ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܕܶܒܚܳܐ ܡܚܰܣܝܳܢܳܐ ܘܩܽܘܪܒܳܢܳܐ ܡܩܰܒܠܐܴ: ܕܰܚܕܳܐ ܙܒܰܢ ܩܰܪܶܒ ܢܰܦܫܶܗ ܚܠܳܦܰܝܢ ܠܐܱܒܽܘܗ̱ܝ ܓܢܺܝܙܳܐ: ܠܗܰܘ ܚܰܝܳܐ ܘܡܰܚܝܳܢܳܐ ܕܰܢܚ̣ܶܬ ܗ̱ܘܳܐ ܠܰܫܝܽܘܠ ܕܰܩܒܺܝܪ̈ܶܐ ܘܪܰܣܶܣ ܢܽܘܚܳܡܳܐ ܠܰܫܟܺܝ̣̈ܒܶܐ: ܠܗܰܘ ܕܶܐܡ̣ܰܪ ܠܬܰܠܡܺܝ̈ܕܶܐ ܕܺܝܠܶܗ ܕܙܶܠܽܘܢ ܠܰܓܠܺܝܠܐܴ ܘܬܰܡܳܢ ܩܳܕܶܡ ܐ̱ܢܳܐ ܠܟܽܘܢ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܕܰܐܕܢܰܚ ܒܓܰܘ ܬܺܐܒܶܝܠ ܙܰܠܺܝ̈ܩܰܘܗ̱ܝ: ܘܦܰܪܣܺܝ ܗ̱ܘܳܐ ܠܟܽܠܗܽܘܢ ܕܶܚ̈ܠܳܬܳܐ ܣܪ̈ܺܝܩܳܬܳܐ: ܨܶܡܚܳܐ ܡܰܢܗܪܳܢܳܐ ܕܚܶܫܽܘ̈ܟܶܐ ܕܰܨܡ̣ܰܚ ܡܶܢ ܐܰܒܳܐ ܩܕܳܡ ܙܰܒ̈ܢܶܐ: ܘܶܐܬܺܝܠܶܕ ܡܶܢ ܡܰܪܝܰܡ ܒܚܰܪܰܬ݀ ܙܰܒ̈ܢܶܐ: ܘܰܒܙܰܗܪܺܝܪ̈ܰܘܗ̱ܝ ܕܢܺܝ̣̈ܚܶܐ ܪܕܰܦ ܠܛܶܠܳܠܐܴ ܕܛܳܥܝܽܘܬܳܐ ܡܶܢ ܐܰܦܶܝ̈ܗ̇ ܕܟܽܠܳܗ̇ ܒܪܺܝܬܳܐ ܘܠܐܴ ܐܶܬܒܰܝܢܰܬ݀ ܒܶܗ: ܓܰܢ̱ܒܳܪܳܐ ܕܰܢܚ̣ܶܬ ܠܗܳܡܳܢ ܕܰܩܒܺܝܪ̈ܶܐ ܘܰܣܥ̣ܰܪ ܐܶܢܽܘܢ ܒܬܰܚܬܳܝ̈ܳܬܳܗ̇ ܘܪܰܣ ܥܰܠ ܢܰܦ̈ܫܳܬܗܽܘܢ ܛܰܠܐܴ ܡܦܰܝܓܳܢܳܐ ܘܰܐܚܺܝ ܐܶܢܶܝܢ: ܪܰܥܡܳܐ ܕܩ̈ܳܠܐܷ ܘܡܰܚܝܳܢܳܐ ܕܥܰܢܺܝ̈ܕܶܐ ܢܰܚܶܡ ܗ̣ܽܘ ܠܶܗ ܠܝܰܘܡܳܐ ܬܠܺܝܬܳܝܳܐ: ܘܰܫ̣ܪܳܐ ܫܽܘܠܛܳܢܶܗ ܕܒܺܝܫܳܐ ܡܳܪܽܘܕܳܐ: ܘܰܐܥܕܺܝ ܠܰܫܒܺܝܬܳܐ ܡܶܢ ܐܺܝܕܰܘ̈ܗ̱ܝ ܚܰܣܺܝ̈ܢܳܬܳܐ: ܬܰܩܺܝܦܳܐ ܕܣܰܪܶܩ ܠܰܫܝܽܘܠ ܕܳܘܺܝܬܳܐ: ܘܚܰܠܶܨ ܠܓܰܙ̈ܶܝܗ̇ ܥܰܫܺܝ̈ܢܶܐ: ܘܰܡܠ̣ܰܟ ܚܰܝ̈ܶܐ ܘܢܽܘܚܳܡܳܐ ܠܓܶܢܣܳܐ ܕܐ̱ܢܳܫܽܘܬܰܢ: ܥܰܙܺܝܙܳܐ ܕܰܐܪܗܶܒ ܐܶܢܽܘܢ ܠܰܟܝ̈ܳܢܶܐ ܫܰܬܺܝ̈ܩܶܐ ܥܰܠ ܬܶܫܒܽܘܚܬܶܗ: ܘܩܳܡ̣ܘ̱ ܡܺܝ̈ܬܶܐ ܘܰܦ̣ܪܰܥܘ̱ ܠܶܗ ܬܰܘܕܺܝܬܳܐ ܠܐܴ ܡܳܝܽܘܬܳܐ ܐܰܠܳܗܳܐ ܕܡܺܝܬ ܒܰܒܣܰܪ ܘܩܳܡ ܒܫܽܘܒܚܳܐ ܕܠܐܴ ܚܒܳܠܐܴ: ܘܰܐܚܺܝ ܠܓܶܢܣܳܐ ܕܺܝܠܰܢ ܡܳܝܽܘܬܳܐ: ܦܳܪܩܳܐ ܪܰܒܳܐ ܡܳܪܝܳܐ ܡܫܺܝܚܳܐ ܚܶܣܢܳܐ ܠܐܴ ܡܶܬܚܰܣܢܳܢܳܐ ܕܰܚܣܰܢ ܗ̱ܘܳܐ ܠܰܡܕܺܝܢ̱ܬܶܗ ܡܥܰܕܰܢܬܳܐ ܕܡܰܘܬܳܐ ܛܪܽܘܢܳܐ: ܘܰܐܩܺܝܡ ܠܐܴܕܳܡ ܘܰܠܝܰܠܕ̈ܰܘܗ̱ܝ ܡܶܢ ܬܚܶܝܬ ܐܺܝ̈ܕܰܘܗ̱ܝ ܕܒܺܝܫܳܐ ܡܳܪܽܘܕܳܐ ܘܠܐܴ ܡܶܬܚܰܣܢܳܢܳܐ: ܚܰܟܺܝܡܳܐ ܕܚܶܟܡܬܶܗ ܐܰܥܶܠܬܶܗ ܠܓܰܘ ܩܰܒܪܳܐ ܘܡܽܘܟܳܟܶܗ ܐܰܚܬܶܗ ܕܢܶܬܒܰܣܰܪ ܘܢܶܬܺܝܠܶܕ ܘܢܶܬܬܫܺܝܛ ܡܶܢ ܥܰܒ̣ܕ̈ܶܐ ܒܺܝ̈ܫܶܐ ܐܰܝܟ ܕܣܰܝܒܰܪ ܨܶܒܝܳܢܶܗ: ܠܳܟ ܐܰܠܳܗܳܐ ܡܶܠܬܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܥܰܩܒܳܢܳܐ ܕܗܳܠܶܝܢ ܟܽܠܗܶܝܢ ܡܳܟ̈ܳܬܳܐ ܘܐ̱ܢܳܫܳܝ̈ܳܬܳܐ ܣܒ̣ܰܠܬ ܘܣܰܝܒ̣ܰܪܬ ܡܶܛܽܠ ܦܽܘܪܩܳܢܶܗ ܕܓܶܢܣܰܢ ܚܰܠܳܫܳܐ: ܠܳܟ ܡܶܬܟܰܫܦܺܝܢܰܢ ܒܥܶܕܳܢܳܐ ܗܳܢܳܐ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ: ܕܰܬܪܰܚܶܡ ܥܰܠ ܟܽܠܰܢ ܚܰܛܳܝ̈ܶܐ ܥܰܒ̣ܕ̈ܶܐ ܕܺܝܠܳܟ: ܘܬܶܬܶܠ ܠܰܢ ܚܰܝܠܐܴ ܘܥܽܘܕܪܳܢܳܐ ܥܰܠ ܟܽܠܗܶܝܢ ܨܶܢܥ̈ܳܬܶܗ ܡܰܘܒܕܳܢ̈ܝܳܬܳܐ ܕܳܐܟܶܠܩܰܪܨܳܐ: ܘܰܩܪܺܝ ܘܩܰܪܶܒ ܠܰܢ ܠܘܳܬܳܟ: ܘܰܥܶܕ ܠܰܢ ܠܰܓܢܽܘܢܳܟ ܘܠܰܣܡܳܟܳܟ: ܙܰܡܶܢ ܠܰܢ ܠܰܚܠܽܘܠܐܴ ܕܢܰܨܺܝ̈ܚܰܝܟ ܚܰܕܶܬ ܘܚܰܝܶܕ ܠܰܢ ܠܚܰܕܽܘܬܳܐ ܕܰܩܪ̈ܰܝܝܟ: ܘܛܰܪ ܒܰܢ ܪܰܗܒܽܘܢܳܐ ܕܐ̱ܪ̈ܳܙܰܝܟ: ܙܰܡܶܢ ܠܰܢ ܠܫܳܪܽܘܬܳܐ ܕܰܓܒܰܝ̈ܟ: ܣܰܬܶܬ ܒܰܢ ܫܪܳܪܳܐ ܕܡܽܘܠܟܳܢܰܝ̈ܟ: ܥܰܠܐܴ ܠܰܢ ܠܰܡܪܰܘܡܳܐ ܕܰܫܡܰܝ̈ܟ ܘܪܰܚܰܝ ܡܶܢܰܢ ܠܗܶܪܬܳܐ ܕܣܳܢ̈ܰܐܝܟ ܫܺܐܕ̈ܶܐ ܒܺܝ̈ܫܶܐ ܕܡܰܩܪܒܺܝܢ ܥܰܡܰܢ: ܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܪ̈ܰܚܡܰܝܟ: ܘܚܰܣܳܐ ܠܰܢ ܒܽܘܨܳܪ̈ܰܝܢ ܒܚܰܘ̈ܣܳܢܰܝܟ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ: ܘܰܦ̣ܛܰܪܘ̱ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀