ܡܚܰܘܝܳܢܳܐ

ܪ̈ܺܝܫܟܳܗܢܶܐ ܐܰܘ ܚܰܕ ܡܶܢ ܟܳܗ̈ܢܶܐ ܛܳܥܶܢ ܨܠܺܝܒܳܐ ܘܰܩܕܳܡ ܕܢܶܫܬܰܡܠܶܐ ܩܽܘܪܳܒܳܐ ܐܰܠܳܗܳܝܳܐ ܡܶܢ ܒܳܬܰܪ ܕܰܡܫܰܡܠܶܝܢ ܠܬܶܫܡܶܫܬܳܐ ܕܝܳܠܕܰܬ ܐܰ‎ܠܳܗܳܐ܆ ܩܰܫܺܝ̈ܫܶܐ ܘܰܡܫ̈ܰܡܫܳܢܶܐ ܟܰܕ ܠܒܺܝܫܺܝܢ ܛܶܟܣܰܝ̈ܗܽܘ̇ܢ ܘܫܳܠܶܝܢ ܨܠܺܝܒܳܐ ܘܶܐܘܰܢܓܶܠܝܽܘܢ ܘܦܺܝܪܡܳܐ ܘܡܰܪ̈ܘܚܳܬܳܐ ܘܩܶܪ̈ܝܽܘܢܶܐ. ܘܢܳܦܩܺܝܢ ܡܶܢ ܡܰܕܒܚܳܐ ܒܙܽܘܝܳܚܳܐ ܘܥܳܒܕܺܝܢ ܟܪܽܘܟܝܳܐ ܡܶܢ ܓܰܪܒܝܳܐ ܠܬܰܝܡܢܳܐ ܘܰܒܥܶܕܳܢ ܟܪܽܘܟܝܳܐ ܐܳܡܪܺܝܢ ܠܩ̈ܳܠܶܐ ܗܳܠܶܝܢ.

ܩܠܐ: ܒܩ̄ ܗܰܘ ܕܰܨܠܝܒܶܗ ܥܰܠ ܟܰܬܦܶܗ

ܒܪܺܝܟ ܗ̱ܘܽ ܡܫܺܝܚܳܐ ܕܒܰܫܠܳܡܶܗ܆ ܫܰܪܰܪ ܐܶܢܽܘ̇ܢ ܠܰܫܠܺܝ̈ܚܰܘܗ̱ܝ܆ ܘܗܳܐ ܡܰܣܩܺܝܢ ܠܶܗ ܬܶܫܒܽܘܚܬܳܐ܆ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ܀

ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ܆ ܬܰܠܡܺܝ̈ܕܶܐ ܩܢܰܘ ܠܽܘܒܳܒܳܐ܆ ܕܡܳܪܶܐ ܟܽܠ ܥܰܠ ܨܶܐܕܰܝܗܽܘ̇ܢ܆ ܘܰܫܠܳܡܳܐ ܙܪܰܥ ܒܰܝܢܳܬܗܽܘ̇ܢ܀

ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ܆ ܐܶܣܬܟܰܪ ܦܽܘܡܳܐ ܕܛܳܠܽܘ̈ܡܶܐ܆ ܕܰܟܦܰܪܘ̱ ܒܶܗ ܒܰܒܪܳܐ ܘܶܐܡܰܪܘ̱܆ ܕܗܳܢܳܐ ܠܰܝܬܰܘܗ̱ܝ ܐܰ‎ܠܳܗܳܐ܀

ܒܗܳܢܳܐ ܝܰܘܡܳܐ ܥܰܠ ܡܳܪܰܢ܆ ܠܥܶܠܺܝܬܳܐ ܘܠܰܫܠܺܝ̈ܚܶܐ ܩܪܳܐ܆ ܚܰܘܺܝ ܠܗܽܘܢ ܐܺܝ̈ܕܰܘܗܝ ܘܪ̈ܶܓܠܰܘܗ̱ܝ܆ ܘܫܽܘ̈ܡܳܬܶܗ ܡܰܥܒ̈ܕܳܬ ܚܰܝ̈ܶܐ܀

ܥܰܠ ܡܳܪܰܢ ܨܶܝܕ ܬܰܠܡܺܝ̈ܕܰܘܗ̱ܝ܆ ܘܫܰܝܢܳܐ ܡܰܠܶܠ ܥܰܡ ܟܽܠܗܽܘܢ܆ ܘܚܰܘܺܝ ܐܶܢܽܘ̇ܢ ܬܶܕܡܽܘܪܬܳܐ܆ ܕܠܳܐ ܦܬܰܚ ܬܰܪ̈ܥܶܐ ܕܥܶܠܺܝܬܳܐ܀

ܫܠܳܡܳܐ ܕܫܰܝܶܢ ܒܶܪ̈ܝܳܬܳܐ܆ ܘܰܙܪܰܥ ܫܰܝܢܳܐ ܒܓܰܘ ܬܺܐܒܶܝܠ܆ ܐܰܫܪܳܐ ܫܰܝܢܳܟ ܘܰܫܠܳܡܳܟ܆ ܒܥܰܡܳܟ ܘܥܳܢ̈ܳܟ ܘܰܒܥܺܕܬܳܟ܀

ܩܠܐ ܐ̱ܚܪܢܐ: ܒܩ̄ ܒܨܰܦܪܳܐ ܕܚܰܕ ܒܫܰܒܳܐ

ܣܒܰܪܬܶܗ ܡܰܟܪܶܙ ܐ̱ܢܳܐ܆ ܐܶܡܰܪ ܬܽܐܘܡܰܐ ܠܰܫܠܺܝ̈ܚܶܐ܆ ܠܳܐ ܡܗܰܝܡܶܢ ܐ̱ܢܳܐ ܕܠܳܐ ܓܰܫܬܶܗ܆ ܘܰܚܙܺܝܬ ܫܽܘ̈ܡܳܬܶܗ܆ ܘܣܳܡܶܬ ܐܺܝ̈ܕܰܝ ܥܰܠ ܣܶܛܪܶܗ ܘܶܐܦܽܘܩ ܐܰܟܪܶܙ ܢܽܘܚܳܡܶܗ ܗ̄ ܒܪܺܝܟ ܡܰܘܬܳܟ ܒܪܺܝܟ ܢܽܘܚܳܡܳܟ ܝܶܫܽܘܥ ܦܳܪܽܘܩܶܗ ܕܥܳܠܡܳܐ܀

ܟܰܕ ܬܰܪ̈ܥܶܐ ܐܰܚܺܝܕܺܝܢ܆ ܘܰܫܠܺܝ̈ܚܶܐ ܒܓܰܘ ܥܶܠܺܝܬܳܐ܆ ܡܳܪܰܢ ܩܳܡ ܗ̱ܘܳܐ ܒܰܝܢܳܬܗܽܘ̇ܢ܆ ܘܚܰܘܺܝ ܠܗܽܘܢ ܢܰܦܫܶܗ܆ ܘܰܠܬܽܐܘܡܰܐ ܚܰܘܺܝ ܣܶܛܪܶܗ ܕܢܶܗܘܶܐ ܣܳܗܕܳܐ ܠܰܩܝܳܡܬܶܗ ܗ̄ ܫܽܘܒܚܳܐ ܠܶܗ ܕܩܳܡ ܡܶܢ ܩܰܒܪܳܐ܆ ܘܚܰܘܺܝ ܠܰܪ̈ܚܽܘܡܰܘܗ̱ܝ ܩܝܳܡܬܶܗ܀

ܘܣܳܠܩܺܝܢ ܠܒܺܐܡܰܐ ܘܳܐܡܪܺܝܢ ܪܰܚܶܡܥܠܰܝ

ܩܠܐ : ܒܩ̄ ܐܶܬܕܰܟܪܰܝܢܝ̱ ܒܪܳܐ ܕܰܐ‎ܠܳܗܳܐ

ܡܶܢ ܒܳܬܰܪ ܬܡܳܢܝܳܐ ܝܰܘܡܺܝܢ܆ ܕܶܐܬܢܰܚܰܡ ܦܳܪܽܘܩܰܢ܆ ܚܰܘܺܝ ܢܰܦܫܶܗ ܠܬܰܠܡܺܝ̈ܕܰܘܗ̱ܝ܀

ܒܪܺܝܟ ܫܰܝܢܳܟ ܕܫܰܝܶܢ ܠܰܐܪܥܳܐ܆ ܘܰܥܩܰܪ ܡܶܢܳܗ̇ ܦܠܺܝܓܽܘܬܳܐ܆ ܘܰܙܪܰܥ ܫܰܝܢܶܗ ܪܰܒܳܐ܀

ܫܠܳܡܳܐ ܫܠܳܡܳܐ ܠܪ̈ܰܚܺܝܩܶܐ܆ ܘܰܐܘܝܽܘܬܳܐ ܠܩܰܪ̈ܺܝܒܶܐ܆ ܕܰܡܫܺܝܚܳܐ ܩܳܡ ܡܶܢ ܩܰܒܪܳܐ܀

ܛܽܘܒܰܝܗܽܘ̇ܢ ܠܡܶܣ̈ܟܺܢܶܐ ܐ : ܒܩ̄ ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܫܠܳܡܳܐ܆ ܕܝܰܗ̱ܒ ܗ̱ܘܳܐ ܡܳܪܰܢ ܠܰܬܪܶܥܣܰܪܬܶܗ܆ ܒܥܶܠܺܝܬܳܐ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘ̇ܢ܆ ܠܳܐ ܬܶܬܪܰܗܒܽܘ̇ܢ. ܕܩܳܡܶܬ ܠܺܝ ܡܶܢ ܒܶܝܬ ܡܺܝ̈ܬܶܐ܀

ܡܳܐ ܫܰܦܺܝܪ ܗ̱ܘܳܐ ܩܳܠܳܐ܆ ܕܰܩܪܳܐ ܡܳܪܰܢ ܒܓܰܘ ܥܶܠܺܝܬܳܐ܆ ܟܰܕ ܐܳܡܰܪ ܠܗܽܘܢ ܠܰܫܠܺܝ̈ܚܶܐ ܫܠܳܡܳܐ ܥܰܡܟܽܘ̇ܢ܆ ܘܚܶܕܝܰܬ ܥܺܕܬܳܐ܆ ܕܰܦܪܰܩ ܝܰܠܕܶܝ̈ܗ̇ ܒܰܩܝܳܡܬܶܗ܀

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ ܠܬܽܐܘܡܰܐ܆ ܫܠܺܝܚܳܐ ܟܰܕ ܐܳܡܰܪ ܗ̱ܘܳܐ܆ ܠܰܫܠܺܝ̈ܚܶܐ ܚܰܒܪ̈ܰܘܗ̱ܝ ܘܰܐܚܰܘ̈ܗ̱ܝ ܕܠܳܐ ܡܗܰܝܡܶܢ ܐ̱ܢܳܐ. ܐܶܠܳܐ ܢܚܰܘܶܝܢܝ̱܆ ܢܰܦܫܶܗ ܐܰܝܟ ܕܰܚܙܰܝܬܽܘܢܳܝܗ̱ܝ܀

ܡܫܰܡܫܳܢܳܐ: ܣܛܰܘܡܶܢ ܩܰܠܳܘܣ ܩܽܘܪܝܶܠܰܝܣܳܘܢ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܠܳܐ ܡܣܰܝܟܳܐ ܘܠܳܐ ܡܶܬܡܰܠܠܳܢܳܐ ܘܠܳܐ ܡܶܬܚܰܙܝܳܢܳܐ ܕܥܰܠ ܠܥܶܠܺܝܬܳܐ ܠܘܳܬ ܫܠܺܝ̈ܚܶܐ ܩܰܕܺܝ̈ܫܶܐ ܟܰܕ ܐܰܚܺܝܕܺܝܢ ܬܰܪ̈ܥܶܐ ܘܚܰܘܺܝ ܠܗܽܘܢ ܕܰܦܢܶܗ ܘܕܽܘܟܰܬ ܠܽܘܟܳܝܬܳܐ ܘܨܶܨ̈ܶܐ܆ ܘܰܩܪܳܐ ܠܬܽܐܘܡܰܐ ܘܚܰܘܺܝ ܠܶܗ ܣܶܛܪܶܗ ܘܗܰܝܡܶܢ ܘܰܐܘܕܺܝ ܘܰܣܓܶܕ ܘܶܐܡܰܪ ܡܳܪܝ̱ ܘܰܐܠܳܗܝ̱ ܒܰܫܪܳܪܳܐ܆ ܠܗܰܘ ܕܟܰܠܶܠ ܠܰܫܠܺܝ̈ܚܰܘܗ̱ܝ ܘܫܰܪܰܪ ܐܶܢܽܘܢ ܒܥܶܠܺܝܬܳܐ ܗܳܝ ܐ̱ܪܳܙܳܢܳܝܬܳܐ ܘܰܢܦܰܚ ܒܗܽܘܢ ܡܶܢ ܪܽܘܚܳܐ ܩܰܕܺܝܫܳܐ ܘܰܡܠܳܐ ܐܶܢܽܘ̇ܢ ܚܰܝܠܳܐ ܘܚܶܟܡܬܳܐ܆ ܠܗܰܘ ܕܰܐܫܩܺܝ ܐܶܢܽܘ̇ܢ ܚܰܡܪܳܐ ܚܰܕܬܳܐ ܕܰܐܠܳܗܽܘܬܶܗ ܘܫܰܘܬܶܦ ܐܶܢܘܢ ܒܪܽܘܚܳܢܽܘܬܶܗ ܘܥܰܫܶܢ ܐܶܢܽܘܢ ܒܚܰܝܠܶܗ. ܒܗܳܢܳܐ ܥܶܕܳܢܳܐ ܕܰܩܝܳܡܬܳܐ ܦܳܪܽܘܩܳܝܬܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܠܝܰܘܡܳܐ ܗܳܢܳܐ ܩܰܕܺܝܫܳܐ ܡܥܰܕܥܕܺܝܢܰܢ ܘܰܠܥܶܠܺܝܬܳܐ ܕܐ̱ܪ̈ܳܙܶܐ ܡܶܬܕܰܟܪܺܝܢܰܢ ܕܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܬܰܠܡܺܝ̈ܕܰܘܗ̱ܝ ܕܰܒܪܳܐ ܠܶܗ ܐܰܩܒܶܠܘ̱ ܗ̱ܘܰܘ. ܘܟܰܕ ܕܶܝܢ ܒܪܰܡܫܳܐ ܕܚܰܕ ܒܫܰܒܳܐ ܐܶܬܳܐ ܝܶܫܽܘܥ ܠܘܳܬ ܬܰܠܡܺܝ̈ܕܰܘܗ̱ܝ. ܘܩܳܡ ܒܰܝܢܳܬܗܽܘ̇ܢ ܟܰܕ ܐܰܚܺܝܕܺܝܢ ܬܰܪ̈ܥܶܐ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘ̇ܢ ܘܚܰܘܺܝ ܠܗܽܘܢ ܕܽܘܟܰܬ ܠܽܘܟܳܝܬܳܐ ܘܨܶܨ̈ܶܐ ܘܐܺܝ̈ܕܰܘܗ̱ܝ ܘܪ̈ܶܓܠܰܘܗ̱ܝ ܘܶܐܡܰܪ ܠܗܽܘܢ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇ ܐܰܟܡܳܐ ܕܚܳܙܶܝܬܽܘ̇ܢ ܕܺܐܝܬ ܠܺܝ. ܘܶܐܡܰܪ ܠܗܽܘܢ ܕܰܐܝܟܰܢܳܐ ܕܫܰܕܪܰܢܝ̱ ܐܳܒܝ ܐܳܦ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘ̇ܢ ܘܰܢܦܰܚ ܒܗܽܘܢ ܘܩܰܒܶܠܘ̱ ܪܽܘܚܳܐ ܕܩܽܘܕܫܳܐ ܘܶܐܡܰܪ ܠܗܽܘܢ܆ ܕܶܐܢ ܬܶܫܒܩܽܘ̇ܢ ܚܛܳܗ̈ܶܐ ܕܐ̱ܢܳܫ ܢܶܫܬܰܒܩܽܘ̇ܢ ܠܶܗ܆ ܘܶܐܢ ܬܶܐܚܕܽܘ̇ܢ ܕܐ̱ܢܳܫ ܐܰܚܺܝܕܺܝܢ܆ ܘܗܳܝ ܕܢܶܐܣܪܽܘ̇ܢ ܘܢܶܫܪܽܘ̇ܢ ܒܰܫܡܰܝܳܐ ܘܒܰܐܪܥܳܐ ܦܰܩܶܕ ܐܶܢܽܘܢ. ܘܰܕܢܶܣܥܪܽܘܢ ܬܶܕܡܪ̈ܳܬܳܐ ܘܚܰܝ̈ܠܶܐ ܘܳܐܣ̈ܘܳܬܳܐ ܘܕܰܢܩܺܝܡܽܘܢ ܡܺܝ̈ܬܶܐ ܒܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܐܶܫܬܰܘܕܺܝ ܠܗܽܘܢ. ܘܟܰܕ ܗܰܝܡܶܢ ܬܐܽܘܡܰܐ ܘܶܐܡܰܪ ܡܳܪܝ̱ ܘܰܐܠܳܗܝ̱ ܫܰܪܰܪ ܗܰܝܡܳܢܽܘܬܶܗ. ܘܟܰܕ ܐܶܫܬܰܘܕܺܝ ܠܗܽܘܢ ܠܰܫܠܺܝ̈ܚܰܘܗ̱ܝ ܟܽܘܪ̈ܣܰܘܳܬܳܐ ܕܢܶܬܒܽܘܢ ܘܰܢܕܽܘܢܽܘܢ ܫܰܒ̈ܛܶܐ ܕܺܐܝܣܪܳܐܝܶܠ ܘܰܩܪܳܐ ܐܶܢܽܘܢ ܪ̈ܳܚܡܰܘܗ̱ܝ ܘܰܐܚܰܘ̈ܗ̱ܝ ܐܰܫܠܶܛ ܐܶܢܽܘܢ ܥܰܠ ܡܰܠܟܽܘܬܶܗ ܘܝܰܗܒ ܒܐܺܝ̈ܕܰܝܗܽܘ̇ܢ ܩܠܺܝ̈ܕܶܐ ܕܰܫܡܰܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܕܰܒܢܰܝ̈ܢܳܫܳܐ ܘܰܒܢܳܐ ܥܠܰܝܗܽܘ̇ܢ ܥܺܕܬܶܗ. ܘܗܶܢܽܘ̇ܢ ܐܶܢܽܘܢ ܦܳܠܚ̈ܶܐ ܟܰܫܺܝܪ̈ܶܐ ܒܟܰܪܡܶܗ ܕܰܡܫܺܝܚܳܐ. ܗܶܢܽܘܢ ܐܶܢܽܘܢ ܐܳܣܰܘ̈ܳܬܳܐ ܚܰܟܺܝ̈ܡܶܐ ܕܰܐܣܺܝܘ ܟܺܐܒ̈ܶܐ ܘܟܽܘܪ̈ܗܳܢܶܐ ܕܰܒܢܰܝ̈ܢܳܫܳܐ ܢܰܦܫܳܢܳܝ̈ܶܐ ܘܦܰܓܪ̈ܳܢܳܝܶܐ. ܗܶܢܽܘܢ ܐܶܢܽܘܢ ܕܰܐܟܪܶܙܘ̱ ܒܬܺܒܶܝܠ ܣܒܰܪܬܶܗ ܕܰܒܪܳܐ ܘܰܐܦܢܺܝܘ ܠܥܳܠܡܳܐ ܠܐܽܘܪܚܳܐ ܕܰܫܪܳܪܳܐ. ܐܰܝܟܰܢܳܐ ܕܰܒܝܰܕ ܨܠܰܘ̈ܳܬܗܽܘ̇ܢ ܢܶܫܬܘܶܐ ܚܢܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܰܩܝܳܡܬܳܐ ܕܡܶܢ ܝܰܡܺܝܢܳܟ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ܀

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܳܪܰܢ ܐܶܬܪܰܚܰܡ ܥܠܰܝܢ܆ ܒܪܳܐ ܕܒܰܩܝܳܡܬܶܗ ܚܰܪܰܪ ܠܰܢ܀
ܡܫܝܚܳܐ ܕܒܰܩܝܳܡܬܶܗ ܦܰܪܩܰܢ܆ ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܫܰܝܢܳܟ ܢܰܡܠܶܟ ܐܰ‎ܠܳܗܳܐ܆ ܒܥܺܕܰܬ ܩܘܕܫܳܐ ܡܗܰܝܡܰܢܬܳܐ܆ ܫܠܳܡܳܟ ܢܶܗܘܶܐ ܒܰܝܢܳܬܰܢ܆ ܥܕܰܡܳܐ ܠܚܰܪܬܳܐ ܘܫܘܠܳܡܳܐ܀

ܫܽܘܒܚܳܐ ܠܰܐܒܳܐ ܡܫܰܝܶܢ ܟܽܠ܆ ܘܠܰܒܪܳܐ ܫܠܳܡܳܐ ܡܪܰܥܶܐ ܟܽܠ܆ ܘܰܠܪܽܘܚ ܩܽܘܕܫܳܐ ܡܚܰܕܶܬ ܟܽܠ܆ ܐ̱ܪܳܙܳܐ ܡܥܰܠܝܳܐ ܣܓܝܕ ܡܶܢ ܟܽܠ܀

ܡܳܪܰܢ ܐܶܬܪܰܚܰܡ ܥܠܰܝܢ܆ ܒܪܳܐ ܕܒܰܩܝܳܡܬܶܗ ܚܰܪܰܪ ܠܰܢ܀
ܡܫܝܚܳܐ ܕܒܰܩܝܳܡܬܶܗ ܦܰܪܩܰܢ܆ ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܩܶܪ̈ܝܳܢܶܐ:

ܡܶܢܝܳܢܳܐ. ܗ: ܘ ـ ܝ. Numeri 5:6-10
ܡܰܙܡܽܘܪ̈ܶܐ. ܩܡܛ: ܐ ـ ܛ. Psalms 149:1-9
ܡܰܙܡܽܘܪ̈ܶܐ. ܩܢ: ܐ ـ ܘ Psalms 150:1-6
ܐܶܫܰܥܝܳܐ. ܡܚ: ܝܒ ـ ܟܒ Isaiah 48:12-22
ܐ. ܦܶܛܪܽܘܣ. ܐ: ܝܓ ـ ܟܗ I Peter 1:13-25

ܐܶܓܰܪܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܕ: ܝܙ ـ ܟܕ. Ephesians 4:17-24

ܗܳܕܶܐ ܕܶܝܢ ܐܳܡܰܪ ܐ݈ܢܳܐ ܘܰܡܣܰܗܶܕ ܐ݈ܢܳܐ ܒܡܳܪܝܳܐ ܕܡܶܢ ܗܳܫܳܐ ܠܳܐ ܬܶܗܘܽܘܢ ܡܗܰܠܟܺܝܢ ܐܰܝܟ ܫܰܪܟܳܐ ܕܥܰܡ݈̈ܡܶܐ ܕܰܡܗܰܠܟܺܝܢ ܒܰܣܪܺܝܩܽܘܬ ܪ̈ܶܥܝܳܢܗܽܘܢ܂ ܘܚܶܫܽܘ̈ܟܺܝܢ ܒܡܰܕܥܰܝ̈ܗܽܘܢ ܘܢܽܘܟܪ̈ܳܝܺܝܢ ܐܶܢܽܘܢ ܡܶܢ ܚܰܝܰܘ̈ܗ݈ܝ ܕܰܐ‎ܠܳܗܳܐ ܡܶܛܽܠ ܕܠܰܝܬ ܒܗܽܘܢ ܝܺܕܰܥܬܳܐ ܘܡܶܛܽܠ ܥܘܺܝܪܽܘܬ ܠܶܒܗܽܘܢ܂ ܗܳܢܽܘܢ ܕܰܦܣܰܩܘ ܣܰܒܪܗܽܘܢ ܘܰܐܫܠܶܡܘ ܢܰܦܫܗܽܘܢ ܠܦܰܚܙܽܘܬܳܐ ܘܰܠܦܽܘܠܚܳܢܳܐ ܕܟܽܠܳܗ̇ ܛܰܢܦܽܘܬܳܐ ܒܝܰܥܢܽܘܬܗܽܘܢ܂ ܐܰܢ݈ܬܽܘܢ ܕܶܝܢ ܠܳܐ ܗ݈ܘܳܐ ܗܳܟܰܢܳܐ ܝܺܠܶܦܬܽܘܢܳܝܗ݈ܝ ܠܰܡܫܺܝܚܳܐ܂ ܐܶܢ ܫܰܪܺܝܪܳܐܝܺܬ ܫܡܰܥܬܽܘܢܳܝܗ݈ܝ ܘܒܶܗ ܝܺܠܶܦܬܽܘܢ ܐܰܝܟ ܡܳܐ ܕܺܐܝܬܰܘܗ݈ܝ ܩܽܘܫܬܳܐ ܒܝܶܫܽܘܥ܂ ܐܶܠܳܐ ܕܰܬܢܺܝܚܽܘܢ ܡܶܢܟܽܘܢ ܗܽܘܦܳܟܰܝ̈ܟܽܘܢ ܩܰܕܡܳܝ̈ܶܐ ܠܒܰܪܢܳܫܳܐ ܗܰܘ ܥܰܬܺܝܩܳܐ ܕܡܶܬܚܰܒܰܠ ܒܰܪ̈ܓܺܝܓܳܬܳܐ ܕܛܽܘܥܝܰܝ܂ ܘܬܶܬܚܰܕܬܽܘܢ ܒܪܽܘܚܳܐ ܕܡܰܕܥܰܝ̈ܟܽܘܢ܂ ܘܬܶܠܒܫܽܘܢ ܠܒܰܪܢܳܫܳܐ ܚܰܕ݈ܬܳܐ ܗܰܘ ܕܒܰܐܠܳܗܳܐ ܐܶܬܒܪܺܝ ܒܙܰܕܺܝܩܽܘܬܳܐ ܘܰܒܚܰܣܝܽܘܬܳܐ ܕܩܽܘܫܬܳܐ ܒܰܪܶܟܡܳܪܝ̱܀

ܗܽܘܠܳܠܳܐ ܘܦܶܬܓܳܡܳܐ

ܢܶܚܕܽܘܢ ܫܡܰܝ̈ܳܐ ܘܰܬܕܽܘܨ ܐܰܪܥܳܐ܆ ܒܰܩܝܳܡܬܶܗ ܕܡܰܠܟܳܐ ܡܫܺܝܚܳܐ ܗ̄܀

ܐܶܘܢܓܠܝܘܢ ܕܝܘܚܢܢ
(ܟܟ: ܝܛ ـ ܟܛ John 20: 19-29)

ܟܰܕ ܗܘܳܐ ܕܶܝܢ ܪܰܡܫܳܐ ܕܝܰܘܡܳܐ ܗܰܘ ܕܚܰܕ ܒܫܰܒܳܐ ܘܬܰܪ̈ܥܶܐ ܐܰܚܺܝܕܺܝܢ ܗ݈ܘܰܘ ܕܰܐܝܟܳܐ ܕܺܐܝܬܰܝܗܽܘܢ ܗ݈ܘܰܘ ܬܰܠܡܺܝ̈ܕܶܐ ܡܶܛܽܠ ܕܶܚܠܬܳܐ ܕܺܝܗܽܘ̈ܕܳܝܶܐ ܐܶܬܳܐ ܝܶܫܽܘܥ ܩܳܡ ܒܰܝܢܳܬܗܽܘܢ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘܢ܂ ܗܳܕܶܐ ܐܶܡܰܪ ܘܚܰܘܺܝ ܐܶܢܽܘܢ ܐܺܝ̈ܕܰܘܗ݈ܝ ܘܣܶܛܪܶܗ ܘܰܚܕܺܝܘ ܬܰܠܡܺܝ̈ܕܶܐ ܕܰܚܙܰܘ ܠܡܳܪܰܢ܂ ܐܶܡܰܪ ܠܗܽܘܢ ܕܶܝܢ ܬܽܘܒ ܝܶܫܽܘܥ ܫܠܳܡܳܐ ܥܰܡܟܽܘܢ ܐܰܝܟܰܢܳܐ ܕܫܰܕܪܰܢܝ ܐܳܒܝ ܐܳܦ ܐܶܢܳܐ ܡܫܰܕܰܪ ܐ݈ܢܳܐ ܠܟܽܘܢ܂ ܘܟܰܕ ܐܶܡܰܪ ܗܳܠܶܝܢ ܢܦܰܚ ܒܗܽܘܢ ܘܶܐܡܰܪ ܠܗܽܘܢ ܩܰܒܶܠܘ ܪܽܘܚܳܐ ܕܩܽܘܕܫܳܐ܂ ܐܶܢ ܬܶܫܒܩܽܘܢ ܚܛܳܗ̈ܶܐ ܠܐ݈ܢܳܫ ܢܶܫܬܰܒܩܽܘܢ ܠܶܗ ܘܶܐܢ ܬܶܐܚܕܽܘܢ ܕܐ݈ܢܳܫ ܐܰܚܺܝܕܺܝܢ܂ ܬܳܐܘܡܰܐ ܕܶܝܢ ܚܰܕ ܡܶܢ ܬܪܶܥܣܰܪܬܳܐ ܗܰܘ ܕܡܶܬܶܐܡܰܪ ܬܳܐܡܳܐ ܠܳܐ ܗ݈ܘܳܐ ܬܰܡܳܢ ܗ݈ܘܳܐ ܥܰܡܗܽܘܢ ܟܰܕ ܐܶܬܳܐ ܝܶܫܽܘܥ܂ ܘܳܐܡܪܺܝܢ ܠܶܗ ܬܰܠܡܺܝ̈ܕܶܐ ܚܙܰܝܢ ܠܡܳܪܰܢ ܗܽܘ ܕܶܝܢ ܐܶܡܰܪ ܠܗܽܘܢ ܐܶܠܳܐ ܚܳܙܶܐ ܐ݈ܢܳܐ ܒܺܐܝ̈ܕܰܘܗ݈ܝ ܕܽܘܟܝ̈ܳܬܳܐ ܕܨܶܨ̈ܶܐ ܘܪܳܡܶܐ ܐ݈ܢܳܐ ܒܗܶܝܢ ܨܶܒ̈ܥܳܬܝ ܘܡܰܘܫܶܛ ܐ݈ܢܳܐ ܐܺܝܕܝ ܒܕܰܦܢܶܗ ܠܳܐ ܡܗܰܝܡܶܢ ܐ݈ܢܳܐ܂ ܘܒܳܬܰܪ ܬܡܳܢܝܳܐ ܝܰܘ̈ܡܺܝܢ ܬܽܘܒ ܠܓܰܘ ܗ݈ܘܰܘ ܬܰܠܡܺܝ̈ܕܶܐ ܘܬܳܐܘܡܰܐ ܥܰܡܗܽܘܢ ܘܶܐܬܳܐ ܝܶܫܽܘܥ ܟܰܕ ܐܰܚܺܝܕܺܝܢ ܬܰܪ̈ܥܶܐ ܩܳܡ ܒܰܡܨܰܥܬܳܐ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘܢ܂ ܘܶܐܡܰܪ ܠܬܳܐܘܡܰܐ ܐܰܝܬܳܐ ܨܶܒܥܳܟ ܠܗܳܪܟܳܐ ܘܰܚܙܺܝ ܐܺܝ̈ܕܰܝ ܘܰܐܝܬܳܐ ܐܺܝܕܳܟ ܘܰܐܘܫܶܛ ܒܓܰܒܝ ܘܠܳܐ ܬܶܗܘܶܐ ܠܳܐ ܡܗܰܝܡܢܳܐ ܐܶܠܳܐ ܡܗܰܝܡܢܳܐ܂ ܘܰܥܢܳܐ ܬܳܐܘܡܰܐ ܘܶܐܡܰܪ ܠܶܗ ܡܳܪܝ ܘܰܐܠܳܗܝ܂ ܐܳܡܰܪ ܠܶܗ ܝܶܫܽܘܥ ܗܳܫܳܐ ܕܰܚܙܰܝܬܳܢܝ ܗܰܝܡܶܢܬ ܛܽܘܒܰܝܗܽܘܢ ܠܰܐܝܠܶܝܢ ܕܠܳܐ ܚܙܰܐܘܽܢܝ ܘܗܰܝܡܶܢܘ܀

ܘܢܶܬܠܽܘ̇ܢ ܫܠܳܡܳܐ ܠܥܰܡܳܐ ܘܰܡܙܰܝܚܺܝܢ ܠܰܨܠܺܝܒܳܐ ܐܰܝܟ ܝܰܘܡܳܐ ܕܰܩܝܳܡܬܳܐ:

ܢܶܬܶܠ ܫܠܳܡܳܐ ܠܰܚ̈ܕܳܕܶܐ ܟܽܠ ܐ̱ܢܳܫ ܠܩܰܪܺܝܒܶܗ ܒܢܽܘܫܰܩܬܳܐ ܩܰܕܺܝܫܬܳܐ ܘܰܐܠܳܗܳܝܬܳܐ ܒܚܽܘܒܶܗ ܕܡܳܪܰܢ ܘܰܐܠܳܗܰܢ. ܡܶܢ ܒܳܬܰܪ ܫܠܳܡܳܐ ܗܳܢܳܐ ܩܰܕܺܝܫܳܐ ܘܰܐܠܳܗܳܝܳܐ ܕܶܐܬܺܝܗܶܒ. ܩܕܳܡ ܡܳܪܝܳܐ ܡܪܰܚܡܳܢܳܐ ܪ̈ܺܝܫܰܝܢ ܢܰܪܟܶܢ ܩܕܳܡܰܝܟ ܡܳܪܰܢ ܘܰܐܠܳܗܰܢ܀

ܘܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܫܳܩܶܠ ܨܠܺܝܒܳܐ ܩܰܕܺܝܫܳܐ ܘܰܡܙܰܝܰܚ ܠܶܗ ܘܡܰܙܥܶܩ܆

ܦܳܢܶܝܢ ܠܡܰܕܢܚܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܰܟܪ̈ܘܒܶܐ ܡܒܰܪܟܺܝܢ ܠܶܗ.
ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀	ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ.

ܘܦܳܢܶܝܢ ܠܡܰܥܪܒܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ.
ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀	ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ.

ܘܦܳܢܶܝܢ ܠܓܰܪܒܝܳܐ

ܡܫܰܡ̈ܫܳܢܶܐ	ܟܳܗܢܳܐ
ܩܰܕܺܝܫܬ ܐܰ‎ܠܳܗܳܐ܀	ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ.
ܩܰܕܺܝܫܬ ܚܰܝܠܬܳܢܳܐ܀	ܗܰܘ ܕܡܶܨܥܳܝ̈ܶܐ ܡܩܰܠܣܺܝܢ ܠܶܗ.
ܩܰܕܺܝܫܰܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܩܳܡܬ ܒܫܽܘܒܚܳܐ ܡܶܢ ܓܰܘ ܩܰܒܪܳܐ ܐܶܬܪܰܚܰܡܥܠܰܝܢ܀	ܗܰܘ ܕܬܰܚܬܳܝ̈ܶܐ ܡܙܰܝܚܺܝܢ ܠܶܗ.

ܘܦܳܢܶܝܢ ܠܬܰܝܡܢܳܐ

ܡܫܰܡ̈ܫܳܢܶܐ	ܟܳܗܢܳܐ
ܡܳܪܰܢ ܚܽܘܣ ܘܪܰܚܶܡܥܠܰܝܢ܀	ܡܳܪܰܢ ܐܶܬܪܰܚܰܡܥܠܰܝܢ.
ܫܽܘܒܚܳܐ ܠܳܟ ܐܰ‎ܠܳܗܳܐ܀	ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ.
ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀	ܫܽܘܒܚܳܐ ܠܳܟ ܒܳܪܽܘܝܳܐ.

ܡܚܰܬܶܡ ܪܺܝܫ ܟܳܗ̈ܢܶܐ ܐܰܘ ܟܳܗܢܳܐ ܒܰܨܠܺܝܒܳܐ ܠܥܰܡܳܐ. ܘܟܶܢ ܥܳܐܠܺܝܢ ܠܡܰܕܒܚܳܐ ܘܝܳܗܒܺܝܢ ܫܠܳܡܳܐ ܠܡܰܕܒܚܳܐ ܘܟܶܢ ܠܰܨܠܺܝܒܳܐ ܘܠܶܐܘܰܢܓܶܠܝܽܘܢ ܘܳܐܦ ܠܩܰܒܪܳܐ ܩܰܕܺܝܫܳܐ ܘܠܰܡܢܰܘ̈ܳܬܳܐ ܕܩܰܕܺܝ̈ܫܶܐ. ܘܟܳܗ̈ܢܶܐ ܘܰܡܫܰܡ̈ܫܳܢܶܐ ܝܳܗܒܺܝܢ ܫܠܳܡܳܐ ܠܰܚܕܳܕ̈ܶܐ ܘܟܽܠܶܗ ܥܰܡܳܐ.

ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.

ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܚܰܕܬܳܐ