ܕܰܒܝܰܘܡܳܐ ܕܰܐܪܒܥܳܐ ܒܫܰܒܳܐ ܕܦܶܠܓܶܗ ܕܨܰܘܡܳܐ ܐܰܪܒܥܺܝܢܳܝܳܐ ܡܶܫܬܰܡܠܶܐ

ܩܰܕܡܳܝܰܬ

ܩܕܳܡ ܨܠܽܘܬܳܐ ܕܪܰܡܫܳܐ ܢܛܰܝܒܽܘ̇ܢ ܓܳܓܽܘܠܬܳܐ ܒܡܶܨܥܰܬ ܥܺܕܬܳܐ ܘܢܶܩܒܥܽܘ̇ܢ ܨܠܺܝܒܳܐ ܥܠܰܘܗ̱ܝ ܒܰܕܡܽܘܬ ܚܶܘܝܳܐ ܕܰܢܚܳܫܳܐ ܐܰܟܡܳܐ ܕܰܦܩܰܕ ܡܳܪܝܳܐ ܠܡܽܘܫܶܐ܆ ܕܣܺܝܡ ܚܶܘܝܳܐ ܕܰܢܚܳܫܳܐ ܥܰܠ ܡܢܳܪܬܳܐ ܒܡܶܨܥܰܬ ܡܰܫܪܺܝܬܳܐ܆ ܘܟܽܠ ܡܰܢ ܕܢܳܟܶܬ ܠܶܗ ܚܶܘܝܳܐ ܢܚܽܘܪ ܒܳܗ̇ ܘܠܳܐ ܢܡܽܘܬ. ܗܳܟܘܳܬ ܐܶܡܰܪ ܡܳܪܰܢ܆ ܥܬܺܝܕ ܗ̱ܘܽ ܒܪܶܗ ܕܐ̱ܢܳܫܳܐ ܕܢܶܬܬܪܺܝܡ ܥܰܠ ܩܰܝܣܳܐ ܐܰܟܡܳܐ ܕܰܐܪܺܝܡ ܡܽܘܫܶܐ ܚܶܘܝܳܐ ܒܡܰܕܒܪܳܐ.
ܡܶܢ ܒܳܬܰܪ ܫܽܘܠܳܡ ܩܽܘܪܳܒܳܐ ܒܥܶܕܳܢܳܐ ܕܬܶܫܡܶܫܬܳܐ ܕܝܳܠܕܰܬ ܐܰ‎ܠܳܗܳܐ܆ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܠܳܒܫܺܝܢ ܛܶܟܣܰܝ̈ܗܽܘ̇ܢ ܘܫܳܩܠܺܝܢ ܐܶܘܰܢܓܶܠܝܽܘܢ ܘܰܨܠܺܝܒܳܐ ܘܡܰܪ̈ܘܚܳܬܳܐ ܘܩܶܪ̈ܝܽܘܢܶܐ ܘܰܨܠܺܝܒܳܐ܆ ܘܥܳܒܕܺܝܢ ܟܪܽܘܟܝܳܐ ܡܶܢ ܓܰܪܒܝܳܐ ܠܬܰܝܡܢܳܐ ܟܰܕ ܐܳܡܪܺܝܢ ܩ̈ܳܠܶܐ ܗܳܠܶܝܢ:

ܩܠܐ: ܒܩ̄ ܩܽܘܩܳܝܳܐ

ܡܶܢ ܪܽܘܡܺܝ ܡܕܺܝܢܰܬ ܡܰܠ̈ܟܶܐ ܥܕܰܡܳܐ ܠܽܐܘܪܺܫܠܶܡ܆ ܢܶܚܬܰܬ ܗܶܠܶܢܺܝ ܡܰܠܟܬܳܐ ܕܠܰܨܠܺܝܒܳܐ ܬܶܣܓܽܘܕ܆ ܘܶܐܚܕܰܬ ܐܶܢܽܘ̇ܢ ܠܟܽܠܗܽܘܢ ܝܽܘܕܳܝ̈ܶܐ܆ ܕܬܰܘ ܚܰܘܰܘ ܠܺܝ܆ ܕܽܘܟܬܶܗ ܕܰܨܠܺܝܒܳܐ܆ ܥܢܰܘ ܗܶܢܽܘ̇ܢ ܘܶܐܡܰܪܽܘ̇ܢ ܠܳܗ̇ ܕܪܰܒܳܐ ܐܺܝܬ ܠܰܢ܆ ܐܶܢ ܬܶܐܚܕܺܝܘܗ̱ܝ ܗܽܘ ܡܚܰܘܶܐ ܠܶܟܝ̱ ܕܽܘܟܬܳܐ ܕܒܳܗ̇ ܐܶܬܬܣܺܝܡ ܗ̄ ܨܠܺܝܒܶܗ ܕܰܡܫܺܝܚܳܐ܀

ܫܽܘܒܚܳܐ

ܥܰܡܰܢܽܘܐܝܶܠ ܐܰ‎ܠܳܗܳܐ ܥܰܠ ܩܰܝܣܳܐ ܐܶܬܬܠܺܝ܆ ܘܒܰܪ ܐܺܝܠܫܰܕܰܝ ܓܰܢ̱ܒܳܪܳܐ ܐܰܪܟܶܢ ܪܺܝܫܶܗ ܘܡܺܝܬ܆ ܪܽܘܚܶܗ ܒܰܠܚܽܘܕ܆ ܫܒܰܩ ܗ̱ܘܳܐ ܥܰܠ ܩܰܝܣܳܐ. ܘܠܰܘ ܐܺܝܬܽܘܬܶܗ܆ ܫܰܢܝܰܬ ܡܶܢ ܦܰܓܪܶܗ. ܠܚܰܝ̈ܶܐ ܐ̱ܢܳܫܳܝ̈ܶܐ ܫܒܰܩ ܗ̱ܘܳܐ ܘܠܰܘ ܐܺܝܬܝ̈ܳܝܶܐ܆ ܢܶܬܒܽܘ̇ܢ ܒܶܐܒܠܳܐ ܝܽܘ̈ܕܳܝܶܐ ܕܰܙܩܰܦܘ̱ ܠܰܡܪܰܝܡܳܐ ܗ̄ ܘܳܝ ܠܗܽܘܢ ܘܰܠܥܳܠܰܡ܀

ܒܳܬܰܪ ܟܪܽܘܟܝܳܐ ܫܳܩܶܠ ܪ̈ܺܝܫܟܳܗܢܶܐ ܐܰܘ̇ ܟܳܗܢܳܐ ܨܠܺܝܒܳܐ ܒܺܐܝܕܶܗ܆ ܘܰܡܙܰܝܰܚ ܘܳܐܡܰܪ ܟܰܕ ܐܰܦܰܘ̈ܗ̱ܝ ܠܡܰܕܢܚܳܐ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܒܳܟ ܡܫܺܝܚܳܐ ܐܰ‎ܠܳܗܳܐ ܕܺܝܠܰܢ ܐܶܬܪܫܶܡ ܐ̱ܪܳܙ ܚܽܘܛܪܶܗ ܕܡܽܘܫܶܐ ܪܺܝܫܳܐ ܕܰܢܒܺܝ̈ܶܐ܆ ܘܒܰܨܠܺܝܒܳܟ ܦܳܪܽܘܩܳܝܳܐ ܐܶܬܬܨܺܝܪ ܟܰܕ ܒܡܶܨܥܰܬ ܡܰܫܪܺܝܬܳܐ ܕܺܐܝܣܰܪ̈ܠܳܝܶܐ ܐܶܬܩܰܒܰܥ ܗ̱ܘܳܐ. ܘܗܳܫܳܐ ܥܺܕܬܳܟ ܩܰܕܺܝܫܬܳܐ ܗܳܐ ܡܙܰܝܚܳܐ ܠܶܗ ܠܰܨܠܺܝܒܳܟ ܡܰܥܒܶܕ ܚܰܝ̈ܶܐ ܒܡܶܨܥܰܬ ܨܰܘܡܳܐ ܩܰܕܺܝܫܳܐ܆ ܚܠܳܦ ܢܽܘܛܳܪܳܐ ܕܝܰܠܕ̈ܶܝܗ̇܆ ܘܰܚܠܳܦ ܒܽܘܪܟܬܳܐ ܕܫܰܢ̱ܬܳܐ܆ ܘܰܕܢܶܬܒܰܪܟܽܘ̇ܢ ܦܺܐܪ̈ܶܐ ܘܢܶܬܢܰܛܪܽܘ̇ܢ ܡܶܢ ܟܽܠ ܢܶܟܝ̈ܳܢܺܝܢ ܘܡܶܢ ܟܽܠ ܣܽܘܓܦܳܢܺܝ̈ܢ܆ ܘܰܚܠܳܦ ܗܳܝ ܕܢܶܥܒܪܽܘܢ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܕܢܰܘܕܶܐ ܘܰܢܫܰܒܰܚ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ܀

ܡܫܰܡܫ̈ܳܢܶܐ ܐܳܡܪܺܝܢ ܦܶܬܓܳܡܳܐ ܗܳܢܳܐ܆ (ܡܰܙܡ̄ ܡܕ܆ܗ)

ܒܳܟ ܢܕܰܩܰܪ ܠܰܒܥܶܠܕܒܳܒܰܝ̈ܢ܆ ܘܡܶܛܽܠ ܫܡܳܟ ܢܕܽܘܫ ܠܣܳܐܢܰܝ̈ܢ ܗ̄܀

ܟܳܗܢܳܐ ܡܰܙܥܩܳܢܽܘܬܳܐ

ܟܽܠ ܕܰܒܚܶܘܝܳܐ ܕܰܢܚܳܫܳܐ ܚܳܐܰܪ ܗ̱ܘܳܐ ܡܶܬܰܐܣܶܐ ܗ̱ܘܳܐ܆ ܘܟܽܠܡܰܢ ܕܠܰܨܠܺܝܒܳܐ ܣܳܓܶܕ ܡܶܬܰܐܣܶܐ ܗ̱ܘܳܐ ܡܶܢ ܟܽܠܗܽܘܢ ܟܺܐܒܰܘ̈ܗ̱ܝ܆

ܬܰܪ̈ܬܰܝܗܶܝܢ ܓܽܘ̈ܕܶܐ ܟܢܺܝܫܳܐܺܝܬ ܢܺܐܡܪ̈ܳܢ:

ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܣܰܓܺܝ ܪ̈ܰܚܡܶܐ ܡܳܪܝܳܐ ܟܰܕ ܐܳܡܪܺܝܢܰܢ:

ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀

ܢܶܗܦܽܘܟ ܠܡܰܥܪܒܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ ܨܠܽܘܬܳܐ

ܐܰܫܘܳܐ ܠܰܢ ܡܫܺܝܚܳܐ ܐܰ‎ܠܳܗܳܐ ܕܺܝܠܰܢ ܕܟܰܕ ܕܟܶܝܢܰܢ ܡܶܢ ܚܽܘܬܪܳܐ ܘܫܽܘܒܗܳܪܳܐ ܢܫܰܡܠܶܐ ܠܥܽܘܗܕܳܢܳܐ ܕܐ̱ܪ̈ܳܙܰܝܟ ܩܰܕܺܝ̈ܫܶܐ ܕܒܺܐܝ̈ܕܰܝܳܐ ܕܰܢܒܺܝ̈ܶܐ ܕܺܝܠܳܟ ܩܰܕܺܝ̈ܫܶܐ ܐܶܬܪܫܶܡܘ̱܆ ܘܰܩܒܽܘܥ ܒܠܶܒܰܘ̈ܳܬܰܢ ܢܺܝܫܶܗ ܡܰܚܝܳܢܳܐ ܕܰܨܠܺܝܒܳܟ ܡܰܥܒܶܕ ܚܰܝ̈ܶܐ܆ ܐܰܝܟܰܢܳܐ ܕܟܰܕ ܡܶܬܡܰܕܟܺܝܢ ܗܰܘܢܰܝ̈ܢ ܒܰܚܙܳܬܶܗ ܘܡܶܬܩܰܕܫܺܝܢ ܚܽܘܫܳܒܰܝ̈ܢ ܒܣܶܓܕܬܶܗ܆ ܢܶܥܪ̈ܩܳܢ ܡܶܢܰܢ ܟܽܠܗܶܝܢ ܦܠܰܓܰܝ̈ ܒܺܝܫܽܘܬܳܐ܆ ܘܰܕܚܺܝ̈ܠܶܐ ܥܒܶܕ ܠܰܢ ܒܳܐܬܶܗ ܕܰܨܠܺܝܒܳܟ ܠܽܘܩܒܰܠ ܪ̈ܽܘܚܶܐ ܕܛܳܥܝܽܘܬܳܐ܆ ܕܢܶܣܓܽܘܕ ܠܳܟ ܡܳܪܝ̱ ܘܰܢܪܰܡܪܡܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܦܶܬܓܳܡܳܐ (ܡܰܙܡ̄ ܡܓ܆ܗ)

ܚܽܘܪܘ ܠܘܳܬܶܗ ܘܣܰܒܰܪܘ ܒܗ܆ ܘܰܐܦܰܝ̈ܟܽܘܢ ܠܐ ܢܰܚܦܪ̈ܳܢ ܗ̄܀

ܟܳܗܢܳܐ ܡܰܙܥܩܳܢܽܘܬܳܐ

ܟܡܳܐ ܫܰܦܺܝܪܳܐ ܘܰܬܡܺܝܗܳܐ ܡܕܰܒܪܳܢܽܘܬܶܗ ܕܦܳܪܽܘܩܰܢ܆ ܕܰܒܡܶܨܥܰܬ ܨܰܘܡܳܐ ܩܒܰܥ ܠܰܢ ܢܺܝܫܶܗ ܕܰܨܠܺܝܒܳܐ ܚܰܝܳܐ܀

ܬܰܪ̈ܬܰܝܗܶܝܢ ܓܽܘ̈ܕܶܐ ܟܢܺܝܫܳܐܺܝܬ

ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܣܰܓܺܝ ܪ̈ܰܚܡܶܐ ܡܳܪܝܳܐ ܟܰܕ ܐܳܡܪܺܝܢܰܢ:

ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀

ܘܢܶܗܦܽܘܟ ܠܓܰܪܒܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ ܨܠܽܘܬܳܐ

ܐܰ‎ܠܳܗܳܐ ܕܶܐܬܬܨܺܝܪ ܒܰܢܒܺܝ̈ܶܐ ܕܡܶܢ ܩܕܺܝܡ܆ ܘܰܪܫܰܡ ܡܽܘܫܶܐ ܛܽܘܦܣܶܗ ܒܚܶܘܝܳܐ ܕܰܢܚܳܫܳܐ ܕܰܩܒܰܥ ܒܡܶܨܥܰܬ ܡܰܫܪܺܝܬܳܐ ܟܰܕ ܥܰܠ ܨܠܺܝܒܳܐ ܐܶܬܬܪܺܝܡܬ ܢܓܰܕܬ ܠܒܶܪ̈ܝܳܬܳܐ ܠܣܶܓܕܬܳܟ܆ ܘܰܠܦܶܪܥܽܘܢ ܘܠܰܥܡܳܠܺܝܩ ܐܰܘܒܶܕܬ܆ ܣܰܬܰܪ ܠܰܢ ܡܳܪܝ̱ ܬܚܶܝܬ ܟܶܢ̈ܦܰܘܗ̱ܝ ܕܰܨܠܺܝܒܳܟ܆ ܘܰܐܝܟ ܕܦܰܢܺܝܬ ܠܰܐܒܓܰܪ ܐܽܘܟܳܡܳܐ ܫܶܐܠܬܶܗ܆ ܩܰܒܶܠ ܡܳܪܰܢ ܨܰܘܡܰܢ ܘܰܨܠܽܘܬܰܢ ܕܰܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ ܥܰܒܕܰܝ̈ܟ܆ ܘܰܐܣܳܐ ܫܽܘ̈ܡܳܬܰܢ ܒܰܨܠܺܝܒܳܟ܆ ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܟ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܦܶܬܓܳܡܳܐ (ܡܰܙܡ̄ ܡܕ܆ܙ)

ܟܳܗܢܳܐ ܡܰܙܥܩܳܢܽܘܬܳܐ܆

ܡܶܛܽܠ ܕܰܡܚܺܝܠ ܗ̱ܘܳܐ ܓܶܢܣܰܢ܆ ܕܰܒܕܰܪܳܐ ܢܩܽܘܡ ܥܰܡ ܒܺܝܫܳܐ܆ ܐܰܘܣܶܦ ܠܰܢ ܡܳܪܝܳܐ ܘܝܰܗܒ ܠܰܢ ܥܰܡ ܨܰܘܡܳܐ ܨܠܺܝܒܳܐ ܚܰܝܳܐ܀

ܬܰܪ̈ܬܰܝܗܶܝܢ ܓܽܘ̈ܕܶܐ ܟܢܺܝܫܳܐܺܝܬ

ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܣܰܓܺܝ ܪ̈ܰܚܡܶܐ ܡܳܪܝܳܐ ܟܰܕ ܐܳܡܪܺܝܢܰܢ:

ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ ܨܠܽܘܬܳܐ:

ܠܳܟ ܡܫܺܝܚܳܐ ܐܰ‎ܠܳܗܳܐ ܕܰܒܚܶܘܝܳܐ ܕܰܢܚܳܫܳܐ ܐܶܬܡܰܬܰܠܬ ܘܶܐܬܛܰܦܰܣܬ܆ ܡܶܬܟܰܫܦܺܝܢܰܢ ܘܰܡܦܺܝܣܺܝܢܰܢ܆ ܛܰܠܶܩ ܡܶܢܰܢ ܠܡܶܪܬܳܐ ܩܳܛܽܘܠܬܳܐ ܕܰܚܛܺܝܬܳܐ ܘܰܐܣܳܐ ܠܢܰܦܫ̈ܳܬܰܢ ܘܰܠܦܰܓܪ̈ܰܝܢ ܡܶܢ ܢܽܘܟ̈ܬܳܬܶܗ ܕܣܳ‍ܛܳܢܳܐ. ܘܰܐܝܟܰܢܳܐ ܕܚܶܘܝܳܐ ܕܰܢܚܳܫܳܐ ܡܰܐܣܶܐ ܗ̱ܘܳܐ ܠܰܐܝܠܶܝܢ ܕܒܶܗ ܚܳܝܪܺܝܢ ܗ̱ܘܰܘ܆ ܗܳܟܰܢܳܐ ܡܳܪܝ̱ ܐܰܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܡܶܛܽܠ ܕܰܚـܝܳܪܰܢ ܒܳܟ ܘܒܰܨܠܺܝܒܳܟ ܩܰܬܺܝܬ܆ ܘܥܰܝ̈ܢܰܝܢ ܠܘܳܬܳܟ ܬܰܠܝ̈ܳܢ ܘܣܰܒܪܰܢ ܘܬܽܘܟܠܳܢܰܢ ܒܟܽܠܙܒܰܢ ܥܠܰܝܟ ܗܽܘ ܣܺܝܡ܆ ܠܳܟ ܝܳܕܥܺܝܢܰܢ ܦܳܪܽܘܩܳܐ ܘܰܡܫܰܘܙܒܳܢܳܐ ܕܚܰܝܰܝ̈ܢ܆ ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ܀

ܦܶܬܓܳܡܳܐ (ܡܰܙܡ̄ ܝܚ܆ܠܗ)

ܝܰܗܒܬ ܠܝ ܣܰܟܪܳܐ ܕܦܽܘܪܩܳܢܳܐ. ܝܰܡܝܢܳܟ ܬܣܰܝܥܰܢܝ̱ ܘܡܰܪܕܽܘܬܳܟ ܬܪܰܒܶܝܢܝ̱܀

ܟܳܗܢܳܐ ܡܰܙܥܩܳܢܽܘܬܳܐ

ܢܺܝܫܳܐ ܕܚܰܝ̈ܶܐ ܩܒܰܥ ܣܳܡ ܠܰܢ ܦܳܪܽܘܩܰܢ܆ ܒܡܶܨܥܰܬ ܨܰܘܡܳܐ܆ ܕܒܶܗ ܢܶܙܟܶܐ ܠܒܺܝܫܳܐ ܘܚܰܝܠܶܗ܆ ܘܢܶܩܢܶܐ ܚܰܝ̈ܶܐ ܪ̈ܽܘܚܳܢܳܝܶܐ܀

ܬܰܪ̈ܬܰܝܗܶܝܢ ܓܽܘ̈ܕܶܐ ܟܢܺܝܫܳܐܺܝܬ

ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܣܰܓܺܝ ܪ̈ܰܚܡܶܐ ܟܰܕ ܐܳܡܪܺܝܢܰܢ܆ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀

ܬܽܘܒ ܟܳܗܢܳܐ ܐܳܚܶܕ ܨܠܺܝܒܳܐ ܒܐܺܝܕܶܗ ܘܗܳܦܶܟ ܠܡܰܕܢܚܳܐ ܘܰܡܙܰܝܰܚ ܠܶܗ ܟܰܕ ܡܰܙܥܶܩ܆

ܦܳܢܶܝܢ ܠܡܰܕܢܚܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܰܟܪ̈ܘܒܶܐ ܡܒܰܪܟܺܝܢ ܠܶܗ.
ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ.

ܘܦܳܢܶܝܢ ܠܡܰܥܪܒܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ.
ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ.

ܘܦܳܢܶܝܢ ܠܓܰܪܒܝܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܡܶܨܥܳܝ̈ܶܐ ܡܩܰܠܣܺܝܢ ܠܶܗ.
ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀	ܗܰܘ ܕܬܰܚܬܳܝ̈ܶܐ ܡܙܰܝܚܺܝܢ ܠܶܗ.

ܘܦܳܢܶܝܢ ܠܬܰܝܡܢܳܐ

ܡܫܰܡ̈ܫܳܢܶܐ	ܟܳܗܢܳܐ
ܡܳܪܰܢ ܚܽܘܣ ܘܪܰܚܶܡܥܠܰܝܢ܀	ܡܳܪܰܢ ܐܶܬܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰ‎ܠܳܗܳܐ܀	ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ.
ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀	ܫܽܘܒܚܳܐ ܠܳܟ ܒܳܪܽܘܝܳܐ.

ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.

ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

«ܡܰܟܪܶܙ ܪ̈ܺܝܫܟܳܗܢܶܐ ܐܰܘ̇ ܟܳܗܢܳܐ ܥܰܠ ܨܠܺܝܒܳܐ ܘܥܰܠ ܚܶܘܝܳܐ ܕܰܢܚܳܫܳܐ ܘܝܳܗܒܺܝܢ ܫܠܳܡܳܐ ܠܰܨܠܺܝܒܳܐ ܘܠܶܐܘܰܢܓܶܠܝܽܘܢ (ܗ̄ ܕ̄ ܡܶܬܒܰܪܟܺܝܢ ܡܶܢܗܽܘܢ) ܘܫܪܟܐ»

ܫܠܶܡ ܛܶܟܣܳܐ ܕܙܽܘܝܳܚ ܨܠܺܝܒܳܐ܀