ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܪܳܡܳܐ ܕܶܐܬ̣ܳܐ ܕܰܢ̣ܒܰܪܶܟ ܠܰܐܪܥܳܐ ܕܶܐܬ̣ܬܠܝ̣ܛܰܬ݀ ܘܢ̣ܶܫܪܶܐ ܡܶܢܳܗ̇ ܚܰܘܒܬܳܐ ܕܰܚܛܝ̣ܬܳܐ: ܘܢ̣ܰܥܒܰܪ ܡܶܢܳܗ̇ ܥܳܩ̈ܳܬܳܐ ܘܢܶܡܠܶܝܗ̇ ܒܘ̣ܝܳܐܳܐ ܘܣܰܒܪܳܐ ܛܳܒܳܐ: ܘܫܰܝܶܢ ܫܡܰܝܳܢ̈ܶܐ ܥܰܡ ܐܰܪ̈ܥܳܢܳܝܶܐ: ܡܠܝ̣ ܡܳܪܝ̱ ܦܘ̣̈ܡܰܝܢ ܬܶܫܒ̈ܚܳܬܳܐ ܘܩܘ̣̈ܠܳܣܶܐ ܘܪܘ̣ܡܪ̈ܳܡܶܐ ܐܰܝܟܰܢܳܐ ܕܰܐܝܟ ܝܰܠ̈ܘ̣ܕܶܐ ܘܫܰܒܪ̈ܶܐ ܘܬܰܠܡܝ̣̈ܕܶܐ ܕܝ̣ܠܳܟ ܢܶܩ̇ܥܶܐ ܠܳܟ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ: ܒܪܝ̣ܟ ܗ̱ܘ̣ ܕܶܐܬ̣ܳܐ ܘܰܥܬܝ̣ܕ ܕܢ̣ܺܐܬܶܐ: ܕܰܢܩܝ̣ܡ ܠܳܟܠܗܽܘܢ ܫܟܝ̈ܒܰܝ ܥܰܦܪܳܐ ܕܠܶܗ ܠܰܐܒܘ̣ܗ̱ܝ ܘܰܠܪܘ̣ܚܳܐ ܩܰܕܝ̣ܫܳܐ ܬܶܫܒ̈ܚܳܬܳܐ ܘܩܘ̣ܠ̈ܳܣܶܐ ܡܩܰܪܒܝ̣ܢܰܢ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܚܰܝܠܳܐ ܕܡܶܫܬܰܒܰܚ ܡ̣ܶܢ ܥܶܠ̈ܳܝܶܐ ܫܒܝ̣ܚܳܐܝ̣ܬ: ܘܡ̣ܶܢ ܬܰܚ̈ܬܳܝܶܐ ܐܶܬ̣ܩܰܠܰܣ ܢܰܨܝ̣ܚܳܐܝ̣ܬ: ܠܗܰܘ̇ ܕܰܡܗܰܕܰܪ ܡ̣ܶܢ ܪ̈ܘ̣ܚܳܢܶܐ ܬܡܝ̣ܗܳܐܝ̣ܬ: ܘܰܒܦܘ̣ܡܳܐ ܕܫܰܒܪ̈ܶܐ ܘܰܕܝܰܠ̈ܘ̣ܕܶܐ ܬܰܩ̣ܶܢ ܬܶܫܒܘ̣ܚܬܶܗ ܦܰܐܝܳܐܝ̣ܬ: ܠܗܰܘ̇ ܕܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܡܶܙܕܰܝܰܚ ܓܰܐܝܳܐܝ̣ܬ: ܘܥܰܠ ܥܝ̣ܠܳܐ ܫܝ̣ܛܳܐ ܪܟ̣ܶܒ ܡܰܟܝ̣ܟܳܐܝ̣ܬ: ܠܗܰܘ̇ ܕܰܡܥܰܛܰܦ ܢܘ̣ܗܪܳܐ ܐܰܝܟ ܡܰܪܛܘ̣ܛܳܐ ܐܰܠܳܗܳܐܝ̣ܬ: ܘܰܒܢܰܚ̈ܬܶܐ ܫܚܝ̣̈ܡܶܐ ܐܶܬܝܰܩ̣ܰܪ ܦܫܝ̣ܛܳܐܝ̣ܬ: ܗܰܘ̇ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܡܶܬܬܚܝ̣ܒܳܢܳܐ: ܘܥܰܡ ܐܰܒܘ̣ܗ̱ܝ ܘܪܘ̣ܚܳܐ ܩܰܕܝ̣ܫܳܐ ܫܰܘܝܳܐܝ̣ܬ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܪܳܡܳܐ ܒܰܟܝ̈ܳܢܶܐ ܘܰܡܥܰܠܝܳܐ ܒܬܶܫܒܘ̣ܚܬܳܐ ܡܬܘ̣ܡܳܐܝ̣ܬ: ܗܰܘ̇ ܕܡ̣ܶܢ ܠܶܫܳܢ̈ܶܐ ܕܫܰܠܗܶܒܝ̣ܬܳܐ ܡܶܬܒܰܪܰܟ ܐܰܢ̱ܬ ܘܡܶܫܬܰܒܰܚ ܐܰܢ̱ܬ ܡܰܠܝܳܐܝ̣ܬ ܘܡ̣ܶܢ ܦܘ̣ܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܰܩܶܢ̣ܬ ܠܳܟ ܬܶܫܒܘ̣ܚܬܳܐ ܡܕܰܒܪܳܢܳܐܝ̣ܬ: ܘܟܰܕ ܝܰܥܩܘ̣ܒ ܗܰܘ̇ ܪܝ̣ܫ ܐܰܒ̈ܳܗܳܬܳܐ ܒܰܕܶܩ ܪܟܘ̣ܒܳܟ ܕܥܰܠ ܥܝ̣ܠܳܐ ܡܰܟܪܙܳܢܳܐܝ̣ܬ: ܘܰܙܟܰܪܝܳܐ ܫ̣ܰܘܕܰܥ ܠܒܰܪ̱ܬ݀ ܨܶܗܝܽܘܢ ܥܰܠ ܡܶܐܬܝ̣ܬܳܟ ܘܡܰܠܟܘ̣ܬܳܟ ܓܰܠܝܳܐܝ̣ܬ: ܘܶܐܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܐܰܥܝ̣ܪ ܠܐܘ̣ܪܫܠܶܡ ܥܰܠ ܬܶܫܒܘ̣ܚܬܳܟ ܬܡܝ̣ܗܳܐܝ̣ܬ ܚܰܙܩܺܝ̣ܐܝܶܠ ܬܡܝ̣ܗ ܒܓܶܠ̈ܝܳܢܶܐ ܓܠܳܐ ܥܰܠ ܡܰܪܟܰܒܬܳܐ ܕܺܐܝ̣ܩܳܪܳܟ ܡܳܪܢܳܐܝ̣ܬ: ܗܰܘ̇ ܕܰܒܥܺܐܕܳܐ ܗܳܢܳܐ ܕܐܘ̣ܫܰܥ̈ܢܶܐ ܐܰܘܟܝ̣ܬ ܬܶܫܒ̈ܚܳܬ ܬܶܫܒ̈ܚܳܬܳܐ ܝܰܒܶܒ̣ܘ̱ ܥܶܠܳܝ̈ܶܐ ܬܶܫܒܘ̣ܚܬܳܟ ܘܰܛܠܳܝ̈ܶܐ ܩܥ̣ܰܘ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܫܦܝ̣ܥܳܐܝ̣ܬ ܒܪܝ̣ܟ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܡܰܠܟܶܗ ܕܺܐܝܣܪܳܐܝܶܠ ܫܰܪܝ̣ܪܳܐܝ̣ܬ: ܘܒܰܕܓܽܘܢ ܐܳܦ ܚܢܰܢ ܡܰܙܥܩܝ̣ܢܰܢ ܘܳܐܡܪܝ̣ܢܰܢ ܦܰܐܝܘ̣ܬ ܐܶܘܰܢܓܶܠܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܰܐܚܝ̣ܕ ܟܽܠ ܕܰܐܠ̣ܶܦ ܠܫܰܒܪ̈ܶܐ ܕܰܢ̣ܝܰܒܒܽܘܢ ܠܶܗ ܬܶܫܒܘ̣ܚܬܳܐ ܓܡܝ̣ܪܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܰܒܪܶܗ ܕܕܰܘܝ̣ܕ ܕܰܒܢܰܚ̈ܬܶܐ ܘܡܰܪ̈ܛܘ̣ܛܶܐ ܐܶܬܝܰܩ̣ܪܰܬ݀ ܐܘ̣ܪܚܳܐ ܕܡܶܐܬܝ̣ܬܶܗ ܬܗܝ̣ܪܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܰܓܢܝ̣ܙܳܐ ܕܰܓܡ̣ܰܪ ܒܰܩܢܘ̣ܡܶܗ ܐ̱ܪ̈ܳܙܶܐ ܕܰܢܒܺܝ̈ܰܘܗ̱ܝ ܩܰܕܝ̣̈ܫܶܐ ܩܰܕܝ̣ܫܳܐܝ̣ܬ: ܐܘ̣ܫܰܥܢܳܐ ܒܥܘ̣ܡ̈ܩܶܐ ܠܕܶܐܬ̣ܬܰܚܬܝ̣ ܒܛܰܝܒܘ̣ܬܶܗ ܕܢ̣ܶܫܬܰܒܰܚ ܡ̣ܶܢ ܝܰܠ̈ܘ̣ܕܶܐ ܒܪܝ̣ܪ̈ܶܐ ܐܘ̣ܫܰܥܢܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܗܰܘ̇ ܕܰܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܡܶܬܩܰܠܰܣ ܦܰܐܝܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܘܰܥܕܳܐ ܕܘܰܥ̣ܶܕ ܠܝܰܠ̈ܘ̣ܕܶܐ ܕܰܢ̣ܫܰܒܚܽܘ̣ܢܳܝܗ̱ܝ ܒܐܘ̣ܫܰܥܢ̈ܶܐ ܡܕܰܒܪܳܢܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܙܰܕܝ̣ܩܳܐ ܘܦܳܪܘ̣ܩܳܐ ܕܡܰܟܝ̣ܟ ܘܰܪܟܝ̣ܒ ܥܰܠ ܚܡܳܪܳܐ ܡܰܟܝ̣ܟܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܚܰܢܳܢܳܐ ܕܚ̣ܰܢ ܠܓܶܢܣܰܢ ܒܰܡܕܰܒܪܳܢܘ̣ܬܶܗ ܚܰܟܝ̣ܡܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܛܳܒܳܐ ܕܰܛܠܳܝ̈ܶܐ ܫܰܒܚܘ̣ܗ̱ܝ ܒܐܘ̣ܫܰܥܢܳܐ ܫܒܝ̣ܚܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܝܰܡܳܐ ܕܰܚܢܳܢܳܐ ܕܰܐܪܟܢܘ̣ܗ̱ܝ ܪ̈ܰܚܡܰܘܗ̱ܝ ܕܢ̣ܶܪܟܰܒ ܥܰܠ ܒܰܪ ܐܰܬܳܢܳܐ ܨܶܒܝܳܢܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܟܰܣܝܳܐ ܕܰܡܥܰܛܰܦ ܢܘ̣ܗܪܳܐ ܡܳܪܳܢܳܐܝ̣ܬ: ܐܘ̣ܫܰܥܢܳܐ ܠܠܳܐ ܡܶܬܕܰܪܟܳܢܳܐ ܕܰܥܒ̣ܰܕ ܫܡܰܝܳܐ ܒܚܶܟܡܬܶܗ: ܘܰܪܩ̣ܰܥ ܐܰܪܥܳܐ ܥܰܠ ܡܰܝ̈ܳܐ ܒܦܘ̣ܩܕܳܢܶܗ ܡܫܰܪܪܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܡܰܠܟܳܐ ܕܡܰܠ̈ܟܶܐ ܕܰܐܘܒ̣ܶܕ ܣܘ̣ܣܝܳܐ ܡ̣ܶܢ ܐܰܦܪܶܝܡ ܘܡܰܪܟܰܒܬܳܐ ܡ̣ܶܢ ܐܝ̣ܣܪܳܐܝܶܠ ܥܰܙܝ̣ܙܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܢܘ̣ܗܪܳܐ ܕܥܰܡ̱̈ܡܶܐ ܕܰܐܢ̣ܗܰܪ ܠܰܢ ܒܢܘ̣ܗܪܳܐ ܕܝ̣ܕܰܥܬܶܗ ܘܰܕܡܶܐܬܝ̣ܬܶܗ ܦܳܪܘ̣ܩܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܣܰܒܪܳܐ ܕܠܶܗ ܣܰܟܝ̣ܘ ܢܒܺܝ̈ܶܐ ܒܐ̱ܪ̈ܳܙܰܝܗܽܘܢ ܪܰܥܘ̣ܡܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܥܳܒܘ̣ܕܳܐ ܕܬܰܚ̣ܬܝ̣ ܝܳܬܶܗ ܨܶܝܕ ܬܰܚ̈ܬܳܝܶܐ ܘܩܰܠ̣ܣܘ̣ܗ̱ܝ ܒܐܘ̣ܫܰܥܢ̈ܶܐ ܡܪܰܡܪܡܳܐܝ̣ܬ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܦܳܪܘ̣ܩܳܐ ܕܰܦ̣ܪܰܩ ܠܓܶܢܣܰܢ ܡ̣ܶܢ ܚܶܫܘ̣ܟܳܐ ܕܰܚܛܝ̣ܬܳܐ ܚܰܝܘ̣ܣܬܳܢܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܨܰܠܡܳܐ ܕܰܐܒܳܐ ܓܢܝ̣ܙܳܐ ܕܪܰܡ̣ܪܶܡ ܠܰܢ ܒܡܰܟܝ̣ܟܘ̣ܬܶܗ ܪܶܚܡܰܬ݀ ܐ̱ܢܳܫܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܩܰܕܝ̣ܫܳܐ ܘܝܳܗܶܒ ܩܘ̣ܕ̈ܫܶܐ ܠܩܰܕܝ̣̈ܫܶܐ ܩܰܕܝ̣ܫܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܪܝ̣ܫܳܐ ܪܰܒܳܐ ܘܰܡܥܰܠܝܳܐ ܕܶܐܬ̣ܬܰܚܬܝ̣ ܘܥܰܠܝ̣ ܠܛܘ̣ܗܡܰܢ ܚܰܠܳܫܳܐ ܡܪܰܚܡܳܢܳܐܝ̣ܬ: ܐܘ̣ܫܰܥܢܳܐ ܒܪܰܘܡܳܐ ܠܰܫܡܳܐ ܡܫܰܒܚܳܐ ܘܩܰܕܝ̣ܫܳܐ ܕܫ̣ܰܪܰܪ ܡܶܠܰܝ̈ܗܽܘܢ ܒܓܶܠ̈ܝܳܢܶܐ ܐܰܠܳܗܳܐܝ̣ܬ: ܐܘ̣ܫܰܥܢܳܐ ܒܥܘ̣ܡܩܳܐ ܠܰܬܠܝ̣ܬܳܝܳܗ̇ ܕܰܐܠܳܗܽܘ̣ܬܳܐ ܕܰܓܒ̣ܳܐ ܠܶܗ ܥܰܡܳܐ ܚܰܕܬܳܐ ܡ̣ܶܢ ܥܰܡ̱̈ܡܶܐ ܕܰܢ̇ܫܰܒܰܚ ܠܡܳܪܘ̣ܬܶܗ ܐܰܡܝ̣ܢܳܐܝ̣ܬ: ܕܠܶܗ ܡܶܬܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܢ̣ܰܫܘܶܐ ܠܰܢ ܠܪ̈ܰܚܡܶܐ ܕܒܰܣܝ̣ܡܘ̣ܬܶܗ ܘܰܠܥܘ̣ܕܪܳܢܳܐ ܕܛܰܝܒܘ̣ܬܶܗ ܘܰܠܫܰܝܢܳܐ ܘܰܫܠܳܡܳܐ ܕܡܶܢܶܗ ܘܰܢ̣ܛܰܝܶܒ ܠܰܢ ܘܰܠܥܰܢܝ̣̈ܕܰܝܢ ܠܒܘ̣ܣܳܡܳܐ ܕܡܰܠܟܘ̣ܬܶܗ ܘܰܠܫܘ̣ܒܚܳܐ ܕܪܰܒܘ̣ܬܶܗ ܘܰܠܓܶܠܝܳܢܳܐ ܕܬܶܫܒܘ̣ܚܬܶܗ ܘܰܠܩܰܘܡܳܐ ܕܡ̣ܶܢ ܝܰܡܝ̣ܢܶܗ ܘܕܰܐܒܘ̣ܗ̱ܝ ܘܰܕܪܘ̣ܚܶܗ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܓܶܢ ܡܳܪܝ̱ ܝܰܡܝ̣ܢܳܟ: ܘܰܐܫܦܰܥ ܪ̈ܰܚܡܰܝܟ ܘܰܚܢܳܢܳܟ: ܘܢܰܛܰܪ ܠܟܶܢܫܳܐ ܗܳܢܳܐ ܕܚܳܕܶܐ ܒܥܰܕܥܺܐܕܳܟ ܩܰܕܶܫ ܠܟܳܗ̈ܢܶܐ ܘܙܰܗܳܐ ܠܰܡܫܰܡ̈ܫܳܢܶܐ: ܘܚܰܕܳܐ ܠܰܛܠܳܝ̈ܶܐ: ܘܢܰܟܶܦ ܠܓܰܒܪ̈ܶܐ ܘܰܠ̈ܢܶܫܶܐ ܕܰܒܩܳܠܳܐ ܕܐܘ̣ܫܰܥ̈ܢܶܐ ܡܩܰܠܣܝ̣ܢ ܠܳܟ: ܘܰܚܠܳܦ ܡܳܐܢ̈ܶܐ ܘܙܰܝ̈ܬܶܐ ܠܶܒܰܘ̈ܳܬܗܽܘܢ ܦܳܪܣܝ̣ܢ ܩܕܳܡܰܝܟ ܘܰܡܩܰܒܠܝ̣ܢ ܠܳܟ: ܘܰܐܢܝ̣ܚ ܠܥܰܢܝ̣̈ܕܶܐ ܕܫܰܢܝ̣ܘ ܠܘܳܬܳܟ: ܘܚܰܕܳܐ ܠܰܢ ܘܰܠܗܽܘܢ ܒܰܓܢܽܘܢܳܟ ܕܫܘ̣ܒܚܳܐ ܐܰܡܝ̣ܢܳܐ ܢ̇ܰܣܶܩ ܠܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀