ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܡܫܺܝ̣ܚܳܐ ܡܶܠܬܳܐ ܐܰܠܳܗܳܐ ܕܠܳܐ ܡܶܬܡܰܠܰܠ ܡ̣ܶܢ ܒܳܨܽܘ̈ܝܶܐ: ܢܘ̣ܗܪܳܐ ܡܬܘ̣ܡܳܝܳܐ ܕܠܳܐ ܡܶܬܦܰܫܰܩ ܡܶܢ ܕܳܪ̈ܘ̣ܫܶܐ: ܦܳܪܘ̣ܩܳܐ ܕܶܐܫܬܰܕܰܪ ܡ̣ܶܢ ܐܰܒܳܐ ܓܢܝ̣ܙܳܐ ܠܥܳܠܡܳܐ ܡܶܛܽܠ ܦܘ̣ܪܩܳܢܳܐ ܕܝ̣ܠܰܢ ܡܰܣܟ̈ܠܳܢܶܐ: ܘܚܘ̣ܪܳܪܳܐ ܥܒ̣ܰܕ ܠܰܢ ܡ̣ܶܢ ܥܰܒܕܘ̣ܬܳܐ ܕܣܳܛܳܢܳܐ ܘܚܰܝ̈ܠܰܘܳܬܶܗ ܡܳܪ̈ܘ̣ܕܶܐ: ܘܫܰܡܠܝ̣ ܡܕܰܒܪܳܢܘ̣ܬܶܗ ܒܨܰܘܡܳܐ ܘܥܰܡܠܳܐ ܘܰܨܠܘ̣ܬܳܐ: ܘܰܐܣ̣ܶܩ ܠܰܢ ܠܰܫܡܰܘ̈ܗ̱ܝ ܪ̈ܳܡܶܐ: ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܚܢܰܢ ܡܶܣ̈ܟܺܢܶܐ ܘܬܰܚ̈ܘ̣ܒܶܐ: ܕܬ̣ܶܣܥܘ̣ܪ ܒܪ̈ܰܚܡܰܝܟ ܠܰܟܪ̈ܝ̣ܗܶܐ ܘܰܬ̣ܚܰܝܶܠ ܒܚܰܝܠܬܳܢܘ̣ܬܳܐ ܕܡܶܢܳܟ ܠܰܡܚܝ̣̈ܠܶܐ: ܘܰܬ̣ܣܰܡܶܟ ܒܚܘ̣ܛܪܳܐ ܠܳܐ ܡܶܙܕܰܥܙܥܳܢܳܐ ܠܣܳܒ̈ܶܐ: ܘܰܬ̣ܢܰܟ݂ܶܦ ܘܰܬ̣ܢܰܛܰܪ ܠܰܥܠܰܝ̈ܡܶܐ: ܘܰܬ̣ܪܰܒܶܐ ܘܰܬ̣ܗܰܕܶܐ ܠܰܛܠܳܝ̈ܶܐ: ܘܰܬ̣ܙܽܘܢ ܘܰܕܬ̣ܰܪܣܶܐ ܠܝܰܬܡ̈ܶܐ ܘܠܰܐܪ̈ܡܠܳܬܳܐ: ܘܰܬ̣ܣܰܒܰܥ ܒܛܰܝܒܘ̣ܬܳܟ ܠܡܶܣ̈ܟܺܢܶܐ: ܘܰܬ̣ܫܰܪܬܰܚ ܒܰܡܪܰܚܡܳܢܘ̣ܬܳܟ ܠܥܰܬܝ̣ܪ̈ܶܐ: ܘܰܬ̣ܙܰܕܶܩ ܒܰܚܢܳܢܳܟ ܠܚܰܛܳܝ̈ܶܐ: ܘܰܬ̣ܒܰܣܶܡ ܒܡܰܠܟܘ̣ܬܳܟ ܠܥܰܢܝ̣̈ܕܶܐ ܡܗܰܝܡ̈ܢܶܐ ܘܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܠܳܗܳܐ ܠܚܘ̣ܕܳܐܝ̣ܬ ܕܒܰܬܠܳܬܳܐ ܩܢܘ̣̈ܡܶܐ ܡܶܬܬܰܘܕܶܐ ܣܓܝ̣ܕܳܐܝ̣ܬ: ܗܰܘ̇ ܕܡܰܫܦܰܥ ܪ̈ܰܚܡܰܘܗ̱ܝ ܥܰܠ ܟܽܠܰܢ ܐܰܡܝ̣ܢܳܐܝ̣ܬ: ܗܰܘ̇ ܕܡܶܛܽܠ ܚܰܛܳܝ̈ܶܐ ܐܶܬ̣ܒܰܣܰܪ ܡܕܰܒܪܳܢܳܐܝ̣ܬ: ܐܰܟܡܳܐ ܕܦܘ̣ܡܶܗ ܩܰܕܝ̣ܫܳܐ ܐܰܡ̣ܪ ܫܰܪܝ̣ܪܳܐܝ̣ܬ: ܠܳܐ ܐܶܬܺܝ̇ܬ ܕܶܐܩ̇ܪܶܐ ܠܙܰܕܝ̣̈ܩܶܐ ܠܚܘ̣ܕܳܐܝ̣ܬ: ܐܶܠܳܐ ܠܚܰܛܳܝ̈ܶܐ ܘܠܰܐܝܠܶܝܢ ܕܰܥܒܝ̣ܕܝ̣ܢ ܒܝ̣ܫܳܐܝ̣ܬ: ܗܰܘ̇ ܕܠܶܗ ܡܦܝ̣ܣܝ̣ܢܰܢ ܚܢܝ̣ܓܳܐܝ̣ܬ: ܕܢ̣ܺܐܬܶܐ ܚܢܳܢܶܗ ܠܺܐܝܳܠܰܢ ܡܥܰܕܪܳܢܳܐܝ̣ܬ: ܘܰܬ̣ܣܘ̣ܓܝ̱ ܬܘ̣ܪ̈ܥܳܬܰܢ ܛܰܝܒܘ̣ܬܶܗ ܝܰܨܺܝ̣ܦܳܐܝ̣ܬ: ܘܰܬ̣ܚܰܣܶܐ ܒܰܡܪܰܚܡܳܢܘ̣ܬܶܗ ܚܰܘܒ̈ܳܬܰܢ ܓܡܝ̣ܪܳܐܝ̣ܬ: ܘܢ̇ܶܫܬܘܶܐ ܚܢܰܢ ܘܥܰܢܝ̣̈ܕܰܝܢ ܫܘ̣ܒܚܳܐ ܠܡܶܬܰܠ ܢܰܨܺܝܚܳܐܝ̣ܬ: ܘܬܰܘܕܝ̣ܬܳܐ ܠܡܶܦܪܰܥ ܣܰܓܺܝܳܐܝ̣ܬ: ܘܣܶܓܕܬܳܐ ܠܰܡܩܰܪܳܒܘ̣ ܪܟܝ̣ܢܳܐܝ̣ܬ: ܠܶܗ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ ܫܰܘܝܳܐܝ̣ܬ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢܘ̣ ܐܰܝܟ ܕܫܳܘܶܐ ܡ̇ܨܶܐ̣ ܕܰܢ̣ܫܰܒܰܚ ܠܣܰܓܝܽܐܘ̣ܬ ܪ̈ܰܚܡܶܐ ܕܝ̣ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܐܰܘ ܐܰܝܢܳܐ ܦܘ̣ܡܳܐ ܣܳܦܶܩ ܕܢ̣ܶܫܬܰܥܶܐ ܥܰܠ ܛܰܝܒ̈ܘܳܬܳܟ ܬܟܝ̣̈ܒܳܬܳܐ ܕܰܐܫܦ̣ܰܥܬ ܥܰܠ ܓܶܢܣܰܢ ܚܰܠܳܫܳܐ ܒܝܰܕ ܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ: ܐܶܬ̣ܒܰܪܢܰܫܬ ܐܰܘܟܝ̣ܬ ܒܡܶܐܬܝ̣ܬܳܟ ܡܰܠܝܰܬ݀ ܪ̈ܰܚܡܶܐ ܕܰܠܥܳܠܡܳܐ: ܘܙܰܝܢܳܐ ܕܦܘ̣ܪܩܳܢܳܐ ܨܰܘܡܳܐ ܩܰܕܝ̣ܫܳܐ ܐܰܓܥܶܠ̣ܬ ܠܥܺܕܬܳܟ ܩܰܕܝ̣ܫܬܳܐ: ܟܰܠܬܳܟ ܡܫܰܒܰܚܬܳܐ ܕܬܶܗܘܶܐ ܨܳܝ̇ܡܳܐ ܡ̣ܶܢ ܟܽܠܗܶܝܢ ܪ̈ܓܝܓܳܬܳܐ ܒܶܣܪ̈ܳܢܝܬܳܐ: ܘܡܶܨܛܰܠܒܳܐ ܥܰܡܳܟ ܠܥܳܠܡܳܐ ܗܳܢܳܐ ܘܰܪ̈ܓܝ̣ܓܳܬܳܐ ܕܝ̣ܠܶܗ ܡܰܘܒ̈ܕܳܢܝܳܬܳܐ: ܕܬ̣ܶܦܪܘ̣ܥܝ̱ ܛܰܝܒܘ̣ܬܳܐ ܠܳܟ ܕܡܶܛܠܳܬܳܗܿ ܨܳܡ̣ܬ ܘܶܐܨܛܠܶܒ̣ܬ ܕܬ̣ܶܦܪܩܝ̣ܗܿ ܘܰܬ̣ܚܰܪܪܝ̣ܗܿ ܡ̣ܶܢ ܚܰܫ̈ܶܐ: ܘܚܳܫܳܐ ܥܰܡܳܟ ܐܰܝܟܰܢܳܐ ܕܬ̣ܶܫܬܰܒܰܚܝ̱ ܒܫܘ̣ܒܚܳܟ ܘܬ̣ܶܚܕܶܐ ܒܙܳܟܘ̣ܬܳܟ: ܘܡܶܛܽܠ ܗܳܕܶܐ ܚܢܰܢ ܚܰܛ̈ܳܝܶܐ ܥܰܒ̈ܕܰܝܟ ܘܰܦܪ̈ܝ̣ܩܰܝܟ ܝܰܠ̈ܕܶܝܗܿ ܕܥܺܕܬܳܐ ܩܰܕܝ̣ܫܬܳܐ ܡܶܬܟܰܫܦܝ̣ܢܰܢ ܠܛܰܝܒܘ̣ܬܳܟ ܘܰܠܪ̈ܰܚܡܰܝܟ ܣܰܓ̈ܺܝܶܐܐ: ܫܰܟܶܢ ܠܰܢ ܬܰܪܥܝ̣ܬܳܐ ܫܦܝ̣ܬܳܐ: ܘܪܶܚܡܰܬ݀ ܐܰܠܳܗܳܐ ܘܨܶܒܝܳܢܳܐ ܛܳܒܳܐ: ܕܕܰܟܝܳܐܝ̣ܬ ܘܩܰܕܝܫܳܐܝ̣ܬ ܢ̇ܝܰܩܰܪ: ܠܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܕܰܐܓܘ̣ܢܳܐ ܗܳܢܳܐ ܪܘ̣ܚܳܢܳܝܳܐ ܕܨܰܘܡܳܐ ܩܰܕܝ̣ܫܳܐ ܘܰܒܬܰܟ̈ܫܦܳܬܳܐ ܣܒܝ̣̈ܣܳܬܳܐ: ܘܒܰܨ̈ܠܰܘܳܬܳܐ ܙܡܝ̣̈ܢܳܬܳܐ ܢܶܬܶܐܡ̣ܶܢ: ܒܕܶܡ̈ܥܶܐ ܕܥܰܠ ܨܽܘ̣ܥ̈ܨܳܥܶܐ: ܒܓܘ̣ܪ̈ܓܳܚܶܐ ܕܥܰܠ ܐܰܪܥܳܐ: ܒܰܚܣܝ̣ܠܘ̣ܬܳܐ ܕܡ̣ܶܢ ܟܽܠܗܶܝܢ ܪܓܝ̣̈ܓܳܬܳܐ ܡܰܚܛ̈ܝܳܢܝܳܬܳܐ: ܐܰܝܟܰܢܳܐ ܕܟܰܕ ܥܰܕ ܙܰܒܢܳܐ ܐܝ̣ܬ ܠܰܢ ܕܢ̇ܶܦܠܘ̣ܚ ܛܳܒ̈ܳܬܳܐ: ܢ̇ܶܒܥܶܐ ܥܰܠ ܗܳܠܶܝܢ ܕܰܚ̣ܛܰܝܢܰܢ: ܢ̇ܰܚܶܬ ܕܶܡܥ̈ܶܐ ܥܰܕ ܩܰܠܝ̣ܠ ܦܫܝ̣ܩ ܠܰܢ ܢ̇ܶܡܚܶܐ ܥܰܠ ܠܶܒܰܢ: ܕܢ̇ܶܫܬܰܘܙܰܒ ܡ̣ܶܢ ܚܘ̣ܪܳܩ ܫܶܢ̈ܶܐ ܕܬܰܡܳܢ ܕܢ̇ܰܘܕܶܐ ܒܰܚ̈ܛܳܗܰܝܢ ܩܕܳܡܰܝܟ ܡܳܪܝܳܐ: ܘܡܶܢܳܟ ܢ̇ܶܣܰܒ ܚܘ̣ܣܝܳܐ ܐܰܝܟ ܕܰܘܺܝܕ: ܘܚܰܛ̈ܳܝܶܐ ܕܶܐܙܕܰܕܰܩܘ̱ ܘܡܳܟ݂̈ܣܶܐ ܕܬܳܒܘ̱: ܘܢ̇ܶܣܬܰܟܰܠ ܐܰܝܟ ܗܰܘ̇ ܕܰܡܨܳܪ ܨܝ̣ܪ ܐܰܢ̱ܬ ܩܕܳܡ ܥܰܝ̈ܢܰܝܢ ܟܰܕ ܨܠܝ̣ܒ ܐܰܢ̱ܬ ܡܶܛܽܠ ܚܰܛ̈ܳܝܶܐ ܕܢ̣ܶܬܦܰܪܩܽܘܢ ܘܥܰܠ ܠܘ̣ܚ̈ܶܐ ܕܠܶܒܰܘ̈ܳܬܰܢ ܪܳܫܡܝ̣ܢܰܢ ܠܦܶܬ̈ܓܳܡܶܐ ܩܰܕܝ̈ܫܶܐ: ܕܣܳܡ̣ܬ ܠܡܳܪܝܳܐ ܠܩܘ̣ܒܠܰܢ ܒܟܽܠܙܒܰܢ: ܘܰܒܕܘ̣ܒܳܪ̈ܶܐ ܕܙܰܕܝ̣ܩܘ̣ܬܳܐ ܢ̇ܶܫܦܰܪ ܠܳܟ: ܘܰܢ̇ܝܰܩܪ ܠܰܫܡܳܟ ܣܓܝ̣ܕܳܐ ܘܩܰܕܝ̣ܫܳܐ: ܕܬ̣ܶܗܘܶܐ ܠܰܢ ܡ̣ܶܢ ܝܰܡܝ̣ܢܳܟ ܒܛܝ̣ܠܘ̣ܬܳܟ: ܘܰܬܪܰܚܶܦܝ̱ ܥܠܰܝܢ ܘܗܳܟܰܢܳܐ ܒܥܘ̣ܕܪܳܢܳܟ ܢ̣ܶܦܠܽܘܢ ܡ̣ܶܢ ܚܕܳܪ̈ܰܝܢ ܐܰܠܦ̈ܶܐ ܘܪ̈ܶܒܘܳܬܳܐ ܕܫܰܚܪ̈ܶܐ ܠܙܝ̣̈ܙܶܐ ܕܚܶܫ̈ܘ̣ܟܶܐ ܘܠܳܐ ܢ̣ܶܬܡܨܽܘ̣ܢ ܠܡܰܟܝܳܢܘ̣ܬܰܢ: ܘܰܐܫܘܳܐ ܠܰܢ ܕܰܒ̈ܡܶܠܶܐ ܘܒܰܥ̈ܒܳܕܶܐ ܫܰܦܝ̣ܪ̈ܶܐ: ܘܕܘ̣ܒܳܪ̈ܶܐ ܡܝܰܬܪ̈ܶܐ ܕܠܳܐ ܩܘ̣ܛܳܥܳܐ ܘܢܘ̣ܬܳܦܳܐ: ܢ̇ܪܰܡܪܶܡ ܘܰܢ̇ܫܰܒܰܚ ܘܢ̇ܰܘܕܶܐ ܠܰܫܡܳܟ ܣܓܝ̣ܕܳܐ ܘܩܰܕܝ̣ܫܳܐ ܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܗܰܢܺܝܳܐܝ̣ܬ ܡܳܪܝ̱ ܩܰܒܶܠ ܠܒܶܣ̈ܡܶܐ ܗܳܠܶܝܢ ܕܰܐܥ̣ܛܰܪܢܰܢ ܩܕܳܡܰܝܟ: ܐܰܝܟ ܪܝ̣ܚ ܨܰܘܡܰܝ̈ܗܽܘܢ ܕܟܺܐܢ̈ܶܐ ܩܰܕ̈ܡܳܝܶܐ: ܘܶܐܬܬܢܝ̣ܚ ܒܝܰܕ ܨܠܰܘ̈ܳܬܳܐ ܕܝ̣ܠܰܢ ܡܚܝ̣̈ܠܶܐ: ܐܰܝܟ ܕܶܐܬ̣ܬܢܝ̣ܚܬ ܒܰܨ̈ܠܰܘܳܬܗܽܘܢ: ܘܶܐܬ̣ܪܰܥܳܐ ܒܒܳܥ̈ܘܳܬܰܢ ܐܰܝܟ ܕܶܐܬ̣ܪܰܥܝ̣ܬ ܒܒܳܥ̈ܘܳܬܗܽܘܢ: ܘܚܰܣܳܐ ܚܘܰܒ̈ܰܝܢ ܘܰܚ̈ܛܳܗܰܝܢ ܒܬܰܟ̈ܫܦܳܬܗܽܘܢ: ܘܫܰܝܶܢ ܠܰܐܪܥܳܐ ܒܛܰܝܒܘ̣ܬܳܟ: ܘܢܰܛܰܪ ܠܥܺܕܬܳܟ ܩܰܕܝ̣ܫܬܳܐ ܒܰܡܪܰܚܡܳܢܘ̣ܬܳܟ: ܘܒܰܪܶܟ ܟܠܝ̣ܠܳܐ ܕܫܰܢ̱ܬܳܐ ܒܒܰܣܝ̣ܡܘ̣ܬܳܟ: ܘܰܐܡܠܶܟ ܫܰܝܢܳܟ ܘܰܫܠܳܡܳܟ ܥܰܠ ܟܽܠܰܢ ܒܚܰܝܘ̣ܣܬܳܢܘ̣ܬܳܟ: ܘܰܐܢܝ̣ܚ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܒܡܰܠܟܘ̣ܬܳܟ: ܕܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܚܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀