ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܣܓܝ̣ܕܳܐ ܕܡܶܣܬܓܶܕ ܘܡܶܫܬܰܒܰܚ ܘܡܶܬܪܰܡܪܰܡ ܡ̣ܶܢ ܟܽܠܗܽܘܢ ܒܪ̈ܰܝܳܐ ܘܰܥܒܝ̣̈ܕܶܐ: ܗܳܢܽܘܢ ܕܰܒܪܶܡܙܳܐ ܕܝ̣ܠܶܗ ܛܘ̣ܒܬܳܢܳܐ ܐܶܬ̣ܒܪܝ̣ܘ ܘܶܐܬ̣ܬܰܩܰܢܘ̱ ܠܬܶܫܒܘ̣ܚܬܳܐ ܘܠܺܐܝܩܳܪܳܐ ܕܪܰܒܘ̣ܬܶܗ ܐܰܠܳܗܳܝ̇ܬܳܐ: ܗܳܢܽܘܢ ܕܰܕܠܳܐ ܫܰܠܘܳܐ ܡܥܰܕܥܕܝ̣ܢ ܒܥܺܕܬܳܐ ܕܒܘ̣ܟܪ̈ܶܐ ܕܰܟܬܝ̣ܒܝ̣ܢ ܕܒܰܫܡܰܝܳܐ: ܘܒܰܡܕܝ̣ܢ̱ܬܳܐ ܐܘ̣ܪܫܠܶܡܳܝܬܳܐ ܕܰܠܥܶܠ ܘܰܒܩܰܘ̈ܡܶܐ ܕܩܰܕܝ̣̈ܫܶܐ ܕܒܳܟ ܚܳܕܶܝܢ ܘܠܳܟ ܡܚܰܓܶܝܢ: ܗܰܒܠܰܢ ܕܰܐܟܘܳܬܗܽܘܢ ܢ̇ܚܰܓܶܐ ܘܰܢ̇ܥܰܕܥܶܕ ܒܬܶܫܒ̈ܚܳܬܳܐ ܘܒܘ̣ܪ̈ܟܳܬܳܐ ܘܩܘ̣̈ܠܳܣܶܐ ܕܡܶܬܬܚܝ̣ܒܝ̣ܢ ܠܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܽܘ̣ܒ̈ܚܶܐ ܫܦܰܝ̈ܳܐ ܘܩܘ̣̈ܠܳܣܶܐ ܡܥܰܠܰܝ̈ܳܐ: ܠܗܰܘ̇ ܪܳܡܳܐ ܘܰܡܫܰܒܚܳܐ ܒܰܐܠܳܗܘ̣ܬܶܗ ܕܶܐܬ̣ܬܰܚܬܝ̣ ܘܣܰܥ̣ܪܰܢ ܒܡܘ̣ܟܳܟܶܗ ܘܟ̣ܰܬܰ ܪ ܒܐܝ̣ܬܘ̣ܬܶܗ ܘܶܐܬ̣ܚܙܝ̣ ܠܘܳܬܰܢ ܒܐ̱ܢܳܫܘ̣ܬܶܗ: ܥܝ̣ܪ̈ܶܐ ܙܳܡ̇ܪܝ̣ܢ ܬܶܫܒܘ̣ܚܬܶܗ ܒܪ̈ܰܘܡܶܐ ܡܥܰܠܰܝ̈ܳܐ ܕܡܰܠܟܘ̣ܬܶܗ ܘܫܰܒܪ̈ܶܐ ܘܝܰܠ̈ܘ̣ܕܶܐ ܡܩܰܠܣܝ̣ܢ ܠܪܰܒܘ̣ܬܶܗ ܘܓܝ̣ܓ̈ܠܶܐ ܡܰܠܳـܠܴ̈ܬܳܐ ܟܕܝ̣ܢܝ̣ܢ ܒܡܰܪܟܰܒܬܶܗ: ܘܥܝ̣ܠܳܐ ܫܝ̣ܛܳܐ ܣܦ̣ܰܩ ܠܪܟ̥ܘ̣ܒܶܗ: ܘܰܫܡܰܝܳܐ ܘܰܐܪܥܳܐ ܡܠܶܝܢ ܬܶܫܒܘ̣ܚܬܶܗ: ܘܟܶܢ̈ܫܶܐ ܦܫܝ̣̈ܛܶܐ ܒܣܰܘ̈ܟܶܐ ܕܙܰܝ̈ܬܶܐ ܢܦܰܩ̣ܘ̱ ܠܐܘ̣ܪܥܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܠܳܐ ܡܶܬܡܰܠܠܳܢܳܐ ܝܰܠܕܶܗ ܕܰܐܒܳܐ ܡܬܘ̣ܡܳܝܳܐ: ܗܰܘ̇ ܕܰܠܥܶܠ ܡ̣ܶܢ ܟܽܠ ܐܝ̣ܬܰܘܗ̱ܝ ܒܬܶܫܒܘ̣ܚܬܳܐ ܘܒܰܫܦܝ̣ܥܘ̣ܬܳܐ ܕܪ̈ܰܚܡܰܝܟ ܐܶܬ̣ܰܝܬ ܠܰܒܪܝ̣ܬܳܐ ܕܬ̣ܶܦܪܘ̣ܩ ܠܰܢ ܡ̣ܶܢ ܥܰܒܕܘ̣ܬܳܐ ܕܡܳܪܘ̣ܕܳܐ: ܘܬ̣ܶܥܒܶܕ ܠܰܢ ܒܢܰܝ̈ܳܐ ܪ̈ܰܚܝ̣ܩܰܝ ܡ̣ܶܢ ܛܳܥܝܘ̣ܬܳܐ: ܟܰܕ ܕܝܶܢ ܒܰܫܡܰܝܳܐ ܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܕܚܝ̣ܠܳܐܝ̣ܬ ܡܶܙܕܰܝܰܚ ܐܰܢ̱ܬ: ܘܥܰܠ ܐܰܪܥܳܐ ܡܶܛܽܠ ܦܘ̣ܪܩܳܢܰܢ ܥܰܠ ܥܝ̣ܠܳܐ ܕܠܳܐ ܡܶܠܬܳܐ ܦܰܓܪܳܢܳܐܝ̣ܬ ܐܶܬ̣ܬܢܝ̣ܚܰܬ݀ ܪܰܒܘ̣ܬܳܟ: ܘܰܒܝܰܕ ܗܳܕܶܐ ܠܰܩܪܳܝܬܳܐ ܕܥܰܡ̱̈ܡܶܐ ܠܳܐ ܕܟܰܝ̈ܳܐ ܩܰܕܶܡ̣ܬ ܫܰܘܕܰܥ̣ܬ: ܟܰܕ ܠܛܘ̣̈ܦܣܶܐ ܘܦ̈ܶܠܳܐܬܳܐ ܕܰܥܠܰܝܟ ܡ̣ܶܢ ܡܒܰܕ̈ܩܳܢܶܐ ܘܚܰܙܳܝ̈ܶܐ ܐܰܩܝ̣ܡܬ ܒܰܬܪܝ̣ܨܘ̣ܬܳܐ: ܘܰܒܡܰܥܰܠܬܳܟ ܕܠܐܘ̣ܪܫܠܶܡ ܠܰܢܒܺܝ̈ܰܘܳܬܳܐ ܕܰܢܒܺܝ̈ܶܐ ܕܡ̣ܰܠܶܠܘ̱ ܡ̣ܶܢ ܪܝ̣ܫܝ̣ܬܳܐ ܚܰܬܶܡ̣ܬ: ܗܳܢܽܘܢ ܕܰܐܝܟ ܫܝ̣ܦܘ̣ܪ̈ܶܐ ܐܰܙܥܶܩ̣ܘ̱ ܡܶܛܽܠ ܡܶܐܬܝ̣ܬܳܟ ܦܳܪܘ̣ܩܳܝܬܳܐ: ܟܰܕ ܟܽܠ ܚܰܕ ܡܶܢܗܽܘܢ ܐܰܝܟ ܕܰܒܨܶܒܥܳܐ ܠܳܟ ܡܚܰܘܶܐ ܗ̱ܘܳܐ: ܟܰܕ ܚܰܕ ܡܶܢܗܽܘܢ ܡܰܢ ܕܠܳܐ ܢ̣ܶܥܢܰܕ ܫܰܒܛܳܐ ܡ̣ܶܢ ܝ̣ܗܘ̣ܕܳܐ ܘܰܡܒܰܕܩܳܢܳܐ ܡ̣ܶܢ ܒܶܝܬ ܪ̈ܶܓܠܰܘܗ̱ܝ ܥܕܰܡܳܐ ܕܢ̣ܺܐܬܶܐ ܡܰܢ ܕܕܝ̣ܠܶܗ ܗ̱ܝ̣ ܡܰܠܟܘ̣ܬܳܐ: ܘܠܶܗ ܢ̣ܣܰܟܽܘܢ ܥܰܡ̱̈ܡܶܐ ܘܰܕܢ̣ܶܐܣܘ̣ܪ ܒܰܓܦܶܬܳܐ ܥܝ̣ܠܶܗ: ܘܰܒܫܰܒܘ̣ܩܳܐ ܒܰܪ ܐܰܬܳܢܶܗ ܡܶܬܢܰܒܶܐ ܗ̱ܘܳܐ: ܘܰܐ̱ܚܪܺܢܳܐ ܕܘ̣ܨܝ̱ ܛܳܒ ܘܰܚܕܳܝ̇ ܐܘ̣ܪܫܠܶܡ ܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܡܰܟܝ̣ܟܳܐ ܘܰܪܟܝ̣ܒ ܥܰܠ ܥܝ̣ܠܳܐ ܒܰܪ ܐܰܬܳܢܳܐ ܒܚܰܕܘ̣ܬܳܐ ܘܒܰܕܝܳܨܳܐ ܡܣܰܒܰܪ ܗ̱ܘܳܐ: ܚܰܕ ܡܳܪܝܳܐ ܡܳܪܰܢ ܡܳܐ ܬܡܝ̣ܗ ܫܡܳܟ ܒܟܽܠܳܗ̇ ܐܰܪܥܳܐ ܘܰܕܡ̣ܶܢ ܦܘ̣ܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܰܩܶܢ̣ܬ ܬܶܫܒܘ̣ܚܬܳܟ ܡܙܰܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܡܳܐ ܝܳܐܝ̈ܳܢ ܪ̈ܶܓܠܰܝܗܽܘܢ ܕܰܡܣܰܒܪ̈ܰܝ ܫܠܳܡܳܐ ܘܰܕܡܰܫ̈ܡܥܰܝ ܚܘ̣ܕܳܬܳܐ: ܘܰܕܐܶܬܬܥܝ̣ܪܝ̱ ܐܶܬܬܥܝ̣ܪܝ̱ ܐܘ̣ܪܫܠܶܡ ܡܫܰܒܰܚܬܳܐ: ܕܩܘ̣ܡܝ̱ ܐܰܢܗܰܪܝ̱ ܕܰܡ̣ܛܳܐ ܠܶܗ ܢܘܽܗܪܶܟܝ̱ ܘܰܕܠܶܟܝ̱ ܢ̣ܺܐܬܽܘܢ ܡܰܠ̈ܟܶܐ ܕܺܐܝܩܳܪܳܐ ܒܺܐܝܩܳܪܳܐ ܕܡܰܠܟܳܐ ܕܰܫ̣ܪܳܐ ܒܶܟܝ̱ ܐܝ̣ܬܰܘܗ̱ܝ ܡܳܪܗܶܝܢ ܕܒܶܪ̈ܝܳܬܳܐ: ܕܠܶܗ ܢ̣ܶܣܓܕܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ ܡܰܟܪܶܙ ܗ̱ܘܳܐ: ܚܰܕ ܕܗܳܐ ܡܳܪܝܳܐ ܪܟܝ̣ܒ ܥܰܠ ܥܢܳܢ̈ܶܐ ܩܰܠܝ̣̈ܠܳܬܳܐ ܘܡܶܬܚܙܶܐ ܒܫܘ̣ܒܚܶܗ ܡܰܙܥܶܩ ܗ̱ܘܳܐ: ܘܰܐ̱ܚܪܺܢܳܐ ܕܗܳܐ ܡܳܪܝܳܐ ܘܦܘ̣ܪܩܳܢܶܗ ܥܰܡܶܗ ܐܳ݀ܬܶܐ ܠܒܰܪ̱ܬ ܨܶܗܝܽܘܢ ܡܒܰܕܶܩ ܗ̱ܘܳܐ: ܘܟܰܕ ܠܡܰܥܰܠܬܳܟ ܕܠܐܘ̣ܪܫܠܶܡ ܒܬܶܫܒܘ̣ܚܬܳܐ ܡܫܰܡܠܶܐ ܗ̱ܘܰܝܬ: ܚܰܝ̈ܠܘܳܬܳܐ ܫܡܰܝܳܢ̈ܶܐ ܒܡܘ̣ܟܳܟܳܟ ܡܶܬܕܰܡܪܝ̣ܢ ܗܘܰܘ: ܘܟܰܕ ܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܡܶܫܬܰܒܰܚ ܗ̱ܘܰܝܬ: ܠܙܳܟܘܽܬܳܐ ܕܥܰܠ ܡܰܘܬܳܐ ܘܣܳܛܳܢܳܐ ܡܰܐܪܶܙ ܗ̱ܘܰܝܬ ܘܰܚܠܳܦ ܬܶܫܒܘ̣ܚܬܳܐ ܕܡ̣ܶܢ ܫܰܒܪ̈ܶܐ ܘܰܛܠܳܝ̈ܶܐ ܒܟܺܐܦ̈ܶܐ ܢܶܦ̣ܩܰܬ݀ ܠܐܘ̣ܪܥܳܟ ܟܢܘ̣ܫܬܳܐ ܕܝܘ̣̈ܕܳܝܶܐ: ܐܰܝܟܰܢܳܐ ܕܰܬ̣ܫܰܬܶܩܝ̱ ܠܰܛܠܳܝ̈ܶܐ ܡܰܠ̈ܝ݂ܰܝ݂ ܫܰܦܝܘ̣ܬܳܐ ܕܰܒ̈ܩܳܠܶܐ ܚܰܕ̈ܬܶܐ ܠܳܟ ܡܫܰܒܚܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܕܶܝܢ ܦܳܪܣܝ̣ܢ ܡܳܐܢܰܝ̈ܗܽܘܢ ܩܕܳܡܰܝܟ ܒܕܶܚܠܬܳܐ: ܚܢܰܢ ܥܰܡܗܽܘܢ ܩܳܥܶܝܢܰܢ ܘܳܐܡܪܝ̣ܢܰܢ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܐܘ̣ܫܰܥܢܳܐ ܒܰܡܪ̈ܰܘܡܶܐ ܥܶܠܳܝ̈ܶܐ ܒܪܝ̣ܟ ܗ̱ܘܳܐ ܕܶܐܬ̣ܳܐ ܠܘܳܬܰܢ ܘܫܰܡ̣ܠܝ̣ ܐ̱ܪ̈ܳܙܶܐ ܕܰܢܒܺܝ̈ܰܘܳܬܳܐ: ܘܟܰܕ ܒ̈ܩܳܠܶܐ ܚܰܕ̈ܬܶܐ ܡܥܰܕܥܕܝ̣ܢܰܢ ܠܐ̱ܪܳܙܳܐ ܕܡܶܐܬܝ̣ܬܳܟ ܦܳܪܘ̣ܩܳܝܬܳܐ ܡܶܬܟܰܫܦܝ̣ܢܰܢ ܠܳܟ: ܩܰܒܶܠ ܠܒܳܥ̈ܘܳܬܰܢ ܘܰܨ̈ܠܰܘܳܬܰܢ: ܘܰܐܥܒܰܪ ܡܶܢܰܢ ܠܙܰܒ̈ܢܶܐ ܥܰܣ̈ܩܶܐ ܕܒܝ̣̈ܫܳܬܳܐ ܘܠܰܚܣܳܡܳܐ ܘܰܐܟܬܳܐ ܘܰܒܥܶܠܕܒܳܒܘ̣ܬܳܐ: ܘܦܰܨܳܐ ܠܰܢ ܡ̣ܶܢ ܚܰܪܒܳܐ ܘܫܶܒܝܳܐ ܘܡܰܘܬܳܢܳܐ ܘܰܡܠܝ̣ ܠܠܶܒܰܘ̈ܳܬܰܢ ܓܰܙܳܐ ܕܡܰܘܗ̈ܒܳܬܳܟ ܐܰܝܟܰܢܳܐ ܕܰܢ̇ܗܰܕܪܳܟ ܒܩ̈ܳܠܶܐ ܫܒܝ̣̈ܚܶܐ ܕܬܰܘ̈ܕܝܳܬܳܐ ܘܗܰܒ ܡܳܪܝܳܐ ܠܡܰܠ̈ܟܶܐ ܘܫܰܠܝ̣̈ܛܳܢܶܐ ܡܫܰܝܢܘ̣ܬܳܐ: ܠܰܡܕܰܒܪ̈ܳܢܶܐ ܘܕܰܝܳܢ̈ܶܐ ܒܗܝ̣ܠܘ̣ܬܳܐ: ܠܡܶܣ̈ܟܺܢܶܐ ܘܰܨܪ̈ܝ̣ܟܶܐ ܡܡܰܠܝܳܢܳܐ ܕܚܰܣܝ̣ܪܘ̣ܬܗܽܘܢ: ܠܝܰܬܡ̈ܶܐ ܘܠܰܐܪ̈ܡܠܳܬܳܐ ܩܳܝܘ̣ܡܳܐ ܘܰܡܦܰܪܢܣܳܢܳܐ: ܠܩܰܪ̈ܝ̣ܒܶܐ ܡܢܰܛܪܳܢܳܐ: ܠܪ̈ܰܚܝ̣ܩܶܐ ܡܦܰܢܝܳܢܳܐ: ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܘܠܰܐܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ ܚܘ̣ܪܳܪܳܐ ܘܰܓܗܳܝܬܳܐ: ܠܰܐܣܝ̣ܪ̈ܶܐ ܫܪܳܝܳܐ ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܢܝܳܚܬܳܐ ܘܒܘ̣ܣܳܡܳܐ ܕܰܒܡܰܠܟܘ̣ܬܳܐ ܕܰܫܡܰܝܳܐ: ܐܰܝܟܰܢܳܐ ܕܗܳܪܟܳܐ ܘܬܰܡܳܢ ܢ̇ܫܰܒܰܚ ܘܢ̇ܰܘܕܶܐ ܠܰܐܒܳܐ ܘܠܰܒܪܳܐ ܘܰܠܪܘ̣ܚܳܐ ܩܰܕܝ̣ܫܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܝܳܐ ܐܰܠܳܗܳܐ ܗܰܘ̇ ܗܕܝ̣ܪܳܐ ܘܰܡܥܰܠܝܳܐ ܒܰܐܠܳܗܘ̣ܬܶܗ: ܗܰܘ̇ ܕܡ̣ܶܢ ܡܰܠܰܐܟ̈ܶܐ ܩܰܕܝ̣̈ܫܶܐ ܩܰܕܝ̣ܫܳܐܝ̣ܬ ܡܶܬܩܰܕܫ ܐܰܢ̱ܬ: ܘܡ̣ܶܢ ܒܢܰܝ̈ܢܳܫܳܐ ܐܰܪ̈ܥܳܢܶܐ ܡܶܫܬܰܒܰܚ ܐܰܢ̱ܬ: ܩܰܒܶܠ ܗܳܫܳܐ ܠܬܶܫܡ̈ܫܳܬܳܐ ܘܰܨ̈ܠܰܘܳܬܳܐ ܘܰܠܫܘ̣ܒ̈ܚܶܐ ܐܘ̣ܫܰܥ̈ܢܳܝܶܐ ܡ̣ܶܢ ܥܰܒ̈ܕܶܐ ܕܝ̣ܠܳܟ: ܠܺܐܝܩܳܪܳܐ ܕܡܳܪܘ̣ܬܳܟ ܡܩܰܪܒܝ̣ܢܰܢ: ܘܫܰܟܶܢ ܠܟܽܠܰܢ ܪ̈ܰܚܡܶܐ ܘܰܚܢܳܢܳܐ ܕܡܶܢܳܟ: ܒܝܰܕ ܒܘ̣ܪ̈ܟܳܬܶܗ ܕܝܰܘܡܳܐ ܗܳܢܳܐ ܩܰܕܝ̣ܫܳܐ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀