪܳܐ ܥܕܰܡܳܐ ܠܪܰܒܳܐ܆ ܘܛܰܢ ܫܶܡܥܽܘܢ ܪܺܝܫ ܬܰܠܡܺܝ̈ܕܶܐ. ܕܰܐܢ̱ܬ ܡܳܪܝ̱ ܠܥܳܠܰܡ ܪ̈ܶܓܠܰܝ ܠܳܐ ܡܫܺܝܓ ܐܰܢ̱ܬ܆ ܗܳܝܕܶܝܢ ܡܳܪܰܢ ܐܶܡܰܪ ܠܶܗ܆ ܕܶܐܢ ܬܩܽܘܡ ܠܽܘܩܒܰܠ ܨܶܒܝܳܢܝ̱. ܠܰܝܬ ܠܳܟ ܥܰܡܝ̱ ܡܢܳܬܳܐ܆ ܘܶܐܬܬܙܺܝܥ ܟܺܐܦܳܐ ܘܶܐܡܰܪ ܠܶܗ. ܕܪܺܝܫܝ̱ ܐܳܦ ܓܽܘܫܡܝ̱ ܐܰܣܚܳܐ ܘܕܰܟܳܐ܆ ܘܡܶܢܳܟ ܡܳܪܰܢ ܠܳܐ ܐܶܬܦܪܶܫ܀
ܟܰܕ ܢܫܺܝܓ ܢܺܐܡܰܪ ܥܰܠ ܟܽܠ ܚܰܕ ܡܶܢܗܽܘܢ ܨܠܽܘܬܳܐ ܗܳܕܶܐ:
ܢܫܺܝܓ ܡܶܢܳܟ ܡܳܪܝܳܐ ܐܰܠܳܗܳܐ ܠܟܽܠܗܽܘܢ ܕܽܘܒܳܪ̈ܶܐ ܕܒܰܪܢܳܫܳܐ ܥܰܬܺܝܩܳܐ ܘܰܢܚܰܕܬܳܟ ܒܪܽܘܚܳܐ ܘܒܰܫܪܳܪܳܐ ܘܳܐܦ ܠܟܽܠܰܢ ܥܰܡܳܟ܀
ܘܟܰܕ ܡܟܰܦܰܪ ܠܪ̈ܶܓܠܶܐ ܕܺܝܠܗܽܘܢ ܒܣܶܕܽܘܢܳܐ ܐܳܡܰܪ ܨܠܽܘܬܳܐ ܗܳܕܶܐ:
ܢܟܰܦܰܪ ܡܶܢܳܟ ܘܡܶܢܰܢ ܡܳܪܝܳܐ ܟܽܠܗܽܘܢ ܙܰܘ̈ܥܶܐ ܘܰܙܢܰܝ̈ܳܐ ܘܰܥܝ̈ܳܕܶܐ ܒܺܝ̈ܫܶܐ܆ ܘܳܐܦ ܢܗܰܕܰܪ ܠܳܟ ܘܰܠܟܽܠܰܢ ܥܰܡܳܟ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܘܰܒܚܰܝ̈ܶܐ ܕܫܳܦܪܺܝܢ ܠܨܶܒܝܳܢܶܗ ܕܰܡܫܺܝܚܳܐ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܘܢܶܡܛܶܐ ܠܘܳܬ ܪܰܒܳܐ ܢܫܰܡܠܶܐ ܡܶܕܶܡ ܕܥܰܠ ܦܶܛܪܽܘܣ܀
ܘܬܽܘܒ ܩܳܪܽܘܝܳܐ ܕܶܐܘܰܢܓܶܠܝܽܘܢ ܢܺܐܡܰܪ:
ܟܰܕ ܕܶܝܢ ܐܶܬܳܐ ܠܘܳܬ ܫܶܡܥܽܘܢ ܟܺܐܦܳܐ܆ ܐܳܡܰܪ ܠܶܗ ܫܶܡܥܽܘܢ܆ ܐܰܢ݈ܬ ܡܳܪܝ܇ ܪ̈ܶܓܠܰܝ ܡܫܺܝܓ ܐܰܢ݈ܬ ܠܺܝ܆ ܥܢܳܐ ܝܶܫܽܘܥ܂ ܘܶܐܡܰܪ ܠܶܗ: ܡܶܕܶܡ ܕܥܳܒܶܕ ܐ݈ܢܳܐ ܐܰܢ݈ܬ ܠܳܐ ܝܳܕܰܥ ܐܰܢ݈ܬ ܗܳܫܳܐ܆ ܒܳܬܰܪܟܶܢ ܕܶܝܢ ܬܶܕܰܥ܂ ܐܳܡܰܪ ܠܶܗ ܫܶܡܥܽܘܢ ܟܺܐܦܳܐ: ܠܥܳܠܰܡ ܠܳܐ ܡܫܺܝܓ ܐܰܢ݈ܬ ܠܺܝ ܪ̈ܶܓܠܰܝ܆ ܐܳܡܰܪ ܠܶܗ ܝܶܫܽܘܥ: ܐܶܢ ܠܳܐ ܡܫܺܝܓ ܐ݈ܢܳܐ ܠܳܟ܆ ܠܰܝܬ ܠܳܟ ܥܰܡܝ ܡܢܳܬܳܐ܆ ܐܳܡܰܪ ܠܶܗ ܫܶܡܥܽܘܢ ܟܺܐܦܳܐ܆ ܡܳܕܶܝܢ ܡܳܪܝ ܠܳܐ ܒܰܠܚܽܘܕ ܪ̈ܶܓܠܰܝ ܬܫܺܝܓ ܠܺܝ܆ ܐܶܠܳܐ ܐܳܦ ܐܺܝ̈ܕܰܝ ܐܳܦ ܪܺܫܝ܆ ܐܳܡܰܪ ܠܶܗ ܝܶܫܽܘܥ: ܗܰܘ ܕܰܣܚܶܐ܆ ܠܳܐ ܣܢܺܝܩ ܐܶܠܳܐ ܪ̈ܶܓܠܰܘܗ݈ܝ ܒܰܠܚܽܘܕ ܢܫܺܝܓ܆ ܟܽܠܶܗ ܓܶܝܪ ܕܟܶܐ ܗ݈ܘ܆ ܐܳܦ ܐܰܢ݈ܬܽܘܢ ܟܽܠܟܽܘܢ ܕܟܰܝ̈ܳܐ ܐܰܢ݈ܬܽܘܢ܆ ܐܶܠܳܐ ܠܳܐ ܟܽܠܟܽܘܢ܆ ܝܳܕܰܥ ܗ݈ܘܳܐ ܓܶܝܪ ܝܶܫܽܘܥ ܠܗܰܘ ܕܡܰܫܠܶܡ ܠܶܗ܆ ܡܶܛܽܠ ܗܳܢܳܐ ܐܶܡܰܪ܆ ܕܠܳܐ ܗ݈ܘܳܐ ܟܽܠܟܽܘܢ ܕܟܰܝ̈ܳܐ ܐܰܢ݈ܬܽܘܢ܆ ܟܰܕ ܕܶܝܢ ܐܰܫܺܝܓ ܪ̈ܶܓܠܰܝܗܽܘܢ܆ ܫܩܰܠ ܢܰܚ̈ܬܰܘܗ݈ܝ܆ ܘܶܐܣܬܡܶܟ܀
ܗܳܪܟܳܐ ܪ̈ܺܝܫܟܳܗܢܶܐ ܝܳܬܶܒ ܥܰܠ ܟܽܘܪܣܝܳܐ ܘܰܢܫܰܡܠܶܐ ܩܶܪܝܳܢܳܐ ܕܶܐܘܰܢܓܶܠܝܽܘܢ:
ܘܶܐܡܰܪ ܠܗܽܘܢ: ܝܳܕܥܺܝܢ ܐܢ݈ܬܽܘܢ ܡܳܢܳܐ ܥܶܒܕܶܬ ܠܟܽܘܢ܆ ܐܰܢ݈ܬܽܘܢ ܩܳܪܶܝܢ ܐܢ݈ܬܽܘܢ ܠܺܝ܆ ܪܰܒܰܢ܆ ܘܡܳܪܰܢ܆ ܘܫܰܦܺܝܪ ܐܳܡܪܺܝܢ ܐܢ݈ܬܽܘܢ܆ ܐܺܝܬܰܝ ܓܶܝܪ܆ ܐܶܢ ܐܶܢܳܐ ܗܳܟܺܝܠ ܡܳܪܟܽܘܢ ܘܪܰܒܟܽܘܢ܆ ܐܰܫܺܝܓܶܬ ܠܟܽܘܢ ܪ̈ܶܓܠܰܝܟܽܘܢ܆ ܟܡܳܐ ܐܰܢ݈ܬܽܘܢ ܚܰܝܳܒܺܝܢ ܐܢ݈ܬܽܘܢ ܕܰܬܫܺܝܓܽܘܢ ܪ̈ܶܓܠܶܐ ܚܰܕ ܕܚܰܕ܆ ܗܳܢܳܐ ܓܶܝܪ ܛܽܘܦܣܳܐ ܝܶܗܒܶܬ ܠܟܽܘܢ܆ ܕܰܐܝܟܰܢܳܐ ܕܶܐܢܳܐ ܥܶܒܕܶܬ ܠܟܽܘܢ܆ ܐܳܦ ܐܰܢ݈ܬܽܘܢ ܬܶܥܒܕܽܘܢ܆ ܐܰܡܺܝܢ ܐܰܡܺܝܢ ܐܳܡܰܪ ܐ݈ܢܳܐ ܠܟܽܘܢ܆ ܕܠܰܝܬ ܥܰܒܕܳܐ ܕܪܰܒ ܡܶܢ ܡܳܪܶܗ܆ ܘܠܳܐ ܫܠܺܝܚܳܐ ܕܪܰܒ ܡܶܢ ܡܰܢ ܕܫܰܕܪܶܗ܆ ܐܶܢ ܗܳܠܶܝܢ ܬܶܕܥܽܘܢ܆ ܛܽܘ̈ܒܳܢܶܐ ܐܰܢ݈ܬܽܘܢ ܐܶܢ ܬܶܥܒܕܽܘܢ ܐܶܢܶܝܢ܆ ܠܳܐ ܗ݈ܘܳܐ ܥܰܠ ܟܽܠܟܽܘܢ ܐܳܡܰܪ ܐ݈ܢܳܐ܆ ܝܳܕܰܥ ܐ݈ܢܳܐ ܓܶܝܪ ܠܰܐܝܠܶܝܢ ܕܰܓܒܺܝܬ܆ ܐܶܠܳܐ ܕܰܟܬܳܒܳܐ ܢܶܫܠܰܡ܆ ܕܗܰܘ ܕܳܐܟܶܠ ܥܰܡܝ ܠܰܚܡܳܐ܂ ܐܰܪܺܝܡ ܥܠܰܝ ܥܶܩܒܶܗ܆ ܡܶܢ ܗܳܫܳܐ ܐܳܡܰܪ ܐ݈ܢܳܐ ܠܟܽܘܢ܆ ܡܶܢ ܩܕܳܡ ܕܢܶܗܘܶܐ܆ ܕܡܳܐ ܕܰܗܘܳܐ܆ ܬܗܰܝܡܢܽܘܢ ܕܶܐܢܳܐ ܐ݈ܢܳܐ܀
ܒܳܬܰܪ ܫܽܘܠܳܡ ܩܶܪܝܳܢܳܐ ܕܶܐܘܰܢܓܶܠܝܽܘܢ ܩܳܝܡܺܝܢ ܟܽܠܗܽܘܢ ܐܰܝܠܶܝܢ ܕܶܐܬܬܫܺܝܓܘ̱ ܪ̈ܶܓܠܶܐ ܕܺܝܠܗܽܘܢ܆ ܘܚܰܕ ܡܶܢܗܽܘܢ ܕܺܐܝܬܰܘܗ̱ܝ ܛܽܘܦܣܳܐ ܕܫܶܡܥܽܘܢ ܢܩܽܘܡ ܡܶܢ ܟܽܘܪܣܝܶܗ ܘܰܢܫܺܝܓ ܪ̈ܶܓܠܶܐ ܕܗܰܘ ܕܰܐܫܺܝܓ ܪ̈ܶܓܠܶܐ ܕܺܝܠܗܽܘܢ܆ ܟܰܕ ܐܳܡܰܪ ܪܺܝܫ ܟܳܗ̈ܢܶܐ ܨܠܽܘܬܳܐ ܗܳܕܶܐ ܕܚܽܘܬܳܡܳܐ܆
ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܆ ܒܪܳܟ ܝܺܚܺܝܕܳܝܳܐ ܘܩܰܕܺܝܫܳܐ ܦܰܩܶܕ ܗ̱ܘܳܐ ܠܬܰܠܡܺܝ̈ܕܰܘܗ̱ܝ ܛܽܘܒܬܳܢ̈ܶܐ ܟܰܕ ܐܰܫܺܝܓ ܪ̈ܶܓܠܰܝܗܽܘܢ ܘܶܐܡܰܪ ܠܗܽܘܢ ܘܰܐܠܶܦ ܐܶܢܽܘܢ܆ ܕܗܳܟܰܢܳܐ ܗܘܰܝܬܽܘܢ ܡܫܺܝܓܺܝܢ ܪ̈ܶܓܠܶܐ ܕܰܚܕ̈ܳܕܶܐ ܒܚܽܘܒܳܐ ܐܰܝܟ ܬܰܠܡܺܝ̈ܕܶܐ ܫܰܪܺܝܪ̈ܶܐ܆ ܐܳܦ ܚܢܰܢ ܡܳܪܝ̱ ܕܫܰܡܠܺܝܢܰܢ ܠܦܽܘܩܕܳܢܳܐ ܡܳܪܳܢܳܝܳܐ ܘܪ̈ܶܓܠܶܐ ܕܰܚܕ̈ܳܕܶܐ ܐܰܫܺܝܓܢܰܢ܆ ܚܽܘܒܶܗ ܢܶܬܡܠܶܐ ܒܠܶܒܰܘ̈ܳܬܰܢ ܘܚܽܘܒܶܗ ܢܶܫܪܶܐ ܒܦܰܓܪ̈ܰܝܢ ܘܰܒܢܰܦܫ̈ܳܬܰܢ ܘܛܰܝܒܽܘܬܶܗ ܬܪܰܚܶܦܝ̱ ܥܠܰܝܢ܆ ܘܰܒܪ̈ܰܚܡܰܘܗ̱ܝ ܢܶܫܬܰܡܠܶܐ ܘܒܰܚܢܳܢܶܗ ܢܶܬܚܰܣܶܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܒܳܥܘܬܳܐ ܕܡܳܪܝ̱ ܝܰܥܩܽܘܒ
ܡܫܺܝܚܳܐ ܕܶܐܬܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܽܘܬܳܐ܆
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀
ܐܰܪܡܝ ܡܳܪܰܢ ܡܰܝ̈ܳܐ ܒܠܰܩܢܳܐ ܡܰܟܺܝܟܳܐܺܝܬ܆ ܘܰܩܪܳܐ ܠܫܶܡܥܽܘܢ ܪܺܝܫ ܬܰܠܡܺܝ̈ܕܶܐ ܢܫܺܝܓ ܠܶܗ ܪ̈ܶܓܠܰܘܗ̱ܝ܆ ܐܳܡܰܪ ܫܶܡܥܽܘܢ ܠܳܐ ܡܳܪܝ̱ ܠܳܐ ܡܳܪܝ̱ ܠܳܐ ܡܫܺܝܓ ܐܰܢ̱ܬ ܠܺܝ܆ ܙܰܘܥܰܐ ܗ̱ܘ ܪܰܒܳܐ ܕܰܬܫܺܝܓ ܪ̈ܶܓܠܰܝ ܐܰܝܟ ܕܳܐܡܰܪ ܐܰܢ̱ܬ܆ ܐܳܘ ܫܡܰܝܳܢܳܐ ܠܳܐ ܬܫܺܝܓ ܪ̈ܶܓܠܶܐ ܕܰܐܪ̈ܥܳܢܳܝܶܐ܆ ܓܳܒܽܘܠܳܐ ܐܰܢ̱ܬ ܠܳܐ ܢܶܬܝܰܩܰܪ ܛܺܝܢܳܐ ܡܶܢܳܟ܀
ܫܽܘܒܚܳܐ ܠܰܐܒܳܐ ܕܓܳܠܘ̱ ܗ̱ܘܰܘ ܪ̈ܰܚܡܰܘܗ̱ܝ ܥܰܠ ܐ̱ܢܳܫܽܘܬܰܢ܆ ܘܫܰܕܰܪ ܠܰܒܪܶܗ ܘܰܠܒܶܫ ܦܰܓܪܳܐ ܡܶܛܽܠܳܬܰܢ܆ ܣܶܓܕܬܳܐ ܠܰܒܪܳܐ ܕܰܐܫܺܝܓ ܪ̈ܶܓܠܶܐ ܕܰܒܢܰܝ̈ ܐ̱ܪ̈ܳܙܶܐ܆ ܘܰܐܪܡܺܝ ܒܚܽܘܒܶܗ ܡܰܝ̈ܳܐ ܒܠܰܩܢܳܐ ܡܰܟܺܝܟܳܐܺܝܬ܆ ܘܶܐܬܓܗܶܢ ܘܰܐܫܺܝܓ ܪ̈ܶܓܠܶܐ ܕܓܽܘܕܳܐ ܕܰܫܠܺܝܚܽܘܬܳܐ܆ ܠܶܗ ܬܶܫܒܽܘܚܬܳܐ ܘܠܰܐܒܽܘܗ̱ܝ ܟܰܣܝܳܐ ܘܰܠܪܽܘܚ ܩܽܘܕܫܳܐ܀
ܐܶܢ ܚܰܣܝܳܐ ܡܶܬܛܰܝܰܒ ܢܶܛܥܢܽܘܢܳܝܗ̱ܝ ܥܰܠ ܟܽܘܪܣܝܳܐ ܟܰܕ ܢܶܩܪܶܐ ܐܶܘܢܰܓܶܠܺܝܳܘܢ ܕܝܽܘܚܰܢܳܢ ܝ: ܝܐ ـ ܝܚ
ܫܠܶܡ ܛܶܟܣܳܐ ܕܰܫܝܳܓܬܳܐ ܐ̱ܪܳܙܳܢܳܝܬܳܐ