ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܰܠܳܗܳܐ ܐܰܒܳܐ: ܕܰܒܠܚܘ̣ܕܳܝܘ̣ܬܳܐ ܡܶܬܗܰܘܢܰܢ ܘܡܶܫܬܰܒܰܚ: ܘܒܰܬܠܝ̣ܬܝܘ̣ܬܳܐ ܡܶܣܬܓܶܕ ܘܡܶܬܪܰܡܪܰܡ ܡ̣ܶܢ ܚܰܝ̈ܠܰܘܳܬܳܐ ܘܟܶܢ̈ܫܶܐ ܕܢܘ̣ܪܳܐ ܘܰܕܪܘ̣ܚܳܐ: ܘܡ̣ܶܢ ܟܽܠܶܗ ܓܶܢܣܳܐ ܐ̱ܢܳܫܳܝܳܐ: ܠܳܟ ܐܰܪܟܶܢ̣ܘ̱ ܥܰܒܕ̈ܶܐ ܕܝ̣ܠܳܟ ܪ̈ܝ̣ܫܰܝܗܽܘܢ ܒܥܶܕܳܢܳܐ ܗܳܢܳܐ: ܕܰܢ̣ܩܰܒܠܽܘܢ ܡܶܢܳܟ ܡܰܘܗܰܒܬܳܐ ܕܰܡܫܰܟܢܳܐ ܠܟܽܠܰܢ: ܪ̈ܰܚܡܶܐ ܘܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܕܝ̣ܠܰܢ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܟܰܕ ܐܝ̣ܬܰܝܟ ܠܳܐ ܡܒܰܣܪܳܐ: ܘܠܳܐ ܡܶܣܬܰܝܟܳܢܳܐ ܗ̣ܘܰܝ̣ܬ ܒܰܪܢܳܫܳܐ ܒܨܶܒܝܳܢܳܟ: ܘܩܰܒܶܠ̣ܬ ܥܠܰܝܟ ܣܘ̣ܪܳܩܳܐ ܨܶܒܝܳܢܳܝܳܐ: ܘܚܰܫ̈ܶܐ ܐ̱ܢܳܫ̈ܳܝܶܐ ܘܒܰܕܡܳܟ ܩܰܕܝ̣ܫܳܐ ܕܡ̣ܶܢ ܕܰܦܢܳܟ ܙܒܰܢ̣ܬܳܢ: ܡ̣ܶܢ ܥܰܒܕܘ̣ܬܳܐ ܕܫܺܐܕ̈ܶܐ ܘܦܘ̣ܠܚܳܢܳܐ ܣܪܝ̣ܩܳܐ ܕܰܦܬܰܟܪ̈ܶܐ: ܘܰܩܪܰܝܬܳܢ ܒܛܰܝܒܘ̣ܬܳܟ ܠܬܶܫܡܶܫܬܳܐ ܕܚܰܝ̈ܶܐ ܘܰܠܦܘ̣ܠܚܳܢܳܐ ܕܰܡܝ̣ܬܪܘ̣ܬܳܐ ܘܠܰܓܙܳܪܳܐ ܕܥܶܪ̈ܒܶܐ ܕܝ̣ܠܳܟ ܪ̈ܘ̣ܚܳܢܳܝܶܐ: ܐܰܢ̱ܬ ܡܳܪܝ̱ ܒܪ̈ܰܚܡܰܝܟ ܢܛܰܪ ܠܰܢ ܒܫܘ̣ܥܒܳܕܳܐ ܘܬܰܪܒܝ̣ܬܳܐ ܕܥܺܕܬܳܐ ܕܝ̣ܠܳܟ ܫܠܝ̣ܚܳܝܬܳܐ ܘܰܬܪܝ̣ܨܰܬ݀ ܫܘ̣ܒܚܳܐ: ܘܠܳܗܿ ܕܶܝܢ ܚܰܪܰܪ ܡ̣ܶܢ ܟܽܠ ܣܪܝ̣ܩܘ̣ܬܳܐ ܕܝܘ̣ܠ̈ܦܳܢܶܐ ܡܚܰܒ̈ܠܶܐ: ܘܡ̣ܶܢ ܟܽܠ ܫܓܘ̣ܫ̈ܝܶܐ ܘܚܶܪ̈ܝܳܢܶܐ: ܘܗܰܕܰܪܶܝܗܿ ܒܝܘ̣ܠ̈ܦܳܢܶܐ ܫܒܝ̣̈ܚܶܐ: ܘܰܒܙܳܟܘ̣ܬܳܐ ܕܥܰܠ ܒܥܶܠ̈ܕܒܳܒܶܝܗܿ: ܘܰܒܫܰܝܢܳܐ ܘܒܰܫܠܳܡܳܐ ܘܒܰܐܘܝܘ̣ܬܳܐ: ܘܰܒܪ̈ܝܫܰܝ ܟܳܗ̈ܢܶܐ ܚܣܰܝ̈ܳܐ: ܒܚܘ̣ܒܳܐ ܘܰܒܗܰܝܡܳܢܘ̣ܬܳܐ ܫܰܪܝ̣ܪܬܳܐ: ܘܰܒܡܰܠܦܳܢܘ̣ܬܳܐ ܕܕܘ̣ܓ̈ܡܰܐܛܰܐ ܫܠܝ̣̈ܚܳܝܶܐ ܐܰܠܳܗܳܝ̈ܶܐ: ܘܒܰܡܟܰܗܢܳܢܘ̣ܬܳܐ ܕܐ̱ܪ̈ܳܙܶܐ ܕܰܫܪܳܪܳܐ: ܒܟܳܗ̈ܢܶܐ ܕܟܰܝ̈ܳܐ: ܒܰܡܫܰܡ̈ܫܳܢܶܐ ܙܗܰܝ̈ܳܐ: ܩܠܝ̣ܪܘ̣ܣ ܩܰܕܝ̣ܫܳܐ ܘܒܰܩܛܰܣܛܰܐܣܝ̣ܣ ܪܘ̣ܚܳܢܳܝܬܳܐ ܒܥܰܡܳܐ ܡܗܰܝܡܢܳܐ: ܘܰܒܩܰܘܡܳܐ ܠܳܐ ܡܶܙܕܰܥܙܥܳܢܳܐ: ܐܶܠܳܐ ܒܰܡܚܰܡܣܢܳܢܘ̣ܬܳܐ ܕܰܐܓܘ̣ܢܳܐ: ܘܰܒܕܘ̣ܒܳܪ̈ܶܐ ܦܰܐܝ݂̈ܰܝ݂ ܠܩܰܕܝ̣̈ܫܶܐ ܘܰܠܗܳܢܽܘܢ ܕܒܳܗܿ ܐܰܡܝ̣ܢܝ̣ܢ ܘܰܒܪܶܚܡܰܬ݀ ܥܰܡ̈ܠܶܐ ܠܕܘ̣ܒܳܪ̈ܶܐ ܕܝ̣ܠܗܽܘܢ ܩܰܕܝ̣ܫܳܐܝ̣ܬ ܡܫܰܡܠܶܝܢܰܢ: ܘܕܘ̣ܟܪܳܢܳܐ ܕܩܰܕܝ̣̈ܫܶܐ ܘܰܕܥܰܢܝ̣̈ܕܶܐ ܡܗܰܝ̈ܡܢܶܐ ܥܰܠ ܡܰܕܒܚܳܟ ܡܙܰܝܚܝ̣ܢ: ܘܫܰܟܶܢ ܒܛܰܝܒܘ̣ܬܳܟ ܡܳܪܝܳܐ ܙܰܝܢܳܐ ܠܳܐ ܡܶܙܕܰܟܝܳܢܳܐ ܕܪܘ̣ܚܳܐ ܩܰܕܝ̣ܫܳܐ: ܠܡܰܠ̈ܟܶܐ ܕܰܒܰܪ ܐܰܝܟ ܨܶܒܝܳܢܳܟ ܠܪ̈ܝ̣ܫܳܢܶܐ ܨܰܒ̣ܶܬ ܒܕܶܚܠܬܳܟ: ܠܡܶܣ̈ܟܺܢܶܐ ܐܰܫܦܰܥ ܒܘ̣ܪ̈ܟܳܬܳܟ: ܠܚܰܛܳܝ̈ܶܐ ܐܰܣܓܳܐ ܫܘ̣ܒܩܳܢܳܐ: ܠܡܰܪ̈ܕܘܳܬܳܐ ܒܰܛܶܠ ܒܰܚܢܳܢܳܟ: ܠܩܝ̣ܢܕܘ̣ܢܽܘ̣ܣ ܐܰܥܒܰܪ ܒܰܡܪܰܚܡܳܢܘ̣ܬܳܟ ܠܰܐܪܥܳܐ ܫܰܟܶܢ ܐܳܐܰܪ̈ܰܣ ܡܡܰܙ̈ܓܶܐ ܘܰܫܦܝ̣ܥܘ̣ܬܳܐ ܕܦܺܐܪ̈ܶܐ: ܘܰܚܢܰܢ ܡܶܣ̈ܟܺܢܶܐ ܘܕܳܘܰܝ̈ܳܐ: ܕܰܩܕܳܡ ܡܳܪܘ̣ܬܳܟ ܩܳܝܡܝ̣ܢܰܢ: ܘܰܒܪܶܚܡܰܬ݀ ܐ̱ܢܳܫܘ̣ܬܳܟ ܡܶܬܓܰܘܣܝ̣ܢܰܢ: ܘܥܰܠ ܣܰܒܪܳܐ ܕܝ̣ܠܳܟ ܬܟܝ̣ܠܝ̣ܢܰܢ: ܫܰܕܰܪ ܦܘ̣ܢܳܝܳܐ ܠܫܶܐܠ̈ܳܬܰܢ: ܫܰܪܰܪ ܘܕܰܟܳܐ ܠܦܰܓܪ̈ܰܝܢ: ܘܙܰܗܳܐ ܘܩܰܕܶܫ ܠܢܰܦ̈ܫܳܬܰܢ ܘܨܰܠܶܠ ܘܰܡܪܘ̣ܩ ܠܰܢ ܡ̣ܶܢ ܟܽܠܗܽܘܢ ܡܘ̣ܡ̈ܶܐ ܣܢܰܝ̈ܳܐ ܘܰܚܒܳܪ̈ܳܬܳܐ ܕܰܚܛܝ̣ܬܳܐ: ܘܰܐܫܘܳܐ ܠܰܢ ܕܢ̇ܶܫܟܰܚ ܫܘ̣ܠܳܡܳܐ ܛܘ̣ܒܬܳܢܳܐ ܘܰܕܠܳܐ ܒܣܝ̣ܪ ܡ̣ܶܢ ܬܺܐܪܬܳܐ: ܘܡܰܢܰܥ ܠܰܢ ܠܝܳܪܬܘ̣ܬܳܐ ܕܰܐܝܠܶܝܢ ܕܶܐܬ̣ܓܡܰܪܘ̱ ܡܫܰܡܠܝܳܐܝ̣ܬ ܐܶܬ̣ܢܰܨܰܚܘ̱: ܐܰܝܟܰܢܳܐ ܕܥܰܡܗܽܘܢ ܒܬܶܫܒ̈ܚܳܬܳܐ ܕܙܳܟܘ̣ܬܳܐ ܘܰܒ̈ܩܳܠܶܐ ܕܩܘ̣ܒܳܠܛܰܝܒܘ̣ܬܳܐ ܢ̇ܶܫܬܘܶܐ: ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܕܫܰܠ̣ܚܳܟ ܠܦܘ̣ܪܩܳܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀