ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܕܰܐܡܝ̣ܢܳܐܝ̣ܬ ܢ̇ܩܰܪܶܒ ܠܡܳܪܘ̣ܬܳܟ ܦܝ̣ܪܡܳܐ ܡܶܬܩܰܒܠܳܢܳܐ ܕܰܨ̈ܠܰܘܳܬܳܐ ܕܰܟ̈ܝܳܬܳܐ: ܘܢ̇ܰܥܛܰܪ ܩܕܳܡ ܪܰܒܘ̣ܬܳܟ ܪܝ̣ܚܳܐ ܒܰܣܝ̣ܡܳܐ ܕܨܰܘܡܳܐ ܩܰܕܝ̣ܫܳܐ ܘܢ̇ܰܣܶܩ ܠܐܝ̣ܩܳܪܳܟ ܦܺܐܪ̈ܶܐ ܕܰܥܒ̈ܳܕܶܐ ܡܝܰܬܪ̈ܶܐ: ܘܰܢ̇ܕܰܒܰܚ ܠܐܝ̣ܬܘ̣ܬܳܟ ܬܰܘܕܝ̣ܬܳܐ ܦܐܝ̣ܬܳܐ ܘܪܘ̣ܡܪ̈ܳܡܶܐ ܚܠܰܝ̈ܳܐ ܘܗܰܢܺܝ̈ܶܐܐ: ܘܢ̇ܶܣܰܒ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܛܳܒܳܐ ܟܰܕ ܠܳܐ ܒܥܰܝܢ̣ܳܝܗ̱ܝ ܐܶܫ̣ܬܟܰܚ ܠܰܢ: ܘܟܰܕ ܠܳܐ ܐܰܪܓܶܫ̣ܢܰܢ ܒܶܗ ܐܶܫ̣ܛܰܘܫܰܛ ܠܰܢ: ܠܗܰܘ̇ ܪܳܡܳܐ ܘܰܡܥܰܠܝܳܐ ܕܰܨܒ̣ܳܐ ܕܢ̣ܶܦܪܩܰܢ ܐܶܬܢܰܚ̣ܰܬ ܠܘܳܬܰܢ ܒܚܘ̣ܒܶܗ ܘܰܐܚܠ̣ܶܡ ܟܘ̣ܪ̈ܗܳܢܰܝܢ ܒܣܰܡܳܐ ܕܰܚܢܳܢܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܕܶܐܬ̣ܳܐ ܠܘܳܬܰܢ ܒܚܘ̣ܒܶܗ ܘܰܣܥ̣ܰܪ ܫܰܦܠܘ̣ܬܰܢ ܒܰܚܢܳܢܶܗ ܛܳܒܳܐ ܕܓܳـܠ̣ـܘ̱ ܪ̈ܰܚܡܰܘܗ̱ܝ ܡܬܘ̣ܡܳܝ̈ܶܐ: ܘܐܰܠܳܗܳܝ̈ܶܐ ܥܰܠ ܓܒܝ̣ܠܬܶܗ ܘܠܳܐ ܣܰܝܒ̣ܰܪ ܕܗܳܢܳܐ ܟܽܠܶܗ ܢ̣ܶܚܣܰܪ ܥܒܳܕܳܐ ܕܐܝ̣̈ܕܰܘܗ̱ܝ ܩܰܕܝ̣̈ܫܳܬܳܐ: ܒܰܪܢܳܫܳܐ ܗܰܘ̇ ܕܡ̣ܶܢ ܛܝ̣ܢܳܐ ܓܰܒ̣ܠܶܗ ܘܰܡܠܝ̣ܠܳܐ ܘܠܳܐ ܡܳܝܘ̣ܬܳܐ ܣܳܡ̣ܶܗ ܒܓܰܢܬܳܐ ܕܒܘ̣ܣܳܡ̈ܶܐ: ܘܡܶܛܽܠ ܕܰܛܥ̣ܳܐ ܗ̣ܘܳܐ ܥܓܝܢ̣ܳܐ ܒܰܚܛܝ̣ܬܳܐ: ܠܳܐ ܐܰܗܡܝ̣ ܪܳܥܝܳܐ ܛܳܒܳܐ ܡ̣ܶܢ ܗܳܝ ܕܢ̣ܺܐܬܳܐ ܠܰܒܥܳܬܶܗ ܕܥܶܪܒܳܐ ܐܰܒܝ̣ܕܳܐ: ܗܰܘ̇ ܕܒܰܢܟܝ̣ܠܘ̣ܬܶܗ ܕܚܶܘܝܳܐ ܡܳܪܘ̣ܕܳܐ ܛܥ̣ܳܐ ܡ̣ܶܢ ܡܶܢܝܳܢܳܐ ܓܡܝ̣ܪܳܐ ܕܰܡܠܝ̣̈ܠܶܐ: ܘܰܐܕܠ̣ܶܩ ܫܪܳܓܳܐ ܒܰܣ̣ܪܶܗ ܩܰܕܝ̣ܫܳܐ: ܘܟܰܢ̣ܶܫ ܒܰܝܬܗ ܕܥܳܠܡܳܐ ܡ̣ܶܢ ܟܽܠ ܙܢܳܐ ܕܰܚܛܝ̣ܬܳܐ: ܘܶܐܫܟ̣ܰܚ ܠܙܘ̣ܙܳܐ ܐܰܒܝ̣ܕܳܐ ܨܰܠܡܳܐ ܕܡܰܠܟܘ̣ܬܳܐ: ܕܰܛܡܝ̣ܪ ܗ̱ܘܳܐ ܒܚܰܫ̈ܶܐ ܕܰܐܫܚ̣ܶܬ ܒܰܚܛܝ̣ܬܳܐ ܘܕܰܟ̣ܝܶܗ ܘܡܰܪܩ̣ܶܗ ܒܟܘ̣ܪܳܐ ܕܡܰܥܡܘ̣ܕܝ̣ܬܳܐ ܡܚܰܣܝܳܢܝ̣ܬܳܐ ܘܒܰܣܚܳܬܳܐ ܕܡܰܘܠܳܕܳܐ ܕܡ̣ܶܢܕܪܝ̣ܫ: ܘܰܐܩ̣ܢܝܶܗ ܫܘ̣ܦܪܳܐ ܩܰܕܡܳܝܳܐ ܕܰܒܪܝ̣ܬܶܗ: ܘܰܒܨܰܘܡܶܗ ܕܰܚܠܳܦܰܘܗ̱ܝ ܙܰܟ̣ܝܶܗ ܠܰܟܝܳܢܶܗ ܪܰܦܝܳܐ ܘܰܒܣܳܥܘ̣ܪܘ̣ܬ ܬܶܕܡܪ̈ܳܬܶܗ ܐܰܣܝ̣ ܘܰܐܚܠ̣ܶܡ ܫܘ̣ܡ̈ܳܬܶܗ: ܚ̣ܰܪܰܪ ܡܳܪܝ̱ ܐܳܦ ܗܳܫܳܐ ܘܰܦܪܘ̣ܩ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܠܢܰܦ̈ܫܳܬܳܐ ܕܟܽܠܰܢ ܡ̣ܶܢ ܨܳܐܝܘ̣ܬܳܐ ܘܫܘ̣ܚܬܳܐ ܕܰܚܛܝ̣ܬܳܐ: ܘܠܳܐ ܐ̱ܢܳܫ ܡܶܢܰܢ ܬ̣ܶܥܒܶܕ ܕܢ̣ܶܗܘܶܐ ܡܶܫܬܰܪܝܳܢܳܐ ܐܰܘ ܡܶܬܦܰܪܫܳܢܳܐ ܡ̣ܶܢ ܡܰܘܗܰܒܬܳܐ ܕܪܘ̣ܚܳܟ ܩܰܕܝ̣ܫܳܐ: ܐܶܠܳܐ ܐܰܫܘܳܐ ܠܰܢ ܡܳܪܝܳܐ ܒܪ̈ܰܚܡܰܝܟ ܣܰܓܺܝ̈ܶܐܐ ܕܢ̇ܶܗܘܶܐ ܢܰܘܣ̈ܶܐ ܕܟܰܝ̈ܳܐ ܠܬܶܫܡܶܫܬܳܟ: ܘܗܰܝ̈ܟܠܶܐ ܩܰܕܝ̣̈ܫܶܐ ܠܰܥܡܘ̣ܪܝܳܐ ܕܐܝ̣ܩܳܪܳܟ ܘܐܰܝܟܰܢܳܐ ܕܒܰܥܡܳܕܳܟ ܐܶܬܢܰܗ̣ܰܪܢܰܢ ܘܰܒܨܰܘܡܳܟ ܐܶܬܚܰܝܰܠ̣ܢܰܢ: ܘܰܒܚܘ̣ܠ̈ܡܳܢܰܝܟ ܐܰܠܳܗܳܝ̈ܶܐ ܐܶܬ̣ܰܐܣܝ̣ܢܰܢ: ܘܰܐܫܘܳܐ ܠܰܢ ܠܰܩܝܳܡܬܳܐ ܫܒܝ̣ܚܬܳܐ ܘܰܠܦܶܨܚܳܐ ܡܰܦܨܚܰ ܟܽܠ: ܘܰܒܥܳܠܡܳܐ ܚܰܕܬܳܐ ܚܢܰܢ ܘܰܐܒ̈ܳܗܰܝܢ ܘܰܐܚ̈ܰܝܢ ܘܪ̈ܰܒܳܢܰܝܢ ܕܩܰܕܶܡ̣ܘ̱ ܫܟ̣ܶܒܘ̱ ܥܰܠ ܣܰܒܪܳܟ ܘܰܒܗܰܝܡܳܢܘ̣ܬܳܐ ܕܰܫܪܳܪܳܐ ܢ̇ܶܫܬܘܶܐ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܣܶܓܕܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܝܳܐ ܠܳܐ ܡܶܬܕܰܪܟܳܢܳܐ ܘܠܳܐ ܡܶܬܗܰܘܢܳܢܳܐ: ܣܰܓܝ̣ ܡܰܘܗܰܒܬܳܐ ܘܰܫܦܝ̣ܥ ܒܫܽܘܘ̣̈ܟܳܢܶܐ: ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܘܰܥܠܰܝܢ ܢ̣ܶܫܬܰܦܰܥ ܚܢܳܢܳܟ: ܘܢ̣ܰܪܚܶܩ ܡܶܢܰܢ ܠܰܓܙܳܡܳܐ ܕܟܺܐܢܘ̣ܬܳܟ: ܘܬ̣ܰܕܪܶܟܝ̱ ܠܰܢ ܛܰܝܒܘ̣ܬܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ ܘܰܬ̣ܒܰܛܶܠܝ̱ ܠܰܡܣܳܡܒܪܝ̣ܫܳܐ ܕܩܰܫܝܽܘ̣ܬ ܕܝ̣ܢܳܟ: ܘܚܘ̣ܣܳܝܳܐ ܓܡܝ̣ܪܳܐ ܫܰܟܶܢ ܠܢܰܦ̈ܫܳܬܳܐ ܕܝ̣ܠܰܢ ܘܰܕܥܰܢܝ̈ܕܰܝܢ: ܕܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܰܚ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀