ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܝܶܠ ܘܥܰܫܶܢ ܘܫܰܪܰܪ ܠܰܢ ܒܚܰܝܠܬܳܢܘ̣ܬܳܐ ܕܝ̣ܠܳܟ ܚܰܝܠܬܳܢܳܐ ܐܰܠܳܗܳܐ: ܠܰܡܩܳܡ ܚܠܝ̣ܨܳܐܝ̣ܬ ܘܠܳܐ ܡܶܙܕܰܟܝܳܢܳܐܝ̣ܬ: ܒܶܐܣܛܰܕܺܝܳܘܢ ܗܳܢܳܐ ܕܨܰܘܡܳܐ ܩܰܕܝ̣ܫܳܐ: ܠܘ̣ܩܒܰܠ ܟܽܠܳܗ̇ ܡܰܥܒܕܳܢܘ̣ܬܳܐ ܕܳܐܟܶܠܩܰܪܨܳܐ: ܘܟܰܕ ܡܶܬܓܰܢ̱ܒܪܝ̣ܢܰܢ ܒܬܰܟܬܘ̣ܫܳܐ ܡܳܪܳܢܳܝܳܐ ܕܰܠܩܘ̣ܒܠܶܗ: ܢܶܫ̇ܬܘܶܐ ܥܰܡ ܙܳܟܘ̣ܬܳܐ ܠܰܟ̈ܠܝ̣ܠܶܐ ܕܦܳܠ̈ܚܶܐ ܕܝ̣ܠܳܟ ܩܰܕܝ̣̈ܫܶܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܒܳܐ ܡܪܰܚܡܳܢܳܐ ܕܥܳܢܶܐ ܠܚܰܛܳܝ̈ܶܐ ܕܩܳܪܶܝܢ ܠܶܗ: ܠܚܰܕ ܒܪܳܐ ܚܰܢܳܢܳܐ ܕܰܡܩܰܒܶܠ ܠܬܰܝܳܒ̈ܶܐ ܕܣܳܘܚܝ̣ܢ ܠܶܗ: ܠܚܰܕ ܪܘ̣ܚܳܐ ܚܰܝܘ̣ܣܬܳܢܳܐ ܕܰܡܚܰܣܶܐ ܠܚܰܛܳܝ̈ܶܐ ܕܢܳܩܫܝ̣ܢ ܒܬܰܪܥܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰ‌ܠܳܗܳܐ ܕܝ̣ܠܰܢ ܗܰܘ̇ ܕܥܰܠ ܟܪ̈ܘ̣ܒܶܐ ܝܳܬܶܒ ܘܡ̣ܶܢ ܣܪ̈ܳܦܶܐ ܡܶܬܒܰܪܰܟ: ܒܩ̈ܳܠܶܐ ܕܰܡܡܰܠܠܘ̣ܬ ܐܰܠܳܗܘ̣ܬܳܐ ܕܟܽܠܗܶܝܢ ܗܰܘ̈ܢܶܐ ܫܠܰܝ̈ܳܐ ܦܰܐܝܘ̣ܬ ܐܰ‌ܠܳܗܳܐܝ̣ܬ ܡܶܫܬܰܒܰܚ ܐܰܢ̱ܬ: ܠܳܐ ܬ̣ܰܗܦܶܟ ܐܰܦ̈ܰܝܟ ܡܶܢܰܢ ܡܳܪܝܳܐ ܘܠܳܐ ܡ̣ܶܢ ܬܰܟܫ̈ܦܳܬܳܐ ܫܝ̣̈ܛܳܬܳܐ ܕܝ̣ܠܰܢ ܚܰܛܳܝ̈ܶܐ ܥܰܒ̈ܕܰܝܟ ܐܶܠܳܐ ܠܪܝ̣ܚܳܐ ܒܰܣܝ̣ܡܳܐ ܠܰܡܩܰܒܳܠܘ̣ ܐܶܬ̣ܬܦܝ̣ܣ ܡܳܪܰܢ: ܟܰܕ ܡܰܫܘܶܐ ܐܰܢ̱ܬ ܠܰܢ ܠܰܡܩܰܪܳܒܘ̣ ܠܳܟ ܒܰܣܝ̣ܡܘ̣ܬ ܪܝ̣ܚܳܐ ܘܕܰܟܝܘ̣ܬܳܐ ܕܢܰܦܫܳܐ ܒܟܽܠܙܒܰܢ: ܘܠܰܡܫܰܘܙܳܒܘ̣ ܬܶܫܡܶܫܬܰܢ ܕܠܳܐ ܬܘ̣ܩܰܠܬܳܐ ܠܡܶܥܒܰܕ ܝܰܨܝ̣ܦܘ̣ܬܳܐ ܕܟܰܟܪ̈ܶܐ ܐܰܝ̇ܕܳܐ ܕܰܐܬܗܰܝܡܰܢ̣ܢܰܢ: ܟܰܕ ܡܣܰܝܥ ܐܰܢ̱ܬ ܠܰܢ ܕܰܠܕܘ̣ܒܳܪ̈ܶܐ ܐܶܘܰܢܓܶܠܳܝ̈ܶܐ ܢ̇ܫܰܡܠܶܐ: ܘܚܰܬܝ̣ܬܘ̣ܬܳܐ ܕܥܰܝ̈ܢܶܐ ܠܡܶܩܢܳܐ ܗܳܝ ܕܡܰܩܢܝܳܐ ܠܰܢ ܚܰܘܪܳܐ ܐܰܡܝ̣ܢܳܐ ܕܒܳܟ ܙܗܝ̣ܪܘ̣ܬܳܐ ܕܠܶܫܳܢܳܐ: ܫܘ̣ܥܒܳܕܳܐ ܕܦܰܓܪܳܐ: ܠܢܰܦܫܳܐ ܬܰܪܥܝ̣ܬܳܐ ܡܡܰܟܰܟܬܳܐ: ܥܛܳܝܳܐ ܕܪܰܓܘ̣ܙܬܳܢܘ̣ܬܳܐ: ܫܘ̣ܒܩܳܢܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܳܐ ܕܝ̣ܠܰܢ: ܝܺܕܰܥܬܳܐ ܘܦܘ̣ܠܚܳܢܳܐ ܕܰܐܝܠܶܝܢ ܕܡܰܘܬܪ̈ܳܢ: ܘܡܶܣܬܰܠܝܳܢܘ̣ܬܳܐ ܕܰܐܝܠܶܝܢ ܕܡܰܚܣܪ̈ܳܢ ܚܘ̣ܪܳܪܳܐ ܕܡ̣ܶܢ ܚܰܫ̈ܶܐ ܦܰܓܪ̈ܳܢܳܝܶܐ ܘܢܰܦ̈ܫܳܢܳܝܶܐ: ܩܰܕܝ̣ܫܘ̣ܬܳܐ ܕܗܰܕܳܡ̈ܶܐ ܟܢܝ̣ܟܘ̣ܬܳܐ ܕܗܘ̣̈ܦܳܟܶܐ ܫܦܝ̣ܥܘ̣ܬܳܐ ܕܰܒܣܳܥܘ̣ܪ̈ܘܳܬܳܐ ܫܰܦܝ̣ܪ̈ܳܬܳܐ: ܥܘ̣ܬܪܳܐ ܕܪܶܚܡܰܬ݀ ܐܰܚ̈ܶܐ ܕܰܟܝܽܘ̣ܬܳܐ، ܢܰܟܦܘ̣ܬܳܐ: ܠܒܝ̣ܒܘ̣ܬܳܐ ܡܰܓܠܳܐ ܐܰܦ̈ܶܐ ܕܟܺܐܢܘ̣ܬܳܐ: ܬܰܚܘܝ̣ܬܳܐ ܕܟܽܠܗܶܝܢ ܚܰܝ̈ܶܐ ܪ̈ܳܚܡܰܝ ܐܰ‌ܠܳܗܳܐ ܘܫܰܦܝ̣ܪܘ̣ܬ ܩܘ̣ܪܳܒ ܦܺܐܪ̈ܶܐ ܕܰܡܝܰܬܪܘ̣ܬܳܐ ܟܰܕ ܡܥܰܬܶܕ ܐܰܢ̱ܬ ܠܰܢ ܠܘܳܬ ܨܶܒܝܳܢܳܟ ܛܳܒܳܐ ܘܰܡܩܰܒܠܳܐ: ܘܰܡܫܰܚܠܶܦ ܐܰܢ̱ܬ ܠܰܢ ܫܘ̣ܚܠܳܦܳܐ ܓܡܝ̣ܪܳܐ: ܐܶܬ̣ܕܰܟܰܪ ܡܳܪܝܳܐ ܘܠܰܐܝܠܶܝܢ ܕܰܒܛܘ̣ܪ̈ܳܦܶܐ ܘܒܰܫ̈ܚܳܩܶܐ ܥܳܠ̈ܡܳܢܳܝܶܐ ܐܝ̣ܬܰܝܗܽܘܢ ܥܒܶܕ ܒܰܥܓܰܠ ܦܘ̣ܪܩܳܢܗܽܘܢ: ܠܳܐ ܬ̣ܶܣܚܘ̣ܦ ܠܢܰܦܫܳܐ ܙܰܕܝ̣ܩܬܳܐ ܘܡ̣ܶܢ ܒܳܥ̈ܘܳܬܳܐ ܕܡܶܣ̈ܟܺܢܶܐ: ܠܳܐ ܬ̣ܰܗܡܶܐ ܕܶܡ̈ܥܶܐ ܕܰܐܪ̈ܡܠܳܬܳܐ: ܒܰܝܰܐ ܨܪܝ̣ܟܘ̣ܬܳܐ ܕܡܶܣ̈ܟܺܢܶܐ: ܦܰܪܢܶܣ ܫܝ̣ܛܘ̣ܬܳܐ ܕܰܐܟܣ̈ܢܳܝܶܐ: ܣܥܘ̣ܪ ܐܳ‌ܠ̈ܨܳܬܳܐ ܕܰܪ̈ܕܝ̣ܦܶܐ ܡܰܠܳܐ: ܠܰܟܪ̈ܝ̣ܗܶܐ ܐܰܣܳܐ: ܠܰܙܥܘ̣ܪ̈ܰܝ ܢܰܦܫܳܐ ܠܰܒܶܒ: ܠܕܰܡܥܳܩܝ̣ܢ ܡܠܝ̣ ܒܠܶܒܗܽܘܢ: ܠܰܕܪܰܚܝ̣ܩܝ̣ܢ ܦܘ̣ܢܳܝܳܐ ܛܳܒܳܐ ܗܰܒ: ܠܰܐܝܠܶܝܢ ܕܒܰܚܒ̈ܘ̣ܫܝܶܐ ܘܰܒܒܶܝܬ ܐܰܣܝ̣ܪ̈ܶܐ ܚܰܪܰܪ: ܦܪܘ̣ܩ ܠܰܐܝܠܶܝܢ ܕܰܒܫܶܒܝܳܐ ܘܰܒܥܰܒܕܘ̣ܬܳܐ ܡܰܪܝ̣ܪܬܳܐ ܡܶܬܢܰܘܠܝ̣ܢ: ܘܠܰܐܝܠܶܝܢ ܕܡ̣ܶܢ ܫܺܐܕ̈ܶܐ ܛܰܢ̈ܦܶܐ ܡܶܫܬܰܩܦܝ̣ܢ ܡ̣ܶܢ ܥܰܒܕܘ̣ܬܳܐ ܣܳܛܳܢܳܝܬܳܐ ܐܰܓܗܳܐ: ܘܦܰܨܳܐ ܠܰܢ ܒܰܚܢܳܢܳܟ ܡ̣ܶܢ ܟܰܦ̈ܢܶܐ ܘܡ̣ܶܢ ܡܰܘ̈ܬܳܢܶܐ ܡ̣ܶܢ ܙܰܘ̈ܥܶܐ ܡ̣ܶܢ ܛܘܽܒܳܥ̈ܶܐ ܡ̣ܶܢ ܩܰܡ̈ܨܶܐ: ܡ̣ܶܢ ܫܰܘ̈ܒܶܐ ܡ̣ܶܢ ܒܰܪܕܳܐ ܡ̣ܶܢ ܫܶܒ̈ܝܶܐ ܘܡ̣ܶܢ ܟܽܠ ܡܰܚ̈ܘܳܬܳܐ ܕܪܘܽܓܙܳܐ: ܘܗܰܒ ܠܰܢ ܕܰܒܫܰܦܝ̣ܪܘ̣ܬ ܩܰܘܡܳܐ ܕܰܒܕܰܟܝܘ̣ܬܳܐ ܕܢܰܦܫܳܐ ܠܡܶܐܚܰܕ ܦܘ̣ܩ̈ܕܳܢܰܝܟ: ܐܶܬ̣ܕܰܟܰܪ ܡܳܪܝܳܐ ܘܠܰܐܝܠܶܝܢ ܕܰܒܬܶܫܡ̈ܫܳܬܳܐ ܟܳܗ̈ܢܳܝܳܬܳܐ ܚܰܦ̣ܶܛܘ̱ ܘܦܰܩ̣ܶܕܘ̱ ܠܰܢ ܕܢ̇ܶܬܕܟܰܪ ܐܶܢܽܘܢ: ܡܰܠܳܐ ܣܘ̣̈ܢܩܳܢܰܝܗܽܘܢ ܠܥܘ̣ܡܪܳܐ ܗܳܢܳܐ ܘܰܠܟܽܠ ܥܳܡܘ̣ܪ̈ܶܐ ܐܰܪ̈ܬܳܕܳܟܣܽܘ̣: ܘܰܠܟܽܠ ܒܰܝܬܳܐ ܕܰܡܗܰܝ̈ܡܢܶܐ ܣܳܥܘ̣ܪܘ̣ܬܳܐ ܛܳܒܬܳܐ ܘܝܰܨܝ̣ܦܘ̣ܬܳܐ ܕܕܘ̣ܒܳܪܳܐ ܕܰܡܝܰܬܪܘ̣ܬܳܐ ܫܰܟܶܢ: ܘܦܘ̣ܢܳܝܳܐ ܕܫܶܐܠ̈ܳܬܗܽܘܢ ܫܰܦܝ̣ܪ̈ܳܬܳܐ ܠܳܐ ܬ̣ܶܟܠܶܐ ܡܳܪܝܳܐ: ܠܰܝܬ ܓܶܝܪ ܐܳܦܠܳܐ ܚܰܕ ܕܰܡܨܶܐ ܠܡܶܦܪܰܩ ܣܛܰܪ ܡܶܢܳܟ: ܠܰܐܝܠܶܝܢ ܕܩܰܕܶܡ̣ܘ̱ ܚܙ̣ܰܩܘ̱ ܠܘܳܬܳܟ ܐܰܒ̈ܳܗܰܝܢ ܘܰܐܚ̈ܰܝܢ ܐܰܢܝ̣ܚ ܐܶܢܽܘܢ ܒܰܐܘܳܘ̈ܢܶܐ ܛܘ̣ܒ̈ܬܳܢܶܐ ܕܰܡܠܝ̣ܟܝ̣ܢ ܠܩܰܕܝ̣̈ܫܰܝܟ ܠܗܳܢܽܘܢ ܕܳܐܦ ܥܰܡܗܽܘܢ ܐܰܫܘܳܐ ܠܡܺܐܪܰܬ ܒܛܰܝܒܘ̣ܬܳܟ ܘܰܒܪ̈ܰܚܡܳܐ ܕܝ̣ܚܝ̣ܕܳܝܳܐ ܒܪܳܟ: ܡܳܪܰܢ ܘܰܐܠܳܗܰܢ ܘܦܳܪܘܽܩܰܢ ܝܶܫܘ̣ܥ ܡܫܝ̣ܚܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܡܪܰܚܡܳܢܳܐ: ܕܰܬ̣ܩܰܒܶܠ ܡܶܢܰܢ ܡܚ̈ܝ̣ܠܶܐ ܘܚܰܛܳܝ̈ܶܐ ܥܰܒ̈ܕܰܝܟ: ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܕܨܰܦܪܳܐ: ܕܢ̣ܶܗܘܶܐ ܠܰܢ ܘܰܠܟܽܠܶܗ ܥܰܡܳܟ ܡܗܰܝܡܢܳܐ ܕܰܒܟܽܠ ܐܰܬܰܪ ܠܫܘ̣ܒܩܳܢܳܐ ܕܰܚܛܳܗ̈ܶܐ ܘܠܰܥܛܳܝܳܐ ܕܟܽܠܗܶܝܢ ܒܝ̣̈ܫܳܬܳܐ ܘܰܠܢܳܛܘ̣ܪܘ̣ܬܳܐ ܚܰܬܝ̣ܬܬܳܐ ܕܗܰܝܡܳܢܘ̣ܬܳܐ: ܘܰܠܫܘ̣ܡܠܳܝܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܐܰ‌ܠܳܗܳܝ̈ܶܐ: ܘܠܰܢܝܳܚܳܐ ܕܗܳܢܽܘܢ ܕܩܰܕܶܡ̣ܘ̱ ܫܟܶܒ̣ܘ̱: ܐܰܒ̈ܗܶܐ ܘܰܐܚ̈ܶܐ ܕܝ̣ܠܰܢ: ܘܰܠܬܶܫܒܘ̣ܚܬܳܐ ܘܰܠܩܘ̣ܠܳܣܳܐ ܕܰܫܡܳܐ ܕܝ̣ܠܳܟ ܡܝܰܩܰܪ ܒܟܽܠ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀