ܛܟܣܐ ܕܫܘܒܩܢܐ
ܡܳܐ ܕܫܳܠܡܳܐ ܬܶܫܡܶܫܬܳܐ ܕܰܬܠܳܬܫܳܥܺܝ̈ܢ ܢܫܰܪܶܐ ܒܰܨܠܽܘܬܳܐ ܕܫܽܘܒܩܳܢܳܐ.
ܩܰܕܡܳܝܰܬ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܛܰܝܒܽܘܬܳܟ ܠܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܺܐܝܬܰܘܗ̱ܝ ܫܽܘܪܳܝܳܐ ܕܨܰܘܡܳܟ ܩܰܕܺܝܫܳܐ܆ ܘܗܰܒ ܠܰܢ ܕܰܒܠܶܒܳܐ ܕܰܟܝܳܐ ܢܶܫܰܐܠ ܫܽܘܒܩܳܢܳܐ ܡܶܢ ܚܕ̈ܳܕܶܐ ܘܢܶܫܒܽܘܩ ܚܰܕ ܠܚܰܕ ܐܰܝܟ ܝܽܘܠ̈ܦܳܢܶܐ ܕܺܝܠܳܟ ܐܶܘܰܢܓܶܠܳܝ̈ܶܐ܆ ܐܰܝܟܰܢܳܐ ܕܰܒܕܰܟܝܽܘܬܳܐ ܢܨܽܘܡܺܝܘܗ̱ܝ ܘܰܒܫܰܦܝܽܘܬܳܐ ܢܶܫܬܰܘܬܰܦ ܒܐ̱ܪ̈ܳܙܰܝܟ ܩܰܕܺܝ̈ܫܶܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܢܝܳܢܳܐ ܕܪܰܚܶܡܥܠܰܝ
ܩܠܐ: ܒܩ̄ ܚܛܺܝܬ ܠܳܟ
ܚܛܺܝܬ ܠܳܟ ܚܳܐܶܢ ܠܚܰܛܳܝ̈ܶܐ܆ ܩܰܒܶܠ ܒܳܥܽܘܬܝ̱܆ ܘܰܫܒܽܘܩ ܠܺܝ ܣܰܟܠܽܘܬܝ̱. ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܒܣܽܘܓܳܐܐ ܕܚܰܘ̈ܒܶܐ ܘܕܰܚܛܳܗ̈ܶܐ܆ ܗܳܐ ܡܟܰܬܰܡ ܐ̱ܢܳܐ܆ ܥܰܠ ܗܳܝ ܓܳܥܶܐ ܐ̱ܢܳܐ. ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܒܰܬܪܰܥ ܡܰܢ ܢܺܐܙܰܠ ܢܶܩܽܘܫ܆ ܐܶܠܳܐ ܒܬܰܪܥܳܟ܆ ܚܰܢܳܢܳܐ ܡܳܪܰܢ. ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܐܰܝܟ ܚܰܛܳܝܬܳܐ ܓܳܥܶܐ ܐ̱ܢܳܐ܆ ܘܰܐܝܟ ܗܰܘ ܡܳܟܣܳܐ܆ ܡܶܬܟܰܫܰܦ ܐ̱ܢܳܐ ܠܳܟ. ܡܳܪܝܳܐ ܡܳܪܶܐ ܟܽܠ ܪܰܚܡܥܠܝ܀
ܚܽܘܢܰܝܢ ܚܳܐܶܢ ܠܚܰܛܳܝ̈ܶܐ܆ ܚܰܣܳܐ ܚܰܘ̈ܒܰܝܢ܆ ܘܰܫܒܽܘܩ ܒܽܘܨܳܪ̈ܰܝܢ. ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܫܽܘܒܚܳܐ ܘܡܶܢ ܥܳܠܰܡ
ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ܆ ܘܢܶܣܓܽܘܕ ܠܰܒܪܳܐ܆ ܘܰܠܪܽܘܚܳܐ ܕܩܽܘܕܫܳܐ. ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܡܫܰܡܫܳܢܳܐ: ܣܛܰܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀
ܦܪܽܘܡܝܽܘܢ
ܫܽܘܒܚܳܐ ܠܳܟ ܐܰܒܳܐ ܫܰܝܢܳܐ ܕܰܫܡܰܝ̈ܳܢܶܐ܆ ܘܬܰܘܕܺܝܬܳܐ ܠܳܟ ܒܪܳܐ ܫܠܳܡܳܐ ܕܰܐܪ̈ܥܳܢܳܝܶܐ܆ ܣܓܺܝܕ ܐܰܢ̱ܬ ܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܕܫܽܘ̈ܟܳܢܶܐ ܐܰܠܳܗܳܝ̈ܶܐ܆ ܐܰܒܳܐ ܕܝܰܗܒ ܠܺܝܚܺܝܕܶܗ ܠܡܰܘܬܳܐ ܡܶܛܽܠ ܦܽܘܪܩܳܢܰܢ܆ ܒܪܳܐ ܕܰܥܨܳܝܗ̱ܝ ܚܽܘܒܶܗ ܘܡܺܝܬ ܡܶܛܠܳܬܰܢ܆ ܪܽܘܚܳܐ ܩܰܕܺܝܫܳܐ ܕܚܳܕܶܐ ܒܛܳܒ̈ܳܬܰܢ܆ ܘܒܶܗ ܡܶܬܝܰܗ̈ܒܳܢ ܫ̈ܶܐܠܳܬܰܢ܆ ܐܰܢ̱ܬ ܬܠܺܝܬܳܝܳܐ ܘܰܠܚܽܘܕܳܝܳܐ ܕܚܰܕ ܐܺܝܬܰܝܟ ܘܽܐܘܣܝܳܐܺܝܬ܆ ܘܒܰܬܠܳܬܳܐ ܩܢܽܘ̈ܡܺܝܢ ܣܓܺܝܕ ܐܰܢ̱ܬ ܡܫܰܒܚܳܐܺܝܬ܆ ܗܰܒܠܰܢ ܡܳܪܝ̱ ܕܰܫܠܳܡܳܐ ܢܶܬܶܠ ܠܰܚܕ̈ܳܕܶܐ ܫܰܦܝܳܐܺܝܬ܆ ܘܒܶܗ ܛܰܪ ܠܟܽܠܰܢ ܒܰܐܘܝܽܘܬܳܐ ܕܥܰܡܳܟ ܐܰܠܳܗܳܐܝܬ܆ ܘܒܰܚܙܳܩܳܐ ܕܪܶܚܡܬܳܟ ܠܳܐ ܡܶܫܬܰܪܝܳܢܳܐܺܝܬ܆ ܕܰܢܫܰܒܚܳܟ ܒܝܰܘܡܳܐ ܦܨܺܝܚܳܐ ܕܰܩܝܳܡܬܳܟ ܡܫܰܒܰܚܬܳܐ ܬܗܺܝܪܳܐܺܝܬ܆ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܟܽܠܗܽܘܢ ܝܰܘܳܡ̈ܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܗܰܘ ܫܰܝܢܳܐ ܐܰܡܺܝܢܳܐ ܕܒܶܪ̈ܝܳܬܳܐ܆ ܘܰܫܠܳܡܳܐ ܫܰܪܺܝܪܳܐ ܕܟܽܠܗܽܘܢ ܣܰܘ̈ܦܶܐ ܘܦܶܢܝ̈ܳܬܳܐ܆ ܗܰܘ ܕܟܰܕ ܚܽܘܒܳܐ ܐܺܝܬܰܝܟ܆ ܘܚܽܘܒܳܐ ܡܶܬܩܪܶܐ ܐܰܢ̱ܬ܆ ܘܰܒܗܳܢܳܐ ܫܡܳܐ ܛܳܒ ܡܶܢ ܟܽܠܗܽܘܢ ܫܡܳܗܺܝ̈ܢ ܚܳܕܶܐ ܐܰܢ̱ܬ ܕܒܶܗ ܪܳܚܶܡ ܐ̱ܢܳܫܳܐ ܡܶܬܺܝܕܰܥ ܐܰܢ̱ܬ܆ ܘܠܰܐܝܠܶܝܢ ܕܒܶܗ ܐܰܚܺܝܕܺܝܢ ܡܝܰܩܰܪ ܐܰܢ̱ܬ܆ ܘܒܶܗ ܒܚܽܘܒܳܐ ܐܶܬܩܰܪܰܒܬ ܚܠܳܦܰܝܢ ܩܽܘܪܒܳܢܳܐ ܡܩܰܒܠܳܐ ܘܪܽܘܚܳܐ ܗܰܢܺܝܳܐܐ ܟܰܕ ܒܰܙܩܺܝܦܳܟ ܬܪܰܥܬ ܠܰܣܝܳܓܳܐ ܕܰܒܥܶܠܕܒܳܒܽܘܬܳܐ܆ ܘܒܰܕܡܳܐ ܕܰܩܢܽܘܡܳܟ ܫܰܝܶܢܬ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ ܘܰܐܪܺܝܡܬ ܪܓܺܝܙܽܘܬܳܐ ܡܶܢ ܡܨܰܥܬܳܐ܆ ܟܰܕ ܥܒܰܕܬ ܠܬܰܪ̈ܬܰܝܗܶܝܢ ܚܕܳܐ܆ ܒܝܰܕ ܚܕܳܝܽܘܬܳܐ ܠܳܐ ܡܶܬܦܰܠܓܳܢܺܝܬܳܐ ܕܰܐܠܳܗܽܘܬܳܟ ܐܺܝܬܝܳܝܬܳܐ܆ ܘܐ̱ܢܳܫܽܘܬܳܟ ܙܰܒܢܳܝܬܳܐ ܕܒܳܗ̇ ܩܪܰܝܬ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ܆ ܘܶܐܣܰܪܬ ܐܶܢܽܘ̇ܢ ܒܰܐܘܝܽܘܬܳܐ ܕܪܶܚܡܬܳܟ ܐܰܠܳܗܳܝܬܳܐ ܘܰܒܒܰܝܬܳܝܽܘܬܳܐ ܕܡܰܠܟܽܘܬܳܟ ܡܬܽܘܡܳܝܬܳܐ܆ ܘܣܰܒܰܪܬ ܫܠܳܡܳܐ ܘܫܰܝܢܳܐ ܠܥܳܠܡܳܐ܆ ܟܰܕ ܒܰܫܠܳܡܳܐ ܕܪܺܝܫ ܡܰܠܰܐܟ̈ܶܐ ܣܰܒܰܪܬ ܒܰܛܢܳܟ ܠܶܐܡܳܟ ܒܬܽܘܠܬܳܐ܆ ܘܒܰܫܠܳܡܳܐ ܦܶܓܥܰܬ ܐܶܡܳܟ ܒܶܐܠܺܝܫܒܰܥ ܐܶܡܶܗ ܕܝܽܘܚܰܢܳܢ ܟܳܪܽܘܙܳܟ܆ ܘܰܒܚܰܕܽܘܬܶܗ ܕܰܫܠܳܡܳܟ ܪܗܶܛ ܘܕܳܨ ܩܽܘܕܡܰܝܟ ܐܰܝܟ ܥܰܒܕܳܐ ܩܕܳܡ ܡܳܪܶܗ܆ ܘܰܒܡܰܘܠܳܕܳܟ ܫܠܳܡܳܐ ܣܰܒܰܪܘ̱ ܥܺܝܪ̈ܶܐ ܠܪ̈ܳܥܰܘܳܬܳܐ ܘܰܫܠܳܡܳܐ ܝܰܗܒܬ ܠܢܶܫ̈ܶܐ ܕܣܰܒܰܪ̈ܝ̱ ܥܰܠ ܩܝܳܡܬܳܟ ܡܫܰܒܰܚܬܳܐ܆ ܘܒܰܫܠܳܡܳܐ ܥܰܠܬ ܠܥܶܠܺܝܬܳܐ ܕܒܳܗ̇ ܟܢܺܝܫܺܝܢ ܗ̱ܘܰܘ ܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ܆ ܘܫܰܪܰܪܬ ܐܶܢܽܘ̇ܢ ܥܰܠ ܢܽܘܚܳܡܳܟ܆ ܫܠܳܡܳܐ ܝܰܗܒܬ ܠܰܫܠܺܝ̈ܚܰܝܟ ܩܰܕܺܝ̈ܫܶܐ ܟܰܕ ܐܶܬܥܰܠܺܝܬ ܨܶܝܕ ܫܳܠܽܘܚܳܟ ܘܶܐܡܰܪܬ ܠܗܽܘܢ܆ ܫܠܳܡܳܐ ܕܺܝܠܝ̱ ܫܳܒܶܩ ܐ̱ܢܳܐ ܠܟܽܘ̇ܢ܆ ܘܠܳܐ ܗ̱ܘܳܐ ܐܰܝܟܰܢܳܐ ܕܝܳܗܶܒ ܥܳܠܡܳܐ ܝܳܗܶܒ ܐ̱ܢܳܐ ܠܟܽܘ̇ܢ܆ ܗܳܢܰܘ ܦܽܘܩܕܳܢܝ̱ ܕܬܰܚܒܽܘܢ ܚܰܕ ܠܚܰܕ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘ̇ܢ܆ ܠܗܳܢܳܐ ܚܽܘܒܳܐ ܛܰܪ ܠܰܢ ܦܳܪܽܘܩܰܢ܆ ܘܒܶܗ ܫܰܪܰܪ ܠܪ̈ܶܥܝܳܢܰܝܢ܆ ܒܚܽܘܒܳܟ ܢܶܬܶܐܣܰܪ ܥܰܡ ܚܕ̈ܳܕܶܐ܆ ܚܽܘܒܳܟ ܢܶܛܪܽܘܕ ܡܶܢ ܒܰܝܢܳܬܰܢ ܠܣܶܕ̈ܩܶܐ ܘܚܶܪ̈ܝܳܢܶܐ܆ ܚܽܘܒܳܟ ܢܶܥܒܶܕ ܠܰܢ ܢܳܛܽܘܪ̈ܶܐ ܕܦܽܘܩܕܳܢܰܝ̈ܟ ܡܰܚܝ̈ܳܢܶܐ܆ ܒܚܽܘܒܳܟ ܙܓܽܘܪ ܡܶܢܰܢ ܐܽܘܠܨܳܢ̈ܶܐ ܘܕܽܘܘ̈ܳܢܶܐ܆ ܒܚܽܘܒܳܟ ܢܶܗܘܶܐ ܒܢܰܝ̈ܳܐ ܕܫܰܝܢܳܐ ܘܕܰܫܠܳܡܳܐ܆ ܒܰܫܠܳܡܳܐ ܐܰܘܳܐ ܠܪ̈ܳܥܰܘܳܬܳܐ ܘܰܓܙܳܪ̈ܰܝܗܽܘ̇ܢ܆ ܒܰܫܠܳܡܳܟ ܒܰܣܶܡ ܠܟܳܗ̈ܢܶܐ ܒܐ̱ܪ̈ܳܙܰܝܗܽܘ̇ܢ܆ ܒܰܫܠܳܡܳܟ ܓܡܽܘܪ ܠܥܺܕܬܳܟ ܘܰܠܝܰܠܕܶܝ̈ܗ̇܆ ܒܰܫܠܳܡܳܟ ܕܰܒܰܪܶܝܗ̇܆ ܘܰܒܫܰܝܢܳܟ ܨܰܒܶܬܶܝܗ̇܆ ܒܰܫܠܳܡܳܟ ܗܰܕܳܐ ܠܟܶܢ̈ܫܶܝܗ̇܆ ܘܰܒܫܰܝܢܳܐ ܚܰܕܳܐ ܠܰܒܢܶܝ̈ܗ̇܆ ܒܰܫܠܳܡܳܐ ܘܰܥܶܕ ܠܪ̈ܰܚܺܝܩܶܝܗ̇܆ ܘܰܒܫܰܝܢܳܐ ܛܰܪ ܠܩܰܪ̈ܺܝܒܶܝܗ̇܆ ܒܰܫܠܳܡܳܐ ܙܰܗܳܐ ܠܰܡܫܰܡ̈ܫܳܢܶܝܗ̇܆ ܘܰܒܫܰܝܢܳܐ ܚܰܝܶܕ ܠܰܡܕܰܒܪ̈ܳܢܶܝܗ̇܆ ܒܰܫܠܳܡܳܐ ܛܰܟܶܣ ܬܶܓܡܶܝ̈ܗ̇܆ ܘܰܒܫܰܝܢܳܐ ܝܰܒܶܠ ܥܰܕܥܺܐܕܶܝ̈ܗ̇܆ ܒܰܫܠܳܡܳܐ ܟܰܢܶܫ ܠܰܪ̈ܓܺܝܙܶܐ܆ ܘܰܒܫܰܝܢܳܐ ܠܰܚܶܡ ܠܰܣܕܺܝ̈ܩܶܐ܆ ܒܰܫܠܳܡܳܐ ܡܠܺܝ ܚܰܕܽܘܬܳܐ ܠܡܰܪܺܝܪ̈ܰܝ ܢܰܦܫܳܐ܆ ܘܰܒܫܰܝܢܳܐ ܢܰܛܰܪ ܠܡܰܪܥܺܝܬܳܟ܆ ܒܰܫܠܳܡܳܐ ܣܰܬܶܬ ܠܪ̈ܶܥܝܳܢܶܐ ܦܠܺܝ̈ܓܶܐ܆ ܘܰܒܫܰܝܢܳܐ ܥܒܶܕ ܠܚܽܘ̈ܫܳܒܰܝܢ ܕܟܰܝ̈ܳܐ܆ ܒܰܫܠܳܡܳܐ ܦܪܽܘܩ ܠܰܢ ܡܶܢ ܡܳܪ̈ܰܝܳܐ ܡܰܪܺܝܪ̈ܶܐ܆ ܘܰܒܫܰܝܢܳܐ ܨܰܒܶܬ ܠܰܢ ܒܟܽܠܗܽܘܢ ܥܰܕܥܺܐܕܰܝ̈ܟ܆ ܒܰܫܠܳܡܳܐ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ܆ ܘܰܒܫܰܝܢܳܐ ܪ̈ܰܚܡܶܐ ܘܫܽܘܒܩܳܢܳܐ ܫܰܟܶܢ ܠܰܢ܆ ܒܰܫܠܳܡܳܐ ܫܪܺܝ ܡܶܢܰܢ ܩܶܛܪ̈ܶܐ ܕܥܰܘܠܳܐ܆ ܘܰܒܫܰܝܢܳܐ ܬܒܽܘܪ ܡܶܢܰܢ ܢܺܝܪܶܗ ܕܰܒܥܶܠܕܒܳܒܳܐ܆ ܫܠܳܡܳܟ ܢܶܗܘܶܐ ܥܰܡܰܢ܆ ܘܫܰܝܢܳܟ ܢܰܡܠܶܟ ܒܰܝܢܳܬܰܢ܆ ܚܽܘܒܳܟ ܐܰܣܶܐܢ ܒܬܰܪ̈ܥܝܳܬܰܢ܆ ܘܪܶܚܡܬܳܟ ܩܒܽܘܥ ܒܠܶܒܰܘ̈ܳܬܰܢ܆ ܕܢܰܘܕܶܐ ܠܳܟ ܡܳܪܶܗ ܕܫܰܝܢܳܐ܆ ܘܠܰܐܒܽܘܟ ܝܳܗܽܘܒܶܗ ܕܰܫܠܳܡܳܐ܆ ܘܰܠܪܽܘܚܳܟ ܩܰܕܺܝܫܳܐ ܓܳܡܽܘܪܶܗ ܕܚܽܘܒܳܐ ܫܰܪܺܝܪܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ: ܒܩ̄ ܩܽܘܩܳܝܳܐ
ܐܳܘ ܚܽܘܒܳܐ ܟܡܳܐ ܒܰܣܺܝܡ ܐܰܢ̱ܬ ܒܪܺܝܟ ܐܺܝܠܳܢܳܟ܆ ܕܟܽܠ ܐܰܬܪܳܐ ܕܺܐܝܬ ܒܶܗ ܡܶܢܳܟ ܟܽܠܶܗ ܫܰܝܢܳܐ ܡ̇ܠܶܐ܆ ܒܳܟ ܥܰܠ ܡܳܪܰܢ܆ ܠܒܰܝܬܶܗ ܕܰܐܒܪܳܗܳܡ܆ ܘܒܳܟ ܐܶܬܩܰܪܰܒܘ̱ ܟܳܗ̈ܢܶܐ ܠܒܶܝܬ ܩܽܘܕܫܳܐ܆ ܒܳܟ ܩܳܥܶܐ ܦܰܘܠܳܘܣ ܘܳܐܡܰܪ ܕܠܳܐ ܦܳܪܫܺܝܢ ܠܺܝ܆ ܣܪ̈ܳܩܶܐ ܘܢܶܓ̈ܕܶܐ ܘܽܐܘܠ̈ܨܳܢܶܐ ܡܶܢ ܚܽܘܒܶܗ ܕܡܳܪܝܳܐ ܗ̄ ܒܪܺܝܟ ܗܘܽ ܕܝܰܗܒܶܗ ܠܰܢ܀
ܫܽܘܒܚܳܐ
ܦܰܘܠܳܘܣ ܐܰܟܬܶܒ ܠܰܢ ܥܰܠ ܚܽܘܒܳܐ ܕܠܰܝܬ ܐܰܟܘܳܬܶܗ܆ ܛܽܘܒܰܘܗ̱ܝ ܠܰܐܝܢܳܐ ܕܡܰܚܶܒ ܠܶܗ ܕܗܽܘ ܚܳܙܶܐ ܠܡܳܪܝܳܐ܆ ܒܚܽܘܒܳܐ ܚܙܳܝܗ̱ܝ ܗ̱ܘܳܐ܆ ܡܽܘܫܶܐ ܒܪܺܝܫ ܛܽܘܪܳܐ܆ ܒܚܽܘܒܳܐ ܚܙܰܐܽܘܗ̱ܝ܆ ܣܳܗ̈ܕܶܐ ܒܶܝܬ ܕܺܝܢܳܐ܆ ܘܰܒܚܽܘܒܳܐ ܚܙܳܬܶܗ ܥܺܕܬܳܐ ܥܰܠ ܪܺܝܫ ܩܰܝܣܳܐ܆ ܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ ܐܺܝܡܳܡܳܐ ܘܠܺܠܝܳܐ ܗ̄ܘܗ̄܀
ܡܶܢ ܥܳܠܰܡ
ܫܒܰܥ ܥܰܠ ܫܰܒܥܺܝܢ ܐܰܟܬܶܒ ܠܰܢ ܒܰܪ ܐܰܠܳܗܳܐ܆ ܕܶܐܢܗܽܘ ܕܡܰܣܟܶܠ ܒܳܟ ܐܰܚܽܘܟ ܠܳܐ ܬܶܗܘܶܐ ܣܳܐܢܶܗ܆ ܐܶܬܕܰܟܪ ܕܳܐܦ ܠܳܟ܆ ܐܺܝܬ ܕܶܝܢ ܣܰܟܠܽܘܬܳܐ܆ ܘܥܰܠ ܫܽܘܒܩܳܢܳܐ ܣܢܺܝܩ ܐܰܢ̱ܬ ܐܰܟܘܳܬܶܗ܆ ܙܶܠ ܐܶܬܪܰܥܳܐ ܠܶܗ ܠܰܐܚܽܘܟ ܘܰܗܘܺܝ ܠܶܗ ܪܳܚܡܳܐ܆ ܘܰܩܥܰܘ ܬܪ̈ܰܝܟܽܘ̇ܢ ܫܰܘܝܳܐܺܝܬ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܒܠܺܠܝܳܐ ܘܒܺܐܝܡܳܡܳܐ܀
ܥܶܛܪܳܐ
ܥܒܶܕ ܡܳܪܝ̱ ܠܠܶܒܰܘ̈ܳܬܰܢ ܐܰܘ̈ܳܢܶܐ ܕܫܰܝܢܳܐ܆ ܘܰܠܬܰܪ̈ܥܝܳܬܰܢ ܠܡܺܐܢ̈ܶܐ ܕܰܫܠܳܡܳܐ܆ ܘܰܙܪܽܘܥ ܒܢܰܦܫ̈ܳܬܰܢ ܚܽܘܒܳܐ ܫܰܪܺܝܪܳܐ ܕܰܠܘܳܬܳܟ ܘܕܰܠܘܳܬ ܚܕ̈ܳܕܶܐ܆ ܘܰܩܒܽܘܥ ܒܰܢ ܪܶܚܡܬܳܟ ܘܰܚܕܳܝܽܘܬܳܐ ܘܰܐܘܝܽܘܬܳܐ ܘܕܶܚܠܬܳܐ܆ ܐܰܝܟܰܢܳܐ ܕܙܰܗܝܳܐܺܝܬ ܢܶܬܶܠ ܫܠܳܡܳܐ ܠܰܚ̈ܕܳܕܶܐ ܘܫܰܦܝܳܐܺܝܬ ܢܩܰܒܶܠ܆ ܟܰܕ ܒܗܳܠܶܝܢ ܐܰܝܠܶܝܢ ܕܡܶܢܰܢ ܡܶܣܬܰܥܪ̈ܳܢ ܢܶܬܬܢܺܝܚ ܨܶܒܝܳܢܳܟ ܐܰܝܟ ܥܶܛܪܳܐ ܓܰܒܝܳܐ ܘܪܺܝܚܳܐ ܗܰܢܺܝܐܳܐ ܘܦܺܝܪܡܳܐ ܡܪܰܥܝܳܢܳܐ܆ ܐܰܢ̱ܬ ܕܰܡܒܰܣܶܡ ܠܟܽܠ ܒܰܫܠܳܡܶܗ܆ ܘܰܡܚܰܕܶܐ ܠܟܽܠ ܒܫܰܝܢܶܗ܆ ܠܳܟ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܘܠܰܐܒܽܘܟ ܘܰܠܪܽܘܚܳܟ ܚܰܝܳܐ ܘܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦܫ̈ܳܬܰܢ܀
ܙܽܘܥܘ̱ ܕܰܪܓܺܝܙܺܝܢ ܘܰܚܒܽܘܨܘ̱ ܟܽܠ ܝܽܘܡ ܥܰܠ ܬܰܪܥܽܘܬܳܐ܆ ܕܡܳܪܝܳܐ ܒܚܽܘܒܶܗ ܐܶܬܪܰܥܺܝ ܠܰܢ ܥܰܠ ܕܰܐܪܓܶܙܢܳܝܗ̱ܝ܆ ܠܳܐ ܐ̱ܢܳܫ ܢܺܐܡܰܪ ܕܰܦܠܳܢ ܐܰܣܟܶܠ ܢܺܐܬܶܐ ܠܐܰܦܰܝ̈܆ ܪܰܒ ܐ̱ܢܰܐ ܗ̱ܘ ܡܶܢܶܗ ܨܰܥܪܰܐ ܗ̱ܘ ܐܺܙܰܠ ܘܶܐܬܪܰܥܶܐ ܠܶܗ܀
ܫܽܘܒܚܳܐ ܠܰܐܒܳܐ ܕܺܐܝܬܰܘܗ̱ܝ ܫܰܝܢܳܐ ܕܟܽܠ ܕܰܪܓܺܝܙܺܝܢ܆ ܘܣܶܓܕܬܳܐ ܠܰܒܪܳܐ ܕܫܰܝܶܢ ܥܳܠܡܳܐ ܒܰܙܩܺܝܦܽܘܬܶܗ܆ ܬܰܘܕܺܝ ܠܪܽܘܚܳܐ ܕܫܳܒܶܩ ܚܰܘ̈ܒܶܐ ܕܟܽܠ ܬܰܝ̈ܳܒܶܐ܆ ܘܰܥܠܰܝܢ ܪ̈ܰܚܡܶܐ ܒܟܽܠ ܥܶܕܳܢܺܝ̈ܢ ܐܰܡܺܝܢ ܘܰܐܡܺܝܢ܀
ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨܠ̈ܰܘܳܬܳܐ܆
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦܫ̈ܳܬܰܢ܀
ܩܶܪ̈ܝܳܢܶܐ
ܐܶܓܰܪܬܳܐ ܩܰܕܡܳܝܬܳܐ ܕܝܽܘܚܰܢܳܢ ܫܠܺܝܼܚܳܐ
(ܕ: ܝܐ ـ ܟܐ 1John 4:11-21)
ܚܰܒܺܝ̈ܒܰܝ܆ ܐܶܢ ܗܳܟܰܢܳܐ ܐܰܚܒܰܢ ܐܰܠܳܗܳܐ܆ ܐܳܦ ܚܢܰܢ ܚܰܝܳܒܺܝܢܰܢ ܚܰܕ ܠܚܰܕ ܠܡܰܚܳܒܽܘ. ܠܰܐܠܳܗܳܐ ܡܶܡܬܽܘܡ ܐ̱ܢܳܫ ܠܳܐ ܚܙܳܝܗ̱ܝ. ܐܶܢ ܕܶܝܢ ܢܰܚܶܒ ܚܰܕ ܠܚܰܕ܆ ܐܰܠܳܗܳܐ ܒܰܢ ܡܩܰܘܶܐ܇ ܘܚܽܘܒܶܗ ܡܶܫܬܰܡܠܶܐ ܒܰܢ. ܘܰܒܗܳܕܶܐ ܝܳܕܥܺܝܢܰܢ܁ ܕܒܶܗ ܡܩܰܘܶܝܢܰܢ܇ ܘܗܽܘ ܡܩܰܘܶܐ ܒܰܢ܆ ܕܡܶܢ ܪܽܘܚܶܗ ܝܰܗ̱ܒ ܠܰܢ. ܘܰܚܢܰܢ ܚܙܰܝܢ ܘܡܰܣܗܕܺܝܢܰܢ܆ ܕܰܐܒܳܐ ܫܰܕܰܪ ܠܰܒܪܶܗ ܦܳܪܽܘܩܳܐ ܠܥܳܠܡܳܐ. ܟܽܠ ܕܡܰܘܕܶܐ ܒܝܶܫܽܘܥ ܕܗܽܘܝܽܘ ܒܪܶܗ ܕܰܐܠܳܗܳܐ܆ ܐܰܠܳܗܳܐ ܒܶܗ ܡܩܰܘܶܐ. ܘܗܽܘ ܡܩܰܘܶܐ ܒܰܐܠܳܗܳܐ. ܘܰܚܢܰܢ ܗܰܝܡܶܢܢ ܘܺܝܕܰܥܢ ܚܽܘܒܳܐ܇ ܕܺܐܝܬ ܠܶܗ ܠܰܐܠܳܗܳܐ ܨܶܐܕ̈ܰܝܢ. ܐܰܠܳܗܳܐ ܓܶܝܪ ܚܽܘܒܰܐ ܗ̱ܘ. ܘܟܽܠ ܕܰܡܩܰܘܶܐ ܒܚܽܘܒܳܐ܆ ܒܰܐܠܳܗܳܐ ܡܩܰܘܶܐ. ܘܰܒܗܳܕܶܐ ܡܶܫܬܰܡܠܶܐ ܚܽܘܒܶܗ ܥܰܡܰܢ܆ ܕܓܰܠܝܽܘܬ ܐܰܦ̈ܶܐ ܬܶܗܘܶܐ ܠܰܢ ܒܝܰܘܡܳܐ ܕܕܺܝܢܳܐ. ܡܶܛܽܠ ܕܰܐܝܟ ܕܰܗܘܳܐ ܗܽܘ܆ ܗܳܟܰܢܳܐ ܐܳܦ ܚܢܰܢ ܐܺܝܬܰܝܢ ܒܗܳܢܳܐ ܥܳܠܡܳܐ. ܕܶܚܠܬܳܐ ܒܚܽܘܒܳܐ ܠܰܝܬ. ܐܶܠܳܐ ܚܽܘܒܳܐ ܡܫܰܡܠܝܳܐ܆ ܠܒܰܪ ܫܳܕܶܐ ܠܳܗ̇ ܠܕܶܚܠܬܳܐ܇ ܡܶܛܽܠ ܕܕܶܚܠܬܳܐ ܒܩܶܢܛܳܐ ܐܺܝܬܶܝܗ̇. ܗܰܘ ܕܶܝܢ ܕܕܳܚܶܠ܆ ܠܳܐ ܡܫܰܡܠܰܝ ܒܚܽܘܒܳܐ. ܚܢܰܢ ܗܳܟܺܝܠ ܢܰܚܶܒ ܠܰܐܠܳܗܳܐ܆ ܡܶܛܽܠ ܕܗܽܘ ܩܰܕܡܳܝܰܬ ܐܰܚܒܰܢ. ܐܶܢ ܕܶܝܢ ܐ̱ܢܳܫ ܢܺܐܡܰܪ ܕܡܰܚܶܒ ܐ̱ܢܳܐ ܠܰܐܠܳܗܳܐ܇ ܘܠܰܐܚܽܘܗ̱ܝ ܣܳܢܶܐ܆ ܕܰܓܳܠܰܐ ܗ̱ܘ. ܗܰܘ ܓܶܝܪ ܕܠܰܐܚܽܘܗ̱ܝ ܕܡܶܬܚܙܶܐ ܠܳܐ ܡܰܚܶܒ܆ ܠܰܐܠܳܗܳܐ ܗܰܘ ܕܠܳܐ ܡܶܬܚܙܶܐ܁ ܐܰܝܟܰܢܳܐ ܡܶܫܟܰܚ ܕܢܰܚܶܒ؟ ܘܗܳܢܳܐ ܦܽܘܩܕܳܢܳܐ ܩܰܒܶܠܢ ܡܶܢܶܗ܆ ܕܟܽܠ ܕܡܰܚܶܒ ܠܰܐܠܳܗܳܐ܆ ܢܰܚܶܒ ܐܳܦ ܠܰܐܚܽܘܗ̱ܝ܀
ܐܶܓܰܪܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܩܽܘܪ̈ܺܝܢܬܳܝܶܐ ܩܰܕܡܳܝܬܳܐ
( ܝܓ̄܆ ܕ̄ ـ ܝ 1Corinthians 13:4-10)
ܚܽܘܒܳܐ ܢܰܓܺܝܪܳܐ ܗ݈ܝ ܪܽܘܚܶܗ܂ ܘܒܰܣܺܝܡ. ܚܽܘܒܳܐ ܠܳܐ ܚܳܣܶܡ. ܚܽܘܒܳܐ ܠܳܐ ܡܶܫܬܓܶܫ܂ ܘܠܳܐ ܡܶܬܚܬܰܪ. ܘܠܳܐ ܣܳܥܰܪ ܕܒܶܗܬܬܳܐ܂ ܘܠܳܐ ܒܳܥܶܐ ܕܺܝܠܶܗ. ܘܠܳܐ ܡܶܬܬܦܺܝܪ. ܘܠܳܐ ܡܶܬܪܰܥܶܐ ܕܒܺܝܫ. ܠܳܐ ܚܳܕܶܐ ܒܥܰܘܠܳܐ܆ ܐܶܠܳܐ ܚܳܕܶܐ ܒܩܽܘܫܬܳܐ. ܟܽܠ ܡܶܕܶܡ ܡܣܰܝܒܰܪ. ܟܽܠܡܶܕܶܡ ܡܗܰܝܡܶܢ. ܟܽܠ ܡܣܰܒܰܪ. ܟܽܠ ܣܳܒܶܠ. ܚܽܘܒܳܐ ܡܶܡܬܽܘܡ ܠܳܐ ܢܳܦܶܠ. ܢܒܺܝܰܘ̈ܳܬܳܐ ܓܶܝܪ ܢܶܬܒܰܛ̈ܠܳܢ. ܘܠܶܫܳܢ̈ܶܐ ܢܶܫܬܰܬܩܽܘܢ. ܘܺܝܕܰܥܬܳܐ ܬܶܬܒܰܛܰܠ. ܩܰܠܺܝܠ ܗ݈ܘܽ ܓܶܝܪ ܡܶܢ ܣܰܓܺܝ ܝܳܕܥܺܝܢܰܢ܂ ܘܩܰܠܺܝܠ ܡܶܢ ܣܰܓܺܝ ܡܶܬܢܰܒܶܝܢܰܢ. ܐܶܡܰܬܝ ܕܶܝܢ ܕܬܺܐܬܶܐ ܓܡܺܝܪܽܘܬܳܐ܆ ܗܳܝܕܶܝܢ ܢܶܬܒܰܛܰܠ ܗܰܘ ܡܶܕܶܡ ܕܩܰܠܺܝܠ ܗ݈ܘܳܐ܀
ܦܶܬܓܳܡܳܐ܆ ܛܽܘܒܰܘܗ̱ܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ. ܘܶܐܬܟܰܣܺܝܘ ܠܶܗ ܚܛܳܗܰܘ̈ܗ̱ܝ ܗ̄.
(ܡܙܡ̄. ܠܒ: ܐ. 1-32)
ܐܶܘܰܢܓܶܠܝܽܘܢ ܕܡܰܬܰܝ
(ܝܚ: ܝܚ ـ ܠܗ. Mat. 18: 18-35)
ܘܰܐܡܺܝܢ ܐܳܡܰܪ ܐ݈ܢܳܐ ܠܟܽܘܢ܆ ܕܟܽܠ ܡܳܐ ܕܬܶܐܣܪܽܘܢ ܒܰܐܪܥܳܐ܆ ܢܶܗܘܶܐ ܐܰܣܺܝܪ ܒܰܫܡܰܝܳܐ. ܘܡܶܕܶܡ ܕܬܶܫܪܽܘܢ ܒܰܐܪܥܳܐ܆ ܢܶܗܘܶܐ ܫܪܶܐ ܒܰܫܡܰܝܳܐ܀ ܬܽܘܒ ܐܳܡܰܪ ܐ̱ܢܳܐ ܠܟܽܘܢ܁ ܕܶܐܢ ܬܪܶܝܢ ܡܶܢܟܽܘܢ ܢܶܫܬܘܽܘܢ ܒܰܐܪܥܳܐ܁ ܥܰܠ ܟܽܠ ܨܒܽܘ ܕܢܶܫܶܐܠܽܘܢ܆ ܢܶܗܘܶܐ ܠܗܽܘܢ ܡܶܢ ܠܘܳܬ ܐܳܒܝ ܕܒܰܫܡܰܝܳܐ. ܐܰܝܟܳܐ ܓܶܝܪ ܕܰܬܪܶܝܢ ܐܰܘ ܬܠܳܬܳܐ ܟܢܺܝܫܺܝܢ ܒܫܶܡܝ܆ ܬܰܡܳܢ ܐ̱ܢܳܐ ܒܰܝܢܳܬܗܽܘܢ܀ ܗܳܝܕܶܝܢ ܩܪܶܒ ܠܘܳܬܶܗ ܟܺܐܦܳܐ܂ ܘܶܐܡܰܪ: ܡܳܪܝ܆ ܟܡܳܐ ܙܰܒܢܺܝ̈ܢ܂ ܐܶܢ ܢܰܣܟܶܠ ܒܺܝ ܐܳܚܝ܂ ܐܶܫܒܽܘܩ ܠܶܗ܆ ܥܕܰܡܳܐ ܠܰܫܒܰܥ ܙܰܒܢܺܝ̈ܢ܇ ܐܳܡܰܪ ܠܶܗ ܝܶܫܽܘܥ: ܠܳܐ ܐܳܡܰܪ ܐ݈ܢܳܐ ܠܳܟ ܥܕܰܡܳܐ ܠܰܫܒܰܥ܁ ܐܶܠܳܐ ܥܕܰܡܳܐ ܠܫܰܒܥܺܝܢ ܙܰܒܢܺܝ̈ܢ ܫܒܰܥ ܫܒܰܥ܀
ܡܶܛܽܠ ܗܳܢܳܐ ܐܶܬܕܰܡܝܰܬ ܡܰܠܟܽܘܬܳܐ ܕܰܫܡܰܝܳܐ܆ ܠܓܰܒܪܳܐ ܡܰܠܟܳܐ܂ ܕܰܨܒܳܐ ܕܢܶܣܰܒ ܚܽܘܫܒܳܢܳܐ ܡܶܢ ܥܰܒܕܰܘ̈ܗ݈ܝ. ܘܟܰܕ ܫܰܪܺܝ ܠܡܶܣܰܒ܆ ܩܰܪܶܒܘ ܠܶܗ ܚܰܕ ܕܚܰܝܳܒ ܪ̈ܶܒܽܘ ܟܰܟܪ̈ܺܝܢ. ܘܟܰܕ ܠܰܝܬ ܠܶܗ ܠܡܶܦܪܰܥ܆ ܦܩܰܕ ܡܳܪܶܗ ܕܢܶܙܕܰܒܰܢ܁ ܗܽܘ ܘܰܐܢ݈ܬܬܶܗ ܘܰܒܢܰܘ̈ܗ݈ܝ܆ ܘܟܽܠ ܡܶܕܶܡ ܕܺܐܝܬ ܠܶܗ܂ ܘܢܶܦܪܽܘܥ. ܘܰܢܦܰܠ ܗܰܘ ܥܰܒܕܳܐ܁ ܣܓܶܕ ܠܶܗ܂ ܘܶܐܡܰܪ: ܡܳܪܝ܁ ܐܰܓܰܪ ܥܠܰܝ ܪܽܘܚܳܐ܆ ܘܟܽܠ ܡܶܕܶܡ ܦܳܪܰܥ ܐ݈ܢܳܐ ܠܳܟ. ܘܶܐܬܪܰܚܰܡ ܡܳܪܶܗ ܕܥܰܒܕܳܐ ܗܰܘ܂ ܘܰܫܪܳܝܗ݈ܝ. ܘܚܰܘܒܬܶܗ ܫܒܰܩ ܠܶܗ. ܢܦܰܩ ܕܶܝܢ ܥܰܒܕܳܐ ܗܰܘ܆ ܘܶܐܫܟܰܚ ܠܚܰܕ ܡܶܢ ܟܢܰܘ̈ܳܬܶܗ ܕܚܰܝܳܒ ܗ݈ܘܳܐ ܠܶܗ܁ ܕܺܝܢܳܪ̈ܶܐ ܡܳܐܐ. ܘܰܐܚܕܶܗ܁ ܘܚܳܢܶܩ ܗ݈ܘܳܐ ܠܶܗ܂ ܘܶܐܡܰܪ ܠܶܗ: ܗܰܒ ܠܺܝ ܡܶܕܶܡ ܕܚܰܝܳܒ ܐܰܢ݈ܬ ܠܺܝ. ܘܰܢܦܰܠ ܗܰܘ ܟܢܳܬܶܗ ܥܰܠ ܪ̈ܶܓܠܰܘܗ݈ܝ܁ ܒܥܳܐ ܡܶܢܶܗ܂ ܘܶܐܡܰܪ ܠܶܗ: ܐܰܓܰܪ ܥܠܰܝ ܪܽܘܚܳܐ܂ ܘܦܳܪܰܥ ܐ݈ܢܳܐ ܠܳܟ. ܗܽܘ ܕܶܝܢ ܠܳܐ ܨܒܳܐ. ܐܶܠܳܐ ܐܶܙܰܠ ܐܰܪܡܝܶܗ ܒܶܝܬ ܐܰܣܺܝܪ̈ܶܐ܆ ܥܕܰܡܳܐ ܕܢܶܬܶܠ ܠܶܗ ܡܳܐ ܕܚܰܝܳܒ ܠܶܗ. ܟܰܕ ܚܙܰܘ ܕܶܝܢ ܟܢܰܘ̈ܳܬܗܽܘܢ ܡܶܕܶܡ ܕܰܗܘܳܐ܆ ܟܶܪܝܰܬ ܠܗܽܘܢ܂ ܛܳܒ. ܘܶܐܬܰܘ܂ ܐܰܘܕܰܥܘ ܠܡܳܪܗܽܘܢ ܟܽܠ ܕܰܗܘܳܐ. ܗܳܝܕܶܝܢ ܩܪܳܝܗ݈ܝ ܡܳܪܶܗ܂ ܘܶܐܡܰܪ ܠܶܗ: ܥܰܒܕܳܐ ܒܺܝܫܳܐ܅ ܗܳܝ ܟܽܠܳܗ̇ ܚܰܘܒܬܳܐ ܫܶܒܩܶܬ ܠܳܟ܁ ܕܰܒܥܰܝܬ ܡܶܢܝ. ܠܳܐ ܘܳܠܶܐ ܗ݈ܘܳܐ ܠܳܟ ܐܳܦ ܐܰܢ݈ܬ ܕܰܬܚܽܘܢ ܠܰܟܢܳܬܳܟ܇ ܐܰܝܟܰܢܳܐ ܕܶܐܢܳܐ ܚܳܢܬܳܟ. ܘܰܪܓܶܙ ܡܳܪܶܗ. ܘܰܐܫܠܡܶܗ ܠܰܡܢܰܓ̈ܕܳܢܶܐ܆ ܥܕܰܡܳܐ ܕܢܶܦܪܽܘܥ ܟܽܠ ܡܶܕܶܡ ܕܚܰܝܳܒ ܠܶܗ. ܗܳܟܰܢܳܐ ܢܶܥܒܶܕ ܠܟܽܘܢ ܐܳܒܝ ܕܒܰܫܡܰܝܳܐ܇ ܐܶܠܳܐ ܬܶܫܒܩܽܘܢ ܐ݈ܢܳܫ ܠܰܐܚܽܘܗ݈ܝ ܡܶܢ ܠܶܒܟܽܘܢ ܣܰܟܠܽܘܬܶܗ܀
ܫܰܝܢܳܐ ܘܰܫܠܳܡܳܐ ܠܟܽܠܟܽܘܢ܀
ܩܠܐ: ܒܩ̄ ܒܬܰܪܥܳܟ ܡܳܪܰܢ
ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܆ ܘܡܶܢ ܒܶܝܬ ܓܰܙܳܟ ܪ̈ܰܚܡܶܐ ܫܳܐܶܠ ܐ̱ܢܳܐ܆ ܚܰܛܳܝܳܐ ܐ̱ܢܳܐ ܕܰܫܢܰܝ̈ܳܐ ܣܛܺܝܬ ܡܶܢ ܐܽܘܪܚܳܟ܆ ܗܰܒܠܺܝ ܕܰܐܘܕܶܐ ܒܰܚܛܳܗ̈ܰܝ ܘܶܐܥܒܰܪ ܡܶܢܗܽܘ̇ܢ܆ ܘܺܐܚܶܐ ܒܛܰܝܒܽܘܬܳܟ܀
ܫܽܘܒܚܳܐ
ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܗܘܺܝ ܠܰܢ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ܆ ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ܆ ܕܡܰܩܪܶܒ ܥܰܡܰܢ܆ ܒܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ ܡܳܐ ܕܡܶܬܦܰܪܫܺܝܢ. ܛܳܒ̈ܶܐ ܡܶܢ ܒܺܝ̈ܫܶܐ܀
ܡܶܢ ܥܳܠܰܡ
ܢܶܗܘܶܐ ܩܳܠܳܐ ܕܰܨܠܽܘܬܰܢ܆ ܩܠܺܝܕܳܐ ܕܦܳܬܰܚ ܠܬܰܪܥܶܗ ܕܰܫܡܰܝܳܐ܆ ܘܢܺܐܡܪܽܘ̇ܢ ܪ̈ܰܒܰܝ ܡܰܠܐܰܟ̈ܶܐ ܡܶܢ ܣܶܕܪ̈ܰܝܗܽܘ̇ܢ܆ ܟܡܳܐ ܒܰܣܺܝܡ ܩܳܠ ܥܰܦܪ̈ܳܢܶܐ܆ ܡܳܪܝܳܐ ܡܦܰܢܶܐ ܒܰܥܓܰܠ ܫ̈ܶܐܠܳܬܗܽܘ̇ܢ܀
ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆
ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦܫ̈ܳܬܰܢ܀
ܫܠܶܡܘ̱ ܥܶܕܳܢܰܝ̈ ܟܰܕ ܦܳܠܰܚ ܐ̱ܢܳܐ ܠܰܣܪܺܝܩܽܘܬܳܐ܆ ܫܽܘܠܳܡ ܙܰܒ̈ܢܶܐ ܕܚܰܝ̈ܰܝ ܩܰܒܶܠ ܘܶܐܗܘܶܐ ܕܺܝܠܳܟ܆ ܡܰܠܟܳܐ ܕܛܽܘܥܝܰܝ ܐܰܡܛܰܪ ܓܶܐܪ̈ܰܘܗ̱ܝ ܠܰܡܡܳܬܽܘܬܰܢܝ̱܆ ܐܰܢ̱ܬ ܪܰܒ ܚܰܝܠܳܐ ܛܽܘܫ ܒܺܝ ܣܰܡܶܟ ܘܶܐܬܰܐܣܶܐ ܒܶܗ܀
ܫܽܘܒܚܳܐ ܠܰܐܒܳܐ ܕܺܐܝܬܰܘܗ̱ܝ ܫܰܝܢܳܐ ܕܟܽܠ ܕܰܪܓܺܝܙܺܝܢ܆ ܘܣܶܓܕܬܳܐ ܠܰܒܪܳܐ ܕܫܰܝܶܢ ܥܳܠܡܳܐ ܒܰܙܩܺܝܦܽܘܬܶܗ܆ ܬܰܘܕܺܝ ܠܪܽܘܚܳܐ ܕܫܳܒܶܩ ܚܰܘ̈ܒܶܐ ܕܟܽܠ ܬܰܝ̈ܳܒܶܐ܆ ܘܰܥܠܰܝܢ ܪ̈ܰܚܡܶܐ ܒܟܽܠ ܥܶܕܳܢܺܝ̈ܢ ܐܰܡܺܝܢ ܘܰܐܡܺܝܢ܀
ܥܢܺܝܢ ܐܰܠܳܗܳܐ ܥܢܺܝܢ ܐܰܠܳܗܳܐ ܘܪܰܚܶܡܥܠܰܝܢ܀
ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀
ܗܳܝܕܶܝܢ ܐܳܡܪܺܝܢ:
ܡܳܪܰܢ ܝܶܫܽܘܥ ܡܫܺܝܚܳܐ܆ ܬܰܪܥܳܐ ܕܪ̈ܰܚܡܰܝܟ ܘܫܰܪܟܳܐ܀
ܩܰܕܺܝܫܰܬ ܐܰܠܳܗܳܐ܀ ܐܰܒܽܘ̇ܢ ܕܒܰܫܡܰܝܳܐ܀
ܬܽܘܒ ܟܳܗܢܳܐ ܢܰܟܪܶܙ ܥܰܠ ܚܽܘܒܳܐ ܘܫܽܘܒܩܳܢܳܐ. ܘܒܳܬܰܪ ܟܳܪܽܘܙܽܘܬܳܐ ܩܳܥܶܕ ܪ̈ܺܝܫܟܳܗܢܶܐ ܐܰܘ̇ ܟܳܗܢܳܐ ܘܣܳܐܶܡ ܐܰܦܰܘ̈ܗ̱ܝ ܥܰܠ ܐܰܪܥܳܐ ܩܕܳܡ ܩܠܺܝܪܳܘܣ ܘܥܰܡܳܐ ܘܳܐܡܰܪ:
ܫܒܽܘܩܘ̱ ܠܺܝ ܐܰܚܰܝ̈ ܘܚܰܒܺܝ̈ܒܰܝ ܡܶܛܽܠ ܡܫܺܝܚܳܐ. ܚܛܺܝܬ ܠܟܽܘ̇ܢ܀
ܐܶܢܳܐ ܒܚܽܘܒܳܐ ܘܰܐܘܝܽܘܬܳܐ ܪܽܘܚܳܢܳܝܬܳܐ ܘܚܽܘܒܳܐ ܐܰܒܳܗܳܝܳܐ ܘܰܐܝܟ ܪܳܥܝܳܐ ܥܺܝܪܳܐ ܡܦܰܩܶܕ ܐ̱ܢܳܐ ܠܟܽܠܟܽܘ̇ܢ ܘܣܳܐܶܡ ܐ̱ܢܳܐ ܐܰܦܰܝ̈ ܥܰܠ ܐܰܪܥܳܐ ܩܕܳܡܰܝܟܽܘ̇ܢ܀
ܩܠܺܝܪܳܘܣ ܘܥܰܡܳܐ ܟܽܠܶܗ ܒܳܪܟܺܝܢ ܩܕܳܡܰܘܗ̱ܝ ܟܰܕ ܥܳܢܶܝܢ܀
ܒܰܪܶܟܡܳܪܝ̱ ܥܰܠ ܫܽܘܒܩܳܢܳܐ܀
ܬܪܰܝܳܢܳܐܺܝܬ
ܡܶܬܟܰܫܰܦ ܐ̱ܢܳܐ ܘܒܳܥܶܐ ܐ̱ܢܳܐ ܡܶܢ ܚܽܘܒܟܽܘ̇ܢ ܫܰܪܺܝܪܳܐ. ܬܰܘ ܐܰܚܰܝ̈ ܘܚܰܒܺܝ̈ܒܰܝ ܢܶܬܪܰܥܶܐ ܥܰܡ ܚܕ̈ܳܕܶܐ ܕܢܶܬܪܰܥܶܐ ܠܰܢ ܐܰܠܳܗܳܐ܆
ܘܒܳܪܶܟ ܘܳܐܡܰܪ:
ܠܺܐܝܩܳܪܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܣܳܐܶܡ ܐ̱ܢܳܐ ܐܰܦܰܝ̈ ܥܰܠ ܐܰܪܥܳܐ܆
ܥܳܢܶܝܢ ܘܒܳܪܟܺܝܢ:
ܒܰܪܶܟܡܳܪܝ̱ ܥܰܠ ܫܽܘܒܩܳܢܳܐ܀
ܬܠܺܝܬܳܐܺܝܬ
ܩܕܳܡ ܟܽܠܟܽܘ̇ܢ ܒܠܶܒܳܐ ܫܚܺܝܩܳܐ ܘܰܒܬܺܐܪܬܳܐ ܡܫܰܡܠܰܝܬܳܐ ܡܶܬܟܰܫܰܦ ܐ̱ܢܳܐ ܠܚܽܘܒܟܽܘ̇ܢ܆ ܘܩܳܥܶܐ ܐ̱ܢܳܐ ܒܩܳܠܳܐ ܪܳܡܳܐ ܠܘܳܬܟܽܘ̇ܢ܆ ܬܰܘ ܐܰܚ̈ܰܝ ܘܚܰܒܺܝ̈ܒܰܝ ܢܶܬܪܰܥܶܐ ܠܰܚܕ̈ܳܕܶܐ܆ ܘܟܽܠ ܚܰܕ ܡܶܢܰܢ ܢܶܫܒܽܘܩ ܠܰܐܚܰܘ̈ܗ̱ܝ ܒܽܘܨܳܪ̈ܶܐ ܘܣܰܟܠܘ̈ܳܬܳܐ ܕܰܣܥܰܪܢܰܢ ܠܰܚܕ̈ܳܕܶܐ܆ ܕܰܐܠܳܗܳܐ ܢܶܬܪܰܥܶܐ ܥܰܠ ܟܽܠܰܢ ܘܢܶܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܐܰܝܟ ܕܶܐܡܰܪ: ܐܶܢ ܬܶܫܒܩܽܘ̇ܢ ܚܰܘ̈ܒܶܐ ܘܦܰܘܕ̈ܶܐ ܠܰܚܕ̈ܳܕܶܐ܆ ܢܶܫܬܒܶܩ ܠܟܽܘ̇ܢ܀
ܒܳܪܶܟ ܘܳܐܡܰܪ:
ܡܳܪܝܳܐ ܐܰܠܳܗܳܐ ܢܶܗܘܶܐ ܫܳܒܽܘܩܳܐ ܘܰܡܚܰܣܝܳܢܳܐ ܠܰܚܛܳܗܰܝ̈ܢ ܘܰܚܛܳܗܰܝ̈ܟܽܘ̇ܢ܀
ܥܳܢܶܝܢ ܘܒܳܪܟܺܝܢ:
ܒܰܪܶܟܡܳܪܝ̱ ܥܰܠ ܫܽܘܒܩܳܢܳܐ܀
ܬܽܘܒ ܟܳܗܢܳܐ ܡܨܰܠܶܐ ܥܰܠ ܟܽܠܶܗ ܥܰܡܳܐ ܘܳܐܡܰܪ:
ܒܪܺܝܟܳܐ ܢܶܗܘܶܐ ܡܰܥܠܳܐ ܕܨܰܘܡܳܐ ܗܳܢܳܐ ܩܰܕܺܝܫܳܐ܆ ܘܰܒܪܺܝܟܳܐ ܫܽܘܡܠܳܝܶܗ ܘܰܢܣܰܝܰܥ ܘܰܢܥܰܕܰܪ ܠܟܽܠܟܽܘ̇ܢ ܥܰܠ ܫܽܘܡܠܳܝܶܗ ܐܰܝܟ ܨܶܒܝܳܢܶܗ ܕܰܐܠܳܗܳܐ ܘܰܢܬܰܒܰܪ ܡܶܢ ܩܕܳܡܰܝܟܽܘ̇ܢ ܦܰܚܳܐ ܕܰܒܥܶܠܕ̈ܒܳܒܶܐ ܟܣܰܝ̈ܳܐ ܘܰܓܠܰܝ̈ܳܐ ܐܰܘܟܺܝܬ ܕܣܳܛܳܢܳܐ ܒܥܶܠܕܒܳܒܳܐ ܕܰܟܪ̈ܺܝܣܛܝܳܢܶܐ ܡܗܰܝܡ̈ܢܶܐ. ܘܰܢܦܰܨܶܐ ܠܟܽܘ̇ܢ ܡܶܢ ܢܶܣܝܽܘ̈ܢܰܘܗ̱ܝ ܐܰܟܡܳܐ ܕܫܰܦܠܶܗ ܡܳܪܰܢ ܝܶܫܽܘܥ ܒܫܽܘܠܳܡ ܨܰܘܡܶܗ ܘܶܐܡܰܪ ܠܶܗ: ܕܙܶܠ ܠܳܟ ܣܳܛܳܢܳܐ ܠܒܶܣܬܰܪܝ̱܆ ܒܰܨܠܽܘܬ ܝܳܠܕܰܬ ܐܰܠܳܗܳܐ ܡܰܪܝܰܡ ܘܰܕܟܽܠܗܽܘܢ ܩܰܕܺܝ̈ܫܶܐ. ܘܰܒܚܰܝܠܶܗ ܕܰܨܠܺܝܒܳܐ ܢܢܰܛܰܪ ܘܰܢܥܰܕܰܪ ܠܟܽܘ̇ܢ. ܐܰܡܺܝܢ܀
ܒܳܬܰܪܟܶܢ ܢܺܐܡܪܽܘ̇ܢ:
ܩܳܢܽܘܢܳܐ ܕܗܰܝܡܳܢܽܘܬܳܐ
ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.
ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܝܺܬܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟܡܳܪܝ܀
ܘܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܘܰܕܩܰܕܺܝ̈ܫܶܐ. ܘܟܶܢ ܡܚܰܬܡܺܝܢ ܨܠܽܘܬܳܐ܀
ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ
ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ ܗ̄ܘܗ̄ ܘܡܰܠܟܬܳܐ ܡܶܢ ܝܰܡܺܝܢܳܟ܀
ܘܰܛܥܳܝ ܥܰܡܶܟܝ̱ ܘܒܶܝܬ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟܝ̱܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܩܰܪܶܒܝ̱ ܒܳܥܽܘܬܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬܰܢ܇ ܘܰܨܠܽܘܬܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬܰܢ܀
ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬܽܘܠܬܳܐ ܡܰܪܝܰܡ ܝܳܠܕܰܬ ܐܰܠܳܗܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀
ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܝܳܠܕܰܬ ܐܰܠܳܗܳܐ
ܗܰܘ ܪܺܝܫ ܡܰܠܰܐܟ̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟܝ̱ ܘܡܶܢܶܟܝ̱ ܕܳܢܰܚ܀
ܫܽܘܒܚܳܐ: ܐܶܠܦܳܐ ܗܘܳܬ ܡܰܪܝܰܡ܇ ܛܶܥܢܰܬ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀
ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ
ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀
ܢܰܦܪܥܽܘܢ ܬܽܘܒ ܢܶܬܪܰܒܽܘܢ ܒܣܰܝܒܽܘܬܳܐ ܗ̄ܘܗ̄ ܫܰܡܺܝ̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟܪܳܢܳܟ܇ ܢܶܬܥܰܕܪܽܘܢ ܒܰܨܠܰܘ̈ܳܬܳܟ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀
ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀
ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟܪܳܢܳܟ܇ ܢܶܬܥܰܕܪܽܘܢ ܒܰܨܠܰܘ̈ܳܬܳܟ܀
ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ
ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀
ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀
ܘܒܳܬܰܪܟܶܢ ܟܳܗ̈ܢܶܐ ܘܰܡܫ̈ܡܫܳܢܶܐ ܘܟܽܠܶܗ ܥܰܡܳܐ ܕܶܐܬܛܰܝܰܒܘ̱ ܒܥܺܕܬܳܐ ܩܰܕܺܝܫܬܳܐ ܢܶܬܠܽܘ̇ܢ ܫܠܳܡܳܐ ܠܰܚܕ̈ܳܕܶܐ ܡܶܢ ܠܶܒܳܐ ܐܰܝܟ ܐܰܚ̈ܶܐ ܪ̈ܽܘܚܳܢܳܝܶܐ ܘܢܶܒܥܽܘ̇ܢ ܫܽܘܒܩܳܢܳܐ ܡܶܢ ܚܕ̈ܳܕܶܐ܆ ܡܶܢ ܓܰܘ ܠܶܒܳܐ ܘܠܳܐ ܡܶܢ ܣܶܦܘ̈ܳܬܳܐ. ܘܟܰܕ ܚܳܙܶܐ ܐܰܠܳܗܳܐ ܕܰܫܒܰܩܢܰܢ ܠܰܚܕ̈ܳܕܶܐ ܒܰܬܪܺܝܨܽܘܬܳܐ ܘܶܐܫܬܰܝܰܢܢܰܢ ܥܰܡ ܚܕ̈ܳܕܶܐ ܘܫܰܡܠܺܝܢܰܢ ܦܽܘܩܕ̈ܳܢܰܘܗ̱ܝ ܩܰܕܺܝ̈ܫܶܐ܆ ܒܰܪ ܫܳܥܬܶܗ ܫܳܒܶܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܐܰܟܡܳܐ ܕܶܐܫܬܰܘܕܺܝ܀
ܫܠܶܡ ܛܶܟܣܳܐ ܕܫܽܘܒܩܳܢܳܐ