ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܰܐܝܟ ܡܰܠܦܳܢܘ̣ܬܳܐ ܕܝ̣ܠܳܟ ܡܰܠܝܰܬ݀ ܚܰܝ̈ܶܐ: ܢ̇ܫܰܡܠܶܐ ܠܶܐܣܛܰܕܺܝܳܘܢ ܗܳܢܳܐ ܕܨܰܘܡܳܐ ܩܰܕܝ̣ܫܳܐ: ܘܰܠܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ: ܘܟܰܕ ܕܟܰܝ̈ܳܐ ܡܶܢ ܛܰܡ̈ܶܐܐ ܥܳܒܶܕ ܐܰܢ̱ܬ ܠܰܢ: ܘܡܶܢ ܡܚܝ̣̈ܠܶܐ ܚܠܝ̣̈ܡܶܐ: ܘܡܶܢ ܡܶܣ̈ܟܺܢܶܐ ܥܰܬܝ̣ܪ̈ܶܐ: ܘܰܫܡܰܝ̈ܳܢܶܐ ܚܠܳܦ ܐܰܪ̈ܥܳܢܶܐ: ܫܘ̣ܒܚܳܐ ܘܐܝ̣ܩܳܪܳܐ ܘܣܶܓܕܬܳܐ ܢ̇ܰܣܶܩ ܠܳܟ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܝܳܗܘ̣ܒܳܐ ܕܢܳܡܘ̣ܣܳܐ ܪܘ̣ܚܳܢܳܝܳܐ: ܘܰܡܒܰܕܩܳܢܳܐ ܕܐܘ̣ܪܚܳܐ ܡܥܰܠܰܝܬܳܐ ܘܡܰܚܝܳܢܝ̣ܬܳܐ: ܗܰܘ̇ ܕܰܒܨܰܘܡܳܐ ܢ̣ܰܨܰܚ ܠܟܺܐܢ̈ܶܐ: ܘܒܶܗ ܙܰܗܝ̣ ܠܰܒܬܘ̣̈ܠܶܐ ܓܡܝ̣ܪ̈ܶܐ: ܘܒܶܗ ܒ̣ܰܛܶܠ ܠܰܓܙܳܡܳܐ ܡܰܪܝ̣ܪܳܐ ܡܶܢ ܬܰܝ̈ܳܒܶܐ ܫܰܪ̈ܝ̣ܪܶܐ: ܕܠܶܗ ܡܦܝ̣ܣܝ̣ܢܰܢ ܬܟܝ̣ܠܳܐܝ̣ܬ ܕܰܢ̣ܚܰܝܶܠ ܠܰܢ ܕܙܰܕܝ̣ܩܳܐܝ̣ܬ ܢ̇ܨܽܘܡ ܘܕܰܟܝܳܐܝ̣ܬ ܢ̇ܨܰܠܶܐ: ܘܙܰܗܝܳܐܝ̣ܬ ܢ̇ܶܬܥܰܢܘܶܐ: ܘܩܰܕܝ̣ܫܳܐܝ̣ܬ ܢ̇ܶܬܕܰܒܰܪ: ܘܰܒܨܰܘܡܰܢ ܚܘ̣ܣܳܝܳܐ ܠܢܰܦܫ̈ܳܬܰܢ ܢ̇ܶܬܬܰܓܰܪ: ܫܘ̣ܒܩܳܢܳܐ ܕܣܰܟܠ̈ܘܳܬܰܢ ܢ̇ܰܥܬܰܪ: ܘܰܟܠܝ̣̈ܠܶܐ ܕܙܳܟܘ̣ܬܳܐ ܒܝܰܘܡܳܐ ܕܰܩܝܳܡܬܳܐ ܢ̇ܶܣܰܒ: ܘܫܘ̣ܒܚܳܐ ܕܠܳܐ ܫܶܠܝܳܐ ܢ̇ܰܣܶܩ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܪܰܒܳܐ ܒܡܰܘܗ̈ܒܳܬܳܐ ܘܰܫܒܝ̣ܚ ܒܫܘ̣̈ܟܳܢܶܐ ܘܰܡܫܰܒܚܳܐ: ܗܰܘ̇ ܕܐܝ̣ܬܰܝܟ ܦܳܪܘ̣ܩܳܐ ܕܗܳܢܽܘܢ ܕܰܐܠܝ̣ܨܺܝ̣ܢ: ܘܰܕܗܳܢܽܘܢ ܕܡܶܬܩܰܦܚܝ̣ܢ ܡܢܝ̣ܚܳܢܳܐ: ܕܗܳܢܽܘܢ ܕܡܶܫܬܰܚܩܝ̣ܢ ܒܶܝܬ ܓܰܘܣܳܐ ܘܰܡܫܰܘܙܒܳܢܳܐ: ܕܗܳܢܽܘܢ ܕܡܶܬܬܰܥܘ̣ܠܝ̣ܢ ܘܰܕܗܳܢܽܘܢ ܕܩܳܪܶܝܢ ܠܳܟ ܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܡܥܰܕܪܳܢܳܐ: ܐܰܢ̱ܬ ܐܝ̣ܬܰܝܟ ܐܰܠܳܗܳܐ ܕܝ̣ܠܰܢ ܘܰܠܒܰܪ ܡܶܢܳܟ ܠܳܐ ܝܳܕܥܝ̣ܢܰܢ: ܘܠܰܫܡܳܟ ܩܰܕܝ̣ܫܳܐ ܝܳܕܥܝ̣ܢܰܢ ܘܠܳܟ ܟܽܠܰܢ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܒܗܳܠܶܝܢ ܝܰܘܡ̈ܳܬܳܐ ܕܟܰܝ̈ܳܐ ܕܨܰܘܡܳܐ ܩܰܕܝ̣ܫܳܐ: ܟܰܕ ܥܰܠ ܪ̈ܰܚܡܰܝܟ ܣܰܓܺܝ̈ܶܐܐ ܘܠܳܐ ܡܶܬܕܰܪ̈ܟܳܢܶܐ ܬܟܝ̣ܠܝ̣ܢܰܢ: ܘܰܠܥܘ̣ܕܪܳܢܳܐ ܕܡܶܢܳܟ ܡܣܰܟܶܝܢܰܢ ܘܰܡܟܰܬܪܝ̣ܢܰܢ: ܘܰܠܘܳܬܳܟ ܗܳܟܝ̣ܠ ܬܰܠ̈ܝܳܢ ܥܰܝ̈ܢܶܐ ܕܟܽܠܰܢ ܥܰܡ ܠܶܒܰܘ̈ܳܬܰܢ: ܘܡܶܬܓܰܘܣܝ̣ܢܰܢ ܘܒܳܥܶܝܢܰܢ ܡܶܢ ܛܰܝܒܘ̣ܬܳܟ: ܕܬ̣ܰܕܪܶܟ ܠܰܢ ܠܥܰܒ̈ܕܶܐ ܕܝ̣ܠܳܟ ܒܰܚܢܳܢܳܟ: ܘܬ̣ܶܗܘܶܐ ܠܰܢ ܡܰܢ ܒܥܳܩܬܳܐ ܡܒܰܝܳܐܢܳܐ: ܒܐܘ̣ܠ̈ܨܳܢܶܐ ܕܶܝܢ ܡܥܰܕܪܳܢܳܐ: ܒܢܶܟ̈ܠܶܐ ܡܣܰܬܪܳܢܳܐ: ܒܰܪ̈ܕܘ̣ܦܝܶܐ ܡܣܰܝܥܳܢܳܐ: ܒܰܩܪ̈ܳܒܶܐ ܡܢܰܛܪܳܢܳܐ: ܒܩܝ̣̈ܢܕܘ̣ܢܘ̣ ܦܳܪܘ̣ܩܳܐ: ܐܳܣܝܳܐ ܒܚܰܫ̈ܶܐ: ܙܳܝܽܘ̣ܢܳܐ ܒܣܘ̣̈ܢܩܳܢܶܐ: ܒܚܰܣܝ̣ܪܘ̣ܬܳܐ ܡܫܰܪܬܚܳܢܳܐ ܘܰܡܫܰܡܠܝܳܢܳܐ: ܕܝܽܘܩܪ̈ܶܐ ܡܰܩܠܳܢܳܐ: ܕܢܘ̣̈ܬܳܦܶܐ ܘܥܘ̣̈ܘܳܟܶܐ ܕܡܶܢ ܦܘ̣ܠܚܳܢܳܐ ܕܛܳܒ̈ܳܬܳܐ ܡܰܪܚܩܝ̣ܢ ܡܒܰܛܠܳܢܳܐ: ܕܢܶܣ̈ܝܽܘ̣ܢܶܐ ܫܪܳܝܳܐ: ܕܣܘ̣ܓ̈ܦܳܢܶܐ ܡܦܰܠܗܕܳܢܳܐ: ܕܚܰܘܒ̈ܶܐ ܡܚܰܣܝܳܢܳܐ: ܕܰܚ̈ܛܳܗܶܐ ܫܳܒܘ̣ܩܳܐ ܘܠܳܐ ܡܶܬܥ̱ܰܗܕܳܢܳܐ: ܐܰܝܟܰܢܳܐ ܕܰܒܟܽܠܙܒܰܢ ܒܢܳܡܘ̣̈ܣܰܝܟ ܢ̇ܶܬܗܰܓܶܐ: ܘܰܒܦܘ̣ܩ̈ܕܳܢܰܝܟ ܢ̇ܶܬܚܰܟܰܡ: ܘܰܒܙܰܕܝ̣ܩܘ̣ܬܳܟ ܢ̇ܶܥܬܰܪ: ܘܟܺܐܢܘ̣ܬܳܟ ܘܗܰܝܡܳܢܘ̣ܬܳܟ ܢ̇ܶܓܡܘ̣ܪ ܘܨܶܒܝܳܢܳܟ ܢ̇ܫܰܡܠܶܐ: ܘܰܒܟܽܠܙܒܰܢ ܗܳܠܶܝܢ ܕܫܳܦܪ̈ܳܢ ܠܳܟ ܢ̇ܶܣܥܘ̣ܪ: ܘܰܠܛܳܒ̈ܳܬܳܐ ܕܰܡܠܝ̣̈ܟܳܢ ܢ̇ܶܫܬܘܶܐ ܒܛܰܝܒܘ̣ܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܘ̣ܬܶܗ ܕܝ̣ܚܝ̣ܕܳܝܳܐ ܒܪܳܟ: ܕܥܰܡܶܗ ܠܳܟ ܦܐܶܐ ܫܘ̣ܒܚܳܐ ܘܐܝ̣ܩܳܪܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܝ̣ܢ܇ ܒܒܳܥܘ̣ ܡܶܢܳܟ ܡܳܪܝܳܐ ܐܰܠܳܗܳܐ: ܗܰܘ̇ ܕܡܶܛܽܠ ܣܰܓܺܝܽܐܘ̣ܬ ܛܰܝܒܘ̣ܬܳܟ ܕܰܠܘܳܬܰܢ ܐܰܠܶܦ̣ܬ ܠܰܢ ܕܰܨܠܰܘ̈ܳܬܳܐ ܘܒܳܥ̈ܘܳܬܳܐ ܥܰܡ ܨܰܘ̈ܡܶܐ ܕܟܰܝ̈ܳܐ ܘܩܰܕܝ̈ܫܶܐ ܢ̇ܩܰܪܶܒ ܠܳܟ ܚܠܳܦ ܚܛܳܗ̈ܶܐ ܘܣܰܟܠ̈ܘܳܬܳܐ ܕܝ̣ܠܰܢ ܘܰܕܟܽܠܶܗ ܥܰܡܳܐ ܕܝ̣ܠܳܟ ܡܗܰܝܡܢܳܐ: ܐܰܢ̱ܬ ܡܳܪܝܳܐ ܪܳܚܶܡ ܐ̱ܢܳܫ̈ܳܐ ܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܡܶܢ ܐܝ̣ܕܰܝ̈ܢ ܠܰܢܝܳܚܳܐ ܕܰܐܠܳܗܘ̣ܬܳܟ: ܘܰܠܚܘ̣ܣܳܝܳܐ ܕܚܰܘ̈ܒܰܝܢ ܘܰܠܫܘ̣ܒܩܳܢܳܐ ܕܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܳܐ ܕܝ̣ܠܰܢ: ܘܗܰܒܠܰܢ ܕܰܒܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܕܨܰܘܡܳܐ ܦܳܪܘ̣ܩܳܝܳܐ ܢ̇ܪܰܥܶܝܟ ܒܕܘ̣ܒܳܪ̈ܶܐ: ܘܢ̇ܶܫܦܰܪ ܠܳܟ ܒܰܥ̈ܒܳܕܶܐ ܘܰܒܡ̈ܶܠܐܶ: ܘܰܐܫܘܳܐ ܠܰܢ ܕܰܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܢ̇ܶܫܬܘܶܐ ܠܫܰܘܬܳܦܘ̣ܬܳܐ ܫܰܪܝ̣ܪܬܳܐ ܕܦܶܨܚܳܐ ܩܰܕܝ̣ܫܳܐ: ܘܰܢ̇ܫܰܒܰܚ ܬܶܫܒ̈ܚܳܬܳܐ ܩܰܕܝ̣̈ܫܳܬܳܐ ܥܰܡ ܟܶܢ̈ܫܶܐ ܕܩܰܕܝ̣̈ܫܰܝܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀