ܛܟܣܐ ܕܚܕ ܒܫܒܐ ܪܒܐ ܕܩܝܡܬܐ ܦܪܘܩܝܬܐ
ܡܰܘܕܥܳܢܽܘܬܳܐ
ܡܶܢ ܩܕܳܡ ܕܢܺܐܡܪܽܘܢ ܡܰܘܪܒܳܐ ܕܠܺܠܝܳܐ܆ ܟܰܕ ܐܳܡܪܺܝܢ ܟܳܗܢ̈ܶܐ ܘܰܡܫܰܡܫܳܢ̈ܶܐ ܬܶܫܡܶܫܬܳܐ ܕܥܰܢܺܝ̈ܕܶܐ ܥܳܐܠܺܝܢ ܠܡܰܕܒܚܳܐ ܪܺܝܫܟܳܗܢ̈ܶܐ ܘܩܰܫܺܝ̈ܫܶܐ ܘܰܡܫܰܡܫܳܢ̈ܶܐ܆ ܘܛܳܥܢܺܝܢ ܠܦܺܝܪܡܳܐ ܘܰܡܩܺܝܡܺܝܢ ܠܶܗ ܠܰܨܠܺܝܒܳܐ ܡܶܢ ܩܰܒܪܳܐ܆ ܘܡܰܫܠܚܺܝܢ ܡܶܢܶܗ ܡܳܐܢ̈ܶܐ ܕܰܩܒܽܘܪܬܳܐ܆ ܘܰܡܫܺܝܓܺܝܢ ܠܶܗ ܒܡܰܝ̈ ܘܰܪ̈ܕܶܐ܆ ܘܰܡܨܰܒܬܺܝܢ ܠܶܗ ܒܡܳܐܢ̈ܶܐ ܫܰܦܺܝܪ̈ܶܐ ܕܢܶܙܕܰܝܰܚ ܒܗܽܘܢ ܐܰܘܟܺܝܬ ܢܶܗܘܶܐ ܡܶܢ ܙܚܽܘܪܺܝܬܳܐ ܣܽܘܡܳܩܳܐ ܐܰܟܡܳܐ ܕܳܐܡܰܪ ܐܶܫܰܥܝܳܐ ܢܒܺܝܳܐ «ܡܰܢܽܘ ܗܳܢܳܐ ܕܳܐܬܶܐ ܡܶܢ ܐܰܕܽܘܡ ܘܣܽܘ̈ܡܳܩܺܝܢ ܢܰܚܬܰܘ̈ܗ̱ܝ (ܐܶܫܰܥܝܳܐ ܣܓ: ܐ ـ ܒ)»
ܗܳܝܕܶܝܢ ܪ̈ܺܝܫܟܳܗܢܶܐ ܐܰܘ ܟܳܗܢܳܐ ܡܪܺܝܡ ܠܰܨܠܺܝܒܳܐ ܒܝܰܡܺܝܢܶܗ ܘܰܡܣܰܒܰܪ ܠܰܡܗܰܝ̈ܡܢܶܐ ܥܰܠ ܩܝܳܡܬܳܐ ܕܦܳܪܽܘܩܰܢ ܘܳܐܡܰܪ ܒܩܳܠܳܐ ܪܳܡܳܐ: ܐܰܚ̈ܰܝ ܣܒܰܪܬܳܐ ܚܕܰܬܳܐ ܡܣܰܒܰܪ ܐ̱ܢܳܐ ܠܟܽܘܢ܆ "ܩܳܡ ܡܫܺܝܚܳܐ ܡܶܢ ܩܰܒܪܳܐ" ܘܰܡܚܳܐ ܠܰܒܥܶܠܕܒ̈ܳܒܰܘܗ̱ܝ ܠܒܶܣܬܪܶܗ.
ܘܡܰܝܬܶܝܢ ܘܰܡܩܺܝܡܺܝܢ ܠܶܗ ܥܰܠ ܡܢܳܪܬܳܐ ܩܕܳܡ ܦܳܬܽܘܪ ܚܰܝ̈ܶܐ ܘܡܰܪ̈ܘܚܳܬܳܐ ܘܩܶܪ̈ܝܽܘܢܶܐ ܡܶܟܳܐ ܘܡܶܟܳܐ܆ ܘܢܺܐܡܪܽܘܢ:
ܩܠܐ: ܒܩ̄ ܩܽܘܩܰܠܝܽܘܢ ܒܪܶܟܢܳܐ ܩܰܕܡܳܝܳܐ
ܢܩܽܘܡ ܐܰܠܳܗܳܐ ܘܢܶܬܒܰܕܪܽܘܢ ܟܽܠܗܽܘܢ ܒܥܶܠ̈ܕܒܳܒܰܘܗ̱ܝ ܗ̄ܘܗ̄܆ ܘܢܶܥܪܩܽܘܢ ܣܳܐܢܰܘ̈ܗ̱ܝ ܡܶܢ ܩܕܳܡܰܘܗ̱ܝ܀
ܘܰܐܝܟ ܕܡܶܬܛܰܠܰܩ ܬܶܢܳܢܳܐ ܢܶܬܛܰܠܩܽܘܢ ܗ̄ܘܗ̄܆ ܘܢܺܐܒܕܽܘܢ ܪ̈ܰܫܺܝܥܶܐ ܡܶܢ ܩܕܳܡ ܡܳܪܝܳܐ܀
ܥܩܒܐ: ܒܩ̄ ܒܠܰܝ̈ܠܰܘܳܬܳܐ ܡܩܰܕܡܺܝܢܰܢ
ܡܶܢ ܓܰܘ ܩܰܒܪܳܐ ܒܫܽܘܒܚܳܐ ܩܳܡܬ ܝܳܗܶܒ ܚܰܝ̈ܶܐ ܡܫܺܝܚܳܐ ܐܰܠܳܗܰܢ܆ ܘܠܳܐܕܳܡ ܪܰܡܝܳܐ ܐܰܩܺܝܡܬ ܥܰܡܳܟ ܐܰܢ̱ܬ ܛܳܒܳܐ ܘܪܳܚܶܡ ܐ̱ܢܳܫ̈ܳܐ܆ ܫܰܝܢܳܟ ܪܰܒܳܐ ܘܰܫܠܳܡܳܟ ܫܰܟܶܢ ܠܰܢ ܒܪ̈ܰܚܡܰܝܟ ܪܳܚܶܡ ܐ̱ܢܳܫ̈ܳܐ܀
ܡܫܰܡܫܳܢܳܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܚܰܝܳܐ ܘܠܳܐ ܡܳܝܽܘܬܳܐ ܕܰܒܡܰܘܬܶܗ ܐܰܚܺܝ ܠܰܒܪܺܝܬܶܗ ܘܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ܆ ܘܰܒܢܽܘܚܳܡܶܗ ܚܰܕܺܝ ܠܡܰܪܥܺܝܬܶܗ ܘܰܒܓܶܠܝܳܢܶܗ ܡܰܦܨܰܚ ܠܥܳܢ̈ܶܗ ܘܒܰܓܢܽܘܢܶܗ ܡܒܰܣܶܡ ܠܝܳܪܬܽܘܬܶܗ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀
ܣܶܕܪܳܐ
ܝܰܠܕܳܐ ܡܬܽܘܡܳܝܳܐ ܕܶܐܬܺܝܠܶܕ ܡܶܢ ܐܰܒܳܐ ܡܬܽܘܡܳܝܳܐ ܘܒܶܗ ܐܶܬܒܪ̈ܺܝ ܒܶܪ̈ܝܳܬܳܐ܆ ܘܶܐܬܺܝܠܶܕ ܡܶܢ ܐܰܢ̱ܬܬܳܐ ܒܬܽܘܠܬܳܐ ܘܶܐܬܒ̈ܰܛܰܠܝ̱ ܒܶܗ ܪ̈ܓܺܝܓܳܬܳܐ܆ ܦܳܪܽܘܩܳܐ ܕܒܽܐܘܪܚܳܐ ܕܺܝܠܺܝ̈ܕܶܐ ܢܚܶܬ ܡܶܢ ܨܶܝܕ ܐܰܒܽܘܗ̱ܝ ܘܒܽܐܘܪܚܳܐ ܕܡܳܝܽܘ̈ܬܶܐ ܗܰܠܶܟ܆ ܘܚܰܘܳܐ ܐܶܬܬܪܺܝܡܰܬ̥. ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܕܰܬܫܰܟܶܢ ܠܰܢ ܒܽܘܪ̈ܟܳܬܶܗ ܕܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ܆ ܚܽܘܠܳܠܳܐ ܘܕܽܘܟܳܝܳܐ ܡܶܢ ܟܽܠܳܗ̇ ܛܰܡܽܐܘܼܬܳܐ ܕܒܶܣܪܳܐ ܘܰܕܪܽܘܚܳܐ܆ ܠܚܺܝܼ ܘܰܐܥܒܰܪ ܡܶܢܰܢ ܚܣܳܡܳܐ ܘܰܐܟܬܳܐ ܘܰܒܥܶܠܕܒܳܒܽܘܼܬܳܐ܆ ܘܰܡܠܺܝܼ ܠܰܢ ܚܽܘܼܒܳܐ ܘܕܰܟܝܽܘܼܬܳܐ ܘܩܰܕܺܝܫܽܘܼܬܳܐ܆ ܘܗܰܒ ܒܛܰܝܒܽܘܼܬܳܟ ܡܳܪܝܳܐ ܠܡܰܠܟ̈ܶܐ ܡܫܰܝܢܽܘܼܬܳܐ܆ ܘܰܠܦܳܠܚ̈ܶܐ ܒܗܺܝܼܠܽܘܬܳܐ܆ ܠܰܪ̈ܕܺܝܼܦܶܐ ܢܺܝܼܚܽܘܬܳܐ ܘܠܰܥܠܺܝܼ̈ܒܶܐ ܦܽܘܼܨܳܝܳܐ܆ ܠܰܥܠܰܝܡ̈ܶܐ ܢܰܟܦܽܘܼܬܳܐ ܘܰܠܣܳܒ̈ܶܐ ܣܡܺܝܼܟܽܘܬܳܐ܆ ܠܰܡܙܰܘ̈ܓܶܐ ܟܢܺܝܟܽܘܼܬܳܐ܆ ܘܠܰܒܬܽܘܼ̈ܠܶܐ ܙܰܗܝܽܘܼܬܳܐ܆ ܠܕܰܝܪ̈ܳܝܶܐ ܬܪܺܝܨܽܘܬܳܐ܆ ܘܠܰܢܙܺܝܪ̈ܶܐ ܡܚܰܡܣܢܳܢܽܘܼܬܳܐ܆ ܠܥܰܬܺܝܪ̈ܶܐ ܡܰܟܺܝܼܟܽܘܬܳܐ܆ ܘܰܠܡܶܣܟ̈ܺܢܶܐ ܡܣܰܝܒܪܳܢܽܘܼܬܳܐ܆ ܘܰܠܟܰܦ̈ܢܶܐ ܣܰܒܥܽܘܬܳܐ܆ ܠܰܟܪ̈ܺܝܗܶܐ ܚܽܘܼܠܡܳܢܳܐ܆ ܘܠܰܡܚܺܝܼ̈ܠܶܐ ܥܽܘܼܕܪܳܢܳܐ܆ ܠܝܰܬܡ̈ܶܐ ܘܠܰܪ̈ܡܠܳܬܳܐ ܙܳܝܽܘܢܳܐ ܘܰܡܦܰܪܢܣܳܢܳܐ܆ ܠܚܰܛܳܝ̈ܶܐ ܘܡܰܣܟ̈ܠܳܢܶܐ ܫܳܒܽܘܩܳܐ ܘܰܡܚܰܣܝܳܢܳܐ܆ ܠܪ̈ܰܚܺܝܼܩܶܐ ܦܽܘܼܢܳܝܳܐ܆ ܘܰܠܩܰܪ̈ܺܝܒܶܐ ܢܽܘܛܳܪܳܐ܆ ܘܰܠܟܽܠܗܽܘ̇ܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܰܬܳܐ ܥܽܘܼܗܕܳܢܳܐ ܛܳܒܳܐ ܕܚܰܣܝܽܘܬܳܐ܆ ܐܰܝ̇ܟܰܢܳܐ ܕܰܚܢܰܢ ܘܗܼܶܢܽܘ̇ܢ ܢܰܣܶܩ ܠܳܟ ܫܽܘܼܒܚܳܐ ܘܬܰܘܕܺܝܬܳܐ܀
ܘܳܐܡܪܺܝܢ ܩ̈ܳܠܶܐ ܗܳܠܶܝܢ ܢܺܝܚܳܐܺܝܬ ܕܠܳܐ ܢܶܫܬܡܰܥ ܠܒܰܪ:
ܩܠܐ: ܒܩ̄ ܩܽܘܩܳܝܳܐ
ܩܳܡ ܓܰܢ̱ܒܳܪܳܐ ܡܶܢ ܩܰܒܪܳܐ ܒܚܰܝܠܳܐ ܪܰܒܳܐ܆ ܘܰܐܪܥܶܗ ܢܒܺܝܳܐ ܘܰܬܗܰܪ ܒܶܗ ܘܰܩܪܶܒ ܕܰܢܫܰܐܠܺܝܘܗ̱ܝ: ܡܳܢܳܐ ܠܳܟ ܡܳܪܝ̱܆ ܕܣܽܘ̈ܡܳܩܺܝܢ ܢܰܚ̈ܬܰܝܟ ܆ ܘܰܬܪܺܝܥ ܣܶܛܪܳܟ܆ ܘܰܡܒܰܙܥ̈ܳܢ ܐܺܝܕ̈ܰܝܟ܆ ܡܰܥܨܰܪܬܳܐ ܕܳܫܶܬ ܒܰܫܝܽܘܠ ܓܰܢ̱ܒܳܪܳܐܺܝܬ܆ ܘܩܺܐܪܣܳܐ ܐܰܪܥܶܬ ܒܰܠܚܽܘܕܰܝ ܘܒܰܕܡܳܐ ܐܶܬܦܰܠܦܠܶܬ ܗ̄ ܘܩܳܡܶܬ ܘܶܐܬܢܰܚܡܶܬ܀
ܫܽܘܒܚܳܐ
ܬܪܶܝܢ ܡܰܠܐܰܟ̈ܶܐ ܡܶܢ ܪܰܘܡܳܐ ܝܰܘܡܳܢ ܠܰܐܪܥܳܐ ܢܚܶܬܘ̱܆ ܟܰܕ ܠܒܺܝܫܺܝܢ ܗ̱ܘܰܘ ܚܶܘܳܪ̈ܶܐ ܘܨܶܝܕ ܩܰܒܪܳܐ ܩܳܝܡܺܝܢ܆ ܐ̱ܡܰܪܘ̱ ܠܰܢ ܓܰܒܪ̈ܶܐ܆ ܕܢܽܘܪܳܐ ܘܰܕܪܽܘܚܳܐ܆ ܡܽܘܢ ܒܳܥܝܶܢ ܐܢ̱ܬܽܘ̇ܢ܆ ܒܰܡܕܺܝܢܰܬ ܡܰܘܬܳܐ܆ ܕܠܳܐܕܳܡ ܘܰܠܟܽܠܗܽܘܢ ܝܰܠܕܰܘ̈ܗ̱ܝ ܣܰܩܪܳܐ ܐܶܬܟܰܬܒܰܬ܆ ܕܶܐܬܪܰܥܺܝ ܠܗܽܘܢ ܐܰܠܳܗܳܐ ܘܰܫܒܰܩ ܚܰܘܒܰܝ̈ܗܽܘܢ ܗ̄ܘܗ̄܀
ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆ ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ̱܀
ܡܶܢ ܝܽܘܚܰܢܳܢ ܬܶܫܡܰܥܝ̱ ܥܺܕܬܳܐ ܥܰܠ ܢܽܘܚܳܡܶܗ܆ ܕܪܳܥܝܳܐ ܛܳܒܳܐ ܕܟܰܢܶܫ ܐܶܡܪ̈ܰܘܗ̱ܝ ܕܶܐܬܒܰܕܰܪܘ ܗ̱ܘܰܘ܆ ܗܰܘ ܬܰܠܡܺܝܕܳܐ ܩܰܠܺܝܠ ܪܶܗܛܳܐ ܢܡܰܠܶܠ ܝܰܘܡܳܢ܆ ܕܰܚܙܳܐ ܩܝܳܡܬܶܗ ܗܽܘ ܢܶܫܬܰܥܶܐ ܥܰܠ ܢܽܘܚܳܡܶܗ܀
ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܥܰܠ ܦܽܘܪܩܳܢܰܢ܆ ܣܶܓܕܬܳܐ ܠܰܒܪܳܐ ܕܰܒܬܶܫܒܽܘܚܬܳܐ ܩܳܡ ܡܶܢ ܩܰܒܪܳܐ܆ ܬܰܘܕܺܝ ܠܪܽܘܚܳܐ ܕܠܳܐ ܝܰܗ̱ܒ ܠܚܰܣܝܶܗ ܕܢܶܚܙܶܐ ܚܒܳܠܳܐ܆ ܘܚܰܕ ܗ̱ܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀
ܫܰܝܢܳܐ ܕܫܰܝܶܢ ܠܰܫܡ̈ܰܝܳܢܶܐ ܥܰܡ ܐܰܪ̈ܥܳܢܶܐ܆ ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗܿ ܒܰܩܝܳܡܬܳܟ ܡܳܪܝ̱܀
ܡܶܢ ܒܳܬܰܪ ܕܰܡܫܺܝܓ ܠܰܨܠܺܝܒܳܐ ܒܡܰܝ̈ ܘܰܪ̈ܕܶܐ ܪ̈ܺܝܫܟܳܗܢܶܐ ܐܰܘ ܟܳܗܢܳܐ ܡܪܺܝܡ ܠܰܨܠܺܝܒܳܐ ܠܥܶܠ ܟܕ ܩܳܥܶܐ ܘܳܐܡܰܪ ܠܥܰܡܳܐ:
ܐܰܚ̈ܰܝ ܣܒܰܪܬܳܐ ܚܕܰܬܳܐ ܡܣܰܒܰܪ ܐ̱ܢܳܐ ܠܟܽܘܢ܆ ܩܳܡ ܡܫܺܝܚܳܐ ܡܶܢ ܩܰܒܪܳܐ ܘܰܡܚܳܐ ܠܰܒܥܶܠܕܒܳܒ̈ܰܘܗ̱ܝ ܠܒܶܣܬܪܶܗ܀
ܩܠܺܝܪܽܘܣ ܘܥܰܡܳܐ ܥܳܢܶܝܢ:
ܡܰܘܕܶܝܢܰܢ ܘܰܡܗܰܝܡܢܺܝܢܰܢ ܕܫܰܪܺܝܪܳܐܺܝܬ ܩܳܡ܀
ܗܳܫܳܐ ܪ̈ܺܝܫܟܳܗܢܶܐ ܣܳܐܶܡ ܠܰܨܠܺܝܒܳܐ ܥܰܠ ܡܢܳܪܬܳܐ ܩܕܳܡ ܡܰܕܒܚܳܐ ܐܰܘ ܒܡܶܨܥܰܬ ܥܺܕܬܳܐ܆ ܘܰܡܫܰܡܠܶܝܢ ܨܠܽܘܬܳܐ ܕܠܺܠܝܳܐ ܘܰܠܬܶܫܡܫ̈ܳܬܳܐ ܕܝܳܠܕܰܬ ܐܰܠܳܗܳܐ ܘܰܕܩܰܕܺܝ̈ܫܶܐ ܘܰܕܥܰܢܺܝ̈ܕܶܐ ܘܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ܆ ܘܰܡܨܰܠܶܝܢ ܨܠܽܘ̇ܬܳܐ ܕܨܰܦܪܳܐ ܘܰܡܫܰܪܶܝܢ ܒܩܽܘܪܳܒܳܐ܆ ܘܰܩܕܳܡ ܕܢܶܫܬܰܡܠܶܐ ܩܽܘܪܳܒܳܐ ܐܰܠܳܗܳܝܳܐ܆ ܒܳܬܰܪ ܕܰܡܫܰܡܠܶܝܢ ܠܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ܆ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܠܳܒܫܺܝܢ ܛܶܟܣܰܝ̈ܗܽܘܢ܆ ܘܫܳܩܠܺܝܢ ܨܠܺܝܒܳܐ ܘܶܐܘܰܢܓܶܠܺܝܽܘ̇ܢ ܘܦܺܝܪܡܳܐ ܘܡܰܪ̈ܘܚܳܬܳܐ ܘܩܶܪ̈ܝܽܘܢܶܐ܆ ܘܢܳܦܩܺܝܢ ܡܶܢ ܡܰܕܒܚܳܐ ܒܙܰܘܝܳܚܳܐ܆ ܘܥܳܒܕܺܝܢ ܟܪܽܘܼܟܝܳܐ ܡܶܢ ܓܰܪܒܝܳܐ ܠܬܰܝܡܢܳܐ. ܘܰܒܥܶܕܳܢ ܟܪܽܘܟܝܳܐ ܐܳܡܪܺܝܢ ܠܩ̈ܳܠܶܐ ܗܳܠܶܝܢ:
ܩܳܡ ܓܰܢ̱ܒܳܪܳܐ ܡܶܢ ܩܰܒܪܳܐ܀ ܬܪܶܝܢ ܡܰܠܰܐܟ̈ܶܐ ܡܶܢ ܪܰܘܡܳܐ܀
ܐ̱ܚܪܺܢܳܐ ܡܰܕܪܳܫܳܐ ܒܩܽܘܡ ܦܰܘܠܳܘܣ
ܥܽܘܢܺܝܬܳܐ
ܫܽܘܼܒܚܳܐ ܠܳܟ ܕܰܐܦܨܰܚܬ ܠܒܶܪ̈ܝܳܬܳܐ܆ ܫܽܘܒܚܳܐ ܠܳܟ ܕܰܐܚܺܝܼܬ ܠܡܳܝܽܘ̈ܬܶܐ
ܐܳܘ ܡܰܪܝܰܡ ܐܶܢܰܐ ܗ̱ܘ ܓܰܢܳܢܳܐ܆ ܘܢܳܨܽܘܒܶܗ ܪܰܒܳܐ ܕܦܰܪܕܰܝܣܳܐ܆ ܐܳܘ ܡܰܪܝܰܡ ܐܶܢܰܐ ܗ̱ܘ ܢܽܘܚܳܡܳܐ܆ ܘܰܩܝܳܡܬܳܐ ܘܚܰܝ̈ܶܐ ܕܟܽܠ ܢܶܫܡܳܐ܆ ܐܳܘ ܡܰܪܝܰܡ ܐܶܢܰܐ ܗ̱ܘ܆ ܩܛܺܝܠܳܐ ܘܰܩܒܺܝܪܳܐ: ܠܐ ܬܶܬ̥ܩܰܪܒܺܝܢ ܠܺܝ܆ ܕܠܐ ܣܶܠܩܶܬ ܨܶܝܕ ܐܳܒܝ܆ ܙܶܠܝ ܗܳܟܺܝܠ ܣܰܒܰܪܝ̱ ܠܰܫ̈ܠܺܝܚܶܐ: ܕܩܳܡܶܬ̥ ܠܺܝ ܒܫܽܘܒܚܳܐ ܡܶܢ ܩܰܒܪܳܐ܀
ܡܰܠܰܐܟܳܐ ܕܰܡܥܰܛܰܦ ܢܽܘܗܪܳܐ܆ ܩܪܶܒ ܥܰܓܶܠ ܟܺܐܦܳܐ ܡܢ ܩܰܒܪܳܐ܆ ܦܰܬܚܶܗ ܗ̱ܘܳܐ ܠܰܓܢܽܘܢܳܐ ܕܚܰܬ̥ܢܳܐ܆ ܕܰܢܫܰܪܰܪ ܕܩܳܡ ܠܶܗ ܡܢ ܩܰܒܪܳܐ܆ ܘܠܐ ܫܰܒܩܶܗ ܐܰܚܺܝܕ܆ ܕܰܢܗܰܝܡܶܢ ܥܰܡܳܐ܆ ܕܒܰܫܪܳܪܳܐ ܩܳܡ ܠܶܗ܆ ܡܶܢܶܗ ܒܰܪ ܡܰܠܟܳܐ܆ ܥܰܓܠܳܗ̇ ܗ̱ܘܳܐ ܠܟܺܐܦܳܐ ܢܽܘܪܳܢܳܐ ܘܝܺܬ̥ܶܒ ܗ̱ܘܳܐ ܚܰܝܳܐ ܕܰܢܣܰܒܰܪ܀
ܒܗܳܢ ܨܰܦܪܳܐ ܪܰܒܳܐ ܘܫܰܦܺܝܪܳܐ܆ ܗܳܐ ܦܨܺܝܚܳܐ ܫܡܰܝܳܐ ܘܢܰܗܺܝܪܳܐ܆ ܗܳܐ ܪܳܘܙܳܐ ܐܰܪܥܳܐ ܡܢ ܣܳܟ̥ܳܗ̇܆ ܕܰܐܡܠܶܟ̥ܘ ܒܳܗ̇ ܚܰܝ̈ܶܐ ܘܦܽܘܪܩܳܢܳܐ܆ ܒܶܗ ܐܶܫܬܰܝܰܢܘ ܗ̱ܘܰܘ ܪܰܘܡܳܐ ܐܳܦ ܥܽܘܡܩܳܐ܆ ܕܡܶܢ ܢܽܘܓܪܳܐ ܪܰܒܐ܆ ܬܪ̈ܰܝܗܽܘܢ ܪܓ̥ܺܝܙܺܝܢ ܗ̱ܘܰܘ܆ ܒܶܗ ܗܽܘ ܓܶܝܪ ܐܶܬ̥ܦܢܺܝܘ ܟܽܠ ܥܰܡ̈ܡܺܝܢ ܘܶܐܡ̈ܘܳܬܳܐ ܘܰܩܢܰܘ ܚܰܕܽܘܬܳܐ܀
ܘܟܰܕ ܡܳܛܶܝܢ ܠܰܩܕܳܡ ܡܰܕܒܚܳܐ ܢܙܰܝܚܽܘܢ ܠܰܨܠܺܝܒܳܐ ܘܰܡܫܰܪܶܐ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܒܬܶܫܡܶܫܬܐ ܕܝܳܗܽܘܒܽܘܬ ܫܠܳܡܳܐ܀
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܫܘܒ̄ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܡܫܺܝܚܳܐ ܐܰܠܳܗܳܐ ܕܣܰܝܒܰܪ ܚܰܫ̈ܶܐ ܘܰܨܠܺܝܒܳܐ ܡܶܛܽܠ ܦܽܘܪܩܳܢܰܢ ܘܡܺܝܬ ܒܨܶܒܝܳܢܶܗ ܘܰܐܚܺܝ ܠܡܺܝܬܽܘܬܰܢ. ܘܩܳܡ ܡܢ ܩܰܒܪܳܐ ܘܥܰܡܶܗ ܐܰܩܺܝܡ ܠܰܢ. ܚܰܕܳܐ ܠܰܢ ܡܳܪܝ ܒܥܺܐܕܳܐ ܗܳܢܳܐ ܫܒܺܝܚܳܐ ܕܰܩܝܳܡܬܳܟ. ܘܰܐܫܪܳܐ ܒܰܢ ܫܰܝܢܳܟ ܘܰܫܠܳܡܳܟ. ܘܰܣܥܽܘܪ ܠܰܢ ܒܪ̈ܰܚܡܶܐ ܕܛܰܝܒܽܘܬܳܟ. ܘܰܐܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܒܚܢܳܢܳܟ. ܘܫܰܘܙܶܒ ܠܰܢ ܡܢ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓ̥ܙܳܐ ܒܚܰܝܽܘܣܬܳܢܽܘܬܳܟ܆ ܕܒܰܦܨܺܝܚܽܘܬܳܐ ܢܫܰܡܠܶܐ ܥܰܕܥܺܐܕܳܟ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܢܝܳܢܳܐ: ܕܪܰܚܶܡܥܰܠܝ
ܒܩܳܠܳܐ܆ ܐܰܢܬ ܕܒܰܩܝܳܡܬܳܐ ܕܺܝܠܳܟ
ܐܰܢܬ ܕܒܰܩܝܳܡܬܳܐ ܕܺܝܠܳܟ܆ ܠܰܫܡܰܝܳܐ ܘܠܰܐܪܥܳܐ ܚܰܕܺܝܬ̊܆ ܚܰܕܳܐ ܥܺܕܬܳܟ܆ ܘܢܰܛܰܪ ܝܰܠܕܶܝ̈ܗ̇ ܒܰܨܠܺܝܒܳܟ܆ ܐܰܠܳܗܳܐ ܐܶܬܪܰܚܡ ܥܠܰܝܢ܀
ܒܰܗܺܝܬ ܥܰܡܳܐ ܕܨܰܠܒܳܟ܆ ܘܚܳܕܶܝܢ ܥܰܡ̱ܡ̈ܶܐ ܕܗܰܝܡܶܢܘ ܒܳܟ܆ ܘܥܺܕܬܳܐ ܘܝܰܠܕܶܝ̈ܗ̇܆ ܙܳܡܪܺܝܢ ܫܽܘܒܚܳܐ ܒܰܩܝܳܡܬܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀
ܗܰܘ ܕܒܰܩܝܳܡܬܶܗ ܚܰܕܺܝ܆ ܠܬܰܠܡܺܝ̈ܕܰܘܗ̱ܝ ܕܰܟܡܺܝܪܺܝܢ ܗ̱ܘܰܘ܆ ܘܰܙܪܰܥ ܫܰܝܢܳܐ܆ ܒܶܝܬ ܥܶܠܳܝ̈ܶܐ ܠܬܰܚ̈ܬܳܝܶܐ܆ ܐܰܠܳܗܐ ܐܶܬܪܰܚܰܡ ܥܠܰܝܢ܀
ܫܽܘܒܚܳܐ
ܫܽܘܒܚܳܐ ܠܰܐܒܳܐ ܘܠܰܒܪܳܐ܆ ܘܠܪܽܘܚܩܽܘܕܫܳܐ ܗܽܘܠܳܠܐ܆ ܕܗܽܘ ܐܰܦܨܰܚ ܠܰܢ܆ ܒܥܺܐܕܳܐ ܫܒܺܝܚܳܐ ܕܰܩܝܳܡܬܳܐ܆ ܐܰܠܳܗܐ ܐܶܬܪܰܚܰܡ ܥܠܰܝܢ܀
ܩܠܐ ܒܩܳܠܳܐ ܩܽܘܩܳܝܳܐ
ܫܠܳܡܳܐ ܫܠܳܡܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ܆ ܕܰܡܫܺܝܚܳܐ ܩܳܡ ܡܶܢ ܩܰܒܪܳܐ ܘܟܰܢܶܫ ܠܰܡܒܰܕܪ̈ܶܐ܆ ܘܗܰܝܡܶܢ ܬܐܽܘܡܰܐ܆ ܘܶܐܫܬܰܪܰܪ ܫܶܡܥܽܘܢ܆ ܘܰܐܥܒܰܪ ܡܶܢܗܽܘܢ܆ ܐܶܒܠܳܐ ܘܟܰܪܝܽܘܬܐ܆. ܡܚܰܦܰܝ ܪܺܝܫܶܗ ܕܩܰܝܳܦܳܐ ܘܰܐܒܺܝܠܳܐ ܟܢܽܘܫܬܳܐ܆ ܘܥܺܕܬܳܐ ܘܡܰܪܝܰܡ ܘܚܰܒܪ̈ܳܬܳܗ̇ ܬܶܫܒܽܘܚܬܳܐ ܙܳܡܪ̈ܳܢ. ܗ̄ ܘܗ̄܀
ܫܽܘܒܚܳܐ:
ܫܠܳܡܐ ܥܰܡܟܽܘܢ ܚܰܒܺܝ̈ܒܰܝ ܐܶܡܰܪ ܡܳܪܰܢ܆ ܠܬܰܠ̈ܡܺܝܕܰܘܗ̱ܝ ܒܓܰܘ ܥܶܠܺܝܬܳܐ܆ ܒܝܰܘܡܳܐ ܕܰܩܝܳܡܬܳܐ܆ ܘܰܐܥܒܰܪ ܡܶܢܗܽܘܢ܆ ܥܳܩܬܳܐ ܘܟܰܪܝܽܘܬܳܐ܆ ܘܰܡܠܳܐ ܐܶܢܽܘܢ܆ ܫܰܝܢܳܐ ܘܰܫܠܳܡܳܐ܆ ܘܶܐܡܰܪ ܠܗܽܘܢ ܕܗܳܢܳܐ ܫܠܳܡܳܐ ܢܶܗܘܶܐ ܥܰܡܟܽܘܢ. ܘܒܶܗ ܬܶܬܢܰܛܪܽܘܢ ܡܶܢ ܒܺܝܫܳܐ ܐܺܝܡܳܡܳܐ ܘܠܺܠܝܳܐ. ܗ̄ ܘܗ̄܀
ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆ ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ̱܀
ܒܗܳܢܳܐ ܝܰܘܡܳܐ܆ ܝܰܠܕܶܝ̈ܗ̇ ܕܥܺܕܬܳܐ ܙܡܰܪܘ ܬܶܫܒܽܘܚܬܳܐ܆ ܘܒܶܗ ܐܶܫܬܰܝܰܢܘ ܪܰܘܡܳܐ ܘܥܽܘܡܩܳܐ ܘܟܽܠ ܒܶܪ̈ܝܳܬܐ܆ ܒܗܳܢܳܐ ܝܰܘܡܳܐ ܐܰܡܠܶܟ ܫܰܝܢܳܐ ܒܰܐܪܒܰܥ ܦܶܢ̈ܝܳܢ܆ ܘܒܶܗ ܐܶܬܪܰܥܺܝܘ ܡܳܪܝܳܐ ܘܳܐܕܳܡ ܕܰܪܓܺܝܙܺܝܢ ܗ̱ܘܰܘ܀
ܫܽܘܒܚܳܐ ܠܰܐܒܳܐ ܕܺܐܝܬܰܘܗ̱ܝ ܫܰܝܢܳܐ ܕܟܽܠ ܕܰܪܓܺܝܙܺܝܢ܆ ܘܣܶܓܕܬܳܐ ܠܰܒܪܳܐ ܕܒܰܙܩܺܝܦܽܘܬܶܗ ܫܰܝܶܢ ܟܽܘܠܳܐ܆ ܬܰܘܕܺܝ ܠܪܽܘܚܳܐ ܕܟܽܠܳܗ̇ ܐܽܘܪܚܳܐ ܒܫܰܝܢܳܐ ܓܰܡܪܳܗ̇܆ ܒܪܺܝܟ ܕܰܒܚܽܘܒܳܐ ܘܫܰܝܢܳܐ ܐܰܠܦܰܢ ܕܢܶܬܕܰܡܶܐ ܒܶܗ܀
ܫܰܝܢܳܐ ܕܫܰܝܶܢ ܠܰܫܡ̈ܰܝܳܢܶܐ ܥܰܡ ܐܰܪ̈ܥܳܢܶܐ܆ ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗܿ ܒܰܩܝܳܡܬܳܟ ܡܳܪܝ̱܀
ܩܶܪ̈ܝܳܢܶܐ:
ܟܳܗ̈ܢܶܐ. ܟܓ: ܟܘ ـ ܠܒ. Leviticus 23:26-32
ܡܺܝܟ̥ܳܐ. ܗ: ܚ ـ ܝܓ. Micah 5:8-13
ܐܶܫܰܥܝܳܐ. ܢܙ: ܝܛ ـ ܟܟ. , ܣ: ܝܙ ـ ܟܒ. Isaiah 57:19-20, 60:17-22
ܐ ܦܶܛܪܽܘܣ. ܗ: ܗ ـ ܝܕ. I Peter 5:5-14
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܘ: ܐ ـ ܝܘ. Romans 16:1-16
ܡܰܓܥܶܠ ܐ݈ܢܳܐ ܠܟܽܘܢ ܕܶܝܢ ܠܦܽܘܒܺܐ ܚܳܬܰܢ. ܕܺܐܝܬܶܝܗ̇ ܡܫܰܡܫܳܢܺܝܬܳܐ ܕܥܺܕ݈ܬܳܐ ܕܩܶܢܟܪܶܐܘܳܣ܆ ܕܰܬܩܰܒܠܽܘܢܳܗ̇ ܒܡܳܪܰܢ ܐܰܝܟ ܕܙܳܕܶܩ ܠܩܰܕܺܝܫ̈ܶܐ܆ ܘܰܒܟܽܠ ܨܒܽܘ ܕܒܳܥܝܳܐ ܡܶܢܟܽܘܢ ܬܩܽܘܡܽܘܢ ܠܳܗ̇܆ ܡܶܛܽܠ ܕܳܐܦ ܗܺܝ ܩܳܝܽܘܡܬܳܐ ܗܘܳܬ ܠܣܰܓܺܝ̈ܶܐܐ ܐܳܦ ܠܺܝ.. ܫܰܐܠܘ ܒܰܫܠܳܡܳܐ ܕܰܦܪܺܝܣܩܶܠܰܐ ܘܕܰܐܩܶܠܰܣ܆ ܦܳܠܚ̈ܶܐ ܕܥܰܡܝ ܒܝܶܫܽܘܥ ܡܫܺܝܚܳܐ܆ ܕܗܶܢܽܘܢ ܗܳܠܶܝܢ ܚܠܳܦ ܢܰܦܫܝ ܨܰܘܪ̈ܰܝܗܽܘܢ ܝܰܗ݈ܒܘ܆ ܘܠܳܐ ܗ݈ܘܳܐ ܐܶܢܳܐ ܒܰܠܚܽܘܕܰܝ ܡܰܘܕܶܐ ܐ݈ܢܳܐ ܠܗܽܘܢ܆ ܐܶܠܳܐ ܐܳܦ ܟܽܠܗܶܝܢ ܥܺܕ̈ܳܬܳܐ ܕܥܰܡ݈ܡܶܐ܆ ܘܗܰܒܘ ܫܠܳܡܳܐ ܠܥܺܕ݈ܬܳܐ ܕܺܐܝܬ ܒܒܰܝܬܗܽܘܢ. ܫܰܐܠܘ ܒܰܫܠܳܡܳܐ ܕܶܐܦܶܢܶܛܳܘܣ ܚܰܒܺܝܒܝ܆ ܐܰܝܢܳܐ ܕܺܐܝܬܰܘܗ݈ܝ ܪܺܫܺܝܬܳܐ ܕܰܐܟܰܐܺܝܰܐ ܒܰܡܫܺܝܚܳܐ܀ ܫܰܐܠܘ ܒܰܫܠܳܡܳܐ ܕܡܰܪܺܝܰܐ܆ ܐܰܝܕܳܐ ܕܣܰܓܺܝ ܠܶܐܝܰܬ ܒܟܽܘܢ. ܫܰܐܠܘ ܒܰܫܠܳܡܳܐ ܕܰܐܢܕܪܳܘܢܺܝܩܳܘܣ܆ ܘܰܕܝܽܘܢܺܝܰܐ ܐ݈ܚ̈ܝܳܢܰܝ܆ ܕܰܗܘܰܘ ܫܒܰܝܳܐ ܥܰܡܝ܆ ܘܺܝܕܺܝܥܺܝܢ ܐܶܢܽܘܢ ܒܰܫܠܺܝ̈ܚܶܐ܆ ܘܒܰܡܫܺܝܚܳܐ ܩܕܳܡܰܝ ܗܘܰܘ܀ ܫܰܐܠܘ ܒܰܫܠܳܡܳܐ ܕܰܐܡܦܠܺܝܳܘܣ ܚܰܒܺܝܒܝ ܒܡܳܪܰܢ܆ ܫܰܐܠܘ ܒܰܫܠܳܡܳܐ ܕܽܐܘܪܒܰܢܳܘܣ ܦܳܠܚܳܐ ܕܥܰܡܰܢ ܒܰܡܫܺܝܚܳܐ܆ ܘܕܶܐܣܛܰܟܽܘܣ ܚܰܒܺܝܒܝ. ܫܰܐܠܘ ܒܰܫܠܳܡܳܐ ܕܰܐܦܶܠܺܐ ܓܰܒܝܳܐ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܰܒ̈ܢܰܝ ܒܰܝܬܶܗ ܕܰܐܪܺܣܛܳܒܽܘܠܳܘܣ܀ ܫܰܐܠܘ ܒܰܫܠܳܡܳܐ ܕܗܶܪܳܘܕܺܝܳܘܢ ܐ݈ܚܝܳܢܝ܀ ܫܰܐܠܘ ܒܰܫܠܳܡܳܐ ܕܰܒ̈ܢܰܝ ܒܰܝܬܶܗ ܕܢܰܪܩܺܣܳܘܣ܆ ܐܰܝܠܶܝܢ ܕܺܐܝܬܰܝܗܽܘܢ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܰܛܪܽܘܦܶܢܰܐ ܘܕܰܛܪܽܘܦܳܣܰܐ ܕܰܠܐܺܝܶܝܢ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܦܶܪܣܺܣ ܚܰܒܺܝܒܬܝ܆ ܐܰܝܕܳܐ ܕܣܰܓܺܝ ܠܶܐܝܰܬ ܒܡܳܪܰܢ܀ ܫܰܐܠܘ ܒܰܫܠܳܡܳܐ ܕܪܽܘܦܳܣ ܓܰܒܝܳܐ ܒܡܳܪܰܢ܆ ܘܕܶܐܡܶܗ ܕܺܝܠܶܗ ܘܕܺܝܠܝ܀ ܫܰܐܠܘ ܒܰܫܠܳܡܳܐ ܕܰܐܣܽܘܢܩܪܺܛܳܘܣ ܘܕܰܦܠܶܓܳܘܢ ܘܰܕܗܶܪܡܰܐ ܘܰܕܦܰܛܪܳܒܰܐ ܘܰܕܗܶܪܡܺܐ܆ ܘܕܰܐܚ̈ܶܐ ܕܥܰܡܗܽܘܢ܀ ܫܰܐܠܘ ܒܰܫܠܳܡܳܐ ܕܦܺܝܠܳܠܳܓܳܘܣ ܘܰܕܝܽܘܠܺܝܰܐ ܘܰܕܢܺܐܪܳܘܣ ܘܰܕܚܳܬܶܗ ܘܕܳܐܠܽܘܡܦܰܐ܆ ܘܰܕܟܽܠܗܽܘܢ ܩܰܕܺܝ̈ܫܶܐ ܕܥܰܡܗܽܘܢ܀ ܫܰܐܠܘ ܒܰܫܠܳܡܳܐ ܚܰܕ ܕܚܰܕ ܒܢܽܘܫܰܩܬܳܐ ܩܰܕܺܝܫܬܳܐ܆ ܫܳܐܠ̈ܳܢ ܒܰܫܠܳܡܟܽܘܢ ܟܽܠܗܶܝܢ ܥܺܕ̈ܳܬܶܗ ܕܰܡܫܺܝܚܳܐ܀
ܗܽܘܠܳܠܳܐ ܘܦܶܬܓܳܡܳܐ
ܢܶܚܕܽܘܢ ܫܡܰܝ̈ܳܐ ܘܰܬܕܽܘܨ ܐܰܪܥܳܐ܆ ܒܰܩܝܳܡܬܶܗ ܕܡܰܠܟܳܐ ܡܫܺܝܚܳܐ ܗ̄܀
ܐܶܘܢܓܠܝܘܢ ܕܝܘܚܢܢ
(ܝܓ: ܠܕ ـ ܠܗ. ܘܟܶܢ. ܝܕ: ܟܙ ـ ܘܟܶܢ. ܝܗ: ܝܐ ـ ܝܗ. ܘܟܶܢ. ܝܙ ـ ܝܛ John 13: 34-35, 14:27, 15:11-15, 17-19)
ܦܽܘܩܕܳܢܳܐ ܚܰܕ݈ܬܳܐ ܝܳܗܶܒ ܐ݈ܢܳܐ ܠܟܽܘܢ܆ ܕܰܗܘܰܝܬܽܘܢ ܡܰܚܒܺܝܢ ܚܰܕ ܠܚܰܕ܆ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘܢ܆ ܐܳܦ ܐܰܢ݈ܬܽܘܢ ܬܰܚܒܽܘܢ ܚܰܕ ܠܚܰܕ܆ ܒܗܳܕܶܐ ܢܶܕܰܥ ܟܽܠ ܐ݈ܢܳܫ ܕܬܰܠܡܺܝ̈ܕܰܝ ܐܰܢ݈ܬܽܘܢ ܐܶܢ ܚܽܘܒܳܐ ܢܶܗܘܶܐ ܒܟܽܘܢ ܚܰܕ ܠܘܳܬ ܚܰܕ܀ ܫܠܳܡܳܐ ܫܳܒܶܩ ܐ݈ܢܳܐ ܠܟܽܘܢ܆ ܫܠܳܡܳܐ ܕܺܝܠܝ ܝܳܗܶܒ ܐ݈ܢܳܐ ܠܟܽܘܢ܆ ܠܳܐ ܗ݈ܘܳܐ ܐܰܝܟܰܢܳܐ ܕܝܳܗܶܒ ܥܳܠܡܳܐ ܐܶܢܳܐ ܝܳܗܶܒ ܐ݈ܢܳܐ ܠܟܽܘܢ܀ ܗܳܠܶܝܢ ܡܰܠܠܶܬ ܥܰܡܟܽܘܢ܆ ܕܚܰܕܘܰܬܝ ܬܶܗܘܶܐ ܒܟܽܘܢ܆ ܘܬܶܫܬܰܡܠܶܐ ܚܰܕܘܰܬܟܽܘܢ܆ ܗܳܢܰܘ ܦܽܘܩܕܳܢܝ ܕܬܰܚܒܽܘܢ ܚܰܕ ܠܚܰܕ܆ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘܢ܆ ܚܽܘܒܳܐ ܕܪܰܒ ܡܶܢ ܗܳܢܳܐ ܠܰܝܬ܆ ܕܐ݈ܢܳܫ ܢܰܦܫܶܗ ܢܣܺܝܡ ܚܠܳܦ ܪ̈ܳܚܡܰܘܗ݈ܝ܆ ܐܰܢ݈ܬܽܘܢ ܪ̈ܳܚܡܰܝ ܐܰܢ݈ܬܽܘܢ܆ ܐܶܢ ܬܶܥܒܕܽܘܢ ܟܽܠ ܕܰܡܦܰܩܶܕ ܐ݈ܢܳܐ ܠܟܽܘܢ܆ ܠܳܐ ܡܶܟܺܝܠ ܩܳܪܶܐ ܐ݈ܢܳܐ ܠܟܽܘܢ ܥܰܒ̈ܕܶܐ܆ ܡܶܛܽܠ ܕܥܰܒܕܳܐ ܠܳܐ ܝܳܕܰܥ ܡܳܢܳܐ ܥܳܒܶܕ ܡܳܪܶܗ܆ ܪ̈ܳܚܡܰܝ ܕܶܝܢ ܩܪܺܝܬܟܽܘܢ܆ ܡܶܛܽܠ ܕܟܽܠ ܕܫܶܡܥܶܬ ܡܶܢ ܐܳܒܝ ܐܰܘܕܰܥܬܟܽܘܢ܀ ܗܳܠܶܝܢ ܡܦܰܩܶܕ ܐ݈ܢܳܐ ܠܟܽܘܢ܆ ܕܬܰܚܒܽܘܢ ܚܰܕ ܠܚܰܕ. ܘܶܐܢ ܥܳܠܡܳܐ ܣܳܢܶܐ ܠܟܽܘܢ܆ ܕܰܥܘ ܕܰܩܕܳܡܰܝܟܽܘܢ ܠܺܝ ܣܢܳܐ܆ ܘܶܐܠܽܘ ܡܶܢ ܥܳܠܡܳܐ ܗ݈ܘܰܝܬܽܘܢ܆ ܥܳܠܡܳܐ ܠܕܺܝܠܶܗ ܪܳܚܶܡ ܗ݈ܘܳܐ܆ ܐܶܠܳܐ ܠܳܐ ܗܘܰܝܬܽܘܢ ܡܶܢ ܥܳܠܡܳܐ܆ ܡܶܛܽܠ ܗܳܢܳܐ ܣܳܢܶܐ ܠܟܽܘܢ ܥܳܠܡܳܐ܀
ܗܳܝܕܶܝܢ ܡܫܰܪܶܝܢ ܒܙܽܘܝܳܚܳܐ ܕܰܨܠܺܝܒܳܐ ܘܡܰܦܢܶܝܢ ܐܰܦܰܝ̈ܗܽܘܢ ܠܡܰܕܢܚܳܐ ܘܰܡܫܰܪܶܐ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܒܰܨܠܽܘܬܐ ܗܳܕܶܐ܀
ܟܳܗܢܳܐ: ܫܘܒ̄ ܠܐܒܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܫܰܝܢܳܐ ܕܫܰܝܶܢ ܠܥܶܠܳܝ̈ܶܐ ܒܩܶܛܠܶܗ܆ ܫܠܳܡܳܐ ܕܪܰܥܺܝ ܠܬܰܚ̈ܬܳܝܶܐ ܒܰܕܒܺܝܚܽܘܬܶܗ܆ ܦܳܪܽܘܩܳܐ ܕܰܦܪܰܩ ܠܥܰܡ̱ܡ̈ܶܐ ܒܰܨܠܺܝܒܶܗ܆ ܚܽܘܒܳܐ ܕܰܐܠܘܶܬ ܠܰܦ̈ܠܺܝܓ̥ܶܐ ܒܢܽܘܚܳܡܶܗ܆ ܫܰܝܶܢ ܡܳܪܝ ܒܝܰܘܡܳܐ ܗܳܢܳܐ ܕܰܩܝܳܡܬܳܐ ܕܺܝܠܳܟ ܫܓ̥ܺܝܫܽܘܬܳܐ ܕܡܶܬܥܰܡܪܳܢܺܝܬܳܐ܆ ܘܢܰܛܰܪ ܠܰܢ ܒܰܨܠܺܝܒܳܟ ܡܢ ܟܽܠ ܡܰܐܟܝܳܢܽܘܬܐ܆ ܕܢܰܘܕܶܐ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ܀
ܡܰܙܥܩܳܢܽܘܬܐ
ܠܳܟ ܣܰܓܺܝ ܪ̈ܰܚܡܶܐ ܡܳܪܝܳܐ܆ ܒܰܩܝܳܡܬܳܟ ܡܳܪܝ ܐܶܙܡܰܪ ܠܳܟ܆ ܡ̈ܶܠܶܐ ܕܦܰܐܝ̈ܳܢ ܠܺܐܝܩܳܪܳܟ܆ ܘܰܒܥܰܕܥܺܐܕܳܟ ܢܰܘܕܽܘܢ ܠܳܟ܆ ܥܰܡ̱ܡ̈ܶܐ ܦܪ̈ܺܝܩܰܝ ܒܰܨܠܺܝܒܳܟ܆ ܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ ܩܽܘܪܝܠܝܣܘܢ. ܩܽܘܪܝܠܝܣܘܢ. ܩܽܘܪܝܠܝܣܘܢ܀
ܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܘܒ̄ ܠܐܒܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܒܰܩܝܳܡܬܳܟ ܚܳܕܶܝܢܰܢ ܘܡܶܬܦܰܨܚܺܝܢܰܢ ܘܪܳܘܙܺܝܢܰܢ܆ ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ ܘܰܐܫܪܳܐ ܒܰܢ ܚܽܘܒܳܟ ܘܪܶܚܡܬܟ܆ ܘܗܰܒ ܠܰܢ ܕܢܶܣܓܽܘܕ ܠܰܨܠܺܝܒܳܟ ܘܢܰܘܕܶܐ ܒܰܩܝܳܡܬܳܟ܆ ܘܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܟ ܕܰܢܫܰܒܰܚ ܠܡܳܪܽܘܬܳܟ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܡܰܙܥܩܳܢܽܘܬܐ
ܩܝܳܡܬܳܐ ܠܟܽܠ ܐ̱ܢܳܫ ܐܶܬܝܰܕܥܰܬ܆ ܘܥܰܡܳܐ ܣܰܟܠܳܐ ܟܳܦܰܪ ܒܳܗ̇܆ ܕܗܰܘ ܕܰܨܠܰܒܘ ܝܽܗ̱ܘ̈ܕܳܝܶܐ܆ ܩܳܡ ܠܶܗ ܒܫܽܘܒܚܳܐ ܡܢ ܩܰܒܪܳܐ܆ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ: ܩܽܘܪܝܠܝܣܘܢ. ܩܽܘܪܝܠܝܣܘܢ. ܩܽܘܪܝܠܝܣܘܢ܀
ܘܦܳܢܶܝܢ ܠܓܰܪܒܝܳܐ
ܟܳܗܢܳܐ: ܫܘܒ̄ ܠܐܒܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܐ ܕܢܶܣܬܰܬܰܪ ܬܚܶܝܬ ܟܶܢ̈ܦܰܘܗ̱ܝ ܕܰܨܠܺܝܒܳܟ ܘܰܕܢܶܛܦܰܣ ܒܰܩܝܳܡܬܳܟ ܘܕܰܢܗܰܝܡܶܢ ܒܢܽܘܚܳܡܳܟ. ܘܰܕܢܶܛܰܪ ܦܽܘܩ̈ܕܳܢܶܐ ܕܶܐܘܰܢܓܶܠܺܝܽܘܢ ܕܺܝܠܳܟ. ܘܰܕܢܶܥܒܶܕ ܨܶܒܝܳܢܳܟ ܘܕܰܢܫܰܡܠܶܐ ܢܳܡܽܘܣܳܟ. ܘܰܕܢܶܬܓܰܘܰܣ ܘܢܶܬܥܰܕܰܪ ܒܰܨ̈ܠܰܘܳܬܗܽܘܢ ܕܟܺܐܢ̈ܶܐ ܘܙܰܕܝ̈ܩܶܐ. ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܒܝܰܕ ܒܳܥ̈ܘܳܬܗܽܘܢ ܕܢܰܘܕܶܐ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀
ܡܰܙܥܩܳܢܽܘܬܐ
ܚܽܘܣ ܡܳܪܝܳܐ ܥܠ ܥܰܡܳܐ ܕܺܝܠܳܟ܆ ܘܠܳܐ ܬܰܗܡܶܐ ܡܢ ܝܳܪܬܽܘܬܳܟ. ܘܪܰܡܪܶܡ ܩܰܪܢܳܐ ܕܰܟܪ̈ܤܛܝܳܢܶܐ ܒܢܺܝܫܶܗ ܪܰܒܳܐ ܕܰܨܠܺܝܒܳܟ. ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ. ܩܽܘܪܝܠܝܣܘܢ. ܩܽܘܪܝܠܝܣܘܢ. ܩܽܘܪܝܠܝܣܘܢ܀
ܘܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܘܒ̄ ܠܐܒܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܐ ܕܥܰܡ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܢܪܰܡܪܶܡ ܠܝܰܘܡܳܐ ܗܳܢܐ ܕܰܩܝܳܡܬܳܟ ܬܠܺܝܬܝܰܬ ܝܰܘ̈ܡܶܐ. ܘܰܐܫܘܳܐ ܠܰܢ ܕܰܢܫܰܡܠܶܐ ܥܰܕܥܺܐܕܰܝ̈ܟ ܒܰܦܨܺܝܚܽܘܬܐ. ܘܰܕܢܶܣܰܒ ܡܶܢܳܟ ܛܳܒ̈ܳܬܳܐ ܘܒܽܘܪ̈ܟܳܬܐ. ܘܰܐܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ ܘܟܽܠܗܶܝܢ ܡܰܚ̈ܘܳܬܳܐ ܒܝܰܕ ܨܠܺܝܒܳܟ ܩܰܕܝܫܳܐ ܘܰܒܚܰܝܠܳܟ ܕܰܫ̇ܪܶܐ ܒܩܰܕܺܝ̈ܫܰܝܟ ܕܢܰܘܕܶܐ ܠܳܟ ܘܰܢܫܰܒܰܚ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ܀
ܡܰܙܥܩܳܢܽܘܬܳܐ
ܡܶܛܽܠ ܟܪ̈ܺܝܗܶܐ ܘܰܐܠܺܝ̈ܨܶܐ. ܘܡܶܛܽܠ ܒܳܝ̈ܫܶܐ ܘܡܶܣ̈ܟܺܢܶܐ. ܘܡܶܛܽܠ ܝܰܬܡ̈ܶܐ ܘܰܐܪ̈ܡܠܳܬܐ. ܘܡܶܛܽܠ ܗܳܝ ܕܢܰܫܪܶܐ ܡܳܪܝܳܐ ܫܰܝܢܶܗ ܪܰܒܳܐ ܘܰܫܠܳܡܶܗ ܒܥܰܡܶܗ ܘܥܺܕܬܶܗ ܘܡܰܪܥܺܝܬܶܗ. ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ. ܩܽܘܪܝܠܝܣܘܢ. ܩܽܘܪܝܠܝܣܘܢ. ܩܽܘܪܝܠܝܣܘܢ܀
ܘܦܳܢܶܝܢ ܠܡܰܕܢܚܳܐ܆ ܘܰܡܫܰܪܶܐ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܕܰܛܥܺܝܢ ܨܠܺܝܒܳܐ ܟܰܕ ܐܳܡܰܪ:
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘܒܶܐ ܡܒܰܪܟܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝܢ ܠܶܗ. |
| ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܚܰܬܶܡ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܒܰܨܠܺܝܒܳܐ ܠܥܰܡܳܐ. ܘܟܶܢ ܥܳܐܠܺܝܢ ܠܡܰܕܒܚܳܐ ܘܝܳܗܒܺܝܢ ܫܠܳܡܳܐ ܠܦܳܬܽܘܪ ܚܰـܝ̈ܶܐ ܘܠܰܨܠܺܝܒܳܐ ܘܠܶܐܘܰܢܓܶܠܝܽܘܢ ܘܰܠܩܰܒܪܳܐ ܩܰܕܺܝܫܳܐ ܘܠܰܡܢܰܘ̈ܳܬܳܐ ܕܩܰܕܺܝ̈ܫܶܐ. ܘܟܳܗ̈ܢܶܐ ܘܰܡܫܰܡ̈ܫܳܢܶܐ ܘܟܽܠܶܗ ܥܰܡܳܐ ܝܳܗܒܺܝܢ ܫܠܳܡܳܐ ܠܰܚܕܳܕ̈ܶܐ܆ ܘܟܽܠܶܗ ܥܰܡܳܐ.
ܪܺܝܫ ܡܫܰܡ̈ܫܳܢܶܐ ܡܰܙܥܶܩ ܘܳܐܡܰܪ:
ܢܶܬܶܠ ܫܠܳܡܳܐ ܠܰܚ̈ܕܳܕܶܐ ܟܽܠ ܐ̱ܢܳܫ ܠܩܰܪܺܝܒܶܗ ܒܢܽܘܫܰܩܬܳܐ ܩܰܕܺܝܫܰܬܳܐ ܘܰܐܠܳܗܳܝܬܳܐ ܒܚܽܘܒܶܗ ܕܡܳܪܰܢ ܘܰܐܠܳܗܰܢ. ܡܶܢ ܒܳܬܰܪ ܫܠܳܡܳܐ ܗܳܢܳܐ ܩܰܕܺܝܫܳܐ ܘܰܐܠܳܗܳܝܳܐ ܕܶܐܬܺܝܗܶܒ. ܩܕܳܡ ܡܳܪܝܳܐ ܡܪܰܚܡܳܢܳܐ ܪ̈ܺܝܫܰܝܢ ܢܰܪܟܶܢ ܩܕܳܡܰܝܟ ܡܳܪܰܢ ܘܰܐܠܳܗܰܢ܀
ܘܰܡܫܰܡܫܳܢ̈ܶܐ ܐܳܡܪܺܝܢ: ܩܳܠܳܐ ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝ̈ܕܶܐ
ܩܳܠܳܐ: ܒܨܰܦܪܳܐ ܚܙܰܐܘܽܗ̱ܝ ܬܰܠܡܺܝܕ̈ܶܐ
ܫܠܳܡܳܐ ܠܡܰܕܒܚܳܐ ܘܠܰܨܠܺܝܒܳܐ܆ ܫܠܳܡܳܐ ܠܩܰܒܪܳܐ ܩܰܕܺܝܫܳܐ܆ ܫܠܳܡܳܐ ܠܶܐܘܰܢܓܶܠܝܽܘܢ܆ ܘܥܰܡܶܗ ܠܣܺܝܥܬܳܐ ܕܩܰܕܺܝ̈ܫܶܐ܆ ܘܰܠܟܳܗ̈ܢܶܐ ܘܠܰܡܫܰܡ̈ܫܳܢܶܐ܆ ܘܰܠܟܽܠܗܽܘܢ ܝܰܠܕܶܝ̈ـܗ̇ ܕܥܺܕ̱ܬܳܐ܀
ܫܰܝܢܳܟ ܡܳܪܰܢ ܘܰܫܠܳܡܳܟ܆ ܝܶܫܽܘܥ ܡܫܺܝܚܳܐ ܦܳܪܽܘܩܰܢ܆ ܢܶܗܘܶܐ ܥܰܡܰܢ ܘܒܰܝܢܳܬܰܢ܆ ܘܰܢܥܰܦܶܩ ܐܳܦ ܠܰܚܕܳܕ̈ܶܐ܆ ܘܢܰܡܠܶܟ ܒܰܐܪܒܰܥ ܦܶܢܝ̈ܳܬܳܐ܆ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ܀
ܫܰܝܢܳܟ ܢܢܰܛܰܪ ܥܺܕ̈ܳܬܰܢ܆ ܫܠܳܡܳܟ ܢܩܰܝܶܡ ܕܰܝܪ̈ܳܬܰܢ܆ ܨܠܺܝܒܳܟ ܢܩܰܕܶܫ ܢܰܦܫ̈ܳܬܰܢ܆ ܥܺܐܕܳܟ ܢܰܦܨܰܚ ܪ̈ܽܘܚܳܬܰܢ܆ ܫܰܝܢܳܟ ܡܳܪܰܢ ܘܰܫܠܳܡܳܟ܆ ܢܶܗܘܶܐ ܥܰܡܰܢ ܘܒܰܝܢܳܬܰܢ܀
ܚܽܘܬܳܡܳܐ
ܒܳܬܰܪ ܕܢܶܬܠܽܘܢ ܟܳܗ̈ܢܶܐ ܘܰܡܫܰܡܫ̈ܳܢܶܐ ܫܠܳܡܳܐ ܠܰܚܕܳܕ̈ܶܐ܆ ܢܶܦܩܽܘܢ ܠܒܰܪ ܘܰܢܩܰܘܽܘܢ ܩܕܳܡ ܬܪܰܥ ܗܰܝܟܠܳܐ ܐܰܝܟܰܢܳܐ ܕܟܽܠܗܽܘܢ ܡܗܰܝܡ̈ܢܶܐ ܢܶܬܒܰܪܟܽܘܢ ܡܶܢ ܨܠܺܝܒܳܐ ܘܶܐܘܰܓܶܠܺܝܽܘܢ ܘܰܡܢܰܘ̈ܳܬܳܐ ܕܩܰܕܺܝ̈ܫܶܐ܆ ܘܢܶܬܠܽܘܢ ܫܠܳܡܳܐ ܠܰܚܕܳܕ̈ܶܐ ܟܽܠ ܩܰܘܡ̈ܳܢ. ܘܰܡܫܰܡܫ̈ܳܢܶܐ ܢܙܰܡܪܽܘܢ ܒܬܰܪܬܶܝܢ ܓܽܘܕܺܝ̈ܢ ܠܣܽܘܓܺܝܬܳܐ ܗܳܕܶܐ ܒܢܺܝܫܳܐ܆
ܚܕܰܘ ܥܰܡ̈ܡܶܐ ܚܕܰܘ ܥܰܡ̈ܡܶܐ
ܚܕܰܘ ܥܰܡ̱̈ܡܶܐ܆ ܚܕܰܘ ܥܰܡ̱̈ܡܶܐ ܡܰܪܝܰܡ ܐܶܡܪܰܬ܆ ܕܩܳܡ ܠܶܗ ܒܶܪܝ̱ ܡܶܢ ܩܰܒܪܳܐ܆ ܘܨܶܝܕ ܐܰܒܽܘܗ̱ܝ ܣܠܶܩ܀
ܒܢܰܝ̈ ܢܽܘܗܪܳܐ ܒܢܰܝ̈ ܢܽܘܗܪܳܐ܆ ܘܗܳܐ ܢܽܘܗܪܳܐ ܡܰܛܺܝ ܠܶܗ܆ ܩܽܘܡܘ ܐܰܘܕܰܘ ܠܺܐܝܡܳܡܳܐ܆ ܕܠܰܐܪܥܳܐ ܐܰܢܗܪܳܗ̇܀
ܬܰܠܡܺܝ̈ܕܶܐ ܬܰܠܡܺܝ̈ܕܶܐ܆ ܗܳܐ ܕܢܰܚ ܠܶܗ ܢܽܘܚܳܡܳܐ܆ ܠܳܐ ܬܶܒܟܽܘܢ ܠܳܐ ܬܶܒܟܽܘܢ܆ ܕܩܳܡ ܠܶܗ ܪܰܒܟܽܘܢ܀
ܡܰܢ ܗ̱ܝ ܗܳܝ̇ ܡܰܢ ܗ̱ܝ ܗܳܝ̇܆ ܕܰܚܙܳܬܶܗ ܠܢܰܗܺܝܪܳܐ܆ ܘܰܡܫܰܐܠܳܐ ܘܡܰܠܶܦ ܠܳܗ̇܆ ܕܗܽܘܝܽܘ ܘܠܰܘ ܐ̱ܚܪܺܝܢ܀
ܡܰܪܝܰܡ ܗ̱ܝ ܡܰܪܝܰܡ ܗ̱ܝ ܕܒܰܫܡܰܝܳܐ ܚܳܝܪܳܐ܆ ܘܗܺܝ ܚܙܳܬܶܗ ܩܰܕܡܳܝܰܬ܆ ܟܰܕ ܣܠܶܩ ܕܢܶܬܓܠܶܐ܀
ܙܶܠܝ̱ ܣܰܒܰܪܝ̱ ܙܶܠܝ̱ ܣܰܒܰܪܝ̱܆ ܠܰܫܠܺܝ̈ܚܶܐ ܟܽܠܗܽܘܢ܆ ܕܩܳܡܶܬ ܠܺܝ ܕܩܳܡܶܬ ܠܺܝ ܠܳܐ ܬܶܬܪܰܗܒܽܘܢ܀
ܣܰܒܪ̈ܳܬܳܐ ܛܳܒ̈ܳܬܳܐ ܒܺܐܝܡܳܡܳܐ ܢܰܗܺܝܪܳܐ܆ ܠܰܫܠܺܝ̈ܚܶܐ ܛܽܘ̈ܒܳܢܶܐ܆ ܕܩܳܡ ܠܶܗ ܪܰܒܗܽܘܢ܀
ܒܰܠܒܽܘ̈ܫܶܐ ܚܶܘܳܪ̈ܶܐ܆ ܡܰܠܰܐܟ̈ܶܐ ܡܰܦܪܓܺܝܢ܆ ܒܰܓܢܽܘܢܶܗ ܕܰܩܛܺܝܠܳܐ܆ ܕܠܰܫܝܽܘܠ ܐܰܚܪܒܳܗ̇܀
ܪ̈ܗܶܛܝ̱ ܢܶܫ̈ܶܐ ܒܚܰܕܘܽܬܳܐ܆ ܘܠܰܫܠܺܝ̈ܚܶܐ ܐܳܡܪ̈ܳܢ܆ ܐܶܬܠܰܒܰܒܘ̱ ܐܶܬܠܰܒܰܒܘ̱܆ ܕܩܳܡ ܠܶܗ ܪܰܒܟܘܢ܀
ܩܽܘܡ ܫܶܡܥܽܘܢ ܘܦܽܘܩ ܘܰܚܙܺܝ܆ ܢܽܘܚܳܡܳܐ ܫܰܪܺܝܪܳܐ܆ ܐܰܘܕܳܐ ܒܶܗ ܘܣܰܒܰܪܳܝܗ̱ܝ܆ ܠܟܽܠܶܗ ܥܳܠܡܳܐ܀
ܚܢܺܝܩ ܝܽܘܕܳܐ ܚܢܺܝܩ ܝܽܘܕܳܐ܆ ܘܩܰܝܳܦܳܐ ܒܣܺܝܪ܆ ܒܠܺܝܡ ܚܰܢܳܢ ܘܰܡܕܰܘܰܕ܆ ܕܰܒܪܳܐ ܩܳܡ ܠܶܗ܀
ܡܰܠܰܐܟ̈ܶܐ ܒܣܰܒܪ̈ܳܬܳܐ܆ ܠܢܶܫ̈ܶܐ ܐܳܡܪ̈ܳܢ܆ ܕܩܳܡ ܚܰܬܢܳܐ ܒܬܶܫܒܽܘܚܬܳܐ܆ ܘܠܰܝܬܰܘܗ̱ܝ ܒܓܰܘ ܫܝܽܘܠ܀
ܩܽܘܡܘ̱ ܐܰܫܺܝܓܘ̱ ܕܶܡܥܰܝ̈ܟܽܘܢ܆ ܐܳܘ ܥܳܪ̈ܽܘܩܶܐ܆ ܘܰܐܪܺܝܡܽܘܢ ܪ̈ܺܝܫܰܝܟܽܘܢ܆ ܕܩܳܡ ܠܶܗ ܪܰܒܟܘܢ܀
ܢܳܛܽܘܪ̈ܶܐ ܐܶܬܕܰܘܰܕܘ̱܆ ܡܶܢ ܢܽܘܗܪܳܐ ܥܰܙܺܝܙܳܐ܆ ܘܗܳܐ ܟܢܺܝܫܺܝܢ ܡܰܠܰܐܟ̈ܶܐ܆ ܘܩܽܘܫܬܳܐ ܡܰܟܪܙܺܝܢ܀
ܩܳܡ ܒܨܰܦܪܳܐ ܢܰܗܺܝܪܳܐ܆ ܘܦܰܟܪܗ ܗ̱ܘܳܐ ܠܠܺܠܝܳܐ܆ ܘܗܳܐ ܡܫܰܦܰܠ ܚܶܫܽܘܟܳܐ܆ ܕܢܽܘܗܪܳܐ ܐܶܬܓܠܺܝ܀
ܓܰܢ̱ܒܳܪܳܐ ܥܰܠ ܠܰܫܝܽܘܠ܆ ܕܢܶܣܒܰܥ ܫܶܢܬܳܐ܆ ܘܠܳܐ ܥܪܳܬܶܗ ܕܢܶܕܡܰܟ ܒܳܗ̇. ܐܶܬܬܥܺܝܪ ܘܰܐܚܪܒܳܗ̇܀
ܠܳܟ ܫܽܘܒܚܳܐ ܠܳܟ ܫܽܘܒܚܳܐ܆ ܨܰܦܪܳܐ ܡܫܺܝܚܳܐ܆ ܬܰܘܕܺܝܬܳܐ ܠܳܟ ܘܠܰܐܒܘܽܟ܆ ܘܰܠܪܽܘܚ ܩܽܘܕܫܳܐ܀
ܫܠܶܡ ܛܶܟܣܳܐ ܕܙܽܘܝܳܚܳܐ ܕܰܨܠܺܝܒܳܐ ܒܥܺܐܕܳܐ ܕܰܩܝܳܡܬܳܐ܀