ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܪܳܡܳܐ ܕܰܒܨܶܒܝܳܢܶܗ ܣ̣ܳܡ ܟܽܠ ܡܶܕܶܡ ܘܶܐܬ̣ܐ ܠܰܙܥܘ̣ܪܘ̣ܬܳܐ ܐܰܝܟ ܕܰܫܦ̣ܰܪ ܠܶܗ: ܚܰܝܠܬܳܢܳܐ ܕܰܛܥܝ̣ܢ ܠܒܶܪ̈ܝܳܬܳܐ ܒܚܰܝܠܬܳܢܘ̣ܬܶܗ: ܘܶܐܬ̣ܥܰܛܰܦ ܕܡܘ̣ܬܳܐ ܐ̱ܢܳܫܳܝܬܳܐ ܒܰܡܪܰܚܡܳܢܘ̣ܬܶܗ: ܡܥܰܠܝܳܐ ܕܰܡܥܰܠܰܝ ܡ̣ܶܢ ܟܽܠ ܪܰܒܘ̣ܬܳܐ ܒܒܰܣܝ̣ܡܘ̣ܬܶܗ: ܙܳܝܘ̣ܢܳܐ ܘܰܡܬܰܪܣܝܳܢܳܐ ܘܰܡܣܰܒܥܳܢܳܐ ܕܒܶܪ̈ܝܳܬܶܗ: ܕܰܠܒ̣ܰܟ ܨܰܘܡܳܐ ܐܰܝܟ ܣܢܝ̣ܩܳܐ ܘܶܐܬ̣ܒܰܣܰܡ ܒܶܗ ܩܰܒܶܠ ܡܳܪܝ̱ ܒܛܰܝܒܘ̣ܬܳܟ ܨܰܘܡܰܢ ܘܰܫܡܰܥ ܨܠܰܘ̈ܳܬܰܢ: ܘܩܰܒܶܠ ܬܰܟܫ̈ܦܳܬܰܢ ܘܶܐܬܬܢܝ̣ܚ ܒܬܶܫ̈ܡܫܳܬܰܢ: ܘܦܰܢܳܐ ܫܶܐܠ̈ܳܬܰܢ: ܘܩܰܕܶܫ ܬܰܪ̈ܥܝܳܬܰܢ ܘܫܰܪܬܰܚ ܛܳܒ̈ܳܬܰܢ ܘܰܐܣܓܳܐ ܚܰܕ̈ܘܳܬܰܢ: ܘܨܰܒܶܬ ܠܟܰܣ̈ܝܳܬܰܢ: ܘܛܰܟܶܣ ܠܓܰܠ̈ܝܳܬܰܢ: ܘܚܰܣܳܐ ܚܰܘ̈ܒܳܬܰܢ ܘܰܕܥܰܢܝ̣̈ܕܰܝܢ ܕܰܢ̇ܫܰܒܚܳܟ ܐܰܡܝ̣ܢܳܐܝ̣ܬ: ܘܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܳܪܳܐ ܛܳܒܳܐ ܘܢܰܓܝ̣ܪ ܪܘ̣ܚܳܐ: ܕܚܳܐܰܪ ܠܚܰܛܳܝ̈ܶܐ ܕܢ̣ܶܬܦܢܽܘܢ ܠܘܳܬܶܗ: ܘܰܡܣܰܟܶܐ ܠܬܰܝܳܒ̈ܶܐ ܕܢܳܩ̇ܫܝ̣ܢ ܒܬܰܪܥܶܗ: ܠܗܰܘ̇ ܡܪܰܚܡܳܢܳܐ ܕܨܳܒܶܐ ܒܪ̈ܰܚܝ̣ܩܶܐ ܕܢ̣ܶܬܩܰܪܒܽܘܢ ܠܘܰܥܕܶܗ: ܘܪܳܚܶܡ ܠܰܐܒܝ̣̈ܕܶܐ ܕܢ̣ܶܫܬܰܟܚܽܘܢ ܒܰܛܝܳܪܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܶܬܟܰܫܦܝ̣ܢܰܢ ܠܳܟ ܡܫܝ̣ܚܳܐ ܦܳܪܘ̣ܩܰܢ: ܘܰܡܦܝ̣ܣܝ̣ܢܰܢ ܠܚܘ̣ܒܳܐ ܪܰܒܳܐ ܕܰܐܠܳܗܘ̣ܬܳܟ ܕܰܬ̣ܚܘ̣ܪ ܒܪ̈ܰܚܡܶܐ ܒܟܽܠܶܗ ܥܰܡܳܐ ܘܝܳܪܬܘ̣ܬܳܐ ܕܝ̣ܠܳܟ: ܦܪܝ̣ܩܰܬ݀ ܒܰܨܠܝ̣ܒܳܐ ܕܝ̣ܠܳܟ ܪܰܒܳܐ ܘܦܳܪܘ̣ܩܳܝܳܐ: ܐܝ̣ܢ ܡܳܪܝܳܐ ܦܳܪܘ̣ܩܳܐ ܕܓܶܢܣܳܐ ܕܝ̣ܠܰܢ ܡܚܝ̣ܠܳܐ: ܘܶܐܬܪܰܚܡ ܥܰܠ ܐܰܪܥܳܐ ܘܥܰܠ ܥܳܡܘ̣ܪ̈ܶܝܗܿ ܗܘܝ̣ ܢܳܛܘ̣ܪܳܐ ܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ: ܟܰܕ ܡܬܰܪܶܨ ܐܰܢ̱ܬ ܒܛܰܝܒܘ̣ܬܳܟ ܠܗܳܢܽܘܢ ܕܰܐܫܘܝ̣ܬ ܐܶܢܽܘܢ ܕܢ̣ܶܗܘܽܘܢ ܡܕܰܒܪ̈ܳܢܶܐ ܕܝ̣ܠܳܗܿ ܘܰܒܗܰܝܡܳܢܘ̣ܬܳܐ ܕܠܳܐ ܡܶܨܛܰܠܝܳܐ ܡ̣ܶܢ ܫܪܳܪܳܐ: ܗܳܝ ܕܰܒܝܰܕ ܫܠܝ̣̈ܚܰܝܟ ܩܰܕܝ̣̈ܫܶܐ ܐܰܫܠܶܡ̣ܬ ܠܳܗܿ: ܘܰܒܚܶܟܡܬܳܐ ܘܒܝ̣ܕܰܥܬܳܐ ܢ̣ܦܰܪܢܣܢܽܘܢܗܿ ܐܰܝܟ ܨܶܒܝܳܢܳܐ ܕܝ̣ܠܳܟ: ܢܶܪܥܽܘܢ ܠܥܶܪ̈ܒܶܐ ܕܝ̣ܠܳܟ ܒܝܰܨܺܝ̣ܦܘ̣ܬܳܐ ܪܰܒܬܳܐ ܗܳܝ ܕܪܰܚܝ̣ܩܳܐ ܡ̣ܶܢ ܡܰܗܡܝܳܢܘ̣ܬܳܐ: ܐܶܬܕܰܟܰܪ ܡܳܪܝܳܐ ܠܪ̈ܳܥܰܘܳܬܳܐ ܫܰܪ̈ܝ̣ܪܶܐ: ܘܩܳܝ̈ܘ̣ܡܶܐ ܕܬܰܪܶܨܘ̱ ܘܗܰܕܝ̣ܘ ܠܥܳܢ̈ܳܐ ܕܝ̣ܠܳܟ ܡܠܝ̣ܠܬܳܐ ܠܘܳܬ ܕܘ̣ܓ̈ܡܰܐܛܰܐ ܕܝܘ̣ܠ̈ܦܳܢܶܐ ܐܶܘܰܢ̈ܓܶܠܳܝܶܐ: ܠܩܰܫܝ̣̈ܫܶܐ ܘܰܡܫܰܡ̈ܫܳܢܶܐ: ܘܰܠܟܽܠܶܗ ܬܶܓܡܳܐ ܥܺܕܬܳܢܳܝܳܐ: ܠܥܘ̣ܡܪ̈ܶܐ ܩܰܕܝ̣̈ܫܳܐ ܕܕܰܝܪ̈ܳܝܶܐ ܕܰܒܟܽܠܳܗܿ ܬܺܒܶܝܠ: ܥܰܡ ܥܺܕܬܳܐ ܕܝ̣ܠܳܟ ܬܪܝ̣ܨܰܬ݀ ܫܘ̣ܒܚܳܐ ܘܰܫܠܝ̣ܚܳܝܬܳܐ ܕܰܒܟܽܠ ܐܰܬܰܪ ܒܫܰܝܢܳܐ ܘܰܐܘܝܘ̣ܬܳܐ ܢܰܛܰܪ ܒܚܰܝܠܳܟ ܠܳܐ ܡܰܬܚܰܣܢܳܢܳܐ: ܘܰܠܗܳܢܽܘܢ ܕܰܙܩܝ̣ܦܝ̣ܢ ܠܥܳܠܡܳܐ ܘܠܰܪ̈ܓܝ̣ܓܳܬܶܗ: ܘܠܝ̣ܚܝ̈ܕܳܝܶܐ ܘܥܳܢ̈ܘܳܝܶܐ: ܠܰܒ̈ܬܘ̣ܠܶܐ ܘܰܠ̈ܨܰܝܳܡܶܐ ܡܶܬ̈ܦܰܛܡܰܝ ܒܪ̈ܘ̣ܚܳܢܝܳܬܳܐ ܠܕܰܝܪ̈ܳܝܶܐ ܢܰܟ̈ܦܶܐ: ܘܰܠܡܰܟܝ̣̈ܟܶܐ ܘܢܝ̣ܚ̈ܶܐ ܘܒܰܣܝ̈ܡܶܐ: ܘܠܰܐܝܠܶܝܢ ܕܥܰܠ ܐܶܣܛ̈ܘ̣ܢܶܐ ܘܰܒܒܶܝܬ ܚܒܘ̣ܫ̈ܝܶܐ: ܘܠܰܡܪ̈ܰܚܡܳܢܶܐ ܕܒܰܐܠܳܗܘ̣ܬܳܟ ܡܶܬܕܰܡܶܝܢ: ܘܠܰܐܝܠܶܝܢ ܕܒܰܐܟܣܶܢܝܳܐ ܡܶܛܠ ܫܡܳܟ ܡܶܬܛܰܪܦܝ̣ܢ: ܘܢܰܦܫܗܽܘܢ ܣ̣ܰܪܶܩܘ̱ ܐܰܝܟܰܢܳܐ ܕܠܳܟ ܢ̣ܶܩܢܽܘܢ: ܠܡܰܠ̈ܟܶܐ ܘܕܰܝܳܢ̈ܶܐ ܘܪ̈ܝ̣ܫܳܢܶܐ ܐܰܥܒܶܕ ܕܒܰܣܝ̣ܡܳܐܝ̣ܬ ܘܢܝ̣ܚܳܐܝ̣ܬ ܘܰܒܗܳܠܶܝܢ ܕܫܳܦܪ̈ܳܢ ܠܰܡܪܰܚܡܳܢܘ̣ܬܳܟ ܢ̣ܕܰܒܪܘ̣ܢ: ܠܡܶܣ̈ܟܢܶܐ ܙܽܘܢ ܒܛܰܝܒܘ̣ܬܳܟ ܡ̣ܶܢ ܡܰܘܗܰܒܬܳܟ ܫܦܝ̣ܥܬܳܐ: ܘܰܡܠܝ̣ܠܬܐ: ܠܰܐܠܝ̣̈ܨܶܐ ܐܰܪܘܰܚ ܡ̣ܶܢ ܐܘ̣ܠ̈ܨܳܢܰܝܗܽܘܢ: ܠܰܟܪ̈ܝ̣ܗܶܐ ܗܰܒ ܥܘ̣ܕܪܳܢܳܐ ܘܳܐܣܝܘ̣ܬܳܐ ܘܢܰܦܺܐܫܳܐ: ܠܝܰܬ̈ܡܶܐ ܘܠܰܐܪ̈ܡܠܳܬܳܐ ܗܘܺܝ ܝܳܨܽܘ̣ܦܳܐ ܘܰܡܠܰܒܒܳܢܳܐ: ܘܰܠܗܳܢܽܘܢ ܕܰܒܝܰܡ̱̈ܡܶܐ ܪܳܕܶܝܢ ܗܘܺܝ̣ ܣܰܒܪܳܐ ܘܬܘ̣ܟܠܳܢܳܐ ܘܠܰܐܝܠܶܝܢ ܕܚܳܙܩܝ̣ܢ ܒܐܘ̣ܪ̈ܚܳܬܳܐ ܥܰܣ̈ܩܳܬܳܐ ܗܘܺܝ̣ ܠܗܽܘܢ ܡܢܰܛܪܳܢܳܐ ܘܰܡܦܰܢܝܳܢܳܐ ܠܥܘ̣ܡܪ̈ܰܝܗܽܘܢ: ܐܰܢ̱ܬ ܡܳܪܝܳܐ ܩܳܝܘ̣ܡܳܐ ܕܒܶܪ̈ܝܳܬܳܐ ܩܘ̣ܡ ܠܗܽܘܢ ܘܦܰܨܳܐ ܐܶܢܽܘܢ ܡ̣ܶܢ ܟܽܠܗܽܘܢ ܒܥܶܠܕ̈ܒܳܒܶܐ ܟܣܰܝ̈ܳܐ ܘܰܓܠܰܝ̈ܳܐ: ܘܠܰܐܝܠܶܝܢ ܕܫ̣ܶܐܠܘ̱ ܨܠܰܘ̈ܳܬܳܐ ܕܩܰܕܝ̣̈ܫܶܐ ܘܰܨܠ̈ܰܘܳܬܳܐ ܕܰܡܚܝܠܘ̣ܬܰܢ: ܘܶܐܫ̣ܬܰܘܬܰܦܘ̱ ܒܰܣܢܝܩܘ̣ܬܳܐ ܕܡܶܣ̈ܟܺܢܶܐ: ܫܰܟܶܢ ܠܗܽܘܢ ܫܶܐܠ̈ܳܬܗܽܘܢ ܟܺܐܢ̈ܳܬܳܐ: ܘܠܰܐܝܠܶܝܢ ܕܫܰܢܝ̣ܘ ܡ̣ܶܢ ܥܳܠܡܳܐ ܗܳܢܳܐ ܠܘܳܬܳܟ ܒܣܰܒܪܳܐ ܘܬܘ̣ܟܠܳܢܳܐ ܕܰܩܝܳܡܬܳܐ: ܐܰܢܝ̣ܚ ܐܶܢܽܘܢ ܒܛܰܝܒܘ̣ܬܳܟ: ܒܰܐܘ̈ܘܳܢܶܐ ܕܩܰܕܝ̈ܫܰܟ ܝ̣ܕܝ̣ܥܳܐܝ̣ܬ ܠܰܐܒ̈ܳܗܰܝܢ ܪ̈ܘ̣ܚܳܢܳܝܶܐ ܘܦܰܓܪ̈ܳܢܳܝܶܐ: ܕܡ̣ܶܢ ܥܳܠܡܳܐ ܗܳܢܳܐ ܦ̣ܛܰܪܘ̱: ܘܰܐܫܘܳܐ ܡܳܪܝ̱ ܒܪ̈ܰܚܡܰܝܟ ܕܡ̣ܶܢ ܥܳܠܡܳܐ ܟܽܠܶܗ: ܘܡ̣ܶܢ ܥܺܕ̈ܳܬܳܐ ܘܕܰܝܪ̈ܳܬܳܐ ܘܡ̣ܶܢ ܓܳܙܪ̈ܳܬܳܐ: ܘܡ̣ܶܢ ܝܰܡ̱̈ܡܶܐ ܘܡ̣ܶܢ ܛܘ̣ܪ̈ܶܐ: ܘܡ̣ܶܢ ܦܰܩ̈ܥܳܬܳܐ: ܘܡ̣ܶܢ ܚܘ̣ܪ̈ܒܶܐ: ܘܡ̣ܶܢ ܫܰܝܢܳܐ ܘܡ̣ܶܢ ܢܰܦ̈ܫܳܬܳܐ ܘܪ̈ܘ̣ܚܳܬܳܐ: ܘܡ̣ܶܢ ܦܰܓܪ̈ܶܐ ܘܡ̣ܶܢ ܗܰܘ̈ܢܶܐ: ܘܡ̣ܶܢ ܠܶܫ̈ܳܢܶܐ ܘܣܶܦ̈ܘܳܬܳܐ: ܘܡ̣ܶܢ ܚܘ̣ܫ̈ܳܒܶܐ ܘܡ̣ܶܢ ܙܰܘ̈ܥܶܐ: ܘܡ̣ܶܢ ܙܰܕܝ̣̈ܩܶܐ ܘܡ̣ܶܢ ܚܰܛ̈ܳܝܶܐ: ܘܡ̣ܶܢ ܟܽܠܳܗܿ ܥܳܡܰܪܬܳܐ: ܘܡ̣ܶܢ ܟܽܠܳܗܿ ܥܺܕܬܳܐ ܐܰܡܬܳܐ ܕܝ̣ܠܳܟ: ܬܶܫܒܘ̣ܚܬܳܐ ܒܟܽܠܥܶܕܳܢ ܬ̣ܶܣܰܩܝ̱ ܠܳܟ: ܘܠܰܐܒܘ̣ܟ ܕܫܰܠ̣ܚܳܟ ܠܦܘ̣ܪܩܳܢܰܢ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܡܝ̣ܢܳܐܝ̣ܬ ܢ̇ܩܰܪܶܒ ܠܡܳܪܘ̣ܬܳܟ ܦܝ̣ܪܡܳܐ ܡܶܬܩܰܒܠܳܢܳܐ ܕܰܨ̈ܠܰܘܳܬܳܐ ܕܰܟ̈ܝܳܬܳܐ ܘܢ̇ܰܥܛܰܪ ܩܕܳܡ ܪܰܒܘ̣ܬܳܟ ܪܝ̣ܚܳܐ ܒܰܣܝ̣ܡܳܐ ܕܨܰܘܡܳܐ ܩܰܕܝ̣ܫܳܐ: ܘܢ̇ܰܣܶܩ ܠܐܝ̣ܩܳܪܳܟ ܦܺܐܪ̈ܶܐ ܕܰܥ̈ܒܳܕܶܐ ܡܝܰܬܪ̈ܶܐ: ܘܰܢ̇ܕܰܒܰܚ ܠܐܝ̣ܬܘ̣ܬܳܟ ܬܰܘܕ̈ܝܳܬܳܐ ܦܰܐܝ̈ܳܬܳܐ ܪܘ̣ܡܪ̈ܳܡܳܐ ܚܠ̈ܰܝܳܐ ܘܗܰܢܺܝ̈ܶܐܐ: ܘܢ̇ܶܣܰܒ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܠܥܳܠܰܡ ܥܳܠܡܝ̣ܢ܀