ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܬܠܝ̣ܬܳܝܳܐ ܕܒܰܬܠܳܬܳܐ ܩܢܘ̣̈ܡܶܐ ܩܰܕܝ̣̈ܫܶܐ ܡܶܣܬܓܶܕ ܘܡܶܫܬܰܒܰܚ ܘܡܶܬܪܰܡܪܰܡ ܡ̣ܶܢ ܟܽܠܗܽܘܢ ܒܪ̈ܰܝܳܐ ܘܰܥܒܝ̣̈ܕܶܐ: ܗܳܢܽܘܢ ܕܰܒܪܶܡܙܳܐ ܕܝ̣ܠܶܗ ܛܘ̣ܒܬܳܢܳܐ ܐܶܬ̣ܒܪܝ̣ܘ ܘܶܐܬ̣ܬܰܩܰܢܘ̱ ܠܬܶܫܒܘ̣ܚܬܳܐ ܘܠܺܐܝܩܳܪܳܐ ܕܪܰܒܘ̣ܬܶܗ ܐܰܠܳܗܳܝܬܳܐ: ܗܳܢܽܘܢ ܕܰܕܠܳܐ ܫܰܠܘܳܐ ܡܥܰܕܥܕܝ̣ܢ ܒܥܺܕܬܳܐ ܕܒܘ̣ܟܪ̈ܶܐ ܕܰܟܬܝ̣ܒܝ̣ܢ ܒܰܫܡܰܝܳܐ ܘܒܰܡܕܝ̣ܢ̱ܬܳܐ ܐܘ̣ܪܫܠܶܡܳܝܬܳܐ ܕܰܠܥܶܠ: ܘܒܘ̣̈ܣܳܡܶܐ ܕܩܰܕܝ̣̈ܫܶܐ ܕܒܳܟ ܚܳܕܶܝܢ ܘܠܳܟ ܡܚܰܓܶܝܢ: ܗܰܒܠܰܢ ܕܰܐܟܘܳܬܗܽܘܢ ܢ̇ܚܰܓܶܐ ܘܰܢ̇ܥܰܕܥܶܕ ܒܬܶܫܒ̈ܚܳܬܳܐ ܘܒܘ̣ܪ̈ܟܳܬܳܐ ܘܩܘ̣̈ܠܳܣܶܐ ܕܡܶܬܬܚܝ̣ܒܝ̣ܢ ܠܳܟ ܡܳܪܝ̱: ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢܘ̣ ܡ̇ܨܶܐ̣ ܕܢ̣ܶܫܬܰܥܶܐ ܬܶܕܡܪ̈ܳܬܳܐ ܕܝ̣ܠܳܟ ܐܳܘ ܡܳܪܝܳܐ ܐܰܠܳܗܳܐ ܘܰܒܪܳܐ ܫܡܰܝܳܢܳܐ: ܐܳܘ ܡܰܢܘ̣ ܣܳܦܶܩ ܕܰܠܪܰܒܘ̣ܬ ܚܘ̣ܒܳܟ ܢ̣ܫܰܒܰܚ ܐܳܘ ܡܶܠܬܳܐ ܐܰܠܳܗܳܐ ܕܡ̣ܶܢ ܐܰܒܳܐ: ܗܰܘܢܳܐ ܪܰܒܳܐ ܘܪܝ̣ܫܳܝܳܐ ܗܰܘ̇ ܕܟܰܕ ܐܝ̣ܬܰܝܟ ܛܘ̣ܒܬܳܢܳܐ ܘܰܕܡܶܬܓܰܝܰܐܐ ܒܥܘ̣ܒܳܐ ܛܘ̣ܒܬܳܢܳܐ ܘܰܡܫܰܟܢܳܢܳܐ ܕܛܳܒܘ̣ܬܳܐ ܠܳܐ ܡܫܰܢܝܳܢܳܐܝ̣ܬ: ܘܐܘ̣ܣܺܝܰܐ ܕܶܝܢ ܘܰܐܠܳܗܳܐܝ̣ܬ ܐܝ̣ܬܰܝܟ ܒܶܗ: ܘܗܘ̣ ܒܳܟ ܠܳܐ ܡܶܬܕܰܪܟܳܢܳܐܝ̣ܬ ܘܠܳܐ ܡܶܬܦܰܫܩܳܢܳܐܝ̣ܬ: ܟܰܕ ܡܶܬܢܰܨܰܚ ܢܰܨܝ̣ܚܳܐܝ̣ܬ ܥܰܠ ܡܰܪܟܰܒܬܳܐ ܢܘ̣ܪܳܢܳܝܬܳܐ ܕܡ̣ܶܢ ܡܰܘܬܒܳܐ ܕܰܡܢܝ̣̈ܚܳܢܶܐ ܕܰܟܪ̈ܘ̣ܒܶܐ ܩܰܕܝ̣̈ܫܶܐ: ܘܰܣܪ̈ܳܦܶܐ ܣܰܓܺܝ̈ܰܐܝ ܥܰܝ̈ܢܶܐ ܚܶܟܡܬܳܐ ܕܩܘ̣ܕܳܫ̈ܶܐ ܟܕܝ̣ܢܳܐ: ܘܰܒܝܘ̣ܒܳܒܳܐ ܠܳܐ ܫܰܬܘ̣ܩܳܢܳܐܝ̣ܬ ܡ̣ܶܢ ܗܰܘ̈ܢܶܐ ܡܶܬܝܰܕܥ̈ܳܢܶܐ ܘܰܦܫܝ̣̈ܛܶܐ ܡܶܬܗܰܕܰܪ ܐܰܢ̱ܬ: ܠܘܳܬܰܢ ܒܨܝ̣ܪ̈ܶܐ ܘܫܳܘ̈ܝ݂ܰܝ݂ ܠܥܳܩ̈ܳܬܳܐ ܘܡܰܠ̈ܝ݂ܰܝ݂ ܕܘ̣̈ܘܳܢܶܐ ܘܢܳܬܥ̈ܰܝ ܠܬܰܚܬ ܐܶܬ̣ܰܝܬ ܐܰܝܟ ܡܪܰܚܡܳܢܳܐ: ܘܡܰܒܘ̣ܥܳܐ ܕܚܘ̣ܒܳܐ ܘܕܰܚܢܳܢܳܐ: ܗܳܕܶܐ ܡܶܛܽܠ ܓܶܢܣܰܢ ܗܰܘ̇ ܕܰܢܦ̣ܰܠ ܡ̣ܶܢ ܛܘ̣ܒܬܳܢܘ̣ܬܳܐ ܘܡܶܢܝܳܢܳܐ ܕܝ̣ܠܳܟ ܘܰܕܒܘ̣̈ܣܳܡܰܝܟ ܘܟܰܕ ܥܰܡܰܢ ܐܰܟܘܳܬܰܢ ܐܶܬ̣ܕܰܡܝ̣ܬ ܒܰܒܣܰܪ ܕܰܢܣܰܒ̣ܬ ܡ̣ܶܢ ܟܝܳܢܰܢ: ܠܥܝ̣ܠܳܐ ܫܝ̣ܛܳܐ ܘܫܝ̣ܠܳܐ ܐܶܬ̣ܪܟܶܢܬ ܠܡܶܪܟܰܒ: ܐܰܢ̱ܬ ܕܥܰܠ ܡܰܪܟܰܒܬܳܐ ܕܢܘ̣ܪܳܐ ܕܰܡܚܰܙܩܳܐ ܒܢܘ̣ܪܳܐ ܠܳܐ ܗܘ̣ܠܳܢܳܝܬܳܐ ܡܶܬܝܰܩܰܪ ܐܰܢ̱ܬ: ܡ̣ܶܢ ܫܰܒܪ̈ܶܐ ܘܝܰܠ̈ܘ̣ܕܶܐ ܐܶܨܛܒ̣ܰܝܬ ܕܬܶܬ̣ܩܰܠܶܣ: ܐܰܢ̱ܬ ܕܫܘ̣̈ܠܛܳܢܶܐ ܘܡܳܪ̈ܰܘܳܬܳܐ ܙܳܠܚܝ̣ܢ ܠܳܟ ܩܘ̣̈ܕܳܫܶܐ ܠܳܐ ܡܰܘ̈ܦܝܳܢܶܐ ܘܡ̣ܶܢ ܬܰܠܡܝ̣̈ܕܶܐ ܩܰܕܝ̣̈ܫܶܐ ܕܗܳܝܕܶܝܟ ܬܰܡܳܢ ܐܶܬ̣ܛܰܝܰܒܘ̱: ܘܶܐܬ̣ܝܰܩܰܪܬ ܒܡܰܪܛܘ̣ܛܳܐ ܐܰܢ̱ܬ ܕܰܠܢܘ̣ܗܪܳܐ ܠܳܐ ܡܶܬܩܰܪܒܳܢܳܐ ܡܥܰܛܰܦ ܐܰܢ̱ܬ ܐܰܝܟ ܬܰܟܣܝ̣ܬܳܐ: ܘܠܰܡܕܝ̣ܢܰܬ݀ ܡܰܠܟܳܐ ܥܰܠ̣ܬ ܐܰܝܟ ܕܺܐܝܬܰܝܟ ܡܰܠܟܳܐ ܕܐܘ̣ܪܫܠܶܡ ܚܺܐܪܬܳܐ ܕܒܰܫܡܰܝܳܐ: ܘܗܳܠܶܝܢ ܕܚܶܟܡܬܳܐ ܣܥ̣ܰܪܬ ܐܰܝܟܰܢܳܐ ܕܠܰܢܒܺܝ̈ܶܐ ܚܰܙܳܝ̈ܶܐ ܕܝ̣ܠܳܟ ܬ̣ܢܰܨܰܚ ܘܰܬ̣ܫܰܪܰܪ ܐܶܬ̣ܢܰܒܝ̣ܘ ܥܰܠ ܬܡܝ̣̈ܗܳܬܳܟ ܐܰܠܳܗܳܝ̈ܳܬܳܐ ܘܐ̱ܢܳܫܳܝ̈ܳܬܳܐ: ܠܗܳܠܶܝܢ ܕܰܡܦܝ̣̈ܣܳܢܶܐ ܡܩܰܪܒܝ̣ܢܰܢ ܠܗܽܘܢ ܠܳܟ ܥܰܡ ܫܠܝ̣̈ܚܰܟ ܡܫܰܒ̈ܚܶܐ: ܐܳܘ ܫܰܦܝ̣ܪ ܪ̈ܰܚܡܶܐ ܘܚܰܝܘ̣ܣܬܳܢܳܐ ܕܳܐܦ ܠܰܢ ܠܥܰܒ̈ܕܶܐ ܕܝ̣ܠܳܟ ܡܶܣ̈ܟܺܢܶܐ ܘܕܳܘ̈ܰܝܳܐ ܐܰܫܘܳܐ ܠܰܢ ܕܰܢ̇ܥܰܕܥܶܕ ܪܘ̣ܚܳܢܳܐܝ̣ܬ ܥܺܐܕ̈ܶܐ ܕܙܳܟܘ̣ܬܳܐ ܘܰܒܛܰܪ̈ܦܶܐ ܪ̈ܘ̣ܚܳܢܳܝܶܐ ܕܙܰܝ̈ܬܶܐ ܡܶܬܝܰܕ̈ܥܳܢܶܐ ܢ̇ܗܰܕܰܪ ܠܰܡܪܰܚܡܳܢܘ̣ܬܳܟ ܘܰܒ̈ܕܶܩܠܶܐ ܡܶܬܝܰܕ̈ܥܳܢܶܐ ܕܕܘ̣ܒܳܪ̈ܶܐ ܪ̈ܳܡܶܐ ܢܶܡ̇ܛܶܐ ܠܰܩܪܳܝܬܳܐ ܕܶܐܬ̣ܩܪܝ̣ܢܰܢ ܡܶܢܳܟ: ܘܰܐܝܟ ܛܠܳܝ̈ܶܐ ܘܫܰܒܪ̈ܶܐ ܢ̇ܶܗܘܶܐ ܕܟܰܝ̈ܳܐ ܘܰܫܦܰܝ̈ܳܐ: ܐܰܝܟ ܡܰܠܦܳܢܘ̣ܬܳܟ ܚܰܟܝ̣ܡܰܬ݀ ܒܟܽܠ ܘܦܳܪܘ̣ܩܳܝܬܳܐ ܟܰܕ ܠܠܶܒܰܘ̈ܳܬܳܐ ܕܝ̣ܠܰܢ ܘܗܰܘ̈ܢܶܐ ܢ̇ܶܦܪܘ̣ܣ ܘܰܢ̇ܩܰܒܠܳܟ ܐܰܝܟ ܡܰܪܛܘ̣ܛܳܐ ܕܗܳܝܕܶܝܟ ܘܰܒܚܰܕܘ̣ܬܳܐ ܢܺܐܡܰܪ: ܐܘ̣ܫܰܥܢܳܐ ܒܥܺܐܕܳܐ ܕܙܳܟܘ̣ܬܳܐ ܕܒܶܗ ܙܟ̣ܳܝܗ̱ܝ ܠܰܒܥܶܠܕܰܪܳܐ ܘܒܰܛܶܠ ܠܥܘ̣ܫܢܶܗ ܡܶܢܰܢ ܒܡܰܟܝ̣ܟܘ̣ܬܶܗ ܪܳܡܰܬ݀ ܡ̣ܶܢ ܗܰܘ̈ܢܶܐ: ܟܰܕ ܡܫܰܟܶܢ ܐܰܢ̱ܬ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܟܘ̣̈ܬܡܳܬܳܐ ܕܝ̣ܠܰܢ ܐܰܥܒܰܪ ܡ̣ܶܢ ܩܕܳܡܰܝܟ: ܘܰܐܝܟ ܚܰܢܳܢܳܐ ܘܣܰܓܝ̣ ܛܰܝܒܘ̣ܬܳܐ ܡ̣ܶܢ ܚܡܝ̣ܪܳܐ ܥܰܬܝ̣ܩܳܐ ܘܣܳܒܳܝܳܐ ܫܰܘܙܶܒ ܠܰܢ: ܐܰܝܟܰܢܳܐ ܕܰܢ̇ܩܰܒܠܳܟ ܒܰܡ̈ܛܰܠ̱ܠܶܐ ܕܝ̣ܠܰܢ ܘܠܰܘ ܐܰܝܟ ܣܳܒ̈ܶܐ ܗܳܢܽܘܢ ܐܘ̣ܪ̈ܫܠܶܡܳܝܶܐ ܟܰܕ ܡܰܣܩܝ̣ܢܰܢ ܫܘ̣ܒܚܳܐ ܒܙܳܟܘ̣ܬܳܐ ܕܠܳܐ ܡܶܙܕܰܟܝܳܐ: ܠܳܟ ܡܳܪܝ̱ ܘܠܰܐܒܘ̣ܟ ܗܰܘ̇ ܛܘ̣ܒܬܳܢܳܐ ܘܰܠܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀