ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܦܳܪܘ̣ܩܳܐ ܕܰܒܨܰܘܡܶܗ ܙܰܟ̣ܝܰܢ: ܘܡܶܢ ܒܥܶܠܕܒܳܒܳܐ ܘܣܳܢܳܐܐ ܕܐ̱ܢܳܫܘ̣ܬܰܢ ܦ̣ܰܨܝܰܢ: ܘܰܒܕܰܪܶܗ ܕܥܰܡ ܐܳܟܶܠܩܰܪܨܳܐ ܦܘ̣ܪܩܳܢܳܐ ܥܒ̣ܰܕ ܠܰܢ: ܘܰܒܨܰܘܡܳܐ ܬܰܪܥܳܐ ܕܰܬܝܳܒܘ̣ܬܳܐ ܦ̣ܬܰܚ ܠܰܢ: ܘܰܫܒܝ̣ܠܳܐ ܕܐܘ̣ܪܚܳܐ ܚܰܘܝ̣ ܠܰܢ ܕܰܠܡܰܠܟܘ̣ܬܳܐ ܡܕܰܪܶܓ ܠܰܢ ܘܒܰܓܢܘ̣ܢܶܗ ܪܘ̣ܚܳܢܳܝܳܐ ܥܰܡ ܚܕܽܘ̣ܓ̈ܰܘܗ̱ܝ ܡܒܰܣܶܡ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܡܶܛܽܠ ܦܘ̣ܪܩܳܢܳܐ ܘܳܐܣܝܽܘ̣ܬܳܐ ܕܓܶܢܣܳܐ ܕܝ̣ܠܰܢ ܡܚܝ̣ܠܳܐ ܐܰܪܟܶܢ̣ܬ ܐܰܢ̱ܬ ܠܳܟ ܠܣܘ̣ܪܳܩܳܐ ܨܶܒܝܳܢܳܝܳܐ: ܘܡܘ̣ܟܳܟܳܐ ܐ̱ܢܳܫܳܝܳܐ ܒܰܡܪܰܚܡܳܢܘ̣ܬܳܟ ܐܶܬܬܰܚܬܝ̣ܬ: ܘܐܘ̣ܪܚܳܐ ܕܦܘ̣ܪܩܳܢܳܐ ܘܡܰܥܰܠܬܳܐ ܕܰܠܡܰܠܟܘ̣ܬܳܐ ܕܪܰܫ̣ܬ ܠܰܢ: ܘܰܠܘܳܬ ܚܰܝ̈ܶܐ ܫܰܪ̈ܝ̣ܪܶܐ ܘܠܳܐ ܡܶܬܚܰܒ̈ܠܳܢܶܐ ܗܰܕܝ̣ܬ ܠܰܢ ܒܝܰܕ ܨܰܘܡܳܐ ܩܰܕܝ̣ܫܳܐ: ܘܕܰܪ̈ܶܐ ܕܥܰܡ ܐܳܟܶܠܩܰܪܨܳܐ ܗܰܘ̇ ܕܰܒܠܰܥܒܘ̣ܬܳܐ ܫ̣ܕܳܢ ܡܶܢ ܕܘ̣ܝܳܪ̈ܰܘܗ̱ܝ ܕܦܰܪܕܰܝܣܳܐ: ܫܰܟܶܢ ܠܰܢ ܡܳܪܝ̱ ܕܰܐܝܟ ܣܳܝܽܘܡܘ̣ܬ ܢܳܡܘ̈ܣܰܝܟ ܢܶܗ̣ܘܶܐ ܨܰܘܡܰܢ ܘܰܨܠܰܘ̈ܳܬܰܢ: ܕܰܒܝܰܘ̈ܡܳܬܳܐ ܗܳܠܶܝܢ ܩܰܕܝ̈ܫܶܐ ܘܰܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ: ܘܰܫܪܝ̣ ܡܶܢܰܢ ܩܶܛܪ̈ܶܐ ܕܥܰܘܠܳܐ: ܚܣܳܡܳܐ: ܥܰܘܠܳܐ: ܚܶܪܝܳܢܳܐ: ܣܶܢܶܐܬܳܐ: ܐܰܟܬܳܢܘ̣ܬܳܐ: ܪܰܓܘ̣ܙܬܳܢܘ̣ܬܳܐ: ܘܟܽܠ ܡܶܐܣܰܪ̈ܝܳܬܳܐ ܕܢܶܟܠܳܐ: ܚܳܪܥܘ̣ܬܳܐ: ܒܥܶܠܕܒܳܒܘ̣ܬܳܐ: ܪܳܡܘ̣ܬܳܐ: ܚܰܘܪܳܐ ܙܰܠܝ̣ܠܳܐ: ܦܶܗܝܳܐ ܕܥܰܝ̈ܢܶܐ: ܠܳܐ ܡܪܰܚܡܳܢܘ̣ܬܳܐ: ܐܶܡ̣ܰܪ ܢܒܺܝܳܐ ܐܰܝܟܳܐ ܕܐܝ̣ܬܰܝܗܶܝܢ ܗܳܠܶܝܢ ܨܰܘܡܳܐ ܡܰܣܠܰܝ: ܘܰܨܠܘ̣ܬܳܐ ܠܳܐ ܡܶܬܩܰܒܠܳܐ: ܐܝ̣ܢ܇ ܡܳܪܝ̱ ܠܳܐ ܢܶܗ̣ܘܶܐ ܨܰܘܡܰܢ ܠܩܘ̣ܛܪܳܓܰܢ: ܐܰܝܟ ܗܰܘ̇ ܕܐܝ̣ܙܒܝ̣ܠ ܕܦܶܣܩܰܬ݀ ܘܣܳܒ̈ܶܐ ܕܐܝ̣ܙܰܪܥܝ̣ܠ ܩܰܒܶܠ̣ܘ̱: ܠܳܐ ܬܶܗ̣ܘܶܐ ܒܳܥܘ̣ܬܰܢ ܐܰܝܟ ܗܳܝ ܕܰܦܪܝ̣ܫܳܐ ܕܪ̈ܳܡܳܬܳܐ ܐܶܬ̣ܪܰܥܝ̣: ܐܶܠܳܐ ܡܩܰܒ̈ܠܳܢܝܳܬܳܐ ܘܰܡܪ̈ܰܥܝܳܢܝܳܬܳܐ ܐܰܝܟ ܗܰܘ̇ ܡܳܟܣܳܐ ܕܒܰܚ̈ܛܳܗܰܘܗ̱ܝ ܐܰܘܕܝ̣: ܢܶܗ̣ܘܶܐ ܨܰܘܡܰܢ ܡܩܰܒܠܳܐ ܐܰܝܟ ܗܰܘ̇ ܕܝܰܘܢܳܢ ܓܙܰܪ ܘܢܝ̣ܢܘ̈ܳܝܶܐ ܨܳܡ̣ܘ̱: ܐܰܝܟ ܗܰܘ̇ ܕܡܽܘܫܶܐ ܒܶܗ ܐܶܙܕܰܗܝ̣: ܘܺܐܠܺܝܳܐ ܒܶܗ ܠܪܰܘܡܳܐ ܐܶܬ̣ܥܰܠܝ̣: ܘܰܐܝܟ ܗܰܘ̇ ܕܒܶܝܬ ܚܰܢܰܢܝܳܐ ܕܒܶܗ ܠܢܘ̣ܪܳܐ ܕܫܰܠܗܶܒܝ̣ܬܳܐ ܙܟ̣ܰܘ: ܘܰܐܝܟ ܗܰܘ̇ ܕܕܳܢܺܝ̣ܐܝܶܠ ܕܒܶܗ ܠܡܶܓܠܳܐ ܐ̱ܪ̈ܳܙܶܐ ܟܣܰܝ̈ܳܐ ܐܶܫ̣ܬܘܝ̣: ܘܰܐܝܟ ܗܰܘ̇ ܕܶܐܣܬܝ̣ܪ ܘܡܽܘܪܕܟܰܝ ܕܒܶܗ ܥܰܠ ܗܳܡܳܢ ܐܶܫ̣ܬܰܠܰܛܘ̱: ܘܰܐܝܟ ܗܰܘ ܕܒܶܝܬ ܩܘ̣ܪܢܺܝܠܺܝܳܘܣ ܘܰܕܒܶܝܬ ܦܶܛܪܽܘܣ ܕܠܰܓܡܝ̣ܪܘ̣ܬܳܐ ܡܫܰܡܠܰܝܬܳܐ ܩܰܒ̣ܶܠܘ̱: ܬܘ̣ܒ ܕܶܝܢ ܡܳܪܝܳܐ ܒܳܥܶܝܢܰܢ ܡܶܢܳܟ ܚܰܝܶܠ ܠܰܢ ܥܰܠ ܒܥܶܠܕܒܳܒܳܐ ܕܝ̣ܠܰܢ ܣܳܛܳܢܳܐ: ܒܰܛܶܠ ܠܘ̣ܬܳܟܰܘ̈ܗ̱ܝ ܕܰܥܠܰܝܢ: ܦܰܣܶܩ ܢܶܫܒܰܘ̈ܗ̱ܝ ܕܰܢܟܝ̣ܠܳܐ ܡܰܟܝܳܢܰܢ ܘܬܰܒܰܪ ܦܰܚܰܘ̈ܗ̱ܝ: ܘܡܶܢ ܡܨܺܝ̈ܕܳܬܶܗ ܦܰܠܶܛ ܠܰܢ: ܥܰܘܠܶܗ ܐܰܗܦܶܟ ܒܪܝ̣ܫܶܗ: ܘܡܶܢ ܟܡܺܐܢܰܘ̈ܗ̱ܝ ܫܰܘܙܶܒ ܠܰܢ: ܕܝ̣ܠܳܟ ܐܝ̣ܬܰܝܢ ܘܠܳܐ ܢܶܫ̣ܒܶܐ ܠܰܢ ܡܶܢܳܟ: ܘܒܳܟ ܡܰܘܕܶܝܢܰܢ ܘܠܳܐ ܢܶܓܢܘ̣ܒ ܠܰܢ ܒܚܘ̣ܬܚ̈ܳܬܰܘܗ̱ܝ: ܠܳܐ ܢ̣ܫܰܥܒܶܕ ܠܰܢ ܒܪܶܚܡܰܬ݀ ܟܶܣܦܳܐ ܘܝܰܥܢܘ̣ܬܳܐ: ܠܳܐ ܢ̣ܫܰܕܶܠ ܠܰܢ ܒܪܶܓܰܬ݀ ܟܰܪܣܳܐ ܘܡܶܢܳܟ ܢ̣ܰܪܚܶܩ ܠܰܢ: ܠܳܐ ܢ̣ܰܛܥܶܐ ܒܰܢ ܒܪܶܚܡܰܬ݀ ܡܳܡܘ̣ܢܳܐ: ܠܳܐ ܢ̣ܰܠܶܦ ܠܰܢ ܫܘ̣ܒܗܳܪܳܐ ܘܚܘ̣ܬܪܳܐ ܕܡܶܢܳܟ ܡܰܒܥܶܕ ܠܰܢ: ܠܳܐ ܢܶܡ̣ܠܶܐ ܠܰܢ ܚܶܡܬܳܐ ܘܪܘ̣ܓܙܳܐ ܚܠܳܦ ܡܘ̣ܟܳܟܳܐ ܕܡܶܢܳܟ ܝ̣ܠܶܦܢܰܢ: ܡܚܝ̣ܠ ܗ̱ܘ̣ ܟܝܳܢܰܢ ܥܰܦܪܳܢܳܐ ܕܢ̣ܶܬܟܰܬܰܫ ܥܰܡܶܗ ܕܒܶܠܶܐܝܰܪ ܡܶܬܝܰܕܥܳܢܳܐ: ܬܰܟܬܘ̣ܫܳܟ ܕܰܚܠܘܦܰܝܢ ܕܥܰܡܶܗ ܢ̣ܶܗܘܶܐ ܠܰܢ ܡܥܰܕܪܳܢܳܐ: ܕܰܪܳܟ ܕܰܣܚ̣ܰܦ ܫܘ̣ܠܛܳܢܶܗ ܢܶܗ̣ܘܶܐ ܠܰܢ ܙܰܝܢܳܐ ܚܰܣܝ̣ܢܳܐ: ܘܚܶܣܢܳܐ ܠܳܐ ܡܶܬܚܰܣܢܳܢܳܐ ܘܠܳܐ ܡܶܬܟܰܒܫܳܢܳܐ: ܐܰܝܟܰܢܳܐ ܕܰܒܝܰܕ ܡܫܰܝܢܘ̣ܬܳܐ ܘܰܐܘܝܽܘ̣ܬܳܐ ܘܰܚܕܳܝܽܘ̣ܬܳܐ ܕܢܰܦܫܳܐ ܘܦܰܓܪܳܐ: ܘܰܒܝܰܕ ܚܘ̣ܫ̈ܳܒܶܐ ܕܟܰܝ̈ܳܐ ܘܕܘ̣ܒܳܪ̈ܶܐ ܡܥܰܠܰܝ̈ܳܐ: ܘܪ̈ܶܥܝܳܢܶܐ ܫܦܰܝ̈ܳܐ: ܘܰܥܒ̈ܳܕܶܐ ܓܒܰܝ̈ܳܐ: ܢ̇ܫܰܡܠܶܐ ܨܰܘܡܰܢ ܘܕܶܒܚ̈ܰܝܢ ܘܩܘ̣ܪ̈ܒܳܢܰܝܢ: ܘܒܳܥ̈ܘܳܬܰܢ ܘܬܰܟܫ̈ܦܳܬܰܢ: ܘܢܶܫ̇ܬܘܶܐ ܠܒܘ̣ܣܳܡܳܐ ܕܦܶܨܚܳܟ ܡܰܥܒܶܕ ܚܰܝ̈ܶܐ: ܘܡܰܦܨܰܚ ܟܽܠ: ܘܰܠܥܰܕܥܺܐܕܳܟ ܡܚܰܕܶܬ ܟܽܠ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܕܠܳܐ ܫܶܠܝܳܐ: ܠܳܟ ܡܳܪܝ̱ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܒܰܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ ܨܳܡ̣ܬ ܚܠܳܦܰܝܢ: ܘܰܐܩܝ̣ܡܬ ܠܰܢ ܢܝ̣ܫܳܐ ܕܙܳܟܘ̣ܬܳܐ: ܘܰܕܪܰܫ̣ܬ ܠܰܢ ܐܘ̣ܪܚܳܐ ܕܢ̇ܶܐܪܘ̣ܥ ܠܨܶܢܥ̈ܳܬܶܗ ܢܟܝ̣̈ܠܳܬܳܐ ܕܳܐܟܶܠܩܰܪܨܳܐ: ܘܚܰܬܶܡ̣ܬ ܐܳܦ ܠܛܘ̣ܦ̈ܣܶܐ ܐ̱ܪ̈ܳܙܳܢܳܝܶܐ ܕܰܢܒܺܝ̈ܶܐ: ܘܳܐܦ ܗܳܫܳܐ ܡܦܝ̣ܣܝ̣ܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬ̣ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ: ܘܫܰܟܶܢ ܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢܰܪܗܛܝ̣ܘܗ̱ܝ ܠܰܐܓܘ̣ܢܳܐ ܗܳܢܳܐ ܪܘ̣ܚܳܢܳܝܳܐ ܕܨܰܘܡܳܐ ܩܰܕܝ̣ܫܳܐ: ܘܚܰܣܳܐ ܘܰܫܒܘ̣ܩ ܠܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܳܐ ܕܝ̣ܠܰܢ: ܡܪܰܚܡܳܢܳܐ ܓܶܝܪ ܐܝܬܰܝܟ ܘܨܳܒܶܐ ܒܪ̈ܰܚܡܶܐ ܕܬܰܝ̈ܳܒܶܐ: ܘܰܪܓܝ̣ܓ ܠܦܘ̣ܪܩܳܢܳܐ ܕܡܰܣܟ̈ܠܳܢܶܐ: ܘܰܦܐܶܐ ܠܳܟ ܫܘ̣ܒܚܳܐ ܘܐܝ̣ܩܳܪܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀