ܛܟܣܐ ܕܙܘܝܚܐ ܕܨܠܝܒܐ
ܡܚܰܘܝܳܢܳܐ
ܡܶܢ ܩܕܳܡ ܕܢܶܫܬܰܡܠܶܐ ܩܽܘܪܳܒܳܐ ܐܰܠܳܗܳܝܳܐ܆ ܒܳܬܰܪ ܕܰܡܫܰܡܠܶܝܢ ܠܬܶܫܡܶܫܬܳܐ ܕܝܳܠܕܰܬ ܐܰܠܳܗܐ. ܡܛܰܝܒܺܝܢ ܨܠܺܝܒܳܐ ܘܰܡܢܰܘ̈ܳܬܳܐ ܕܩܰܕܺܝ̈ܫܶܐ. ܘܪ̈ܺܝܫܟܳܗܢܶܐ ܛܳܥܶܢ ܠܰܨܠܺܝܒܳܐ. ܘܰܐ̱ܚܪܺܢܳܐ ܠܶܐܘܰܢܓܶܠܝܽܘܢ. ܘܰܐ̱ܚܪܺܢܳܐ ܡܢܰܘ̈ܳܬܳܐ ܕܩܰܕܝ̈ܫܶܐ. ܘܰܐ̱ܚܪ̈ܳܢܶܐ ܡܰܪ̈ܽܘܚܳܬܳܐ ܡܶܟܳܐ ܘܡܶܟܳܐ ܘܩܶܪ̈ܝܽܘܢܶܐ ܘܰܡܫܰܡܫܳܢܳܐ ܕܰܛܥܺܝܢ ܦܺܝܪܡܳܐ ܐܳܙܶܠ ܩܕܳܡܰܝܗܽܘ̇ܢ ܘܥܳܒܕܺܝܢ ܕܰܘܪܳܐ ܟܰܕ ܐܳܡ̇ܪܺܝܢ ܩ̈ܳܠܶܐ ܗܳܠܶܝܢ܀
ܩܠܐ: ܒܩ̄ ܩܽܘܩܳܝܳܐ
ܚܕܳܐ ܛܠܺܝܬܳܐ ܡܢ ܒܶܝܬ ܕܰܘܺܝܕ ܕܰܫܡܳܗ̇ ܡܰܪܝܰܡ. ܗܘܳܬ ܡܰܪܟܰܒܬܳܐ ܘܰܛܥܶܢܬܶܗ ܠܦܳܪܽܘܩܶܗ ܕܥܳܠܡܳܐ. ܡܶܣܬܰܒܪܳܐ ܠܺܝ ܕܗܺܝ ܪܰܒܳܐ ܗ̄ܝ ܣܰܓܺܝ. ܡܶܢ ܡܰܪܟܰܒܬܳܐ ܕܰܚܙܳܐ ܚܰܙܩܺܝܐܝܶܠ. ܠܗܳܝ ܐܝܬ ܠܳܗ̇ ܐܰܦ̈ܶܐ ܘܓܺܝܓ̈ܠܶܐ ܡ̈ܰܠܳܠܳܬܳܐ. ܘܰܠܡܰܪܝܰܡ ܦܽܘܡܳܐ ܕܙܳܡܰܪ ܠܳܟ ܫܽܘܒܚܳܐ ܡܳܪܝܳܐ ܗ̄ ܨܠܽܘܬܳܗ̇ ܬܥܰܕܰܪܝ̱ ܠܰܢ܀
ܫܽܘܒܚܳܐ
ܡܽܘܢ ܐܶܩܪܶܝܟܝ̱ ܐܳܘ ܒܰܪ̱ܬ ܕܰܘܺܝܕ ܠܳܐ ܝܳܕܰܥ ܐ̱ܢܳܐ. ܘܰܐܝܢܳܐ ܫܡܳܐ ܠܶܟܝ̱ ܐܶܟܰܢܶܐ ܡܰܪܝܰܡ ܠܳܐ ܪܓܺܝܫ ܐ̱ܢܳܐ. ܒܬܽܘܠܬܳܐ ܐܶܩܪܶܝܟܝ̱ ܒܪܳܐ ܝܺܢܶܩ ܡܶܢܶܟܝ̱. ܐܶܡܳܐ ܐܶܩܪܶܝܟܝ̱ ܒܬܽܘܠܰܝ̈ܟܝ̱ ܩܰܝܳܡܺܝܢ. ܡܶܟܺܝܠ ܝܳܠܕܰܬ ܐܰܠܳܗܐ ܩܳܪܶܐ ܐ̱ܢܳܐ ܠܶܟܝ̱. ܘܢܶܒܗܰܬ ܣܳܦܪܳܐ ܕܳܪܽܘܫܳܐ ܕܒܳܨܶܐ ܠܶܗ ܠܝܰܠܕܶܟܝ̱ ܗ̄ ܚܪܶܡ ܗ̱ܘ ܕܒܳܨܶܐ ܠܶܗ܀
ܡܶܢܥܳܠܰܡ
ܝܳܠܕܰܬ ܐܠܳܗܳܐ ܒܬܽܘܠܬܳܐ ܕܽܘܟܪܳܢܶܟܝ̱ ܠܒܽܘܪܟܬܳܐ. ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ ܦܰܢܳܝ ܫ̈ܶܐܠܳܬܗܽܘܢ. ܠܐܰܝܢܳܐ ܕܰܟܪܺܝܗ ܗܰܒܝ̱ ܠܶܗ ܚܽܘܠܡܳܢܳܐ. ܘܰܐܝܢܳܐ ܕܰܡܥܳܩ ܒܥܳܝ ܠܶܗ ܠܽܘܒܳܒܳܐ. ܘܰܐܝܢܳܐ ܕܒܺܝܫܳܐ ܫܳܚܶܩ ܠܶܗ ܛܪܽܘܕܺܝܘܗ̱ܝ ܡܶܢܶܗ. ܒܰܨܠܽܘܬܶܟܝ̱ ܘܰܒܒܳܥܽܘܬܶܟܝ̱ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܶܟܝ̱ ܬܥܰܕܰܪܝ̱ ܠܰܢ܀
ܘܟܰܕ ܐܰܦܰܝ̈ܗܽܘܢ ܠܡܰܕܢܚܳܐ܆ ܡܫܰܪܶܐ ܪܺܝܫ ܟܳܗ̈ܢܶܐ:
ܦܳܢܶܝܢ ܠܡܕܢܚܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܕܰܒܚܽܘܒܳܐ ܘܰܒܗܰܝܡܳܢܽܘܬܳܐ ܢܝܰܩܰܪ ܝܽܘܡ ܕܽܘܟܪܳܢܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܝܳܠܶܕܬܳܟ܆ ܘܒܰܨܠܰܘ̈ܳܬܳܗ̇ ܫܰܘܙܶܒ ܠܰܢ ܡܶܢ ܟܽܠ ܢܶܟܝܳܢܺܝ̈ܢ. ܘܢܰܛܰܪ ܠܰܢ ܒܚܺܝܠ ܬܽܘܩܦܶܗ ܕܰܨܠܺܝܒܳܐ ܦܳܪܽܘܩܳܝܳܐ܆ ܘܰܙܓܽܘܪ ܘܒܰܛܶܠ ܡܶܢܰܢ ܟܽܠܗܽܘܢ ܩܪ̈ܳܒܶܐ ܘܬܰܟܬܽܘ̈ܫܶܐ܆ ܚܰܣܳܐ ܠܰܢ ܒܒܳܥ̈ܘܳܬܳܐ ܕܝܳܠܶܕܬܳܟ ܘܰܕܩܰܕܺܝ̈ܫܰܝܟ ܚܰܘ̈ܒܶܐ ܘܰܚܛܳܗ̈ܶܐ ܕܰܣܥܰܪܢܰܢ ܩܕܳܡܰܝܟ܆ ܘܰܐܢܺܝܚ ܠܥܰܢܺܝ̈ܕܰܝܢ ܒܰܓܢܽܘܢܳܟ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܆ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܒܩ̄: ܕܪܰܒ ܗ̱ܘ ܐ̱ܪܳܙܳܐ ܡܠܶܐ ܬܶܗܪܳܐ
ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ܆ ܡܰܠܝܰܬ ܫܽܘܦܪ̈ܶܐ ܪ̈ܳܡܶܐ ܘܰܗܕܺܝܪ̈ܶܐ. ܫܽܘܒܗܳܪܐ ܕܰܟܪ̈ܺܝܣܛܝܳܢܶܐ ܫܰܪܺܝܪ̈ܶܐ ܝܳܠܕܰܬ ܐܰܠܳܗܐ ܕܰܟܝܰܬ ܒܟܽܠ܆ ܟܽܠܰܢ ܓܶܝܪ ܡܩܰܠܣܺܝܢܰܢ ܠܶܟܝ̱ ܒܰܫܪܳܪܳܐ ܘܗܰܝܡܳܢܽܘܬܳܐ܆ ܐܶܬܟܰܫܰܦܝ̱ ܚܠܳܦܰܝܢ܀
ܙܽܘܝܳܚܳܐ ܐܰܘܟܺܝܬ ܡܰܙܥܩܳܢܽܘܬܳܐ
ܒܰܨܠܺܝܒܳܟ ܡܳܪܰܢ ܝܶܫܽܘܥ܆ ܘܒܰܨܠܽܘܬ ܐܶܡܳܐ ܕܺܝܠܶܕܬܳܟ܆ ܘܕܰܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ܆ ܘܰܕܟܽܠܗܽܘܢ ܐܰܝܠܶܝܢ ܕܪܰܥܝܽܘܟ܆ ܐܰܥܒܰܪ ܡܶܢܰܢ ܢܶܟܝ̈ܳܢܶܐ܆ ܘܗܰܒ ܠܰܢ ܙܰܒ̈ܢܶܐ ܕܚܰܕ̈ܘܳܬܳܐ܆ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܐܰܦܨܰܚ ܠܰܢ ܡܳܪܝܳܐ ܐܰܠܳܗܳܐ ܒܝܽܘܡ ܕܽܘܟܪܳܢܳܗ̇ ܕܶܐܡܳܐ ܕܺܝܠܶܕܬܳܟ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܆ ܐܰܝܟܰܢܳܐ ܕܰܢܥܰܕܥܶܕ ܠܳܟ ܥܺܐܕܶܝ̈ܗ̇ ܒܚܰܕܽܘܬܳܐ ܘܒܰܦܨܺܝܚܽܘܬܳܐ. ܘܰܐܫܘܳܐ ܠܰܢ ܕܰܒܝܰܕ ܨܠܰܘ̈ܳܬܳܗ̇ ܩܰܕܺܝ̈ܫܳܬܳܐ ܘܰܡܩܰܒ̈ܠܳܬܳܐ ܢܶܬܰܐܣܽܘܢ ܟܪ̈ܺܝܗܰܝܢ ܘܡܰܪ̈ܥܰܝܢ܆ ܘܢܶܫܬܰܪܬܚܽܘܢ ܟܰܪ̈ܡܰܝܢ ܘܰܓܕܺܝ̈ܫܰܝܢ܆ ܘܢܶܬܢܰܛܪܽܘܢ ܟܽܠܗܶܝܢ ܩܰܢܳܝ̈ܘܳܬܰܢ܆ ܘܢܶܣܓܶܐ ܫܰܝܢܳܐ ܒܰܝܢܳܬܰܢ܆ ܘܢܶܫܬܰܒܩܽܘ̇ܢ ܚܰܘ̈ܒܰܝܢ ܘܰܚܛܳܗܰܝ̈ܢ ܘܰܕܥܰܢܺܝ̈ܕܰܝܢ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܒܩ̄: ܕܰܒܠܰܝ̈ܠܰܘܳܬܳܐ ܡܩܰܕܡܺܝܢܰܢ
ܒܰܨܠܽܘܬ ܐܶܡܳܐ ܕܺܝܠܶܕܬܳܟ܆ ܒܬܽܘܠܬܳܐ ܕܟܺܝܬܳܐ ܘܡܰܠܝܰܬ ܟܽܠ ܫܽܘܦܪ̈ܺܝܢ܆ ܐܰܥܒܰܪ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܘܟܽܠܗܽܘܢ ܢܶܟܝ̈ܳܢܶܐ܆ ܫܰܝܢܳܟ ܪܰܒܳܐ ܘܰܫܠܳܡܳܟ ܫܰܟܶܢ ܠܰܢ ܒܪ̈ܰܚܡܰܝܟ ܪܳܚܶܡ ܐܢܳܫ̈ܳܐ܀
ܡܰܙܥܩܳܢܽܘܬܳܐ
ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ܆ ܐܰܦܝܣܝ̱ ܥܰܡܰܢ ܠܺܝܚܺܝܕܶܟܝ̱܆ ܕܰܢܫܰܟܶܢ ܠܰܢ ܒܥܰܕܥܺܐܕܶܟܝ̱ ܚܽܘܣܳܝ ܚܰܘܒ̈ܶܐ ܘܰܚܛܳܗ̈ܶܐ. ܘܚܽܘܠܡܳܢܳܐ ܠܰܟܪܺܝܗܽܘܬܰܢ. ܘܢܽܘܛܳܪܳܐ ܠܩܰܢܳܝܽܘܬܰܢ܆ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܓܰܪܒܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܗܰܒܠܰܢ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܕܰܒܢܰܦܫܳܐ ܕܟܺܝܬܳܐ܆ ܘܰܒܬܰܪܥܺܝܬܳܐ ܡܨܰܠܰܠܬܳܐ. ܘܰܒܚܽܘ̈ܫܳܒܶܐ ܕܟܰܝ̈ܳܐ ܢܥܰܕܥܶܕ ܘܰܢܩܰܠܶܣ ܠܝܰܘܡܳܐ ܗܳܢܳܐ ܕܕܽܘܟܪܳܢܳܗ̇ ܕܶܐܡܳܐ ܕܺܝܠܶܕܬܳܟ ܛܽܘܒܳܢܺܝܬܳܐ ܡܳܪܬܝ̱ ܡܰܪܝܰܡ܆ ܗܳܝ ܕܠܳܐ ܫܰܢܝܰܬ ܛܰܒ̈ܥܶܐ ܕܰܒܬܽܘ̈ܠܶܝܗ̇ ܕܡܰܘܠܳܕܳܟ܆ ܘܫܰܟܶܢ ܒܰܨܠܰܘ̈ܳܬܳܗ̇ ܘܬܰܟܫ̈ܦܳܬܳܗ̇܆ ܠܰܟܪ̈ܺܝܗܶܐ ܘܠܰܐܠܺܝ̈ܨܶܐ ܢܦܺܐܫܳܐ܆ ܘܠܰܡܥ̈ܳܩܶܐ ܪܘܳܚܬܳܐ܆ ܘܰܠܚܰܛܳܝ̈ܶܐ ܚܽܘܣܳܝܳܐ ܘܫܽܘܒܩܳܢܳܐ܆ ܘܰܠܟܽܠܰܢ ܓܰܠܝܽܘܬ ܐܰܦ̈ܶܐ ܒܝܽܘܡ ܕܺܝܢܳܐ܆ ܘܰܠܥܰܢܺܝ̈ܕܶܐ ܚܢܳܢܳܐ ܘܪ̈ܰܚܡܶܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܒܩ̄: ܕܟܰܕ ܥܰܡ̱̈ܡܶܐ ܡܙܰܡܢܺܝܢ ܗ̱ܘܰܘ
ܠܶܟܝ̱ ܒܰܠܚܽܘܕܰܝܟܝ̱ ܝܳܕܥܺܝܢܰܢ܆ ܒܬܽܘܠܬܳܐ ܘܶܐܡܳܐ ܕܰܕܠܳܐ ܦܽܘܫܳܩ ܝܺܠܶܕܬܝ̱ ܠܡܶܠܬܳܐ ܐܰܠܳܗܳܐ܆ ܘܠܶܟܝ̱ ܡܶܬܟܰܫܦܺܝܢܰܢ ܩܰܕܺܝܫܬܳܐ ܕܬܶܗܘܶܝܢ ܡܦܺܝܣܳܢܺܝܬܳܐ ܕܢܶܬܶܠ ܠܰܢ ܒܰܚܢܳܢܶܗ ܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ܆ ܐܰܟܡܰܢ ܕܠܶܟܝ̱ ܠܚܽܘܕܳܐܺܝܬ ܨܶܝܕܰܘܗ̱ܝ ܦܰܪܶܗܣܺܝܰܐ܆ ܘܥܰܠܗܳܕܶܐ ܡܰܙܥܩܺܝܢܰܢ܆ ܡܪܰܝܡܳܐ ܘܣܳܥܰܪ ܬܶܕܡܪ̈ܳܬܳܐ ܐܰܠܳܗܳܐ ܕܰܐܒܳܗ̈ܳܬܰܢ ܡܒܰܪܰܟ ܐܰܢ̱ܬ ܘܰܡܫܰܒܰܚ ܐܰܢ̱ܬ ܗ̱ܘ ܠܥܳܠܰܡ ܥܳܠܡܺܝܢ܀
ܡܰܙܥܩܳܢܽܘܬܳܐ
ܒܝܽܘܡ ܕܽܘܟܪܳܢܶܟܝ̱ ܩܰܕܺܝܫܬܳܐ܆ ܝܳܠܕܰܬ ܐܰܠܳܗܳܐ ܡܰܪܝܰܡ܆ ܐܰܦܺܝܣܝ̱ ܘܰܒܥܳܝ ܚܠܳܦܰܝܢ ܡܶܢ ܡܫܺܝܚܳܐ ܕܰܕܢܰܚ ܡܶܢܶܟܝ̱܆ ܕܢܰܥܒܰܪ ܡܶܢܰܢ ܟܽܠ ܡܰܚ̈ܘܳܢ܆ ܘܰܢܒܰܪܶܟ ܠܰܢ ܒܒܽܘܪ̈ܟܳܬܶܗ܆ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܒܰܪܶܟ ܡܳܪܝܳܐ ܐܰܠܳܗܳܐ ܒܰܨܠܽܘܬ ܐܶܡܳܟ ܕܺܝܠܶܕܬܳܟ ܘܰܕܩܰܕܺܝ̈ܫܰܝܟ܆ ܘܰܒܚܺܝܠ ܬܽܘܩܦܶܗ ܕܰܨܠܺܝܒܳܟ ܙܰܟܳܝܳܐ. ܠܰܟܠܺܝܠܳܐ ܕܫܰܢ̱ܬܳܐ ܒܛܰܝܒܽܘܬܳܟ ܘܢܰܛܰܪ ܠܟܰܪ̈ܡܶܐ ܘܰܠܙܰܪ̈ܥܶܐ ܘܰܓܕܺܝ̈ܫܶܐ ܘܚܰܩ̈ܠܶܐ ܘܥ̈ܰܠܠܳܬܳܐ ܡܰܥܨܪ̈ܳܬܳܐ ܡܶܢ ܟܽܠ ܡܰܚ̈ܘܳܬܳܐ܆ ܘܢܶܗܘܶܐ ܥܒܽܘܪܳܐ ܣܰܓܺܝܳܐܐ܆ ܘܬܽܘܪܣܳܝܳܐ ܡܫܰܪܬܚܳܐ ܠܒܳܝ̈ܫܶܐ ܘܰܨܪ̈ܺܝܟܶܐ ܘܝܰܬܡ̈ܶܐ ܘܰܐܪ̈ܡܠܳܬܳܐ܆ ܐܰܝܟܰܢܳܐ ܕܟܰܕ ܢܶܐܟܠܽܘܢ ܘܢܶܣܒܥܽܘܢ ܡܶܢ ܛܳܒ̈ܳܬܳܟ܆ ܘܰܢܫܰܒܚܽܘܢܳܟ ܠܳܐ ܣܰܒܥܳܐܺܝܬ ܒܠܺܠܝܳܐ ܘܒܐܺܝܡܳܡܳܐ܆ ܚܢܰܢ ܓܶܝܪ ܗܳܫܳܐ ܕܠܰܨܠܺܝܒܳܟ ܡܰܚܝܳܢܳܐ ܣܳܓܕܺܝܢܰܢ ܘܰܡܙܰܝܚܺܝܢܰܢ܆ ܘܰܠܥܺܐܕ̈ܶܐ ܕܝܳܠܶܕܬܳܟ ܘܰܕܩܰܕܺܝ̈ܫܰܝܟ ܒܚܰܕܽܘܬܳܐ ܡܥܰܕܥܕܺܝܢܰܢ ܘܰܡܫܰܡܠܶܝܢܰܢ܆ ܘܒܰܨܠܰܘ̈ܳܬܳܗ̇ ܘܕܽܝܠܗܽܘܢ ܛܳܦܣܺܝܢܰܢ ܘܡܶܬܓܰܘܣܺܝܢܰܢ܆ ܗܰܒܠܰܢ ܒܐܺܝܙܓܰܕܽܘܬܗܽܘ̇ܢ ܡܶܢ ܒܶܝܬ ܓܰܙܳܟ ܥܰܬܺܝܪܳܐ ܪ̈ܰܚܡܶܐ ܘܰܚܢܳܢܳܐ ܘܚܽܘܣܳܝܳܐ ܕܫܽܘܪ̈ܥܳܬܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܒܩ̄: ܒܡܶܨܥܰܬ ܫܰܠܗܶܒܺܝܬܳܐ
ܠܰܒܬܽܘܠܽܘܬܳܐ ܕܺܝܠܶܟܝ̱ ܡܝܰܩܰܪ ܟܶܢܫܳܐ ܕܰܡܗܰܝ̈ܡܢܶܐ܆ ܐܶܡܳܐ ܕܟܺܝܬܳܐ ܘܡܰܠܝܰܬ ܫܽܘܦܪ̈ܶܐ܆ ܡܶܛܽܠ ܕܺܝܠܶܕܬܝ̱ ܕܠܳܐ ܦܽܘܫܳܩ ܠܡܶܠܬܳܐ ܐܰܠܳܗܳܐ܆ ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ̱܆ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀
ܡܰܙܥܩܳܢܽܘܬܳܐ
ܡܶܛܽܠ ܟܪ̈ܺܝܗܶܐ ܘܰܐܠܺܝ̈ܨܶܐ. ܘܡܶܛܽܠ ܒܳܝ̈ܫܶܐ ܘܡܶܣܟܺܢ̈ܶܐ. ܘܡܶܛܽܠ ܝܰܬܡ̈ܶܐ ܘܰܐܪ̈ܡܠܳܬܳܐ. ܘܡܶܛܽܠ ܗܳܝ̇ ܕܢܰܫܪܶܐ ܫܰܝܢܶܗ ܪܰܒܳܐ ܘܰܫܠܳܡܶܗ ܒܥܰܡܶܗ ܘܥܺܕܬܶܗ ܘܡܰܪܥܺܝܬܶܗ܆ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܟܰܕ ܐܳܡܪܺܝܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܘܬܳܪܶܨ ܟܽܠܶܗ ܥܰܡܳܐ ܐܰܦܰܘ̈ܗ̱ܝ ܠܡܰܕܢܚܳܐ ܘܰܡܫܰܪܶܐ ܪܺܝܫ ܟܳܗ̈ܢܶܐ ܡܙܰܝܰܚ ܠܰܨܠܺܝܒܳܐ ܘܳܐܡܰܪ:
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘܒܶܐ ܡܒܰܪܟܺܝܢ ܠܶܗ. |
| ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܢܽܘܪ̈ܳܢܶܐ ܡܗܰܠܠܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘܚܳܢܶܐ ܡܗܰܕܪܺܝܢ ܠܶܗ. |
| ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝܢ ܠܶܗ. |
| ܩܰܕܺܝܫܬ ܠܳܐ ܡܳܝܽܘܬܳܐ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܘܟܶܢ ܚܳܬܶܡ ܪ̈ܺܝܫܟܳܗܢܶܐ ܠܥܰܡܳܐ ܒܰܨܠܺܝܒܳܐ ܘܩܳܪܒܺܝܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܘܰܡܗܰܝܡ̈ܢܶܐ ܘܝܳܗܒܺܝܢ ܫܠܳܡܳܐ ܘܡܶܬܒܰܪܟܺܝܢ ܡܶܢ ܨܠܺܝܒܳܐ ܘܡܶܢ ܐܶܘܰܢܓܶܠܝܽܘܢ ܩܰܕܺܝܫܳܐ܀
ܫܠܶܡ ܛܶܟܣܳܐ ܕܕܽܘܟܪ̈ܳܢܶܝܗ̇ ܕܰܒܬܽܘܠܬܳܐ ܝܳܠܕܰܬ ܐܰܠܳܗܳܐ܀