ܛܟܣܐ ܕܙܘܝܚܐ ܘܣܓܕܬܐ ܕܨܠܝܒܐ
ܡܚܰܘܝܳܢܳܐ
ܒܳܬܰܪ ܨܠܽܘܬܳܐ ܕܰܬܠܳܬܫܳܥܺܝ̈ܢ܆ ܐܰܘ ܕܦܶܠܓܶܗ ܕܝܰܘܡܳܐ܆ ܥܳܐܠܺܝܢ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܠܡܰܕܒܚܳܐ ܘܠܳܒܫܺܝܢ ܛܶܟܣܰܝ̈ܗܽܘܢ ܘܡܰܦܩܺܝܢ ܠܶܗ ܠܰܨܠܺܝܒܳܐ܆ ܘܛܳܥܶܢ ܠܶܗ ܪ̈ܺܝܫܟܳܗܢܶܐ ܐܰܘ ܪܺܝܫܳܐ ܕܩܰܫܺܝ̈ܫܶܐ ܥܰܠ ܟܰܬܦܶܗ ܕܝܰܡܺܝܢܳܐ܆ ܘܟܳܪܟܺܝܢ ܕܳܪܳܐ (ܗ̄ ܕ̄ ܟܪܽܘܟܝܳܐ) ܡܶܢ ܬܰܝܡܢܳܐ ܠܓܰܪܒܝܳܐ ܟܰܕ ܐܳܚܕܺܝܢ ܢܳܩܽܘܫܳܐ ܩܰܕܡܳܐܺܝܬ ܘܦܺܝܪܡܳܐ ܩܕܳܡ ܨܠܺܝܒܳܐ ܘܡܰܪ̈ܘܚܳܬܳܐ ܠܥܶܠ ܡܶܢܶܗ܆ ܘܰܡܗܰܠܟܺܝܢ ܢܺܝܚܳܐܺܝܬ ܘܫܰܠܝܳܐܺܝܬ ܒܚܰܫܳܐ ܘܟܰܪܝܽܘܬܳܐ܆ ܘܳܐܬܶܝܢ ܠܰܩܕܳܡ ܡܰܕܒܚܳܐ ܘܰܡܩܺܝܡܺܝܢ ܠܰܨܠܺܝܒܳܐ ܥܰܠ ܡܢܳܪܬܳܐ ܥܰܡ ܓܽܘܕܳܐ ܕܶܐܘܰܢܓܶܠܝܽܘܢ ܟܰܕ ܫܠܺܝܚ ܘܰܡܦܰܪܣܰܝ ܘܬܰܪܬܶܝܢ ܡܰܪ̈ܘܚܳܬܐ ܡܶܟܳܐ ܘܡܶܟܳܐ ܘܙܳܩܦܺܝܢ ܕܶܝܢ ܘܡܰܢܗܪܺܝܢ ܬܪܶܝܢ ܩܶܪ̈ܝܽܘܢܶܐ ܡܶܢ ܬܪܶܝܢ ܣܶܛܪ̈ܰܘܗ̱ܝ ܒܛܽܘܦܣܳܐ ܕܰܬܪܶܝܢ ܓܰܝ̈ܳܣܶܐ ܕܶܐܨܛܠܶܒܘ̱ ܥܰܡ ܡܳܪܰܢ ܕܺܐܝܬܰܝܗܽܘܢ ܛܺܝܛܳܘܣ ܘܕܽܘܡܰܐܟܳܘܣ. ܘܰܒܩܶܪܝܳܢܳܐ ܕܶܐܘܰܢܓܶܠܝܽܘܢ ܕܦܶܠܓܶܗ ܕܝܰܘܡܳܐ ܐܰܝܟܳܐ ܕܳܐܡܰܪ (ܘܰܟܐܳܐ ܒܶܗ ܚܰܒܪܶܗ) ܡܶܬܕܰܥܟܳܐ ܩܶܪܝܽܘܢܳܐ ܬܰܝܡܢܳܝܬܳܐ ܗܳܝ ܕܺܐܝܬܶܝܗ̇ ܕܣܶܡܳܠܳܐ ܒܗܳܝ ܫܳܥܬܳܐ ܛܽܘܦܣܳܐ ܕܕܽܘܡܰܐܟܳܘܣ ܗܰܘ ܕܡܶܢ ܣܶܡܳܠܳܐ. ܘܰܒܩܶܪܝܳܢܳܐ ܕܶܐܘܰܢܓܶܠܝܽܘܢ ܕܰܬܫܰܥܫܳܥܺܝ̈ܢ ܕܳܐܡܰܪ «ܗܳܝܕܶܝܢ ܐܰܦܰܝ̈ ܬܰܪܥܳܐ ܐܶܣܬܕܶܩ ܡܶܢ ܠܥܶܠ ܥܕܰܡܳܐ ܠܬܰܚܬ» ܘܺܐܠܳܐ ܕܥܰܠ ܡܰܕܒܚܳܐ ܡܶܬܓܠܶܓ.
ܘܰܒܥܶܕܳܢ ܟܪܽܘܟܝܳܐ ܐܳܡܪܺܝܢ ܒܰܝܬܳܐ ܗܳܢܳܐ
ܟܰܕ ܢܳܦܶܩ ܡܶܢ ܓܰܘ ܟܰܪܟ̣ܳܐ܆ ܘܰܛܥܺܝܢ ܨܠܺܝܒܶܗ ܥܰܠ ܟܰܬܦܶܗ܆ ܘܶܐܬܟܰܢܰܫ̈ܝ ܥܶܒܪ̈ܳܝܳܬܳܐ܆ ܕܰܢܒܰܟ̈ܝܳܢ ܠܶܗ ܒܰܚܢܰܓܬܳܐ܆ ܩܳܝܡܳܐ ܐܶܡܶܗ ܡܶܢ ܪܽܘܚܩܳܐ܆ ܘܥܰܡܳܗ̇ ܟܽܠܗܶܝܢ ܝܳܕܽܘܥܶܝ̈ܗ̇܆ ܘܰܐܝܟ ܝܰܘܢܳܐ ܫܰܪܝܰܬ ܢܳܗܡܳܐ܆ ܒܚܰܫܳܐ ܪܰܒܳܐ ܘܟܰܪܝܽܘܬܳܐ܆ ܠܰܐܝܟܳܐ ܒܶܪܝ ܠܰܐܝܟܳܐ ܚܰܒܺܝܒܝ܆ ܠܰܐܝܟܳܐ ܕܳܒܪܺܝܢ ܠܳܟ ܘܳܐܙܺܠ̱ܝܢ܆ ܠܡܳܢܳܐ ܟܰܝ ܐܰܫܠܶܡܬ ܢܰܦܫܳܟ܆ ܒܺܐܝ̈ܕܰܝ ܥܰܡܳܐ ܛܳܠܽܘܡܳܐ܆ ܘܳܝܠܺܝ ܒܶܪܝ ܘܳܝܠܺܝ ܚܰܒܺܝܒܝ܆ ܡܳܢܳܐ ܓܰܕܫܳܟ ܝܰܘܡܳܢܳܐ܆ ܒܪܺܝܟ ܚܰܫܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܡܶܛܽܠܳܬܰܢ܀
ܒܳܬܰܪ ܨܠܽܘܬܳܐ ܕܰܬܫܰܥܫܳܥܺܝ̈ܢ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܠܳܒܫܺܝܢ ܛܶܟܣܰܝ̈ܗܽܘܢ ܘܫܳܩܠܺܝܢ ܨܠܺܝܒܳܐ ܡܶܢ ܡܢܳܪܬܳܐ ܘܣܳܝܡܺܝܢ ܥܰܠ ܦܳܬܽܘܪܳܐ ܡܫܰܘܝܳܐ ܘܩܳܝܡܺܝܢ ܩܕܳܡܰܘܗ̱ܝ ܘܰܡܫܰܪܶܝܢ ܒܛܶܟܣܳܐ ܕܣܶܓܕܬܳܐ ܕܰܨܠܺܝܒܳܐ.
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܟܰܕ ܒܰܨܠܺܝܒܳܟ ܩܰܕܺܝܫܳܐ ܢܶܫܬܰܪܪ̈ܳܢ ܢܰܦ̈ܫܳܬܰܢ ܩܰܕܺܝܫܳܐܺܝܬ܆ ܘܦܰܐܝܽܘܬ ܐܰܠܳܗܳܐܺܝܬ ܢܶܣܓܽܘܕ ܠܳܟ܆ ܐܰܝܟ ܦܽܘܩܕܳܢܳܐ ܕܺܝܠܳܟ ܡܳܪܳܢܳܝܳܐ ܟܪܺܝܣܛܝܳܢܳܐܺܝܬ ܢܶܛܥܢܺܝܘܗ̱ܝ ܥܰܠ ܟܰܬ̈ܦܳܬܰܢ܆ ܟܰܕ ܟܽܠܫܳܥ ܡܡܺܝܬܺܝܢܰܢ ܠܗܰܕܳܡܰܝ̈ܢ ܗܳܢܽܘܢ ܕܒܰܐܪܥܳܐ܆ ܘܰܒܟܽܠܳܗ̇ ܕܶܚܠܰܬ ܐܰܠܳܗܳܐ ܢܺܚܶܐ ܒܳܟ ܐܰܢ̱ܬ ܕܺܐܝܬܰܝܟ ܚܰܝ̈ܶܐ ܫܰܪܺܝܪ̈ܶܐ ܟܰܕ ܡܣܰܟܶܝܢܰܢ ܠܣܰܒܪܳܐ ܒܪܺܝܟܳܐ ܘܰܠܓܶܠܝܳܢܳܐ ܫܒܺܝܚܳܐ ܕܡܶܢ ܫܡܰܝܳܐ ܕܒܶܗ ܝܳܗܶܒ ܐܰܢ̱ܬ ܐܰܓܪܳܐ ܠܣܳܓ̈ܕܰܝ ܠܰܨܠܺܝܒܳܟ ܘܡܰܘ̈ܕܝܰܝ ܒܰܫܡܳܟ ܩܰܕܺܝܫܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܢܝܳܢܳܐ ܕܪܰܚܶܡܥܠܰܝ
ܩܠܐ ܒܩ̄: ܐܶܡܳܐ ܕܟܺܝܬܳܐ
ܗܰܘ ܕܶܐܨܛܠܶܒ ܗ̱ܘܳܐ ܒܨܶܗܝܽܘܢ ܥܰܠ ܩܰܝܣܳܐ܆ ܘܒܰܨܠܺܝܒܶܗ ܥܒܰܕ ܦܽܘܪܩܳܢܳܐ ܠܥܳܠܡܳܐ܆ ܪܰܚܶܡܥܠܰܝܢ ܐܰܠܳܗܳܐ܀
ܗܰܘ ܕܶܐܫܬܺܝ ܗ̱ܘܳܐ ܚܰܠܳܐ ܘܰܡܪܳܪܳܐ܆ ܘܰܠܡܰܪܺܝܪܽܘܬ ܚܰܫܰܝ̈ܢ ܐܰܥܒܰܪ ܗ̱ܘܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀
ܨܠܺܝܒܳܟ ܡܳܪܰܢ ܢܶܗܘܶܐ ܠܥܰܢܺܝ̈ܕܰܝܢ܆ ܐܽܘܪܚܳܐ ܘܓܺܝܫܪܳܐ ܘܒܶܗ ܗܽܘ ܢܶܬܡܰܢܥܽܘܢ܆ ܠܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܀
ܫܽܘܒܚܳܐ
ܫܽܘܒܚܳܐ ܠܰܐܒܳܐ ܕܫܰܕܰܪ ܠܺܝܚܺܝܕܶܗ܆ ܘܶܐܨܛܠܶܒ ܕܢܶܦܪܽܘܩ ܨܰܠܡܶܗ ܕܶܐܬܚܰܒܰܠ܆ ܪܰܚܶܡܥܠܰܝܢ ܐܰܠܳܗܳܐ܀
ܩܠܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܪܳܐ
ܐܰܠܳܗܝ̱ ܐܰܠܳܗܝ̱ ܠܡܳܢܳܐ ܫܒܰܩܬܳܢܝ̱ (ܡܙܡ̄: ܟܒ܆ܙ)
ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܚܙܺܝܬ ܐܰܚܰܝ̈ ܒܓܳܓܽܘܠܬܳܐ܆ ܘܰܪܬܺܝܬܳܐ ܐܶܬܡܠܺܝܬ܆ ܐܰܠܳܗܳܐ ܕܰܬܠܶܐ ܒܩܰܝܣܳܐ܆ ܘܡܶܬܒܰܙܰܚ ܡܶܢ ܥܰܘ̈ܳܠܶܐ܆ ܘܥܶܠܳܝ̈ܶܐ ܘܬܰܚ̈ܬܳܝܶܐ܆ ܫܰܒܚܽܘܗ̱ܝ ܘܪܰܡܶܪܡܽܘܗ̱ܝ ܠܥܳܠܡܺܝܢ܀
ܘܒܰܙܰܥܘ̱ ܐܺܝ̈ܕܰܝ ܘܪ̈ܶܓܠܰܝ (ܡܙܡ̄: ܟܒ:ܝܘ)
ܣܳܓܕܺܝܢܰܢ ܡܳܪܝ ܠܰܨܠܺܝܒܳܟ܆ ܘܒܶܗ ܡܶܫܬܰܒܗܪܺܝܢܰܢ ܘܳܐܚܕܺܝܢܰܢ ܓܰܘܣܳܐ܆ ܘܠܶܗ ܪܳܫܡܺܝܢܰܢ ܒܶܝܬ ܥܰܝ̈ܢܰܝܢ܆ ܕܗܽܘ ܡܦܰܨܶܐ ܠܰܢ ܡܶܢ ܒܺܝܫܳܐ܆ ܘܰܠܗܰܘ ܕܰܥܠܰܘܗ̱ܝ ܐܶܬܬܠܺܝ܆ ܫܰܒܚܽܘܗ̱ܝ ܘܪܰܡܶܪܡܽܘܗ̱ܝ ܠܥܳܠܡܺܝܢ܀
ܫܽܘܒܚܳܐ
ܐܰܢ̱ܬ ܡܳܪܝܳܐ ܠܳܐ ܬܶܪܚܰܩ ܡܶܢܝ̱ (ܡܙܡ̄: ܟܒ: ܝܛ)
ܒܪܺܝܟܽ ܗ̱ܘ ܕܥܰܒܕܶܗ ܠܰܨܠܺܝܒܶܗ܆ ܙܰܝܢܳܐ ܘܫܽܘܪܳܐ ܚܰܣܺܝܢܳܐ ܠܰܐܝܠܶܝܢ ܕܠܶܗ ܣܳܓܕܺܝܢ܆ ܘܡܰܦܽܘܠܬܳܐ ܠܟܽܠܗܽܘܢ ܐܰܝܠܶܝܢ܆ ܕܠܳܐ ܡܰܘܕܶܝܢ ܒܗܰܘ ܕܶܐܨܛܠܶܒ ܥܠܰܘܗ̱ܝ܆ ܘܰܒܗܰܘ ܝܰܘܡܳܐ ܕܡܶܐܬܺܝܬܶܗ܆ ܡܰܘܕܶܝܢ ܒܶܗ ܟܰܕ ܠܐ ܨܳܒܶܝܢ܀
ܩܠܐ ܐܚܪܢܐ ܒܩ̄: ܒܗܳܢܳܐ ܝܰܘܡܳܐ
ܐܰܣܳܐ ܬܒܳܪܶܗ ܕܠܶܒܝ̱܆ ܣܰܟܺܝܬ ܠܡܰܢ ܕܬܶܟܪܶܐ ܠܶܗ ܘܠܰܝܬ (ܡܙܡ̄܆ ܣܛ. ܟܟ)
ܒܗܳܢܳܐ ܝܰܘܡܳܐ܆ ܚܫܶܟ ܫܶܡܫܳܐ ܘܰܦܩܰܥܘ̱ ܫܽܘ̈ܥܶܐ ܘܙܳܥܘ̱ ܛܰܪ̈ܳܢܶܐ܆ ܕܰܚܙܰܐܘܽܗ̱ܝ ܠܡܳܪܗܽܘܢ ܕܰܙܩܺܝܦ܆ ܥܰܠ ܪܺܝܫ ܩܰܝܣܳܐ܀
ܝܰܗܒܘ̱ ܒܡܶܐܟܽܘܠܬܝ̱ ܡܪܳܪ̈ܶܐ (ܡܙܡ̄܆ ܣܛ܆ܟܐ)
ܒܗܳܢܳܐ ܝܰܘܡܳܐ܆ ܐܰܫܠܶܡ ܗ̱ܘܳܐ ܪܽܘܚܶܗ ܠܰܐܒܽܘܗ̱ܝ ܒܗܰܘ ܥܶܕܳܢܳܐ܆ ܘܰܒܩܳܠܳܐ ܕܝܰܗܒ ܥܰܠ ܩܰܝܣܳܐ ܦܩܰܥܘ̱ ܛܰܪ̈ܳܢܶܐ܀
ܢܶܗܘܶܐ ܦܳܬܽܘܪܗܽܘܢ ܩܕܳܡܰܝܗܽܘܢ ܦܰܚܳܐ (ܡܙܡ̄ ܣܛ܆ܟܒ)
ܒܗܳܢܳܐ ܝܰܘܡܳܐ܆ ܦܰܠܶܓܘ̱ ܢܰܚ̈ܬܰܘܗ̱ܝ ܒܰܝܢܳܬܗܽܘܢ ܐܰܟܡܳܐ ܕܰܟܬܺܝܒ܆ ܐܰܝܟ ܕܦܰܓܪܶܗ ܗܳܐ ܡܶܬܦܰܠܰܓ ܒܰܐܪܒܰܥ ܦܶܢ̈ܝܳܢ܀
ܫܽܘܒܚܳܐ ܘܡܶܢ ܥܳܠܰܡ
ܒܗܳܢܳܐ ܝܰܘܡܳܐ܆ ܒܰܕܡܽܘܬ ܫܶܡܫܳܐ ܨܡܰܚ ܢܺܝܫܶܗ ܕܰܨܠܺܝܒ ܢܽܘܗܪܳܐ܆ ܘܨܰܠ̈ܡܶܐ ܟܽܠܗܽܘܢ ܕܰܚܙܰܐܘܽܗ̱ܝ ܢܦܰܠܘ̱ ܘܶܐܬܕܰܩܰܩܘ̱܀
ܡܰܘܪܒܳܐ܆ ܐܶܡܪܰܬ ܡܰܪܝܰܡ (ܠܘܩܳܐ܆ ܐ܆ ܡܘ ـ ܢܗ)
ܩܠܐ ܒܩ̄: ܕܠܶܟܝ̱ ܦܰܐܝܳܐ
ܠܳܟ ܙܳܕܶܩ ܕܰܢܫܰܒܰܚ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܡܶܛܽܠ ܕܟܰܕ ܐܶܬܬܠܺܝܬ ܥܰܠ ܩܰܝܣܳܐ ܕܰܨܠܺܝܒܳܐ܆ ܠܥܳܠܡܳܐ ܡܶܢ ܣܳܟܶܗ ܐܰܢܗܰܪܬ܀
ܣܳܓܕܺܝܢܰܢ ܠܰܨܠܺܝܒܳܟ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܡܶܛܽܠ ܕܒܶܗ ܐܶܬܦܪܶܩܢܰܢ ܡܶܢ ܣܶܓܕܬܳܐ ܕܰܦܬܰܟܪ̈ܶܐ܆ ܘܡܶܢ ܕܶܚܠܰܬ ܫܺܐܕ̈ܶܐ܀
ܫܽܘܒܚܳܐ
ܩܰܕܺܝܫܰܬ ܐܰܠܳܗܳܐ܆ ܡܪܰܝܡܳܐ ܕܰܠܥܳܠܰܡ ܥܳܠܡܺܝܢ܆ ܕܥܳܡܰܪ ܒܰܫܡܰܝܳܐ ܘܰܒܥܺܕܬܶܗ ܐܰܬܩܶܢ ܒܛܰܝܒܽܘܬܶܗ܆ ܡܰܕܒܚܳܐ ܡܚܰܣܝܳܢܳܐ܀
ܫܰܒܰܚܘ̱ ܥܰܒܕܰܘ̈ܗ̱ܝ ܕܡܳܪܝܳܐ (ܡܙܡ̄܆ ܩܝܓ. ܙ ـ ܛ)
ܩܠܐ ܒܩ̄: ܡܫܰܒܚܺܝܢ ܠܳܟ ܡܳܪܝܳܐ
ܝܰܘܡܳܢܳܐ ܐܰܪܟܶܢ܆ ܪܺܝܫܶܗ ܒܶܝܬ ܕܺܝܢܳܐ܆ ܘܡܶܬܬܕܺܝܢ ܐܰܝܟ ܥܰܒܕܳܐ܆ ܕܰܝܳܢܳܐ ܕܥܳܠ̈ܡܶܐ܀
ܝܰܘܡܳܢܳܐ ܓܕܰܠܘ̱ ܠܶܗ܆ ܟܠܺܝܠܳܐ ܡܶܢ ܟܽܘ̈ܒܶܐ܆ ܠܗܰܘ ܕܨܰܒܬܳܗ̇ ܠܰܐܪܥܳܐ܆ ܒܦܰܩ̈ܚܶܐ ܘܗܰܒܳܒ̈ܶܐ܀
ܝܰܘܡܳܢܳܐ ܕܳܢܽܘܗ̱ܝ܆ ܘܰܐܝܟ ܒܺܝܫܳܐ ܚܰܝܒܽܘܗ̱ܝ܆ ܠܗܰܘ ܕܰܥܬܺܝܕ ܕܰܢܕܽܘܢ܆ ܠܡܰܠ̈ܟܶܐ ܒܶܝܬ ܕܺܝܢܶܗ܀
ܝܰܘܡܳܢܳܐ ܩܥܰܘ ܠܶܗ܆ ܩܽܘܕܡܰܬ ܦܺܝܠܰܛܳܘܣ܆ ܕܰܨܠܽܘܒܳܝܗ̱ܝ ܠܝܶܫܽܘܥ܆ ܠܗܰܘ ܕܡܶܬܩܪܶܐ ܡܫܺܝܚܳܐ܀
ܝܰܘܡܳܢܳܐ ܢܰܘܕܶܐ܆ ܘܢܶܣܓܽܘܕ ܠܰܨܠܺܝܒܳܐ܆ ܘܰܠܗܰܘ ܕܶܨܛܠܶܒ ܥܠܰܘܗ̱ܝ܆ ܟܽܠܫܳܥ ܡܫܰܒܚܺܝܢܰܢ܀
ܛܽܘܒܰܝܗܽܘܢ ܠܡܶܣ̈ܟܺܢܶܐ (ܡܬܝ܆ ܗ ـ ܓ ـ ܝܒ)
ܩܠܐ ܒܩ̄: ܣܠܶܩܬ ܠܰܨܠܺܝܒܳܐ
ܣܠܶܩܬ ܠܰܨܠܺܝܒܳܐ. ܡܫܺܝܚܳܐ ܐܰܠܳܗܐ ܕܺܝܠܰܢ܆ ܒܦܰܓܪܳܐ ܕܰܢܣܰܒܬ ܡܶܢ ܡܰܪܝܰܡ. ܒܨܶܒܝܳܢܳܐ ܕܰܐܒܳܐ ܘܪܽܘܚܳܐ܆ ܠܦܽܘܪܩܳܢܳܐ ܕܰܒܢܰܝ̈ܢܳܫܳܐ܀
ܥܒܰܕܬ ܦܽܘܪܩܳܢܳܐ ܠܓܶܢܣܰܢ ܡܫܺܝܚܳܐ ܐܰܠܳܗܳܢ܆ ܒܰܨܠܺܝܒܳܟ ܦܳܪܽܘܩܳܝܳܐ܆ ܘܰܒܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ܆ ܫܽܘܒܚܳܐ ܠܳܟ ܪܳܚܶܡ ܐ̱ܢܳܫܳܐ܀
ܫܽܘܒܚܳܐ
ܒܰܨܠܺܝܒܳܟ ܡܰܚܝܳܢܳܐ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܣܚܰܦܬܳܝܗ̱ܝ ܠܒܺܝܫܳܐ ܒܥܶܠܕܰܪܳܐ܆ ܘܰܦܪܰܩܬ ܠܳܐܕܳܡ ܘܰܠܝܰܠ̈ܕܰܘܗ̱ܝ܆ ܡܶܢ ܫܽܘܥܒܳܕܳܐ ܕܰܚܛܺܝܬܳܐ܀
ܩܠܐ ܐܚܪܢܐ ܒܩ̄: ܡܳܐ ܫܰܦܺܝܪ ܗ̱ܘܳܐ
ܡܳܐ ܚܢܺܝܓܳܐ ܗ̱ܘܳܬ ܫܳܥܬܳܐ܆ ܕܰܢܦܰܩ ܡܫܺܝܚܳܐ ܡܶܢ ܐܽܘܪܺܫܠܶܡ܆ ܘܕܳܒܪܺܝܢ ܗ̱ܘܰܘ ܠܶܗ ܡܰܪ̈ܳܚܶܐ ܕܢܶܙܩܦܽܘܢܳܝܗ̱ܝ܆ ܚܠܳܦ ܕܰܐܣܺܝ ܗ̱ܘܳܐ܆ ܟܺܐܒ̈ܶܐ ܘܟܽܘܪ̈ܗܳܢܶܐ ܕܺܝܠܗܽܘܢ܀
ܡܳܐ ܚܢܺܝܓ ܗ̱ܘܳܐ ܘܡܰܪܺܝܪ ܗ̱ܘܳܐ܆ ܩܳܠܳܗ̇ ܕܡܰܪܝܰܡ ܟܰܕ ܐܳܡܪܳܐ ܠܶܗ܆ ܠܺܝܚܺܝܕܳܗ̇ ܒܚܰܫܳܐ ܪܰܒܳܐ ܘܰܒܟܰܪܝܽܘܬܳܐ܆ ܠܰܐܝܟܳܐ ܚܰܒܺܝܒܝ܆ ܠܰܐܝܟܳܐ ܕܳܒܪܺܝܢ ܠܳܟ ܘܳܐܙܺܠ̱ܝܢ܀
ܡܳܐ ܫܰܦܺܝܪ ܗ̱ܘܳܐ ܩܳܠܶܗ܆ ܕܒܰܪ ܐܰܠܳܗܳܐ ܟܰܕ ܐܳܡܰܪ ܠܳܗ̇܆ ܠܝܳܠܶܕܬܶܗ ܕܳܐܙܶܠ ܐ̱ܢܳܐ ܐܶܡܝ̱ ܕܶܐܨܛܠܶܒ ܡܶܛܽܠ܆ ܦܽܘܪܩܳܢ ܥܳܠܡܳܐ܆ ܘܕܰܐܦܢܺܝܘܗ̱ܝ ܠܳܐܕܳܡ ܠܝܳܪܬܽܘܬܶܗ܀
ܡܳܐ ܚܢܺܝܓܳܐ ܗ̱ܘܳܬ ܫܳܥܬܳܐ܆ ܕܰܐܣܶܩܘ̱ ܨܰܠܒܽܘܗ̱ܝ ܥܰܠ ܪܺܝܫ ܩܰܝܣܳܐ. ܘܰܩܥܰܘ ܝܽܘ̈ܕܳܝܶܐ ܒܒܶܙܚܳܐ ܟܰܕ ܐܳܡܪܺܝܢ ܠܶܗ܆ ܕܶܐܢ ܐܰܢ̱ܬ ܡܫܺܝܚܳܐ܆ ܫܪܺܝ ܢܰܦܫܳܟ ܘܰܢܗܰܝܡܶܢ ܒܳܟ܀
ܡܫܰܡܫܳܢܳܐ: ܣܛܳܘܡܶܢ ܩܰܠܳܘܣ ܩܽܘܪܝܶܠܰܝܣܳܘܢ܀
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܫܰܝܢܳܐ ܫܡܰܝܳܢܳܐ ܕܥܰܠ ܩܰܝܣܳܐ ܐܶܬܬܠܺܝ ܘܒܰܦܫܳܛ ܐܺܝ̈ܕܰܘܗ̱ܝ ܠܥܰܡܳܐ ܘܰܠܥܰܡ̱̈ܡܶܐ ܟܰܢܶܫ܆ ܠܗܰܘ ܡܳܪܝܳܐ ܡܒܰܣܪܳܐ ܕܥܰܠ ܨܠܺܝܒܳܐ ܠܡܰܥܪܒܳܐ ܪܟܶܒ ܘܬܶܫܒܽܘܚܬܳܐ ܬܪܺܝܨܬܳܐ ܘܣܶܓܕܬܳܐ ܫܰܪܺܝܪܬܳܐ ܡܶܢ ܟܽܠܗܽܘܢ ܣܰܘ̈ܦܶܐ ܩܰܒܶܠ܆ ܠܗܰܘ ܪܳܥܝܳܐ ܫܰܪܺܝܪܳܐ ܕܛܳܒܽܘܬ ܪܳܥܝܽܘܬܶܗ ܒܰܒܛܺܝܠܽܘܬܶܗ ܕܰܚܠܳܦ ܥܳܢ̈ܶܗ ܐܰܘܕܰܥ܆ ܘܰܠܣܰܓܺܝܐܽܘܬ ܚܢܳܢܶܗ ܒܰܣܺܝܡܳܐ ܒܗܳܝ ܕܣܳܡ ܢܰܦܫܶܗ ܚܠܳܦ ܡܰܪܥܺܝܬܶܗ ܫܰܪܰܪ ܘܰܠܟܽܠܗܽܘܢ ܥܰܡ̱̈ܡܶܐ ܒܰܠܒܺܝܒܽܘܬܶܗ ܦܪܰܩ ܘܰܚ̈ܛܳܗܶܐ ܕܟܽܠ ܒܰܕܒܺܝܚܽܘܬܶܗ ܫܒܰܩ܆ ܕܠܶܗ ܝܳܐܶܐ ܫܽܘܒܚܳܐ ܒܗܳܢܳܐ ܥܶܕܳܢܳܐ ܕܣܶܓܕܬܳܐ ܕܰܨܠܺܝܒܳܐ ܦܳܪܽܘܩܳܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶـܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܣܳܓܕܺܝܢܰܢ ܘܡܰܘܕܶܝܢܰܢ ܘܰܡܪܰܡܪܡܺܝܢܰܢ ܠܺܐܝܬܽܘܬܳܟ ܐܰܠܳܗܰܢ ܡܪܰܝܡܳܐ ܕܰܥܒܰܕܬܳܢ ܒܨܰܠܡܳܟ ܘܰܐܬܩܶܢܬܳܢ ܒܰܕܡܽܘܬܳܟ܆ ܡܫܰܒܚܺܝܢܰܢ ܠܦܽܘܪܩܳܢܳܐ ܕܺܝܠܳܟ ܐܳܘ ܪܳܚܶܡ ܐ̱ܢܳܫ̈ܳܐ ܕܰܒܝܰܘܡܳܐ ܗܳܢܳܐ ܕܰܥܪܽܘܒܬܳܐ ܐܰܚܺܝܬܳܢ ܒܰܙܩܺܝܦܳܟ ܘܚܰܪܰܪܬܳܢ ܒܡܰܘܬܳܟ܆ ܐܰܢ̱ܬ ܓܶܝܪ ܒܪܺܝܫܺܝܬ ܒܝܰܘܡܳܐ ܕܶܫܬܳܐ ܪܶܓܰܬ ܨܶܒܝܳܢܳܟ ܫܰܡܠܺܝܬ ܒܰܒܪܺܝܬܰܢ܆ ܘܥܰܦܪܳܐ ܡܶܢ ܐܳܕܰܡܬܳܐ ܒܺܐܝܕܰܝ̈ܟ ܩܰܕܺܝ̈ܫܳܬܳܐ ܫܩܰܠܬ ܘܰܓܒܰܠܬ ܘܰܐܬܩܶܢܬܳܝܗ̱ܝ ܠܝܽܘܩܢܳܐ ܕܰܕܡܽܘܬܳܟ܆ ܘܡܶܢ ܪܽܘܚ ܦܽܘܡܳܟ ܢܦܰܚܬ ܒܰܐܦܰܘ̈ܗ̱ܝ ܢܶܫܡܰܬ ܚܰܝ̈ܶܐ܆ ܘܶܐܬܓܡܰܪ ܒܫܽܘܦܪܳܐ܆ ܘܶܐܫܬܰܡܠܺܝ ܒܺܝܕܰܥܬܳܐ ܡܳܐܢܳܐ ܕܬܶܕܡܽܘܪܬܳܐ܆ ܘܟܰܕ ܐܶܬܥܒܰܪ ܒܣܰܟܠܽܘܬܳܐ ܘܫܳܛ ܦܽܘܩܕܳܢܳܐ܆ ܐܶܬܡܣܰܪ ܒܰܓܙܳܪ ܕܺܝܢܳܐ ܘܶܐܬܚܰܒܰܠ ܒܡܰܘܬܳܐ܆ ܘܒܳܬܰܪ ܗܳܠܶܝܢ ܟܽܠܗܶܝܢ ܐܳܘ ܡܳܪܝܳܐ ܡܪܰܚܡܳܢܳܐ ܘܰܡܠܶܐ ܪ̈ܰܚܡܶܐ ܘܰܚܢܳܢܳܐ ܐܰܦܺܝܣܽܘܟ ܪ̈ܰܚܡܰܝܟ ܥܰܠ ܚܽܘܒܳܠܶܗ܆ ܘܒܶܗ ܬܽܘܒ ܒܝܰܘܡܳܐ ܕܶܫܬܳܐ ܒܰܥܪܽܘܒܬܳܐ ܡܰܠܝܰܬ ܐ̱ܪ̈ܳܙܶܐ ܐܶܬܩ̈ܒܰܥܝ̱ ܐܺܝܕܰܝ̈ܟ ܒܨܶܨ̈ܶܐ ܥܰܠ ܨܠܺܝܒܳܐ ܚܠܳܦ ܦܽܘܪܩܳܢܶܗ܆ ܘܪܽܘܩܳܐ ܛܰܡܳܐܐ ܩܰܒܶܠ ܦܰܪܨܽܘܦܳܟ ܡܶܢ ܙܳܩܽܘ̈ܦܶܐ܆ ܘܰܒܠܽܘܟܳܝܬܳܐ ܒܠܰܥܬ ܒܣܶܛܪܳܟ ܡܶܛܽܠ ܕܬܰܚܶܝܘܗ̱ܝ܆ ܘܚܰܝ̈ܶܐ ܚܰܕ̈ܬܶܐ ܒܰܕܡܳܐ ܘܡܰܝ̈ܳܐ ܕܡܶܢ ܕܰܦܢܳܟ ܪܕܰܘ ܩܢܳܐ ܘܶܐܬܚܰܕܰܬ܆ ܘܳܐܦ ܗܳܫܳܐ ܡܳܪܝܳܐ ܒܶܗ ܒܝܰܘܡܳܐ ܗܳܢܳܐ ܕܰܥܪܽܘܒܬܳܐ ܕܚܰܫܳܟ ܦܳܪܽܘܩܳܝܳܐ ܘܕܽܘܟܪܳܢܳܐ ܕܰܨܠܺܝܒܳܟ ܡܰܥܒܶܕ ܚܰܝ̈ܶܐ܆ ܡܶܬܟܰܫܦܳܐ ܥܺܕܬܳܟ ܒܦܽܘܡ ܝܰܠ̈ܕܶܝܗ̇ ܘܡܶܬܚܰܢܢܳܐ ܩܕܳܡܰܝܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܝܟ ܕܰܪܚܶܡܬ ܘܰܒܪܰܝܬ ܒܪܺܝܫܺܝܬ ܘܰܦܪܰܩܬ ܘܰܐܚܺܝܬ ܒܚܰܪܬܳܐ܆ ܬܶܣܥܽܘܪ ܐܳܦ ܗܳܫܳܐ ܠܟܽܠܳܗ̇ ܓܒܺܝܠܬܳܟ ܒܪ̈ܰܚܡܶܐ ܕܡܶܢܳܟ܆ ܘܰܬܫܰܟܶܢ ܥܽܘܕܪܳܢܳܐ ܒܰܨܠܺܝܒܳܟ ܠܟܽܠܳܗ̇ ܥܳܡܰܪܬܳܐ܆ ܒܰܨܠܺܝܒܳܟ ܐܰܥܒܰܪ ܠܪܽܘܓܙܳܐ܆ ܒܰܨܠܺܝܒܳܟ ܕܰܥܶܟ ܩܪ̈ܳܒܶܐ܆ ܒܰܨܠܺܝܒܳܟ ܒܰܛܶܠ ܠܬܰܟܬܽܘ̈ܫܶܐ܆ ܒܰܨܠܺܝܒܳܟ ܬܰܗܳܐ ܠܰܡܣܳܡ ܒܪ̈ܺܝܫܶܐ܆ ܒܰܨܠܺܝܒܳܟ ܫܰܦܳܐ ܠܰܕܠܺܝ̈ܚܶܐ܆ ܒܰܨܠܺܝܒܳܟ ܫܰܝܶܢ ܠܰܐܟ̈ܬܳܢܶܐ܆ ܒܰܨܠܺܝܒܳܟ ܡܰܟܶܟ ܠܪܳܡܽܘܬܳܐ܆ ܒܰܨܠܺܝܒܳܟ ܣܚܽܘܦ ܠܫܰܒܗܪܳܢܽܘܬܳܐ܆ ܒܰܨܠܺܝܒܳܟ ܐܰܪܺܝܡ ܠܰܒܥܶܠܕܒܳܒܽܘܬܳܐ܆ ܒܰܨܠܺܝܒܳܟ ܫܰܗܳܐ ܠܰܪܓܺܝܙܽܘܬܳܐ܆ ܒܰܨܠܺܝܒܳܟ ܦܰܓܶܕ ܚܺܐܦ̈ܶܐ ܕܒܺܝܫܽܘܬܳܐ܆ ܒܰܨܠܺܝܒܳܟ ܫܰܬܶܐܣ ܥܺܕ̈ܳܬܰܢ܆ ܒܰܨܠܺܝܒܳܟ ܣܰܬܶܬ ܕܰܝܪ̈ܳܬܰܢ܆ ܒܰܨܠܺܝܒܳܟ ܙܰܗܳܐ ܠܟܳܗ̈ܢܰܝܟ܆ ܒܰܨܠܺܝܒܳܟ ܗܰܕܰܪ ܠܰܡܫܰܡ̈ܫܳܢܰܝܟ܆ ܒܰܨܠܺܝܒܳܟ ܣܰܡܶܟ ܠܣܳܒ̈ܶܐ܆ ܒܰܨܠܺܝܒܳܟ ܟܰܒܶܫ ܚܺܐܦ̈ܶܐ ܕܰܥܠܰܝ̈ܡܶܐ܆ ܒܰܨܠܺܝܒܳܟ ܪܰܒܳܐ ܠܰܛܠܳܝ̈ܶܐ܆ ܒܰܨܠܺܝܒܳܟ ܚܰܣܳܐ ܠܚܰܛܳܝ̈ܶܐ܆ ܒܰܨܠܺܝܒܳܟ ܫܒܽܘܩ ܠܡܰܣܟ̈ܠܳܢܶܐ܆ ܒܰܨܠܺܝܒܳܟ ܐܰܬܩܶܢ ܫܰܦܺܝܪ ܠܡܰܪܥܺܝܬܳܟ܆ ܕܰܩܕܳܡܰܘܗ̱ܝ ܗܳܫܳܐ ܠܳܟ ܣܳܓܕܳܐ ܘܰܠܚܰܫܰܝ̈ܟ ܡܝܰܩܪܳܐ ܘܰܠܫܽܘ̈ܡܳܬܳܟ ܡܚܰܒܒܳܐ ܘܰܠܡܰܚ̈ܘܳܬܳܟ ܡܥܰܦܩܳܐ ܘܰܠܨܽܘ̈ܠܦܳܬܳܟ ܡܢܰܫܩܳܐ܆ ܘܒܶܗ ܒܰܨܠܺܝܒܳܟ ܡܶܫܬܰܒܗܪܳܐ ܘܪܳܘܙܳܐ ܘܰܚܬܺܝܪܳܐ܆ ܘܰܦܪܽܘܩ ܠܰܢ ܘܰܠܟܽܠܶܗ ܥܰܡܳܟ ܓܡܺܝܪܳܐܺܝܬ܆ ܘܫܰܡܠܳܐ ܠܘܳܬܰܢ ܫܽܘܘ̈ܕܳܝܰܝܟ܆ ܘܰܣܥܽܘܪ ܠܰܢ ܒܢܽܘܚܳܡܳܟ ܡܫܰܡܠܝܳܐܺܝܬ܆ ܐܰܝܟܰܢܳܐ ܕܰܢܡܰܢܰܥ ܒܓܰܠܝܽܘܬ ܐܰܦ̈ܶܐ ܠܰܩܝܳܡܬܳܟ ܡܫܰܒܰܚܬܳܐ܆ ܘܢܶܗܘܶܐ ܚܕܽܘ̈ܓܶܐ ܒܰܓܢܽܘܢܳܟ ܘܰܙܡܺܝ̈ܢܶܐ ܒܡܶܫܬܽܘܬܳܟ ܘܝܳܪ̈ܬܶܐ ܒܡܰܠܟܽܘܬܳܟ ܕܰܠܥܳܠܰܡ. ܘܬܰܡܳܢ ܕܠܳܐ ܫܶܠܝܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܩܽܘܩܳܝܳܐ
ܒܰܙܩܺܝܦܳܐ ܐܰܫܠܶܡ ܢܰܦܫܶܗ ܒܰܪ ܐܰܠܳܗܳܐ܆ ܘܝܰܗܒ ܪܽܘܚܶܗ ܒܺܐܝ̈ܕܰܝ ܐܰܒܽܘܗ̱ܝ ܗܰܘ ܡܳܪܶܗ ܕܥܳܠܡܳܐ܆ ܘܰܦܩܰܥܘ̱ ܫܽܘ̈ܥܶܐ܆ ܘܶܐܨܛܰܪܺܝܘ ܩܰܒܪ̈ܶܐ܆ ܘܶܐܚܰܕ ܬܶܡܗܳܐ܆ ܠܟܽܠܗܶܝܢ ܒܶܪ̈ܝܳܬܳܐ܆ ܘܰܒܪܽܘܡܚܳܐ ܕܰܩܪܽܘܗ̱ܝ ܠܣܶܛܪܶܗ ܕܒܰܪ ܐܰܠܳܗܳܐ܆ ܘܰܪܕܰܘ ܡܶܢܶܗ ܕܡܳܐ ܘܡܰܝ̈ܳܐ ܚܽܘܣܳܝܳܐ ܠܥܳܠܡܳܐ ܗ̄ܘܗ̄܀
ܫܽܘܒܚܳܐ
ܡܫܺܝܚܳܐ ܕܰܢܚܶܬ ܡܶܢ ܪܰܘܡܳܐ ܥܰܠ ܩܰܝܣܳܐ ܗܳܐ ܬܠܶܐ܆ ܬܰܘܪܳܐ ܕܰܢܟܰܣܘ̱ ܝܽܘ̈ܕܳܝܶܐ ܗܳܐ ܣܺܝܡ ܥܰܠ ܡܰܕܒܚܳܐ܆ ܬܰܘ ܥܽܘܠܘ̱ ܥܰܡ̱̈ܡܶܐ܆ ܕܰܢܦܰܩܘ̱ ܠܶܗ ܥܰܡܳܐ܆ ܩܽܘܡܝ̱ ܠܶܟܝ̱ ܥܺܕܬܳܐ܆ ܕܢܶܦܠܰܬ ܠܳܗ̇ ܨܶܗܝܽܘܢ܆ ܗܳܐ ܡܰܬܩܰܢ ܒܶܟܝ̱ ܦܳܬܽܘܪܳܐ ܠܰܚܡܳܐ ܕܚܰܝ̈ܶܐ܆ ܘܰܡܙܺܝܓܳܐ ܒܶܟܝ̱ ܐܰܓܳܢܳܐ ܡܶܢ ܕܰܦܢܶܗ ܕܡܳܪܝܳܐ ܗ̄ܘܗ̄܀
ܩܠܐ ܐܚܪܢܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܪܰܒ ܘܰܫܒܺܝܚ ܢܺܝܫܶܗ ܕܰܨܠܺܝܒܳܟ܆ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܆ ܕܒܶܗ ܐܶܬܚܰܝܰܒ ܗ̱ܘܳܐ ܣܳܛܳܢܳܐ܆ ܘܶܐܬܛܰܠܰܩܘ̱ ܚܰܝ̈ܠܰܘܳܬܶܗ܆ ܒܰܨܠܺܝܒܳܟ ܡܳܪܝ ܐܶܬܝܰܗܒܰܬ܆ ܙܳܟܽܘܬܳܐ ܠܰܒܢܰܝ̈ܢܳܫܳܐ܆ ܗܳܐ ܩܳܥܶܝܢ ܠܳܟ ܟܽܠ ܥܰܡ̱ܡܺܝ̈ܢ܆ ܩܰܕܺܝܫܰܬ ܒܪܳܐ ܕܰܐܠܳܗܳܐ܆ ܕܒܰܨܠܺܝܒܳܟܽ ܗ̱ܘ ܦܪܺܝܩܺܝܢܰܢ܀
ܫܠܰܚ ܡܰܠܟܳܐ ܘܩܳܡ ܥܰܪܛܶܠܳܐܺܝܬ܆ ܠܥܶܠ ܡܶܢ ܟܶܢܦܰܘ̈ܗ̱ܝ ܕܰܨܠܺܝܒܳܐ܆ ܡܬܰܚ ܐܺܝ̈ܕܰܘܗ̱ܝ ܥܰܠ ܩܰܝܣܳܐ ܡܝܰܩܪܳܐ܆ ܘܶܐܚܰܕ ܠܰܐܪܒܰܥ ܦܶܢ̈ܝܳܬܳܐ܆ ܘܒܰܕܡܳܐ ܘܡܰܝ̈ܳܐ ܕܡܶܢ ܕܰܦܢܶܗ܆ ܚܰܕܬܶܗ ܠܓܶܢܣܰܢ ܕܶܐܬܚܰܒܰܠ܆ ܘܶܐܬܰܐܣܺܝܢܰܢ ܒܫܽܘ̈ܡܳܬܶܗ܆ ܒܰܨܠܺܝܒܶܗ ܗܘܳܐ ܦܽܘܪܩܳܢܳܐ܆ ܠܟܽܠܗܽܘܢ ܥܰܡ̱̈ܡܶܐ ܕܒܶܗ ܗܰܝܡܶܢܘ̱܀
ܥܶܛܪܳܐ
ܣܳܓܕܺܝܢܰܢ ܠܳܟ ܡܒܰܣܶܡ ܠܬܺܐܒܶܝܠ ܒܥܶܛܪܳܐ ܕܪ̈ܺܝܚܳܢܰܘܗ̱ܝ܆ ܕܰܙܩܺܝܦܳܟ ܗܘܳܐ ܦܺܝܪܡܳܐ ܪܽܘܚܳܢܳܐ܆ ܘܰܒܥܶܛܪܳܐ ܗܰܢܺܝܳܐܐ ܪܰܥܺܝܬ ܠܰܐܒܽܘܟ ܥܰܡ ܒܶܪ̈ܝܳܬܳܐ܆ ܗܘܳܐ ܓܶܝܪ ܚܰܫܳܟ ܚܠܳܦ ܡܽܘܪܳܐ܆ ܘܚܽܘܒܳܟ ܚܠܳܦ ܗܶܪ̈ܽܘܡܶܐ܆ ܘܰܒܝܰܕ ܟܽܘܡܪܽܘܬܳܐ ܕܐ̱ܢܳܫܽܘܬܳܟ ܩܰܪܶܒܬ ܠܝܳܠܽܘܕܳܟ ܦܺܝܪܡܶܗ ܕܰܙܩܺܝܦܳܟ܆ ܩܰܒܶܠ ܐܳܦ ܗܳܫܳܐ ܡܶܢ ܐܺܝ̈ܕܰܝܳܐ ܕܺܝܠܰܢ ܚܰܠܳܫ̈ܳܬܳܐ ܦܺܝܪܡܳܐ ܗܳܢܳܐ ܕܩܰܪܒܶܢܰܢ ܩܕܳܡܰܝܟ܆ ܘܫܰܟܶܢ ܒܶܗ ܚܽܘܣܳܝܳܐ ܘܫܽܘܒܩܳܢܳܐ ܠܟܽܠܳܗ̇ ܡܰܪܥܺܝܬܳܟ܆ ܘܰܥܒܶܕ ܒܶܗ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܚܽܘܬܳܡܳܐ
ܐܶܣܟܺܡܶܐ ܡܳܪܳܢܳܝܳܐ ܕܰܠܟܽܠ ܥܒܰܕ ܒܝܰܕ ܚܰܝܠܶܗ ܠܳܐ ܡܶܙܕܰܟܝܳܢܳܐ ܗܰܘ ܕܰܒܝܰܕ ܦܫܳܛ ܐܺܝܕܰܘ̈ܗ̱ܝ ܩܰܕܺܝ̈ܫܳܬܳܐ ܠܰܐܪܒܰܥ ܦܶܢ̈ܝܳܬܶܗ ܕܥܳܠܡܳܐ܆ ܕܡܶܢܶܗ ܘܒܶܗ ܝܺܕܰܥܬܳܐ ܚܠܺܝܡܬܳܐ ܕܰܥܛܳܬ ܠܽܐܘܚܕܳܢܶܗ ܕܒܺܝܫܳܐ ܩܢܰܝܢܰܢ܆ ܡܳܪܝܳܐ ܗܰܘ ܕܶܐܬܡܬܰܚ ܥܰܠ ܩܰܝܣܳܐ ܦܰܓܪܳܢܳܐܺܝܬ ܟܰܕ ܚܰܝܰܐ ܗ̱ܘ ܐܰܝܟ ܐܰܠܳܗܳܐ܆ ܒܳܟ ܢܚܽܘܪ̈ܳܢ ܥܰܝܢܰܝ̈ܢ ܩܰܕܺܝܫܳܐ ܕܺܐܝܣܪܳܐܶܝܠ܆ ܕܰܐܢ̱ܬܽ ܗ̱ܘ ܚܰܝ̈ܶܐ ܕܰܬܠܶܝܢ ܠܩܽܘܒܠܰܢ܆ ܗܰܒ ܕܠܳܐ ܢܶܕܚܰܠ ܡܶܢ ܦܶܓ̈ܥܶܐ ܠܺܠܝ̈ܳـܝܶܐ܆ ܘܳܐܦܠܳܐ ܡܶܢ ܓܶܐܪ̈ܶܐ ܐܺܝ̈ܡܳܡܳܝܶܐ ܕܰܒܛܰܗܪܳܐ ܕܚܰܫ̈ܶܐ ܡܶܢ ܐܳܟܶܠܩܰܪܨܳܐ ܒܰܢ ܡܶܬܟܰܫܛܺܝܢ ܡܶܛܽܠ ܕܰܐܢ̱ܬܽ ܗ̱ܘ ܣܶܬܳܪܳܐ ܕܺܝܠܰܢ ܥܰܫܺܝܢܳܐ ܥܰܠ ܟܽܠܰܢ ܝܰܡܺܝܢܳܟ ܐܰܓܶܢ܆ ܘܠܰܟܢܽܘܫܝܰܢ ܕܒܳܟ ܒܰܪܶܟ܆ ܘܰܠܢܰܦ̈ܫܳܬܰܢ ܒܢܺܝܫܶܗ ܕܰܨܠܺܝܒܳܟ ܢܰܛܰܪ. ܘܢܰܣܶܩ ܠܳܟ ܫܽܘܒܚܳܐ ܦܰܐܝܳܐ ܘܬܰܘܕܺܝܬܳܐ ܒܟܽܠܥܶܕܳܢ. ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܛܽܘܒܰܝܟܝ̱ ܥܺܕܬܳܐ
ܡܳܪܝܳܐ ܕܺܐܝܬܰܝܟ܆ ܝܺܚܺܝܕܳܝܳܐ ܕܡܶܢ ܐܰܒܳܐ܆ ܒܰܙܩܺܝܦܳܐ ܐܰܡܪܰܚܘ̱ ܬܠܰܐܘܽܘܟ܆ ܒܢܰܝ̈ ܐܺܝܣܪܳܐܶܝܠ ܛܳܠܽܘ̈ܡܶܐ܆ ܘܰܒܠܽܘܟܳܝܬܳܐ ܬܪܰܥܘ̱ ܣܶܛܪܳܟ܆ ܘܰܪܕܰܘ ܡܶܢܶܗ ܕܡܳܐ ܘܡܰܝ̈ܳܐ܆ ܘܶܐܫܬܰܦܰܥܘ̱ ܡܰܒܽܘܥ ܚܰܝ̈ܶܐ ܥܰܠ ܓܳܓܽܘܠܬܳܐ ܒܰܙܩܺܝܦܳܐ܆ ܘܗܰܝܡܶܢܘ̱ ܥܰܡ̱̈ܡܶܐ ܘܶܐܬܚܰܪܰܪܘ̱܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀
ܫܽܘܒܚܳܐ
ܡܒܰܪܰܟ ܩܰܝܣܳܐ܆ ܕܙܰܕܺܝܩܳܐ ܡܶܬܚܙܶܐ ܡܶܢܶܗ܆ ܐܰܟܬܶܒ ܠܰܢ ܡܰܠܟܳܐ ܫܠܶܝܡܽܘܢ܆ ܘܰܐܟܪܶܙ ܠܟܽܠܗܶܝܢ ܒܶܪ̈ܝܳܬܳܐ܆ ܥܰܠ ܩܰܝܣܳܐ ܕܰܙܩܺܝܦܽܘܬܳܐ܆ ܡܬܰܚ ܢܰܦܫܶܗ ܒܪܳܐ ܕܰܐܠܳܗܳܐ܆ ܫܽܘܒܚܳܐ ܠܶܗ ܕܰܒܝܰܕ ܪ̈ܰܚܡܰܘܗ̱ܝ܆ ܐܶܬܳܐ ܘܫܰܡܠܺܝ ܟܽܠ ܕܰܟܬܺܝܒ܆ ܘܒܰܬܪܰܥ ܣܶܛܪܶܗ ܐܶܬܚܰܣܝܰܬ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܀
ܡܰܕܪܳܫܳܐ ܒܩ̄: ܩܽܘܡ ܦܰܘܠܳܘܣ
ܒܰܥܪܽܘܒܬܳܐ ܙܳܥ̈ܝ̱ ܗ̱ܘܰܝ̈ ܒܶܪ̈ܝܳܬܳܐ܆ ܘܰܩܛܰܪ ܗ̱ܘܳܐ ܐܶܒܠܳܐ ܠܦܶܢ̈ܝܳܬܳܐ܆ ܫܰܠܺܝܛܳܐ ܕܰܬܪ̈ܰܝܗܽܘܢ ܥܳܠ̈ܡܶܐ܆ ܥܰܠ ܩܰܝܣܳܐ ܙܩܺܝܦ ܗ̱ܘܳܐ ܘܡܶܬܒܰܙܰܚ܆ ܫܶܡܫܳܐ ܐܶܬܟܡܰܗ ܗ̱ܘܳܐ܆ ܘܚܰܦܺܝ ܙܰܠܺܝ̈ܩܰܘܗ̱ܝ܆ ܘܰܐܪܥܳܐ ܦܶܩܥܰܬ ܗ̱ܘܳܬ܆ ܘܝܶܗܒܰܬ ܠܰܚܒܺܝ̈ܫܶܝܗ̇܆ ܥܶܠܳܝ̈ܶܐ ܘܓܽܘ̈ܕܶܐ ܕܢܽܘܪ̈ܳܢܶܐ܆ ܛܪܰܦܘ̱ ܓܶܦ̈ܶܐ ܕܢܽܘܪܳܐ ܒܬܶܕܡܽܘܪܬܳܐ܀
ܒܰܥܪܽܘܒܬܳܐ ܩܥܳܐ ܗ̱ܘܳܐ ܠܘܳܬ ܐܰܒܳܐ܆ ܗܰܘ ܒܽܘܟܪܶܗ ܕܰܐܒܳܐ ܫܡܰܝܳܢܳܐ܆ ܘܶܐܫܬܰܡܠܺܝ ܟܽܠ ܡܳܐ ܕܰܐܟܪܶܙܘ̱ ܗ̱ܘܰܘ܆ ܚܰܙܳܝ̈ܶܐ ܕܰܥܠܰܘܗ̱ܝ ܐܶܬܢܰܒܺܝܘ܆ ܡܰܚ̈ܘܳܬܳܐ ܩܰܒܶܠ܆ ܪܽܘܩܳܐ ܥܰܡ ܒܶܙܚܳܐ ܚܰܠܳܐ ܘܰܡܪܳܪܳܐ܆ ܨܶܨ̈ܶܐ ܘܠܽܘܟܳܝܬܳܐ܆ ܘܠܳܐ ܝܳܕܥܺܝܢ ܒܺܝ̈ܫܶܐ ܘܕܳܘ̈ܰܝܳܐ܆ ܕܰܠܡܳܪܳܗ̇ ܕܬܶܫܒܽܘܚܬܳܐ ܙܩܰܦܘ̱ ܗ̱ܘܰܘ܀
ܒܰܥܪܽܘܒܬܳܐ ܐܰܟܡܰܗ ܗ̱ܘܳܐ ܠܢܽܘܗܪܶܗ܆ ܗܰܘ ܫܶܡܫܳܐ ܫܽܘܦܪܳܐ ܕܒܶܪ̈ܝܳܬܳܐ܆ ܘܶܐܣܦܺܝܪܳܐ ܫܒܺܝܚܰܬ ܒܟܽܠ ܨܶܡܚܺܝ̈ܢ܆ ܚܰܦܝܰܬ ܗ̱ܘܳܬ ܫܽܘܦܪܳܐ ܕܢܰܗܺܝܪ̈ܶܝܗ̇܆ ܕܗܰܘ ܫܶܡܫܳܐ ܪܰܒܳܐ܆ ܘܢܽܘܗܪܳܐ ܕܒܶܪ̈ܝܳܬܳܐ܆ ܘܨܶܡܚܳܐ ܫܰܪܺܝܪܳܐ܆ ܬܠܶܐ ܗ̱ܘܳܐ ܘܰܡܦܰܪܣܰܝ܆ ܘܚܰܦܺܝ ܗ̱ܘܳܐ ܫܶܡܫܳܐ ܙܰܠܺܝ̈ܩܰܘܗ̱ܝ܆ ܕܠܳܐ ܢܶܚܙܶܐ ܥܰܡܳܐ ܦܽܘܪܣܳܝܶܗ܀
ܒܰܥܪܽܘܒܬܳܐ ܒܟܰܝ̈ ܗ̱ܘܰܝ̈ ܒܰܚܢܰܓܬܳܐ܆ ܐܶܡ̈ܗܳܬܳܐ ܠܚܰܫܶܗ ܕܺܝܚܺܝܕܳܐ܆ ܥܒܰܕ̈ܝ̱ ܗ̱ܘܰܝ̈ ܠܶܗ ܠܰܒܪܳܐ ܒܶܝܬ ܒܳܟܶܐ܆ ܘܰܒܟܰܝܳܝ̈ܗ̱ܝ ܠܒܽܘܟܪܳܐ ܫܡܰܝܳܢܳܐ܆ ܫܡܰܝܳܐ ܒܢܰܗܺܝܪ̈ܶܐ܆ ܘܰܐܪܥܳܐ ܒܝܰܕ ܫܽܘ̈ܥܶܐ. ܫܝܽܘܠ ܢܰܚܡܰܬ ܡܺܝ̈ܬܶܐ܆ ܘܰܐܘܕܥܰܬ ܪܰܒܽܘܬܶܗ܆ ܗܰܘ ܥܰܡܳܐ ܕܨܰܠܒܶܗ ܐܶܣܬܰܡܺܝ܆ ܘܠܳܐ ܝܺܕܰܥ ܟܝܳܢܳܐ ܕܡܳܪܶܐ ܟܽܠ܀
ܒ̈ܳܬܶܐ ܕܚܰܫܳܐ
ܒܪܺܝܟ ܡܳܪܝ ܚܰܫܳܟ ܕܰܗܘܳܐ ܚܠܳܦܰܝܢ܆ ܒܪܺܝܟ ܡܽܘܟܳܟܳܟ ܕܡܶܛܽܠܳܬܰܢ܀
ܡܳܐ ܕܕܳܝܢܰܬ ܠܶܗ ܠܥܰܡܳܐ ܕܕܳܢܳܟ܆ ܠܕܺܝܢܳܐ ܥܰܡܰܢ ܡܳܪܝ ܠܳܐ ܬܶܥܽܘܠ܀
ܫܢܰܘ ܨܳܠܽܘ̈ܒܶܐ܆ ܘܰܐܣܶܩܘ̱ ܨܰܠܒܽܘܗ̱ܝ܆ ܠܰܡܠܶܟ ܡܰܠ̈ܟܶܐ܆ ܥܰܠ ܓܳܓܽܘܠܬܳܐ܆ ܘܰܐܘܫܶܛܘ̱ ܝܰܗܒܘ̱ ܠܶܗ܆ ܙܽܘܦܳܐ ܒܩܰܢܝܳܐ܆ ܘܰܟܬܰܒ ܒܩܰܢܝܳܐ ܘܰܫܪܳܐ ܐܶܢܽܘܢ܆ ܘܒܰܕܰܪ ܐܶܢܽܘܢ ܒܰܝܢܳܬ ܥܰܡ̱̈ܡܶܐ܀
ܐܰܣܶܩܘ̱ ܨܰܠܒܽܘܗ̱ܝ܆ ܥܰܠ ܓܳܓܽܘܠܬܳܐ܆ ܠܶܐܡܰܪ ܦܶܨܚܳܐ܆ ܣܰܟ̈ܠܶܐ ܕܰܛܥܰܘ܆ ܘܰܒܪܶܟܘ̱ ܩܽܘܕܡܰܘܗ̱ܝ܆ ܥܰܠ ܒܽܘܪ̈ܟܰܝܗܽܘܢ܆ ܒܝܰܕ ܣܶܓܕܰܬܗܽܘܢ ܚܰܘܺܝܘ ܬܳܓܶܗ܆ ܕܡܰܠܟܰܐ ܗ̱ܘ ܪܰܒܳܐ ܕܠܳܐ ܡܶܣܬܰܝܰܟ܀
ܨܶܨ̈ܶܐ ܘܣܶܟ̈ܶܐ܆ ܒܺܐܝ̈ܕܰܘܗ̱ܝ ܘܪ̈ܶܓܠܰܘܗ̱ܝ܆ ܩܒܰܥܘ̱ ܗ̱ܘܰܘ ܣܰܟ̈ܠܶܐ ܟܰܕ ܡܶܫܬܰܢܶܝܢ܆ ܘܰܒܠܽܘܟܳܝܬܳܐ ܬܪܰܥܘ̱ ܗ̱ܘܰܘ ܣܶܛܪܶܗ܆ ܘܒܰܕܡܳܐ ܘܡܰܝ̈ܳܐ ܕܰܪܕܰܘ ܡܶܢܶܗ܆ ܐܶܬܚܰܣܺܝ ܗ̱ܘܳܐ ܟܽܠܶܗ ܥܳܠܡܳܐ܀
ܫܶܡܫܳܐ ܕܰܚܙܳܐ܆ ܠܡܳܪܶܗ ܕܰܙܩܺܝܦ܆ ܘܰܬܠܶܐ ܒܩܰܝܣܳܐ ܚܰܦܺܝ ܐܰܦܰܘ̈ܗ̱ܝ܆ ܕܠܳܐ ܐ̱ܢܳܫ ܢܶܚܙܶܐ܆ ܕܰܡܦܰܪܣܰܝ ܗ̱ܘܳܐ܆ ܗܽܘ ܐܰܠܒܶܫ ܗ̱ܘܳܐ܆ ܠܳܐܕܳܡ ܫܽܘܒܚܳܐ܆ ܕܰܥܛܺܝܦ ܢܽܘܗܪܳܐ ܐܰܝܟ ܡܰܪܛܽܘܛܳܐ܀
ܐܰܪܟܶܢ ܪܺܝܫܶܗ܆ ܠܥܶܠ ܡܶܢ ܩܰܝܣܳܐ܆ ܘܰܐܫܠܶܡ ܢܰܦܫܶܗ ܒܺܐܝ̈ܕܰܝ ܐܰܒܽܘܗ̱ܝ܆ ܗܰܘ ܕܰܢܦܰܚ ܗ̱ܘܳܐ܆ ܪܽܘܚܳܐ ܒܳܐܕܳܡ܆ ܟܰܕ ܒܳܪܶܐ ܠܶܗ ܘܠܳܐ ܐܶܣܬܰܟܰܠ܆ ܠܡܰܢܽܘ ܙܩܰܦ ܗ̱ܘܳܐ ܥܰܡܳܐ ܠܺܝܛܳܐ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ ܝܰܥܩܽܘܒ
ܡܫܺܝܚܳܐ ܕܶܐܬܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܽܘܬܳܐ܀
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀
ܐܰܠܳܗܰܢ ܪܰܚܶܡܥܠܰܝܢ܆ ܡܳܪܰܢ ܒܪ̈ܰܚܡܰܝܟ ܚܽܘܣ ܥܠܰܝܢ܀
ܡܛܳܐ ܠܰܥܠܳܬܳܐ ܐܶܡܪܳܐ ܚܰܝܳܐ ܕܰܐܠܳܗܽܘܬܳܐ܆ ܘܩܳܡܘ̱ ܨܳܠܽܘ̈ܒܶܐ ܗ̱ܘܰܘ ܠܶܗ ܟܽܘܡܪ̈ܶܐ ܕܰܢܢܰܩܽܘܢܳܝܗ̱ܝ܆ ܩܒܰܥܘ̱ ܗ̱ܘܰܘ ܩܰܝܣܳܐ ܕܰܨܠܺܝܒܽܘܬܶܗ ܥܰܠ ܓܳܓܽܘܠܬܳܐ܆ ܘܢܰܓܕܽܘܗ̇ ܠܟܺܐܦܳܐ ܠܪܺܝܫ ܒܶܢܝܳܢܳܐ ܦܳܥ̈ܠܶܐ ܠܺܝ̈ܛܶܐ܆ ܒܰܝܢܳܬ ܪܰܘܡܳܐ ܠܥܽܘܡܩܳܐ ܦܰܫܛܽܘܗ̱ܝ ܐܰܝܟ ܥܰܡܽܘܕܳܐ܆ ܘܩܳܡ ܗ̱ܘܳܐ ܕܢܶܛܥܰܢ ܝܽܘܩܪܶܗ ܕܥܳܠܡܳܐ ܓܰܢ̱ܒܳܪܳܐܺܝܬ܀
ܡܬܰܚ ܗ̱ܘܳܐ ܐܺܝ̈ܕܰܘܗ̱ܝ ܕܢܶܐܚܽܘܕ ܣܰܘܦܶܝ̈ܗ̇ ܘܥܶܒܪ̈ܶܝܗ̇ ܕܰܐܪܥܳܐ܆ ܘܟܽܠܳܗ̇ ܒܪܺܝܬܳܐ ܚܡܰܠ ܒܰܕܪ̈ܳܥܰܘܗ̱ܝ ܨܶܝܕ ܝܳܠܽܘܕܶܗ܆ ܒܰܙܰܥܘ̱ ܐܺܝܕܰܘ̈ܗ̱ܝ ܣܰܟܶܟܘ̱ ܪ̈ܶܓܠܰܘܗ̱ܝ ܚܰܠܳܐ ܝܰܗܒܘ̱ ܠܶܗ܆ ܦܰܠܶܓܘ̱ ܢܰܚ̈ܬܰܘܗ̱ܝ ܘܰܐܪܡܺܝܘ ܦܶܣ̈ܶܐ ܥܰܠ ܬܰܠܒܶܫܬܶܗ܆ ܕܢܶܣܒܽܘܠ ܗܳܠܶܝܢ ܐܰܝܬܺܝ ܗܽܘ ܠܶܗ ܠܰܙܩܺܝܦܽܘܬܳܐ܆ ܘܰܦܫܰܛ ܐܺܝܕܰܘ̈ܗ̱ܝ ܘܩܰܒܶܠ ܨܰܥܪܳܐ ܡܶܢ ܡܰܪ̈ܳܚܶܐ܀
ܒܦܶܠܓܶܗ ܕܝܰܘܡܳܐ ܕܳܠ ܚܶܫܽܘܟܳܐ ܘܛܰܫܝܳܗ̇ ܠܰܐܪܥܳܐ܆ ܘܡܶܢܳܗ̇ ܝܶܕܥܰܬ ܡܰܢܽܘ ܫܰܠܺܝܛ ܥܰܠ ܢܰܗܺܝܪ̈ܶܐ܆ ܥܪܰܒ ܒܰܥܪܽܘܒܬܳܐ ܢܽܘܗܪܳܐ ܕܢܰܟܪܶܙ ܡܰܢܽܘ ܢܽܘܗܪܳܐ܆ ܘܰܐܪܓܶܫ ܥܳܠܡܳܐ ܒܒܰܪ ܐܰܠܳܗܳܐ ܕܗܽܘܝܽܘ ܕܰܨܠܺܝܒ܆ ܒܦܶܠܓܶܗ ܕܝܰܘܡܳܐ ܐܶܟܰܠ ܐܳܕܳܡ ܡܶܢ ܐܺܝܠܳܢܳܐ܆ ܘܩܳܡ ܟܰܕ ܒܰܗܺܝܬ ܙܳܐܰܥ ܘܕܳܚܶܠ ܥܰܠ ܣܰܟܠܽܘܬܶܗ܀
ܣܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܪܽܘܚܳܐ ܕܩܽܘܕܫܳܐ܆ ܗܳܐ ܡܶܢ ܥܳܠܰܡ ܘܰܠܕܳܪܕܳܪ̈ܺܝܢ ܠܶܗ ܬܶܫܒܽܘܚܬܳܐ܆ ܒܦܶܠܓܶܗ ܕܝܰܘܡܳܐ ܐܶܬܦܰܪܣܺܝ ܗ̱ܘܳܐ ܒܪܳܐ ܒܰܙܩܺܝܦܳܐ܆ ܘܰܩܥܳܐ ܒܩܳܠܳܐ ܘܙܳܥ ܚܰܪܡܳܢܳܐ ܕܩܰܛܠܶܗ ܠܳܐܕܳܡ܆ ܥܪܽܘܒܬܳܐ ܕܚܰܫ̈ܶܐ ܘܡܳܪܰܬ ܛܽܘܦ̈ܣܶܐ ܘܡܰܠܝܰܬ ܐ̱ܪ̈ܳܙܶܐ܆ ܙܥܽܘܪ ܗ̱ܘܽ ܠܶܟܝ ܦܽܘܡܝ̱ ܕܢܶܬܢܶܐ ܗܳܠܶܝܢ ܕܶܐܫܬܰܡܰܫ̈ܝ̱ ܒܶܟܝ̱܀
ܠܰܐܝܟܳܐ ܝܽܘܕܳܐ ܠܰܐܝܟܳܐ ܢܟܺܝܠܳܐ ܡܶܢ ܨܶܝܕ ܪܰܒܳܟ܆
ܡܰܢ ܐܰܟܘܳܬܶܗ ܕܰܪܚܺܝܡ ܘܚܰܒܺܝܒ ܘܰܡܠܶܐ ܚܽܘܒܳܐ.
ܐܰܠܳܗܰܢ ܪܰܚܶܡܥܠܰܝܢ܆ ܡܳܪܰܢ ܒܪ̈ܰܚܡܰܝܟ ܚܽܘܣ ܥܠܰܝܢ܀
ܩܠܐ ܒܩ̄: ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܳܪܰܢ ܐܶܬܪܰܚܰܡܥܠܰܝܢ܆ ܒܚܰܫܳܟ ܪܰܒܳܐ ܕܰܚܠܳܦܰܝܢ܀
ܒܚܰܫܳܟ ܢܶܗܘܶܐ ܚܳܫܽܘ̈ܫܶܐ܆ ܘܰܠܡܰܠܟܽܘܬܳܟ ܝܳܪ̈ܽܘܬܶܐ܀
ܡܬܰܚ ܢܰܦܫܶܗ ܒܰܪ ܐܰܠܳܗܳܐ܆ ܥܰܠ ܩܰܝܣܳܐ ܕܰܨܠܺܝܒܽܘܬܳܐ܆ ܘܒܰܦܫܳܛܳܐ ܕܬܰܪܬܶܝܢ ܐܺܝܕܰܘ̈ܗܝ܆ ܐܶܚܰܕ ܠܰܐܪܒܰܥ ܦܶܢ̈ܝܳܬܳܐ܆ ܐܳܘ ܨܠܺܝܒܳܐ ܕܰܡܠܶܐ ܚܶܣܕܳܐ܆ ܘܢܳܒܥܳܐ ܡܶܢܶܗ ܚܰܠܝܽܘܬܳܐ܆ ܩܒܺܝܥܳܐ ܒܶܗ ܠܰܘܛܰܬ ܚܰܘܳܐ܆ ܘܰܡܠܶܐ ܟܽܠܶܗ ܒܽܘܪ̈ܟܳܬܳܐ܀
ܣܳܓܕܺܝܢܰܢ ܡܳܪܝ ܠܰܨܠܺܝܒܳܟ܆ ܕܒܶܗ ܗܽܘ ܗܘܳܐ ܠܰܢ ܦܽܘܪܩܳܢܳܐ܆ ܘܶܐܬܦܰܢܝܰܬ ܠܰܢ ܝܳܪܬܽܘܬܰܢ܆ ܕܰܒܡܶܠܟܶܗ ܕܒܺܝܫܳܐ ܫܒܰܩܢܳܗ̇܆ ܢܶܣܓܽܘܕ ܟܽܠܰܢ ܠܰܨܠܺܝܒܳܐ܆ ܕܒܶܗ ܗܽܘ ܒܺܝܫܳܐ ܐܶܫܬܰܦܰܠ܀
ܙܘܡܪܐ ܗܢܐ ܫܒܝܥܝܐ ܒܩ̄: ܐܰܨܶܕܬ ܪܶܥܝܳܢܝ̱
ܓܠܰܘ ܚܰܪ̈ܡܶܐ ܘܰܫܠܰܚܘ̱ ܢܰܚ̈ܬܰܘܗ̱ܝ܆ ܘܰܫܪܳܐ ܙܰܘܥܳܐ ܒܰܒܪܺܝܬܳܐ܆ ܘܫܶܬܶܐܣܶܝ̈ܗ̇ ܕܰܐܪܥܳܐ ܪ̈ܥܶܠܝ̱ ܗ̱ܘܰܝ̈܆ ܥܰܠ ܓܽܘܢܚܳܐ ܕܥܶܒܕܰܬ ܨܶܗܝܽܘܢ܆ ܓܳܓܽܘܠܬܳܐ ܕܰܥܠܶܝܗ̇ ܨܰܠܒܽܘܗ̱ܝ܆ ܠܳܐ ܣܰܝܒܪܰܬ ܕܬܶܛܥܰܢܝ̱ ܝܽܘܩܪܶܗ܀
ܒܪܺܝܟ ܚܰܫܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܕܡܶܛܽܠܳܬܰܢ܀
ܩܶܪ̈ܝܳܢܶܐ:
ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܘܪܽܘܚ ܩܽܘܕܫܳܐ ܒܕܰܘܺܝܕ ܙܶܡܪܰܬ܀
ܒܪܺܝܬܳܐ. ܟܒ܆ ܐ ـ ܝܕ Genesis 22:1-14
ܡܰܦܩܳܢܳܐ. ܝܙ܆ ܚ ــ ܝܘ Exodus 17:8-16
ܐܶܫܰܥܝܳܐ. ܢܒ: ܝܓ ـ ܝܗ. ܘܩܦ̄ ܢܓ܆ ܐـ ܚ Jesaiah 52:13-15 - 53:1-8
ܐ. ܦܶܛܪܳܘܣ. ܒ: ܝܛ ـ ܟܗ I Peter 2:19-25
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰܠܰܛܳܝ̈ܶܐ
ܒ: ܟܐ܇ ܓ: ܐ ـ ܝܕ Galatians 2:21, 3:1-14
ܕܣܓܕܬܐ ܕܨܠܝܒܐ
ܠܳܐ ܛܳܠܶܡ ܐ̱ܢܳܐ ܛܰܝܒܽܘܬܶܗ ܕܰܐܠܳܗܳܐ. ܐܶܢ ܓܶܝܪ ܒܝܰܕ ܢܳܡܽܘܣܳܐ ܗ̱ܝ ܙܰܕܺܝܩܽܘܬܳܐ܆ ܡܫܺܝܚܳܐ ܡܰܓܳܢ ܡܺܝܬ! ܐܳܘ ܚܰܣܺܝܪ̈ܰܝ ܪܶܥܝܳܢܳܐ ܓܰܠܰܛܳܝ̈ܶܐ܇ ܡܰܢܽܘ ܚܣܰܡ ܒܟܽܘܢ؟ ܕܗܳܐ ܐܰܝܟ ܗܰܘ ܕܰܡܨܳܪ. ܨܺܝܪ ܗ̱ܘܳܐ ܩܕܳܡ ܥܰܝ̈ܢܰܝܟܽܘܢ ܝܶܫܽܘܥ ܡܫܺܝܚܳܐ. ܟܰܕ ܨܠܺܝܒ؟ ܗܳܕܶܐ ܒܰܠܚܽܘܕ ܨܳܒܶܐ ܐ̱ܢܳܐ ܕܶܐܕܰܥ ܡܶܢܟܽܘܢ. ܡܶܢ ܥ̈ܒܳܕܶܐ ܕܢܳܡܽܘܣܳܐ ܢܣܰܒܬܽܘܢ ܪܽܘܚܳܐ܆ ܐܰܘ ܡܶܢ ܫܶܡܥܳܐ ܕܗܰܝܡܳܢܽܘܬܳܐ܆ ܗܳܟܰܢܳܐ ܣܰܟܠܺܝܢ ܐܢ̱ܬܽܘܢ܆ ܕܫܰܪܺܝܬܽܘܢ ܒܪܽܘܚܳܐ܇ ܘܗܳܫܳܐ ܒܰܒܣܰܪ ܡܫܰܠܡܺܝܢ ܐܢ̱ܬܽܘܢ܆ ܗܳܠܶܝܢ ܟܽܠܗܶܝܢ ܐܺܝܩܺܐ ܣܰܝܒܰܪܬܽܘܢ܆ ܘܶܐܫܬܽܘܦ ܕܶܝܢ ܐܺܝܩܺܐ! ܗܰܘ ܗܳܟܺܝܠ ܕܝܰܗ̱ܒ ܒܟܽܘܢ ܪܽܘܚܳܐ܇ ܘܣܳܥܰܪ ܒܟܽܘܢ ܚܰܝ̈ܠܶܐ܆ ܡܶܢ ܥ̈ܒܳܕܶܐ ܕܢܳܡܽܘܣܳܐ ܐܰܘ ܡܶܢ ܫܶܡܥܳܐ ܕܗܰܝܡܳܢܽܘܬܳܐ؟ ܐܰܝܟܰܢܳܐ ܕܗܰܝܡܶܢ ܐܰܒܪܳܗܳܡ ܠܰܐܠܳܗܳܐ܆ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘ. ܕܰܥܘ ܗܳܟܺܝܠ ܕܰܐܝܠܶܝܢ ܕܡܶܢ ܗܰܝܡܳܢܽܘܬܳܐ ܐܶܢܽܘܢ܆ ܗܶܢܽܘܢ ܐܶܢܽܘܢ ܒܢܰܝ̈ܳܐ ܕܰܐܒܪܳܗܳܡ. ܡܶܛܽܠ ܓܶܝܪ ܕܩܰܕܶܡ ܝܺܕܰܥ ܐܰܠܳܗܳܐ. ܕܰܒܗܰܝܡܳܢܽܘܬܰܐ ܗ̱ܘ ܡܶܙܕܰܕܩܺܝܢ ܥܰܡ̱̈ܡܶܐ܆ ܩܰܕܶܡ ܣܰܒܰܪ ܠܰܐܒܪܳܗܳܡ. ܐܰܝܟ ܕܶܐܡܰܪ ܟܬܳܒܳܐ ܩܰܕܺܝܫܳܐ. ܕܒܳܟ ܢܶܬܒܰܪܟܽܘܢ ܟܽܠܗܽܘܢ ܥܰܡ̱̈ܡܶܐ. ܡܳܕܶܝܢ ܡܗܰܝܡ̈ܢܶܐ ܗ̱ܘ ܡܶܬܒܰܪܟܺܝܢ ܒܰܐܒܪܳܗܳܡ ܡܗܰܝܡܢܳܐ. ܐܰܝܠܶܝܢ ܓܶܝܪ ܕܡܶܢ ܥ̈ܒܳܕܶܐ ܐܶܢܽܘܢ ܕܢܳܡܽܘܣܳܐ܆ ܬܚܶܝܬ ܠܰܘܛܬܳܐ ܐܶܢܽܘܢ. ܟܬܺܝܒ ܓܶܝܪ܆ ܕܠܺܝܛ ܗ̱ܘ ܟܽܠܡܰܢ ܕܠܳܐ ܢܶܥܒܶܕ ܟܽܠ ܕܰܟܬܺܝܒ ܒܢܳܡܽܘܣܳܐ ܗܳܢܳܐ. ܕܠܳܐ ܕܶܝܢ ܡܶܙܕܰܕܰܩ ܐ̱ܢܳܫ ܒܢܳܡܽܘܣܳܐ ܠܘܳܬ ܐܰܠܳܗܳܐ܆ ܗܳܕܶܐ ܓܰܠܝܳܐ ܗ̱ܝ. ܡܶܛܽܠ ܕܰܟܬܺܝܒ. ܕܙܰܕܺܝܩܳܐ ܒܗܰܝܡܳܢܽܘܬܳܐ ܢܺܚܶܐ. ܢܳܡܽܘܣܳܐ ܕܶܝܢ ܠܳܐ ܗ̱ܘܳܐ ܡܶܢ ܗܰܝܡܳܢܽܘܬܳܐ܆ ܐܶܠܳܐ ܡܰܢ ܕܢܶܥܒܶܕ ܐܰܝܠܶܝܢ ܕܰܟܬܺܝ̈ܒܳܢ ܒܶܗ. ܢܺܚܶܐ ܒܗܶܝܢ. ܠܰܢ ܕܶܝܢ ܡܫܺܝܚܳܐ ܙܰܒܢܰܢ ܡܶܢ ܠܰܘܛܬܳܐ ܕܢܳܡܽܘܣܳܐ܆ ܘܗܽܘ ܗܘܳܐ ܚܠܳܦܰܝܢ ܠܰܘܛܬܳܐ. ܟܬܺܝܒ ܓܶܝܪ܆ ܕܠܺܝܛ ܗ̱ܘ ܟܽܠܡܰܢ ܕܡܶܬܬܠܶܐ ܒܩܰܝܣܳܐ. ܕܰܒܥܰܡ̱̈ܡܶܐ ܬܶܗܘܶܐ ܒܽܘܪܟܬܶܗ ܕܰܐܒܪܳܗܳܡ ܒܝܶܫܽܘܥ ܡܫܺܝܚܳܐ. ܘܰܚܢܰܢ ܢܶܣܰܒ ܫܽܘܘܕܳܝܳܐ ܕܪܽܘܚܳܐ ܒܗܰܝܡܳܢܽܘܬܳܐ܀܀
ܗܽܘܠܳܠܳܐ ܘܦܶܬܓܳܡܳܐ
ܦܰܠܶܓܘ̱ ܢܰܚܬܰܝ̈ ܒܰܝܢܳܬܗܽܘܢ܆ ܘܥܰܠ ܠܒܽܘܫܝ̱ ܐܰܪܡܺܝܘ ܦܶܣ̈ܶܐ ܗ̄܀ (ܡܙܡ̄ ܟܒ܆ ܝܚ)
ܐܶܘܰܢܓܶܠܝܽܘܢ (ܝܛ܆ ܠܐ ـ ܠܚ)
ܟܳܗܢܳܐ: ܠܡܳܪܝܳܐ ܫܽܘܒܚܳܐ ܥܠܰܝܢ ܘܰܥܠܰܝܟܽܘܢ ܪ̈ܰܚܡܰܘܗ̱ܝ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ: ܐܶܘܰܢܓܶܠܝܽܘܢ ܩܰܕܺܝܫܳܐ ܡܶܢ ܠܽܘܩܳܐ ܘܚܰܒܪ̈ܰܘܗܝ܀
ܠܽܘܩܳܐ܆ ܟܓ. ܡܛ. ܡܬܝ܆ ܟܙ. ܢܗ ـ ܢܘ. ܡܪܩܘܣ܆ ܝܗ. ܡ ـ ܡܐ. ܝܘܚܢܢ܆ ܝܛ. ܠܐ ـ ܠܙ.
ܥܰܡܳܐ: ܨܠܽܘܬܶܗ ܥܰܡܰܢ܀
ܟܳܗܢܳܐ:
ܘܩܳܝܡܺܝܢ ܗ̱ܘܰܘ ܡܶܢ ܪܽܘܚܩܳܐ ܟܽܠܗܽܘܢ ܝܳܕܽܘ̈ܥܰܘܗ̱ܝ ܕܝܶܫܽܘܥ܆ ܐܺܝܬ ܗ̱ܘܰܝ̈ ܕܶܝܢ ܬܰܡܳܢ܆ ܐܳܦ ܢܶܫ̈ܶܐ ܣܰܓܺܝ̈ܳܐܬܳܐ ܕܚܳܙ̈ܝܳܢ ܗ̱ܘܰܝ̈ ܡܶܢ ܪܽܘܚܩܳܐ܆ ܗܳܠܶܝܢ ܕܶܐܬܰܝ̈ ܗ̱ܘܰܝ̈ ܒܳܬܪܶܗ ܕܝܶܫܽܘܥ ܡܶܢ ܓܠܺܝܠܳܐ ܘܰܡܫܰܡ̈ܫܳܢ ܗ̱ܘܰܝ̈ ܠܶܗ܆ ܕܰܚܕܳܐ ܡܶܢܗܶܝܢ ܡܰܪܝܰܡ ܡܰܓܕܠܳܝܬܳܐ܆ ܘܡܰܪܝܰܡ ܐܶܡܶܗ ܕܝܰܥܩܘܒ ܘܰܕܝܽܘܣܺܝ܆ ܘܶܐܡܗܽܘܢ ܕܰܒܢܰܝ̈ ܙܰܒܕܰܝ.. ܘܫܳܠܽܘܡ ܘܰܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ ܕܰܣܠܶܩ̈ܝ̱ ܗ̱ܘܰܝ̈ ܥܰܡܶܗ ܠܽܐܘܪܺܫܠܶܡ.. ܝܽܗ̱ܘ̈ܕܳܝܶܐ ܕܶܝܢ ܡܶܛܽܠ ܕܰܥܪܽܘܒܬܳܐ ܗ̱ܘܳܬ ܐܳܡܪܺܝܢ܆ ܠܳܐ ܢܒܽܘܬܽܘܢ ܦܰܓܪ̈ܶܐ ܗܳܠܶܝܢ ܥܰܠ ܙܩܺܝܦܳܐ. ܡܶܛܽܠ ܕܫܰܒܬܳܐ ܢܳܓܗܳܐ܆ ܝܰܘܡܳܐ ܗ̱ܘܳܐ ܓܶܝܪ ܪܰܒܳܐ ܕܫܰܒܬܳܐ ܗܳܝ܆ ܘܰܒܥܰܘ ܡܶܢ ܦܝܠܰܛܳܘܣ ܕܰܢܬܰܒܪܽܘܢ ܫܳܩܰܝ̈ܗܽܘܢ ܕܗܳܢܽܘܢ ܙܩܺܝ̈ܦܶܐ ܘܢܰܚܬܽܘܢ ܐܶܢܽܘܢ܆ ܘܶܐܬܰܘ ܐܶܣܛܪ̈ܰܛܝܽܘܛܶܐ܆ ܘܬܰܒܰܪܘ ܫܳܩܰܘ̈ܗܝ ܕܩܰܕܡܳܝܳܐ ܘܰܕܗܰܘ ܐ̱ܚܪܺܢܳܐ ܕܶܐܙܕܩܶܦ ܥܰܡܶܗ܆ ܘܟܰܕ ܐܶܬܰܘ ܠܘܳܬ ܝܶܫܽܘܥ܆ ܚܙܰܘ ܕܡܺܝܬ ܠܶܗ ܡܶܢ ܟܰܕܽܘ ܘܠܳܐ ܬܰܒܰܪܘ̱ ܫܳܩܰܘ̈ܗ̱ܝ ܐܶܠܳܐ ܚܰܕ ܡܶܢ ܐܶܣܛܪ̈ܰܛܺܝܽܘܛܶܐ ܡܚܳܝܗ̱ܝ ܒܕܰܦܢܶܗ ܒܠܽܘܟܳܝܬܳܐ ܘܡܶܚܕܳܐ ܢܦܰܩܘ ܕܡܳܐ ܘܡܰܝ̈ܳܐ܆ ܘܡܰܢ ܕܰܚܙܳܐ ܐܰܣܗܶܕ ܘܫܰܪܺܝܪܳܐ ܗ̱ܝ ܣܳܗܕܽܘܬܶܗ. ܘܗܽܘ ܝܳܕܰܥ ܕܰܫܪܳܪܳܐ ܐܳܡܰܪ. ܕܳܐܦ ܐܰܢ̱ܬܽܘܢ ܬܗܰܝܡܢܽܘܢ. ܗܳܠܶܝܢ ܓܶܝܪ ܗܘܰܝ̈ ܕܢܶܬܡܰܠܶܐ ܟܬܳܒܳܐ ܕܶܐܡܰܪ܆ ܕܓܰܪܡܳܐ ܠܳܐ ܢܶܬܬܒܰܪ ܒܶܗ. ܘܬܽܘܒ ܟܬܳܒܳܐ ܐ̱ܚܪܺܢܳܐ ܕܶܐܡܰܪ܆ ܕܰܢܚܽܘܪܽܘܢ ܒܡܰܢ ܕܰܕܩܰܪܘ̱܀
ܘܣܶܓܕܬܳܐ ܠܡܳܪܝܳܐ ܩܽܘܪܝܶܐܠܰܝܣܳܘܢ܀
ܒܳܬܰܪ ܩܶܪܝܳܢܳܐ ܕܶܐܘܰܢܓܶܠܝܽܘܢ ܢܰܟܪܶܙ ܪܺܝܫ ܟܳܗ̈ܢܶܐ: ܘܒܳܬܰܪܟܶܢ ܣܳܝܡܺܝܢ ܒܶܣ̈ܡܶܐ ܩܕܳܡ ܨܠܺܝܒܳܐ ܩܰܕܺܝܫܳܐ܆ ܘܡܶܬܛܰܟܣܺܝܢ ܬܪܶܝܢ ܓܽܘ̈ܕܶܐ܆ ܚܰܕ ܐܳܡܰܪ ܘܰܐ̱ܚܪܺܢܳܐ ܡܦܰܢܶܐ ܥܕܰܡܳܐ ܕܰܢܫܰܡܠܽܘܢ ܬܠܳܬ ܣܶܓ̈ܕܳܬܳܐ܆ ܘܳܐܡܪܺܝܢ:
ܣܳܓܕܺܝܢܰܢ ܠܰܨܠܺܝܒܳܐ܆ ܕܒܶܗ ܗܘܳܐ ܦܽܘܪܩܳܢܳܐ ܠܢܰܦ̈ܫܳܬܰܢ܆ ܘܥܰܡ ܓܰܝܳܣܳܐ ܐܳܡܪܺܝܢܰܢ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀
ܡܳܐ ܕܫܳܠܡܳܐ ܣܶܓܕܬܳܐ ܢܶܛܥܰܢ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܥܰܠ ܟܰܬܦܶܗ ܕܣܶܡܳܠܳܐ ܘܰܢܫܰܪܽܘܢ ܒܰܟܪܽܘܟܝܳܐ ܡܶܢ ܓܰܪܒܝܳܐ ܠܬܰܝܡܢܳܐ܆ ܘܟܳܗ̈ܢܶܐ ܘܰܡܫܰܡ̈ܫܳܢܶܐ ܐܳܡܪܺܝܢ ܒܰܝܬܳܐ ܗܳܢܳܐ ܒܩܳܠܳܐ ܐܰܨܕܶܬ ܪܶܥܝܳܢܝ̱ ܐܰܘ ܩܰܐܬܺܝܣܡܰܐ ܐ̱ܚܪܺܬܳܐ ܕܚܳܫܚܳܐ܆
ܟܰܕ ܐܰܚܬܽܘܟ ܡܶܢ ܪܺܝܫ ܩܰܝܣܳܐ܇ ܝܰܘܣܶܦ ܥܰܡ ܢܺܝܩܽܘܕܺܝܡܳܘܣ܇ ܘܰܛܥܺܝܢܺܝܢ ܠܳܟ ܐܰܝܟ ܡܺܝܬܳܐ܆ ܟܰܕ ܚܰܝ̈ܶܐ ܒܳܟܽ ܗ̱ܘ ܟܣܶܝܢ ܗܘܰܘ܆ ܘܰܒܡܽܘܪܳܐ ܘܥܰܠܘܰܝ ܚܰܢܛܽܘܟ܆ ܘܰܒܟܶܬܳܢ̈ܶܐ ܬܽܘܒ ܟܰܪܟܽܘܟ܆ ܘܰܒܩܰܒܪܳܐ ܚܰܕܬܳܐ ܣܳܡܽܘܟ܆ ܘܰܚܬܰܡܘ ܟܺܐܦܳܐ ܥܰܠ ܬܰܪܥܶܗ܆ ܒܪܺܝܬܳܐ ܟܽܠܳܗ ܟܡܺܝܪܳܐ ܗܘܳܬ܆ ܘܰܐܒܺܝܠܳܐ ܗܘܳܬ ܥܰܠ ܡܰܘܬܳܟ܆ ܘܥܰܢܺܝ̈ܕܶܐ ܣܘܰܚܘ ܘܰܣܓܶܕܘ ܠܳܟ܆ ܚܰܝܳܐ ܕܡܺܝܬ ܐܰܝܟ ܨܶܒܝܳܢܶܗ܆ ܒܪܺܝܟ ܚܰܫܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܕܡܶܛܽܠܳܬܰܢ܀
ܣܽܘܓܺܝܬܳܐ ܒܩ̄: ܣܠܶܩ ܠܰܨܠܺܝܼܒܳܐ
ܣܠܶܩ ܠܰܨܠܺܝܒܳܐ ܗܰܘ ܡܳܪܳܐ ܕܬܶܫܒܽܘܚܬܳܐ܆ ܘܪܳܒܘ ܨܳܠܽܘ̈ܒܶܐ ܥܰܠ ܡܰܘܬܶܗ ܕܙܰܟܳܝܳܐ܆ ܐܶܬܟܰܪܟܽܘܗܝ ܕܺܐܒ̈ܶܐ ܣܳܪ̈ܽܘܚܶܐ܆ ܐܳܦ ܒܰܣܒܶܣܘ ܠܶܐܡܪܳܐ ܕܠܳܐ ܡܽܘܡܳܐ܆ ܣܒܰܠ ܚܰܫ̈ܶܐ ܒܨܶܒܝܳܢܶܗ܆ ܘܚܰܪܰܪ ܟܽܠ ܒܰܨܠܺܝܒܶܗ܀
ܒܢ̈ܳܬ ܐܽܘܪܺܫܠܶܝܡ ܡܽܘܢ ܐܰܣܟܶܠ ܝܼܺܚܺܝܕܳܐ܆ ܕܟܽܠ ܛܳܒ̈ܳܬܳܐ ܣܥܰܪ ܗ̱ܘܳܐ ܠܓܰܒܪ̈ܰܝܟܶܝܢ܆ ܠܰܣ̈ܡܰܝܳܐ ܒܪܽܘܩܶܗ ܡܦܰܬܰܚ ܗ̱ܘܳܐ܆ ܘܰܠܓܰܪ̈ܒܶܐ ܒܡܶܠܬܶܗ ܡܕܰܟܶܐ ܗ̱ܘܳܐ܆ ܒܓܰܒܪ̈ܰܝܟܶܝܢ ܘܒܰܒܢܰܝ̈ܟܶܝܢ܆ ܬܶܬܦܰܪ̈ܥܳܢ ܩܽܘܦܳܚܰܘ̈ܗ̱ܝ܀
ܬܰܘ ܦܽܘܩܘ ܡܺܝ̈ܬܶܐ ܡܶܢ ܬܰܪܥܶܗ ܕܰܐܒܕܳܢܳܐ܆ ܕܗܳܐ ܠܩܰܒܪ̈ܰܝܟܽܘܢ ܣܳܡ ܐܰܦܰܘ̈ܗ̱ܝ ܢܰܗܺܝܪܳܐ܆ ܗܳܐ ܢܚܶܬ ܠܶܗ ܫܶܡܫܳܐ ܕܥܶܠܳܝ̈ܶܐ܆ ܨܶܐܕܰܝ̈ܟܽܘܢ ܠܚ̈ܶܙܶܐ ܥܰܡܺܝ̈ܩܶܐ܆ ܦܽܘܩܘ ܠܽܐܘܪܥܶܗ ܕܢܰܗܺܝܪܳܐ܆ ܕܗܳܐ ܥܳܐܶܠ ܨܶܐܕܰܝܟܽܘܢ܀
ܠܳܟ ܬܶܫܒܽܘܚܬܳܐ ܐܰܠܳܗܳܐ ܐܰܚܺܝܕ ܟܽܠ܆ ܘܠܳܟ ܬܰܘܕܺܝܬܳܐ ܕܶܐܬܒܰܣܰܪܬ ܡܶܢ ܒܬܽܘܠܬܳܐ܆ ܠܳܟ ܫܽܘܒܚܳܐ ܕܚܰܫܬ ܡܶܛܽܠܳܬܰܢ܆ ܠܳܟ ܫܽܘܒܚܳܐ ܕܶܐܬܬܠܺܝܬ ܒܰܙܩܺܝܦܳܐ܆ ܘܰܒܡܰܘܬܳܟ ܐܰܚܺܝܬ ܠܰܢ܆ ܘܰܒܫܽܘܒܚܳܐ ܢܰܚܶܡܬ ܠܰܢ܀
ܒܳܬܰܪ ܫܽܘܠܳܡ ܟܪܽܘܟܝܳܐ ܟܰܕ ܡܳܛܶܝܢ ܠܰܩܕܳܡ ܡܰܕܒܚܳܐ܆ ܢܙܰܝܚܽܘܢ ܠܰܨܠܺܝܒܳܐ ܥܰܪܛܶܠܳܐܝܺܬ. ܘܟܰܕ ܐܰܦܰܝ̈ܗܽܘܢ ܠܡܰܕܢܚܳܐ ܡܫܰܪܶܐ ܪܺܝܫ ܟܳܗ̈ܢܳܐ:
ܨܠܽܘܬܳܐ ܕܫܽܘܪܳܝܳܐ
ܐܳܬܳܐ ܕܫܰܝܢܳܐ ܘܢܺܝܫܶܐ ܕܙܳܟܽܘܬܳܐ ܘܙܰܝܢܳܐ ܕܦܽܘܪܩܳܢܳܐ ܢܶܗܘܶܐ ܠܰܢ ܨܠܺܝܒܳܐ ܩܰܕܺܝܫܳܐ܆ ܡܫܺܝܚܳܐ ܐܰܠܳܗܰܢ ܕܶܐܨܛܠܶܒܬ ܚܠܳܦ ܦܽܘܪܩܳܢܶܗ ܕܓܶܢܣܰܢ܆ ܘܰܠܟܽܠܰܢ ܣܰܬܰܪ ܬܚܶܝܬ ܟܶܢ̈ܦܰܘܗܝ܆ ܘܢܰܛܰܪ ܠܰܢ ܒܚܰܝܠܶܗ ܙܰܟܳܝܳܐ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܘܳܐܡܪܺܝܢ ܥܶܩܒܳܐ ܗܳܢܳܐ
ܐܶܬܩܰܒܰܥܬ ܡܳܪܝ ܒܰܨܠܺܝܒܳܐ ܡܶܢ ܥܰܘ̈ܳܠܶܐ܆ ܘܒܰܦܫܳܛܳܐ ܕܬܰܪܬܶܝܢ ܐܺܝ̈ܕܰܝܟ ܐܶܚܰܕܬ ܠܰܐܪܒܰܥ ܦܶܢ̈ܝܳܬܳܐ، ܫܶܡܫܳܐ ܚܫܶܟ ܗ̱ܘܳܐ ܒܰܪܩܺܝܥܳܐ ܕܰܚܙܳܟ ܡܳܪܝ ܕܥܰܪܛܶܠܳܝ ܐܰܢܬ܆ ܒܡܶܨܥܰܬ ܛܰܗܪܳܐ ܒܺܐܝܡܳܡܳܐ܆ ܥܰܠ ܩܳܡ ܠܺܠܝܳܐ ܒܫܽܘܠܛܳܢܶܗ܆ ܒܩܳܠܳܐ ܕܰܩܥܰܝܬ ܥܰܠ ܩܰܝܣܳܐ܆ ܐܰܙܺܝܥܬ ܠܰܫܡܰܝܳܐ ܘܠܰܐܪܥܳܐ܆ ܒܡܺܝ̈ܬܶܐ ܐܶܬܡܢܺܝܬ ܒܪ̈ܰܚܡܰܝܟ܆ ܘܩܳܡܬ ܡܶܢ ܩܰܒܪܳܐ ܕܰܨܒܰܝܬ܆ ܘܰܐܩܺܝܡܬ ܠܳܐܕܳܡ ܕܰܢܦܺܝܠ ܗ̱ܘܳܐ܆ ܘܰܐܦܢܺܝܬܳܝܗܝ ܠܰܥܕܶܢ ܗܳܝ ܕܰܢܦܰܩ ܡܶܢܳܗ܆ ܛܳܒܳܐ ܡܳܪܝܳܐ ܛܰܝܒܽܘܬܳܟ ܦܳܪܽܘܩܳܐ ܘܣܰܓܺܝ ܪ̈ܰܚܡܶܐ܀
ܘܳܐܡܪܺܝܢ ܦܶܬܓܳܡܳܐ ܒܺܐܝܟܳܘܣ ܬܡܺܝܢܳܝܳܐ
ܝܰܗܒܬ ܠܺܝ ܣܰܟܪܳܐ ܕܦܽܘܪܩܳܢܳܐ܆ ܐܺܝܠܳܢܳܐ ܕܚܰܝ̈ܶܐ ܕܰܒܥܶܕܳܝܢ܆ ܗܰܘ ܕܒܰܡܨܰܥܬܶܗ ܕܦܰܪܕܰܝܣܳܐ ܐܶܬܢܨܶܒ ܗ̱ܘܳܐ܆ ܠܶܗ ܠܰܨܠܺܝܒܳܐ ܨܳܐܪ ܗ̱ܘܳܐ܆ ܕܦܺܐܪܳܐ ܕܚܰܝ̈ܶܐ ܥܳܠܡܳܐ ܡܶܢܶܗ ܩܛܰܦ܆ ܥܰܠ ܗܳܝ ܒܝܰܘܡܳܐ ܕܓܶܣܕܬܶܗ܆ ܫܡܰܝܳܐ ܘܰܐܪܥܳܐ ܒܚܰܕܽܘܬܳܐ ܡܥܰܕܥܕܺܝܢ܆ ܘܰܚܢܰܢ ܥܰܡܗܽܘܢ ܢܶܥܢܶܐ ܘܢܺܐܡܰܪ܀
ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ܆ ܕܰܒܝܰܕ ܪܽܘܫܡܶܗ ܕܰܨܠܺܝܒܳܟ܆ ܙܰܟܳܝܳܐ ܢܶܬܢܛܰܪ ܓܙܳܪܳܐ ܕܡܰܪܥܺܝܬܳܟ ܡܶܢ ܟܽܠܗܶܝܢ ܨܶܢ̈ܥܳܬܶܗ ܡܰܘܒܕܳܢ̈ܝܳܬܳܐ ܕܳܐܟܶܠܩܰܪܨܳܐ ܡܳܪܽܘܕܳܐ ܘܡܶܢ ܒܺܝܫܽܘܬܳܐ ܕܰܒܢܰܝ̈ܢܳܫܳܐ ܒܺܝ̈ܫܶܐ ܘܥܰܢ̈ܳܬܶܐ܆ ܡܫܺܝܚܳܐ ܪܳܥܝܳܐ ܕܶܐܬܢܟܶܣ ܚܠܳܦܰܝܢ܆ ܠܳܟ ܫܽܘܒܚܳܐ ܡܰܣܩܺܝܢܰܢ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܬܡܺܝܢܳܝܳܐ
ܒܰܡܨܰܥܬܳܐ ܕܡܶܬܥܰܡܪܳܢܺܝܬܳܐ ܡܫܺܝܚܳܐ ܟܰܕ ܐܶܨܛܠܶܒܬ܆ ܐܰܦܰܝ̈ ܬܰܪܥܳܐ ܕܗܰܝܟܠܳܐ ܐܶܨܛܰܪܝ ܗ̱ܘܳܐ ܠܰܬܪܶܝܢ܆ ܐܳܦ ܐܰܪܥܳܐ ܐܶܬܬܙܺܝܥܰܬ ܗ̱ܘܳܬ܆ ܡܫܺܝܚܳܐ ܕܰܚܙܳܬ ܕܰܨܠܺܝܒ ܐܰܢ̱ܬ܆ ܘܰܒܕܶܚܠܳܐ ܘܰܒܙܰܘܥܳܐ ܩܥܳܬ ܟܰܕ ܐܳܡܪܳܐ܆ ܡܒܰܪܟܳܐ ܐܺܝܬܰܝܟ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ܀
ܦܶܬܓܳܡܳܐ
ܝܰܡܺܝܢܳܟ ܬܣܰܝܥܰܢܝ̱ ܘܡܰܪܕܽܘܬܳܟ ܬܪܰܒܶܝܢܝ̱ (ܡܙܡ̄ ܝܚ܆ܗ)
ܐܺܝܠܳܢܳܐ ܕܝܰܗܒ ܗ̱ܘܳܐ ܕܶܟܪܳܐ ܗܰܘ ܕܒܶܗ ܐܺܝܣܚܳܩ ܡܶܢ ܡܰܘܬܳܐ ܐܶܬܦܪܶܩ܆ ܠܶܗ ܠܰܨܠܺܝܒܳܐ ܨܳܐܰܪ ܗ̱ܘܳܐ. ܕܰܠܥܳܠܡܳܐ ܡܶܢ ܣܳܟܶܗ ܦܪܰܩ܆ ܘܥܰܠܗܳܝ ܒܝܰܘܡܳܐ ܕܣܶܓܕܬܶܗ܆ ܫܡܰܝܳܐ ܘܰܐܪܥܳܐ ܒܚܰܕܽܘܬܳܐ ܡܥܰܕܥܕܺܝܢ܆ ܘܰܚܢܰܢ ܥܰܡܗܽܘܢ ܢܶܥܢܶܐ ܘܢܺܐܡܰܪ܀
ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܓܰܪܒܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܗܰܒ ܠܰܢ ܡܳܪܝ ܕܣܶܓܕܬܳܐ ܫܰܪܺܝܪܬܳܐ ܕܰܒܪܽܘܚܳܐ ܘܒܰܫܪܳܪܳܐ ܢܩܰܪܶܒ ܠܶܗ ܠܰܨܠܺܝܒܳܟ ܝܰܩܺܝܪܳܐ ܘܡܰܥܒܶܕ ܚܰܝ̈ܶܐ܆ ܘܬܰܘܕܺܝܬܳܐ ܕܟܺܝܬܳܐ ܒܬܰܪܥܺܝܬܳܐ ܫܦܺܝܬܳܐ ܢܝܰܒܶܒ ܩܕܳܡ ܪܽܘܫܡܶܗ ܕܰܨܠܺܝܒܳܟ ܘܥܺܕܬܳܐ ܕܰܡܙܰܝܚܳܐ ܠܶܗ ܒܗܰܝܡܳܢܽܘܬܳܐ ܬܶܫܬܰܘܙܰܒܝ̱ ܡܶܢ ܢܶܟܝ̈ܳܢܶܐ܆ ܘܝܰܠܕܶܝ̈ܗ̇ ܢܶܬܢܰܛܪܽܘܢ ܡܶܢ ܣܽܘܓ̈ܦܳܢܶܐ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܡܫܺܝܚܳܐ ܐܰܠܳܗܳܐ ܕܶܐܨܛܠܶܒܬ ܚܠܳܦ ܦܽܘܪܩܳܢܶܗ ܕܟܽܠܶܗ ܥܳܠܡܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܬܡܺܝܢܳܝܳܐ
ܐܰܢ̱ܬ ܕܰܨܠܺܝܒ ܚܶܣܕܳܐ ܣܰܝܒܰܪܬ܆ ܒܓܳܓܽܘܠܬܳܐ ܚܠܳܦܰܝܢ ܒܨܶܒܝܳܢܳܟ܆ ܐܰܢ̱ܬ ܕܰܫܪܰܝܬ ܘܒܰܛܶܠܬ ܒܬܽܘܩܦܳܟ܆ ܠܥܽܘܩܣܶܗ ܕܡܰܘܬܳܐ ܝܰܥܢܳܐ ܡ̇ܠܶܐ ܩܶܢܛܳܐ܆ ܘܡܶܢ ܐܰܣܽܘܪ̈ܶܐ ܩܫܰܝ̈ܳܐ ܫܰܘܙܶܒܬ ܥܓܺܝ̈ܢܶܝܗ̇ ܕܰܫܝܽܘܠ ܒܩܺܝܢܬܳܐ ܥܛܺܝܦܰܬ ܙܳܟܽܘܬܳܐ ܘܰܒܙܽܘܡܳܪ̈ܶܐ ܕܪܽܘܚܳܐ ܣܳܓܕܺܝܢܰܢ܀
ܦܶܬܓܳܡܳܐ
ܒܳܟ ܢܕܰܩܰܪ ܠܰܒܥܶܠܕ̈ܒܳܒܰܝܢ ܘܡܶܛܽܠ ܫܡܳܟ ܢܕܽܘܫ ܠܣܳܐܢܰܝ̈ܢ (ܡܙܡ̄܆ ܡܕ܆ܗ)
ܚܽܘܛܪܳܐ ܗܰܘ ܕܥܰܦܶܩ ܗ̱ܘܳܐ܆ ܝܰܥܩܽܘܒ ܪܳܥܝܳܐ ܘܰܣܓܶܕ ܠܶܗ܆ ܠܶܗ ܠܰܨܠܺܝܒܳܐ ܨܳܐܰܪ ܗ̱ܘܳܐ܆ ܕܪܳܥܝܰܢ ܡܫܺܝܚܳܐ ܒܪܶܟ ܥܰܠ ܡܰܘܬܳܐ ܘܩܰܛܠܶܗ ܘܠܰܫܝܽܘܠ ܐܰܚܪܒܳܗ̇܆ ܘܥܰܠ ܗܳܝ ܒܝܰܘܡܳܐ ܕܣܶܓܕܬܶܗ܆ ܫܡܰܝܳܐ ܘܰܐܪܥܳܐ ܒܚܰܕܽܘܬܳܐ ܡܥܰܕܥܕܺܝܢ܆ ܘܰܚܢܰܢ ܥܰܡܗܽܘܢ ܢܶܥܢܶܐ ܘܢܺܐܡܰܪ܀
ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܙܰܝܢܳܐ ܕܦܽܘܪܩܳܢܳܐ ܘܰܕܪܳܥܳܐ ܠܳܐ ܡܶܬܟܰܒܫܳܢܳܐ ܢܶܗܘܶܐ ܨܠܺܝܒܳܟ ܡܳܪܝܳܐ ܠܥܺܕܬܳܟ ܩܰܕܺܝܫܰܬܳܐ܆ ܘܒܶܗ ܬܕܰܩܰܪܝ̱ ܠܟܽܠܗܽܘܢ ܚܰܝ̈ܠܰܘܳܬܳܐ ܡܶܬܝܰܕ̈ܥܳܢܶܐ ܕܗܳܪܺܝܢ ܥܰܡܳܗ̇܆ ܐܰܝܟܰܢܳܐ ܕܟܰܕ ܒܗܳܢܳܐ ܡܶܬܢܰܨܚܳܐ ܢܕܽܘܨܽܘܢ ܪ̈ܳܥܰܘܳܬܳܗ̇ ܥܰܡ ܡܰܠܦܳܢܶܝ̈ܗ̇ ܒܚܰܝܠܳܐ ܕܪܽܘܚܳܟ ܩܰܕܺܝܫܳܐ܆ ܘܟܳܗ̈ܢܶܐ ܘܰܡܫܰܡ̈ܫܳܢܶܐ ܒܙܰܗܝܽܘܬܳܐ ܢܫܰܡܫܽܘܢ܆ ܘܡܰܠܟ̈ܶܐ ܘܦܳܠܚ̈ܶܐ ܒܰܒܗܺܝܠܽܘܬܳܐ ܘܰܒܫܰܝܢܳܐ ܢܶܗܘܽܘܢ܆ ܘܟܽܠܗܽܘܢ ܡܗܰܝ̈ܡܢܶܐ ܒܛܳܒ̈ܳܬܳܐ ܢܶܫܬܰܪܬܚܽܘܢ܆ ܘܢܰܣܩܽܘܢ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܬܡܺܝܢܳܝܳܐ
ܒܪܺܝܟ ܕܶܐܨܛܠܶܒ ܥܰܠ ܪܺܝܫ ܓܳܓܽܘܠܬܳܐ܆ ܡܶܢ ܥܰܡܳܐ ܣܰܟܠܳܐ ܕܝܽܘ̈ܕܳܝܶܐ܆ ܘܒܰܨܠܺܝܒܶܗ ܚܰܝܳܐ ܦܪܰܩ ܠܰܢ܆ ܘܰܚܢܰܢ ܒܚܰܕܽܘܬܳܐ ܢܶܩܥܶܐ܆ ܘܥܰܡ ܓܰܝܳܣܳܐ ܐܳܡܪܺܝܢܰܢ ܐܶܬܕܰܟܪܰܝܢ ܡܳܐ ܕܳܐܬܶܝܬ܆ ܒܝܰܕ ܗܳܕܶܐ ܕܠܳܐ ܫܶܠܝܳܐ ܟܽܠܰܢ ܣܳܓܕܺܝܢܰܢ܀
ܦܶܬܓܳܡܳܐ
ܐܰܢ̱ܬ ܗ̱ܘ ܦܪܰܩܬܳܢ ܡܶܢ ܣܳܐܢܰܝ̈ܢ ܘܰܐܒܗܶܬܬ ܠܰܒܥܶܠܕܒܳܒܰܝ̈ܢ (ܡܙܡ̄. ܡܕ: ܚ)
ܩܺܐܒܽܘܬܳܐ ܗܳܝ ܕܰܒܝܰܘ̈ܡܰܝ ܢܽܘܚ܆ ܕܫܰܪܟܳܢܳܐ ܕܚܰܝ̈ܶܐ ܠܥܳܠܡܳܐ ܒܳܗ̇ ܐܶܬܢܛܰܪ܆ ܠܶܗ ܠܰܨܠܺܝܒܳܐ ܨܳܝܪܳܐ ܗ̱ܘܳܬ܆ ܕܰܣܒܰܪܬܳܐ ܕܚܰܝ̈ܶܐ ܚܰܕ̈ܬܶܐ ܠܥܳܠܡܳܐ ܡܶܢܶܗ ܢܒܰܥ܆ ܘܥܰܠ ܗܳܝ ܒܝܰܘܡܳܐ ܕܣܶܓܕܬܶܗ܆ ܫܡܰܝܳܐ ܘܰܐܪܥܳܐ ܒܚܰܕܽܘܬܳܐ ܡܥܰܕܥܕܺܝܢ܆ ܘܰܚܢܰܢ ܥܰܡܗܽܘܢ ܢܶܥܢܶܐ ܘܢܺܐܡܰܪ܀
ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀
ܬܘܒ ܦܳܢܶܝܢ ܠܡܰܕܢܚܳܐ
ܘܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܫܳܩܶܠ ܨܠܺܝܒܳܐ ܩܰܕܺܝܫܳܐ ܘܰܡܙܰܝܰܚ ܠܶܗ ܘܡܰܙܥܶܩ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܰܟܪ̈ܽܘܒܶܐ ܡܒܰܪܟܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ ܡܶܬܟܰܫܦܺܝܢ ܘܳܐܡܪܺܝܢ܆ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ܆ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ܆ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܰܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝܫܰܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ ܡܶܬܟܰܫܦܺܝܢ ܘܳܐܡܪܺܝܢ܆ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ܀ | ܫܽܘܒܚܳܐ ܠܳܟ ܒܳܪܽܘܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܒܳܬܰܪ ܙܽܘܝܳܚܳܐ ܡܶܬܛܥܶܢ ܥܰܠ ܕܪ̈ܳܥܶܐ ܒܛܽܘܦܣܳܐ ܕܶܐܬܛܥܶܢ ܦܰܓܪܶܗ ܕܡܳܪܰܢ ܐܰܝܟ ܥܰܢܺܝܕܳܐ ܘܰܡܫܰܪܶܝܢ ܡܰܥܢܺܝܬܳܐ ܗܳܕܶܐ܆ ܟܳܗ̈ܢܶܐ ܘܰܡܫܰܡ̈ܫܳܢܶܐ ܟܰܕ ܐܳܡܪܺܝܢ܆
ܟܰܕ ܐܰܚܬܽܘܟ ܡܶܢ ܪܺܝܫ ܩܰܝܣܳܐ܆ ܝܰܘܣܶܦ ܥܰܡ ܢܺܝܩܳܘܕܺܝܡܳܘܣ܆ ܘܰܐܝܟ ܕܰܠܡܺܝܬܳܐ ܛܥܺܝܢܺܝܢ ܗ̱ܘܰܘ ܠܳܟ܆ ܟܰܕ ܚܰܝ̈ܶܐ ܥܰܡ ܒܳܟܽ ܗ̱ܘ ܟܣܶܝܢ ܗ̱ܘܰܘ܆ ܘܰܒܡܽܘܪܳܐ ܘܥܰܠܘܰܝ ܚܰܢܛܽܘܟ܆ ܘܰܒܟܶܬܳܢ̈ܶܐ ܬܽܘܒ ܟܰܪܟܽܘܟ܆ ܘܰܒܩܰܒܪܳܐ ܚܰܕܬܳܐ ܣܳܡܽܘܟ܆ ܘܰܚܬܰܡܘ̱ ܟܺܐܦܳܐ ܥܰܠ ܬܰܪܥܶܗ܆ ܒܪܺܝܬܳܐ ܟܽܠܳܗ̇ ܟܡܺܝܪܳܐ ܗ̱ܘܳܬ܆ ܘܰܐܒܺܝܠܳܐ ܗ̱ܘܳܬ ܥܰܠ ܡܰܘܬܳܟ܆ ܘܥܰܢܺܝ̈ܕܶܐ ܣܘܰܚܘ ܗ̱ܘܰܘ ܠܽܐܘܪܥܳܟ܆ ܒܪܺܝܟ ܡܰܘܬܳܟ ܕܰܗܘܳܐ ܚܠܳܦܰܝܢ܆ ܘܡܽܘܟܳܟܳܟ ܕܡܶܛܽܠܳܬܰܢ܀
ܡܰܕܪܳܫܳܐ ܒܩ̄: ܩܽܘܡ ܦܰܘܠܽܘܣ
ܚܰܕ ܓܰܒܪܳܐ ܕܰܫܡܶܗ ܗ̱ܘܳܐ ܝܰܘܣܶܦ܆ ܡܶܢ ܪܳܡܬܳܐ ܕܟܺܐܢ ܗ̱ܘܳܐ ܒܕܽܘܒܳܪ̈ܰܘܗ̱ܝ܆ ܐܶܙܰܠ ܗ̱ܘܳܐ ܒܥܳܐ ܡܶܢ ܦܺܝܠܰܛܳܘܣ܆ ܕܢܶܬܶܠ ܠܶܗ ܦܰܓܪܶܗ ܕܰܡܫܺܝܚܳܐ܆ ܕܰܝܳܢܳܐ ܗܰܒܠܺܝ܆ ܦܰܓܪܶܗ ܕܦܳܪܽܘܩܰܢ܆ ܣܺܝܡܬܳܐ ܕܟܽܠ ܛܽܘ̈ܒܺܝܢ܆ ܕܺܐܙܰܠ ܐܶܥܰܦܶܝܘܗ̱ܝ܆ ܝܽܘ̈ܕܳܝܶܐ ܨܰܠܒܽܘܗ̱ܝ ܥܰܠ ܩܰܝܣܳܐ܆ ܘܠܺܝ ܗܰܒܳܝܗ̱ܝ ܕܡܶܢܶܗ ܐܶܬܒܰܣܰܡ܀
ܡܰܘܕܥܳܢܽܘܬܳܐ
ܟܰܕ ܡܳܛܶܝܢ ܠܡܰܕܒܚܳܐ ܡܰܝܬܶܝܢ ܠܰܩܢܳܐ ܕܰܚܠܺܝܛܺܝܢ ܒܶܗ ܥܰܠܘܰܝ ܘܚܰܠܳܐ ܘܟܳܗܢܳܐ ܕܒܺܐܝܕܶܗ ܨܠܺܝܒܳܐ ܡܨܰܒܰܥ ܒܗܽܘܢ ܩܰܪ̈ܢܳܬܶܗ ܘܟܶܢ ܐܳܚܶܕ ܠܰܨܠܺܝܒܳܐ ܠܥܶܠ ܡܶܢ ܠܰܩܢܳܐ ܘܰܡܫܺܝܓ ܠܶܗ ܒܡ̈ܰܝ ܘܰܪ̈ܕܶܐ ܐܶܢ ܫܟܺܝܚܺܝܢ܆ ܐܰܝܟܰܢܳܐ ܕܢܶܪܕܽܘܢ ܡܰܝ̈ ܫܝܳܓܬܶܗ ܒܶܗ ܒܠܰܩܢܳܐ܆ ܘܶܐܢ ܠܳܐ ܫܟܺܝܚܺܝܢ ܡܰܝ̈ ܘܰܪ̈ܕܶܐ ܢܫܺܝܓܺܝܘܗ̱ܝ ܒܡܰܝ̈ܳܐ ܫܚܺܝ̈ܡܶܐ ܒܰܠܚܽܘܕ. ܫܝܳܓܬܳܐ ܗܳܕܶܐ ܥܳܒܕܝܢܰܢ ܛܽܘܦܣܳܐ ܕܰܫܝܳܓܬܶܗ ܕܦܰܓܪܶܗ ܕܡܳܪܰܢ ܕܰܐܫܺܝܓܽܘܗ̱ܝ ܝܰܘܣܶܦ ܘܢܺܝܩܳܘܕܺܝܡܳܘܣ ܟܰܕ ܩܰܒܪܽܘܗ̱ܝ. ܒܳܬܰܪ ܫܝܳܓܬܳܐ ܡܥܰܦܶܝܢ ܠܰܨܠܺܝܒܳܐ ܒܡܳܐܢܳܐ ܚܶܘܳܪܳܐ ܢܰܩܕܳܐ ܕܟܶܬܳܢܳܐ ܫܰܦܺܝܪܳܐ ܘܣܳܝܡܺܝܢ ܠܶܗ ܣܽܘܕܳܪܳܐ ܒܪܺܝܫܶܗ ܘܳܐܣܪܺܝܢ ܚܰܨܶܗ ܒܙܽܘܢܳܪܳܐ ܘܩܳܒܪܺܝܢ ܠܶܗ ܒܕܽܘܟܬܳܐ ܦܪܺܝܫܬܳܐ ܘܺܝܕܺܝܥܬܳܐ. ܘܶܐܢ ܩܳܒܪܺܝܢ ܠܶܗ ܬܚܶܝܬ ܦܳܬܽܘܪ ܚܰܝ̈ܶܐ ܠܳܐ ܢܩܰܪܒܽܘܢ ܩܽܘܪܒܳܢܳܐ ܒܝܰܘܡܳܐ ܕܫܰܒܬܳܐ ܪܰܒܬܳܐ ܥܰܠ ܗܰܘ ܦܳܬܽܘܪܳܐ ܕܰܬܚܶܝܬ ܡܶܢܶܗ ܩܒܺܝܪ ܨܠܺܝܒܳܐ ܩܰܕܺܝܫܳܐ. ܐܶܠܳܐ ܥܰܠ ܡܰܕܒܚܳܐ ܐ̱ܚܪܺܢܳܐ ܢܩܰܪܒܽܘܢ ܩܽܘܪܒܳܢܳܐ. ܟܰܕ ܣܳܝ̇ܡܺܝܢ ܠܶܗ ܒܩܰܒܪܳܐ܆ ܙܳܕܶܩ ܕܪܺܝܫܶܗ ܕܰܨܠܺܝܒܳܐ ܢܶܗܘܶܐ ܠܬܰܝܡܢܳܐ ܘܪ̈ܶܓܠܰܘܗ̱ܝ ܠܓܰܪܒܝܳܐ ܘܰܐܦܰܘ̈ܗ̱ܝ ܠܡܰܕܢܚܳܐ ܘܣܶܛܪܶܗ ܕܝܰܡܺܝܢܳܐ ܒܰܐܪܥܳܐ ܕܢܶܟܒܰܫ ܡܚܽܘܬܳܐ ܕܠܽܘܟܳܝܬܳܐ ܘܢܶܗܘܶܐ ܣܡܺܝܟ ܥܰܠ ܣܶܛܪܶܗ܆ ܐܰܝܟ ܕܨܳܪ ܥܠܰܘܗ̱ܝ ܢܒܺܝܳܐ ܚܰܙܩܺܝܶܐܠ (ܕ: ܕ ـ ܘ) ܕܰܐܓܶܣ ܥܰܠ ܣܶܛܪ̈ܰܘܗ̱ܝ ܬܠܳܬܡܳܐܐ ܘܬܶܫܥܺܝܢ ܝܰܘ̈ܡܳܬܳܐ܆ ܡܶܛܽܠ ܗܳܕܶܐ ܠܳܐ ܢܶܗܘܶܐ ܚܰܨܶܗ ܥܰܠ ܐܰܪܥܳܐ. ܒܳܬܰܪ ܕܰܡܫܰܡܠܶܝܢ ܨܠܽܘܬܳܐ ܘܩܳܒܪܺܝܢ ܠܰܨܠܺܝܒܳܐ܆ ܘܢܳܣܒܺܝܢ ܡܗܰܝ̈ܡܢܶܐ ܡܶܢ ܡܰܝ̈ܳܐ ܕܰܫܝܳܓܬܳܐ ܕܰܚܠܺܝܛܺܝܢ ܒܗܽܘܢ ܚܰܠܳܐ ܘܰܡܪܳܪܳܐ ܘܥܰܠܘܰܝ ܘܫܳܬܶܝܢ ܠܒܽܘܪܟܬܳܐ. ܘܙܳܕܶܩ ܠܰܡܗܰܝ̈ܡܢܶܐ ܕܢܶܙܕܰܗܪܽܘܢ ܕܠܳܐ ܢܛܽܘܦ ܡܶܢܗܽܘܢ ܡܶܕܶܡ ܥܰܠ ܐܰܪܥܳܐ ܕܠܳܐ ܢܶܬܚܰܝܒܽܘܢ. ܘܢܶܬܬܣܺܝ̈ܡܳܢ ܡܰܪ̈ܘܚܳܬܳܐ ܡܶܟܳܐ ܘܡܶܟܳܐ ܘܢܶܬܥܒܶܕ ܢܰܗܺܝܪܳܐ ܩܕܳܡ ܩܰܒܪܳܐ ܥܕܰܡܳܐ ܠܝܰܘܡܳܐ ܕܰܩܝܳܡܬܳܐ܀
ܘܟܰܕ ܩܳܒܪܺܝܢ ܠܰܨܠܺܝܒܳܐ ܐܳܡܪܺܝܢ: ܩܽܘܩܰܠܝܽܘܢ ܫܒܺܝܥܳܝܳܐ
ܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ ܗ̄ܘܗ̄ ܐܰܝܟ ܩܛܺܝ̈ܠܶܐ ܕܰܫܟܺܝܒܺܝܢ ܒܩܰܒܪ̈ܶܐ܀
ܐܰܚܶܬܬܳܢܝ̱ ܠܓܽܘܒܳܐ ܬܰܚܬܳܝܳܐ ܗ̄ܘܗ̄ ܠܚܶܫܽܘܟܳܐ ܘܰܠܛܶܠܳܠܰܝ̈ ܡܰܘܬܳܐ܀
ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ ܗ̄ܘܗ̄ ܘܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ܀
ܥܶܩܒܳܐ ܫܒܺܝܥܳܝܳܐ
ܩܒܽܘܪܬܶܗ ܕܰܡܫܺܝܚܳܐ ܡܰܠܟܰܢ ܚܰܝ̈ܶܐ ܗܘܳܬ ܠܰܒܢܰܝ̈ܢܳܫܳܐ. ܐܶܠܽܘܠܳܐ ܕܰܒܓܰܘ ܩܰܒܪܳܐ ܠܳܐ ܐܶܬܬܣܺܝܡ ܗ̱ܘܳܐ܆ ܬܰܪ̈ܥܶܐ ܪ̈ܳܡܶܐ ܕܦܰܪܕܰܝܣܳܐ ܠܳܐ ܐܶܬܦܬܰܚܘ̱ ܗ̱ܘܰܘ܆ ܒܶܗ ܡܳܪܝ ܐܰܢ̱ܬ ܐܰܫܪܳܐ ܘܰܐܢܺܝܚ ܠܢܰܦ̈ܫܳܬܳܐ ܕܥܰܒܕܰܝ̈ܟ ܕܰܫܟܶܒܘ̱ ܥܰܠ ܣܰܒܪܳܟ܀
ܡܫܰܡܫܳܢܳܐ: ܣܛܳܘܡܶܢ ܩܰܠܳܘܣ ܩܽܘܪܝܶܠܰܝܣܳܘܢ܀
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܥܺܝܪܳܐ ܕܠܳܐ ܡܳܐܶܬ ܕܥܰܠ ܕܰܫܦܰܪ ܠܶܗ ܒܪܶܚܡܰܬ ܐ̱ܢܳܫܽܘܬܶܗ ܛܥܶܡ ܡܰܘܬܳܐ ܒܨܶܒܝܳܢܶܗ܆ ܠܗܰܘ ܡܢܰܚܡܳܢܳܐ ܕܡܺܝ̈ܬܶܐ ܘܰܡܩܺܝܡܳܢܳܐ ܕܰܩܒܺܝܪ̈ܶܐ ܕܰܒܚܽܘܒܶܗ ܗܘܳܐ ܒܩܰܒܪܳܐ ܐܰܝܟ ܚܰܠܳܫܳܐ܆ ܠܗܰܘ ܒܳܪܽܘܝܳܐ ܕܥܳܠ̈ܡܶܐ ܕܰܐܝܟ ܡܶܣܟܺܢܳܐ ܡܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܥܰܦܝ ܗ̱ܘܳܐ ܒܟܶܬܳܢ̈ܶܐ܆ ܠܗܰܘ ܕܝܳܗܶܒ ܫ̈ܶܐܠܳܬܳܐ ܠܰܒܢܰܝ̈ ܢܰܥܒܳܐ ܕܩܳܪܶܝܢ܆ ܕܶܐܫܬܰܐܰܠ ܦܰܓܪܶܗ ܕܢܶܬܥܰܦܶܐ ܐܰܝܟ ܡܺܝܬܳܐ ܡܶܢ ܕܰܝܳܢܳܐ܆ ܠܗܰܘ ܕܦܰܪܩܰܢ ܒܚܰܫܶܗ ܘܰܒܡܰܘܬܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ ܕܰܩܒܽܘܪܬܳܐ ܦܳܪܽܘܩܳܝܬܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶـܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܢܽܘܗܪܳܐ ܘܚܰܝ̈ܶܐ ܫܰܪܺܝܪ̈ܶܐ܆ ܠܳܐ ܡܳܝܽܘܬܳܐ ܕܡܺܝܬ ܘܶܐܬܩܒܰܪ ܒܨܶܒܝܳܢܶܗ ܒܩܰܒܪܳܐ ܚܰܕܬܳܐ ܗܰܘ ܕܰܢܩܺܝܪ ܗ̱ܘܳܐ ܡܶܢ ܝܰܘܣܶܦ ܪܳܚܡܶܗ ܠܰܩܒܽܘܪܬܶܗ܆ ܒܰܕܓܽܘܢ ܗܳܫܳܐ ܠܰܩܒܽܘܪܬܳܐ ܫܒܺܝܚܬܳܐ ܘܡܰܥܒܕܰܬ ܚܰܝ̈ܶܐ ܒܚܰܕܽܘܬܳܐ ܡܝܰܩܪܺܝܢܰܢ ܟܰܕ ܐܳܡܪܺܝܢܰܢ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܰܐܢܺܝܚܰܬ ܠܥܰܢܺܝ̈ܕܶܐ ܒܓܰܘ ܚܶܙܶܝ̈ܗ̇ ܕܰܫܝܽܘܠ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܓܰܪ̈ܡܶܐ ܝܰܒܺܝ̈ܫܶܐ ܣܘܰܚܘ̱ ܠܩܽܘܒܠܳܗ̇ ܘܰܩܢܰܘ ܒܳܗ̇ ܚܰܝ̈ܶܐ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܕܶܚܠܬܳܐ ܘܰܪܬܺܝܬܳܐ ܐܰܪܡܝܰܬ ܒܡܰܘܬܳܐ ܘܣܳܛܳܢܳܐ ܘܶܐܬܒܰܛܰܠ ܘܶܐܫܬܪܺܝ ܫܽܘܠܛܳܢܗܽܘܢ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܗܰܓܡܰܬ ܫܽܘܪ̈ܶܝܗ̇ ܕܰܫܝܽܘܠ ܘܬܰܒܪܰܬ ܬܰܪ̈ܥܶܝܗ̇܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܘܳܝܳܐ ܘܥܳܝܳܐ ܐܰܩܢܝܰܬ ܠܚܰܝ̈ܠܰܘܳܬܳܐ ܣܰܩܽܘܒ̈ܠܳܝܶܐ ܕܚܶܫܽܘܟܳܐ܆ ܐܳܘ ܩܒܽܘܪܬܳܐ ܐܠܰܗܳܝܬܳܐ ܕܙܺܝܘܳܐ ܘܫܽܘܒܚܳܐ ܐܰܠܒܫܰܬ ܠܳܐܕܳܡ ܘܰܠܟܽܠܶܗ ܓܶܢܣܳܐ ܕܰܡܗܰܝ̈ܡܢܶܐ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܚܰܝ̈ܶܐ ܚܰܕ̈ܬܶܐ ܫܰܟܢܰܬ ܠܟܽܠܶܗ ܓܰܒܳܐ ܕܒܶܝܬ ܙܰܕܺܝ̈ܩܶܐ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܛܳܒ̈ܳܬܳܐ ܙܶܪܥܰܬ ܒܥܽܘܡܪܳܗ̇ ܕܰܫܝܽܘܠ ܘܰܥܒܰܕܬܳܗ̇ ܨܳܕܺܝܬܳܐ܆ ܐܳܘ ܩܒܽܘܪܬܳܐ ܡܰܚܝܳܢܺܝܬܳܐ ܕܝܳܪ̈ܽܘܬܶܐ ܕܡܰܠܟܽܘܬܳܐ ܥܶܒܕܰܬ ܠܳܐܕܳܡ ܘܰܠܟܽܠܗܽܘܢ ܝܰܠܕܰܘ̈ܗ̱ܝ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܟܰܪܝܽܘܬܳܐ ܐܰܠܒܫܰܬ ܗ̱ܘܳܬ ܠܣܳܛܳܢܳܐ ܘܰܠܚܰܝ̈ܠܰܘܳܬܶܗ ܘܰܫܒܳܬ ܫܒܺܝܬܳܐ ܕܰܫܒܳܐ ܗ̱ܘܳܐ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܠܽܘܒܳܒܳܐ ܘܚܰܕܽܘܬܳܐ ܐܰܩܢܝܰܬ ܠܳܐܕܡܳ ܘܰܠܟܽܠܗܽܘܢ ܝܰܠܕܰܘ̈ܗ̱ܝ܆ ܐܳܘ ܩܒܽܘܪܬܳܐ ܡܳܪܳܢܳܝܬܳܐ ܕܡܺܝ̈ܬܶܐ ܥܓܺܝ̈ܢܰܝ ܕܰܚܺܝܚܳܐ ܪܘܰܙܘ̱ ܒܳܗ̇ ܘܚܰܕܽܘܬܳܐ ܣܰܓܺܝܐܬܳܐ ܩܢܰܘ ܒܳܗ̇. ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܢܽܘܗܪܳܐ ܘܚܰܝ̈ܶܐ ܐܰܙܠܓܰܬ ܥܰܠ ܟܽܠܗܽܘܢ ܐܰܝܠܶܝܢ ܕܗܰܝܡܶܢܘ̱ ܒܳܟ ܗܰܝܡܳܢܽܘܬܐ ܫܰܪܺܝܪܬܳܐ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܣܰܒܪܳܐ ܫܰܪܺܝܪܳܐ ܘܚܰܝ̈ܶܐ ܝܶܗܒܰܬ ܠܪܺܝܫܳܐ ܕܛܽܘܗ̈ܡܶܐ ܘܰܕܫܰܪ̈ܒܳܬܳܐ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܥܺܝܪ̈ܰܝ ܪܰܘܡܳܐ ܢܚܶܬܘ̱ ܘܝܰܩܪܽܘܗ̱ܝ ܠܩܰܒܪܶܗ ܕܒܰܪ ܡܳܪܗܽܘܢ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܦܳܐܰܚ ܡܶܢܳܗ̇ ܪܺܝܚܳܐ ܗܰܢܺܝܳܐܐ ܘܒܰܣܺܝܡܳܐ ܒܡܰܥܰܠܬܶܗ ܕܰܡܫܺܝܚܳܐ ܕܠܰܫܝܽܘܠ ܘܠܰܐܝܠܶܝܢ ܕܪܰܒܺܝܥܺܝܢ ܗ̱ܘܰܘ ܥܰܠ ܕܰܚܺܝܚܳܐ ܐܰܦܨܚܰܬ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܰܐܨܡܚܰܬ ܥܰܠ ܥܰܢܺܝ̈ܕܶܐ ܢܽܘܗܪܳܐ ܠܳܐ ܡܶܬܕܰܪܟܳܢܳܐ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܩܰܕܺܝܫܽܘܬܳܐ ܘܢܰܟܦܽܘܬܳܐ ܙܰܡܢܰܬ ܠܰܡܗܰܝ̈ܡܢܶܐ ܘܒܶܗܬܬܳܐ ܘܟܽܘܳܐܪܳܐ ܠܰܐܝܠܶܝܢ ܕܰܟܦܰܪܘ̱ ܒܶܗ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܪ̈ܰܚܡܶܐ ܘܰܚܢܳܢܳܐ ܒܳܗ̇ ܐܶܫܟܰܚܘ̱ ܥܰܢܺܝ̈ܕܶܐ ܐܰܝܠܶܝܢ ܕܰܪܡܶܝܢ ܗ̱ܘܰܘ ܒܓܰܘ ܩܰܒܪ̈ܰܝܗܽܘܢ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܫܰܝܢܳܐ ܪܰܒܳܐ ܘܰܫܠܳܡܳܐ ܣܰܓܺܝܳܐܐ ܐܰܥܒܕܰܬ ܒܶܝܬ ܫܡܰܝ̈ܳܢܶܐ ܠܰܐܪ̈ܥܳܢܳܝܶܐ܆ ܐܳܘ ܩܒܽܘܪܬܳܐ ܐܰܠܳܗܳܝܬܳܐ ܕܬܰܪܥܶܗ ܕܰܓܢܽܘܢܳܐ ܫܡܰܝܳܢܳܐ ܒܳܗ̇ ܐܶܬܦܬܰܚ ܠܰܛܪ̈ܺܝܕܶܐ ܘܰܣܚܺܝ̈ܦܶܐ ܡܶܢ ܝܳܪܬܽܘܬܗܽܘܢ. ܘܠܳܟ ܗܳܫܳܐ ܡܳܪܝܳܐ ܐܰܠܳܗܳܐ ܡܶܬܟܰܫܦܺܝܢܰܢ ܕܰܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܕܬܰܥܒܰܪ ܠܰܚܛܳܗ̈ܶܐ ܘܣܰܟܠܘ̈ܳܬܳܐ ܕܺܝܠܰܢ ܘܬܶܫܒܽܘܩ ܠܟܽܠܗܶܝܢ ܠܳܐ ܢܳܡܽܘܣܳܝ̈ܘܳܬܳܐ ܕܟܽܠܰܢ܆ ܘܰܐܢܺܝܚ ܠܥܰܢܺܝ̈ܕܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܠܘܳܬܟ ܚܙܰܩܘ̱. ܘܰܚܢܰܢ ܘܗܶܢܽܘܢ ܢܰܣܶܩ ܠܟ ܫܽܘܒܚܳܐ ܘܬܰܘܕܺܝܬܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܢܚܶܬ ܚܰܝܳܐ ܠܒܶܝܬ ܡܺܝ̈ܬܶܐ ܘܰܐܟܪܶܙ ܬܰܡܳܢ܆ ܢܽܘܚܳܡܳܐ ܘܚܰܝܰܬ ܡܺܝ̈ܬܶܐ ܘܫܽܘܒܩܳܢܳܐ ܕܚܰܘ̈ܒܶܐ܆ ܘܬܰܒܰܪ ܬܰܪ̈ܥܶܝܗ̇ ܕܰܫܝܽܘܠ ܘܡܽܘܟ̈ܠܶܝܗ̇ ܓܰܕܶܡ܆ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ ܘܒܰܛܶܠ ܙܳܟܽܘܬܶܗ܆ ܒܪܺܝܟ ܚܰܝܳܐ܆ ܕܰܐܚܺܝ ܡܺܝܬܽܘܬܰܢ܆ ܒܪܺܝܟ ܥܺܝܪܳܐ ܕܰܐܥܺܝܪ ܕܰܡܟܽܘܬܰܢ܆ ܒܪܺܝܟ ܗ̱ܘܽ ܕܰܐܚܝܰܢ ܒܰܩܒܽܘܪܬܶܗ ܚܽܘܣ ܘܶܐܬܪܰܚܡ ܥܠܰܝܢ܀
ܫܽܘܒܚܳܐ ܘܡܶܢ ܥܳܠܰܡ
ܚܰܝܰܝ̈ ܠܰܫܝܽܘܠ ܡܰܛܺܝܘ ܕܰܘܺܝܕ ܐܶܡܰܪ܆ ܒܦܰܪܨܽܘܦ ܡܰܠܟܳܐ ܒܰܪ ܕܰܘܺܝܕ ܕܰܢܚܶܬ ܠܒܶܝܬ ܡܺܝ̈ܬܶܐ܆ ܣܶܒܥܰܬ ܢܰܦܫܝ̱ ܒܺܝ̈ܫܳܬܳܐ ܡܶܢ ܨܳܠܽܘ̈ܒܶܐ܆ ܘܡܶܢ ܨܶܒܝܳܢܗܽܘܢ ܐܶܬܚܰܫܒܶܬ ܥܰܡ ܢܳܚ̈ܬܰܝ ܓܽܘܒܳܐ܆ ܠܡܺܝ̈ܬܶܐ ܓܶܝܪ܆ ܕܰܫܝܽܘܠ ܡܰܚܶܐ ܐ̱ܢܳܐ܆ ܘܠܰܐܣܺܝܪ̈ܶܐ ܕܬܰܡܳܢ ܫܳܪܶܐ ܐ̱ܢܳܐ܆ ܘܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ ܘܒܳܗܬܺܝܢ ܨܳܠܽܘ̈ܒܶܐ܀
ܗܳܝܕܶܝܢ ܐܳܡܪܺܝܢ:
ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀
ܡܫܰܒܚܺܝܢܰܢ ܠܳܟ܉ ܡܒܰܪܟܺܝܢܰܢ ܠܳܟ܉ ܣܳܓܕܺܝܢܰܢ ܠܳܟ܉ ܡܡܰܠܽܠܘܬ ܫܽܘܒܚܳܐ ܡܰܣܩܺܝܢܰܢ ܠܳܟ܀
ܡܰܘܕܶܝܢܰܢ ܠܳܟ ܡܶܛܽܠ ܪܰܒܽܘܬܳܐ ܕܫܽܘܒܚܳܐ ܕܺܝܠܳܟ܉ ܡܳܪܝܳܐ ܥܳܒܽܘܕܳܐ ܡܰܠܟܳܐ ܫܡܰܝܳܢܳܐ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀
ܡܳܪܝܳܐ ܐܰܠܳܗܳܐ ܒܪܳܐ ܝܺܚܺܝܕܳܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܡܳܪܝܳܐ ܐܰܠܳܗܳܐ ܐܶܡܪܶܗ ܕܰܐܠܳܗܳܐ ܒܪܳܐ ܘܡܶܠܬܶܗ ܕܰܐܒܳܐ܉ ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܐܶܬܪܰܚܰܡܥܠܰܝܢ܀
ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ܉ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬܰܢ܉ ܗܰܘ ܕܝܳܬܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܣ ܘܶܐܬܪܰܚܰܡܥܠܰܝܢ܀
ܡܶܛܽܠ ܕܰܐܢ̱ܬܽ ܗ̱ܘ ܠܚܽܘܕܰܝܟ ܩܰܕܺܝܫܰܬܽ ܗ̱ܘ ܠܚܽܘܕܰܝܟ܉ ܡܳܪܝܳܐ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀
ܫܽܘܒܚܶܗ ܕܰܐܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ ܐܶܒܰܪܟܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܉ ܡܒܰܪܟܳܐ ܠܥܳܠܰܡ ܗܰܘ ܕܺܐܝܬܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀
ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫ̈ܒܚܳܬܳܐ ܠܥܳܠܰܡ ܥܳܠܡܺܝܢ܀
ܠܳܟ ܝܳܐܶܐ ܫܽܘܒܚܳܐ܉ ܠܳܟ ܦܰܐܝܳܐ ܬܶܫܒܽܘܚܬܳܐ ܘܠܳܟ ܦܐܶܐ ܩܽܘܠܳܣܳܐ܉ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܉ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܉ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀
ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܉ ܕܰܒܝܰܕ ܡܰܘܬܳܟ ܐܶܬܒܰܛܰܠܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀
ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬܳܢܳܐ. ܩܰܕܺܫܰܬ ܠܳܐ ܡܳܝܽܘܬܳܐ ܕܶܐܨܠܶܒܬ ܚܠܳܦܰܝܢ ܐܶܬܪܰܚܰܡܥܠܰܝܢ.
ܡܳܪܰܢ ܐܶܬܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳـ̈ܝܶܐ ܥܰܒܕܰܝ̈ܟ ܒܰܪܶܟܡܳܪܝ܀
ܩܳܢܽܘܢܳܐ ܕܗܰܝܡܳܢܽܘܬܳܐ
ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.
ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ. ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ. ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ. ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢ̈ܒܺܝܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܰܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚ̈ܛܳܗܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟܡܳܪܝ܀
ܫܠܶܡ ܛܶܟܣܳܐ ܕܣܶܓܕܬܳܐ ܕܰܨܠܺܝܒܳܐ ܘܰܩܒܽܘܪܬܳܐ ܦܳܪܽܘܩܳܝܬܳܐ܀