ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܽܘ̣ܣܳܝܳܐ ܘܪ̈ܰܚܡܶܐ ܘܫܽܘ̣ܒܩܳܢܳܐ ܕܰܚ̈ܛܳܗܶܐ ܢ̣ܶܫܬܰܕܰܪ ܡ̣ܶܢ ܠܘܳܬܳܟ: ܡܫܝ̣ܚܳܐ ܐܰܠܳܗܳܐ ܠܥܰܒ̈ܕܶܐ ܕܝ̣ܠܳܟ: ܕܩܳܪܶܝܢ ܠܳܟ ܐܰܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܘܣܰܓܝ̣ ܪ̈ܰܚܡܶܐ: ܘܰܡܠܝ̣ ܦܘ̣̈ܡܰܝܢ ܥܰܡ ܢܰܦ̈ܫܳܬܰܢ ܬܰܘܕܝ̣ܬܳܐ ܘܫܘ̣ܒܚܳܐ ܕܪܰܒܘ̣ܬܳܟ: ܘܰܗܘܝ̣ ܠܰܢ ܒܶܝܬ ܓܰܘܣܳܐ ܘܰܡܣܰܬܪܳܢܳܐ ܒܙܰܒ̈ܢܶܐ ܕܐܘ̣ܠܨܳܢܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܦܳܪܘ̣ܩܳܐ ܪܰܒܳܐ ܕܰܢܚ̣ܶܬ ܡ̣ܶܢ ܪܰܘܡܳܐ ܕܪܰܒܘ̣ܬܶܗ ܡܶܛܽܠ ܦܘ̣ܪܩܳܢܰܢ ܘܡܶܛܽܠܳܬܰܢ ܚܰܛܳܝ̈ܶܐ ܗ̣ܘܳܐ ܒܰܪܢܳܫܳܐ: ܟܰܕ ܠܳܐ ܣܒ̣ܰܠ ܫܘ̣ܚܠܳܦܳܐ ܡ̣ܶܢ ܗܳܝ̇ ܕܐܝ̣ܬܰܘܗ̱ܝ ܐܰܠܳܗܳܐ: ܡܶܛܽܠܳܬܰܢ ܬܘ̣ܒ ܨܰܘܡܳܐ ܩܰܒ̣ܶܠ ܟܰܕ ܡ̣ܶܢ ܟܽܠ ܚܛܝ̣ܬܳܐ ܪܰܚܝ̣ܩ: ܘܶܐܬ̣ܢܰܣܝ̣ ܬܘ̣ܒ ܡ̣ܶܢ ܒܝ̣ܫܳܐ ܕܠܰܢ ܢ̣ܚܰܝܶܠ ܥܰܠ ܟܽܠ ܢܶܣܝܘ̣ܢܳܐ ܕܰܒܥܶܠ̈ܕܒܳܒܶܐ ܘܡܶܛܽܠܳܬܰܢ ܬܘ̣ܒ ܚ̣ܰܫ ܘܶܐܨܛܠ̣ܶܒ: ܕܠܶܗ ܠܰܡܢܰܣܝܳܢܳܐ ܕܚ̣ܰܝܶܒ ܒܕܰܪܶܗ ܬܘ̣ܒ ܒܰܨܠܝ̣ܒܶܗ ܙܰܟܳܝܳܐ ܢ̣ܶܣܚܘ̣ܦ ܘܢ̣ܶܩܛܘ̣ܠ ܘܠܰܢ ܡ̣ܶܢ ܢܘ̣ܟ̈ܬܳܬܳܐ ܕܝ̣ܠܶܗ ܢ̣ܚܰܪܰܪ ܘܢ̣ܶܦܪܘ̣ܩ: ܕܠܶܗ ܗܳܫܳܐ ܣܳܓ̇ܕܝ̣ܢܰܢ ܘܰܡܪܰܡܪܡܝ̣ܢܰܢ: ܘܠܶܗ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܕܡ̣ܶܢ ܡܰܚ̈ܘܳܬܶܗ ܕܬܰܢܝ̣ܢܳܐ ܡܶܬܝܰܕܥܳܢܳܐ ܢ̣ܫܰܘܙܶܒ ܠܰܢ ܘܡ̣ܶܢ ܦܰܚ̈ܰܘܗ̱ܝ ܘܰܡܨܝ̣̈ܕܳܬܶܗ ܢ̣ܢܰܛܪ ܠܰܢ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܡܶܠܬܶܗ ܕܐܰܒܳܐ ܡܬܘ̣ܡܳܝܳܐ ܗܰܘ̇ ܣܰܒܪܳܐ ܕܰܐܝܠܶܝܢ ܕܰܕܠܳܐ ܣܰܒܪܳܐ ܘܬܘ̣ܟܠܳܢܳܐ ܘܒܶܝܬ ܓܰܘܣܳܐ ܕܰܐܝܠܶܝܢ ܕܰܕܠܳܐ ܐܺܝܳܠܳܐ: ܗܰܘ̇ ܐܳܣܝܳܐ ܛܳܒܳܐ ܕܡܶܛܽܠ ܐܰܝܠܶܝܢ ܕܒܝ̣ܫܳܐܝ̣ܬ ܣܝ̣ܡܝ̣ܢ ܐܶܬܢܰܚ̣ܰܬ ܕܰܠܗܽܘܢ ܢ̣ܰܐܣܶܐ ܘܢ̣ܰܚܠܶܡ ܡ̣ܶܢ ܡܰܚ̈ܘܳܬܶܗ ܕܚܶܘܝܳܐ ܚܰܪܡܳܢܳܐ: ܗܰܘ̇ ܕܠܰܐܒ̈ܳܗܰܝܢ ܩܰܕܡܳܝ̈ܶܐ ܐܳܕܳܡ ܘܚܰܘܳܐ ܙܰܟܝ̣: ܒܝܰܕ ܢܶܟܠܶܗ ܒܡܶܨܥܰܬ݀ ܐܝ̣ܠܳܢܳܐ ܕܦܰܪܕܰܝܣܳܐ ܒܡܶܐܟܘ̣ܠܬܳܐ ܕܡ̣ܶܢ ܦܺܐܪ̈ܶܐ ܕܐܝ̣ܠܳܢܳܐ ܗܰܘ̇ ܕܒܰܡܨܰܥܬܳܐ ܢܨܝ̣ܒ ܗ̱ܘܳܐ ܠܒܘ̣ܚܪܳܢ ܚܺܐܪܘ̣ܬܗܽܘܢ: ܗܰܘ̇ ܕܥܶܩܳܪ̈ܶܐ ܡܣܰܡ̈ܣܡܳܢܶܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܠܨܰܘܡܳܐ ܩܰܕܝ̣ܫܳܐ ܬܰܚ̣ܶܡ ܠܰܢ: ܗܰܘ̇ ܕܗܘ̣ ܓܰܡ̣ܪܳܗܿ ܒܰܩܢܘ̣ܡܶܗ ܚܠܳܦܰܝܢ: ܕܠܳܐ ܨܳܡ̣ܢܰܢ ܒܓܰܢܬܳܐ ܡ̣ܶܢ ܦܺܐܪܳܐ ܩܳܛܘ̣ܠܳܐ ܕܰܥܒܳܪ ܦܘ̣ܩܕܳܢܳܐ: ܐܰܝܟܰܢܳܐ ܕܒܶܗ ܟܰܕ ܒܶܗ ܒܥܶܩܳܪܳܐ ܕܨܰܘܡܳܐ ܠܶܗ ܠܚܶܘܝܳܐ ܢܳܟܘ̣ܠܳܐ ܢ̣ܶܩܛܘ̣ܠ: ܘܰܠܗܳܝ ܡܶܪܬܳܐ ܡܚܰܒܠܳܢܝ̣ܬܳܐ ܕܦܶܪܚ̣ܰܬ݀ ܒܰܓܒܝ̣ܠܬܳܐ ܐܳܕܳܡܳܝܬܳܐ ܡܶܢܰܢ ܢ̣ܢܰܦܶܨ: ܘܚܘ̣ܠܡܳܢܳܐ ܓܡܝ̣ܪܳܐ ܠܐ̱ܢܳܫܘ̣ܬܳܐ ܟܽܠܳܗܿ ܢ̣ܫܰܟܶܢ: ܘܟܰܕ ܠܗܳܢܳܐ ܐܰܓܘ̣ܢܳܐ ܢܚ̣ܶܬ ܨܶܒܝܳܢܳܐܝ̣ܬ ܚܠܳܦ ܐܳܕܳܡ ܥܰܬܝ̣ܩܳܐ ܕܰܢܦ̣ܰܠ ܒܕܰܪܳܐ ܘܶܐܙ̣ܕܟ݂ܝ̣ ܡ̣ܶܢ ܛܥܳܡܬܳܐ ܗܳܝ̇ ܚܶܘܝ݂ܳܝܬܳܐ ܘܚܰܘܳܝܬܳܐ ܒܰܡܨܰܥܬܳܗܿ ܕܓܰܢܬܳܐ ܥܕܶܢܳܝܬܳܐ: ܗܰܘ̇ ܐܳܕܳܡ ܬܪܰܝܳܢܳܐ ܘܰܫܡܰܝܳܢܳܐ ܒܕܰܪܳܐ ܕܰܥܒ̣ܰܕ ܥܰܡ ܗܰܘ̇ ܢܳܟܘ̣ܠܳܐ ܒܕܰܒܪܳܐ ܠܚܰܝܳܒܘ̣ܬܶܗ ܕܳܐܕܳܡ ܙܰܟܝ̣: ܘܠܶܗ ܠܒܝ̣ܫܳܐ ܢܟܝ̣ܠܳܐ ܚ̣ܰܝܶܒ ܘܦܰܪܣܝ̣ ܒܕܰܪܳܐ ܬܠܳܬܳܐ ܒܳܬܰܪ ܝܰܘ̈ܡܳܬܳܐ ܐܰܪܒܥܝ̣ܢ ܕܨܳܡ: ܘܠܰܢ ܠܰܒ̈ܢܰܝ ܐܳܕܳܡ ܕܰܗ̣ܘܰܝܢܰܢ ܒܶܗ ܒܢ̈ܰܝܳܐ ܠܰܐܒܘ̣ܗ̱ܝ ܫܡܰܝܳܢܳܐ ܒܛܰܝܒܘ̣ܬܳܐ: ܠܰܒ̣ܶܒ ܘܚ̣ܰܝܶܠ ܘܥ̣ܰܕܰܪ ܒܨܰܘܡܶܗ ܙܰܟܳܝܳܐ ܘܒܰܨܠܝ̣ܒܶܗ ܡܰܥܒܶܕ ܚܰܝ̈ܶܐ ܕܰܚܠܳܦܰܝܢ ܣܒ̣ܰܠ ܒܰܡܨܰܥܬܳܗܿ ܕܐܰܪܥܳܐ ܘܒܶܗ ܓܰܡ̣ܪܶܗ ܠܦܘ̣ܪܩܳܢܰܢ: ܘܗܳܫܳܐ ܡܳܪܝܳܐ ܪܳܚܶܡ ܐ̱ܢܳܫܳܐ ܝܶܫܘ̣ܥ ܡܫܝ̣ܚܳܐ ܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ: ܗܰܘ̇ ܕܰܥܒ̣ܰܕ ܩܪܳܒܳܐ ܥܰܡ ܐܳܟܶܠܩܰܪܨܳܐ ܘܰܫ̣ܕܳܝܗܝ ܠܒܶܣܬܪܶܗ: ܘܥܰܡ ܡܰܘܬܳܐ ܕܒܰܟܝܳܢܶܗ ܠܳܐ ܡܳܝܘ̣ܬܳܐ: ܗܰܘ̇ ܟܰܕ ܒܥܘ̣ܕܪܳܢܳܐ ܕܡܶܢܳܟ ܐܶܬܡܰܨܥ̣ܢܰܢ ܠܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܘܰܡܙܰܝ̈ܚܳܢܶܐ ܕܨܰܘܡܳܟ ܡܳܪܳܢܳܝܳܐ ܘܩܰܕܝ̣ܫܳܐ ܘܰܕܚܰܫܳܟ ܦܳܪܘ̣ܩܳܝܳܐ: ܐܰܝܟ ܕܰܠܬܘ̣ܪܳܨܳܐ ܘܰܩܝܳܡܬܳܐ ܕܚܰܝ̈ܰܝ݂ܰܢ ܠܚܰܫ̈ܰܝܟ ܣܓܝ̣̈ܕܶܐ ܘܰܒܚܘ̣ܒܳܐ ܡܥ̱ܰܗܕܝ̣ܢܰܢ: ܘܠܰܨܠܝ̣ܒܳܟ ܚܰܝܳܐ ܘܡܰܥܒܶܕ ܚܰܝ̈ܶܐ ܘܠܳܐ ܡܳܝܘ̣ܬܘ̣ܬܳܐ ܗܰܘ̇ ܕܰܥܒ̣ܰܕܬ ܠܰܢ ܒܶܗ ܦܘ̣ܪܩܳܢܳܐ ܒܰܡܨܰܥܬܳܐ ܕܗܳܕܶܐ ܝܰܬܒܬܳܐ: ܒܰܡܨܰܥܬܳܗܿ ܕܥܺܕܬܳܐ ܩܳܒܥܝ̣ܢܰܢ ܒܛܘ̣ܦܣܳܐ ܕܚܶܘܝܳܐ ܗܰܘ̇ ܕܰܢܚܳܫܳܐ ܕܡ̣ܶܢ ܡܽܘܫܶܐ ܐܶܬܩܒ̣ܰܥ ܒܡܶܨܥܰܬ݀ ܡܰܫܪܝ̣ܬܳܐ ܕܰܒܢܰܝ̈ ܐܝ̣ܣܪܳܐܝܶܠ: ܠܳܐܣܝܘ̣ܬܳܐ ܕܡ̣ܶܢ ܡܰܚ̈ܘܳܬܳܐ ܕܰܚ̈ܘܰܘܳܬܳܐ ܚܰܪ̈ܡܳܢܶܐ ܗܰܘ̇ ܕܐܰܢ̱ܬ ܒܡܶܠܬܳܟ ܠܳܐ ܕܰܓܳܠܬܳܐ ܐܰ‌ܠܶܦ̣ܬ ܠܰܢ ܠܐ̱ܪܳܙܳܐ ܪܰܒܳܐ ܕܡܶܬܬܪܝ̣ܡܳܢܘ̣ܬܳܟ ܕܥܰܠ ܙܩܝ̣ܦܳܐ ܨܳܐܰܪ ܗ̱ܘܳܐ ܒܰܡܨܰܥܬܳܗܿ ܕܰܐܪܥܳܐ: ܡܶܟܝ̣ܠ ܡܳܪܝܳܐ ܟܰܕ ܒܳܪܟܝ̣ܢ ܩܕܳܡܰܘܗ̱ܝ ܟܳܦܝ̣ܢܰܢ ܘܚܰܘܪܰܢ ܟܽܠܶܗ ܠܘܳܬܶܗ ܬܳܠܶܝܢܰܢ: ܘܒܐܝ̣̈ܕܰܝܢ ܡܚܝ̣̈ܠܳܬܳܐ ܠܶܗ ܡܥܰܦܩܝ̣ܢܰܢ ܘܢܘ̣ܫ̈ܩܳܬܳܐ ܡܶܬܝܰܕ̈ܥܳܢܝܳܬܳܐ ܠܶܗ ܝܳܗܒܝ̣ܢܰܢ: ܒܳܥܶܝܢܰܢ ܡ̣ܶܢ ܡܪܰܚܡܳܢܘ̣ܬܳܟ ܕܬ̣ܰܒܰܥ ܠܰܢ ܡ̣ܶܢ ܣܝ̣̈ܡܳܬܳܐ ܕܒܘ̣ܪ̈ܟܳܬܶܗ ܚܘ̣ܣܝܳܐ ܘܕܘ̣ܟܳܝܳܐ ܕܡ̣ܶܢ ܟܽܠܗܶܝܢ ܢܘ̣ܟ̈ܬܳܬܶܗ ܕܚܶܘܝܳܐ ܗܰܘ̇ ܣܰܓܝ̣ ܪ̈ܝܫܶܐ ܕܟܰܡܝ̣ܢ ܠܰܢ: ܘܰܒܟܽܠܗܽܘܢ ܗܰܕܳܡܰܝ̈ܢ ܡܡܰܚܶܐ ܠܰܢ: ܐܝ̣ܢ ܡܳܪܝܳܐ ܗܰܒܠܰܢ ܕܰܢ̇ܥܰܡܶܨ ܠܪ̈ܶܓܫܰܝܢ ܟܽܠܗܽܘܢ ܡ̣ܶܢ ܪ̈ܓܝ̣ܓܳܬܳܐ ܡܰܘܒ̈ܕܳܢܝܳܬܳܐ ܕܢܰܦܫܳܐ ܘܰܕܦܰܓܪܳܐ ܠܪ̈ܶܓܠܶܐ ܢܟܝ̣̈ܠܶܐ ܡ̣ܶܢ ܐܘ̣ܪ̈ܚܳܬܳܐ ܕܝ̣ܠܶܗ ܥܩܰܠ̈ܩܠܳܬܳܐ ܕܗܰܘ̇ ܚܶܘܝܳܐ ܥܰܬܝ̣ܩܳܐ ܘܰܕܠܳܐ ܢ̣ܶܪ̈ܗܛܳܢ ܒܐܘ̣ܪܚܳܐ ܕܐܝ̣ܠܳܢܳܐ ܛܥܝ̣ܢ ܡܰܘܬܳܐ ܐܰܘܟܝ̣ܬ ܫܘ̣ܒܚܶܗ ܕܗܳܢ ܥܳܠܡܳܐ: ܠܐܝ̣̈ܕܰܝܳܐ ܕܶܝܢ ܕܰܢ̇ܟܘ̣ܦ ܡ̣ܶܢ ܩܛܳܦ ܦܺܐܪܳܐ ܗܰܘ̇ ܡܡܝ̣ܬܳܢܳܐ ܐܰܘܟܝ̣ܬ ܫܘ̣ܦܪܶܗ ܕܥܳܠܡܳܐ: ܘܰܠܦܘ̣ܡܳܐ ܘܚܶܟܳܐ ܡ̣ܶܢ ܛܥܳܡܬܶܗ ܡܰܘܒܕܳܢܝ̣ܬܳܐ ܕܗܰܘ̇ ܦܺܐܪܳܐ ܐܰܘܟܝ̣ܬ ܓܰܐܝܘ̣ܬܶܗ ܕܥܳܠܡܳܐ ܢ̇ܶܒܠܘ̣ܡ: ܘܰܠܠܶܫܳܢܳܐ ܬܘ̣ܒ ܢ̇ܦܰܓܶܕ ܡ̣ܶܢ ܡܶܐܟܰܠܩܰܪܨܳܐ ܚܶܘܝ݂ܳܝ݂ܳܐ ܘܡܶܠܟܳܐ ܒܝ̣ܫܳܐ: ܘܡ̣ܶܢ ܟܽܠ ܡܰܡܠ̱ܠܳܐ ܡܣܰܓܦܳܢܳܐ ܠܣܰܘܩܳܐ ܬܘ̣ܒ ܕܡ̣ܶܢ ܪ̈ܝ̣ܚܳܢܶܐ ܡܪ̈ܰܦܝܳܢܶܐ ܘܥܳܒ̈ܕܰܝ ܢܶܟܝܳܢܳܐ ܒܠܶܒܳܐ ܘܰܒܡܘ̣ܚܳܐ ܢ̇ܶܣܟܘ̣ܪ: ܠܶܐܕ̈ܢܶܐ ܬܘ̣ܒ ܡ̣ܶܢ ܡܶܠܟܳܐ ܢܳܟܘ̣ܠܳܐ ܘܡ̣ܶܢ ܟܽܠ ܝܘ̣ܠܦܳܢܳܐ ܡܰܥܒܶܕ ܡܰܘܬܳܐ ܒܢܰܦ̈ܫܳܬܰܢ ܢ̇ܫܘ̣ܥ: ܠܥܰܝ̈ܢܶܐ ܬܘ̣ܒ ܡ̣ܶܢ ܚܰܘܪܳܐ ܙܰܠܝ̣ܠܳܐ ܕܪܶܓܬܳܐ ܡܰܣܠܰܝܬܳܐ ܕܥܳܠܡܳܐ ܢ̇ܥܰܡܶܨ: ܐܰܝ̇ܕܳܐ ܕܚܰܫܳܐ ܕܛܰܢܦܘ̣ܬܳܐ ܘܰܕܓܰܘܪܳܐ ܠܪܶܥܝܳܢܳܐ ܡܰܠܝܳܐ: ܫܰܟܶܢ ܠܰܢ ܕܶܝܢ ܬܘ̣ܒ ܡܳܪܝܳܐ ܕܰܠܘܳܬܳܟ ܒܰܠܚܘ̣ܕ ܚܰܘܪܳܐ ܕܬܰܪܥܝ̣ܬܰܢ ܢ̇ܥܰܠܶܐ: ܘܰܒܫܘ̣ܦܪܳܟ ܪܓܝ̣ܓܳܐ ܐܰܡܝ̣ܢܳܐܝ̣ܬ ܢ̇ܰܐܨܶܕ: ܘܒܶܐܕ̈ܢܰܝܢ ܠܫܶܡܥܳܐ ܕܦܘ̣ܩ̈ܕܳܢܰܝܟ ܬܪ̈ܝ̣ܨܶܐ ܘܡܰܥ̈ܒܕܰܝ ܚܰܝ̈ܶܐ ܢ̇ܰܥܶܠ ܠܘܳܬ ܡܰܕ̈ܥܶܐ ܕܝ̣ܠܰܢ: ܠܣܰܘܩܳܐ ܬܘ̣ܒ ܕܪܘ̣ܚܳܐ ܕܚܰܝ̈ܶܐ ܘܰܕܦܘ̣ܪܩܳܢܳܐ ܢ̇ܩܰܒܶܠ: ܘܡ̣ܶܢ ܪܝ̣ܚܳܐ ܕܒܶܣ̈ܡܳܢܰܝܟ ܚܠܰܝ̈ܳܐ ܢ̇ܣܘ̣ܩ: ܘܰܠܦܘ̣ܡܳܐ ܕܝܶܢ ܕܝ̣ܠܰܢ ܒܰܣܝ̣ܡ ܐܰܢ̱ܬ ܘܛܳܒ ܐܰܢ̱ܬ ܢ̇ܶܛܥܰܡ ܘܢ̇ܺܚܶܐ ܒܳܟ: ܘܰܠܠܶܫܳܢܳܐ ܕܢ̇ܶܠܛܘ̣ܫ ܠܬܶܫܒܘ̣ܚܬܳܐ ܕܪܰܒܘ̣ܬܳܟ ܘܰܠܬܰܘܕܝ̣ܬܳܐ ܕܡܳܪܘ̣ܬܳܟ: ܘܰܠܓܶܫܬܳܐ ܕܬܶܬ̣ܒܰܣܰܡܝ̱ ܒܗܰܝܡܳܢܘ̣ܬܳܐ ܘܬ̣ܶܦܪܘ̣ܫܝ̱ ܙܰܕܝ̣ܩܘ̣ܬܳܐ ܡ̣ܶܢ ܥܰܘܳܠܘ̣ܬܳܐ ܘܚܳܪܥܘ̣ܬܳܐ ܡ̣ܶܢ ܬܰܡܝ̣ܡܘ̣ܬܳܐ: ܠܗܰܠ̈ܟܳܬܳܐ ܕܶܝܢ ܕܒܐܘ̣ܪܚܳܐ ܩܰܛܝ̣ܢܬܳܐ ܘܰܐ‌ܠܝ̣ܨܬܳܐ ܢܶܪ̈ܕܝܳܢ ܗܳܝ ܕܰܡܡܰܢܥܳܐ ܠܡܰܠܟܘ̣ܬܳܐ ܕܰܫܡܰܝܳܐ: ܐܶܠܳܐ ܚܰܝܶܠ ܡܳܪܝ̱ ܠܦܰܓܪܳܐ ܕܰܒܠܳܐ ܬܘ̣ܪܣܳܝܳܐ ܢ̇ܶܬܥܰܠܶܐ ܠܘܳܬ ܗܳܠܶܝܢ ܕܢܰܦܫܳܐ: ܘܰܠܢܰܦܫܳܐ ܬܘ̣ܒ ܥܰܕܰܪ ܐܰܝܟܰܢܳܐ ܕܥܰܡܶܗ ܕܫܰܘܬܳܦܳܗ̇ ܬ̣ܶܬܥܰܠܶܐ ܠܘܳܬ ܗܰܘܢܳܐ ܪܝܫܳܢܳܐ ܕܝܠܳܗ݂̇: ܠܗܰܘܢܳܐ ܕܶܝܢ ܕܰܠܢܰܦܫܳܐ ܘܰܠܦܰܓܪܳܐ ܢ̣ܶܦܪܰܚ ܒܶܐܒܪ̈ܶܐ ܪ̈ܘ̣ܚܳܢܳܝܶܐ ܠܘܳܬ ܫܟܝ̣ܢܬܳܐ ܡܰܪܕܝܰܬ݀ ܚܰܝ̈ܶܐ ܕܐܝ̣ܬܶܝܗܿ ܚܙܳܬܳܐ ܕܦܰܐܝܘ̣ܬܳܟ ܠܳܐ ܡܶܬܦܰܚܡܳܢܝ̣ܬܳܐ: ܐܰܝܟܰܢܳܐ ܕܒܳܟ ܘܠܳܟ ܢ̇ܶܬܝܰܐܝܰܒ ܘܡܶܢܳܟ ܢ̇ܶܬܦܰܛܰܡ: ܘܰܒܪܶܚܡܬܳܟ ܢ̇ܶܪܘܰܙ ܘܥܰܡܳܟ ܢ̇ܶܫܬܰܒܰܚ ܘܠܳܟ ܢ̇ܶܣܓܘ̣ܕ ܘܰܢ̇ܫܰܒܰܚ ܘܢ̇ܰܘܕܶܐ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܥܶܛܪܳܐ

ܛܳܒܳܐ ܘܰܡܪܰܚܡܳܢܳܐ ܘܢܰܓܝ̣ܪ ܪܘ̣ܚܳܐ ܘܰܡܪܰܚܦܳܢܳܐ ܡܳܪܝܳܐ: ܗܰܘ̇ ܕܝܳܕܰܥ ܒܠܶܒܰܘ̈ܳܬܳܐ ܕܟܽܠ: ܫܡܰܥ ܨܠܰܘ̈ܳܬܳܐ ܕܥܰܒ̈ܕܰܝܟ ܕܰܟܢܝ̣ܫܝ̣ܢ ܒܰܫܡܳܟ ܩܰܕܝ̣ܫܳܐ: ܘܶܐܬܬܢܝ̣ܚ ܒܬܶܫܡ̈ܫܳܬܳܐ ܕܣܳܓ̈ܘ̣ܕܰܝܟ ܕܰܪܟܝ̣ܢܝ̣ܢ ܩܕܳܡܰܝܟ: ܘܫܰܝܶܢ ܥܺܕ̈ܳܬܳܟ ܘܕܰܝܪ̈ܳܬܳܟ ܕܰܒܟܽܠ ܐܰܬܰܪ: ܘܢܰܛܰܪ ܝܰܠ̈ܕܰܝܗܶܝܢ ܘܟܳܗ̈ܢܰܝܗܶܝܢ ܒܰܫܪܳܪܳܐ ܕܗܰܝܡܳܢܘ̣ܬܳܐ ܕܝ̣ܠܳܟ: ܘܫܰܝܶܢ ܡܰܠܟ̈ܘܳܬܳܐ ܕܰܐܪܥܳܐ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܣܰܓܺܝ̈ܶܐܐ: ܘܰܐܢܝ̣ܚ ܠܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ: ܘܰܐܩܝ̣ܡ ܐܶܢܽܘܢ ܡ̣ܶܢ ܝܰܡܝ̣ܢܳܟ: ܥܰܡ ܟܽܠܗܽܘܢ ܩܰܕܝ̈ܫܰܝܟ ܠܥܳܠܡܝ̣ܢ܀