ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܫܳܒܘ̣ܩܳܐ ܕܥܰܘ̈ܠܶܐ ܐ̱ܢܳܫܳܝ̈ܶܐ: ܠܗܰܘ̇ ܡܚܰܠܠܳܢܳܐ ܕܟܘ̣̈ܬܡܳܬܳܐ ܘܨܳܐܝ̈ܘܳܬܳܐ ܕܰܒܢܰܝ̈ܢܳܫܳܐ: ܠܗܰܘ̇ ܡܪܰܚܡܳܢܳܐ ܘܰܡܪܰܚܦܳܢܳܐ ܘܢܰܓܝ̣ܪ ܪܘ̣ܚܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܠܗܰܘ̇ ܐܳܣܝܳܐ ܕܟܽܠ ܟܺܐܒܝ̣̈ܢ ܘܥܳܨܽܘ̇ܒܳܐ ܕܟܽܠ ܡܰܚ̈ܘܳܢ: ܠܗܰܘ̇ ܚܰܝܠܳܐ ܟܰܣܝܳܐ ܕܰܒܬܰܪܥܝ̣ܬܳܐ ܠܳܐ ܡܶܬܥܰܩܰܒ ܘܰܒܦܘ̣ܡܳܐ ܠܳܐ ܡܶܬܡܰܠܰܠ: ܘܡܶܢ ܠܶܫܳܢܳܐ ܠܳܐ ܡܶܬܦܰܫܰܩ: ܘܒܝ̣ܕܰܥܬܳܐ ܠܳܐ ܡܶܬܕܪܶܟ: ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܠܳܐ ܨܳܒܶܐ ܒܰܐܒܕܳܢܳܐ ܕܰܓܒܝ̣ܠܬܶܗ: ܚܘ̣ܢܳܝܗ̱ܝ ܠܟܽܠܶܗ ܟܝܳܢܳܐ ܕܝ̣ܠܰܢ ܚܰܛܳܝܳܐ ܘܡܳܝܽܘ̣ܬܳܐ ܕܰܒܚܺܐܪܘ̣ܬܶܗ ܢܦ̣ܰܠ ܡܶܢ ܒܪܝ̣ܬܶܗ ܩܰܕܡܳܝܬܳܐ: ܗܳܝ ܕܫܰܦܝ̣ܪ ܡܰܬܩܢܳܐ ܗ̱ܘܳܬ݀ : ܪ̈ܰܚܡܰܝܟ ܡܳܪܝ̱ ܐܰܪܟܢܘ̣ܟ ܘܰܗ̣ܘܰܝܬ ܒܰܪܢܳܫܳܐ ܒܨܶܒܝܳܢܳܟ ܡܶܢ ܓܶܢܣܳܐ ܕܰܒܢܰܝ̈ܢܳܫܳܐ ܕܬ̣ܶܥܒܶܕ ܐܶܢܽܘܢ ܒܛܰܝܒܘ̣ܬܳܟ ܒܢܰܝ̈ܳܐ ܠܰܐܠܳܗܳܐ ܐܰܒܘ̣ܟ: ܢܦܰܩ̣ܬ ܓܶܝܪ ܒܳܬܰܪ ܒܥܳܬܶܗ ܕܰܟܝܳܢܰܢ ܐܰܒܝ̣ܕܳܐ: ܘܶܐܫܟܰܚ̣ܬܳܝܗ̱ܝ ܘܰܛܥܶܢ̣ܬܳܝܗ̱ܝ ܥܰܠ ܟܰܬܦ̈ܳܬܳܟ ܩܰܕܝ̣̈ܫܳܬܳܐ ܘܰܐܥܶܠ̣ܬܳܝܗ̱ܝ ܠܒܶܝܬ ܐܰܒܘ̣ܟ: ܘܫܰܝܶܢ̣ܬ ܠܝܳܠܘ̣ܕܳܟ ܒܰܕܡܳܐ ܕܝ̣ܠܳܟ ܝܰܩܝ̣ܪܳܐ: ܗܰܘ̇ ܕܰܚܠܳܦܰܝܢ ܐܶܫ̣ܬܰܦܰܥ ܥܰܠ ܨܠܝ̣ܒܳܐ ܕܝ̣ܠܳܟ ܦܳܪܘ̣ܩܳܝܳܐ: ܨܒܝ̣ ܒܰܢ ܡܳܪܝܳܐ ܒܪ̈ܰܚܡܰܝܟ ܘܰܐܦܢܳܐ ܠܰܢ ܡܶܢ ܬܘ̣ܩ̈ܠܳܬܳܐ ܕܰܚܛܝ̣ܬܳܐ ܘܰܐܝܬܳܐ ܠܰܢ ܡܶܢ ܬܰܘܫܳܐ ܕܒܝ̣̈ܫܳܬܳܐ ܠܐܘ̣ܪܚܳܟ ܕܚܰܝ̈ܶܐ: ܐܰܣܳܐ ܫܘ̣ܡ̈ܳܬܳܐ ܕܢܰܦ̈ܫܳܬܰܢ: ܘܕܰܟܳܐ ܠܚܘ̣ܫ̈ܳܒܶܐ ܕܪ̈ܶܥܝܳܢܰܝܢ: ܠܳܐ ܡܳܪܝ̱ ܬ̣ܶܟܦܘ̣ܪ ܒܰܢ ܡܶܛܽܠ ܣܰܢܝ̈ܳܬܳܐ ܕܝ̣ܠܰܢ: ܘܠܳܐ ܬ̣ܶܫܕܶܐ ܠܰܢ ܡܶܢ ܩܕܳܡܰܝܟ: ܡܶܛܽܠ ܢܰܚ̈ܬܶܐ ܨ̈ܳܐܶܐ ܕܰܥܒܳܕ̈ܰܝܢ ܒܝ̣̈ܫܶܐ: ܠܳܐ ܡܳܪܝ̱ ܬ̣ܰܦܩܰܢ ܟܺܐܢܘ̣ܬܳܟ ܠܒܰܪ ܡܶܢ ܒܶܝܬ ܓܢܘ̣ܢܳܟ: ܠܳܐ ܡܳܪܝ̱ ܢ̇ܶܦܘ̣ܩ ܡܶܢ ܩܕܳܡܰܝܟ ܠܚܶܫܘ̣ܟܳܐ ܒܰܪܳܝܳܐ ܒܰܕܡܘ̣ܬ ܗܰܘ̇ ܥܰܒܕܳܐ ܒܰܛܝ̣ܠܳܐ ܕܛܰܫܝ̣ ܟܰܟܪܶܗ ܒܓܰܘ ܐܰܪܥܳܐ ܘܠܳܐ ܐܶܬܬܰܓܰܪ ܒܳܗ̇: ܐܶܠܳܐ ܡܶܛܽܠ ܪ̈ܰܚܡܶܐ ܕܝ̣ܠܳܟ ܐܘ̣ܣܺܝ̈ܳܝܶܐ ܕܒܳܟ ܡܟܳܢܝ̣ܢ: ܫܒܘ̣ܩ ܠܗܽܘܢ ܠܡܰܣܟ̈ܠܳܢܶܐ ܘܚܰܣܳܐ ܠܚܰܝ̈ܳܒܶܐ: ܘܙܰܕܶܩ ܠܥܰܘ̈ܳܠܶܐ: ܩܰܕܶܫ ܠܛܰܡ̈ܶܐܐ: ܢܰܟ݂ܶܦ ܠܙܰܠܝ̈ܠܶܐ: ܚܽܘܢ ܠܚܰܛܳܝ̈ܶܐ: ܩܰܒܶܠ ܠܬܰܝ̈ܳܒܶܐ: ܨܒܝ̣ ܒܰܐܒܝ̣̈ܕܶܐ: ܐܰܪܘܰܚ ܠܰܐܠܝ̣̈ܨܶܐ: ܒܰܝܰܐ ܠܰܬܒܝ̣ܪ̈ܰܝ ܠܶܒܳܐ: ܙܽܘܢ ܠܝܰܬܡ̈ܶܐ: ܬܰܪܣܳܐ ܠܰܐܪ̈ܡܠܳܬܳܐ: ܦܰܪܢܶܣ ܠܡܶܣ̈ܟܺܢܶܐ: ܠܰܒܶܒ ܠܥܰܝܺܝ̣̈ܩܰܝ ܪܘ̣ܚܳܐ: ܫܰܝܶܢ ܫܓܘ̣̈ܫܝܶܐ: ܪܰܥܳܐ ܠܰܪ̈ܓܝ̣ܙܶܐ: ܐܰܥܒܰܪ ܠܣܶܕ̈ܩܶܐ: ܕܰܥܶܟ ܠܚܶܪ̈ܝܳܢܶܐ: ܠܥܺܕܬܳܟ ܐܰܘܪܶܒ: ܘܪܰܡܪܶܡ ܩܰܪܢܳܗ̇: ܘܒܰܛܶܠ ܡܶܢܳܗ̇ ܟܽܠ ܝܘ̣ܠ̈ܦܳܢܶܐ ܒܝ̣̈ܫܶܐ: ܘܟܽܠ ܐܶܪ̈ܶܣܺܝ̣ܣ ܡܚܰܒ̈ܠܳܬܳܐ: ܘܠܰܢ ܥܰܒ̈ܕܰܝܟ ܘܰܒܢܰܝ̈ܳܐ ܕܥܺܕܬܳܐ ܘܰܐܡܬܳܐ ܕܝ̣ܠܳܟ ܡܢܝ̣̈ܚܳܢܶܐ ܘܓܳܡܘ̣ܪ̈ܶܐ ܕܨܶܒܝܳܢܳܟ ܐܰܫܘܳܐ ܠܰܢ ܕܢ̇ܶܗܘܶܐ: ܘܡܶܢ ܡܶܨܛܰܠܝܳܢܘ̣ܬܳܐ ܕܫܘ̣ܪ̈ܥܳܬܳܐ: ܘܡܶܢ ܟܽܠ ܡܰܐܟܝܳܢܘ̣ܬܳܐ ܘܡܶܢ ܙܢܳܐ ܕܰܠܢܰܦܫܳܐ ܘܰܠܦܰܓܪܳܐ ܡܣܰܓܶܦ ܢܰܛܰܪ ܘܣܰܬܰܪ ܠܰܢ: ܘܰܠܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܳܐ ܕܰܐܝܟ ܠܒܝ̣̈ܫܰܝ ܒܶܣܪܳܐ ܕܰܣܥ̣ܰܪܢܰܢ ܩܕܳܡܰܝܟ ܫܒܘ̣ܩ ܘܚܰܣܳܐ ܘܰܥܛܝ̣: ܘܰܠܨܳܐܝܽܘ̣ܬܳܐ ܕܦܰܓܪܳܐ ܐܰܫܝ̣ܓ ܘܰܡܪܘ̣ܩ: ܠܛܘ̣ܠܫܳܐ ܘܰܠܛܰܡܽܐܘ̣ܬܳܐ ܕܢܰܦܫܳܐ ܕܰܟܳܐ ܘܩܰܕܶܫ: ܘܰܐܫܘܳܐ ܠܰܢ ܕܠܳܐ ܢ̇ܶܗܘܶܐ ܡܶܬܠܰܒ̈ܟܳܢܶܐ ܠܣܝ̈ܥܳܬܳܐ ܕܫܺܐܕ̈ܶܐ: ܒܝܰܕ ܢܳܛܘ̣ܪܘ̣ܬܳܐ ܕܡܰܠܰܐܟ̈ܶܐ ܕܝ̣ܠܳܟ ܩܰܕܝ̣̈ܫܶܐ ܘܰܒܡܰܥܒܪ̈ܳܬܳܐ ܕܚܝ̣̈ܠܳܬܳܐ ܕܠܳܐ ܩܶܢܛܳܐ ܐܰܥܒܰܪ ܠܰܢ: ܘܠܰܩܕܳܡ ܟܘ̣ܪܣܝܳܐ ܕܪܰܒܘ̣ܬܳܟ ܡܰܢܰܥ ܠܰܢ: ܘܰܣܛܰܪ ܡܶܢ ܟܽܠ ܚܘ̣ܝܳܒܳܐ ܘܦܶܓܥܳܐ ܡܚܰܕܝܳܢܳܐ ܕܒܳܟ ܐܰܦܨܰܚ ܠܰܢ: ܘܠܰܢ ܘܰܠܥܰܢܝ̈ܕܰܝܢ ܒܰܐܬܪ̈ܰܘܳܬܳܐ ܕܢܘ̣ܗܪܳܐ ܛܰܟܶܣ ܘܚܰܕܳܐ ܠܰܢ: ܘܰܒܟܶܢ̈ܫܶܐ ܫܒܝ̣̈ܚܶܐ ܕܩܰܕܝ̈ܫܰܝܟ ܡܢܝ̣ ܠܰܢ: ܘܰܒܓܰܒܳܐ ܝܰܡܝ̣ܢܳܝܳܐ ܕܝ̣ܠܳܟ ܚܠܘ̣ܛ ܠܰܢ: ܘܥܰܡ ܦܳܥ̈ܠܶܐ ܐ̱ܚܪ̈ܳܝܶܐ ܕܟܰܪܡܳܐ ܩܰܒܶܠ ܠܰܢ: ܘܠܳܟ ܙܳܕܩܳܐ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܡܶܢ ܟܽܠܰܢ: ܘܠܰܐܒܘ̣ܟ ܣܓܝ̣ܕܳܐ ܘܠܳܐ ܡܶܬܥ̱ܰܗܕܳܢܳܐ ܕܒܝ̣̈ܫܳܬܰܢ: ܘܚܳܕܶܐ ܒܛܰܝܒܘ̣ܬܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܕܰܡܦܰܢܶܐ ܫܶܐܠ̈ܳܬܰܢ ܘܡܰܥܒܰܪ ܣܰܟܠ̈ܘܳܬܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀