ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܳܪܳܐ ܛܳܒܳܐ ܘܰܡܪܰܝܡܳܐ ܕܡ̣ܶܢ ܬܶܫܒܘ̣ܚܬܶܗ ܫܡܰܝܳܐ ܡܰܠܝܳܐ: ܘܡ̣ܶܢ ܛܰܝܒܘ̣ܬܶܗ ܟܽܠܳܗ̇ ܐܰܪܥܳܐ ܡܶܬܒܰܣܡܳܐ: ܠܗܰܘ̇ ܚܰܝܠܳܐ ܕܡܰܪܟܰܒܬܳܐ ܕܰܟܪ̈ܘ̣ܒܶܐ ܛܥܝ̣ܢܳܐ ܠܶܗ ܒܕܶܚܠܳܐ: ܘܥܰܠ ܚܰܝܘ̣ܬܳܐ ܫܝ̣ܛܬܳܐ ܐܶܙ̣ܕܰܝܰܚ ܒܡܘ̣ܟܳܟܳܐ ܘܰܛܥܶܢ̣ܬܶܗ ܒܡܘ̣ܟܳܟܶܗ: ܘܰܒܚܘ̣ܒܶܗ ܥܰܠ ܕܰܨܒ̣ܳܐ ܕܢ̣ܶܦܪܘ̣ܩ ܒܶܪ̈ܝܳܬܳܐ: ܠܗܰܘ̇ ܓܢܝ̣ܙܳܐ ܕܒܰܪܟܘ̣ܗ̱ܝ ܛܠܳܝ̈ܶܐ ܒܫܘ̣̈ܩܰܝ ܨܶܗܝܽܘܢ ܒܓܶܠܝܳܐ: ܟܰܕ ܠܶܓܝ̈ܘ̣ܢܶܐ ܕܢܘ̣ܪܳܐ ܚܕܝ̣ܪ̈ܳܢ ܠܶܗ ܒܟܶܣܝܳܐ: ܠܗܰܘ̇ ܕܥܰܙܝ̣ܙ ܘܰܕܚܝ̣ܠ ܥܰܠ ܬܶܓܡ̈ܶܐ ܕܰܣܪ̈ܳܦܶܐ ܒܪܰܘܡܳܐ: ܘܡܰܟܝ̣ܟ ܘܰܚܠܝ̣ܛ ܒܰܝܢܳܬ ܟܶܢ̈ܫܶܐ ܕܰܐܪ̈ܥܳܢܳܝܶܐ ܒܥܘ̣ܡܩܳܐ: ܟܰܕ ܥܰܠ ܚܰܨܳܐ ܕܥܝ̣ܠܳܐ ܪܟ̣ܶܒ ܗ̱ܘܳܐ ܘܥܳܐܶܠ ܠܐܘ̣ܪܫܠܶܡ ܒܛܰܝܒܘ̣ܬܶܗ: ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܣܳܓ̇ܕܝ̣ܢܰܢ ܘܡܰܘܕܶܝܢܰܢ ܠܳܟ ܡܳܪܳܐ ܕܰܢܒܺܝ̈ܶܐ ܕܰܒܩܢܘ̣ܡܶܗ ܓܡ̣ܰܪ ܡܶܠܰܝ̈ܗܽܘܢ: ܡܫܰܒܚܝ̣ܢܰܢ ܘܰܡܩܰܠܣܝ̣ܢܰܢ ܠܳܟ ܝܺܚܝܕܳܝܶܗ ܕܰܐܒܳܐ ܕܶܐܬ̣ܚܙܝ̣ ܠܬܰܚ̈ܬܳܝܶܐ ܒܪ̈ܰܚܡܰܘܗ̱ܝ: ܝܳܬܶܒ ܥܰܠ ܟܪ̈ܘ̣ܒܶܐ ܕܝ̣ܬܶܒ ܥܰܠ ܒܰܪ ܐܰܬܳܢܳܐ ܘܚܰܕܝ̣ ܠܰܙܟܰܪܝܳܐ ܢܒܺܝܳܐ: ܫܩܝ̣ܠ ܒܰܥ̈ܢܳܢܳܐ ܘܰܪܟܝ̣ܒ ܠܡܰܥܪܒܳܐ ܘܰܟܪܝ̣ܟܝ̣ܢ ܠܶܗ ܥܢܳܢ̈ܶܐ ܘܥܰܪ̈ܦܶܠܶܐ: ܡܶܬܪܰܗܒܝ̣ܢ ܣܪ̈ܳܦܶܐ ܡ̣ܶܢ ܙܝ̣ܘܶܗ: ܝܳܬܶܒ ܥܰܠ ܡܰܪܟܰܒܬܳܐ ܢܘ̣ܪܳܢܳܝܬܳܐ: ܥܰܠ ܚܰܨܳܐ ܕܥܝ̣ܠܳܐ ܫܝ̣ܠܳܐ ܨܒ̣ܳܐ ܕܢ̣ܶܙܕܰܝܰܚ: ܘܰܒܢܰܚ̈ܬܰܝ ܥܰܡ̱̈ܡܶܐ ܐܶܬ̣ܝܰܩܰܪ ܪܟ̥ܘ̣ܒܶܗ ܡܠܶܟ ܡܰܠ̈ܟܝ̣ܢ ܘܡܳܪܳܐ ܕܡܰܠ̈ܟܶܐ: ܕܰܠܡܰܠ̈ܟܰܝ ܨܶܗܝܽܘܢ ܝܰܩ̣ܰܪ ܒܡܰܪܟܰܒܬܳܐ: ܠܶܗ ܙܰܝܚܘ̣ܗ̱ܝ ܥܰܠ ܪܟܘ̣ܒܳܐ ܫܝ̣ܛܳܐ ܟܰܕ ܥܳܐܶܠ ܠܐܘ̣ܪܫܠܶܡ: ܣܳܐܶܡ ܩܘ̣ܕܫܳܐ ܒܦܘ̣ܡܳܐ ܕܰܣܪ̈ܳܦܶܐ ܕܰܨܒ̣ܳܐ ܕܡ̣ܶܢ ܝܰܠ̈ܘ̣ܕܶܐ ܕܢ̣ܶܫܬܰܒܰܚ ܒܠܶܥܙܳܐ ܕܰܫܩ̣ܰܠܘ̱ ܡܶܢܶܗ: ܡܳܪܳܐ ܕܶܐܬ̣ܳܐ ܘܫܰܡ̣ܠܝ̣ ܛܘ̣ܦ̈ܣܶܐ ܕܨܳܪܘ̱ ܠܶܗ ܢܒܺܝܰܘ̈ܗ̱ܝ ܕܰܐܒܘ̣ܗ̱ܝ ܘܰܗ̣ܘܳܐ ܕܶܒܚܳܐ ܘܚܰܣܝ̣ ܠܟܽܠ ܒܫܘ̣ܦܳܥ ܕܡܶܗ ܙܰܟܳܝܳܐ: ܦܳܪܩܳܐ ܪܰܒܳܐ ܕܗܘ̣ ܠܶܗ ܩ̣ܰܪܶܒ ܚܠܳܦܰܝܢ: ܕܶܒܚܳܐ ܠܝܳܠܘ̣ܕܶܗ ܘܶܐܫܟ̣ܰܚ ܠܰܢ ܦܘ̣ܪܩܳܢܳܐ ܕܰܠܥܳܠܰܡ: ܡܶܛܽܠ ܗܳܠܶܝܢ ܟܽܠܗܶܝܢ ܘܰܒܝܰܕ ܟܽܠ ܡܶܕܶܡ ܕܰܣܥ̣ܰܪܬ ܒܰܡܪܰܚܡܳܢܘ̣ܬܳܟ: ܡܕܰܒܪܳܢܳܐܝ̣ܬ ܠܘܳܬ ܥܘ̣ܕܪܳܢܳܐ ܕܓܶܢܣܰܢ ܕܳܘܝܳܐ ܘܚܰܠܳܫܳܐ: ܬܶܫܒ̈ܚܳܬܳܐ ܐܰܡܝ̣̈ܢܳܬܳܐ ܥܰܡ ܥܶܛܪܳܐ ܕܒܶܣ̈ܡܶܐ ܡܩܰܪܒܝ̣ܢܰܢ ܩܕܳܡܰܝܟ: ܟܰܕ ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܰܚܢܳܢܳܟ ܕܬܶܡܪܘ̣ܩ ܘܰܬܚܰܠܶܠ ܡܶܢܰܢ ܠܟܽܠܳܗ̇ ܥܰܬܝ̣ܩܘ̣ܬܳܐ ܘܡܰܪܝ̣ܪܘ̣ܬܳܐ ܕܒܝ̣ܫܳܐ ܘܣܳܥܘ̣ܪܘ̣ܬܳܐ ܕܰܚܛܝ̣ܬܳܐ: ܘܬ̣ܰܫܘܶܐ ܠܟܽܠܰܢ ܕܰܒܚܰܕܘ̣ܬܳܐ ܢ̇ܶܦܘ̣ܩ ܠܐܘ̣ܪܥܳܟ ܒܝܰܘܡܳܐ ܗܳܢܳܐ ܕܚܘ̣ܕܳܬܳܐ ܕܐܘ̣ܫܰܥ̈ܢܰܝܟ ܐܘ̣ܪ̈ܫܠܶܡܳܝܶܐ: ܟܰܕ ܪ̈ܳܘܙܳܢ ܢܰܦ̈ܫܳܬܰܢ ܒܰܦܨܝ̣ܚܘ̣ܬܳܐ ܡܝܰܬܰܪܬܳܐ ܢ̇ܺܐܪܥܳܟ ܘܰܚܠܳܦ ܣܰܘ̈ܟܶܐ ܕܙܰܝ̈ܬܶܐ ܡܰܢ ܕܘ̣ܒܳܪ̈ܶܐ ܕܟܰܝ̈ܳܐ ܘܩܰܕܝ̣̈ܫܶܐ ܢ̇ܩܰܪܶܒ ܠܳܟ: ܘܰܚܠܳܦ ܕܶܩ̈ܠܶܐ ܕܶܝܢ ܒܝ̣ܕܰܥܬܳܐ ܕܗܰܝܡܳܢܘ̣ܬܳܐ ܫܰܪܝ̣ܪܬܳܐ ܕܰܒܠܶܒ̈ܰܘܳܬܳܐ ܕܝ̣ܠܰܢ ܛܥܝ̣ܢܝ̣ܢܰܢ ܡܥܰܠܝܳܐܝ̣ܬ ܒܪܰܘܡܳܐ ܕܬܶܐܘܳܪܺܝܰܐ ܢܶܦ̇ܓܰܥ ܒܳܟ: ܘܰܚܠܳܦ ܢܰܚ̈ܬܶܐ ܡܶܬܝܰܕ̈ܥܳܢܶܐ ܕܶܐܬ̣ܩܰܪܰܒܘ̱ ܠܐܝ̣ܩܳܪܳܟ: ܚܘ̣ܫ̈ܳܒܶܐ ܦܫܝ̣̈ܛܶܐ ܕܰܒܬܶܫ̈ܒܚܳܬܳܐ ܕܪܰܒܘ̣ܬܳܟ ܟܽܠܫܳܥ ܗܳܪܓܝ̣ܢ ܕܢ̇ܶܦܪܘ̣ܣ ܩܕܳܡܰܝܟ: ܟܰܕ ܥܰܡ ܛܠܳܝ̈ܶܐ ܘܫܰܒܪ̈ܶܐ ܫܦܰܝ̈ܳܐ ܕܠܳܐ ܡܘ̣ܡܳܐ ܢ̇ܠܰܓܠܶܓ ܩܘ̣̈ܠܳܣܰܝܟ ܒܐܘ̣ܫܰܥܢ̈ܶܐ ܘܢ̇ܺܐܡܰܪ: ܒܪܝ̣ܟ ܗ̱ܘ̣ ܗܰܘ̇ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܕܢ̣ܶܦܪܘ̣ܩ ܠܰܢ ܡ̣ܶܢ ܫܘ̣ܥܒܳܕܳܐ ܕܰܚܛܝ̣ܬܳܐ ܐܘ̣ܫܰܥܢܳܐ ܒܰܡܪ̈ܰܘܡܶܐ ܘܫܘ̣ܒܚܳܐ ܒܰܫܡܰܝܳܐ: ܘܰܒܝܰܘܡܳܐ ܗܰܘ̇ ܐ̱ܚܪܳܝܳܐ ܕܡܶܐܬܝ̣ܬܳܟ ܕܬܰܪܬܶܝܢ ܡܳܐ ܕܳܐܬܶܐ ܐܰܢ̱ܬ ܒܙܰܘܚܳܐ ܪܰܒܐ ܥܰܠ ܡܰܪܟܰܒܬܳܐ ܢܘ̣ܪܳܢܳܝܬܳܐ ܕܰܟܪ̈ܘ̣ܒܶܐ ܩܰܕܝ̣̈ܫܶܐ ܒܪ̈ܶܒܘܳܬܳܐ ܘܒܰܐܠ̈ܦܶܐ ܕܚܰܝ̈ܠܰܘܳܬܳܐ ܕܬ̣ܶܦܪܘ̣ܥ ܒܡܰܠܟܘ̣ܬܳܟ ܠܟܽܠ ܐ̱ܢܳܫ ܐܰܝܟ ܥܒ̈ܳܕܰܘܗ̱ܝ: ܐܰܫܘܳܐ ܠܰܢ ܚܰܛܳܝ̈ܶܐ ܘܡܶܣ̈ܟܺܢܶܐ ܥܰܒ̈ܕܰܝܟ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܩܰܕܶܡ̣ܘ̱ ܚܙܰܩ̣ܘ̱ ܠܘܳܬܳܟ ܠܪ̈ܰܚܡܶܐ ܡܫܰܝ̈ܢܶܐ ܕܒܰܣܝ̣ܡܘ̣ܬܳܟ: ܘܰܠܦܰܪܶܗܣܺܝܰܐ ܕܠܳܐ ܒܶܗܬܬܳܐ ܩܕܳܡ ܗܳܝ ܒܺܐܡܰܐ ܕܚܝ̣ܠܬܳܐ ܕܟܺܐܢܘ̣ܬܳܟ: ܐܰܝܟܰܢܳܐ ܕܗܳܪܟܳܐ ܘܬܰܡܳܢ ܒܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢ̇ܰܣܶܩ ܠܳܟ ܬܶܫܒ̈ܚܳܬܳܐ ܡܬܘ̣ܡܳܝܳܬܳܐ ܒܩ̈ܳܠܶܐ ܕܬܰܘܕܝ̣ܬܳܐ ܥܰܡ ܩܘ̣ܒܳܠ ܛܰܝܒܘ̣ܬܳܐ: ܘܠܰܐܒܘ̣ܟ ܚܰܢܳܢܳܐ: ܘܰܡܪܰܚܡܳܢܳܐ ܪܰܒܳܐ ܘܰܡܝܰܩܪܳܐ ܕܫܰܠ̣ܚܳܟ ܠܦܘ̣ܪܩܳܢܰܢ ܘܰܠܪܘ̣ܚܳܟ ܚܰܝܳܐ ܘܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀