ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܠܳܗܳܐ ܕܠܳܐ ܡܶܬܡܰܠܰܠ ܡ̣ܶܢ ܡܰܠ̈ܳܠܶܐ: ܘܠܳܐ ܡܶܣܬܰܝܰܟ ܡ̣ܶܢ ܣܳܦܪ̈ܶܐ: ܘܠܳܐ ܡܶܬܒܨܶܐ ܡ̣ܶܢ ܚܰܟܝܡ̈ܶܐ: ܘܠܳܐ ܡܶܬܥܰܩܰܒ ܡ̣ܶܢ ܕܳܪ̈ܘ̣ܫܶܐ: ܗܰܘ̇ ܕܰܒܟܽܠܡܶܕܶܡ ܐܶܬ̣ܕܰܡܝ̣ ܠܰܢ ܣܛܰܪ ܡ̣ܶܢ ܚܛܝ̣ܬܳܐ: ܘܚܰܘܝ̣ ܒܰܩܢܘ̣ܡܶܗ ܐܘ̣ܪܚܳܐ ܚܰܕܬܳܐ ܕܦܘ̣ܪܩܳܢܳܐ ܕܰܕܪܰܫ̣ ܫܒܝ̣ܠܳܐ ܡܰܚܝܳܢܳܐ ܠܛܘ̣ܗܡܳܐ ܕܡܳܝ̈ܘ̣ܬܳܐ: ܘܰܒܝܰܕ ܨܰܘܡܶܗ ܐܰܣܝ̣ ܠܝܰܥܢܘ̣ܬܳܐ ܕܰܒܝܰܕ ܥܒܳܪ ܦܘ̣ܩܕܳܢܳܐ ܥܶܠ̣ܰܬ݀ ܥܰܠ ܓܶܢܣܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܗܰܘ̇ ܡܥܰܠܝܳܐ ܒܠܳܐ ܡܶܬܕܰܪܟܳܢܘ̣ܬܳܐ ܘܰܡܪܰܡܪܡܳܐ ܒܠܳܐ ܡܶܬܗܰܘܢܳܢܘ̣ܬܳܐ: ܗܰܘ̇ ܣܰܓܺܝܳܐܐ ܒܟܽܠ ܡܰܘܗ̈ܒܳܬܳܐ ܛܳܒ̈ܳܬܳܐ: ܘܩܰܠܝ̣ܠܳܐ ܠܘܳܬ ܫܶܐܠ̈ܳܬܳܐ ܕܡܶܬܟܰܫ̈ܦܳܢܶܐ ܕܝ̣ܠܶܗ: ܝܰܬܝ̣ܪܐܝ̣ܬ ܕܶܝܢ ܕܗܳܢܽܘܢ ܕܒܰܫܚܝ̣ܩܘ̣ܬ ܠܶܒܳܐ: ܘܰܒܡܰܟܝ̣ܟܘ̣ܬ ܬܰܪܥܝ̣ܬܳܐ ܒܬܰܪܥܳܐ ܕܰܬܝܳܒܘ̣ܬܳܐ ܝܰܨܝ̣ܦܳܐܝ̣ܬ ܢܳܩܫܝ̣ܢ: ܟܰܕ ܥܰܠ ܡܶܬܦܰܢܝܳܢܘ̣ܬܳܐ ܕܝ̣ܠܗܽܘܢ ܡܒܰܕܩܳܐ ܚܰܕܘ̣ܬܳܐ ܕܡܰܠܰܐܟ̈ܶܐ ܕܝ̣ܠܳܟ ܩܰܕܝ̈ܫܶܐ: ܐܰܢ̱ܬ ܐܳܦ ܗܳܫܳܐ ܐܳܘ ܡܳܪܝܳܐ: ܟܰܕ ܡ̣ܶܢ ܫܡܰܝ̈ܳܐ ܕܝ̣ܠܳܟ ܩܰܕܝ̣̈ܫܶܐ ܒܰܦܫܝ̣ܛܘ̣ܬ ܥܰܝܢܳܐ ܕܝ̣ܠܳܟ ܡܪܰܚܡܳܢܝ̣ܬܳܐ ܒܥܰܒ̈ܕܶܐ ܕܝ̣ܠܳܟ ܕܰܩܕܳܡܰܝܟ ܡܶܬܓܰܪܓܚܝ̣ܢ ܚܳܐܰܪ ܐܰܢ̱ܬ: ܩܰܒܶܠ ܡܳܪܝ̱ ܢܝ̣ܚܳܐܝ̣ܬ ܘܝܰܬܝ̣ܪ ܪܶܚܡܰܬ݀ ܐ̱ܢܳܫܳܐܝ̣ܬ: ܒܰܡܪ̈ܰܘܡܶܐ ܕܝ̣ܠܳܟ ܫܡܰܝܳܢ̈ܶܐ ܠܒܳܥ̈ܘܳܬܳܐ ܘܬܰܟܫ̈ܦܳܬܳܐ ܕܝ̣ܠܰܢ: ܘܚܘ̣ܪ ܒܰܪܟܝ̣ܢܘ̣ܬܳܐ ܕܝ̣ܠܰܢ: ܒܳܥܶܝܢܰܢ ܘܓܳܥܶܝܢܰܢ ܠܘܳܬܳܟ: ܘܠܳܐ ܬ̣ܶܢܰܟܪܶܐ ܠܰܢ ܡ̣ܶܢ ܪ̈ܰܚܡܶܐ ܕܝ̣ܠܳܟ: ܫܡܰܥ ܚܰܒܝ̣ܒܳܐܝ̣ܬ ܠܰܨ̈ܠܰܘܳܬܳܐ ܚܦܝ̣̈ܛܳܬܳܐ ܕܰܡܩܰܪܒܝ̣ܢܰܢ ܩܕܳܡܰܝܟ: ܘܶܐܬܚܙܝ̣ ܠܘܳܬܰܢ ܡܫܰܝ̈ܢܶܐ: ܟܰܕ ܝܰܬܝ̣ܪ ܚܳܕܝܳܐܝ̣ܬ ܡܩܰܒܶܠ ܐܰܢ̱ܬ ܠܰܢ: ܘܗܰܒ ܘܫܰܟܶܢ ܠܰܢ ܡܳܪܝܳܐ ܐܰܡܝ̣ܢܘ̣ܬ ܩܰܘܡܳܐ ܕܰܩܕܳܡܰܝܟ ܘܚܘ̣ܒܳܐ ܫܰܦܝܳܐ ܘܚܰܝ̈ܶܐ ܢܰܩ̈ܕܶܐ ܕܕܶܚܠܰܬ݀ ܐܰܠܳܗܳܐ: ܡܚܰܡ̈ܣܢܳܢܶܐ ܒܢܶܣ̈ܝܘ̣ܢܶܐ: ܡܣܰܝܒܪ̈ܳܢܶܐ ܒܪܘ̣ܓܙܳܐ: ܚܦܝ̣̈ܛܶܐ ܒܰܨ̈ܠܰܘܳܬܳܐ: ܥܰܒ̈ܕܶܐ ܛܳܒ̈ܶܐ ܘܰܡܗܰܝܡ̈ܢܶܐ ܘܰܐܡܝ̣̈ܢܶܐ: ܕܰܒܟܰܟܪ̈ܶܐ ܕܫܰܦܝ̣ܪܘ̣ܬ ܥܘ̣ܬܪܳܐ ܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ ܕܝ̣ܠܳܟ: ܕܬܶܐܓܘ̣ܪܬܳܐ ܥܦܝ̣ܦܬܳܐ ܡܰܦܢܶܝܢ: ܘܰܐܫܘܳܐ ܠܰܢ ܡܳܪܝܳܐ ܕܢ̇ܶܗܘܶܐ ܠܳܟ ܥܰܡܳܐ ܩܰܕܝ̣ܫܳܐ: ܘܰܒ̈ܢܰܝܳܐ ܚܰܒܝ̣̈ܒܶܐ ܘܡܶܫܬܰܡ̈ܥܳܢܶܐ ܕܰܐܒܳܗܘ̣ܬܳܐ ܕܝ̣ܠܳܟ: ܬܘ̣ܒ ܕܶܝܢ ܒܳܥܶܝܢܰܢ ܡܶܢܳܟ ܐܳܘ ܛܳܒܳܐ ܘܪܳܚܶܡ ܛܳܒ̈ܳܬܳܐ ܡܳܪܝܳܐ: ܕܰܬ̣ܫܰܟܶܢ ܠܰܢ ܒܥܳܠܡܳܐ ܗܳܢܳܐ ܙܰܒܢܳܝܳܐ ܗܳܠܶܝܢ ܕܙܳܕܩ̈ܳܢ ܠܩܘ̣ܝܳܡܳܐ ܕܚܰܝ̈ܶܐ ܕܝ̣ܠܰܢ ܙܰܒ̈ܢܳܝܶܐ: ܦܫܘ̣ܛ ܝܰܡܝ̣ܢܳܐ ܕܝ̣ܠܳܟ ܗܳܝ̇ ܩܰܕܝ̣ܫܬܳܐ ܡܰܠܝܰܬ݀ ܒܘ̣ܪ̈ܟܳܬܳܐ ܘܰܫܦܝ̣ܥܰܬ݀ ܒܡܰܘ̈ܗܒܳܬܳܐ ܥܰܬܝ̣ܪ̈ܳܬܳܐ ܡܦܰܬܟܘ̣ܬ ܦܺܐܪ̈ܶܐ ܡܫܰܡ̈ܠܝܶܐ ܠܳܐ ܬܶܟܠܶܐ ܡ̣ܶܢ ܓܒܝ̣ܠܬܳܐ ܕܐܝ̣̈ܕܰܝܳܐ ܕܝ̣ܠܳܟ: ܐܰܡܝ̣ܢܘ̣ܬܳܐ ܕܡܰܪܕܘ̣ܬ ܡܰܒܘ̣ܥ̈ܶܐ ܓܝ̣ܚܘ̣ܢܳܝ̈ܶܐ ܕܣܳܦܩܳܐܝ̣ܬ ܡܬܰܪܣܶܝܢ ܠܰܒܪܝ̣ܬܳܐ ܟܽܠܳܗܿ ܕܝ̣ܠܳܟ ܣܰܒܥܳܐܝ̣ܬ ܫܰܟܶܢ ܒܟܽܠ ܛܳܒ̈ܳܬܳܐ ܢܰܨܝ̣ܚܰܬ݀ ܫܘ̣ܦܪ̈ܶܐ ܕܡ̣ܶܢ ܒܶܝܬ ܓܰܙܳܐ ܕܝ̣ܠܳܟ ܢܳܦ̈ܩܳܢ: ܐܰܦܨܰܚ ܠܦܰܪ̈ܨܘ̣ܦܶܐ ܕܝ̣ܠܰܢ: ܠܟܽܠ ܪ̈ܘ̣ܓܙܶܐ ܐܰܒ̈ܕܳܢܳܝܳܐ ܕܡܶܬܬܰܝ̣ܬܶܝܢ ܥܰܠ ܥܰܡܳܐ ܕܝ̣ܠܳܟ ܡܗܰܝܡܢܳܐ: ܒܰܛܝ̣̈ܠܶܐ ܘܠܳܐ ܡܰܚܣܪ̈ܳܢܶܐ ܥܒܶܕ ܐܶܢܽܘܢ ܡܳܪܝܳܐ: ܠܰܫܓܝ̣ܫܘ̣ܬܳܐ ܘܰܩܪ̈ܳܒܶܐ ܕܰܚܕܝ̣ܪܝܢ ܠܰܢ ܒܰܛܶܠ ܒܫܰܝܢܳܐ ܕܡܶܢܳܟ: ܠܟܽܠ ܚܰܪ̈ܒܶܐ ܘܫܶܒ̈ܝܶܐ ܘܡܰܘ̈ܬܳܐ ܡܣܰܪ̈ܗܒܶܐ ܟܠܝ̣ ܡܶܢܰܢ ܡܳܪܝܳܐ: ܠܟܽܠ ܐܘ̣ܠ̈ܨܳܢܶܐ ܘܢܶܣܝܘ̣̈ܢܶܐ ܥܰܣ̈ܩܶܐ ܐܰܥܒܰܪ ܒܰܚܢܳܢܳܟ ܘܟܰܕ ܡܶܬܦܢܶܐ ܐܰܢ̱ܬ ܠܘܳܬ ܝܰܡܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ: ܩܰܝܶܡ ܒܫܰܦܝ̣ܪܘ̣ܬ ܨܶܒܝܳܢܳܟ ܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝܬܳܐ ܗܳܝ ܕܥܰܠ ܫܘ̣ܥܳܐ ܐܰܘܟܝ̣ܬ ܟܺܐܦܳܐ ܓܒܝ̣ܬܳܐ ܦܶܛܪܘ̣ܣܳܝܬܳܐ ܠܳܐ ܡܶܙܕܰܥܙܥܳܢܳܐܝ̣ܬ ܒܰܢܝܳܐ: ܘܚܰܘܳܐ ܒܝܰܕ ܪܘ̣ܚܳܐ ܩܰܕܝ̣ܫܳܐ ܡܰܦܪܓܘ̣ܬܳܐ ܕܢܰܨܝ̣ܚܘ̣ܬ ܫܘ̣ܦܪ̈ܶܐ ܕܝ̣ܠܳܗܿ ܒܟܽܠܳܗܿ ܬܺܒܶܝܠ: ܘܢܰܛܰܪ ܠܪ̈ܳܥܰܘܳܬܳܐ ܕܰܒܪܝ̣ܫܳܐ ܕܝ̣ܠܳܗܿ ܩܳܝܡܝ̣ܢ: ܝ̣ܕܝ̣ܥܳܐܝ̣ܬ ܕܶܝܢ ܠܗܳܢܽܘܢ ܕܦܝ̣ܠܠܘ̣ܣܘ̣ܦܳܐܝ̣ܬ ܬܶܐܘܳܠܳܘܓܺܝܰܐ ܒܳܗܿ ܡܰܣܪܚܝ̣ܢ: ܢܰܒܪܰܫ ܕܶܝܢ ܒܪܶܚܡܰܬ݀ ܐ̱ܢܳܫܘ̣ܬܳܟ: ܘܶܐܬܚܰܫܰܚ ܒܰܡܪܰܚܡܳܢܘ̣ܬܳܟ ܠܘܳܬ ܓܶܢܣܳܐ ܕܝ̣ܠܰܢ ܟܪܝ̣ܣܛܝܳܢܳܝܳܐ: ܘܗܰܒ ܐܳܣܝܘ̣ܬܳܐ ܕܙܳܕܩܳܐ ܘܥܘ̣ܕܪܳܢܳܐ ܓܡܝ̣ܪܳܐ ܠܗܳܢܽܘܢ ܕܰܒܟܘ̣ܪ̈ܗܳܢܶܐ ܘܰܠܗܳܢܽܘܢ ܕܡ̣ܶܢ ܫܺܐܕ̈ܶܐ ܛܰܢ̈ܦܶܐ ܡܶܫܬܰܚܩܝ̣ܢ: ܘܰܠܗܳܢܽܘܢ ܕܰܒܫܶܒ̈ܝܶܐ ܡܰܪܝ̣ܪ̈ܶܐ ܗܘܝ̣ ܦܳܪܘ̣ܩܳܐ: ܘܰܠܗܳܢܽܘܢ ܕܒܰܐܟܣܢܳܝܘ̣ܬܳܐ ܠܘܝ̣ܬܳܐ ܕܪ̈ܰܚܡܶܐ: ܘܰܠܗܳܢܽܘܢ ܕܰܐܠܝ̣ܨܝ̣ܢ ܒܰܐܣܘ̣ܪ̈ܶܐ ܘܰܒܒܶܝܬ ܚܒܘ̣ܫ̈ܝܶܐ ܗܘܝ̣ ܡܫܰܘܙܒܳܢܳܐ: ܘܰܠܗܳܢܽܘܢ ܕܰܒܥܰܣܩܘ̣ܬ ܢܶܣܝܘ̣̈ܢܶܐ ܕܳܘܝܳܐܝ̣ܬ ܡܶܬܰܐܠܨܝ̣ܢ ܗܘܝ̣ ܡܥܰܕܪܳܢܳܐ: ܘܠܰܐܒܳܗ̈ܶܐ ܘܰܐܚ̈ܶܐ ܕܝ̣ܠܰܢ ܗܳܢܽܘܢ ܕܡ̣ܶܢ ܚܰܝ̈ܶܐ ܗܳܠܶܝܢ ܙܰܒ̈ܢܳܝܶܐ ܫܰܢܝ̣ܘ ܒܰܐܘ̈ܘܳܢܶܐ ܕܢܘ̣ܗܪܳܐ ܐܰܢܝ̣ܚ: ܘܠܰܢ ܗܳܢܽܘܢ ܕܰܒܚܰܝ̈ܶܐ ܫܓܝ̣̈ܫܶܐ ܐܝ̣ܬܰܝܢ ܘܰܒܥܳܠܡܳܐ ܗܳܢܳܐ ܡܥܰܪܙܠܝ̣ܢ: ܕܰܒܰܪ ܠܰܢ ܐܰܝܟ ܫܰܦܝ̣ܪܘ̣ܬ ܪ̈ܰܚܡܶܐ ܕܝ̣ܠܳܟ ܘܫܰܟܶܢ ܠܰܢ ܚܰܝ̈ܶܐ ܠܳܐ ܫܓܝ̣̈ܫܶܐ ܒܫܰܝܢܳܐ ܕܡ̣ܶܢ ܠܘܳܬܳܟ: ܘܟܰܕ ܠܬܰܘܬܳܒܘ̣ܬܳܐ ܕܝ̣ܠܰܢ ܕܡ̣ܶܢ ܗܳܪܟܳܐ ܫܳܪܶܐ ܐܰܢ̱ܬ: ܘܡ̣ܶܢ ܥܳܠܡܳܐ ܗܳܢܳܐ ܠܥܳܠܡܳܐ ܕܰܠܗܰܠ ܡܰܥܒܰܪ ܐܰܢ̱ܬ ܠܰܢ: ܐܰܫܘܳܐ ܠܰܢ ܠܚܰܝ̈ܶܐ ܗܳܢܽܘܢ ܛܘ̣ܒ̈ܬܳܢܶܐ ܘܠܳܐ ܥܳܒܘ̣ܪ̈ܶܐ: ܕܒܶܝܬ ܓܢܽܘܢܳܐ ܕܝ̣ܠܳܟ ܫܡܰܝܳܢܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀