ܫܬܳܐ ܕܟܳܢܽܘܢ ܐ̱ܚܪܳܝ

ܩܝܢܬܐ ܒ

ܦܬܓܡܐ:

ܚܙܰܐܽܘܟ ܡܰܝ̈ܳܐ ܐܰܠܳܗܳܐ: ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ ܗ̄܀

ܬܒܪܬ‌ܐ:

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ. ܫܰܝܶܢ ܠܥܺܕܬܳܟ ܘܢܰܛܳܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܕܡ ܐܘܢܓܠܝܘܢ - H

ܬܶܫܒܽܘܚܬܳܐ ܘܗܶܕܪܳܐ ܘܪܽܘܡܪܳܡܳܐ ܡܕܰܫܢܺܝܢܰܢ ܠܓܰܐܝܳܐ ܘܓܰܢ̱ܒܳܪܳܐ ܘܬܰܩܺܝܦ ܥܽܘܫܢܳܐ. ܥܰܠ ܦܽܘܪܩܳܢܳܐ ܘܙܳܟܽܘܬܳܐ ܕܥܰܡܳܟ ܝܺܣܪܳܐܶܝܠ܀

ܟܰܕ ܡܥܰܢܝܳܐ ܡܰܪܝܰܡ. ܒܰܦ̈ܠܰܓܶܐ. ܘܒܰܪ̈ܒܺܝܥܶܐ. ܠܝܰܗ ܡܳܪܝܳܐ܀

ܗܰܠܶܠܘ ܗܰܠܶܠܘ ܗܰܠܶܠܽܘܢܳܝܗ̱ܝ. ܠܺܐܝܠ ܬܰܩܺܝܦܳܐ. ܕܐܬܳܐ ܠܰܥܡܳܕܳܐ܀

ܫܰܒܰܚܘ ܫܰܒܰܚܘ ܫܰܒܰܚܽܘܢܳܝܗ̱ܝ. ܠܺܐܝܠ ܥܰܫܺܝܢܳܐ. ܕܐܬܳܐ ܠܰܥܡܳܕܳܐ܀

ܙܰܡܰܪܘ ܙܰܡܰܪܘ ܙܰܡܰܪܽܘܢܳܝܗ̱ܝ. ܠܺܐܝܠ ܥܰܙܺܝܙܳܐ. ܕܐܬܳܐ ܠܰܥܡܳܕܳܐ܀

ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܝܽܘܚܰܢܳܢ ܡܰܙܶܓ ܡܰܝ̈ܳܐ ܕܡܰܥܡܽܘܕܺܝܬܳܐ: ܘܰܡܫܺܝܚܳܐ ܩܰܕܶܫ ܐܶܢܽܘܢ ܒܕܰܢܚܶܬ ܘܰܥܡܰܕ ܒܗܽܘܢ. ܒܗܰܘ ܥܶܕܳܢܳܐ ܕܰܣܠܶܩ ܡܶܢ ܡܰܝ̈ܳܐ. ܫܡܰܝܳܐ ܘܰܐܪܥܳܐ ܦܠܰܓܘ ܠܶܗ ܐܺܝܩܳܪܳܐ. ܫܶܡܫܳܐ ܐܰܪܟܶܢ ܙܰܠܺܝ̈ܩܰܘܗ̱ܝ: ܘܟܰܘ̈ܟܒܶܐ ܣܓܶܕܘ ܠܶܗ. ܠܗܰܘ ܕܩܰܕܶܫ ܢܰܗܪ̈ܰܘܳܬܳܐ ܘܡܰܒܽܘ̈ܥܶܐ ܟܽܠܗܽܘܢ ܗ̄ܘܗ̄܀

ܠܘܛܢܝܐ ܒܩ̄: ܠܬܶܫܒܽܘܚܬܶܗ ܕܡܳܪܝܳܐ - H

ܢܽܘܗܪܳܐ ܒܰܫܡܰܝ̈ ܝܽܘܪܕܢܳܢ ܕܳܢܰܚ: ܘܡܳܠܶܐ ܥܳܠܡܳܐ ܚܰܕܽܘܬܳܐ. ܘܟܶܢ̈ܫܶܐ ܬܳܗܪܺܝܢ ܘܢܰܗܪܳܐ ܪܳܬܰܚ: ܒܕܶܢܚܳܐ ܕܰܬܠܺܝܬܳܝܽܘܬܳܐ܀

ܒܬܶܗܪܳܐ ܐܰܦܪܶܓܘ ܩܢܽܘ̈ܡܶܐ ܬܠܳܬܳܐ: ܥܰܠ ܝܰܕ ܢܰܗܪܳܐ ܝܰܘܡܳܢܳܐ. ܘܶܐܬܬܰܠܰܚ ܐܶܫܛܳܪ ܚܰܘ̈ܒܳܬܳܐ: ܘܶܐܫܬܚܶܩ ܪܺܝܫܶܗ ܕܚܰܪܡܳܢܳܐ܀

ܒܪܳܐ ܕܩܳܐܶܡ ܒܶܝܬ ܫܶܦ̈ܥܶܐ ܕܡܰܝ̈ܳܐ: ܘܡܶܢ ܐܺܝ̈ܕܰܝ ܥܰܒܕܶܗ ܥܳܡܶܕ. ܘܪܽܘܚܩܽܘܕܫܳܐ ܕܢܳܚܬܳܐ ܡܶܢ ܫܡܰܝܳܐ: ܘܰܐܒܳܐ ܕܗܳܢܰܘ ܒܶܪܝ ܣܳܗܶܕ܀

ܒܰܥܡܳܕܳܟ ܡܳܪܝ ܚܰܠܶܠ ܡܰܕܥܰܝ̈ܢ: ܕܢܶܗܘܽܘܢ ܢܰܘ̈ܣܶܐ ܠܪܰܒܽܘܬܳܟ. ܘܰܒܕܶܢܚܳܟ ܐܰܢܗܰܪ ܟܽܠ ܙܰܘܥܰܝ̈ܢ: ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܐܚܪܢܐ ܒܩ̄: ܡܽܘܟܳܟܳܟ ܝܰܘܡܳܢܳܐ - H

ܡܽܘܟܳܟܳܟ ܝܰܘܡܳܢܳܐ: ܐܰܬܗܰܪ ܠܟܽܠ ܒܶܪ̈ܝܳܬܳܐ. ܐܳܘ ܐܶܡܪܶܗ ܕܰܐܠܳܗܳܐ: ܘܰܒܪܳܗ̇ ܕܺܐܝܬܽܘܬܳܐ܀

ܐܰܒܳܐ ܕܩܳܥܶܐ ܘܳܐܡܰܪ: ܡܶܢ ܡܪ̈ܰܘܡܶܐ ܥܶܠܳܝ̈ܶܐ. ܕܗܳܢܰܘ ܒܶܪܝ ܚܰܒܺܝܒܳܐ: ܕܒܶܗܽ ܗ̱ܘ ܐܶܨܛܒܺܝܬ܀

ܪܽܘܚ ܩܽܘܕܫܳܐ ܕܰܡܪܰܚܦܳܐ: ܒܰܕܡܽܘܬ ܓܽܘܫܡܳܐ ܕܝܰܘܢܳܐ. ܘܥܰܠ ܪܺܝܫܶܗ ܕܒܰܪ ܐܽܘܣܺܝܰܐ: ܕܺܝܠܶܗ ܟܰܕ ܫܳܟ݂ܢܳܐ܀

ܝܽܘܚܰܢܳܢ ܕܰܡܚܰܘܶܐ: ܘܪܳܡܶܙ ܠܟܶܢܫܳܐ ܒܨܶܒܥܶܗ. ܕܗܳܐ ܐܶܡܪܶܗ ܕܰܐܠܳܗܳܐ: ܗܰܘ ܕܡܰܚܶܐ ܠܥܳܠܡܳܐ܀

ܠܙܘܝܚܐ ܒܩ̄: ܥܺܐܕܳܐ ܪܰܒܳܐ ܗܘܳܐ ܒܽܐܘܪܺܫܠܶܡ - H

ܣܶܠܩܰܬ ܟܰܠܬܳܐ ܡܶܢ ܡܰܣܚܽܘܬܳܐ: ܘܩܳܝܡܳܐ ܒܗܶܕܪܳܐ ܥܰܠ ܝܰܕ ܢܰܗܪܳܐ: ܡܨܰܒܬܳܐ ܒܶܐܣ̈ܛܠܶܐ ܕܰܫܒܺܝܚܽܘܬܳܐ. ܘܙܺܝܘܳܗ̇ ܡܰܓܗܰܪ ܠܫܶܡܫܳܐ ܘܣܰܗܪܳܐ܀

ܚܙܳܗ̇ ܒܰܪ ܐܺܝܫܰܝ ܒܥܰܝܢܳܐ ܕܪܽܘܚܳܐ: ܘܰܩܥܳܐ ܒܕܰܘܨܳܐ ܐܳܗ ܡܳܐ ܫܰܦܺܝܪ: ܗܳܐ ܒܰܪ̱ܬ ܡܰܠܟܳܐ ܩܳܝܡܳܐ ܒܫܽܘܒܚܳܐ: ܥܛܺܝܦܳܐ ܠܒܽܘ̈ܫܶܐ ܕܕܰܗܒܳܐ ܕܰܐܘܦܺܝܪ܀

ܚܰܬܢܳܐ ܫܳܩܶܠ ܚܛܺܝܬܶܗ ܕܥܳܠܡܳܐ: ܩܪܶܒ ܠܰܥܡܳܕܳܐ ܒܝܽܘܪܕܢܳܢ ܢܰܗܪܳܐ. ܚܙܳܝܗ̱ܝ ܝܽܘܚܰܢܳܢ ܒܰܝܢܳܬ ܥܰܡܳܐ. ܩܦܰܣ ܝܰܡܺܝܢܶܗ ܕܙܳܥ ܡܶܢ ܬܶܗܪܳܐ܀

ܩܳܠܳܐ ܕܩܳܪܶܐ ܒܚܽܘܪܒܳܐ ܕܺܝܗܽܘܕ: ܩܪܽܘܒ ܐܰܥܡܶܕܰܝܢܝ ܕܗܳܐ ܣܳܘܶܐ ܐ̱ܢܳܐ. ܦܰܢܺܝ ܥܰܒܕܳܐ ܡܚܺܝܠ ܐ̱ܢܳܐ ܥܳܒܽܘܕܝ: ܘܕܶܐܫܪܶܐ ܡܣܳܐܢܰܝ̈ܟ ܠܳܐ ܫܳܘܶܐ ܐ̱ܢܳܐ܀

ܒܰܫܡܳܟ ܥܳܡܕܺܝܢ ܠܰܬܝܳܒܽܘܬܳܐ. ܟܽܠ ܚܰܛܳܝ̈ܶܐ ܐܳܘ ܙܰܕܺܝܩܳܐ: ܘܟܰܕ ܡܶܢܳܟܺ ܗ̱ܝ ܟܽܠ ܡܰܠܝܽܘܬܳܐ: ܠܡܰܥܡܽܘܕܺܝܬܳܐ ܠܰܝܬܰܝܟ ܣܢܺܝܩܳܐ܀

ܠܙܘܝܚܐ ܐܚܪܢܐ ܒܩ̄: ܚܕܰܘ ܥܰܡ̱̈ܡܶܐ - H

ܒܗܳܢ ܠܺܠܝܳܐ ܒܠܰܡܦܺܝ̈ܕܶܐ: ܒܪܺܝܬܳܐ ܢܳܗܪܳܐ. ܒܢܰܝ̈ ܥܺܕܬܳܐ ܩܽܘܡܘ ܫܰܒܰܚܘ: ܕܶܐܬܳܐ ܡܫܺܝܚܳܐ܀

ܒܗܳܢ ܠܺܠܝܳܐ ܐܶܬܩܰܕܰܫܘ: ܫܶܦ̈ܥܶܐ ܕܝܽܘܪܕܢܳܢ. ܕܰܢܚܶܬ ܠܗܽܘܢ ܩܰܕܺܝܫܳܐ: ܕܰܒܗܽܘܢ ܢܶܥܡܰܕ܀

ܒܗܳܢ ܠܺܠܝܳܐ ܪܰܚܶܦ ܗ̱ܘܳܐ: ܪܽܘܚܳܐ ܕܩܽܘܕܫܳܐ. ܐܰܝܟ ܝܰܘܢܳܐ ܥܰܠ ܡܰܝ̈ܳܐ: ܘܡܰܒܽܘ̈ܥܶܐ ܪܬܰܚܘ܀

ܒܗܳܢ ܠܺܠܝܳܐ ܩܥܳܐ ܐܰܒܳܐ: ܒܰܫ̈ܡܰܝ ܝܽܘܪܕܢܳܢ. ܗܳܢܰܘ ܒܶܪܝ ܚܰܒܺܝܒܳܐ: ܕܒܶܗܽ ܗ̱ܘ ܐܶܨܛܒܺܝܬ܀

ܕܘܽܨܝ ܥܺܕܬܳܐ ܕܗܳܐ ܚܰܬܢܳܐ: ܣܠܶܩ ܡܶܢ ܡܰܝ̈ܳܐ. ܘܗܳܐ ܫܰܘܫܒܺܝܢܳܐ ܩܳܐܶܡ: ܘܰܡܠܶܐ ܬܶܗܪܳܐ܀

ܒܪܺܝܟ ܕܶܐܬܳܐ ܠܰܥܡܳܕܳܐ: ܝܶܫܽܘܥ ܡܰܠܟܰܢ. ܘܩܰܕܶܫ ܡܰܥܡܽܘܕܺܝܬܳܐ: ܠܚܽܘܣܳܝ ܚܰܘ̈ܒܶܐ܀

ܗܫܐ ܚܙܝ ܛܟܣܐ ܕܥܐܕܐ ܩܕܝܫܐ ܕܕܢܚܐ

ܚܘܬܡܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ - H

ܙܓ̣ܰܪ ܝܽܘܪܕܢܳܢ ܪܶܗܛܶܗ: ܘܡܰܝܰܘ̈ܗ̱ܝ ܒܙܰܘܥܳܐ ܠܒܶܣܬܪܳܐ ܗܦܰܟܘ. ܘܝܰܗ̱ܒܘ ܫܶܦܥܰܘ̈ܗ̱ܝ ܐܰܬܪܳܐ: ܕܡܳܪܶܐ ܝܰܡ̱̈ܡܶܐ ܒܗܽܘܢ ܢܶܣܚܶܐ. ܢܗܰܪܘ ܣܰܘ̈ܦܶܐ ܕܳܐܰܐܪ: ܟܰܕ ܪܽܘܚܩܽܘܕܫܳܐ ܥܠܰܘܗ̱ܝ ܪܰܚܶܦ: ܘܙܳܥܘ ܟܝܳܢ̈ܶܐ ܠܩܳܠܶܗ: ܕܰܐܒܳܐ ܕܰܐܣܗܶܕ ܗܳܢܰܘ ܒܶܪܝ܀