ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܝܳܐ ܒܰܟܝܳܢܶܗ ܘܝܳܗܶܒ ܚܰܝ̈ܶܐ ܠܡܳܝܘ̣̈ܬܶܐ ܒܛܰܝܒܘ̣ܬܶܗ: ܠܗܰܘ̇ ܕܡܝ̣ܬܳܐ ܗ̣ܘܳܐ ܒܰܒܣܰܪ ܒܨܶܒܝܳܢܶܗ ܘܢܶܚ̣ܬ ܠܰܫܝܘ̣ܠ ܕܰܫܰܦ̣ܪ ܠܶܗ: ܠܗܰܘ̇ ܒܰܪ ܚܺܐܪ̈ܶܐ ܕܣ̣ܳܡ ܗܘ̣ ܠܶܗ ܒܶܝܬ ܡܝ̣̈ܬܶܐ ܒܫܘ̣ܠܛܳܢܶܗ: ܠܗܰܘ̇ ܕܣܰܒܪܳܐ ܘܚܰܝ̈ܶܐ ܣܰܒ̣ܰܪ ܠܰܩܒܝ̣ܪ̈ܶܐ ܘܳܐܦ ܢܘ̣ܚܳܡܳܐ ܐܰܟ̣ܪܶܙ ܠܥܰܢܝ̣̈ܕܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܣܳܓ̇ܕܝ̣ܢܰܢ ܘܡܰܘ̇ܕܶܝܢܰܢ ܘܰܡܫܰܒܚܝ̣ܢܰܢ ܠܳܟ ܥܰܠ ܟܽܠܗܶܝܢ ܛܰܝܒ̈ܘܳܬܳܟ ܕܰܚܠܳܦܰܝܢ: ܝܰܬܝ̣ܪܳܐܝ̣ܬ ܕܶܝܢ ܒܗܳܢܳܐ ܝܰܘܡܳܐ ܕܡܰܥܰܠܬܳܟ ܕܠܰܫܝܘ̣ܠ ܗܰܘ̇ ܕܟܰܕ ܣܚܰܦ̣ܬ ܠܳܐܟܶܠܩܰܪܨܳܐ ܣܒܰܠ̣ܬ ܒܰܒܣܰܪ ܚܰܫ̈ܶܐ: ܘܰܥܡ̣ܰܕܬ ܒܠܶܒܳܗ̇ ܕܐܰܪܥܳܐ ܬܠܳܬܳܐ ܐܝ̣ܡܳܡܝ̣̈ܢ ܘܰܬܠܳܬܳܐ ܠܰܝ̈ܠܰܘܳܢ: ܐܶܣ̣ܰܪܬ ܘܰܦܟܰܪܬܳܝܗ̱ܝ ܠܰܛܪܘ̣ܢܳܐ ܚܰܣܝ̣ܢܳܐ: ܘܒܰܙ̣ܬ ܠܰܫܝܘ̣ܠ ܘܰܐܗ̣ܦܶܟ݂ܬ ܠܰܫܒܝ̣ܬܳܐ ܒܝܰܕ ܕܡܳܟ ܦܳܪܘ̣ܩܳܝܳܐ ܘܡܰܥܒܶܕ ܚܰܝ̈ܶܐ: ܘܠܰܐܝܠܶܝܢ ܕܡܶܛܽܠ ܥܒܳܪ ܦܘ̣ܩܕܳܢܳܐ ܬܚܶܝܬ ܢܝ̣ܪܳܐ ܕܡܰܘܬܳܐ ܐܶܫ̣ܬܰܥܒܰܕܘ̱ ܣܰܒ̣ܰܪܬ ܫܰܝܢܳܐ ܘܚܰܕܘ̣ܬܳܐ: ܟܰܕ ܠܳܐ ܚ̣ܙܰܝܬ ܚܒܳܠܳܐ ܩܳܡ̣ܬ ܒܫܘ̣ܒܚܳܐ ܐܰܝܟ ܐܰܠܳܗܳܐ: ܘܰܐܩܝ̣ܡܬ ܠܰܢ ܥܰܡܳܟ ܒܠܳܐ ܡܶܬ̣ܚܰܒܠܳܢܘ̣ܬܳܐ: ܗܰܘ̇ ܕܰܒܝܰܘܡܳܐ ܗܳܢܳܐ ܩܰܕܝ̣ܫܳܐ ܐܰܢܗ̣ܰܪܬ ܒܶܗ ܢܘ̣ܗܪܳܐ ܠܥܳܠܡܳܐ ܒܝܰܕ ܒܘ̣ܪ̈ܟܳܬܳܐ ܕܝ̣ܠܳܟ: ܘܒܶܗ ܣܓܝ̣ ܣܰܒܪܳܐ ܠܡܝ̣̈ܬܶܐ ܕܰܫܝܘ̣ܠ ܒܝܰܕ ܦܰܓܪܳܟ ܩܰܕܝ̣ܫܳܐ ܘܰܕܡܳܟ ܡܚܰܣܝܳܢܳܐ: ܒܶܗ ܚ̣ܙܰܘ ܚܢܳܢܳܟ ܒܝܰܕ ܡܰܥܰܠܬܳܟ ܕܰܠܩܰܒܪܳܐ: ܘܒܶܗ ܐܶܣܰܬ̣ܒܰܪܘ̱ ܬܰܠܡܝ̣̈ܕܶܐ ܡ̣ܶܢ ܡܰܠܰܐܟ̈ܶܐ ܥܰܠ ܢܘ̣ܚܳܡܳܟ: ܘܒܶܗ ܐܶܬܬܰܒ̣ܥܰܬ݀ ܫܝܘ̣ܠ ܕܬܰܦ̣ܢܶܐ ܦܰܓܪ̈ܶܐ ܕܡܝ̣̈ܬܶܐ ܕܰܒܓܰܘܳܗ̇ ܫ̇ܪܶܝܢ̣ ܗ̱ܘܰܘ: ܘܐܳܦ ܚܢܰܢ ܡܳܪܝܳܐ ܟܰܕ ܒܚܰܕܘ̣ܬܳܐ ܪܳܘܙܝ̣ܢܰܢ ܘܐܳܡ̇ܪܝ̣ܢܰܢ: ܝܰܘܡܳܢܳܐ ܚܰܘܝ̣ ܡܳܪܝܳܐ ܦܘ̣ܪܩܳܢܶܗ ܠܕܳܚ̈ܠܰܘܗ̱ܝ ܘܰܠܥܝ̣ܢ ܥܰܡ̱̈ܡܶܐ ܓܠܳܐ ܙܰܕܝ̣ܩܘ̣ܬܶܗ: ܝܰܘܡܳܢܳܐ ܥܰܡ ܡܙܰܡܰܪ ܟܳܗ̈ܢܳܝܳܬܳܐ ܕܰܘܝ̣ܕ ܢ̇ܰܙܥܶܩ ܘܢ̇ܺܐܡܰܪ: ܗܳܢܰܘ ܝܰܘܡܳܐ ܕܰܥܒ̣ܰܕ ܡܳܪܝܳܐ ܬܰܘ ܢ̇ܕܘ̣ܨ ܘܢܶܚ̇ܕܶܐ ܒܶܗ: ܗܳܢܰܘ ܝܰܘܡܳܐ ܕܠܳܐ ܗ̣ܘܳܐ ܩܕܳܡܰܘܗ̱ܝ ܐܰܟܘܳܬܶܗ ܐܳܦܠܳܐ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ: ܗܳܢܰܘ ܥܰܕܥܺܐܕܳܐ ܫܒܝ̣ܚܳܐ ܐܳܦ ܫܘ̣ܒܗܳܪܳܐ ܕܟܽܠܗܽܘܢ ܥܺܐܕ̈ܶܐ ܐ̱ܚܝܳܢܰܘ̈ܗ̱ܝ: ܝܰܘܡܳܢܳܐ ܚܰܕܘ̣ܬܳܐ: ܝܰܘܡܳܢܳܐ ܦܘ̣ܪܩܳܢܳܐ: ܝܰܘܡܳܢܳܐ ܥܺܐܕܳܐ ܘܥܰܕܥܺܐܕܳܐ ܕܡܰܠܟܳܐ ܕܡܰܠ̈ܟܶܐ: ܝܰܘܡܳܢܳܐ ܚܰܕܘ̣ܬܳܐ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܡܰܠܰܐܟ̈ܶܐ ܡܣܰܒܪܝ̣ܢ ܗ̱ܘܰܘ ܐܶܒܠܳܐ ܠܙܳܩܘ̣̈ܦܶܐ: ܒܘ̣ܝܳܐܳܐ ܠܬܰܠ̈ܡܝ̣ܕܶܐ: ܟܡܝ̣ܪܘ̣ܬܳܐ ܠܝܘ̣̈ܕܳܝܶܐ: ܕܰܘܨܳܐ ܘܰܦܨܝ̣ܚܘ̣ܬܳܐ ܠܓܰܒܳܐ ܝܰܡܝ̣ܢܳܝܳܐ ܕܥܺܕܬܳܐ: ܝܰܘܡܳܢܳܐ ܠܣܰܒܪܳܐ ܕܚܰܝ̈ܶܐ ܐܶܬ̣ܡܰܛܝ̣ܢܰܢ: ܢ̇ܫܰܒܰܚ ܠܗܰܘ̇ ܕܒܰܙܩܝ̣ܦܶܗ ܐܰܕܢܰܚ̣ ܠܰܢ ܣܰܒܪܳܐ ܕܚܰܝ̈ܶܐ: ܢ̇ܩܰܠܶܣ ܠܗܰܘ̇ ܕܰܫ̇ܪܶܐ̣ ܒܶܝܬ ܡܝ̣̈ܬܶܐ ܕܰܠܓܶܢܣܳܐ ܕܐ̱ܢܳܫܘ̣ܬܰܢ ܢܚ̣ܰܪܰܪ ܡ̣ܶܢ ܚܒܳܠܳܐ ܕܰܚܛܝ̣ܬܳܐ: ܢ̇ܪܰܡܪܶܡ ܠܗܰܘ̇ ܥܝ̣ܪܳܐ ܕܠܳܐ ܕܳܡܶܟ: ܕܣ̣ܳܡ ܝܰܘܡܳܢܳܐ ܬܰܫܘܺܝ̣ܬܶܗ ܒܶܝܬ ܥܰܢܝ̣̈ܕܶܐ ܘܰܕܡ̣ܶܟ: ܕܠܰܢ ܕܡܰܝܺـܝ̣ܬܝ̣ܢ ܗ̱ܘܰܝܢ ܒܰܚܛܝ̣ܬܳܐ ܒܡܰܘܬܶܗ ܕܰܚܠܳܦܰܝܢ ܚ̣ܰܪܰܪ: ܝܰܘܡܳܢܳܐ ܥܰܡ ܬܰܠܡܝ̣̈ܕܶܐ ܐܶܒܠܳܐ ܥܛܝ̣ܦܝ̣ܢܰܢ: ܠܰܡܚܳܪ ܥܰܡܗܽܘܢ ܚܳܕܶܝܢܰܢ: ܝܰܘܡܳܢܳܐ ܥܰܡ ܥܰܢܝ̣̈ܕܶܐ ܡܢ̣ܳܐ ܢܰܦܫܶܗ ܗܰܘ̇ ܕܰܡܥܝ̣ܪ ܠܥܰܢܝ̣̈ܕܶܐ ܒܩܳܠܶܗ: ܘܰܡܚܰܕܶܬ ܓܒܝ̣ܠܬܶܗ ܡ̣ܶܢ ܕܪܝ̣ܫ: ܐܶܬܡܳܠ ܓܶܝܪ ܒܰܙܩܝ̣ܦܳܐ ܚ̣ܙܰܝܢܳܝܗ̱ܝ ܠܗܰܘ̇ ܕܰܬܠܶܝܢ ܫܡܰܝܳܐ ܘܐܰܪܥܳܐ ܒܪܶܡܙܶܗ ܟܰܕ ܡܩܰܒܰܥ ܒܨܶܨ̈ܐ ܘܰܬܪܝ̣ܥ ܓܰܒܶܗ ܒܠܘ̣ܟܳܝܬܳܐ: ܝܰܘܡܳܢܳܐ ܚ̣ܙܰܝܢܳܝܗ̱ܝ ܠܰܡܫܝ̣ܚܳܐ ܒܩܰܒܪܳܐ ܠܗܰܘ̇ ܕܒ̣ܰܙ ܠܡܰܘܬܳܐ ܘܣܰܦ̣ܶܩ ܓܰܙܰܘ̈ܗ̱ܝ: ܠܬܰܚܬ ܫ̣ܶܐܠ ܝܰܘܣܶܦ ܡ̣ܶܢ ܦܝ̣ܠܰܛܘ̣ܣ ܕܰܢ̣ܥܰܦܶܝܘܗ̱ܝ ܐܰܝܟ ܕܰܠܡܝ̣ܬܳܐ ܒܛܰܝܒܘ̣ܬܶܗ: ܘܰܠܥܶܠ ܦܳܩܶܕ ܠܰܕܒܶܝܬ ܓܰܒܪܺܐܝܶܠ ܕܢܶܚ̣ܬܽܘܢ ܠܺܐܝ̣ܩܳܪ ܩܰܒܪܶܗ: ܗܳܪܟܳܐ ܡܫܰܐܠܳܐ ܡܰܪܝܰܡ ܟܰܕ ܒܳܟ̇ܝܳܐ ܡܰܢ ܫܰܩ̣ܠܶܗ ܡ̣ܶܢ ܩܰܒܪܳܐ: ܘܰܠܥܶܠ ܪܳܐܬܝ̣ܢ ܡܶܢܶܗ ܢܘ̣ܪ̈ܳܢܶܐ ܘܰܡܩܰܕܫܝ̣ܢ ܠܶܗ ܒܕܶܚܠܬܳܐ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܕܰܬܰܫ̣ܟܶܢ ܫܰܝܢܳܐ ܘܰܫܠܳܡܳܐ ܕܡܶܢܳܟ ܠܟܽܠܶܗ ܥܳܠܡܳܐ: ܘܬܶܣ̣ܥܘ̣ܪ ܒܣܳܥܘ̣ܪܘ̣ܬܳܐ ܕܛܰܝܒܘ̣ܬܳܟ ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܘܐܳܦ ܠܰܐܝܠܶܝܢ ܕܡܶܬ̣ܢܰܣܶܝܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ: ܘܬܶܥ̣ܒܶܕ ܠܰܢ ܕܘ̣ܟܪܳܢܳܐ ܛܳܒܳܐ ܘܰܡܩܰܒܠܳܐ ܩܕܳܡܰܝܟ ܠܟܽܠ ܡܰܢ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܐܰܫܘܳܐ ܐܶܢܽܘܢ ܘܠܰܢ ܥܰܡܗܽܘܢ ܠܗܳܝ̇ ܩܝܳܡܬܳܐ ܒܪܝ̣ܟܬܳܐ ܒܓܰܠܝܘ̣ܬ ܐܰܦ̈ܶܐ: ܕܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܰܡܥܳܠܡܺܝ̣ܢ ܐܰܡܝܢ܀