ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܕܩܳܪܶܐ ܠܚܰܛܳܝ̈ܶܐ ܠܰܬܝܳܒܘ̣ܬܳܐ: ܘܠܳܐ ܟܳܠܶܐ ܪ̈ܰܚܡܰܘܗ̱ܝ ܡ̣ܶܢ ܣܳܓ̈ܘ̣ܕܰܘܗ̱ܝ ܗܰܘ̇ ܕܒܰܛܝ̣ܠ ܠܶܗ ܥܰܠ ܚܰܝ̈ܶܐ ܘܦܘ̣ܪܩܳܢܳܐ ܕܟܽܠ ܒܣܰܪ: ܘܰܡܫܦܰܥ ܡܰܘܗܰܒܬܶܗ ܥܰܠ ܗܳܢܽܘܢ ܕܰܠܘܳܬܶܗ ܡܶܬܦܢܶܝܢ ܗ̱ܘܰܘ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ: ܩܰܒܶܠ ܬܝܳܒܘ̣ܬܳܐ ܘܕܶܡ̈ܥܶܐ ܘܚܶܢܓ̥̈ܳܬܳܐ ܕܥܰܒ̈ܕܰܝܟ ܗܳܠܶܝܢ ܕܰܩܕܳܡܰܝܟ ܩܳܝܡܝ̣ܢ: ܘܫܰܟܶܢ ܠܰܢ ܘܰܠܗܽܘܢ ܚܘ̣ܣܽܝܽܐ ܕܚܰܘ̈ܒܶܐ ܘܕܰܚ̈ܛܳܗܶܐ: ܡ̣ܶܢ ܓܰܙܳܟ ܡܰܠܝܳܐ ܘܥܰܬܝ̣ܪܳܐ: ܘܠܳܟ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܰܢ ܝܶܫܽܘ̣ܥ ܡܫܺܝ̣ܚܳܐ ܒܬܰܪܥܳܐ ܕܛܰܝܒܘ̣ܬܳܟ ܢܳܩ̇ܫܝ̣ܢܰܢ ܘܩܳܪܶܝܢܰܢ: ܘܡܶܢ ܒܶܝܬ ܓܰܙܳܟ ܥܰܬܝ̣ܪܳܐ ܚܢܳܢܳܐ ܘܪ̈ܰܚܡܶܐ ܘܚܘ̣ܣܳܝܳܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܫܳܐܠܝ̣ܢܰܢ: ܬܳܐ ܡܳܪܝ̱ ܠܺܐܝܳܠܳܐ ܕܥܰܒ̈ܕܰܝܟ ܕܢܶܫܘܰܪܘ̱ ܡ̣ܶܢ ܦܰܚܳܐ ܘܰܐܝܟ ܛܰܒܝܳܐ ܕܢܶܬܦܰܠܰܛ ܡ̣ܶܢ ܡܨܝ̣ܕܬܳܐ ܕܨܰܝܳܕܳܐ ܒܥܶܕܳܢܳܐ ܗܳܢܳܐ: ܘܰܫܡܰܥ ܨܠܰܘ̈ܳܬܰܢ ܐܰܝܟ ܣܘ̣ܓܳܐܐ ܕܪ̈ܰܚܡܰܝܟ ܣܰܓܺܝ̈ܶܐܐ: ܡܳܪܰܢ ܠܳܐ ܬ̣ܚܘ̣ܪܝ̱ ܟܺܐܢܘ̣ܬܳܟ ܒܚܰܘ̈ܒܰܝܢ ܘܒܰܚ̈ܛܳܗܰܝܢ: ܐܶܠܳܐ ܢ̣ܶܬܟܰܣܽܘܢ ܚܰܘ̈ܒܰܝܢ ܘܰܚ̈ܛܳܗܰܝܢ ܘܡܘ̣̈ܡܰܝܢ ܘܣܘ̣ܪ̈ܚܳܢܰܝܢ ܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ ܘܚܽܘܢ ܠܰܢ ܒܰܡܪܰܚܡܳܢܘ̣ܬܳܟ: ܡܳܪܰܢ ܠܰܘ ܥܰܠ ܙܰܕܝ̣ܩܘ̣ܬܰܢ ܬܟܝ̣ܠܝ̣ܢܰܢ ܘܰܡܨܰܠܶܝܢܰܢ ܩܕܳܡܰܝܟ: ܐܶܠܳܐ ܥܰܠ ܪ̈ܰܚܡܰܝܟ ܣܰܓܺܝ̈ܶܐܐ ܗܳܢܽܘܢ ܕܠܳܐ ܡܶܬܬܟܝ̣ܠܝ̣ܢ ܘܠܳܐ ܡܶܬܡܰܫܚܝ̣ܢ: ܡ̣ܶܢ ܝܺܕܰܥܬܳܐ ܕܰܒܢܰܝ̈ܢܳܫܳܐ ܐܰܝܟ ܚܰܛܳܝ̈ܶܐ ܘܰܡܣܰܟ̈ܠܳܢܶܐ ܡܳܪܰܢ ܒܳܥܶܝܢܰܢ: ܘܠܳܐ ܗ̱ܘܳܐ ܐܰܝܟ ܙܰܕܝ̣̈ܩܶܐ ܥܰܠ ܪ̈ܰܚܡܰܝܟ ܬܟܝ̣ܠܝ̣ܢܰܢ: ܘܠܳܐ ܗܘܳܐ ܥܰܠ ܥܒܳܕ̈ܰܝܢ ܐܰܠܳܗܳܐ ܠܳܐ ܬܰܪܦܶܐ ܠܰܢ ܕܟܽܠ ܐܶܡܰܬܝ̱ ܕܚܳܛܶܝܢܰܢ ܡ̣ܶܢ ܐܝ̣ܕ̈ܰܝܳܐ ܕܢܘ̣ܟܪ̈ܳܝܶܐ ܢ̇ܶܬܢܓܶܕ: ܐܶܠܳܐ ܐܰܢ̱ܬ ܡܳܪܝܳܐ ܡܪܰܚܡܳܢܳܐ ܪܕܝ̣ ܠܰܢ ܒܪ̈ܰܚܡܶܐ ܘܰܩܢܝ̣ ܠܰܢ ܒܰܚܢܳܢܳܟ: ܡܶܛܽܠ ܕܰܐܢܬ ܗ̱ܘ̣ ܐܰܠܳܗܳܐ ܐܰܚܝ̣ܕ ܟܽܠ: ܗܰܘ̇ ܕܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢ̣ܺܚܽܘܢ: ܘܠܝ̣ܕܰܥܬܳܐ ܕܰܫܪܳܪܳܐ ܢ̣ܺܐܬܽܘܢ: ܘܰܐܢ̱ܬ ܗܳܟܝ̣ܠ ܒܨܶܒܝܳܢܳܟ ܛܳܒܳܐ ܝܰܗ̣ܒܬ ܫܘ̣ܠܛܳܢܳܐ ܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ: ܒܝܰܕ ܫܠܝ̣̈ܚܶܐ ܕܝ̣ܠܳܟ ܩܰܕܝ̣̈ܫܶܐ ܘܶܐܡ̣ܰܪܬ ܠܳܗ̇ ܒܺܐܝ̈ܕܰܝܗܽܘܢ ܕܶܐܢܗܘ̣ ܕܬ̣ܶܐܚܕܘ̣ܢ ܚܛܳܗ̈ܶܐ ܕܰܒܢܰܝ̈ܢܳܫܳܐ ܐܰܚܝ̣ܕܝ̣ܢ: ܘܶܐܢ ܬ̣ܶܫܒܩܽܘܢ ܫܒܝ̣ܩܝ̣ܢ ܘܶܐܢ ܬ̣ܶܐܣܪܽܘܢ ܒܰܐܪܥܳܐ ܐܶܢܳܐ ܐܳܣܰܪ ܐ̱ܢܳܐ ܒܰܫܡܰܝܳܐ: ܘܶܐܢ ܬ̣ܶܫܪܽܘܢ ܒܰܐܪܥܳܐ ܐܶܢܳܐ ܫܳܪܶܐ ܐ̱ܢܳܐ ܒܰܫܡܰܝܳܐ: ܐܰܢ̱ܬ ܗܳܟܝ̣ܠ ܚܰܢܳܢܳܐ ܘܰܬܪܝ̣ܨܳܐ: ܛܳܒܳܐ ܘܙܰܟܳܝܳܐ ܒܰܠܚܘ̣ܕܰܝܟ: ܚܰܣܳܐ ܘܰܠܚܝ̣ ܘܰܫܪܝ̣ ܘܰܫܒܘ̣ܩ ܚܛܳܗ̈ܶܐ ܘܣܰܟ̈ܠܘܳܬܳܐ ܕܥܰܒ̈ܕܶܐ ܕܝ̣ܠܳܟ ܘܕܰܐܡ̈ܗܳܬܳܟ ܕܩܳܝ̇ܡܝ̣ܢ ܩܕܳܡܰܝܟ: ܒܥܶܕܳܢܳܐ ܗܳܢܳܐ ܘܰܒܟܽܠܥܶܕܳܢܝ̣̈ܢ ܘܫܳܐܠܝ̣ܢ ܡ̣ܶܢ ܡܪܰܚܡܳܢܘ̣ܬܳܟ ܚܘ̣ܣܳܝܳܐ ܕܚܰܘ̈ܒܰܝܗܽܘܢ ܘܫܘ̣ܒܩܳܢܳܐ ܕܰܚܛܳܗܰܝ̈ܗܽܘܢ: ܘܰܐܝܟܰܢܳܐ ܡܳܪܝ̱ ܕܩܰܒܶܠ̣ܬ ܠܕܰܘܝ̣ܕ ܡܰܠܟܳܐ ܟܰܕ ܚ̣ܛܳܐ ܒܰܚ̈ܛܳܗܶܐ ܕܒܶܝܬ ܐܽܘܪܺܝܳܐ: ܘܗܽܘ̣ ܐܰܘܕܝ̣ ܘܶܐܡ̣ܰܪ ܕܰܚܛܺ̃ܝ̇ܬ ܘܰܐܣ̇ܟܠܶܬ ܩܕܳܡܰܝܟ ܡܳܪܝܳܐ ܐܰܠܳܗܳܐ ܕܺܐܝܣܪܳܐܝܶܠ: ܝܰܗ̣ܒܬ ܠܶܗ ܠܘ̣ܒܳܒܳܐ ܒܝܰܕ ܢܳܬܳܢ ܢܒܺܝܳܐ ܘܶܐܡ̣ܰܪܬ ܠܶܗ: ܕܳܐܦ ܡܳܪܝܳܐ ܐܰܥܒܰܪ ܣܰܟܠܘ̣ܬܳܟ ܠܳܐ ܬ̣ܡܘ̣ܬ: ܘܰܐܝܟܰܢܳܐ ܡܳܪܝ̱ ܕܩܰܒܶܠ̣ܬܳܝܗ̱ܝ ܠܙܰܟܰܝ ܡܳܟܣܳܐ ܟܰܕ ܥܰܠ̣ܬ ܠܒܰܝܬܶܗ: ܘܶܐܡ̣ܰܪܬ ܠܶܗ ܕܝܰܘܡܳܢܳܐ ܗ̣ܘܰܘ ܚܰܝ̈ܶܐ ܒܒܰܝܬܳܐ ܗܳܢܳܐ: ܘܰܐܝܟܰܢܳܐ ܡܳܪܝ̱ ܕܩܰܒܶܠ̣ܬܳܗ̇ ܠܚܰܛܳܝܬܳܐ ܡܰܪܝܰܡ ܟܰܕ ܡܶܫ̣ܚܰܬ݀ ܒܡܶܫܚܳܐ ܪ̈ܶܓܠܰܝܟ ܘܟܰܦ̣ܪܰܬ݀ ܐܶܢܶܝܢ ܒܣܰܥܪܳܗ̇ ܘܶܐܡ̣ܰܪܬ ܠܳܗ̇: ܕܰܫܒܝ̣ܩܝ̣ܢ ܠܶܟܝ̱ ܚܛܳܗܰܝ̈ܟܝ̱ ܣܰܓܺܝ̈ܶܐܐ ܡܶܛܽܠ ܕܰܐܚܶܒ̣ܬ ܣܰܓܝ̣: ܘܰܐܝܟܰܢܳܐ ܡܳܪܝ̱ ܕܩܰܒܶܠ̣ܬܳܝܗ̱ܝ ܠܫܶܡܥܽܘܢ ܟܺܐܦܳܐ ܪܝ̣ܫܳܐ ܕܰܫܠܝ̣̈ܚܶܐ ܡ̣ܶܢ ܒܳܬܰܪ ܕܝ̣ܡܳܐ ܘܰܟܦ̣ܰܪ ܘܰܐܚ̣ܪܶܡ ܥܰܠ ܢܰܦܫܶܗ ܬܠܳܬ ܙܰܒ̈ܢܝ̣ܢ ܕܠܳܐ ܝܳܕܰܥ ܠܳܟ: ܘܡܶܛܽܠ ܬܝܳܒܘ̣ܬܶܗ ܚܰܨܝ̣ܦܬܳܐ ܘܒܶܟܝܳܐ ܕܶܡ̈ܥܶܐ ܘܬܶܢ̈ܚܳܬܳܐ ܘܰܓܥܳܬܳܐ ܘܰܦܝܳܣܳܐ: ܫܒܰܩ̣ܬ ܠܶܗ ܡܳܪܝܳܐ ܐܰܠܳܗܳܐ ܚܰܘ̈ܒܰܘܗ̱ܝ ܘܰܚܛܳܗܰܘ̈ܗ̱ܝ ܘܒܘ̣ܨܳܪ̈ܰܘܗ̱ܝ: ܘܰܐܩܝ̣ܡܬܳܝܗ̱ܝ ܥܰܠ ܕܰܪܓܳܐ ܕܝ̣ܠܶܗ ܩܰܕܡܳܝܳܐ: ܡܳܪܝܳܐ ܕܟܽܠ ܘܰܐܳܠܗܳܐ ܕܰܐܒ̈ܳܗܳܬܳܐ ܕܝ̣ܠܰܢ: ܘܚܰܛܳܝ̈ܶܐ ܥܰܒ̈ܕܶܐ ܕܝ̣ܠܳܟ ܐܝ̣ܬܰܝܢ ܐܶܢܗܘ̣ ܕܰܚ̣ܛܰܝܢܰܢ ܩܕܳܡܰܝܟ ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ: ܐܶܢ ܒܝ̣ܕܰܥܬܳܐ ܘܶܐܢ ܠܳܐ ܒܝ̣ܕܰܥܬܳܐ: ܐܶܢ ܒܡܰܘ̈ܡܳܬܳܐ: ܘܶܐܢ ܒܕܰܓܳܠܘ̣ܬܳܐ: ܐܶܢ ܒܚܶܪܝܳܢܳܐ: ܘܶܐܢ ܒܥܶܨܝܳܢܳܐ: ܐܶܢ ܒܚܶܡܬܳܐ ܘܶܐܢ ܒܚܶܪܡܳܐ: ܐܶܢ ܒܰܚܣܳܡܳܐ ܘܶܐܢ ܒܟܶܠܝܳܢܳܐ: ܐܶܢ ܒܚܘ̣ܫܳܒܳܐ ܕܠܶܒܳܐ: ܘܶܐܢ ܒܡܰܡܠ̱ܠܳܐ ܕܣܶܦ̈ܘܳܬܳܐ: ܘܶܐܢ ܒܟܽܠ ܥܶܠܬܳܐ ܐܰܝܕܳܐ ܕܗܝ̣: ܕܗܽܘ̣ ܡܰܚܛܶܐ ܣܳܛܳܢܳܐ ܠܓܶܢܣܳܐ ܕܰܒܢܰܝ̈ܢܳܫܳܐ: ܐܰܢ̱ܬ ܡܳܪܝܳܐ ܝܶܫܘ̣ܥ ܡܫܝ̣ܚܳܐ ܦܫ̣ܰܛܬ ܐܝ̣ܕܰܝ̈ܟ ܩܰܕܝ̣̈ܫܳܬܳܐ ܥܰܠ ܨܠܝ̣ܒܳܟ ܩܰܕܝ̣ܫܳܐ ܡܶܛܽܠ ܚܘ̣ܣܳܝܳܐ ܘܦܘ̣ܪܩܳܢܳܐ ܕܓܶܢܣܳܐ ܕܰܒܢܰܝ̈ ܐ̱ܢܳܫܳܐ ܚܰܣܳܐ ܚܰܘ̈ܒܰܝܢ: ܘܰܫܒܘ̣ܩ ܚܛܳܗ̈ܰܝܢ ܘܰܐܥܒܰܪ ܣܰܟ̈ܠܘܳܬܰܢ: ܘܰܐܫܘܳܐ ܠܰܢ ܕܰܢ̇ܩܘ̣ܡ ܡ̣ܶܢ ܝܰܡܝ̣ܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ܀