ܨܠܽܘܬܳܐ ܕܫܽܘܪܳܝܳܐ

ܡܫܺܝܚܳܐ ܐܰܠܳܗܳܐ ܕܩܳܡ ܡܶܢ ܩܰܒܪܳܐ ܒܚܰܝܠܐܴ ܕܙܳܟܽܘܬܳܐ ܘܚܰܕܺܝ ܒܥܺܐܕܳܐ ܕܰܩܝܳܡܬܶܗ ܠܢܶܫ̈ܶܐ ܢܰܟ̈ܦܳܬܳܐ: ܘܰܠܓܽܘܕܳܐ ܕܰܫܠܺܝܚܽܘܬܳܐ ܘܪܰܥܺܝ ܠܐܱܒܽܘܗ̱ܝ ܕܥܰܠ ܐ̱ܢܳܫܽܘܬܰܢ ܪܓܺܝܙ ܗ̱ܘܳܐ ܘܐܰܠܶܦ ܠܰܢ ܕܰܒܟܽܠܙܒܰܢ ܢܩܰܪܶܒ ܠܶܗ ܨܠܰܘ̈ܳܬܳܐ ܘܢܶܫܒܽܘܩ ܠܐܱܚܰܝ̈ܢ: ܢܶܬܒܥܺܝܘܗ̱ܝ ܫܽܘܒܩܳܢܳܐ ܕܟܽܠܗܶܝܢ ܫܽܘܪ̈ܥܳܬܰܢ ܕܢܶܫܟܰܚ ܪ̈ܰܚܡܶܐ ܒܝܽܘܡ ܕܺܝܢܳܐ ܡܳܐ ܕܡܶܬܓܰܠܝ̈ܳܢ ܟܰܣ̈ܝܳܬܳܐ ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ ܐܰܡܺܝܢܬܳܐ ܕܠܐܴ ܫܶܠܝܳܐ ܘܬܰܘܕܺܝܬܳܐ ܕܟܺܝܬܳܐ ܕܠܐܴ ܡܰܘܦܝܳܐ: ܘܗܶܕܪܳܐ ܠܐܴ ܡܟܰܬܡܳܐ ܘܩܽܘܠܳܣܳܐ ܠܐܴ ܡܕܰܪܡܳܐ ܢܶܫܬܘܶܐ ܕܢܰܣܶܩ ܒܩܳܠܐܴ ܕܠܐܴ ܫܳܬܶܩ: ܠܐܱܒܳܐ ܡܪܰܚܡܳܢܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ: ܘܠܰܒܪܳܐ ܚܰܢܳܢܳܐ ܕܶܐܨܛܠܶܒ ܡܶܛܽܠܳܬܰܢ: ܘܰܠܪܽܘܚܳܐ ܚܰܝܽܘܣܬܳܢܳܐ ܕܫܰܡܠܺܝ ܘܰܓܡ̣ܰܪ ܚܽܘܣܳܝܰܢ: ܐܰܒܳܐ ܓܢܺܝܙܳܐ ܕܠܐܴ ܡܶܫܬܰܚܠܰܦ ܘܰܒܪܳܐ ܐܝ̣ܬܝܳܝܳܐ ܕܠܐܴ ܡܶܬܥܰܩܰܒ: ܘܪܽܘܚܳܐ ܕܠܐܴ ܡܶܬܬܰܪܓܰܡ: ܐܰܒܳܐ ܕܠܐܴ ܝܺܠܺܝܕ ܘܰܐܘܠܶܕ ܘܰܒܪܳܐ ܕܺܝܠܺܝܕ ܘܠܐܴ ܐܰܘܠܶܕ: ܘܪܽܘܚܳܐ ܩܰܕܺܝܫܳܐ ܕܢܳܦܶܩ ܡܶܢ ܐܰܒܳܐ ܘܢܳܣܶܒ ܡܶܢ ܒܪܳܐ: ܘܠܐܴ ܝܺܠܺܝܕ ܘܠܐܴ ܐܰܘܠܶܕ: ܚܰܕ ܟܝܳܢܳܐ ܚܰܕ ܫܽܘܠܛܳܢܳܐ ܚܰܕ ܐܽܘܚܕܳܢܳܐ: ܚܰܕ ܚܰܝܠܐܴ: ܚܰܕ ܐܺܝܩܳܪܳܐ: ܚܰܕ ܨܶܒܝܳܢܳܐ: ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ܀

ܣܶܕܪܳܐ ܡܰܢܛܺܝܩܳܝܳܐ

ܡܫܺܝܚܳܐ(ܐܰܠܳܗܳܐ) ܐܳܬܶܐܘܳܣ (ܫܶܡܫܳܐ) ܗܶܠܝܳܘܣ ܪܰܒܳܐ ܕܙܰܕܺܝܩܽܘܬܳܐ ܕܰܠܥܶܠ ܡܶܢ ܟܽܠܳܗ̇ ܥܒܺܝܛܽܘܬܳܐ ܕܚܶܟܡܬܳܐ ܕܚܰܟܺܝ̈ܡܶܐ ܘܣܰܟܽܘܠܬܳܢܽܘܬܳܐ ܕܣܰܟܽܘܠܬܳܢ̈ܶܐ ܐܝ̣ܬܝܗ̇ ܡܕܰܒܪܳܢܽܘܬܳܟ ܦܰܐܝܰܬ݀ ܠܐܱܠܳܗܳܐ ܬܳܚܒܺܝܢ ܓܶܝܪ ܡܶܢܳܗ̇ ܡܽܘܫ̈ܚܳܬܳܐ ܓܪ̈ܰܡܰܐܛܺܝܩܳܝܳܬܳܐ ܘܥܳܡܶܛ ܡܶܢܳܗ̇ ܗܰܘܢܳܐ ܘܡܰܕܥܳܐ ܕܫܰܦܺܝܪܽܘܬ ܐܰܪܡܽܘܢܺܝܰܐ (ܩܝ̣̈ܢܳܬܳܐ) ܘܪܽܘܪܳܒ ܡ̈ܶܠܐܷ ܪܽܘܛܽܘܪ̈ܺܝܩܳܝܳܬܳܐ (ܕܡܰܡܠ̱ܠܳܐ ܣܩܝ̣ܠܳܐ) ܘܡܶܬܡܰܚܠܺܝܢ ܡܶܢܳܗ̇ ܬܰܫܥܝ̈ܳܬܳܐ ܕܐܰܣܛܪܽܘܠܽܘܓܽܘ ܕܶܐܣܛܪܽܘܢܽܘܡܽܘ (ܝܰܕܥ̈ܳܬܳܐ ܕܡܠ̈ܘܳܫܶܐ ܘܰܕܟܰܘܟ̈ܒܶܐ) ܗܳܠܶܝܢ ܕܰܩܢܶܝܢ ܝܺܕܰܥܬܳܐ ܠܘܳܬ ܩܒܺܝܥܽܘܬܳܐ: ܘܡܰܘܙܰܠܬܳܐ ܕܡܶܬܬܙܺܝܥܳܢܽܘܬܳܐ ܗܳܕܶܐ ܩܺܝܩܠܽܘܣܳܝܬܳܐ (ܚܘ̣ܕܪܳܢܳܝܬܳܐ) ܘܠܐܴܝܶܢ ܡܶܢܳܗ̇ ܟܽܠܗܽܘܢ ܣܽܘܦܺܝ̈ܣܛܶܐ (ܡܰܛܥܝܳܢܘ̣ܬܳܐ ܒܬܚܘ̈ܝܳܬܳܐ ܠܳܐ ܬܪ̈ܝ̣ܨܳܬܳܐ) ܗܳܢܽܘܢ ܕܰܪܗܺܝܛܪܽܘܬܳܐ (ܐܘ̣ܡܳܢܘ̣ܬ ܡܰܡܠ̱ܠܳܐ) ܣܰܓܺܝܐܬܳܐ ܘܰܣܩܺܝܠܽܘܬ ܡܰܡܠ̱ܠܐܴ ܡܰܫܦܠܝ̣ܢ ܘܰܪܦܶܝܢ: ܟܰܕ ܠܗܰܠ ܡܶܢܳܗ̇ ܠܪܽܘܚܩܳܐ ܣܝ̣ܡܺܝ̣ܢ ܚܽܘܫ̈ܳܒܶܐ ܕܰܐܝܠܶܝܢ ܕܰܒܡܽܘܣܺܝܩܪܳܝܽܘܬܳܐ ܡܶܨܛܰܢܥܺܝܢ ܘܡܶܬܚܰܫܒܺܝܢ: ܘܰܟܪܶܝܢ ܡܶܢܳܗ̇ ܠܶܫܳܢ̈ܶܐ ܡܰܠܟܺܝܣܛܰܝܰܐ ܕܗܳܢܘܢ̇ ܕܰܐܝܠܶܝܢ (ܕܰܠܩܘ̣ܒܠܳܐ) (Anti ܕܐܰܢܛܺܝܦܰܛܺܝܩܳܐܝ̣ܬ ܠܘܳܬܳܗ̇ ܩܳܝܡܺܝܢ: ܘܗܰܓܳܓܽܘܬܳܐ (ܚܙܳܬ ܚܶܙܘܳܐ ܐܰܘ ܨܳܝܘ̣ܪܘ̣ܬ ܕܡܘ̣ܬܳܐ ܡܕܶܡ) ܠܳܗ̇ ܡܫܰܡܗܺܝܢ: ܘܰܫܚܺܝܡܺܝܢ ܡܶܢܳܗ̇ ܐܰܝܠܶܝܢ ܕܠܽܘܓܺܝܩܳܐܝ̣ܬ (ܡܠܝ̣ܠܳܐܝ̣ܬ) ܘܪܽܘܛܽܘܪܺܝܩܳܐܝ̣ܬ (ܡܰܡܠ̱ܠܳܐ ܣܩܝ̣ܠܳܐ) ܐܰܝܟ ܕܰܠܡܰܕܪܳܟܽܘ ܠܳܗ̇ ܒܳܗ̇ ܡܠܰܓܠܓܺܝܢ: ܘܰܛܦܺܝܢܽܘܣܺܝܢ (ܡܚܝ̣ܠܝ̣ܢ) ܡܶܢܳܗ̇ ܐܰܝܠܶܝܢ ܕܰܦܪܽܘܛܰܐܣܺܝܣܳܐܝ̣ܬ ( ܡܺܐܡܪܳܐ ܟܰܪܝܳܐ ܘܦܶܬܓܳܡܳܐ ܓܡܝ̣ܪ ܣܘ̣ܟܳܠܳܐ) ܒܳܥܶܝܢ ܕܒܰܦܪܽܘܣܕܺܝܘܪܺܝܣܡܳܘܣ (ܦܶܬܓܳܡܳܐ ܡܬܰܚܡܳܐ ܕܡܶܬܬܰܘܣܰܦ) ܢܶܚܫܒܽܘܢܶܝܗ̇ ܘܠܳܐܝܶܢ ܡܶܢܳܗ̇ ܡܰܕ̈ܥܶܐ ܕܗܳܢܘܢ̇ ܕܰܒܩܽܘܛܪ̈ܶܐ ܕܽܐܘܡܳܢ̈ܘܳܬܳܐ ܘܰܫܪ̈ܳܝܶܐ ܕܣܽܘܠܽܘܓܺܝܣ̈ܡܽܘܣܳܝܶܐ (ܗܘ̣ܦܳܟ ܚܘ̣ܫܳܒܳܐ) ܥܰܡܶܗ ܡܥܰܪܙܠܺܝܢ ܕܰܢܚܰܦܽܘܢ ܠܐܻܝܡܳܡܳܗ̇: ܘܟܰܕ ܒܗܳܠܶܝܢ ܘܕܰܐܝܟ ܗܳܠܶܝܢ ܗܳܢܳܐ ܟܽܠܶܗ: ܘܝܰܬܺܝܪ ܡܶܢܶܗ ܐܠܰܗܽܘܬܳܟ ܘܰܡܕܰܒܪܳܢܽܘܬܳܟ ܪܳܡܳܐ ܟܰܕ ܠܐܴ ܡܶܬܕܰܪܟܳܐ ܐܳܦܠܐܴ ܡܶܬܥܰܩܒܳܐ ܘܠܐܴ ܡܶܬܒܰܨܝܳܐ ܐܳܦ ܠܐܴ ܡܶܬܕܰܪܫܳܐ: ܐܰܚܒܽܘܟ ܟܺܐܢ̈ܶܐ ܘܙܰܕܺܝ̈ܩܶܐ ܘܰܫܦ̣ܰܪܘ̱ ܠܳܟ ܒܕܽܘܒܳܪ̈ܰܝܗܽܘܢ: ܗܳܒܶܝܠ ܩܰܪܶܒ ܠܳܟ ܕܶܒܚ̈ܶܐ ܫܰܡܺܝ̈ܢܶܐ ܘܒܽܘܟܪ̈ܶܐ ܕܥܳܢ̈ܶܗ ܘܩܰܒ̣ܶܠܬ ܐܶܢܶܝܢ ܡܶܢܶܗ ܨܶܒܝܳܢܳܐܝ̣ܬ: ܘܰܐܢܽܘܫ ܐܰܝܟ ܦܳܪܽܘܫܳܐ ܫܰܒܚܳܟ ܘܐܰܠܶܦ ܬܶܫܒܽܘܚܬܳܐ ܠܰܒ̈ܢܰܝ ܕܳܪܶܗ ܬܰܩܢܳܐܝ̣ܬ: ܚܢܽܘܟ ܥܰܙܺܝ ܒܫܽܘܦܪ̈ܶܐ ܐܰܠܳܗܳܝ̈ܶܐ ܘܠܰܫܡܰܝܳܐ ܐܰܣܶܩܬܳܝܗ̱ܝ ܡܪܰܡܪܡܳܐܝ̣ܬ: ܢܽܘܚ ܟܺܐܢܳܐ ܕܰܚܠܰܦܬܳܐ ܗ̱ܘܳܐ ܕܥܳܠܡܳܐ: ܘܡܰܠܟܺܝܙܕܶܩ ܗܰܘ ܟܽܘܡܪܳܐ ܪܰܒܳܐ ܕܩܰܪܶܒ ܠܳܟ ܠܰܚܡܳܐ ܘܚܰܡܪܳܐ ܐ̱ܪܳܙܳܢܳܐܝ̣ܬ: ܘܰܐܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܕܰܫܦ̣ܰܪܘ̱ ܠܳܟ ܒܕܽܘܒܳܪ̈ܰܝܗܽܘܢ ܬܪܺܝܨܳܐܝ̣ܬ: ܘܺܐܝܽܘܒ ܙܰܕܺܝܩܳܐ ܕܶܐܙܕܰܝܰܢ ܠܽܘܩܒܰܠ ܣܳܛܳܢܳܐ ܘܚܰܝܠܰܘ̈ܳܬܶܗ ܚܺܝܨܳܐܝ̣ܬ: ܝܰܘܣܶܦ ܟܺܐܢܳܐ ܕܰܪܕܳܐ ܒܽܐܘܪܚܳܐ ܕܙܰܕܺܝܩܽܘܬܳܐ ܟܰܫܺܝܪܳܐܝ̣ܬ ܡܽܘܫܶܐ ܪܰܒܳܐ ܕܰܐܣܠܺܝ ܗ̱ܘܳܐ ܠܣܺܝ̈ܡܳܬܳܐ ܕܟܽܠܳܗ̇ ܡܶܨܪܶܝܢ ܘܒܳܟ ܠܚܽܘܕܰܝܟ ܨܒ̣ܳܐ ܦܳܪܽܘܫܳܐܝ̣ܬ: ܦܺܝܢܚܶܣ ܕܰܩ̣ܛܰܠ ܠܙܰܢܳܝ̈ܶܐ ܘܚܰܘܺܝ ܛܢܳܢܶܗ ܠܳܟ ܝܰܨܺܝܦܳܐܝ̣ܬ: ܝܶܫܽܘܥ ܒܰܪܢܽܘܢ ܒܥܶܠܫܡܳܟ ܕܰܐܥܒ̣ܰܪ ܠܥܰܡܳܐ ܠܐܱܪܥܳܐ ܕܡܽܘܠܟܳܢܳܐ ܐ̱ܪܳܙܳܢܳܐܝ̣ܬ: ܢܰܦܬܰܚ ܕܰܢܕܰܪ ܠܒܰܪܬܶܗ ܢܶܕܪܳܐ ܘܕܰܒܚܳܗ̇ ܠܳܟ ܩܽܘܪܒܳܢܳܐ ܡܩܰܒܠܐܴ ܙܰܕܺܝܩܳܐܝ̣ܬ: ܒܳܪܳܩ ܘܓܶܕܥܽܘܢ ܕܰܡܠܶܝܢ ܗ̱ܘܰܘ ܗܰܝܡܳܢܽܘܬܳܐ ܙܰܗܝܳܐܝ̣ܬ: ܢܕܺܝܪ̈ܶܐ ܫܶܡܫܽܘܢ ܘܰܫܡܽܘܐܶܝܠ ܕܰܐܦܶܩ̣ܘ̱ ܚܰܝܰܝ̈ܗܽܘܢ ܢܙܺܝܪܳܐܝ̣ܬ ܐܺܠܺܝܳܐ ܘܶܐܠܺܝܫܳܥ ܬܰܠܡܺܝܕܶܗ ܕܠܰܘ ܠܢܰܦܫܗܽܘܢ ܚܝ̣ܰܘ: ܐܶܠܐܴ ܠܳܟ ܚܰܝܺܝ̈ܢ ܗ̱ܘܰܘ ܐܰܡܺܝܢܳܐܝ̣ܬ: ܢܒܺܝܳܐ ܙܰܗܝܳܐ ܐܶܫܰܥܝܳܐ ܕܰܒܚܶܙܘ̈ܳܢܶܐ ܐܰܥܬܰܪܬܳܝܗ̱ܝ ܡܰܓܳܢ ܥܰܬܺܝܪܳܐܝ̣ܬ: ܘܶܐܪܰܡܝܳܐ ܢܒܺܝܳܐ ܕܰܠܚܽܘܪܒܳܐ ܢܳܦܶܩ ܗ̱ܘܳܐ ܟܽܠ ܝܰܘܡܳܐ ܠܚܽܘܕܳܐܝ̣ܬ: ܚܶܙܰܩܝܳܐ ܘܝܽܘܫܺܝܳܐ ܕܰܪܕܰܘ ܩܕܳܡܰܝܟ ܐܰܝܟ ܨܶܒܝܳܢܳܟ ܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܫܰܦܝܳܐܝ̣ܬ: ܘܚܰܙܩܺܝ̣ܐܝܶܠ ܕܡܶܬܩܰܦܰܚ ܗ̱ܘܳܐ ܡܶܢ ܥܰܡܶܗ ܘܡܶܢ ܢܒܺܝܽܘܬܳܐ ܠܐܴ ܫܳܬܶܩ ܗ̱ܘܳܐ ܚܺܝܨܳܐܝ̣ܬ: ܕܳܢܺܝܐܶܝܠ ܪܓܺܝܓܳܐ ܕܰܒܠܰܡ ܦܽܘ̈ܡܶܐ ܕܚܰܝ̈ܘܳܬܳܐ ܐܰܠܳܗܳܐܝ̣ܬ: ܘܚܰܢܰܢܝܳܐ ܘܥܶܙܰܪܝܳܐ ܘܡܺܝܫܳܐܝܶܠ ܒܪܶܟܘ̱ ܠܳܟ ܒܰܐܬܽܘܢܳܐ ܫܓܺܝܪܳܐ ܕܢܽܘܪܳܐ ܠܒܺܝܒܳܐܝ̣ܬ: ܘܟܰܕ ܒܗܳܠܶܝܢ ܬܳܗܰܪ ܗ̱ܘܳܐ ܥܳܠܡܳܐ ܕܚܽܘܒܳܐ ܣܰܓܺܝܳܐܐ ܐܰܚܒܽܘܟ: ܘܡܶܬܕܰܡܰܪ ܗ̱ܘܳܐ ܕܰܟܡܳܐ ܣܰܝܒ̣ܰܪܘ̱ ܡܶܛܽܠܳܬܳܟ ܟܰܕ ܐܳܡܰܪ ܗ̱ܘܳܐ: ܚܰܕ ܕܡܶܗ ܐܶܫܬܰܦܰܥ ܥܰܠ ܩܽܘܪܒܳܢܶܗ: ܐ̱ܚܪܺܢܳܐ ܗܰܠܶܟ ܒܙܰܕܺܝܩܽܘܬܳܐ ܘܰܒܕܰܟܝܽܘܬܳܐ: ܚܰܕ ܦܟ̣ܰܪ ܠܰܒܪܶܗ ܩܕܳܡ ܣܰܟܺܝܢܳܐ ܘܰܐ̱ܚܪܺܢܳܐ ܠܒ̣ܶܫ ܟܽܘܡܪܽܘܬܳܐ ܕܡܰܠܝܳܐ ܙܰܗܝܽܘܬܳܐ: ܚܰܕ ܡܶܛܽܠ ܡܳܪܝܳܐ ܢܦ̣ܰܩ ܡܶܢ ܐܰܬܪܶܗ ܐ̱ܚܪܺܢܳܐ ܣܰܝܒܰܪ ܚܰܫ̈ܶܐ ܒܰܚܘܺܝܚܽܘܬܳܐ: ܚܰܕ ܛܠܺܝܡ ܘܰܚܒܺܝܫ ܘܰܡܠܐܷ ܟܢܺܝܟܽܘܬܳܐ ܘܰܐ̱ܚܪܺܢܳܐ ܡܠܐܷ ܛܰܢܳܢܳܐ ܕܕܰܟܝܽܘܬܳܐ: ܚܰܕ ܠܒܺܝܫ ܙܰܕܺܝܩܽܘܬܳܐ ܘܕܳܒܰܚ ܠܺܝܚܺܝܕܳܝܬܶܗ ܘܰܐ̱ܚܪܺܢܳܐ ܣܳܒܶܠ ܪܕܺܝܦܽܘܬܳܐ: ܚܰܕ ܡܚܰܘܶܐ ܗ̱ܘܳܐ ܨܰܘܡܳܐ ܘܰܐ̱ܚܪܺܢܳܐ ܡܩܰܪܶܒ ܨܠܰܘ̈ܳܬܳܐ: ܚܰܕ ܐܶܬܢܙܰܪ ܢܙܺܝܪܽܘܬܳܐ ܘܰܐ̱ܚܪܺܢܳܐ ܢ̣ܛܰܪ ܒܬܽܘܠܽܘܬܳܐ: ܚܰܕ ܐܶܬܶܐܠܶܨ ܐ̱ܚܪܺܢܳܐ ܡܺܝܬ ܒܩܰܝܣܳܐ ܚܰܪܺܝܦܳܐ ܕܰܒܥܶܠܕܒܳܒܽܘܬܳܐ: ܚܰܕ ܦܳܗܶܐ ܗ̱ܘܳܐ ܒܡܰܕܒܪܳܐ ܒܰܡܓܰܙܝܽܘܬܳܐ: ܘܟܰܕ ܒܗܳܠܶܝܢ ܘܕܰܐܟܘܳܬܗܽܘܢ ܬܳܗܪܳܐ ܗ̱ܘܳܬ݀ ܟܽܠܳܗ̇ ܒܪܺܝܬܳܐ: ܢܒܰܓ ܠܶܗ ܚܽܘܒܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܕܠܐܴ ܦܳܚܶܡ ܠܶܗ ܚܽܘܒܳܐ ܕܗܳܠܶܝܢ ܕܰܣܥ̣ܰܪܘ̱ ܩܕܳܡܰܝܟ : ܒܛܶܠ ܬܶܗܪܳܐ ܕܚܽܘܒܳܐ ܕܗܳܢܘܢ̇ ܘܶܐܬܒܰܩܺܝ ܗܰܘܢܳܐ ܒܚܽܘܒܶܗ ܕܰܐܒܽܘܟ: ܘܕܺܝܠܳܟ ܘܰܕܪܽܘܚܳܟ ܩܰܕܺܝܫܳܐ: ܕܰܐܚܒܽܘܟ ܓܶܝܪ ܟܰܕ ܠܐܴ ܐܰܣܟ̣ܶܠܬ ܘܰܐܚܶܒܬܳܢ ܒܳܬܰܪ ܕܰܐܪܫܰܥܢܰܢ: ܘܰܪܚܶܡܬܳܢ ܒܳܬܰܪ ܕܰܚܛܰܝܢܰܢ: ܗܳܠܶܝܢ ܟܽܠܗܶܝܢ ܕܚܰܝܳܒ ܗ̱ܘܳܐ ܐܳܕܳܡ ܐܰܢ̱ܬ ܦ̣ܪܰܥܬ: ܘܠܰܢܒܺܝܽܘܬܶܗ ܕܰܐܒܳܐ ܕܺܝܠܳܟ ܓܡ̣ܰܪܬ ܕܡܶܕܶܡ ܕܠܐܴ ܛܳܠܡܰܬ ܡܦܰܢܶܐ ܗ̱ܘܰܝܬ ܫܰܡܠܺܝܬ: ܫ̣ܪܰܥ ܐܳܕܳܡ ܘܰܢܦ̣ܰܠ: ܥܒ̣ܰܪ ܥܰܠ ܦܽܘܩܕܳܢܳܐ: ܫ̣ܳܛ ܠܡܳܪܶܗ: ܫܡ̣ܰܥ ܠܢܳܟܽܘܠܶܗ: ܦܫ̣ܰܛ ܐܺܝܕܶܗ ܠܦܺܐܪܳܐ: ܘܣ̣ܳܡ ܪܶܓܠܶܗ ܒܦܰܚܳܐ: ܬܪܰܥ̣ ܣܝܳܓܶܗ ܕܢܳܡܽܘܣܶܗ: ܬܒܰܪ ܢܺܝܪܶܗ ܕܦܽܘܩܕܳܢܳܐ ܥܰܡܶܩ ܚܦ̣ܰܪ ܠܶܗ ܩܰܒܪܳܐ: ܦܬܰܚ ܬܰܪܥܳܐ ܠܡܰܘܬܳܐ ܝܰܥܢܳܐ: ܐܰܢ̱ܬ ܐܰܫܠܶܡ̣ܬ ܚܠܳܦܰܘܗ̱ܝ ܩܢܽܘܡܳܟ ܠܒܶܙܚܳܐ: ܝܰܗ̣ܒܬ ܦܰܓܪܳܟ ܠܩܽܘ̈ܦܳܚܶܐ ܦܫ̣ܰܛܬ ܚܰܨܳܟ ܠܰܦܪ̈ܳܓܶܠܐܷ: ܩܰܘܡܬܳܟ ܠܰܙܩܺܝܦܳܐ: ܐܺܝܕܰܝ̈ܟ ܠܨ̈ܶܨܶܐ: ܪ̈ܶܓܠܰܝܟ ܠܐܱܣܽܘܪ̈ܶܐ: ܘܪܺܝܫܳܟ ܠܰܟܠܺܝܠܐܴ ܕܟܽܘ̈ܒܶܐ: ܘܰܐܦܰܝ̈ܟ ܠܪܽܘܩܳܐ ܣܰܢܝܳܐ: ܦܽܘܡܳܟ ܠܚܰܠܐܴ ܘܰܡܪܳܪ̈ܶܐ: ܐܶܬܕܩܰܪܬ ܒܕܰܦܢܳܟ ܒܪܽܘܡܚܳܐ: ܐܶܬܩܒ̣ܰܥܬ ܒܰܨܠܺܝܒܳܐ ܕܚܶܣܕܳܐ ܐܰܦܩ̣ܰܥܬ ܠܫܽܘ̈ܥܶܐ ܘܨܰܪܺܝܬ ܠܟܺܐܦ̈ܶܐ: ܘܠܐܱܦ̈ܰܝ ܬܰܪܥܳܐ ܕܗܰܝܟܠܐܴ ܣܰܕܶܩ̣ܬ ܠܐܱܪܥܳܐ ܐܰܪܥܶܠ̣ܬ ܘܰܐܙܺܝܥܬ: ܘܩܳܡ̣ܬ ܡܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܰܙܪܰܥ̣ܬ ܚܰܝ̈ܶܐ ܘܢܽܘܚܳܡܳܐ: ܒܰܐܬܪܳܐ ܕܢܽܘܚܳܡܳܐ ܠܐܴ ܡܶܬܕܟܰܪ ܗ̱ܘܳܐ ܒܶܗ ܘܡܶܢ ܚܶܫܽܘܟܳܐ ܐܰܦܶܩ̣ܬ ܠܰܛܡܺܝܪ̈ܰܝ ܒܕܰܚܺܝܚܳܐ: ܘܥܰܠ ܗܳܕܶܐ ܠܝܰܘܡܳܐ ܪܰܒܳܐ ܕܰܩܝܳܡܬܳܟ ܒܚܰܕܽܘܬܳܐ ܡܢܰܨܪܺܝܢܰܢ ܘܰܒܩܳܠܐܴ ܪܳܡܳܐ ܐܳܡܪܺܝܢܰܢ: ܕܩܳܡ ܐܰܠܳܗܳܐ ܡܶܢ ܩܰܒܪܳܐ ܒܚܰܝܠܐܴ ܘܙܳܟܽܘܬܳܐ: ܘܰܒܥܶܠܕ̈ܒܳܒܰܘܗ̱ܝ ܟܽܠܗܽܘܢ ܐܶܬܒܰܕܰܪܘ̱ ܗ̱ܘܰܘ ܡܶܢ ܫܶܡܥܶܗ ܕܰܐܪܗܶܒ ܐܶܢܽܘܢ: ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܠܝܰܘܡܳܐ ܕܢܽܘܚܳܡܳܟ ܫܒܺܝܚܳܐ ܙܰܝܰܚ̣ܢܰܢ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܡܶܢܶܗ ܫܳܐܠܺܝܢܰܢ: ܠܰܟܠܺܝܠܐܴ ܕܫܰܢ̱ܬܳܐ ܢܒܰܪܶܟ ܒܛܰܝܒܽܘܬܶܗ: ܘܰܠܥ̈ܰܠܠܳܬܳܐ ܕܰܐܪܥܳܐ ܢܰܣܓܶܐ ܒܰܡܪܰܚܡܳܢܽܘܬܶܗ: ܘܰܠܩܰܫܺܝ̈ܫܶܐ ܢܢܰܗܰܪ ܘܰܢܚܰܟܶܡ: ܘܠܰܡܫܰܡ̈ܫܳܢܶܐ ܢܶܗܘܶܐ ܡܕܰܟܝܳܢܳܐ: ܠܣܳܒ̈ܶܐ ܚܽܘܛܪܳܐ ܠܐܴ ܡܶܙܕܰܥܙܥܳܢܳܐ: ܠܢܶܫ̈ܶܐ ܟܚܺܝܕܽܘܬܳܐ ܘܢܰܟܦܽܘܬܳܐ: ܠܚܰܛܳܝ̈ܶܐ ܫܽܘܒܩܳܢܳܐ: ܠܰܡܟܰܬܡ̈ܶܐ ܚܽܘܠܳܠܐܴ: ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܐܰܦܪܰܚ ܒܰܐܦ̈ܶܐ ܓܰܠܝ̈ܳܬܳܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ܀

ܥܶܛܪܳܐ

ܠܐܴ ܬܪܰܦܶܐ ܒܰܢ ܐܺܝܕܰܝ̈ܳܐ: ܘܠܐܴ ܬܰܟܶܣ ܠܰܢ ܒܝܽܘܡ ܕܺܝܢܳܐ ܒܚܶܡܬܳܐ ܕܰܐܦܰܝ̈ܟ: ܘܠܐܴ ܡܳܪܝ̱ ܬܶܪܕܶܐ ܠܰܢ ܥܰܡ ܒܥܶܠܕ̈ܒܳܒܰܝܟ: ܐܶܠܐܴ ܐܰܫܘܳܐ ܠܰܢ ܕܢܶܛܰܪ ܦܽܘܩܕ̈ܳܢܰܝܟ: ܘܰܒܢܳܡܽܘ̈ܣܰܝܟ ܢܶܬܕܰܒܰܪ: ܘܢܶܬܩܰܒܰܠ ܦܺܝܪܡܰܢ ܒܨܺܝܪܳܐ ܩܕܳܡܰܝܟ: ܘܬܶܥܽܘܠܝ̱ ܒܳܥܽܘܬܰܢ ܠܒܶܝܬ ܓܰܙܳܟ: ܘܬܰܝܬܶܐ ܠܰܢ ܥܽܘܕܪ̈ܳܢܶܐ ܡܶܢ ܠܘܳܬܳܟ: ܘܬܰܦܶܩܝ̱ ܠܰܢ ܡܰܘܗ̈ܒܳܬܳܐ ܡܶܢ ܣܺܝ̈ܡܳܬܳܟ: ܐܰܝܟܰܢܳܐ ܕܢܰܘܕܶܐ ܘܰܢܫܰܒܚܳܟ ܡܳܪܰܢ ܘܰܐܠܳܗܰܢ܀

ܚܽܘܬܳܡܳܐ

ܥܢܺܝ ܠܰܢ ܕܩܳܪܶܝܢܰܢ ܠܳܟ ܡܳܪܝܳܐ: ܘܥܰܕܰܪ ܠܰܢ ܕܡܶܬܓܰܘܣܺܝܢܰܢ ܒܳܟ ܒܽܐܘܠܨܳܢܰܝ̈ܢ: ܘܰܦܬܰܚ ܬܰܪܥܳܐ ܕܪ̈ܰܚܡܰܝܟ ܠܰܨܠܰܘ̈ܳܬܰܢ ܕܰܒܟܽܠܙܒܰܢ ܢܳܩܫܺܝܢܰܢ ܒܶܗ: ܘܠܐܴ ܬܶܫܒܽܘܩ ܠܰܢ ܡܶܢ ܐܺܝܳܠܐܴ ܕܛܰܝܒܽܘܬܳܟ: ܘܣܰܝܰܥ ܠܰܢ ܒܝܰܡܺܝܢܳܟ: ܘܚܰܕܳܐ ܠܰܢ ܒܰܩܝܳܡܬܳܟ ܘܰܐܦܨܰܚ ܠܰܢ ܒܢܽܘܚܳܡܳܟ: ܕܢܰܘܕܶܐ ܡܳܪܝ̱ ܠܰܚܕܳܢܳܝܽܘܬܳܟ: ܗܳܫܳܐ܀