ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܪܳܡܳܐ ܘܰܡܗܰܕܪܳܐ ܒܫܘ̣ܒܚܳܐ ܕܺܐܝܬܘ̣ܬܶܗ ܐܶܬ̣ܬܰܚܬܝ̣ ܘܣܰܥ̣ܪܰܢ ܒܡܘ̣ܟܳܟܶܗ ܘܟ̣ܰܬܰܪ ܒܰܐܠܳܗܘ̣ܬܶܗ: ܘܥܝ̣ܪ̈ܶܐ ܙܳܡܪܝ̣ܢ ܬܶܫܒܘ̣ܚܬܶܗ ܒܪܰܘܡܳܐ: ܘܫܰܒܪ̈ܶܐ ܘܝܰܠ̈ܘ̣ܕܶܐ ܩܰܠܣܘ̣ܗ̱ܝ ܒܥܘ̣ܡܩܳܐ: ܘܓܝ̣ܓ̈ܠܶܐ ܡܰܠ̈ܳـܠܳܬܳܐ ܟܕܝ̣̈ܢܳܢ ܒܡܰܪܟܰܒܬܳܐ ܕܝ̣ܠܶܗ ܘܥܝ̣ܠܳܐ ܫܝ̣ܛܳܐ ܣܦ̣ܰܩ ܠܰܪܟ̥ܘ̣ܒܶܗ: ܘܬܶܫܒܘ̣ܚܬܶܗ ܡܰܠܝܳܐ ܫܡܰܝܳܐ ܐܳܦ ܐܰܪܥܳܐ: ܘܟܶܢ̈ܫܶܐ ܦܫܝ̣̈ܛܶܐ ܒܣܰܘ̈ܟܶܐ ܕܙܰܝ̈ܬܶܐ ܢܦ̣ܰܩܘ̱ ܗ̱ܘܰܘ ܠܐܘ̣ܪܥܶܗ ܕܠܶܗ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܕܢ̣ܶܫܒܘ̣ܩ ܚܰܘ̈ܒܰܝܢ ܘܰܚܛܳܗ̈ܰܝܢ: ܘܥܰܡ ܡܰܠܰܐܟ̈ܶܐ ܢ̣ܶܚܠܘ̣ܛ ܩܳܠ̈ܰܝܢ ܘܥܰܡ ܫܰܒܪ̈ܶܐ ܕܠܳܐ ܡܘ̣ܡ ܢ̣ܰܫܘܶܐ ܠܰܢ ܕܢ̣ܶܙܡܰܪ ܠܶܗ ܬܶܫܒ̈ܚܳܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܡܫܺܝ̣ܚܳܐ ܝܰܠܕܶܗ ܕܰܐܒܳܐ ܗܰܘ̇ ܐܝ̣ܬܝ݂ܳܝ݂ܳܐ: ܠܳܟ ܬܰܘܕܝ̣ܬܳܐ ܕܶܢܚܳܐ ܓܰܐܝܳܐ ܕܰܠܒ̣ܶܫ ܦܰܓܪܳܐ ܒܡܘ̣ܟܳܟܳܐ: ܘܰܗ̣ܘܳܐ ܒܰܪܢܳܫܳܐ ܟܰܕ ܐܝ̣ܬܰܘܗ̱ܝ ܐܰܠܳܗܳܐ: ܠܳܟ ܬܶܫܒܘ̣ܚܬܳܐ ܕܶܐܙܕܰܝܰܚ̣ܬ ܥܰܠ ܥܝ̣ܠܳܐ: ܠܳܟ ܣܶܓܕܬܳܐ ܕܶܐܬ̣ܝܰܩܰܪܬ ܒܡܳܐܢ̈ܶܐ ܕܬܰܠܡܝ̣̈ܕܶܐ: ܠܳܟ ܫܘ̣ܒܚܳܐ ܡܫܝ̣ܚܳܐ ܐܰܠܳܗܳܐ ܕܟܰܕ ܐܝ̣ܬܰܝܟ ܥܰܠ ܡܰܪܟܰܒܬܳܐ ܘܶܐܬ̣ܚܙܰܝܬ ܥܰܠ ܐܰܪܥܳܐ: ܠܳܟ ܬܰܘܕܝ̣ܬܳܐ ܕܡ̣ܶܢ ܛܠܳܝ̈ܶܐ ܐܶܬܩܰܠܰܣ̣ܬ: ܠܳܟ ܬܶܫܒܘ̣ܚܬܳܐ ܕܰܩܥ̣ܰܘ ܠܳܟ ܬܰܠܡܝ̣̈ܕܶܐ ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ: ܠܳܟ ܫܘ̣ܒܚܳܐ ܕܰܡܠ̣ܰܝܬ ܠܠܶܒܰܘ̈ܳܬܗܽܘܢ ܪܘܳܙܳܐ ܕܡܰܘܗ̈ܒܳܬܳܟ: ܠܳܟ ܬܰܘܕܝ̣ܬܳܐ ܕܰܐܥ̣ܬܰܪܬ ܠܥܺܕܬܳܟ ܒܚܰܕܘ̣ܬܳܐ ܘܒܰܦܨܝ̣ܚܘ̣ܬܳܐ: ܠܳܟ ܬܶܫܒܘ̣ܚܬܳܐ ܢܰܨܝ̣ܚܬܳܐ ܕܪܰܡܪܡܘ̣ܟ ܒܗܳܢܳܐ ܝܰܘܡܳܐ ܩܰܘ̈ܡܳܬܳܐ ܠܳܐ ܡܫܰܡ̈ܠܝܳܬܳܐ: ܠܳܟ ܣܶܓܕܬܳܐ ܡ̣ܶܢ ܝܰܠ̈ܕܶܝܗ̇ ܕܥܺܕܬܳܐ ܒܗܳܠܶܝܢ ܙܰܒ̈ܢܶܐ ܕܗܳܐ ܩܶܪܒ̣ܰܬ݀ ܒܪܝ̣ܬܳܐ ܠܫܘ̣ܠܳܡܳܐ: ܠܳܟ ܫܘ̣ܒܚܳܐ ܥܝ̣ܪܳܐ ܕܡ̣ܶܢ ܥܝ̣ܪ̈ܰܝ ܪܰܘܡܳܐ ܡܶܫܬܰܡܰܫ: ܠܳܟ ܬܰܘܕܝ̣ܬܳܐ ܕܰܦܪܰܩ̣ܬ ܠܥܳܢ̈ܳܟ ܡܠܝ̣ܠܬܳܐ: ܠܳܟ ܬܶܫܒܘ̣ܚܬܳܐ ܕܫܰܘܙܶܒ̣ܬܳܢ ܡ̣ܶܢ ܢܝ̣ܪܳܐ ܩܰܫܝܳܐ ܕܳܐܟܶܠܩܰܪܨܳܐ: ܠܳܟ ܫܘ̣ܒܚܳܐ ܕܰܐܟܪܶܟ݂ܬ ܠܥܺܕܬܳܟ ܩܰܕܝ̣ܫܬܳܐ ܡܰܫܪܝ̣ܬܳܐ ܕܡܰܠܰܐܟܰܝ̈ܟ ܢܘ̣ܪ̈ܳܢܳܝܶܐ: ܠܳܟ ܣܶܓܕܬܳܐ ܡܗܝ̣ܪܳܐ ܕܶܐܬ̣ܬܨܝ̣ܪܘ̱ ܒܪܶܡܙܶܗ ܝܰܠ̈ܘ̣ܕܶܐ ܘܫܰܒܪ̈ܶܐ ܘܛܠܳܝ̈ܶܐ: ܠܳܟ ܬܶܫܒܘ̣ܚܬܳܐ ܕܶܐܬ̣ܓܠܶܦܘ̱ ܠܶܫܳܢܰܝ̈ܗܽܘܢ ܘܶܐܬ̣ܬܰܩܰܢܘ̱ ܠܬܶܫܒܘ̣ܚܬܳܟ: ܠܳܟ ܫܘ̣ܒܚܳܐ ܕܨܳܪܬ ܡܶܐܬܝ̣ܬܳܟ ܐ̱ܚܪܳܝܬܳܐ ܒܗܳܕܶܐ ܕܶܐܬ̣ܰܝܬ ܒܳܗ̇ ܒܡܰܟܝ̣ܟܘ̣ܬܳܐ: ܠܳܟ ܬܰܘܕܝ̣ܬܳܐ ܕܰܐܠܶܦ̣ܬ ܠܥܺܕܬܳܟ ܐܘ̣ܪܚܳܐ ܕܙܰܕܝ̣ܩܘ̣ܬܳܐ ܘܢܳܛܘ̣ܪܘ̣ܬܳܐ ܕܦܘ̣ܩ̈ܕܳܢܰܝܟ ܘܢܳܡܘ̣̈ܣܰܝܟ ܩܰܕܝ̣̈ܫܶܐ ܘܝܺܕܰܥܬܳܐ ܕܗܰܝܡܳܢܘ̣ܬܳܐ ܕܒܳܟ: ܠܳܟ ܣܶܓܕܬܳܐ ܕܝܰܗ̣ܒܬ ܠܰܡܟܝ̣ܪܬܳܟ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܬܶܬ̣ܕܰܒܰܪܝ̱ ܩܕܳܡܰܝܟ ܒܫܰܦܝ̣ܪܘ̣ܬ ܕܶܚܠܬܳܟ: ܠܳܟ ܫܘ̣ܒܚܳܐ ܓܰܢ̱ܒܳܪܳܐ ܒܚܰܝܠܬܳܢܘ̣ܬܳܐ: ܘܥܰܫܝ̣ܢܳܐ ܪܰܒܳܐ ܒܰܩܪܰܒܬܳܢܘ̣ܬܳܐ ܡܳܪܝܳܐ: ܠܳܟ ܬܰܘܕܝ̣ܬܳܐ ܕܰܣ̣ܕܰܪܬ ܩܪܳܒܳܐ ܘܬܰܟܬܘ̣ܫܳܐ ܠܘ̣ܩܒܰܠ ܒܥܶܠܕܒܳܒܳܐ ܡܳܪܘ̣ܕܳܐ: ܠܳܟ ܣܶܓܕܬܳܐ ܕܝܰܗ̣ܒܬ ܠܓܶܢܣܳܐ ܡܚܝ̣ܠܳܐ ܙܳܟܘ̣ܬܳܐ ܥܰܠ ܡܰܘܬܳܐ ܗܰܘ̇ ܬܶܢܝܳܢܳܐ: ܠܳܟ ܬܶܫܒܘ̣ܚܬܳܐ ܕܰܒܨܰܘܡܳܐ ܘܒܰܨܠܘ̣ܬܳܐ ܨܰܒ̣ܶܬܬܳܗ̇ ܠܒܰܪ̱ܬ ܐܰܪ̈ܡܳܝܶܐ ܕܶܐܬܢܰܩ̣ܦܰܬ݀ ܠܳܟ: ܠܳܟ ܬܰܘܕܝ̣ܬܳܐ ܕܰܛܪܰܕܬ ܡܶܢܰܢ ܠܟܽܠܳܗ̇ ܡܫܰܩܠܘ̣ܬܳܐ ܘܪܳܡܘ̣ܬܳܐ ܘܰܚܬܝ̣ܪܘ̣ܬܳܐ ܒܡܘ̣ܟܳܟܳܟ ܠܳܐ ܡܶܬܡܰܠܠܳܢܳܐ: ܠܳܟ ܣܶܓܕܬܳܐ ܕܒܰܫܡܰܝܳܐ ܣܪ̈ܳܦܶܐ ܩܰܕܝ̣̈ܫܶܐ ܩܳܥܶܝܢ ܠܳܟ ܩܰܕܝ̣ܫ ܩܰܕܝ̣ܫ ܩܰܕܝ̣ܫ ܡܳܪܝܳܐ ܨܒܰܐܘܽܬ ܕܰܡܠܶܝܢ ܟܽܠܗܶܝܢ ܒܶܪ̈ܝܳܬܳܐ ܡ̣ܶܢ ܬܶܫܒܘ̣ܚܬܳܟ: ܠܳܟ ܫܘ̣ܒܚܳܐ ܕܶܐܬ̣ܚܣܶܡܬ ܡ̣ܶܢ ܣܳܦܪ̈ܶܐ ܘܰܦܪ̈ܝ̣ܫܶܐ ܘܰܒܥ̣ܰܘ ܕܰܢ̣ܫܰܬܩܽܘܢ ܠܰܡܫܰܒ̈ܚܳܢܶܐ ܫܦܰܝ̈ܳܐ ܕܩܰܠ̣ܣܘ̣ܟ ܒܰܡܠܝ̣ܠܘ̣ܬܳܐ ܕܪܘ̣ܡܪܳܡܳܐ: ܠܳܟ ܬܰܘܕܝ̣ܬܳܐ ܐܝ̣ܬܝܳܐ ܕܠܳܐ ܡܶܬܥܰܩܰܒ ܘܰܒܪܳܐ ܕܠܳܐ ܡܶܬܒܨܶܐ: ܠܳܟ ܣܶܓܕܬܳܐ ܥܛܝ̣ܦ ܓܰܘܙܰܠܬܳܐ: ܕܰܠܒ̣ܶܫ ܡܳܐܢ̈ܶܐ ܫܚܝ̣̈ܡܶܐ ܥܰܠ ܥܝ̣ܠܳܐ: ܠܳܟ ܬܶܫܒܘ̣ܚܬܳܐ ܢܘ̣ܪܳܐ ܠܳܐ ܗܽܘ̣ܠܳܢܳܝܬܳܐ ܕܶܐܬܓܰܫܰܡ̣ܬ ܡ̣ܶܢ ܡܰܪܝܰܡ ܦܰܓܪܳܢܳܐܝ̣ܬ: ܠܳܟ ܬܰܘܕܝ̣ܬܳܐ ܬܰܩܝ̣ܦ ܥܘ̣ܫܢܳܐ ܘܰܗܕܝ̣ܪ ܓܰܐܝܘ̣ܬܳܐ ܕܶܐܬܡܢܝ̣ ܥܰܡ ܬܰܚܘ̣̈ܒܶܐ ܘܰܡܚܝ̣̈ܠܶܐ ܒܢܰܝ̈ܳܐ ܕܳܐܕܳܡ: ܠܳܟ ܣܶܓܕܬܳܐ ܗܰܘ̇ ܕܝܳܬܶܒ ܥܰܠ ܟܘ̣ܪܣܝܳܐ ܪܳܡܳܐ ܕܰܩܪܘ̣ܣܛܶܠܘ̣ܣ ܕܝ̣ܬܶܒ ܥܰܠ ܪܟܘ̣ܒܳܐ ܡܒܰܣܪܳܐ: ܠܳܟ ܫܘ̣ܒܚܳܐ ܩܳܛܰܪ ܬܳܓ̈ܶܐ ܠܫܰܠ̈ܝ̣ܛܳܢܶܐ: ܘܝܳܗܶܒ ܚܰܝܠܳܐ ܠܡܰܠ̈ܟܶܐ ܥܳܒܘ̣ܪ̈ܶܐ: ܕܰܗ̣ܘܳܐ ܡܶܬܬܕܝ̣ܢܳܢܳܐ ܩܕܳܡ ܡܰܠܟܳܐ ܐܝ̣ܪܳܘܕܶܝܣ ܪܰܫܝ̣ܥܳܐ: ܠܳܟ ܬܰܘܕܝ̣ܬܳܐ ܡܳܪܶܐ ܡܳܪ̈ܰܘܳܬܳܐ ܕܨܰܒ̣ܶܬܬܳܗ̇ ܠܡܰܪܕܝ̣ܬܳܟ ܡ̣ܶܢ ܐܝ̣ܠ̈ܳܢܶܐ ܘܡ̣ܶܢ ܒܰܪ̱ܬ ܩܳܠܳܐ ܚܠܝ̣ܬܳܐ ܕܝܰܠ̈ܘ̣ܕܶܐ: ܠܳܟ ܣܶܓܕܬܳܐ ܥܶܠܳܝܳܐ ܕܰܠܥܶܠ ܡ̣ܶܢ ܟܽܠ ܟܝܳܢ ܡܰܘܬܒܶܗ ܡܰܬܩܰܢ ܘܗܽܘ̣ ܫܰܠܝ̣ܛ ܥܰܠ ܟܽܠ ܣܰܘ̈ܦܝ̣ܢ: ܘܠܶܗ ܡܶܫܬܰܡܥܝ̣ܢ ܟܽܠ ܟܝ̈ܳܢܶܐ ܘܡܶܢܶܗ ܪܳܐܬܝ̣ܢ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܛܰܝܒܘ̣ܬܳܟ ܕܢܶܚ̇ܙܶܐ ܚܢܳܢܳܟ ܒܡܶܐܬܝ̣ܬܳܟ ܕܬܰܪܬܶܝܢ: ܘܢ̇ܶܦܘ̣ܩ ܠܰܩܕܳܡܰܝܟ ܟܰܕ ܡܨܰܒܬܝ̣ܢܰܢ ܒܰܥ̈ܒܳܕܶܐ ܕܟܰܝ̈ܳܐ ܕܙܰܕܝ̣ܩܘ̣ܬܳܐ: ܘܢ̇ܶܥܘ̣ܠ ܠܗܰܘ̇ ܓܢܘ̣ܢܳܐ ܕܛܰܝܶܒ̣ܬ ܠܪ̈ܳܚܡܰܝܟ ܘܢ̇ܶܙܡܰܪ ܠܳܟ ܬܶܫܒܘ̣ܚܬܳܐ ܠܳܐ ܡܶܬܦܰܣܩܳܢܝ̣ܬܳܐ ܘܠܰܐܒܘ̣ܟ ܣܓܝ̣ܕܳܐ ܘܰܡܫܰܒܚܳܐ ܘܰܠܪܘ̣ܚܳܟ ܚܰܝܳܐ ܘܡܰܚܝܳܢܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀