ܛܟܣܐ ܕܥܐܕܐ ܩܕܝܫܐ ܕܐܘܫܥܢ̈ܐ
ܡܚܰܘܝܳܢܳܐ
ܡܶܢ ܩܕܳܡ ܕܢܶܫܬܰܡܠܶܐ ܩܽܘܪܳܒܳܐ ܐܰܠܳܗܳܝܳܐ܆ ܡܶܢ ܒܳܬܰܪ ܕܰܡܫܰܡܠܶܝܢ ܠܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ܆ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܟܰܕ ܠܒܺܝܫܺܝܢ ܛܶܟܣܰܝ̈ܗܽܘ̇ܢ ܒܡܰܕܒܚܳܐ. ܛܳܥܢܺܝܢ ܠܰܨܠܺܝܒܳܐ ܘܠܶܐܘܰܢܓܶܠܝܽܘܢ ܩܰܕܺܝܫܳܐ ܘܰܠܦܺܝܪܡܳܐ ܘܰܠܡܰܪ̈ܘܚܳܬܳܐ ܘܣܰܘ̈ܟܶܐ ܕܙܰܝ̈ܬܶܐ ܘܕܶܩ̈ܠܶܐ ܕܒܰܕܡܽܘܬ ܨܠܺܝܒܳܐ ܐܰܣܺܝܪܺܝܢ܆ ܘܥܳܒܕܺܝܢ ܕܳܪܳܐ (ܗ̄ ܕ̄ ܟܪܽܘܟܝܳܐ)܆ ܟܰܕ ܢܳܦܩܺܝܢ ܡܶܢ ܬܰܪܥܳܐ ܕܓܰܪܒܝܳܐ ܘܳܐܡܪܺܝܢ ܣܽܘܓܺܝܬܳܐ ܗܳܕܶܐ:
ܣܽܘܓܺܝܬܳܐ ܕܥܺܐܕܳܐ
ܡܰܢ ܕܶܝܢ ܐܰܣܩܰܢܝ̱ ܥܰܠ ܛܽܘܪ̈ܶܐ ܪ̈ܳܡܶܐ ܕܐܽܘܪܺܫܠܶܡ܆ ܘܰܚܙܺܝܬܶܗ ܠܒܰܪ ܐܰܠܳܗܳܐ ܡܶܠܬܳܐ ܕܶܐܬܓܰܫܰܡ܆ ܕܰܪܟܺܝܒ ܥܰܠ ܥܺܝܠܳܐ ܫܺܝܛܳܐ ܘܥܳܐܶܠ ܠܽܐܘܪܺܫܠܶܡ܆ ܐܳܙܳܠܐ̱ ܩܽܘܕܡܰܘܗ̱ܝ ܓܽܘܕܳܐ ܕܰܢܒܺܝ̈ܶܐ܆ ܘܳܐܬܝܳܐ ܒܳܬܪܶܗ ܓܽܘܕܳܐ ܕܰܫܠܺܝ̈ܚܶܐ܆ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܡܫܰܒܚܺܝܢ ܩܽܘܕܡܰܘܗ̱ܝ ܟܰܕ ܐܳܡܪܺܝܢ: ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ܆ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܆ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ ܒܰܫܡܳܐ ܡܫܰܒܚܳܐ ܕܝܳܠܽܘܕܶܗ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀
ܩܠܐ : ܒܩ̄ ܛܽܘܒܳܐ ܠܝܰܠܽܘ̈ܕܶܐ
ܢܰܘܕܶܐ ܘܢܶܣܓܽܘܕ ܠܶܗ ܠܥܰܡܰܢܽܘܐܶܝܠ ܕܶܐܬܬܰܚܬܺܝ܆ ܘܰܒܡܽܘܟܳܟܶܗ ܥܺܝܠܳܐ ܪܟܶܒ܆ ܘܟܶܢ̈ܫܶܐ ܢܦܰܩܘ̱ ܠܐܽܘܪܥܶܗ܆ ܘܰܒܣܰܘ̈ܟܰܝ ܙܰܝܬܳܐ ܫܰܒܚܽܘܗ̱ܝ܆ ܝܰܒܶܒܘ̱ ܩܽܘܕܡܰܘܗ̱ܝ ܟܰܕ ܐܳܡܪܺܝܢ܆ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܆ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀
ܥܺܕܬܳܐ ܒܽܐܘܫܰܥ̈ܢܶܐ ܙܡܰܪܝ̱ ܫܽܘܒܚܳܐ ܠܒܰܪ ܐܰܠܳܗܳܐ܆ ܒܝܽܘܡ ܥܰܕܥܺܐܕܶܗ ܟܰܕ ܪܳܘܙܰܬܝ̱܆ ܘܰܐܘܕܳܝ ܠܡܽܘܟܳܟܶܗ܆ ܕܶܐܬܳܐ ܘܦܰܪܩܶܟܝ̱ ܒܰܨܠܺܝܒܶܗ܆ ܘܰܥܬܺܝܕ ܕܢܺܐܬܶܐ ܘܰܢܪܰܡܪܡܶܟܝ̱. ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܆ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀
ܟܰܕ ܡܳܛܶܝܢ ܠܰܩܕܳܡ ܡܰܕܒܚܳܐ ܢܛܰܝܒܘ̇ܢ ܓܘܕܳܐ ܘܰܢܫܰܪܶܐ ܪܝܫ ܟܳܗ̈ܢܶܐ ܒܒܽܘܪܳܟ ܣܰܘ̈ܟܶܐ ܟܰܕ ܐܳܡܰܪ:
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܽܘܬܳܐ ܕܫܽܘܪܳܝܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܢܰܚ̈ܬܶܐ ܕܫܽܘܒܚܳܐ ܘܰܒܡܰܙܠܓܽܘܬܳܐ ܡܶܬܝܰܕܥܳܢܺܝܬܳܐ ܘܰܒܚܽܘ̈ܫܳܒܶܐ ܕܟܰܝ̈ܳܐ ܘܩܰܕܺܝ̈ܫܶܐ܆ ܢܶܦܽܘܩ ܠܐܽܘܪܥܳܟ ܒܗܳܢܳܐ ܝܰܘܡܳܐ ܕܡܰܥܰܠܬܳܟ ܕܠܽܐܘܪܺܫܠܶܡ܆ ܘܰܒܣܰܘ̈ܟܶܐ ܕܬܶܫܒܽܘܚܬܳܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܒܪܺܝܟ ܗ̱ܘܽ ܕܶܐܬܳܐ ܒܰܫܡܶܗ ܕܡܳܪܝܳܐ܆ ܐܽܘܫܰܥܢܳܐ ܒܰܡܪ̈ܰܘܡܶܐ܀
ܥܶܢܝܳܢܳܐ ܕܪܰܚܶܡܥܠܰܝ ܒܩ̄: ܕܶܐܡܳܐ ܕܟܺܝܬܳܐ
ܗܰܘ ܕܰܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ܆ ܛܠܳܝ̈ܶܐ ܘܫܰܒܪ̈ܶܐ܆ ܒܽܐܘܫܰܥ̈ܢܶܐ ܫܰܒܚܽܘܗ̱ܝ܆ ܪܰܚܶܡܥܠܰܝܢ ܐܰܠܳܗܐ܀
ܗܰܘ ܕܠܽܘܓ̈ܠܳܓܶܐ ܕܝܰܠܽܘ̈ܕܶܐ ܘܫܰܒܪ̈ܶܐ܆ ܐܶܬܩܰܪܰܒܘ̱ ܠܶܗ܆ ܟܰܕ ܥܰܠ ܠܽܐܘܪܺܫܠܶܡ܆ ܪܰܚܶܡܥܠܰܝܢ ܐܰܠܳܗܐ܀
ܗܰܘ ܕܰܟܪ̈ܽܘܒܶܐ ܒܕܶܚܠܳܐ ܛܥܺܝܢܺܝܢ ܠܶܗ܆ ܥܺܝܠܳܐ ܛܰܥܢܶܗ܆ ܟܰܕ ܥܰܠ ܠܽܐܘܪܺܫܠܶܡ܆ ܪܰܚܶܡܥܠܰܝܢ ܐܰܠܳܗܐ܀
ܡܶܢ ܛܽܘܪ ܙܰܝ̈ܬܶܐ ܥܕܰܡܳܐ ܠܽܐܘܪܺܫܠܶܡ. ܛܠܳܝ̈ܶܐ ܘܫܰܒܪ̈ܶܐ܆ ܒܽܐܘܫܰܥ̈ܢܶܐ ܫܰܒܚܽܘܗ̱ܝ܆ ܪܰܚܶܡܥܠܰܝܢ ܐܰܠܳܗܐ܀
ܫܽܘܒܚܳܐ ܘܡܶܢ ܥܳܠܰܡ
ܣܳܒ̈ܶܐ ܥܠܰܝ̈ܡܶܐ ܛܠܳܝ̈ܶܐ ܘܝܰܠܽܘ̈ܕܶܐ܆ ܡܫܰܒܚܺܝܢ ܠܰܒܪܳܐ ܕܦܰܪܩܰܢ ܒܡܽܘܟܳܟܶܗ. ܪܰܚܶܡܥܠܰܝܢ ܐܰܠܳܗܳܐ܀
ܐܳܡܪܺܝܢ ܩܘܩܰܠܝܽܘܢ ܪܒܝܥܳܝܳܐ
ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ ܗ̄ ܕܝܰܗܒܬ ܫܽܘܒܚܳܟ ܥܰܠ ܫܡܰܝܳܐ܀
ܡܶܢ ܦܘܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܰܩܶܢܬ ܬܶܫܒܽܘܚܬܳܟ ܗ̄ ܡܶܛܽܠ ܕܢܶܬܒܰܛܰܠ ܒܥܶܠܕܒܳܒܳܐ ܕܡܶܬܢܰܩܰܡ܀
ܡܰܙܥܩܳܢܽܘܬܳܐ
ܥܰܠ ܛܽܘܪܳܐ ܪܳܡܳܐ ܣܰܩ ܠܳܟ ܘܶܐܬܥܰܠܳܐ܆ ܐܳܘ ܕܰܡܣܰܒܰܪ ܫܰܝܢܳܐ ܠܨܶܗܝܽܘܢ܆ ܘܝܳܗܶܒ ܫܠܳܡܳܐ ܠܽܐܘܪܺܫܠܶܡ܆ ܘܰܒܚܰܝܠܳܐ ܐܰܪܺܝܡ ܩܳܠܳܟ ܘܰܩܥܺܝ ܠܳܗ̇ ܟܰܕ ܐܳܡܰܪ ܐܰܢ̱ܬ܆ ܕܝܰܩܺܝܪ̈ܳܬܳܐ ܥܠܰܝܟܝ̱ ܐܶܬܡ̈ܰܠܰܠܝ̱܆ ܕܰܡܕܺܝܢ̱ܬܶܗ ܓܶܝܪ ܐܺܝܬܰܝܟܝ̱ ܕܰܐܠܳܗܳܐ܆ ܫܰܝܢܳܐ ܢܶܗܘܶܐ ܥܰܠ ܐܺܝܣܪܳܐܶܝܠ܆ ܘܰܫܠܳܡܳܐ ܘܦܽܘܪܩܳܢܳܐ ܠܒܰܪ̱ܬ ܥܰܡ̱̈ܡܶܐ܀
ܨܠܽܘܬܳܐ
ܨܰܝܳܪܳܐ ܡܗܺܝܪܳܐ ܕܰܒܦܽܘܩܕܳܢܶܗ ܐܶܬܬܨܺܝܪܘ̱ ܝܰܠܽܘ̈ܕܶܐ ܒܟܰܪ̈ܣܳܬܳܐ ܘܰܒܡܶܠܬܶܗ ܐܶܬܓܠܶܦܘ̱ ܘܶܐܬܬܰܩܰܢܘ̱ ܠܶܫܳܢܰܝ̈ܗܽܘ̇ܢ܆ ܕܰܢܩܰܠܣܽܘܢ ܩܕܳܡܰܘܗ̱ܝ ܒܽܐܘ̈ܫܰܥܢܶܐ܆ ܨܽܘܪ ܡܳܪܝ ܡܶܐܬܺܝܬܳܟ ܩܕܳܡ ܥܰܝܢܰܝ̈ܢ ܘܰܒܓܰܘ ܬܰܪ̈ܥܝܳܬܰܢ ܩܽܘܠܳܣܰܝ̈ܟ܆ ܘܰܓܠܽܘܦ ܩܺܝ̈ܢܳܬܰܢ ܠܫܽܘܒܚܳܟ ܘܰܠܪܽܘܡܪܳܡܳܐ ܕܪܰܒܽܘܬܳܟ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܘܩܰܠܝܽܘܢ ܪܒܺܝܥܳܝܳܐ ܡܫܰܚܠܰܦ
ܫܰܒܰܚܝ̱ ܐܽܘܪܺܫܠܶܡ ܠܡܳܪܝܳܐ ܗ̄ ܫܰܒܰܚܝ ܠܰܐܠܳܗܶܟܝ̱ ܨܶܗܝܽܘܢ܀
ܫܽܘܒܚܳܐ ܘܡܶܢ ܥܳܠܰܡ
ܡܰܙܥܩܳܢܽܘܬܳܐ
ܚܕܳܝ ܛܳܒ ܘܰܪܘܰܙܝ̱ ܐܽܘܪܺܫܠܶܡ܆ ܕܽܘܨܘ̱ ܕܶܝܢ ܘܚܰܓܰܘ ܒܟܽܠܙܒܰܢ ܐܰܝܠܶܝܢ ܕܪܳܚܡܺܝܢ ܠܳܗ̇ ܠܨܶܗܝܽܘܢ܆ ܡܫܺܝܚܳܐ ܓܶܝܪ ܗܰܘ ܕܡܰܡܠܶܟ ܥܰܠ ܟܽܠܗܽܘܢ ܥܰܡ̱̈ܡܶܐ܆ ܡܳܪܝܳܐ ܕܚܰܝ̈ܠܰܘܳܬܳܐ ܗܳܐ ܐܳܬܶܐ ܟܰܕ ܪܟܺܝܒ ܥܺܝܠܳܐ ܕܢܰܘܒܶܕ ܫܽܘܥܠܳܝܶܗ ܕܰܒܥܶܠܕܰܪܳܐ܆ ܕܠܶܗ ܩܳܥܶܝܢܰܢ ܕܒܰܪܶܟܘ̱ ܟܽܠܗܽܘܢ ܥܰܒܕ̈ܰܘܗ̱ܝ ܕܡܳܪܝܳܐ ܠܡܳܪܝܳܐ ܐܰܠܳܗܳܐ ܘܪܰܡܪܡܽܘܗ̱ܝ ܘܰܐܘܕܰܘ ܠܶܗ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀
ܡܫܰܡܫܳܢܳܐ: ܣܛܰܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀
ܦܪܽܘܡܝܽܘܢ
ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܘܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀
ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܰܟܝܳܢܶܗ ܕܰܣܪ̈ܳܦܶܐ ܒܪܰܘܡܳܐ ܡܩܰܕܫܺܝܢ ܠܶܗ܆ ܠܗܰܘ ܒܪܺܝܟܳܐ ܘܰܡܒܰܪܟܳܐ ܕܰܟܪ̈ܽܘܒܶܐ ܒܙܰܘܥܳܐ ܡܒܰܪܟܺܝܢ ܠܶܗ܆ ܘܝܰܠܽܘ̈ܕܶܐ ܒܚܰܕܽܘܬܳܐ ܡܫܰܒܚܺܝܢ ܠܶܗ܆ ܠܗܰܘ ܫܒܺܝܚܳܐ ܕܡܰܠܰܐܟ̈ܶܐ ܩܳܥܶܝܢ ܬܶܫܒ̈ܚܳܬܶܗ ܘܡܶܢ ܛܠܳܝ̈ܶܐ ܫܦܰܝ̈ܳܐ ܐܶܬܩܰܠܰܣ ܒܫܽܘ̈ܩܰܝ ܨܶܗܝܽܘܢ ܐܰܝܟ ܕܰܪܚܺܝܡ ܠܶܗ܆ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܒܽܘܪܳܟ ܣܰܘ̈ܟܶܐ ܕܽܐܘܫܰܥ̈ܢܶܐ܆ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܐܰܠܳܗܳܐ ܗܰܘ ܕܰܡܥܰܠܰܝ ܥܽܘܫܢܳܐ ܕܺܐܝܩܳܪܶܗ ܘܪܰܒ ܗܽܘ ܥܽܘܡܩܳܐ ܕܰܡܕܰܒܪܳܢܽܘܬܶܗ܆ ܗܰܘ ܛܳܒܳܐ ܒܰܟܝܳܢܶܗ ܘܚܰܢܳܢܳܐ ܒܪܶܚܡܰܬ ܐ̱ܢܳܫܽܘܬܶܗ܆ ܗܰܘ ܕܶܐܬܳܐ ܠܕܺܝܠܶܗ ܕܢܰܦܢܶܐ ܠܰܒܪܺܝܬܶܗ ܠܣܶܓܕܬܳܐ ܕܺܐܝܩܳܪܶܗ܆ ܘܟܰܕ ܩܕܳܡ ܚܰܫܳܐ ܕܺܝܠܶܗ ܦܳܪܽܘܩܳܝܳܐ ܥܺܝܠܳܐ ܫܺܝܛܳܐ ܫܶܐܠ ܠܰܪܟܽܘܒܶܗ܆ ܗܳܢܳܐ ܕܨܳܐܰܪ ܗ̱ܘܳܐ ܛܽܘܦܣܳܐ ܕܺܝܠܰܢ ܥܰܡܳܐ ܕܡܶܢ ܥܰܡ̱̈ܡܶܐ ܕܶܐܬܦܪܶܩ ܡܶܢ ܛܳܥܝܽܘܬܳܐ ܕܫܺܐܕ̈ܶܐ܆ ܗܰܘ ܕܰܢܒܺܝ̈ܶܐ ܩܰܕܺܝ̈ܫܶܐ ܒܠܶܥܙܳܐ ܕܪܽܘܚܳܐ ܩܰܕܺܝܫܳܐ܆ ܩܰܕܶܡܘ̱ ܛܰܦܶܣܘ̱ ܠܥܺܐܕܳܐ ܗܳܢܳܐ ܩܰܕܺܝܫܳܐ܆ ܟܰܕ ܝܰܥܩܽܘܒ ܗܰܘ ܪܺܝܫܳܐ ܕܫܰܒ̈ܛܶܐ ܘܰܬܠܺܝܬܳܝܳܐ ܒܪ̈ܺܝܫܰܝ ܐܰܒܳܗ̈ܳܬܳܐ ܩܰܕܶܡ ܐܶܬܢܰܒܺܝ. ܕܠܳܐ ܢܶܥܢܰܕ ܫܰܒܛܳܐ ܡܶܢ ܝܺܗܽܘܕܳܐ ܘܰܡܒܰܕܩܳܢܳܐ ܡܶܢ ܒܶܝܬ ܪ̈ܶܓܠܰܘܗ̱ܝ ܥܕܰܡܳܐ ܕܢܺܐܬܶܐ ܡܰܢ ܕܕܺܝܠܶܗ ܗ̱ܝ ܡܰܠܟܽܘܬܳܐ. ܘܠܶܗ ܡܣܰܟܶܝܢ ܥܰܡ̱̈ܡܶܐ܆ ܘܢܶܐܣܽܘܪ ܒܰܓܦܶܬܳܐ ܥܺܝܠܶܗ ܘܰܒܫܰܒܽܘܩܳܐ ܒܰܪ ܐܰܬܳܢܶܗ. ܠܗܳܢܳܐ ܥܺܐܕܳܐ ܩܰܕܺܝܫܳܐ ܕܽܐܘܫܰܥ̈ܢܶܐ ܩܰܕܶܡ ܐܰܟܪܶܙ ܠܨܶܗܝܽܘܢ ܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ. ܙܟܰܪܝܳܐ ܢܒܺܝܳܐ ܟܰܕ ܐܳܡܰܪ: ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܡܰܟܺܝܟ ܘܰܪܟܺܝܒ ܥܰܠ ܚܡܳܪܳܐ ܘܥܰܠ ܥܺܝܠܳܐ ܒܰܪ ܐܰܬܳܢܳܐ܆ ܠܗܳܢܳܐ ܥܺܐܕܳܐ ܩܰܕܺܝܫܳܐ ܕܽܐܘܫܰܥ̈ܢܶܐ ܩܰܕܶܡ ܙܰܡܰܪ ܕܰܘܺܝܕ ܢܒܺܝܳܐ ܐܰܠܳܗܳܝܳܐ ܟܰܕ ܐܳܡܰܪ: ܕܡܶܢ ܦܽܘܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܶܩܢܰܬ ܬܶܫܒܽܘܚܬܳܐ ܠܡܳܪܝܳܐ܆ ܠܗܳܢܳܐ ܥܺܐܕܳܐ ܩܰܕܺܝܫܳܐ ܕܽܐܘܫܰܥ̈ܢܶܐ ܐܶܫܰܥܝܳܐ ܗܰܘ ܡܫܰܒܚܳܐ ܒܰܢܒܺܝ̈ܶܐ ܩܰܕܶܡ ܐܰܟܪܶܙ: ܕܶܐܬܬܥܺܝܪܝ̱ ܐܶܬܬܥܺܝܪܝ̱ ܐܽܘܪܺܫܠܶܡ ܘܰܠܒܰܫܝ̱ ܥܽܘܫܢܳܐ ܕܪܳܥܶܗ ܕܡܳܪܝܳܐ܆ ܘܒܰܕܓܽܘ̇ܢ ܟܰܕ ܒܥܺܐܕܳܐ ܗܳܢܳܐ ܡܙܰܡܢܳܢܳܐ ܕܬܶܫܒ̈ܚܳܬܳܐ ܡܚܰܓܶܝܢܰܢ ܘܰܡܫܰܒܚܺܝܢܰܢ ܒܰܪܘܳܙܳܐ ܪܽܘܚܳܢܳܝܳܐ ܐܳܡܪܺܝܢܰܢ: ܐ ܐܽܘܫܰܥܢܳܐ ܐܰܘܟܺܝܬ ܬܶܫܒ̈ܚܳܬܳܐ ܠܺܐܝܬܝܳܐ ܕܡܶܢ ܐܺܝܬܝܳܐ ܕܶܐܬܳܐ ܕܢܶܦܽܪܘܩ ܠܥܳܠܡܳܐ ܡܶܢ ܫܽܘܥܒܳܕܳܐ ܕܰܚܛܺܝܬܳܐ. ܒ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܘܰܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ ܩܥܰܘ ܠܶܗ ܝܰܠܽܘ̈ܕܶܐ. ܓ ܐܽܘܫܰܥܢܳܐ ܠܰܓܢܺܝܙ ܒܺܐܝܬܽܘܬܶܗ ܡܥܰܠܰܝܬܳܐ ܕܰܓܒܳܐ ܠܶܗ ܥܺܝܠܳܐ ܫܺܝܛܳܐ ܠܰܪܟܽܘܒܶܗ. ܕ ܐܽܘܫܰܥܢܳܐ ܠܕܶܐܬܬܰܚܬܺܝ ܒܛܰܝܒܽܘܬܶܗ ܕܢܶܫܬܰܒܰܚ ܡܶܢ ܫܰܒܪ̈ܶܐ ܕܰܢܪܰܡܪܶܡ ܒܡܽܘܟܳܟܶܗ ܠܫܶܦܠܶܗ ܕܓܶܢܣܰܢ. ܗ ܐܽܘܫܰܥܢܳܐ ܠܗܰܘ ܕܶܐܬܡܰܟܰܟ ܗܳܢܳܐ ܟܽܠܶܗ ܕܢܶܪܟܰܒ ܥܰܠ ܒܰܪ ܐܰܬܳܢܳܐ. ܘ ܐܽܘܫܰܥܢܳܐ ܠܘܰܥܕܳܐ ܕܚܰܝ̈ܶܐ ܕܘܰܥܶܕ ܠܶܗ ܫܽܘܒܚܳܐ ܡܶܢ ܦܽܘܡ ܫܰܒܪ̈ܶܐ. ܙ ܐܽܘܫܰܥܢܳܐ ܠܙܰܕܺܝܩܳܐ ܘܙܰܟܳܝܳܐ ܕܰܙܟܳܐ ܒܡܽܘܟܳܟܶܗ ܠܫܽܘܥܠܳܝܶܗ ܕܳܐܟܶܠܩܰܪܨܳܐ. ܚ ܐܽܘܫܰܥܢܳܐ ܠܚܰܢܳܢܳܐ ܕܚܰܕܺܝ ܠܥܺܕܬܶܗ ܒܥܰܕܥ̈ܺܐܕܰܘܗ̱ܝ ܚܣܰܝ̈ܳܐ ܘܩܰܕܺܝ̈ܫܶܐ. ܛ ܐܽܘܫܰܥܢܳܐ ܠܛܳܒܳܐ ܘܒܰܣܺܝܡܳܐ ܕܰܛܪܰܕ ܠܚܶܫܟܳܐ ܕܛܽܘܥܝܰܝ ܒܰܡܕܰܒܪܳܢܽܘܬܶܗ ܦܳܪܽܘܩܳܝܬܳܐ. ܝ ܐܽܘܫܰܥܢܳܐ ܠܝܰܡܳܐ ܠܳܐ ܡܶܬܡܰܫܚܳܢܳܐ ܕܥܽܘܕܪ̈ܳܢܶܐ ܕܝܰܗܒ ܠܶܥܙܳܐ ܕܬܶܫܒܽܘܚܬܳܐ ܒܦܽܘܡܳܐ ܕܝܰܠܽܘ̈ܕܶܐ. ܟܟ ܐܽܘܫܰܥܢܳܐ ܠܟܺܐܢܳܐ ܘܙܰܕܺܝܩܳܐ ܕܟܰܕ ܐܶܬܬܰܚܬܺܝ ܠܣܽܘܪܳܩܳܐ ܨܶܒܝܳܢܳܝܳܐ ܠܳܐ ܐܰܪܚܶܩ ܡܶܢ ܗܳܝ ܕܺܐܝܬܰܘܗ̱ܝ ܐܰܠܳܗܳܐ ܠܥܶܠ ܡܶܢ ܟܽܠ. ܠ ܐܽܘܫܰܥܢܳܐ ܠܰܠܡܺܐܢܳܐ ܕܚܰܝ̈ܶܐ ܫܰܪ̈ܺܝܪܶܐ ܕܰܠܓܶܢܣܰܢ ܫܰܘܙܶܒ ܡܶܢ ܥܓܳܢܳܐ ܕܰܚܛܺܝܬܳܐ. ܡ ܐܽܘܫܰܥܢܳܐ ܠܰܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ ܘܩܽܘܫܬܳܐ ܕܡܶܢ ܫܰܒܪ̈ܶܐ ܘܝܰܠܽܘ̈ܕܶܐ ܬܶܩܢܰܬ ܬܶܫܒܽܘܚܬܶܗ. ܢܢ ܐܽܘܫܰܥܢܳܐ ܠܢܽܘܪܳܐ ܐܳܟܶܠܬܳܐ ܘܠܳܐ ܗܽܘܠܳܢܳܝܬܳܐ ܕܢܰܒܪܶܫ ܠܪ̈ܳܚܡܰܘܗ̱ܝ ܒܕܶܠܩܶܗ. ܣ ܐܽܘܫܰܥܢܳܐ ܠܣܰܒܪܳܐ ܕܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ ܕܣܰܒܰܪܘ̱ ܢܒܺܝ̈ܶܐ ܡܶܐܬܺܝܬܶܗ. ܥ ܐܽܘܫܰܥܢܳܐ ܠܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠ ܢܶܫ̈ܡܳܢ ܕܰܥܒܰܕ ܠܶܗ ܡܫܰܒ̈ܚܳܢܶܐ ܚܰܕ̈ܬܶܐ ܝܰܠܽܘ̈ܕܶܐ ܘܫܰܒܪ̈ܶܐ. ܦ ܐܽܘܫܰܥܢܳܐ ܠܦܳܪܘܩܳܐ ܕܦܰܪܩܶܗ ܠܥܳܠܡܳܐ ܒܰܡܕܰܒܪܳܢܘܬܶܗ. ܨ ܐܽܘܫܰܥܢܳܐ ܠܨܰܠܡܳܐ ܡܫܰܡܠܝܳܐ ܕܰܐܒܳܐ ܡܫܰܡܠܝܳܐ ܕܰܨܒܳܐ ܘܶܐܬܬܰܚܬܺܝ ܕܠܰܢ ܢܥܰܠܶܐ ܕܪܰܒܽܘܬܶܗ. ܩ ܐܽܘܫܰܥܢܳܐ ܠܩܰܕܺܝܫ ܒܰܟܝܳܢܶܗ ܕܰܩܥܰܘ ܠܶܗ ܝܰܠܽܘ̈ܕܶܐ ܒܪܺܝܟܽ ܗ̱ܘ ܕܶܐܬܳܐ ܒܰܫܡܶܗ ܕܡܳܪܝܳܐ. ܪ ܐܽܘܫܰܥܢܳܐ ܠܪܰܒܳܐ ܕܰܙܥܰܪ ܕܢܰܘܪܒܰܢ ܒܰܡܕܰܒܪܳܢܽܘܬܶܗ ܟܰܕ ܪܰܒܽܘܬܶܗ ܠܳܐ ܣܳܟ ܙܶܥܪܰܬ. ܫ ܐܽܘܫܰܥܢܳܐ ܠܫܳܒܶܩ ܚܰܘ̈ܒܶܐ ܕܡܰܣܟ̈ܠܳܢܶܐ ܕܰܫܒܰܩ ܠܚܰܘܒܬܳܐ ܕܪܺܝܫ ܛܽܘܗܡܰܢ ܒܰܚܢܳܢܶܗ. ܬ ܐܽܘܫܰܥܢܳܐ ܠܬܶܫܒܽܘܚܬܳܐ ܘܝܽܘܩܢܳܐ ܕܰܐܒܳܐ ܓܢܺܝܙܳܐ ܕܫܰܒܪ̈ܶܐ ܬܡܺܝܗܳܐܺܝܬ ܝܰܒܶܒܘ̱ ܬܶܫܒܽܘܚܬܶܗ܆ ܘܒܰܕܓܽܘ̇ܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܬܩܰܒܶܠ ܡܶܢܰܢ ܠܫܽܘܒ̈ܚܶܐ ܕܦܽܘ̈ܡܰܝܢ ܐܰܝܟ ܕܡܶܢ ܝܰܠܽܘ̈ܕܶܐ ܘܫܰܒܪ̈ܶܐ܆ ܟܰܕ ܡܫܰܟܶܢ ܐܰܢ̱ܬ ܠܪ̈ܺܝܫܰܝ ܟܳܗ̈ܢܶܐ ܡܶܠܬܳܐ ܕܚܶܟܡܬܳܐ ܠܟܳܗ̈ܢܶܐ ܙܰܗܝܽܘܬܳܐ܆ ܠܰܡܫܰܡ̈ܫܳܢܶܐ ܕܰܟܝܽܘܬܳܐ܆ ܠܐܰܦܽܘܕܝܰܩ̈ܢܽܘ ܟܚܺܝܕܽܘܬܳܐ܆ ܠܕܰܝܪ̈ܳܝܶܐ ܡܚܰܡܣܢܳܢܽܘܬܳܐ܆ ܠܥܰܬܺܝܪ̈ܶܐ ܪܶܚܡܰܬ ܐ̱ܢܳܫܽܘܬܳܐ܆ ܠܡܶܣ̈ܟܺܢܶܐ ܙܝܳܢܬܳܐ ܛܳܒܬܳܐ܆ ܠܥܺܕ̈ܳܬܐܳ ܪܽܘܡܪܳܡܳܐ܆ ܠܕܰܝܪ̈ܳܬܳܐ ܩܽܘܝܳܡܳܐ܆ ܠܡܰܠܟ̈ܶܐ ܒܗܺܝܠܽܘܬܳܐ܆ ܠܦܳܠܚ̈ܶܐ ܡܶܫܬܰܡܥܳܢܽܘܬܳܐ܆ ܠܚܰܛܳܝ̈ܶܐ ܫܽܘܒܩܳܢܳܐ܆ ܠܛܳܥܰܝ̈ܳܐ ܦܽܘܢܳܝܳܐ܆ ܠܰܪ̈ܓܺܝܙܶܐ ܫܰܝܢܳܐ ܘܰܫܠܳܡܳܐ܆ ܘܰܠܟܽܠܗܽܘܢ ܡܗܰܝܡ̈ܢܶܐ ܣܰܒܪܳܐ ܛܳܒܳܐ܆ ܘܰܠܥܰܢܺܝ̈ܕܶܐ ܚܽܘܣܳܝܳܐ܆ ܘܠܰܢ ܘܰܠܗܽܘܢ ܡܛܰܝܒܽܘܬܳܐ ܕܩܰܘܡܳܐ ܠܳܐ ܥܕܺܝܠܳܐ ܒܫܽܘܒܚܳܐ ܕܪܰܒܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܩܽܘܩܳܝܳܐ
ܐܳܡ̇ܪܺܝܢ ܣܳܒ̈ܶܐ ܠܰܛܠܳܝ̈ܶܐ ܕܣܰܒܽܘ̇ܢ ܟܺܐܦ̈ܶܐ܆ ܘܦܽܘܩܽܘ̇ܢ ܠܐܽܘܪܥܶܗ ܕܗܰܘ ܕܳܐܬܶܐ ܕܢܶܥܽܘܠ ܠܽܐܘܪܺܫܠܶܡ܆ ܫܩܰܠܘ̱ ܗ̱ܘܰܘ ܟܺܐܦ̈ܶܐ܆ ܘܰܢܦܰܩܘ̱ ܠܰܩܕܳܡܰܘܗ̱ܝ܆ ܚܙܰܐܘܽܗ̱ܝ ܕܳܐܬܶܐ܆ ܥܰܠ ܛܽܘܪܳܐ ܕܙܰܝ̈ܬܶܐ܆ ܫܕܰܘ ܟܺܐܦ̈ܶܐ ܡܶܢ ܐܺܝܕܰܝ̈ܗܽܘ̇ܢ ܘܣܰܘ̈ܟܶܐ ܕܙܰܝ̈ܬܶܐ ܛܥܶܢܘ̱܆ ܘܰܩܥܰܘ ܠܶܗ ܕܬܳܐ ܒܰܫܠܳܡܳܐ ܡܰܠܟܶܗ ܕܺܐܝܣܪܳܐܶܝܠ ܗ̄ ܒܪܺܝܟܳܐ ܗ̱ܝ ܡܶܐܬܺܝܬܳܟ܀
ܫܽܘܒܚܳܐ
ܗܳܢܰܘ ܚܰܬܢܳܐ ܫܡܰܝܳܢܳܐ ܩܳܥܝܳܐ ܥܺܕܬܳܐ܆ ܒܪܶܗ ܕܕܰܘܺܝܕ ܘܡܳܪܶܗ ܕܕܰܘܺܝܕ ܥܺܝܠܳܐ ܫܺܝܛܳܐ ܪܟܶܒ܆ ܐܳܙܳܠܐ̱ ܩܽܘܕܡܰܘܗ̱ܝ܆ ܓܽܘܕܳܐ ܕܰܢܒܺܝ̈ܶܐ܆ ܘܳܐܬܝܳܐ ܒܳܬܪܶܗ܆ ܓܽܘܕܳܐ ܕܰܫܠܺܝ̈ܚܶܐ܆ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܩܳܥܶܝܢ ܘܳܐܡܪܺܝܢ܆ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܒܪܺܝܟ ܕܶܐܬܳܐ ܘܦܰܪܩܰܢ ܗ̄ ܐܽܘܫܰܥܢܳܐ ܒܪܰܘܡܳܐ܀
ܥܶܛܪܳܐ
ܦܬܰܚ ܡܳܪܝ̱ ܬܰܪ̈ܥܶܐ ܪ̈ܳܡܶܐ ܕܰܫܡ̈ܰܝܳܐ ܥܶܠܳܝ̈ܶܐ ܘܡܰܕܒܚ̈ܶܐ ܫܒܺܝ̈ܚܶܐ ܕܪ̈ܰܚܡܰܝܟ ܡܬܽܘ̈ܡܳܝܶܐ܆ ܘܢܶܣܰܩ ܥܶܛܪܳܐ ܒܰܣܺܝܡܳܐ ܡܶܢ ܟܶܢܫܰܢ ܠܣܶܕܪ̈ܰܝܗܽܘ̇ܢ ܕܢܽܘܪ̈ܳܢܶܐ܆ ܘܳܐܦ ܒܥܺܐܕܳܐ ܗܳܢܳܐ ܕܒܶܗ ܦܨܺܝܚܺܝܢ ܫܡܰܝ̈ܳܢܶܐ ܘܰܐܪ̈ܥܳܢܶܐ ܘܟܽܠܗܽܘܢ ܡܥܰܕܥܕ̈ܳܢܶܐ ܕܥܺܐܕ̈ܶܐ ܦܳܪ̈ܽܘܩܳܝܶܐ܆ ܢܶܬܩܰܒܰܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܠܳܟ ܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܘܫܰܟܶܢ ܒܶܗ ܦܽܘܢܳܝܳܐ ܡܫܰܡܠܝܳܐ ܠܫ̈ܶܐܠܳܬܰܢ ܫܰܦܺܝܪ̈ܳܬܳܐ܆ ܘܢܰܛܰܪ ܒܪ̈ܰܚܡܰܝܟ ܡܳܪܝܳܐ ܠܟܽܠܗܽܘܢ ܡܗܰܝܡ̈ܢܶܐ ܫܰܪ̈ܺܝܪܶܐ܆ ܘܚܰܣܳܐ ܒܶܗ ܠܟܽܠܗܽܘܢ ܚܰܛܳܝ̈ܶܐ ܘܚܰܝ̈ܳܒܶܐ܆ ܘܰܐܢܺܝܚ ܒܶܗ ܪ̈ܽܘܚܳܬܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀
ܥܰܡܳܐ: ܐܰܡܺܝܢ܀
ܚܽܘܬܳܡܳܐ
ܣܽܘܟܳܝܳܐ ܕܙܰܕܺܝ̈ܩܶܐ ܘܚܽܘܬܳܡ ܡܶܠܰܝ̈ܗܽܘ̇ܢ ܕܟܺܐܢ̈ܶܐ܆ ܕܰܒܝܰܕ ܪܟܳܒܳܐ ܕܺܝܠܶܗ ܕܥܰܠ ܥܺܝܠܳܐ ܫܺܝܛܳܐ ܩܪܳܝܬܳܐ ܕܥܰܡ̱̈ܡܶܐ ܠܳܐ ܕܟܰܝ̈ܳܐ ܒܰܕܶܩ܆ ܘܰܒܝܰܕ ܗܰܠܟ̈ܳܬܶܗ ܕܥܰܠ ܣܰܘ̈ܟܰܝ ܙܰܝ̈ܬܶܐ ܘܰܕܕܶܩ̈ܠܶܐ ܙܳܟܽܘܬܳܐ ܕܥܰܠ ܚܰܫ̈ܶܐ ܠܗܽܘܢ ܝܰܗܒ܆ ܘܰܒܩ̈ܳܠܶܐ ܕܰܡܒܰܕ̈ܩܳܢܶܐ ܕܗܳܝ ܕܶܐܬܳܐ ܘܳܐܬܶܐ ܒܰܫܡܶܗ ܕܡܳܪܝܳܐ܆ ܥܰܡ ܡܶܐܬܺܝܬܳܐ ܩܰܕܡܳܝܬܳܐ ܘܰܐ̱ܚܪܳܝܬܳܐ ܣܰܒܪܳܐ ܠܢܽܘܚܳܡܰܢ ܫܒܰܩ܆ ܐܰܢ̱ܬ ܫܰܟܶܢ ܠܰܢ ܕܰܒܝܰܕ ܣܰܘ̈ܟܶܐ ܠܳܐ ܡܳܝܽܘ̈ܬܶܐ ܕܦܰܪܕܰܝܣܳܐ ܪܽܘܚܳܢܳܝܳܐ ܢܥܰܕܥܶܕ ܠܳܟ ܥܺܐܕܳܐ ܗܳܢܳܐ ܠܳܐ ܥܳܒܽܘܪܳܐܺܝܬ ܒܩܰܘܡܳܐ ܕܩܰܕܺܝ̈ܫܶܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ̱ ܝܰܥܩܽܘܒ
ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܩܥܰܘ ܝܰܠܽܘ̈ܕܶܐ܆ ܩܰܕܺܝܫ ܡܳܪܝܳܐ ܕܰܪܟܶܒ ܥܺܝܠܳܐ ܘܥܰܠ ܠܽܐܘܪܺܫܠܶܡ܀
ܙܡܰܪ ܠܶܗ ܙܡܰܪ ܠܶܗ ܙܡܰܪ ܠܶܗ ܫܽܘܒܚܳܐ ܠܒܰܪ ܐܰܠܳܗܳܐ܆ ܠܫܽܘܒܚܶܗ ܣܳܡܳܟ ܠܡܽܘ̇ܢ ܒܰܛܺܝܠ ܐܰܢ̱ܬ ܡܶܢ ܬܶܫܒܽܘܚܬܶܗ܀
ܐܰܪܡܝ ܡܳܪܰܢ ܐܽܘܪܚܶܗ ܒܥܳܠܡܳܐ ܠܰܡܗܰܠܳܟܽܘ܆ ܒܡܰܟܺܝܟܽܘܬܳܐ ܕܰܪܚܺܝܡܳܐ ܠܶܗ ܡܶܢ ܟܽܠ ܡܶܕܶܡ܆ ܒܣܰܪ ܗ̱ܘܳܐ ܘܰܐܣܠܺܝ ܪ̈ܟܽܘܒܶܐ ܡܨܰܒ̈ܬܶܐ ܕܡܳܪ̈ܰܘܳܬܳܐ܆ ܘܰܪܟܶܒ ܥܺܝܠܳܐ ܕܢܶܣܥܽܘܪ ܥܰܡ̱̈ܡܶܐ ܒܡܰܟܺܝܟܽܘܬܳܐ܀
ܥܠܰܝ̈ܡܶܐ ܦܪܰܥܘ̱ ܗ̱ܘܰܘ ܚܰܘܒܬܳܐ ܕܚܳܒܘ̱ ܗ̱ܘܰܘ ܣܳܒܰܝ̈ ܥܰܡܳܐ܆ ܘܬܶܩܢܰܬ ܬܰܡܳܢ ܗܳܝ ܬܶܫܒܽܘܚܬܳܐ ܕܡܶܬܒܰܥܝܳܐ ܗ̱ܘܳܬ܆ ܒܪܺܝܟܽ ܗ̱ܘ ܕܶܐܬܳܐ ܒܰܫܡܶܗ ܕܡܳܪܝܳܐ ܩܥܰܘ ܬܰܡܺܝ̈ܡܶܐ܆ ܘܪܶܥܡܰܬ ܐܽܘܪܚܶܗ ܕܡܰܠܟܳܐ ܕܶܐܬܳܐ ܒܫܽܘܒܚܳܐ ܪܰܒܳܐ܀
ܢܒܺܝ̈ܶܐ ܡܶܢ ܩܽܘܕܡܰܘܗ̱ܝ܆ ܫܠܺܝ̈ܚܶܐ ܡܶܢ ܒܳܬܪܶܗ܆ ܘܝܰܠܽܘ̈ܕܶܐ ܘܫܰܒܪ̈ܶܐ ܒܐܽܘܫܰܥ̈ܢܶܐ ܩܰܠܣܽܘܗ̱ܝ܀
ܙܘܡܳܪܳܐ: ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ܆ ܩܥܰܘ ܫܰܒܪ̈ܶܐ ܒܫܽܘ̈ܩܰܝ ܨܶܗܝܽܘܢ ܗ̄܀
ܩܶܪ̈ܝܳܢܶܐ:
ܒܪܺܝܬܳܐ. ܡܛ܆ ܚ ـ ܝܒ Genesis 49:8-12
ܙܟܰܪܝܳܐ. ܛ܆ ܛ- ܝܒ Zachariah 9:9-11
ܐܶܫܰܥܝܳܐ. ܢܐ܆ ܛ- ܝܐ Isaiah 51:9-11
ܐ ܕܽܝܘܚܰܢܳܢ. ܒ܆ ܙ ـ ܝܗ I John 2:7-15
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܐ܆ ܝܕ ـ ܟܕ Romans 11:14-24
ܐܰܚܰܝ̈܆ ܠܟܽܘܢ ܕܶܝܢ ܐܳܡܰܪ ܐ̱ܢܳܐ ܠܥܰܡ̱̈ܡܶܐ. ܐܶܢܳܐ ܕܺܐܝܬܰܝ ܫܠܺܝܚܳܐ ܕܥܰܡ̱̈ܡܶܐ܆ ܠܬܶܫܡܶܫܬܝ ܡܫܰܒܰܚ ܐ̱ܢܳܐ. ܕܰܠܡܳܐ ܐܰܛܶܢ ܠܰܒܢܰܝ̈ ܒܶܣܪܝ܇ ܘܰܐܚܶܐ ܐ̱ܢܳܫܺܝ̈ܢ ܡܶܢܗܽܘܢ. ܐܶܢ ܓܶܝܪ ܡܶܣܬܰܠܝܳܢܽܘܬܗܽܘܢ ܬܰܪܥܽܘܬܳܐ ܠܥܳܠܡܳܐ ܗܘܳܬ܆ ܟܡܳܐ ܗܳܟܺܝܠ ܦܽܘܢܳܝܗܽܘܢ܇ ܐܶܠܳܐ ܚܰܝ̈ܶܐ ܕܡܶܢ ܒܶܝܬ ܡܺܝ̈ܬܶܐ. ܘܶܐܢ ܕܶܝܢ ܪܺܫܺܝܬܳܐ ܩܰܕܺܝܫܳܐ܆ ܐܳܦ ܓܒܺܝܠܬܳܐ. ܘܶܐܢ ܥܶܩܳܪܳܐ ܩܰܕܺܝܫ ܗ̱ܘܽ܆ ܐܳܦ ܣܰܘ̈ܟܶܐ. ܘܶܐܢ ܡܶܢ ܣܰܘ̈ܟܶܐ ܐܶܬܦܫܰܚ܇ ܘܰܐܢ̱ܬ ܕܙܰܝܬܳܐ ܐܰܢ̱ܬ ܕܒܰܪܳܐ ܐܶܬܛܥܶܡܬ ܒܕܽܘ̈ܟܝܳܬܗܶܝܢ܇ ܘܰܗܘܰܝܬ ܫܰܘܬܳܦܳܐ ܠܥܶܩܳܪܶܗ ܘܰܠܫܽܘܡܢܶܗ ܕܙܰܝܬܳܐ܆ ܠܳܐ ܬܶܫܬܰܒܗܰܪ ܥܰܠ ܣܰܘ̈ܟܶܐ. ܐܶܢ ܕܶܝܢ ܡܶܫܬܰܒܗܰܪ ܐܰܢ̱ܬ܆ ܠܳܐ ܗ̱ܘܳܐ ܐܰܢ̱ܬ ܫܩܺܝܠ ܠܶܗ ܠܥܶܩܳܪܳܐ܇ ܐܶܠܳܐ ܗܽܘ ܥܶܩܳܪܳܐ ܫܩܺܝܠ ܠܳܟ. ܘܰܟܒܰܪ ܬܺܐܡܰܪ ܕܣܰܘ̈ܟܶܐ ܕܶܐܬܦܫܰܚ̈ܝ̱܆ ܕܶܐܢܳܐ ܒܕܽܘ̈ܟܝܳܬܗܶܝܢ ܐܶܬܛܥܶܡ. ܫܰܦܺܝܪ. ܗܳܠܶܝܢ ܡܶܛܽܠ ܕܠܳܐ ܗܰܝܡܶܢ܂ ܐܶܬܦܫܰܚܘ̱. ܐܰܢ̱ܬ ܕܶܝܢ ܒܗܰܝܡܳܢܽܘܬܳܐ ܩܳܡܬ. ܠܳܐ ܬܶܬܪܺܝܡ ܒܪܶܥܝܳܢܳܟ܆ ܐܶܠܳܐ ܕܚܰܠ. ܐܶܢ ܐܰܠܳܗܳܐ ܓܶܝܪ ܥܰܠ ܣܰܘ̈ܟܶܐ ܕܡܶܢ ܟܝܳܢܗܶܝܢ ܠܳܐ ܚܳܣ܆ ܕܰܠܡܳܐ ܐܳܦܠܳܐ ܥܠܰܝܟ ܢܶܚܽܘܣ. ܚܙܺܝ ܗܳܟܺܝܠ ܒܰܣܺܝܡܽܘܬܶܗ ܘܩܰܫܝܽܘܬܶܗ ܕܰܐܠܳܗܳܐ. ܥܰܠ ܐܰܝܠܶܝܢ ܕܰܢܦܰܠܘ܂ ܩܰܫܝܽܘܬܳܐ. ܥܠܰܝܟ ܕܶܝܢ ܒܰܣܺܝܡܽܘܬܳܐ܆ ܐܶܢ ܬܩܰܘܶܐ ܒܳܗ̇ ܒܒܰܣܺܝܡܽܘܬܳܐ. ܘܶܐܢ ܠܳܐ܇ ܐܳܦ ܐܰܢ̱ܬ ܬܶܬܦܫܰܚ. ܘܗܳܢܽܘܢ ܐܶܢ ܠܳܐ ܢܩܰܘܽܘܢ ܒܚܰܣܺܝܪܽܘܬ ܗܰܝܡܳܢܽܘܬܗܽܘܢ܆ ܐܳܦ ܗܶܢܽܘܢ ܢܶܬܛܰܥܡܽܘܢ. ܡܶܫܟܰܚ ܓܶܝܪ ܐܰܠܳܗܳܐ ܕܬܽܘܒ ܢܰܛܥܶܡ ܐܶܢܽܘܢ. ܐܶܢ ܓܶܝܪ ܐܰܢ̱ܬ ܕܡܶܢ ܙܰܝܬܳܐ ܐܰܢ̱ܬ ܕܒܰܪܳܐ܇ ܗܰܘ ܕܒܰܟܝܳܢܳܟ ܐܶܬܦܫܰܚܬ܇ ܘܰܕܠܳܐ ܒܰܟܝܳܢܳܟ ܐܶܬܛܥܶܡܬ ܒܙܰܝܬܳܐ ܛܳܒܳܐ܆ ܟܡܳܐ ܗܳܟܺܝܠ ܗܳܢܽܘܢ ܐܶܢ ܢܶܬܛܰܥܡܽܘܢ ܒܙܰܝܬܳܐ ܕܰܟܝܳܢܗܽܘܢ. ܒܰܪܶܟܡܳܪܝ̱܀
ܗܽܘܠܳܠܳܐ ܘܦܶܬܓܳܡܳܐ
ܘܶܐܢܳܐ ܐܰܝܟ ܙܰܝܬܳܐ ܡܫܰܒܚܳܐ܆ ܒܒܰܝܬܶܗ ܕܰܐܠܳܗܳܐ ܠܥܳܠܰܡ ܗ̄܀
ܐܶܘܰܢܓܶܠܝܽܘܢ ܕܡܰܪܩܽܘܣ
(ܝܐ܆ ܐ ـ ܝܚ Mark 11: 1-18)
ܘܟܰܕ ܩܪܶܒ ܠܽܐܘܪܺܫܠܶܡ܆ ܥܰܠ ܓܶܢ̱ܒ ܒܶܝܬܦܳܓ̈ܶܐ ܘܒܶܝܬܥܰܢܝܳܐ ܠܘܳܬ ܛܽܘܪܳܐ ܕܙܰܝ̈ܬܶܐ܆ ܫܰܕܰܪ ܬܪܶܝܢ ܡܶܢ ܬܰܠܡܺܝ̈ܕܰܘܗ̱ܝ܆ ܘܶܐܡܰܪ ܠܗܽܘܢ: ܙܶܠܘ ܠܰܩܪܺܝܬܳܐ ܗܳܝ ܕܰܠܩܽܘܒܠܰܢ܆ ܘܒܰܪ ܫܳܥܬܶܗ ܕܥܳܐܠܺܝܢ ܐܢ̱ܬܽܘܢ ܠܳܗ̇܆ ܡܶܫܟܚܺܝܢ ܐܢ̱ܬܽܘܢ ܥܺܝܠܳܐ ܕܰܐܣܺܝܪ. ܕܐ̱ܢܳܫ ܡܶܢ ܒܢܰܝ̈ܢܳܫܳܐ ܠܳܐ ܪܰܟܒܶܗ. ܫܪܰܘ ܐܰܝܬܰܐܘܽܗ̱ܝ. ܘܶܐܢ ܐ̱ܢܳܫ ܢܺܐܡܰܪ ܠܟܽܘܢ ܡܳܢܳܐ ܥܳܒܕܺܝܢ ܐܢ̱ܬܽܘܢ ܗܳܕܶܐ܆ ܐܶܡܰܪܘ ܠܶܗ: ܕܰܠܡܳܪܰܢ ܡܶܬܒܥܶܐ܆ ܘܡܶܚܕܳܐ ܡܫܰܕܰܪ ܠܶܗ ܠܟܳܐ. ܘܶܐܙܰܠܘ ܐܶܫܟܰܚܘ ܥܺܝܠܳܐ ܕܰܐܣܺܝܪ ܥܰܠ ܬܰܪܥܳܐ ܠܒܰܪ ܒܫܽܘܩܳܐ. ܘܟܰܕ ܫܳܪܶܝܢ ܠܶܗ܆ ܐ̱ܢܳܫܺܝ̈ܢ ܡܶܢ ܐܰܝܠܶܝܢ ܕܩܳܝܡܺܝܢ܂ ܐܶܡܰܪܘ ܠܗܽܘܢ: ܡܳܢܳܐ ܥܳܒܕܺܝܢ ܐܢ̱ܬܽܘܢ ܕܫܳܪܶܝܢ ܐܢ̱ܬܽܘܢ ܥܺܝܠܳܐ. ܗܶܢܽܘܢ ܕܶܝܢ ܐܶܡܰܪܘ ܠܗܽܘܢ܁ ܐܰܝܟ ܕܦܰܩܶܕ ܐܶܢܽܘܢ ܝܶܫܽܘܥ܆ ܘܰܫܒܰܩܘ ܐܶܢܽܘܢ. ܘܰܐܝܬܝܽܘܗ̱ܝ ܠܥܺܝܠܳܐ ܠܘܳܬ ܝܶܫܽܘܥ܆ ܘܰܐܪܡܺܝܘ ܥܠܰܘܗ̱ܝ ܡܳܐܢܰܝ̈ܗܽܘܢ܁ ܘܰܪܟܶܒ ܥܠܰܘܗ̱ܝ ܝܶܫܽܘܥ. ܣܰܓܺܝ̈ܶܐܐ ܕܶܝܢ܂ ܡܫܰܘܶܝܢ ܗ݈ܘܰܘ ܢܰܚܬܰܝ̈ܗܽܘܢ ܒܽܐܘܪܚܳܐ. ܘܰܐ̱ܚܪ̈ܳܢܶܐ ܦܳܣܩܺܝܢ ܗ̱ܘܰܘ ܣܰܘ̈ܟܶܐ ܡܶܢ ܐܺܝ̈ܠܳܢܶܐ ܘܰܡܫܰܘܶܝܢ ܒܽܐܘܪܚܳܐ. ܘܗܳܢܽܘܢ ܕܰܩܕܳܡܰܘܗ̱ܝ܁ ܘܗܳܢܽܘܢ ܕܒܳܬܪܶܗ܆ ܩܳܥܶܝܢ ܗ̱ܘܰܘ܂ ܘܳܐܡܪܺܝܢ:
ܐܽܘܫܰܥܢܳܐ ܒܪܺܝܟ ܗ̱ܘܽ ܕܳܐܬܶܐ ܒܰܫܡܶܗ ܕܡܳܪܝܳܐ. ܘܰܒܪܺܝܟܳܐ ܗ̱ܝ ܡܰܠܟܽܘܬܳܐ ܕܳܐܬܝܳܐ ܕܰܐܒܽܘܢ ܕܰܘܺܝܕ. ܐܽܘܫܰܥܢܳܐ ܒܰܡܪ̈ܰܘܡܶܐ.
ܘܥܰܠ ܝܶܫܽܘܥ ܠܽܐܘܪܺܫܠܶܡ ܠܗܰܝܟܠܳܐ܆ ܘܰܚܙܳܐ ܟܽܠܡܶܕܶܡ. ܟܰܕ ܗܘܳܐ ܕܶܝܢ ܥܶܕܳܢܳܐ ܕܪܰܡܫܳܐ܆ ܢܦܰܩ ܠܒܶܝܬܥܰܢܝܳܐ ܥܰܡ ܬܪܶܥܣܰܪ. ܘܰܠܝܰܘܡܳܐ ܐ̱ܚܪܺܢܳܐ܇ ܟܰܕ ܢܦܰܩ ܡܶܢ ܒܶܝܬܥܰܢܝܳܐ ܟܦܶܢ. ܘܰܚܙܳܐ ܬܺܬܳܐ ܚܕܳܐ ܡܶܢ ܪܽܘܚܩܳܐ܂ ܕܺܐܝܬ ܒܳܗ ܛܰܪ̈ܦܶܐ. ܘܶܐܬܳܐ ܠܘܳܬܳܗ̇ ܕܶܐܢ ܢܶܫܟܰܚ ܒܳܗ̇ ܡܶܕܶܡ. ܘܟܰܕ ܐܶܬܳܐ܆ ܠܳܐ ܐܶܫܟܰܚ ܒܳܗ̇ ܐܶܠܳܐ ܐܶܢ ܛܰܪ̈ܦܶܐ. ܙܰܒܢܳܐ ܓܶܝܪ ܠܳܐ ܗܘܳܐ ܗ̱ܘܳܐ ܕܬܺܐܢ̈ܶܐ. ܘܶܐܡܰܪ ܠܳܗ̇: ܡܶܟܺܝܠ ܘܰܠܥܳܠܰܡ ܐ݈ܢܳܫ ܡܶܢܶܟܝ̱ ܦܺܐܪ̈ܶܐ ܠܳܐ ܢܶܐܟܽܘܠ. ܘܰܫܡܰܥܘ ܬܰܠܡܺܝ̈ܕܰܘܗ݈ܝ܂ ܘܶܐܬܰܘ ܠܽܐܘܪܺܫܠܶܡ. ܘܥܰܠ ܝܶܫܽܘܥ ܠܗܰܝܟܠܳܐ ܕܰܐܠܳܗܳܐ܆ ܘܫܰܪܺܝ ܕܢܰܦܶܩ ܠܰܐܝܠܶܝܢ ܕܙܳܒܢܺܝܢ ܘܰܡܙܰܒܢܺܝܢ ܒܗܰܝܟܠܳܐ. ܘܰܗܦܰܟ ܦܳܬܽܘܪ̈ܶܐ ܕܰܡܥܰܪ̈ܦܳܢܶܐ܂ ܘܟܽܘܪ̈ܣܰܘܳܬܳܐ ܕܗܳܢܽܘܢ ܕܰܡܙܰܒܢܺܝܢ ܝܰܘ̈ܢܶܐ. ܘܠܳܐ ܫܳܒܶܩ ܗ̱ܘܳܐ ܕܐ̱ܢܳܫ ܢܰܥܒܰܪ ܡܳܐܢ̈ܶܐ ܒܓܰܘ ܗܰܝܟܠܳܐ. ܘܡܰܠܶܦ ܗ̱ܘܳܐ܂ ܘܳܐܡܰܪ ܠܗܽܘܢ: ܠܳܐ ܟܬܺܝܒ܈ ܕܒܰܝܬܝ܁ ܒܶܝܬ ܨܠܽܘܬܳܐ ܢܶܬܩܪܶܐ ܠܟܽܠܗܽܘܢ ܥܰܡ̱̈ܡܶܐ܆ ܐܰܢ̱ܬܽܘܢ ܕܶܝܢ ܥܒܰܕܬܽܘܢܳܝܗ̱ܝ܂ ܡܥܰܪܬܳܐ ܕܠܶܣ̈ܛܳܝܶܐ. ܘܰܫܡܰܥܘ ܪ̈ܰܒܰܝ ܟܳܗ̈ܢܶܐ ܘܣܳܦܪ̈ܶܐ. ܘܒܳܥܶܝܢ ܗ̱ܘܰܘ ܕܰܐܝܟܰܢܳܐ ܢܰܘܒܕܽܘܢܳܝܗ̱ܝ. ܕܳܚܠܺܝܢ ܗ̱ܘܰܘ ܓܶܝܪ ܡܶܢܶܗ. ܡܶܛܽܠ ܕܟܽܠܶܗ ܥܰܡܳܐ ܬܰܡܺܝܗܺܝܢ ܗ̱ܘܰܘ ܒܝܽܘܠܦܳܢܶܗ܀
ܪܺܝܫ ܡܫ̈ܰܡܫܳܢܶܐ ܐܳܡܰܪ ܠܽܘܛܰܢܺܝܰܐ ܟܰܕ ܡܰܙܥܶܩ
ܢܩܽܘܡ ܫܰܦܺܝܪ ܟܽܠܰܢ ܒܰܚܦܺܝܛܽܘܬܳܐ ܘܰܒܩ̈ܳܠܶܐ ܕܰܡܪܰܥܶܝܢ ܠܰܐܠܳܗܳܐ ܢܶܥܢܶܐ ܘܢܺܐܡܰܪ: ܩܽܘܪܝܶܐܠܰܝܣܳܘܢ܀
ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܕܒܰܫܡܰܝܳܐ ܠܳܐ ܐܶܬܥܰܪܺܝܬ ܘܥܰܠ ܥܺܝܠܳܐ ܕܰܐܬܳܢܳܐ ܡܰܟܺܝܟܳܐ ܝܺܬܶܒܬ ܡܦܺܝܣܺܝܢܰܢ ܠܳܟ: ܩܽܘܪܝܶܐܠܰܝܣܳܘܢ܀
ܗܰܘ ܕܥܰܠ ܥܺܝܠܳܐ ܕܠܳܐ ܡܶܠܬܳܐ ܦܰܓܪܳܢܳܐܺܝܬ ܪܟܶܒܬ܆ ܘܰܠܫܽܘܥܒܳܕܳܐ ܕܥܰܡ̱̈ܡܶܐ ܩܰܕܶܡܬ ܫܰܘܕܰܥܬ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܗܰܘ ܕܰܠܠܶܫܳܢ̈ܶܐ ܗܳܢܽܘ̇ܢ ܕܰܡܠܰܓܠܓܺܝܢ ܡܪܰܩܬ ܐܰܝܟܰܢܳܐ ܕܰܪܗܺܝܛܪܳܐܺܝܬ ܢܫܰܒܚܽܘ̇ܢ ܠܽܘܩܒܰܠ ܠܳܐ ܗܰܝܡܳܢܽܘܬܳܐ ܕܝܳܠܽܘܕܰܝ̈ܗܽܘ̇ܢ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܗܰܘ ܕܡܶܢ ܦܪ̈ܺܝܫܶܐ ܐܰܝܟ ܡܰܛܥܝܳܢܳܐ ܡܶܬܪܕܶܦ ܗ̱ܘܰܝܬ ܘܡܶܢ ܫܰܒܪ̈ܶܐ ܐܰܝܟ ܐܰܠܳܗܳܐ ܡܶܫܬܰܒܰܚ ܗ̱ܘܰܝܬ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܗܰܘ ܕܡܶܢ ܠܶܫܳܢ̈ܶܐ ܫܰܒܪ̈ܳܝܶܐ ܘܠܳܐ ܡܫܰܡܠܰܝ̈ܳܐ ܫܽܘܒܚܳܐ ܡܫܰܡܠܝܳܐ ܘܰܓܡܺܝܪܳܐ ܐܰܢ̱ܬ ܠܳܟ ܬܰܩܶܢܬ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܗܰܘ ܕܡܶܢ ܚܰܝܠܰܘ̈ܳܬܳܐ ܕܢܽܘܪ̈ܳܢܶܐ ܒܕܶܚܠܬܳܐ ܘܒܰܪܬܺܝܬܳܐ ܡܶܣܬܓܶܕ ܐܰܢ̱ܬ܆ ܡܶܢ ܫܰܒܪ̈ܶܐ ܘܝܰܠܽܘ̈ܕܶܐ ܒܚܽܘܒܳܐ ܫܰܦܝܳܐܺܝܬ ܡܶܫܬܰܒܰܚ ܗ̱ܘܰܝܬ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܚܠܳܦ ܫܰܝܢܳܐ ܘܰܫܠܳܡܳܐ ܕܟܽܠܶܗ ܥܳܠܡܳܐ܆ ܘܰܚܠܳܦ ܐܰܒܳܗ̈ܳܬܰܢ ܚܣܰܝ̈ܳܐ ܘܛܽܘܒ̈ܬܳܢܶܐ ܦܰܛܪܝܰܪ̈ܟܽܘ ܕܺܝܠܰܢ ܐܰܒܽܘ̇ܢ ܡܳܪܝ̱ ܐܺܝܓܢܰܐܛܺܝܳܘܣ (ܦܠܳܢ) ܘܚܰܣܝܳܐ ܕܺܝܠܰܢ ܡܳܪܝ̱ (ܦܠܳܢ) ܆ܥܰܡ ܫܰܪܟܳܐ ܕܟܽܠܗܽܘܢ ܐܶܦܺܝܣܩܽܘ̈ܦܶܐ ܐܰܪ̈ܬܳܘܕܳܘܟܣܽܘ܆ ܘܰܚܠܳܦ ܕܽܘܟܪܳܢܳܐ ܕܝܳܠܕܰܬ ܐܰܠܳܗܳܐ ܡܰܪܝܰܡ ܘܰܕܩܰܕܺܝ̈ܫܶܐ ܘܰܕܥܰܢܺܝ̈ܕܶܐ ܡܗܰܝܡ̈ܢܶܐ܆ ܒܳܥܶܝܢܰܢ ܡܶܢܳܟ: ܩܽܘܪܝܶܐܠܰܝܣܳܘܢ܀
ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܳܐ ܕܺܝܠܰܢ ܠܡܶܬܕܰܡܳܝܽܘ ܒܡܽܘܟܳܟܳܟ ܕܰܚܠܳܦܰܝܢ ܘܰܠܡܶܦܰܩ ܠܽܐܘܪܥܳܟ ܒܡܶܐܬܺܝܬܳܟ ܕܬܰܪܬܶܝܢ ܕܡܶܢ ܫܡܰܝܳܐ܆ ܟܰܕ ܡܚܰܪܪܺܝܢܰܢ ܡܶܢ ܟܽܠܳܗ̇ ܨܳܐܽܘܬܳܐ ܕܰܚܛܺܝܬܳܐ܆ ܘܒܰܠܒܽܘ̈ܫܶܐ ܕܠܳܐ ܡܶܬܚܰܒܠܳܢܽܘܬܳܐ ܘܰܒܢܰܚ̈ܬܶܐ ܫܒܺܝ̈ܚܶܐ ܕܰܡܝܰܬܪܽܘܬܳܐ ܥܰܡ ܟܽܠܶܗ ܟܶܢܫܳܐ ܕܰܓܒܰܝ̈ܳܐ ܕܺܝܠܳܟ ܒܓܰܠܝܽܘܬ ܐܰܦ̈ܶܐ ܢܩܰܒܠܳܟ܆ ܘܢܰܙܥܶܩ ܘܢܺܐܡܰܪ ܬܠܳܬ ܙܰܒܢܺܝ̈ܢ: ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܘܪܝܶܐܠܰܝܣܘܢ܀
ܬܽܘܒ ܗܳܪܟܳܐ ܡܫܰܪܶܐ ܪ̈ܺܝܫܟܳܗܢܶܐ ܐܰܘ̇ ܟܳܗܢܳܐ ܒܒܽܘܪܳܟ ܣܰܘ̈ܟܶܐ ܕܙܰܝܬܳܐ ܘܕܶܩ̈ܠܶܐ ܒܩܺܝܢܬܳܐ ܕܩܽܘܪܳܒܳܐ ܟܰܕ ܐܺܝܕܰܘ̈ܗ̱ܝ ܦܫܺܝ̈ܛܳܢ܆
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ ܨܠܘܬܳܐ
ܚܰܣܳܐ ܡܳܪܝ̱ ܚܰܘ̈ܒܰܝܢ ܒܛܰܝܒܽܘܬܳܟ ܘܰܫܒܽܘܩ ܣܰܟܠܘ̈ܳܬܰܢ ܒܰܡܪܰܚܡܳܢܘܬܳܟ܆ ܘܗܰܒܠܰܢ ܕܢܶܗܘܶܐ ܕܺܝܠܳܟ ܘܢܶܫܦܰܪ ܠܳܟ ܐܰܝܟ ܨܶܒܝܳܢܳܟ ܘܢܶܫܟܰܚ ܪ̈ܰܚܡܶܐ ܩܕܳܡܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ: ܡܳܪܝܳܐ ܐܰܠܳܗܳܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ܆ ܕܰܟܪ̈ܽܘܒܶܐ ܘܰܣܪ̈ܳܦܶܐ ܘܡܰܠܰܐܟ̈ܶܐ܆ ܛܶܟ̈ܣܶܐ ܟܽܠܗܽܘܢ ܕܪ̈ܽܘܚܳܢܶܐ܆ ܪܳܥܠܺܝܢ ܘܟܳܘܙܺܝܢ ܡܶܢ ܢܽܘܪܳܐ ܚܰܝܬܳܐ ܕܰܐܠܳܗܽܘܬܳܟ܆ ܘܰܒܕܶܚܠܬܳܐ ܘܙܰܘܥܬܳܐ ܡܒܰܪܟܺܝܢ ܘܰܡܫܰܒܚܺܝܢ ܘܰܡܩܰܕܫܺܝܢ ܠܪܰܒܽܘܬܳܟ ܕܠܳܐ ܫܰܠܘܳܐ܆ ܘܰܒܥܽܘܡܩܳܐ ܠܬܰܚܬ ܥܰܠ ܐܰܪܥܳܐ ܡܶܢ ܝܰܠܽܘ̈ܕܶܐ ܘܫܰܒܪ̈ܶܐ ܘܰܥܠܰܝ̈ܡܶܐ ܘܡܶܢ ܬܰܠܡܺܝ̈ܕܶܐ ܫܦܰܝ̈ܳܐ ܘܩܰܕܺܝ̈ܫܶܐ ܒܽܐܘ̈ܫܰܥ̈ܢܶܐ ܨܒܰܝܬ ܕܬܶܫܬܰܒܰܚ ܘܬܶܬܩܰܠܰܣ܆ ܐܰܢ̱ܬ ܐܳܦ ܗܳܫܳܐ ܐܰܘܫܶܛ ܐܺܝܕܳܐ ܐܳܚܽܘܕܬܳܐ ܘܡܰܠܝܰܬ ܪ̈ܰܚܡܶܐ ܘܰܚܢܳܢܳܐ ܕܺܝܠܳܟ܆ ܘܒܰــܪܶܟ ♱ ܠܥܳܢ̈ܳܐ ܕܡܰܪܥܺܝܬܳܟ ܘܠܽܐܘܫܰܥܢ̈ܶܐ ܗܳܠܶܝܢ ܕܣܺܝܡܺܝܢ ܩܕܳܡܰܝܢ ܒܥܶܕܳܢܳܐ ܗܳܢܐ ܘܠܺܐܝܠܳܢ̈ܶܐ ܕܡܶܢܗܽܘ̇ܢ ܐܶܬܦܫܰܚ̈ܝ̱ ܣܰܘ̈ܟܶܐ ܗܳܠܶܝܢ܆ ܘܢܶܗܘ̈ܝܳܢ ܠܒܽܘܪܟܬܳܐ ܕܢܳܣܽܘܒܰܝ̈ܗܶܝܢ ܘܰܐܫܘܳܐ ܠܰܢ ܕܒܰܕܡܽܘܬܳܐ ܕܝܰܠܽܘ̈ܕܶܐ ܘܰܐܟܘܳܬܗܽܘ̇ܢ ܕܬܰܠܡܺܝ̈ܕܰܝܟ ܒܝܰܘܡܳܐ ܗܳܢܳܐ ܥܰܡܗܽܘܢ ܢܫܰܒܚܳܟ ܘܰܢܩܰܠܣܳܟ ܘܰܢܒܰܪܟܳܟ ܒܥܳܠܡܳܐ ܗܳܢܳܐ܆ ܘܰܒܥܳܠܡܳܐ ܚܰܕܬܳܐ ܒܚܰܝ̈ܶܐ ܛܽܘܒ̈ܬܳܢܶܐ ܘܰܕܠܳܐ ܦܳܛܪܺܝܢ ܥܰܡ ܟܶܢ̈ܫܶܐ ܙܗܰܝ̈ܳܐ ܕܩܰܕܺܝ̈ܫܰܝܟ ܒܽܐܘܫܰܥ̈ܢܶܐ ܡܶܬܝܰܕ̈ܥܳܢܶܐ ܘܰܒܣܰܘ̈ܟܶܐ ܕܦܰܐܝܽܘܬܳܐ ܢܩܰܪܶܒ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܒܺܐܝܕܰܝ̈ܟ ܘܥܰܡܳܟ ܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܢܰܦܪܶܓ ܒܰܠܒܽܘ̈ܫܶܐ ܕܠܳܐ ܡܶܬܚܰܒܠܳܢܽܘܬܳܐ܆ ܘܰܒܣܰܘ̈ܟܶܐ ܡܶܬܝܰܕ̈ܥܳܢܶܐ ܕܬܶܫܒܽܘܚܬܳܐ ܢܥܰܕܥܶܕ ܠܳܟ ܥܺܐܕ̈ܶܐ ܕܚܰܕ̈ܘܳܬܳܐ ܘܕܰܕܝܳܨܳܐ ܥܰܡ ܟܶܢܫܳܐ ܕܰܓܒܰܝ̈ܟ܆ ܘܥܰܡܗܽܘ̇ܢ ܘܒܰܝܢܳܬܗܽܘ̇ܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܚܰܝܳܐ ܘܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ ܒܰܪܶܟܡܳܪܝ̱܀
ܟܳܗܢܳܐ: ܫܠܳܡܳܐ ܠܟܽܠܟܽܘ̇ܢ܀
ܥܰܡܳܐ: ܘܰܠܪܽܘܚܳܐ ܕܺܝܠܳܟ܀
ܡܫܰܡܫܳܢܳܐ: ܩܕܳܡ ܡܳܪܝܳܐ ܪ̈ܺܝܫܰܝܢ ܢܰܪܟܶܢ܀
ܥܰܡܳܐ: ܩܕܳܡܰܝܟ ܡܳܪܰܢ ܘܰܐܠܳܗܰܢ܀
ܟܳܗܢܳܐ: ܥܺܕܬܳܟ ܡܳܪܝ̱ ܘܝܳܪܬܽܘܬܳܟ ܨܰܘܪ̈ܶܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܕܺܝܠܗܶܝܢ ܩܕܳܡܰܝܟ ܪܟܺܝܢܺܝܢ. ܘܰܒܓܽܘܪ̈ܓܳܚܶܐ ܡܦܺܝ̈ܣܳܢܶܐ ܩܕܳܡ ܬܪܽܘܢܳܘܣ ܕܚܺܝܠܳܐ ܕܺܐܝܩܳܪܳܟ ܥܰܒܕܰܝ̈ܟ ܘܰܐܡܗ̈ܳܬܳܟ ܟܦܺܝܦܺܝܢ܆ ܘܰܒܚܰܫܳܐ ܠܘܳܬܳܟ ܓܳܥܶܝܢ ܘܡܶܢ ܡܪܰܚܡܳܢܽܘܬܳܟ ܫܳܐܠܺܝܢ ܚܽܘܣܳܝܳܐ ܕܡܶܬܥܰܒܪ̈ܳܢܘܳܬܗܽܘ̇ܢ܆ ܐܺܝܢ ܡܳܪܝܳܐ ܪܳܚܶܡ ܐ̱ܢܳܫ̈ܳܐ ܠܳܐ ܬܶܫܪܶܐ ܐܶܢܽܘ̇ܢ ܣܦܺܝ̈ܩܶܐ܆ ܐܶܠܳܐ ܦܬܰܚ ܒܶܝܬ ܓܰܙܳܟ ܩܕܳܡܰܝܗܽܘ̇ܢ܆ ܘܚܰܕܳܐ ܐܶܢܽܘ̇ܢ ܒܡܰܘ̈ܗܒܳܬܳܐ ܥܰܬܺܝܪ̈ܳܬܳܐ ܐܰܝܟܰܢܳܐ ܕܰܣܒܺܝܣܳܐܺܝܬ ܢܶܚܙܽܘ̇ܢ ܠܥܺܐܕܳܐ ܗܳܢܳܐ ܕܬܶܫܒܚ̈ܳܬܳܐ܆ ܘܢܶܗܘܽܘܢ ܚܰܒܪ̈ܶܐ ܠܰܛܠܳܝ̈ܶܐ ܗܳܢܽܘ̇ܢ ܕܩܰܠܣܽܘܟ ܒܐܽܘܫܰܥ̈ܢܰܝܗܽܘ̇ܢ܆ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ
ܟܳܗܢܳܐ: ܐܰܢ̱ܬ ܡܳܪܝܳܐ ܐܰܠܳܗܳܐ ܗܰܘ ܕܟܽܠܳܗ̇ ܐܽܘܪܚܳܐ ܗܳܕܶܐ ܕܰܡܕܰܒܪܳܢܽܘܬܳܐ ܣܥܰܪܬ ܠܘܳܬܰܢ܆ ܐܳܦ ܗܳܫܳܐ ܒܰـܪܶܟ ♱ ܒܪ̈ܰܚܡܰܝܟ ܣܰܓܺܝ̈ܶܐܐ ܠܣܰܘ̈ܟܶܐ ܗܳܠܶܝܢ ܘܠܐܺܝܠܳܢ̈ܶܐ ܕܡܶܢܗܽܘ̇ܢ ܐܶܬܦܫܰܚ̈ܝ̱ ܘܳܐܦ ܠܢܶܨܒܬܳܐ ܟܽܠܳܗ̇ ܕܰܒܪܳܬ ܡܳܪܽܘܬܳܟ܆ ܘܢܶܗܘܽܘܢ ܠܒܽܘܪ̈ܟܳܬܳܐ ܕܢܳܣܽܘܒܰܝ̈ܗܽܘ̇ܢ܆ ܨ ܠܫܽܘܘܙܳܒܳܐ ܕܳܐܚܽܘ̈ܕܰܝܗܽܘ̇ܢ ܠܝ ܥܒܶܕ ܐܶܢܽܘ̇ܢ ܣܰܘ̈ܟܶܐ ܕܬܶܫܒܽܘܚܬܳܐ ܒ ܛܰܪ̈ܦܶܐ ܕܩܰܕܺܝܫܽܘܬܳܐ ܐ ܐܽܘܫܰܥ̈ܢܶܐ ܕܕܰܟܝܽܘܬܳܐ܀
ܥܰܡܳܐ: ܐܰܡܺܝܢ
ܟܳܗܢܳܐ: ܠܫܽܘܪܳܪܳܐ ܕܗܰܝܡܳܢܽܘܬܳܐ܆ ܠܨܶܒܬܳܐ ܕܛܰܠܝܽܘܬܳܐ܆ ܠܰܟܢܝܟܽܘܬܳܐ ܕܣܰܝܒܽܘܬܳܐ܆ ܠܪܽܘܡܪܳܡܳܐ ܕܥܺܕ̈ܳܬܳܐ܆ ܠܗܶܕܪܳܐ ܕܕܰܝܪ̈ܳܬܳܐ܆ ܠܒܽܘܪܟܬܳܐ ܕܒ̈ܳܬܶܐ܆ ܠܩܽܘܝܳܡܳܐ ܕܰܡܗܰܝ̈ܡܢܶܐ܆ ܡܶܛܽܠ ܕܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܥܰܡ ܐܰܒܽܘܟ ܡܒܰܪܟܳܐ ܘܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ
ܟܳܗܢܳܐ: ܡܒܰܪܰܟ ܐܰܢ̱ܬ ܐܰܠܳܗܳܐ ܕܺܝܠܰܢ܆ ܘܰܒܪܺܝܟܳܐ ܗ̱ܝ ܡܶܐܬܺܝܬܳܟ ܕܰܠܘܳܬܰܢ܆ ܘܰܒܪܺܝܟ ܫܡܳܟ ܕܶܐܬܩܪܺܝ ܥܠܰܝܢ܆ ܘܰܡܒܰܪܟܳܐ ܗ̱ܝ ܡܕܰܒܪܳܢܽܘܬܳܟ ܕܰܚܠܳܦ ܦܽܘܪܩܳܢܰܢ܆ ܐܺܝܢ ܡܳܪܝܳܐ ܒܝܰܕ ܡܰܐܓܢܳܢܽܘܬܳܐ ܕܛܰܝܒܽܘܬܳܟ܆ ܒܰـܪܶܟ ♱ ܠܟܽܠܰܢ ܘܠܰܐܪ̈ܥܳܬܳܐ ܘܰܠܢܶܨ̈ܒܳܬܳܐ ܘܳܐܦ ܠܣܰܘ̈ܟܶܐ ܗܳܠܶܝܢ܆ ܘܰܥܒܶܕ ܐܶܢܽܘܢ ܨ ܕܶܩ̈ܠܶܐ ܕܒܽܘܪ̈ܟܳܬܳܐ ܠܝ ܡܢܰܛܪ̈ܳܢܶܐ ܕܥܽܘܡܪ̈ܶܐ ܒ ܡܫܰܢ̈ܩܳܢܶܐ ܕܣܳܛܳܢܳܐ܆ ܐ ܪ̈ܳܕܽܘܦܶܐ ܕܢܶܣܝܽܘ̈ܢܶܐ܀
ܥܰܡܳܐ: ܐܰܡܺܝܢ
ܟܳܗܢܳܐ: ܕܳܚܽܘ̈ܩܶܐ ܕܰܩܪ̈ܳܒܶܐ܆ ܡܛܰܠܩ̈ܳܢܶܐ ܕܚܰܫ̈ܶܐ ܒܺܝ̈ܫܶܐ܆ ܛܳܪ̈ܽܘܕܶܐ ܕܣܽܘ̈ܓܦܳܢܶܐ܆ ܘܫܰܟܶܢ ܠܰܢ ܕܰܒܝܰܕ ܛܥܺܝܢܽܘܬܗܽܘ̇ܢ ܢܶܫܟܰܚ ܪ̈ܰܚܡܶܐ ܕܡܶܢܳܟ ܘܚܽܘܣܳܝܳܐ܆ ܘܒܰـܪܶܟ ♱ ܠܥܰܡܳܟ ܕܶܐܬܳܐ ܠܥܰܕܥܺܐܕܳܟ ܘܢܶܫܬܘܶܐ ܟܽܠܰܢ ܕܢܶܥܽܘܠ ܠܰܓܢܽܘܢܳܟ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ
ܟܳܗܢܳܐ ܡܪܰܚܶܦ ܝܰܡܺܝܢܶܗ ܥܰܠ ܣܰܘ̈ܟܶܐ ܕܙܰܝܬܳܐ ܘܳܐܡܰܪ:
ܡܒܰܪ̈ܟܺܝܢ ܐܶܢܽܘܢ ܣܰܘ̈ܟܶܐ ܗܳܠܶܝܢ ܕܰܩܕܳܡܰܝܢ ܣܺܝܡܺܝܢ܀
ܡܫܰܡܫܳܢܳܐ: ܒܰܪܶܟܡܳܪܝ̱܀
ܟܳܗܢܳܐ: ܒܰܫܡܳܐ ܕܰܐܒܳـܐ ♱܀ ܡܫܰܡܫܳܢܳܐ: ܐܰܡܺܝܢ܀
ܟܳܗܢܳܐ: ܘܕܰܒـܪܳܐ ♱܀ ܡܫܰܡܫܳܢܳܐ: ܐܰܡܺܝܢ܀
ܟܳܗܢܳܐ: ܘܰܕܪܽܘܚܳـܐ ♱ ܚܰܝܳܐ ܘܩܰܕܺܝܫܳܐ܆ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀
ܡܫܰܡܫܳܢܳܐ: ܐܰܡܺܝܢ܀
ܟܳܗܢܳܐ: ܡܳܪܝܳܐ ܐܰܠܳܗܳܐ ܕܚܰܝ̈ܠܰܘܳܬܳܐ ܥܶܠܳܝ̈ܶܐ ܘܥܳܒܽܘܕܳܐ ܕܟܽܠܳܗ̇ ܒܪܺܝܬܳܐ ܢܰܛܰܪܰܝܢ ܒܺܐܝܕܳܟ ܐܳܚܽܘܕܬܳܐ ܘܒܰܕܪܳܥܳܟ ܚܰܝܠܬܳܢܳܐ܆ ܘܰܐܫܘܳܐ ܠܰܢ ܕܰܢܫܰܒܚܳܟ ܥܰܡ ܟܶܢ̈ܫܶܐ ܫܓܺܝܪ̈ܶܐ ܕܓܰܘܙܰܠܬܳܐ܆ ܘܥܰܡ ܛܠܳܝ̈ܶܐ ܘܫܰܒܪ̈ܶܐ ܢܰܙܥܶܩ ܘܢܺܐܡܰܪ ܐܽܘܫܰܥܢܳܐ ܒܰܡܪ̈ܰܘܡܶܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ ܚܽܘܬܳܡܳܐ
ܡܳܪܰܢ ܝܶܫܽܘܥ ܡܫܺܝܚܳܐ ܫܡܰܥ ܨܠܰܘ̈ܳܬܰܢ ܘܩܰܒܶܠ ܬܰܟܫ̈ܦܳܬܰܢ ܘܦܰܢܳܐ ܫ̈ܶܐܠܳܬܰܢ ܘܬܳܐ ܠܺܐܝܳܠܰܢ ܘܰܥܒܶܕ ܪ̈ܰܚܡܶܐ ܥܰܠ ܟܽܠܰܢ ܒܰܬܪ̈ܰܝܗܽܘ̇ܢ ܥܳܠܡ̈ܶܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܘܒܳܬܰܪ ܕܰܡܒܰܪܟܺܝܢ ܙܰܝ̈ܬܶܐ܆ ܘܰܡܙܰܝܚܺܝܢ ܨܠܺܝܒܳܐܺܝܬ ܠܶܐܘܰܢܓܶܠܝܽܘܢ ܘܠܰܨܠܺܝܒܳܐ ܘܰܠܣܰܘ̈ܟܶܐ ܟܰܕ ܐܳܡܪܺܝܢ: ܗܰܘ ܕܡܰܠܰܐܟ̈ܶܐ
ܡܦܰܠܓܺܝܢ ܠܣܰܘ̈ܟܶܐ ܠܰܡܗܰܝܡ̈ܢܶܐ ܘܰܡܫܰܠܡܺܝܢ ܠܩܽܘܪܳܒܳܐ ܐܰܠܳܗܳܝܳܐ
ܫܳܩܶܠ ܟܳܗܢܳܐ ܠܰܨܠܺܝܒܳܐ ܘܰܠܣܰܘ̈ܟܶܐ ܕܙܰܝܬܳܐ ܐܰܘ̇ ܕܕܶܩ̈ܠܶܐ ܘܟܰܕ ܐܰܦܰܘ̈ܗ̱ܝ ܠܡܰܕܢܚܳܐ ܘܳܐܡܰܪ:
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܰܟܪ̈ܽܘܒܶܐ ܡܒܰܪܟܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ܆ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܡܶܨ̈ܥܳܝܶܐ ܡܩܰܠܣܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ܆ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚ̈ܬܳܝܶܐ ܡܙܰܝܚܺܝܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨ̈ܠܰܘܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ܀ | ܫܽܘܒܚܳܐ ܠܳܟ ܒܳܪܽܘܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܛܶܟܣܳܐ ܕܒܽܘܪܳܟ ܣܰܘ̈ܟܶܐ ܒܥܺܐܕܳܐ ܕܽܐܘܫܰܥ̈ܢܶܐ܀