ܨܠܽܘܬܳܐ ܕܰܩܕܳܡ ܡܰܘܕܝܳܢܽܘܬܳܐ

ܟܳܗܢܳܐ: ܐܺܝܢ ܐܰܠܳܗܳܐ ܗܰܘ ܕܠܳܐ ܨܳܒܶܐ ܒܡܰܘܬܳܐ ܕܚܰܛܳܝܳܐ ܐܶܠܳܐ ܐܶܢ ܕܰܢܬܽܘܒ ܘܢܺܚܶܐ܆ ܡܰܘܕܶܐ ܐ̱ܢܳܐ ܡܳܪܝ ܕܰܚܛܺܝܬ ܩܕܳܡܰܝܟ ܒܰܫܡܰܝܳܐ ܘܒܰܐܪܥܳܐ ܘܰܒܛܰܝܒܽܘܬܳܟ ܪܰܒܬܳܐ ܕܰܠܘܳܬܝ ܟܶܦܪܶܬ܆ ܘܡܶܢ ܕܰܪܓܳܐ ܕܰܒ̈ܢܰܝܳܐ ܢܶܦܠܶܬ܆ ܘܕܶܐܬܩܪܶܐ ܠܳܟ ܒܪܳܐ ܠܳܐ ܫܳܘܶܐ ܐ̱ܢܳܐ܆ ܡܶܟܺܝܠ ܐܳܒܝ ܫܡܰܝܳܢܳܐ ܐܰܝܟ ܚܰܕ ܡܶܢ ܥܰܒܕܰܝ̈ܟ ܩܰܒܶܠܰܝܢܝ ܘܒܰܡܪܰܚܡܳܢܽܘܬܳܟ ܡܶܢ ܚܰܘ̈ܒܰܝ ܚܰܣܳܢܝ ܘܡܶܢ ܚܛܳܗܰܝ̈ ܕܰܟܳܢܝ܆ ܐܳܘ ܡܪܰܚܦܳܢܳܐ ܐܰܗܦܶܟ ܐܰܦܰܝ̈ܟ ܡܶܢ ܣܘܽܪ̈ܚܳܢܰܝ܆ ܘܰܒܒܰܣܺܝܡܽܘܬܳܟ ܣܰܬܰܪ ܡܽܘ̈ܡܰܝ. ܐܳܘ ܚܰܝܽܘܣܬܳܢܳܐ ܡܶܢ ܩܕܳܡ ܐܰܦܰܝ̈ܟ ܠܳܐ ܬܶܫܕܶܝܢܝ܆ ܘܰܒܪܽܘܓܙܳܟ ܠܳܐ ܬܶܪܕܶܝܢܝ܆ ܩܰܒܶܠ ܕܶܡ̈ܥܶܐ ܕܰܬܝܳܒܽܘܬܝ܆ ܘܰܐܫܺܝܓ ܒܗܶܝܢ ܠܣܰܟܠ̈ܘܳܬܝ. ܛܳܒ ܟܰܪܝܳܐ ܠܺܝ ܘܰܬܘܳܬܝ ܪܰܒܳܐ ܗ̱ܝ ܥܰܠ ܟܽܠܗܽܘܢ ܚܛܳܗ̈ܶܐ ܕܣܶܥܪܶܬ ܘܡܶܫܬܰܘܕܶܐ ܐ̱ܢܳܐ ܕܠܳܐ ܡܬܽܘܡ ܐܶܗܦܽܘܟ ܠܰܚܛܺܝܬܳܐ܆ ܩܰܒܶܠ ܡܶܟܺܝܠ ܠܰܬܝܳܒܽܘܬܝ܆ ܘܰܣܡܽܘܟܰܝܢܝ ܒܝܰܡܺܝܢܳܟ܆ ܐܰܝܟܰܢܳܐ ܕܶܐܨܛܒܶܐ ܒܡܰܘܬܳܐ ܡܶܢ ܗܳܝ ܕܰܐܪܓܶܙܬܳܟ܀

ܨܠܽܘܬܳܐ ܕܡܰܘܕܝܳܢܘܬܳܐ

ܡܰܘܕܶܐ ܐ̱ܢܳܐ ܒܰܐܠܳܗܳܐ ܐܰܒܳܐ ܐܰܚܺܝܕ ܟܽܠ܆ ܘܠܰܒܪܶܗ ܝܺܚܺܝܕܳܝܳܐ ܡܳܪܰܢ ܝܶܫܽܘܥ ܡܫܺܝܚܳܐ܆ ܘܰܠܪܽܘܚܶܗ ܩܰܕܺܝܫܳܐ. ܫܳܠܶܡ ܐ̱ܢܳܐ ܠܗܰܝܡܳܢܘܬܳܐ ܕܰܬܠܳܬ ܣܽܘ̈ܢܶܗܕܽܘ ܩܰܕܺܝ̈ܫܳܬܳܐ ܗܳܝ ܕܰܒܢܺܝܩܺܝܰܐ ܘܗܳܝ ܕܰܒܩܽܘܣܛܰܢܛܺܝܢܳܘܦܳܘܠܺܝܣ ܘܗܳܝ ܕܒܶܐܦܶܣܳܘܣ ܥܰܠ ܣܰܒܪܳܐ ܕܟܳܗܢܽܘܬܳܐ ܡܝܰܩܰܪܬܳܐ ܕܶܐܬܬܰܓܥܠܰܬ ܠܳܟ ܐܳܒܝ ܟܳܗܢܳܐ. ܘܒܳܗ̇ ܫܳܪܶܐ ܐܰܢ̱ܬ ܘܳܐܣܰܪ ܐܰܢ̱ܬ. ܡܰܘܕܶܐ ܐ̱ܢܳܐ ܕܰܚܛܺܝܬ ܒܪ̈ܶܓܫܰܝ ܓܰܘܳܝ̈ܶܐ ܘܒܰܪ̈ܳܝܶܐ܆ ܒܡܶܠܬܳܐ ܘܒܰܥܒܳܕܳܐ ܘܰܒܡܰܚܫܰܒܬܳܐ. ܚܛܺܝܬ ܪܰܒܳܐ ܗ̱ܝ ܛܳܒ ܛܳܒ܆ ܘܬܰܘܝܳܐ ܠܺܝ ܥܠܶܝܗ̇ ܬܘܳܬܳܐ ܫܰܪܺܝܪܬܳܐ܆ ܘܡܶܫܬܰܘܕܶܐ ܐ̱ܢܳܐ ܕܡܶܡܬܽܘܡ ܠܳܐ ܐܶܗܦܽܘܟ ܠܳܗ̇ ܟܰܕ ܨܳܒܶܐ ܐ̱ܢܳܐ ܒܡܰܘܬܳܐ ܐܰܘ ܒܰܚܛܺܝܬܳܐ. ܡܶܟܺܝܠ ܒܳܥܶܐ ܐ̱ܢܳܐ ܡܶܢܳܟ ܟܳܗܢܳܐ ܕܬܶܫܪܶܝܢܝ ܘܰܬܚܰܣܶܝܢܝ ܒܫܽܘܠܛܳܢܳܐ ܕܟܳܗܢܽܘܬܳܐ ܘܰܬܦܺܝܣ ܠܰܐܠܳܗܳܐ ܠܺܝ ܒܛܰܝܒܽܘܬܶܗ܀

ܪܽܘܫܡܳܐ ܕܥܰܠ ܟܽܠ ܐ̱ܢܳܫ

ܢܶܬܪܰܚܰܡ ܥܠܰܝܟ ܐܰܠܳܗܳܐ ܘܢܶܕܒܪܳܟ ܠܚܰܝ̈ܶܐ ܕܰܠܥܳܠܰܡ. ܒܝܰܕ ܫܽܘܠܛܳܢܳܗ̇ ܕܟܳܗܢܽܘܬܳܐ ܗܰܘ ܕܰܐܫܠܡܶܗ ܡܳܪܰܢ ܝܶܫܽܘܥ ܡܫܺܝܚܳܐ ܠܬܰܠܡܺܝ̈ܕܰܘܗ̱ܝ܆ ܘܬܰܠܡܺܝ̈ܕܰܘܗ̱ܝ ܐܰܓܥܠܽܘܗ̱ܝ ܠܬܰܚܠܽܘܦܰܝ̈ܗܽܘܢ܆ ܥܕܰܡܳܐ ܕܡܰܢܰܥ ܠܘܳܬܝ ܐܶܢܳܐ ܥܰܒܕܳܐ ܡܚܺܝܠܳܐ ܘܚܰܛܳܝܳܐ. ܫܳܪܶܐ ܐ̱ܢܳܐ ܠܳܟ ܐܳܚܝ̱ ܡܶܢ ܟܽܠܗܽܘܢ ܚܛܳܗܰܝ̈ܟ ܕܰܐܘܕܺܝܬ ܒܗܽܘܢ ܘܰܬܘܶܐ ܐܰܢ̱ܬ ܥܠܰܝܗܽܘܢ ܘܡܶܢ ܗܳܢܽܘܢ ܕܰܛܥܰܝܬ ܐܶܢܽܘܢ: ܒܰܫܡܳܐ ܕܰܐܒܳܐ ♱ ܘܕܰܒܪܳܐ ♱ ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܨܠܽܘܬܳܐ ܓܰܘܳܢܳܝܬܳܐ ܥܰܠ ܟܽܠ ܚܛܳܗ̈ܶܐ ܘܟܽܠ ܙܢܳܐ ܕܡܶܬܥܰܒܪܳܢܽܘܬܳܐ

ܕܒܰܪ ܨܰܠܺܝܒܺܝ

ܣܰܒܪܳܐ ܫܰܪܺܝܪܳܐ ܘܬܽܘܟܠܳܢܳܐ ܕܰܐܝܠܶܝܢ ܕܒܶܗ ܡܶܬܓܰܘܣܺܝܢ܇ ܚܽܘܪ ܡܪܰܚܡܳܢܳܐܺܝܬ ܒܰܐܝܠܶܝܢ ܕܳܐܦܠܳܐ ܫܳܘܶܝܢ ܠܪ̈ܰܚܡܶܐ ܘܚܰܣܳܐ ܒܛܰܝܒܽܘܬܳܟ ܘܳܐܦܶܢ ܠܳܐ ܫܳܘܶܝܢ ܠܚܽܘܣܳܝܳܐ. ܐܰܘܫܶܛ ܡܳܪܝ ܐܺܝܕܳܟ ܘܕܰܐܠܳܐ ܠܰܐܝܠܶܝܢ ܕܰܡܛܰܒܥܺܝܢ ܒܝܰܡܳܐ ܕܥܰܘܠܳܐ. ܐܰܣܶܩ ܡܶܢ ܨܳܡܰܪܬܳܐ ܕܰܐܒܕܳܢܳܐ ܠܗܽܘܢ ܘܰܕܡܶܢ ܟܰܕܽܘ ܢܰܦܺܝܠܺܝܢ ܒܰܦܣܳܩ ܣܰܒܪܳܐ. ܠܳܐ ܡܳܪܝ ܬܶܚܽܘܬ ܐܶܢܽܘܢ ܒܥܽܘܡܩܳܐ ܬܰܚܬܳܝܳܐ ܬܚܶܝܬ ܡܳܪܽܘܬܳܐ ܘܫܽܘܠܛܳܢܳܐ ܕܣܳܛܳܢܳܐ. ܐܶܠܐ ܗܳܫܳܐ ܡܳܪܝ ܕܰܦܢܰܘ ܠܥܰܡܳܟ. ܘܰܐܪܺܝܡܘ ܥܰܝ̈ܢܰܝܗܽܘܢ ܘܗܳܐ ܚܳܝܪܺܝܢ ܠܦܽܘܪܩܳܢܳܐ܆ ܐܶܬܦܢܰܝ ܘܰܐܥܒܰܪ ܘܚܽܘܣ ܘܩܰܒܶܠ ܐܶܢܽܘܢ. ܠܘܳܬ ܡܰܢܽܘ ܢܺܐܙܰܠ. ܘܰܒܡܰܢܽܘ ܢܶܬܓܰܘܰܣ. ܐܶܠܳܐ ܒܗܽܘܢ ܒܪ̈ܰܚܡܰܝܟ. ܠܡܰܢܽܘ ܡܨܶܐ ܕܰܢܚܰܣܶܐ ܠܰܢ ܐܶܠܳܐ ܐܶܢ ܐܰܢ̱ܬ ܒܰܠܚܽܘܕܰܝܟ ܪܳܚܶܡ ܐ̱ܢܳܫܳܐ܆ ܕܰܠܘܳܬ ܬܘܳܬܳܐ ܚܘܺܝܚܳܐܺܝܬ ܚܳܐܰܪ ܐܰܢ̱ܬ܆ ܘܠܰܬܝܳܒܽܘܬܳܐ ܡܣܰܟܶܐ ܐܰܢ̱ܬ. ܐܰܢ̱ܬ ܡܳܪܝ ܒܛܰܝܒܽܘܬܳܟ ܚܽܘܣ ܥܰܠ ܟܽܠܰܢ. ܘܰܫܒܽܘܩ ܚܛܳܗܰܝ̈ܢ. ܘܰܐܥܒܰܪ ܠܠܳܐ ܢܳܡܽܘܣܳܝ̈ܘܳܬܳܐ ܕܰܣܥܰܪܢܰܢ. ܘܚܰܠܶܠ ܘܰܡܪܽܘܩ ܠܰܢ ܠܗܳܢܽܘܢ ܕܙܳܝܥܺܝܢܰܢ ܘܰܡܢܳܕܺܝܢܰܢ ܘܕܰܒܟܽܠ ܙܢܰܝ̈ܳܐ ܕܨܽܘ̈ܥܨܳܥܶܐ ܕܰܚ̈ܛܳܗܶܐ ܡܦܰܠܦܠܺܝܢܰܢ. ܡܶܛܽܠ ܕܰܐܒܳܐ ܐܺܝܬܰܝܟ ܘܰܡܪܰܚܡܳܢܳܐ. ܘܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܘܟܰܕ ܡܶܫܬܰܡܠܶܐ ܙܰܒܢܳܐ ܕܩܳܢܽܘܢܳܐ܆ ܘܡܶܬܩܰܪܰܒ ܬܽܘܒ ܬܰܝܳܒܳܐ ܠܘܳܬ ܟܳܗܢܳܐ ܕܢܶܫܬܰܘܬܰܦ ܒܪ̈ܳܐܙܶܐ ܩܰܕܺܝ̈ܫܶܐ. ܣܳܐܶܡ ܟܳܗܢܳܐ ܝܰܡܺܝܢܶܗ ܥܰܠ ܪܺܝܫܶܗ ܕܬܰܝܳܒܳܐ. ܘܢܳܦܰܚ ܒܰܐܦܰܘ̈ܗ̱ܝ ܬܠܳܬ ܙܰܒ̈ܢܺܝܢ ܟܰܕ ܐܳܡܰܪ ܠܰܨܠܽܘܬܳܐ:

ܐܶܬܛܰܠܩܰܬ ܚܛܺܝܬܳܐ ܡܶܢ ܢܰܦܫܳܟ ܘܦܰܓܪܳܟ ܒܰܫܡܳܐ ܕܰܐܒܳܐ ܐܰܡܺܝܢ܀

ܐܶܬܚܰܣܺܝܬ ܘܶܐܬܩܰܕܰܫܬ ܒܰܫܡܳܐ ܕܰܒܪܳܐ ܐܰܡܺܝܢ܀

ܬܶܫܬܘܶܐ ܠܫܰܘܬܳܦܽܘܬܐ ܕܰܒܪ̈ܳܐܙܶܐ ܩܰܕܺܝ̈ܫܶܐ ܒܰܫܡܳܐ ܕܪܽܘܚܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬܳܐ ܕܒܳܬܰܪ ܡܰܘܕܝܳܢܽܘܬܳܐ

ܡܳܪܰܢ ܝܶܫܽܘܥ ܡܫܺܝܚܳܐ ܐܳܣܝܳܐ ܕܚܰܝ̈ܶܐ ܘܡܰܒܽܘܥܳܐ ܕܪܰܚܡܶܐ܆ ܗܳܐ ܐܶܢܳܐ ܕܺܐܝܬܰܝ ܣܰܡܝܳܐ ܠܘܳܬܳܟ ܐܶܬܩܰܪܒܶܬ ܐܰܝܟܰܢܳܐ ܕܰܠܥܰܝܢܰܝ ܬܰܪܥܺܝܬܝ ܬܰܢܗܰܪ܆ ܘܰܠܟܺܐܒܰܝ ܬܰܚܠܶܡ܆ ܘܠܰܨܪܺܝܟܽܘܬܝ ܬܰܥܬܰܪ. ܡܗܰܝܡܶܢ ܐ̱ܢܳܐ ܕܠܰܬܝܳܒܽܘܬܝ ܩܰܒܶܠܬ܆ ܘܒܰܬܘܳܬܝ ܐܶܨܛܒܺܝܬ܆ ܘܰܫܒܰܩܬ ܠܺܝ ܣܽܘܪ̈ܚܳܢܰܝ܆ ܘܕܰܟܺܝܬܳܢܝ ܡܶܢ ܚܛܳܗܰܝ̈܆ ܘܥܰܠ ܐܰܦܰܝ̈ ܛܰܝܒܽܘܬܳܟ ܕܰܠܘܳܬܝ ܡܰܘܕܶܐ ܐ̱ܢܳܐ ܠܳܟ ܬܰܘܕܺܝܬܳܐ ܐܰܡܺܝܢܳܬܳܐ܆ ܘܰܡܫܰܒܰܚ ܐ̱ܢܳܐ ܬܶܫܒܽܘܚܬܳܐ ܕܠܳܐ ܫܰܠܘܳܐ ܡܶܛܽܠ ܣܽܘܓܳܐܐ ܕܪ̈ܰܚܡܰܝܟ. ܗܰܒ ܠܺܝ ܒܰܚܢܳܢܳܟ ܕܶܐܗܘܶܐ ܫܰܪܺܝܪ ܒܫܽܘ̈ܘܕܳܝܰܝ ܕܠܳܐ ܬܽܘܒ ܐܶܗܦܽܘܟ ܠܰܚܛܺܝܬܳܐ܆ ܚܰܝܶܠܰܝܢܝ ܕܰܠܟܽܠܗܽܘܢ ܢܶܣܝܽܘ̈ܢܶܐ ܐܶܙܟܶܐ܆ ܘܠܳܟ ܒܰܠܚܽܘܕܰܝܟ ܥܰܠ ܐܰܪܥܳܐ ܐܰܚܶܒ ܘܰܒܡܰܠܟܽܘܬܳܟ ܒܥܳܠܡܳܐ ܕܰܥܬܺܝܕ ܐܶܕܰܝܰܪ ܠܥܳܠܰܡ܀

ܨܠܽܘܬܳܐ ܕܰܩܕܳܡ ܢܣܺܝܒܽܘܬܳܐ ܕܐܪ̈ܳܙܶܐ ܐܰܠܳܗܳܝ̈ܶܐ

ܐܳܘ ܠܰܚܡܳܐ ܕܰܢܚܶܬ ܡܶܢ ܫܡܰܝܳܐ ܬܽܘܪܣܳܝܳܐ ܠܰܒܢܰܝ̈ܢܳܫܳܐ܆ ܗܰܒ ܠܺܝ ܕܶܐܣܒܳܟ ܐܰܟܡܳܐ ܕܙܳܕܶܩ ܒܚܽܘܒܳܐ ܘܗܰܝܡܳܢܽܘܬܳܐ ܘܡܰܟܺܝܟܽܘܬܳܐ. ܐܳܘ ܚܰܡܪܳܐ ܪܓܺܝܓܳܐ ܕܚܰܝ̈ܶܐ܆ ܐܰܪܘܳܢܝ ܒܚܽܘܒܳܟ ܐܰܠܳܗܳܝܳܐ. ܐܳܘ ܕܩܳܪܶܐ ܗܘܳܐ ܡܰܢ ܕܰܨܗܶܐ ܢܺܐܬܶܐ ܠܘܳܬܝ ܘܢܶܫܬܶܐ܆ ܗܳܐ ܢܰܦܫܝ ܠܗܺܝܩܳܐ ܕܬܶܫܬܶܐ ܡܶܢܳܟ ܡܰܝ̈ܳܐ ܕܚܰܝ̈ܶܐ. ܐܺܝܢ ܡܳܪܝܳܐ ܐܰܠܳܗܳܐ ܠܳܐ ܫܳܘܶܐ ܐ̱ܢܳܐ ܕܬܶܥܽܘܠ ܠܠܶܒܝ܆ ܒܰܠܚܽܘܕ ܐܡܰܪ ܡܶܠܬܳܐ ܘܬܶܬܰܐܣܶܐ ܢܰܦܫܝ ܗܳܝ ܕܣܳܘܚܳܐ ܠܳܟ ܐܰܟܡܳܐ ܕܣܳܘܰܚ ܐܰܝܠܳܐ ܠܰܦܨܺܝܕܳܐ ܕܡܰܝ̈ܳܐ. ܐܳܘ ܟܳܣܳܐ ܕܒܽܘܪܟܬܳܐ ܘܰܕܦܽܘܪܩܳܢܳܐ܇ ܐܳܘ ܡܰܢܢܳܐ ܫܡܰܝܳܢܳܐ ܘܠܰܚܡܳܐ ܕܚܰܝ̈ܶܐ ܟܰܬܰܪ ܒܺܝ ܥܕܰܡܳܐ ܠܥܳܠܰܡ܀

ܨܠܽܘܬܳܐ ܕܒܳܬܰܪ ܢܣܺܝܒܽܘܬܳܐ ܕܐܪ̈ܳܙܶܐ ܐܰܠܳܗܳܝ̈ܶܐ

ܒܰܐܝܢܳܐ ܠܶܫܳܢܳܐ ܐܰܘܕܶܐ ܠܳܟ ܐܰܠܳܗܝ ܣܓܺܝܕܳܐ܇ ܐܰܘ ܐܰܝܟܰܢ ܐܶܫܰܒܰܚ ܠܛܰܝܒܽܘܬܳܟ ܗܳܕܶܐ ܠܳܐܡܶܬܡܰܠܠܳܢܺܝܬܳܐ܆ ܥܰܠ ܕܰܨܒܰܝܬ ܘܝܰܗܒܬ ܠܺܝ ܝܳܬܳܟ ܡܪܰܝܰܡܬܳܐ ܬܽܘܪܣܳܝܳܐ ܐܰܠܳܗܳܝܳܐ܆ ܘܰܐܪܘܺܝܬ ܠܪܽܘܚܝ ܒܰܕܡܳܟ܆ ܘܩܰܕܶܫܬܳܢܝ ܒܪܽܘܚܳܟ܆ ܘܣܰܒܰܥܬ ܠܟܰܦܢܽܘܬܝ ܡܶܢ ܫܽܘܡܢܶܗ ܕܒܰܝܬܳܟ. ܠܳܟ ܡܫܰܟܶܢ ܐ̱ܢܳܐ ܠܶܒܝ ܕܢܶܗܘܶܐ ܡܰܥܡܪܳܐ ܪܽܘܚܳܢܳܝܳܐ ܠܪܰܒܽܘܬܳܟ ܐܰܝܟܰܢܳܐ ܕܬܰܡܠܶܟ ܥܰܠ ܟܽܠܗܽܘܢ ܚܽܘ̈ܫܳܒܰܝ ܘܙܰܘ̈ܥܰܝ ܘܬܶܗܘܶܐ ܡܕܰܒܰܪ ܠܗܽܘܢ ܐܰܝܟ ܨܶܒܝܳܢܳܟ. ܡܦܺܝܣ ܐ̱ܢܳܐ ܠܳܟ ܕܬܶܗܘܶܐ ܢܣܺܝܒܽܘܬܝ ܗܳܕܶܐ ܠܬܰܘܣܶܦܬܳܐ ܕܗܰܝܡܳܢܽܘܬܝ܆ ܘܰܠܫܽܘܪܳܪܳܐ ܕܣܰܒܪܳܐ ܕܺܝܠܝ܆ ܘܰܠܫܽܘܠܗܳܒܳܐ ܕܢܽܘܪܳܐ ܕܚܽܘܒܳܟ ܒܰܣܺܝܡܳܐ ܒܗܰܕܳܡܰܝ̈܆ ܘܰܠܥܽܘܬܪܳܐ ܕܰܒܟܽܠܗܶܝܢ ܡܝܰܬܪ̈ܳܬܳܐ܆ ܢܶܗܘܽܘܢ ܠܺܝ ܐ̱ܪ̈ܳܙܶܐ ܗܳܠܶܝܢ ܠܰܢܛܽܘܪܽܘܬܳܐ ܕܡܶܢ ܟܡܺܐܢ̈ܶܐ ܕܰܒܥܶܠ̈ܕܒܳܒܶܐ ܕܢܰܦܫܝ܆ ܘܰܠܚܽܘܝܳܕܳܐ ܕܒܳܟ ܥܕܰܡܳܐ ܕܶܐܬܒܰܣܰܡ ܒܚܰܝ̈ܶܐ ܡܬܽܘ̈ܡܳܝܶܐ ܒܡܰܠܟܽܘܬܳܟ ܫܡܰܝܳܢܺܝܬܳܐ ܥܰܡ ܟܶܢ̈ܫܶܐ ܕܩܰܕܺܝ̈ܫܰܝܟ܆ ܘܥܰܡܗܽܘܢ ܐܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ܀

ܫܠܡ ܨܠܘܬܐ ܕܡܘܕܝܢܘܬܐ