ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܥܒܰܪ ܠܰܓܙܳܡܳܐ ܥܰܙܝ̣ܙܳܐ ܕܪܘ̣ܓܙܳܐ: ܘܰܠܠܘ̣ܚܳܡܳܐ ܕܚܝ̣ܠܳܐ ܕܚܶܡܬܳܟ: ܡ̣ܶܢ ܥܰܡܳܟ ܘܝܳܪܬܘ̣ܬܳܟ ܗܳܢܽܘܢ ܕܰܬܪܝ̣ܨܳܐܝ̣ܬ ܡܰܘܕܶܝܢ ܒܳܟ ܐܰܠܳܗܳܐ ܪܳܚܶܡ ܐ̱ܢܳܫܳܐ: ܘܢ̇ܰܘܕܶܐ ܠܚܘ̣ܒܳܟ ܕܠܳܐ ܢܶܟܝܳܢܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܛܳܒܳܐ ܒܰܟܝܳܢܶܗ ܘܒܰܣܝ̣ܡܳܐ ܒܨܶܒܝܳܢܶܗ: ܠܗܰܘ̇ ܡܪܰܚܡܳܢܳܐ ܒܐܝ̣ܬܘ̣ܬܶܗ ܕܡ̣ܶܢ ܥܳܠܰܡ ܗ̱ܝ̣ ܛܰܝܒܘ̣ܬܶܗ: ܗܰܘ̇ ܪܳܚܶܡ ܐ̱ܢܳܫ̈ܳܐ ܕܥܰܠ ܛܳܒ̈ܶܐ ܘܥܰܠ ܒܝ̣̈ܫܶܐ ܫܦܝ̣ܥܝ̣ܢ ܥܘ̣ܕܪ̈ܳܢܰܘܗ̱ܝ: ܠܗܰܘ̇ ܝܰܡܳܐ ܕܰܚܢܳܢܳܐ ܕܥܰܠ ܟܺܐܢ̈ܶܐ ܘܥܰܠ ܥܰܘ̈ܳܠܶܐ ܐܰܫܝ̣ܕܝ̣ܢ ܪ̈ܰܚܡܰܘܗ̱ܝ: ܠܗܰܘ̇ ܕܠܳܐ ܨܳܒܶܐ ܒܡܰܘܬܳܐ ܕܚܰܛܳܝ̈ܶܐ ܐܶܠܳܐ ܪܳܚܶܡ ܠܦܘ̣ܢܝܳܐ ܕܬܰܝܳܒ̈ܶܐ: ܠܳܟ ܡܳܪܝܳܐ ܡ̇ܠܶܐ̣ ܪ̈ܰܚܡܶܐ ܡܦܝ̣ܣܝ̣ܢܰܢ ܘܡ̣ܶܢ ܒܶܝܬ ܓܰܙܳܐ ܕܝ̣ܠܳܟ ܥܰܬܝ̣ܪܳܐ ܫܘ̣ܒܩܳܢܳܐ ܕܰܚ̈ܛܳܗܶܐ ܫܳܐܠܝ̣ܢܰܢ: ܐܶܬܪܰܚܰܡ ܥܠܰܝܢ ܡܳܪܳܐ ܛܳܒܳܐ: ܘܒܰܛܶܠ ܡܶܢܰܢ ܬܰܟܬ̈ܘ̣ܫܶܐ ܘܢܶܣܝܘ̣̈ܢܶܐ ܥܰܣ̈ܩܶܐ: ܘܰܥܢܝ̣ ܠܰܢ ܘܬܳܐ ܠܥܘ̣ܕܪܳܢܰܢ: ܡܫܝ̣ܚܳܐ ܡܰܠܟܳܐ ܘܡܳܪܳܗܿ ܕܬܶܫܒܘ̣ܚܬܳܐ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܢܰܗܪܳܐ ܕܫܰܝܢܳܐ ܘܝܰܡܳܐ ܕܛܳܒܘ̣ܬܳܐ: ܗܰܘ̇ ܥܰܝܢܳܐ ܕܚܰܝ̈ܶܐ ܘܰܡܥܝ̣ܢܳܐ ܕܠܳܐ ܡܳܝܘ̣ܬܘ̣ܬܳܐ: ܗܰܘ̇ ܕܰܡܗܰܝܡܰܢ ܒܟܽܠܗܶܝܢ ܡܶܠ̈ܰܘܗ̱ܝ ܘܰܚ̇ܣܶܐ̣ ܒܟܽܠܗܽܘܢ ܥܒ̈ܳܕܰܘܗ̱ܝ: ܗܰܘ̇ ܕܡܰܓܰܪ ܐܰܢ̱ܬ ܪܘ̣ܚܳܟ ܠܰܐܝܠܶܝܢ ܕܚܳܛܶܝܢ: ܘܰܐܟܚܕܳܐ ܡܥܰܕܰܪ ܐܰܢ̱ܬ ܠܰܐܝܠܶܝܢ ܕܬܳܝ̇ܒܝ̣ܢ: ܗܰܘ̇ ܗܰܢܺܝܳܐܐ ܠܰܐܝܠܶܝܢ ܕܡܶܬܬܰܪܨܝ̣ܢ ܘܒܰܣܝ̣ܡܳܐ ܠܟܽܠ ܐܰܝܠܶܝܢ ܕܡܶܬܦܢܶܝܢ: ܟܰܕ ܥܕܰܟܝ̣ܠ ܒܪܘ̣ܚܩܳܐ ܡ̣ܶܢ ܬܪܝܨܘ̣ܬܳܐ ܘܙܰܕܝ̣ܩܘ̣ܬܳܐ ܕܝ̣ܠܳܟ ܡܰܒܥܕܝ̣ܢܰܢ ܚܢܰܢ ܥܰܒܕ̈ܶܐ ܕܝ̣ܠܳܟ ܕܳܘ̈ܰܝܳܐ: ܡܰܚܫܰܒܬܳܐ ܕܶܝܢ ܒܰܠܚܘ̣ܕ ܫܚܝ̣ܡܬܳܐ: ܘܚܺܐܦܳܐ ܕܡܶܬܦܰܢܝܳܢܘ̣ܬܳܐ ܢܣܰܒ̣ܢܰܢ ܘܫܘ̣ܪܝܳܐ ܠܰܬܝܳܒܘ̣ܬܳܐ ܟܶܐܡܰܬ ܐܰܪܡܝ̣ܢܰܢ: ܟܰܕ ܡܶܬܚܰܢܓܝ̣ܢܰܢ ܡܦܝ̣ܣܝ̣ܢܰܢ ܠܳܟ ܡܳܪܳܐ ܛܳܒܳܐ ܘܰܢܓܝ̣ܪ ܪܘ̣ܚܳܐ: ܒܪܶܗܛܳܐ ܩܰܠܝ̣ܠܳܐ ܬ̣ܩܘ̣ܡܝ̱ ܘܬ̣ܰܕܪܶܟܝ̱ ܠܰܢ ܛܳܒܘ̣ܬܳܐ ܕܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܠܳܟ ܬ̣ܩܘ̣ܡܝ̱ ܕܶܝܢ ܒܬܘ̣ܪܰܥܬܳܐ ܩܕܳܡ ܦܰܪܨܘ̣ܦܳܐ ܕܪܘ̣ܓܙܳܟ ܕܚܝ̣ܠܳܐ ܕܰܥܠܰܝܢ ܘܰܬ̣ܒܰܛܶܠ ܠܰܓܙܳܪܕܝ̣ܢܳܐ ܕܰܡܣܳܡܒܪܝ̣ܫܳܐ ܕܩܰܫܝܘ̣ܬܳܐ ܕܕܝ̣ܢܳܟ ܟܺܐܢܳܐ: ܘܛܰܠܳܐ ܕܰܚܢܳܢܳܐ ܕܒܰܣܝ̣ܡܘ̣ܬܳܐ ܕܝ̣ܠܳܟ ܢ̣ܰܕܥܶܟ ܠܓܰܘܙܰܠܬܳܐ ܕܰܛܢܳܢܳܐ ܕܰܓܙܳܡܳܐ ܙܝ̣ܥܳܐ ܕܝ̣ܠܳܟ ܕܰܠܩܘ̣ܒܠܰܢ ܘܢܝ̣ܚܘ̣ܬܳܐ ܕܠܳܐ ܥ̱ܰܗܝ̣ܕܘ̣ܬ ܒܝ̣ܫܘ̣ܬܳܐ ܕܝ̣ܠܰܢ ܕܰܩܕܳܡ ܪܰܒܘ̣ܬܳܟ: ܘܠܳܐ ܡܰܬܥ̱ܰܗܕܳܢܘ̣ܬܳܐ ܕܣܰܓܺܝܽܐܘ̣ܬܳܐ ܕܰܡܣܰܝܒܘ̣ܬܳܐ ܕܰܚ̈ܛܳܗܶܐ ܕܝ̣ܠܰܢ: ܘܟܰܕ ܠܰܬܗܘ̣ܡܳܐ ܠܳܐ ܡܶܣܬܰܝܟܳܢܳܐ ܕܚܰܝܘ̣ܣܬܳܢܘ̣ܬܳܐ ܕܝ̣ܠܳܟ ܕܰܠܘܳܬܰܢ ܡܙܝ̣ܥ ܐܰܢ̱ܬ ܒܰܕܪ̈ܳܥܶܐ ܐܰܒܳܗ̈ܳܝܳܐ ܘܰܒܢܘ̣ܫܩ̈ܳܬܳܐ ܕܪܶܚܡܰܬ݀ ܒܢܰܝ̈ܳܐ ܠܰܡܩܰܒܳܠܘ̣ܬܰܢ ܐܰܫܘܳܐ: ܘܠܳܐ ܬ̣ܰܗܦܶܟ ܐܰܦ̈ܝܰܟ ܡܶܢܰܢ ܡܳܪܝܳܐ܇ ܡ̣ܶܢ ܗܳܢܽܘܢ ܕܒܰܒܪܳܐ ܐܳܣܘ̣ܛܳܐ ܒܝ̣ܫܳܐܝ̣ܬ ܐܶܬ̣ܕܰܡܝ̣ܢܰܢ: ܘܰܡܢܳܬܳܐ ܗܳܝ ܕܰܡ̣ܛܳܬ݀ ܠܰܢ ܡ̣ܶܢ ܐܘ̣ܣܺܝܰܐ ܘܝܳܪܬܘ̣ܬܳܐ ܐܰܒܳܗܳܝܬܳܐ: ܒܪ̈ܘ̣ܫܥܶܐ ܘܰܒܥܰܘ̈ܠܶܐ ܘܰܒܗܰܢܺܝ̣ܐܘ̈ܳܬܳܐ ܫܪ̈ܝ̣ܚܳܬܳܐ ܥܠܰܝܡܳܐܝ̣ܬ ܛܰܠܶܩ̣ܢܰܢ: ܘܦܘ̣ܪܥܳܢ ܐܰܓܪܳܐ ܓܶܝܪ ܗܰܘ̇ ܕܙܳܕܶܩ ܗ̱ܘܳܐ ܠܛܳܥܝܘ̣ܬܳܐ ܕܝ̣ܠܰܢ ܚܢܰܢ ܒܰܢ ܢܣܰܒ̣ܢܰܢ: ܘܰܠ̈ܚܰܫܶܐ ܡܨܰܥܪ̈ܶܐ ܒܰܕܡܘ̣ܬ ܚܙܝ̣ܪ̈ܶܐ ܛܰܡ̈ܶܐܐ ܠܡܶܪܥܳܐ ܡ̣ܶܢ ܡܳܪܶܗ ܐܰܓܪܳܐ ܘܩܳܝܘ̣ܡܳܐ ܕܒܝ̣̈ܫܳܬܳܐ ܩܰܒܶܠ̣ܢܰܢ: ܘܠܳܐ ܬܶܕܚܘ̣ܩ ܠܰܢ ܡܳܪܝܳܐ܇ ܠܗܳܢܽܘܢ ܕܰܒܟܰܦܢܳܐ ܕܟܽܠܗܶܝܢ ܛܳܒ̈ܳܬܳܐ ܐܝ̣ܬܰܝܢ: ܒܰܨܪܝܟܘ̣ܬܳܐ ܕܟܽܠܗܶܝܢ ܡܝܰܬܪ̈ܳܬܳܐ ܕܳܘܝܳܐܝ̣ܬ ܡܶܬܥܰܨܪܝ̣ܢܰܢ: ܠܡܰܚܣܶܢ ܓܶܝܪ ܟܰܕ ܒܒܝ̣ܫܘ̣ܬܳܐ ܕܰܐܝܟ ܗܳܕܶܐ ܐܰܪܓܶܫ̣ܢܰܢ ܒܝܰܕ ܬܝܳܒܘ̣ܬܳܐ ܘܰܬܘܳܬ ܢܰܦܫܳܐ ܠܘܳܬ ܐܰܒܳܐ ܕܪ̈ܰܚܡܶܐ ܘܐܰܠܳܗܳܐ ܕܟܽܠܶܗ ܒܘ̣ܝܳܐܳܐ: ܬܘ̣ܒ ܠܡܶܪܗܰܛ ܐܶܬ̣ܬܟܶܠܢܰܢ: ܠܳܐ ܬܰܗܡܶܐ ܡܶܢܰܢ ܡܳܪܝܳܐ܇ ܡ̣ܶܢ ܗܳܢܽܘܢ ܕܰܒܟܺܐܒ̈ܶܐ ܕܢܰܦܫܳܐ ܘܦܰܓܪܳܐ ܘܰܒܦܘ̣ܬܳܚܳܐ ܕܠܶܒܳܐ ܘܒܰܬܘܳܬܳܐ ܡܦܰܪܣܝ̣ܢܰܢ ܩܕܳܡܰܝܟ ܒܰܥܒܳܪ ܢܳܡܘ̣ܣܳܐ ܕܝ̣ܠܰܢ: ܒܒܰܪ̱ܬ ܩܳܠܳܐ ܪܰܥܘ̣ܡܬܳܐ ܘܡܶܬܚܰܢܳܢܝ̣ܬܳܐ ܓܳܥܶܝܢܰܢ ܠܘܳܬܳܟ: ܐܳܒܝ̱ ܚ̣ܛܰܝܢܰܢ ܒܰܫܡܰܝܳܐ ܘܰܩܕܳܡܰܝܟ: ܘܠܳܐ ܬܘ̣ܒ ܡܶܟܝ̣ܠ ܫܳܘܶܝܢܰܢ ܕܰܒ̈ܢܰܝܳܐ ܕܝ̣ܠܳܟ ܢ̇ܶܬܟܰܢܶܐ: ܐܶܠܳܐ ܥܒܶܕ ܠܰܢ ܐܰܝܟ ܚܰܕ ܡ̣ܶܢ ܐܰܓܝ̣ܪ̈ܶܐ ܕܝ̣ܠܳܟ ܠܳܐ ܬܶܢܰܕ ܠܳܟ ܡܶܢܰܢ ܡܳܪܝܳܐ: ܡ̣ܶܢ ܗܳܢܽܘܢ ܕܒܰܗܝ̣ܬܝ̣ܢܰܢ ܡܰܢ ܘܰܠܬܰܚܬ ܟܳܦܝ̣ܢܰܢ: ܘܕܰܢ̇ܚܘ̣ܪ ܠܥܶܠ ܣܳܟ ܠܳܐ ܡܶܫܟܚܝ̣ܢܰܢ ܐܶܢ ܫܳܐܠܝ̣ܢܰܢ ܪܰܒܘ̣ܬܳܐ ܚܳܫܒܝܢܰܢ: ܐܳܦܶܢ ܡܳܪܝ̱ ܐܰܝܟ ܟܰܠܒ̈ܶܐ ܗܳܢܽܘܢ ܕܰܒܒܰܝܬܳܐ ܕܝ̣ܠܳܟ ܡ̣ܶܢ ܦܰܪ̈ܟܘ̣ܟܶܐ ܢ̇ܶܐܟܘ̣ܠ: ܗܳܠܶܝܢ ܕܢܳܦܠܝ̣ܢ ܡ̣ܶܢ ܦܳܬܘ̣ܪܳܐ ܕܰܒ̈ܢܰܝܳܐ ܕܝ̣ܠܳܟ: ܠܳܐ ܬ̣ܶܫܕܶܐ ܠܰܢ ܐܰܒܝ̣̈ܕܶܐ ܡ̣ܶܢ ܩܕܳܡܰܝܟ ܡܳܪܝܳܐ܇ ܗܰܘ̇ ܕܡܶܛܽܠ ܒܪܳܐ ܐܰܒܝ̣ܕܳܐ ܠܰܒܪܳܐ ܗܰܘ̇ ܝ̣ܚܝ̣ܕܳܝܳܐ ܕܝ̣ܠܳܟ ܘܰܫ̇ܘܶܐ̣ ܒܰܡܬܘ̣ܡܳܝܘ̣ܬܳܐ: ܒܰܕܡܘ̣ܬ ܬܰܘܪܳܐ ܡܶܕܶܡ ܡܦܰܛܡܳܐ ܠܕܶܒܚܬܳܐ ܐܰܫܠܶܡ̣ܬ ܘܥܰܠ ܡܶܬܦܰܢܝܳܢܘ̣ܬܳܐ ܕܗܰܘ̇ ܐܳܣܘ̣ܛܳܐ: ܒܰܪ̱ܬ ܩܳܠܳܐ ܗܳܝ ܪܶܚܡܰܬ݀ ܐ̱ܢܳܫܳܐ ܐܰܙܥܶܩ̣ܬ ܕܢ̇ܶܚܕܶܐ ܘܢ̇ܶܬܒܰܣܰܡ ܙܳܕܶܩ ܕܗܳܢܳܐ ܒܪܳܐ ܕܝ̣ܠܝ̱ ܡܝ̣ܬܳܐ ܗ̱ܘܳܐ ܘܰܚ̣ܝܳܐ ܘܰܐܒܝ̣ܕܳܐ ܘܶܐܫ̣ܬܟܰܚ: ܠܳܐ ܬܫܘ̣ܛ ܠܰܢ ܡܳܪܝܳܐ܇ ܠܗܳܢܽܘܢ ܕܡ̣ܶܢ ܐܘ̣ܪܚܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܛܥ̣ܰܝܢܰܢ: ܗܰܘ̇ ܕܰܠܥܶܪܒܳܐ ܛܰܥܝܳܐ ܒܝܰܕ ܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܒܥ̣ܰܝܬ: ܘܥܰܠ ܦܘ̣ܪܩܳܢܳܐ ܕܗܰܘ̇ ܚ̣ܕܰܝܬ ܝܰܬܝ̣ܪܐܝ̣ܬ ܐܰܘ ܥܰܠ ܗܳܢܽܘܢ ܬܶܫܥܝ̣ܢ ܘܬܶܫܥܳܐ ܕܠܳܐ ܛܥ̣ܰܘ: ܠܙܘ̣ܙܳܐ ܗܰܘ̇ ܡܰܠܟܳܝܳܐ ܘܝܘ̣ܩܢܳܐ ܕܝ̣ܠܳܟ ܡܠܝ̣ܠܳܐ ܠܒܰܪ ܐ̱ܢܳܫܳܐ ܕܰܒܚܰܫ̈ܶܐ ܛܡܝ̣ܪ ܗ̱ܘܳܐ ܒ̣ܨܰܝܬ ܘܶܐܫܟܰܚ̣ܬ: ܘܥܰܠ ܚܰܕ ܚܰܛܝܳܐ ܕܬܳܐܶܒ ܚܳܕܶܐ ܐܰܢ̱ܬ: ܘܚܰܕܘ̣ܬܳܐ ܕܰܡܫܰܡܠܝܳܐ ܒܰܫܡܰܝܳܐ ܡܰܠܶܦ ܐܰܢ̱ܬ: ܠܳܐ ܬ̣ܶܓܥܰܨ ܠܳܟ ܡܶܢܰܢ ܚܰܛܳܝ̈ܶܐ ܡܳܪܝܳܐ܇ ܐܳܦܠܳܐ ܠܥܳܠܰܡ ܐܳܠܶܡ ܐܰܢ̱ܬ ܕܬ̣ܶܛܰܪ ܠܰܢ ܒܝ̣̈ܫܳܬܳܐ: ܐܰܢ̱ܬ ܗܘ̣ ܗܰܘ̇ ܕܰܠܚܰܛܳܝ̈ܶܐ ܕܰܐܟܘܳܬܰܢ ܠܘܳܬ ܬܝܳܒܘ̣ܬܳܐ ܩܳܪܶܐ ܐܰܢ̱ܬ: ܘܳܐܡܰܪ ܐܰܢ̱ܬ ܕܰܠܡܳܐ ܗܰܘ̇ ܕܢܳܦܶܠ ܠܳܐ ܩܳܐܶܡ ܘܗܰܘ̇ ܕܗܳܦܶܟ ܠܳܐ ܡܶܬܦܢܶܐ: ܘܶܐܬ̣ܦܢܰܘ ܠܘܳܬܝ̱ ܒܢܰܝ̈ܳܐ ܕܰܐܪܚ̣ܶܩܘ̱: ܘܶܐܢܳܐ ܐܰܣܶܐ ܬܒܳܪܟܽܘܢ: ܘܰܠܘܳܬܝ̱ ܬܰܘ ܟܽܠܟܽܘܢ ܕܰܥܡܝ̣ܠܝ̣ܢ ܘܰܛܥܝ̣ܢܝ̣ܢ ܡܰܘ̈ܒܠܶܐ ܝܰܩܝ̣ܪ̈ܳܬܳܐ: ܘܶܐܢܳܐ ܐܰܢܝ̣ܚܟܽܘܢ: ܠܳܐ ܬ̣ܶܣܢܶܐ ܠܰܢ ܠܗܳܢܽܘܢ ܕܐܰܝܟ ܕܒܰܫܪܳܪܳܐ ܠܣܶܢܶܐܬܳܐ ܫܳܘܶܝܢܰܢ: ܟܰܕ ܡܥܝ̣ܢܳܐ ܕܚܘ̣ܒܳܐ ܘܠܳܐ ܡܶܬܥ̱ܰܗܕܳܢܳܐ ܕܒܝ̣̈ܫܳܬܳܐ ܐܝ̣ܬܰܝܟ ܘܰܕܢ̇ܰܚܶܒ ܠܰܒܥܶܠ̈ܕܒܳܒܶܐ ܕܝ̣ܠܰܢ: ܘܰܕܢ̇ܶܥܒܶܕ ܕܫܰܦܝ̣ܪ ܠܰܐܝܠܶܝܢ ܕܣܳܢܶܝܢ ܠܰܢ ܣܳܡ̣ܬ ܢܳܡܘ̣ܣܳܐ: ܠܳܐ ܗ̱ܘܳܐ ܒܰܠܚܘ̣ܕ ܫܒܰܥ ܙܰܒ̈ܢܝ̣ܢ ܐܶܠܳܐ ܘܰܫܒܰܥ ܥܰܠ ܫܰܒܥܝ̣ܢ ܒܝܰܘܡܳܐ ܕܢ̇ܶܫܒܘ̣ܩ ܠܰܐܝܠܶܝܢ ܕܡܰܣܟܠܝ̣ܢ ܒܰܢ ܦܳܩܶܕ ܐܰܢ̱ܬ: ܠܳܐ ܬ̣ܰܣܠܶܐ ܠܰܢ ܕܬܳܝܒܝ̣ܢܰܢ ܩܕܳܡܰܝܟ ܡܳܪܝܳܐ܇ ܗܰܘ̇ ܕܳܐܦܠܳܐ ܠܰܬܝܳܒܘ̣ܬܳܐ ܓܒܝ̣ܠܬܳܐ ܘܙܺܐܦܳܢܳܝܬܳܐ ܕܐܳܚܳܒ ܗܰܘ̇ ܕܰܒ̈ܡܰܠܟܶܐ ܝܰܬܝ̣ܪ ܪܰܫܝ̣ܥܳܐ ܡܫܰܡܠܝܳܐܝ̣ܬ ܫ̣ܳܛܬ: ܠܢܝ̣̈ܢܘܳܝܶܐ ܕܶܝܢ ܕܳܚܠ̈ܰܝ ܦܬܰܟܪ̈ܶܐ ܒܝܰܕ ܬܝܳܒܘ̣ܬܳܐ ܘܰܬܘܳܬ ܢܰܦܫܳܐ ܠܰܓܙܳܪ ܕܝܢܳܐ ܗܰܘ̇ ܟܡܝ̣ܪܳܐ ܫ̣ܪܰܝܬ: ܘܰܚܠܳܦ ܗܦܘ̣ܟܝܳܐ ܡܰܘܒܕܳܢܳܐ ܠܡܶܬܦܰܢܝܳܢܘ̣ܬܳܐ ܦܳܪܘ̣ܩܳܝܬܳܐ ܐܶܬ̣ܬܰܓܰܪܬ: ܡܶܛܽܠ ܕܰܐܢ̱ܬ ܗܘ̣ ܒܰܠܚܘ̣ܕܰܝܟ ܡܪܰܚܡܳܢܳܐ ܘܫܳܒܶܩ ܚܰܘ̈ܒܶܐ ܘܠܳܟ ܦܰܐܝܳܐ ܬܶܫܒܘ̣ܚܬܳܐ ܘܐܝ̣ܩܳܪܳܐ ܘܪܰܒܘ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܥܒܶܕ ܡܳܪܝܳܐ ܐܰܠܳܗܳܐ ܠܨܰܘܡܰܢ ܦܝ̣ܪܡܳܐ ܡܪܰܥܝܳܢܳܐ ܠܡܳܪܘ̣ܬܳܟ: ܘܰܨ̈ܠܰܘܳܬܰܢ ܪܝ̣ܚܳܐ ܒܣܰܝ̣ܡܳܐ ܠܰܐܠܳܗܘ̣ܬܳܟ: ܘܒܳܥܘ̣ܬܰܢ ܩܘ̣ܪܒܳܢܳܐ ܡܩܰܒܠܳܐ ܠܐܝ̣ܬܘ̣ܬܳܟ: ܘܚܰܣܳܐ ܠܥܰܡܳܟ ܘܒܰܪܶܟ ܠܝܳܪܬܘ̣ܬܳܟ: ܘܢܰܛܰܪ ܠܡܰܪܥܝ̣ܬܳܟ ܘܰܓܡܘ̣ܪ ܠܰܓܙܳܪܳܟ: ܘܰܦܪܘ̣ܩ ܠܰܓܒܝ̣ܠܬܳܟ ܘܪܰܚܶܡ ܥܰܠ ܟܽܠܗܽܘܢ ܝܰܠ̈ܕܶܝܗܿ ܕܥܺܕܬܳܟ: ܕܢ̇ܰܘܕܶܐ ܘܢ̇ܶܣܓܘ̣ܕ ܠܳܟ ܘܰܢ̇ܫܰܒܰܚ ܠܰܫܡܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀