ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܥܰܬܝ̣ܪܳܐ ܪܳܚܶܡ ܡܶܣ̈ܟܺܢܶܐ ܘܝܳܗܘ̣ܒܳܐ ܠܰܣܢܝ̣̈ܩܶܐ ܐܝ̣ܬܰܝܟ ܡܳܪܝܳܐ: ܠܰܐܝܠܶܝܢ ܕܫܳܐܠܝ̣ܢ ܪ̈ܰܚܡܶܐ ܡܶܢܳܟ ܐܳܣܝܳܐ ܛܳܒܳܐ: ܕܩܳܪܶܐ ܠܰܟܪ̈ܝ̣ܗܶܐ ܕܬܰܘ ܐܶܬܰܐܣܰܘ ܡܰܓܳܢ: ܡܶܢܳܟ ܡܳܪܝ̱ ܫܳܐܠܝ̣ܢܰܢ ܕܰܬ̣ܩܰܒܶܠ ܨܰܘܡܰܢ ܘܰܨ̈ܠܰܘܳܬܰܢ ܘܬܶܫ̈ܡܫܳܬܰܢ ܘܬ̣ܶܬܶܠ ܐܳܣܝܘ̣ܬܳܐ ܠܟܺܐܒ̈ܰܝܢ ܘܚܘ̣ܣܳܝܳܐ ܠܚܰܘ̈ܒܰܝܢ ܘܫܘ̣ܒܩܳܢܳܐ ܠܰܚ̈ܛܳܗܰܝܢ ܘܫܰܝܢܳܐ ܠܥܰܡܳܟ: ܘܰܫܠܳܡܳܐ ܠܡܰܪܥܝ̣ܬܳܟ ܒܟܽܠܙܒܰܢ ܘܰܒܟܽܠܥܶܕܳܢ ܡܫܝ̣ܚܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܟܰܕ ܠܳܐ ܫ̣ܰܢܝ̣ ܡ̣ܶܢ ܠܘܳܬ ܐܰܒܘ̣ܗ̱ܝ ܥܰܡܰܢ ܗ̱ܘܳܐ ܐܰܟܘܳܬܰܢ: ܟܰܕ ܠܳܐ ܐܶܫܬܰܚ̣ܠܰܦ ܡ̣ܶܢ ܗܳܝ ܕܺܐܝܬܰܘܗ̱ܝ ܗ̱ܘܳܐ: ܘܟܰܕ ܠܳܐ ܣܢܝ̣ܩ ܗ̱ܘܳܐ ܥܰܠ ܨܰܘܡܳܐ ܨܳܡ̣ ܚܠܳܦܰܝܢ ܕܰܚܢܰܢ ܚܠܳܦ ܢܰܦ̈ܫܳܬܰܢ ܢ̇ܨܘ̣ܡ: ܘܟܰܕ ܗ̱ܘ̣ ܣܰܩܘ̣ܒܠܳܐ ܠܶܗ ܠܳܐ ܐܝ̣ܬ: ܐܶܬ̣ܟܰܬܰܫ ܥܰܡ ܒܥܶܠܕܰܪܰܢ ܕܠܰܢ ܢ̣ܚܰܘܶܐ ܕܰܐܝܟܰܢܳܐ ܢ̇ܰܩܪܶܒ ܒܙܰܒܢܳܐ ܕܣܳܥܶܐ ܥܠܰܝܢ ܢܳܟܘ̣ܠܳܐ ܐܰܝܟ ܕܥܰܠ ܐܰܒܳܗ̈ܰܝܢ ܩܰܕܡܳܝ̈ܶܐ: ܘܰܐܠ̣ܶܦ ܠܰܢ ܕܰܐܝܟܰܢ ܢ̇ܶܬܶܠ ܘܕܰܐܝܟܰܢ ܢ̇ܶܣܰܒ ܡܶܢܶܗ ܒܝ̣ܕܰܥܬܳܐ ܕܡ̣ܶܢ ܠܘܳܬܶܗ: ܗܰܘ̇ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܡܶܠܬܳܐ ܡܬܘ̣ܡܳܝܳܐ ܕܡ̣ܶܢ ܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ ܡܶܫܬܰܒܰܚ ܘܡܶܬܒܰܪܰܟ ܦܰܐܝܘ̣ܬ ܐܰܠܳܗܳܐܝ̣ܬ: ܘܡ̣ܶܢ ܬܶܓ̈ܡܶܐ ܠܳܐ ܗܘ̣ܠܳܢܳܝ̈ܶܐ ܡܰܬܗܰܕܰܪ ܘܡܶܬܪܰܡܪܰܡ ܫܒܝ̣ܚܳܐܝ̣ܬ: ܘܡ̣ܶܢ ܟܽܠܗܽܘܢ ܟܝ̈ܳܢܶܐ ܡܶܬܗܰܘ̈ܢܳܢܶܐ ܘܡܶܬܪ̈ܰܓܫܳܢܶܐ ܡܶܣܬܓܶܕ ܘܡܶܬܪܰܡܪܰܡ ܩܰܕܝ̣ܫܳܐܝ̣ܬ: ܗܰܘ̇ ܕܶܐܬ̣ܝ̣ܠܶܕ ܡ̣ܶܢ ܐܰܒܳܐ ܓܢܝ̣ܙܳܐ ܕܠܳܐ ܫܘ̣ܪܳܝ ܪܘ̣ܚܳܢܳܐܝ̣ܬ: ܝܺܠܝܕܘ̣ܬܳܐ ܡܬܘ̣ܡܳܝܬܳܐ ܕܠܳܐ ܡܶܬܕܰܪܟܳܐ ܘܰܠܟܽܠ ܡܰܚܫܰܒܬܳܐ ܘܡܶܠܬܳܐ ܥܳܒܪܳܐ ܬܗܝ̣ܪܳܐܝ̣ܬ: ܗܰܘ̇ ܫ̇ܘܶܐ̣ ܒܐܘ̣ܣܺܝܰܐ ܠܰܐܒܳܐ ܘܰܠܪܘ̣ܚܳܐ ܩܰܕܝ̣ܫܳܐ ܐܝ̣ܬܝܳܐܝ̣ܬ: ܘܰܒܪܶܡܙܶܗ ܐܶܬ̣ܬܰܝܬܝ̣ ܟܽܠ ܠܰܗܘܳܝܳܐ ܦܳܩܘ̣ܕܳܐܝ̣ܬ: ܗܰܘ̇ ܚܰܝܠܳܐ ܘܚܶܟܡܬܳܐ ܕܰܐܠܳܗܳܐ ܐܰܒܳܐ ܩܢܘ̣ܡܳܐܝ̣ܬ: ܕܰܐܚܝ̣ܕ ܘܰܡܕܰܒܰܪ ܠܟܽܠ ܒܚܶܟܡܬܶܗ ܐܝ̣ܬܝ݂ܳܝ݂ܬܳܐ ܬܡܝ̣ܗܳܐܝ̣ܬ: ܗܰܘ̇ ܕܟܰܕ ܓܳܠ̣ܘ̱ ܪ̈ܰܚܡܰܘܗ̱ܝ ܐܘ̣ܣܺܝ̈ܳܝ݂ܶܐ ܫܦܝ̣ܥܳܐܝ̣ܬ ܥܰܠ ܓܒܝ̣ܠܬܶܗ ܘܨܰܠܡܳܐ ܕܪܰܒܘ̣ܬܶܗ ܡܪܰܚܡܳܢܳܐܝ̣ܬ: ܒܚܰܪܬܳܐ ܕܙܰܒ̈ܢܶܐ ܐܶܬ̣ܳܐ ܒܛܰܝܒܘ̣ܬܶܗ ܠܡܰܘܠܳܕܳܐ ܐ̱ܢܳܫܳܝܳܐ ܨܶܒܝܳܢܳܐܝ̣ܬ: ܘܟܰܕ ܐܝ̣ܬܰܘܗ̱ܝ ܦܫܝ̣ܛܳܐ ܘܠܳܐ ܡܪܰܟܒܳܐ ܟܝܳܢܳܐܝ̣ܬ: ܐܶܬ̣ܥܰܛܰܦ ܗܰܕ̈ܳܡܶܐ ܕܒܶܣܪܳܐ ܘܶܐܬ̣ܳܐ ܠܪܘ̣ܟܳܒܳܐ ܦܰܓܪܳܢܳܐܝ̣ܬ: ܘܟܰܕ ܒܥܘ̣ܒܳܐ ܕܰܐܒܳܐ ܫ̇ܪܶܐ̣ ܓܢܝ̣ܙܳܐܝ̣ܬ: ܐܶܬ̣ܒܰܣܰܪ ܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܠܳܐ ܡܶܫܬܰܚܠܦܳܢܳܐܝ̣ܬ: ܘܟܰܕ ܐܝ̣ܬܰܘܗ̱ܝ ܪܳܡܳܐ ܘܰܡܫܰܒܚܳܐ ܘܰܠܥܶܠ ܡ̣ܶܢ ܡܰܕܪܟܳܢܘ̣ܬܳܐ ܕܗܰܘܢܳܐ ܠܳܐ ܡܶܬܡܰܠܠܳܢܳܐܝ̣ܬ: ܟܽܠܗܶܝܢ ܗܳܠܶܝܢ ܕܰܟܝܳܢܳܐ ܐ̱ܢܳܫܳܝܳܐ ܩܰܒ̣ܶܠ ܥܠܰܘܗ̱ܝ ܘܫܰܡ̣ܠܝ̣ ܣܛܰܪ ܡ̣ܶܢ ܚܛܝ̣ܬܳܐ ܠܚܘ̣ܕܳܐܝ̣ܬ ܘܟܰܕ ܩܰܕܝ̣ܫܳܐ ܐܝ̣ܬܰܘܗ̱ܝ ܘܰܡܚܰܠܠܳܢܳܐ ܕܰܡ̈ܟܰܬܡܶܐ ܘܫܳܒܘ̣ܩܳܐ ܕܰܚ̈ܛܳܗܶܐ ܡܚܰܣܝܳܢܳܐܝ̣ܬ: ܥܰܡ ܚܰܝܳܒ̈ܶܐ ܐܶܬ̣ܳܐ ܠܰܥܡܳܕܳܐ ܪܶܚܡܰܬ݀ ܐ̱ܢܳܫܳܐܝ̣ܬ: ܘܟܰܕ ܫܡܰܝܳܐ ܘܰܐܪܥܳܐ ܡܠܶܝܢ ܡ̣ܶܢ ܬܶܫܒܘ̣ܚܬܶܗ ܘܠܳܐ ܡܶܬܬܚܶܕ ܐܰܘ ܡܶܬܚܒܶܫ ܒܰܐܬܪܳܐ ܡܶܣܬܰܝܟܳܢܳܐܝ̣ܬ: ܗܳܝܕܶܝܢ ܠܡܰܕܒܪܳܐ ܐܶܬ̣ܕܒܰܪ ܡ̣ܶܢ ܪܘ̣ܚܳܐ ܒܰܪ ܐܝ̣ܬܘ̣ܬܶܗ ܕܢ̣ܶܬܢܰܣܶܐ ܡ̣ܶܢ ܐܳܟܶܠܩܰܪܨܳܐ ܨܶܒܝܳܢܳܐܝ̣ܬ ܘܟܰܕ ܡܩܰܒܠܳܢܳܐ ܕܨܰܘܡܳܐ ܘܰܨܠܘ̣ܬܳܐ ܥܰܡ ܐܰܒܳܐ ܐܝ̣ܬܰܘܗ̱ܝ ܒܰܣܝ̣ܡܳܐܝ̣ܬ: ܨܰܘܡܳܐ ܐܰܪܒܥܝ̣ܢܝܳܐ ܠܒ̣ܰܟ ܡܶܛܽܠ ܦܘ̣ܪܩܳܢܰܢ ܡܕܰܒܪܳܢܳܐܝ̣ܬ: ܘܟܰܕ ܡܳܪܳܐ ܕܰܢܒܺܝ̈ܶܐ ܘܕܰܫܠܝ̣̈ܚܶܐ ܐܝ̣ܬܰܘܗ̱ܝ ܫܰܪܝ̣ܪܳܐܝ̣ܬ: ܗܰܠ̣ܶܟ ܒܐܘ̣ܪܚܳܐ ܗܳܝ ܕܶܐܬܕܰܪܫ̣ܰܬ݀ ܡ̣ܶܢ ܗܳܢܽܘܢ ܕܩܰܕܶܡ̣ܘ̱ ܕܳܩ̣ܘ̱ ܘܰܒܥܰܝ̈ܢܶܐ ܟܰܣ̈ܝܳܬܳܐ ܚ̣ܙܰܐܘܽܘܗ̱ܝ ܐ̱ܪܳܙܳܢܳܐܝ̣ܬ: ܘܰܒܨܰܘܡܰܝ̈ܗܽܘܢ ܨܳܪܘ̱ ܗ̱ܘܰܘ ܨܘ̣ܪܬܳܐ ܕܨܰܘܡܶܗ ܩܰܕܝ̣ܫܳܐ ܛܘ̣ܦܣܳܢܳܐܝ̣ܬ: ܘܡܶܛܽܠ ܕܰܚ̣ܙܳܐ ܪܶܓܬܳܐ ܕܡܶܐܟܘ̣ܠܬܳܐ ܒܝܰܕ ܡܶܠܟܶܗ ܕܒܝ̣ܫܳܐ ܢܟܝ̣ܠܳܐ ܚ̣ܳܒ ܘܶܐܙ̣ܕܟܝ̣ ܘܰܢܦܰܠ ܐܳܕܳܡ ܕܳܘܝܳܐܝ̣ܬ: ܥܳܢܘܳܝܘ̣ܬܳܐ ܣ̣ܕܰܪ ܠܩܘ̣ܒܠܶܗ ܒܕܰܪܳܐ ܕܰܢ̣ܩܰܦܰܚ ܠܨܶܢ̈ܥܳܬܶܗ ܙܰܕܝ̣ܩܳܐܝ̣ܬ: ܘܟܰܕ ܒܨܰܘܡܶܗ ܐܰܪܒܥܝ̣ܢܝܳܐ ܪܕܳܐ ܡܰܟܝ̣ܟܳܐܝ̣ܬ: ܐܳܟܶܠܩܰܪܨܳܐ ܐܶܣ̣ܬܰܪܰܕ ܘܙ̣ܳܥ ܕܢ̣ܶܐܪܘ̣ܥ ܓܰܢ̱ܒܳܪܳܐܝ̣ܬ: ܘܟܰܕ ܚܙ̣ܳܝܗ̱ܝ ܕܰܟܦ̣ܶܢ ܡܕܰܒܪܳܢܳܐܝ̣ܬ: ܐܰܡ̣ܪܰܚ ܠܡܶܬܩܰܪܳܒܘ̣ ܠܘܳܬܶܗ ܓܘ̣ܡܕܳܢܳܐܝ̣ܬ: ܘܕܶܐܢ ܒܪܶܗ ܐܰܢ̱ܬ ܕܰܐܠܳܗܳܐ ܐܶܡ̣ܰܪ ܠܶܗ ܡܰܪܳܚܳܐܝ̣ܬ: ܐ̱ܡܰܪ ܕܟܺܐܦ̈ܶܐ ܠܰܚܡܳܐ ܠܳܟ ܢ̣ܶܗ̈ܘܳܝܢ ܦܳܩܘ̣ܕܳܐܝ̣ܬ: ܗܳܝܕܶܝܢ ܦܳܪܘ̣ܩܰܢ ܦܰܢܝ̣ ܠܘܳܬܶܗ ܢܝ̣ܚܳܐܝ̣ܬ: ܕܠܰܘ ܒܠܰܚܡܳܐ ܘܡܰܝ̈ܳܐ ܚܳܝܶܐ ܒܰܪܢܳܫܳܐ ܠܚܘ̣ܕܳܐܝ̣ܬ ܐܶܠܳܐ ܒܡܶܠܬܳܐ ܕܰܐܠܳܗܳܐ ܕܺܐܝܬܶܝܗ̇ ܬܘ̣ܪܣܳܝܳܐ ܕܚܰܝ̈ܶܐ ܠܰܒܢܰܝ̈ܢܳܫܳܐ ܫܰܪܝ̣ܪܳܐܝ̣ܬ: ܘܟܰܕ ܚ̣ܙܳܐ ܡܳܪܘ̣ܕܳܐ ܕܶܐܬ̣ܚܰܝܰܒ ܒܕܰܪܳܐ ܩܰܕܡܳܝܳܐ ܘܐܶܬ̣ܬܫܝ̣ܛܰܬ݀ ܪܳܡܘ̣ܬܶܗ ܐܶܬ̣ܕܰܘܰܕ ܡܡܰܪܡܪܳܢܳܐܝ̣ܬ: ܘܰܕܬܘ̣ܒ ܢ̣ܶܬܟܰܬܰܫ ܡܶܬܪܰܓܪܰܓ ܗ̱ܘܳܐ ܚܰܪܡܳܐܝ̣ܬ: ܘܡܶܬܚܰܫܰܒ ܗ̱ܘܳܐ ܕܒܰܐܝ̇ܕܳܐ ܥܶܠܬܳܐ ܐܰܘ ܐܰܝܢܳܐ ܦܘ̣ܪܣܳܐ ܢ̣ܶܨܠܶܐ ܕܰܪܳܐ ܘܰܢ̣ܥܝ̣ܪ ܬܰܟܬܘ̣ܫܳܐ ܥܰܙܝ̣ܙܳܐܝ̣ܬ: ܗܳܝܕܶܝܢ ܕܰܒ̣ܪܶܗ ܠܦܳܪܘ̣ܩܰܢ ܘܥܰܠ ܟܶܢܦܳܐ ܕܗܰܝܟܠܳܐ ܐܰܩܝ̣ܡܶܗ ܪܳܡܐܝ̣ܬ: ܟܰܕ ܗܽܘ̣ ܡܳܪܰܢ ܠܦܘ̣ܬ ܨܶܒܝܳܢܶܗ ܕܰܡܢܰܣܝܳܢܳܐ ܕܒܶܪ̈ܝܳܬܳܐ ܕܝ̣ܠܶܗ ܡܫܰܡܠܝܳܐܝ̣ܬ: ܠܕܘ̣ܟܬܳܐ ܕܝܳܗܒܳܐ ܐܝ̣ܕܳܐ ܠܕܰܪܳܐ ܘܠܰܘ ܗܽܘ̣ ܕܳܒܰܪ ܠܗܶ ܩܛܝ̣ܪܳܐܝ̣ܬ: ܘܟܰܕ ܚ̣ܙܳܝܗ̱ܝ ܕܩܳܐܶܡ ܠܥܶܠ ܡ̣ܶܢ ܟܶܢܦܳܐ ܕܗܰܝܟܠܳܐ ܒܗܝ̣ܠܳܐܝ̣ܬ ܘܶܐܡ̣ܰܪ ܠܶܗ ܡܢܰܣܝܳܢܳܐܝ̣ܬ: ܕܶܐܢ ܐܰܢ̱ܬ ܐܝ̣ܬܰܝܟ ܒܪܳܐ ܕܰܐܠܳܗܳܐ ܫܰܪܝ̣ܪܳܐ ܐܰܪܡܳܐ ܐܰܢ̱ܬ ܠܳܟ ܠܬܰܚܬ ܬܟܝ̣ܠܳܐܝ̣ܬ: ܟܬܝ̣ܒ ܓܶܝܪ ܕܰܠܡܰܠܰܐܟ̈ܰܘܗ̱ܝ ܢ̣ܦܰܩܶܕ ܡܶܛܽܠܳܬܳܟ ܥܠܰܝܟ ܚܦܝ̣ܛܳܐܝ̣ܬ: ܕܥܰܠ ܕܪ̈ܳܥܰܝܗܽܘܢ ܢ̣ܶܫܩܠܽܘܢܳܟ ܙܗܝ̣ܪܳܐܝ̣ܬ: ܗܳܝܕܶܝܢ ܡܳܪܰܢ ܦܰܢܝ̣ ܠܘܳܬܶܗ ܟܬܳܒܳܐܝ̣ܬ: ܕܬܘ̣ܒ ܟܬܝ̣ܒ ܕܠܳܐ ܬ̣ܢܰܣܶܐ ܠܡܳܪܝܳܐ ܐܰܠܳܗܳܟ ܡܬܘ̣ܡ ܣܰܟܠܳܐܝ̣ܬ: ܘܟܰܕ ܠܳܐ ܣܶܦ̣ܩܰܬ݀ ܠܶܗ ܚܰܝܳܒܘ̣ܬܶܗ ܘܡܰܦܘ̣ܠܬܶܗ ܒܝ̣ܫܳܐܝ̣ܬ ܐܶܠܳܐ ܥܰܠ ܕܰܪܳܐ ܬܠܝ̣ܬܳܝܳܐ ܚܳܒܶܨ ܗ̱ܘܳܐ ܛܪܽܘܢܐܝ̣ܬ: ܡܳܪܰܢ ܕܶܝܢ ܐܶܬ̣ܬܙܝ̣ܥ ܥܰܠ ܣܘ̣ܥܪܳܢܳܐ ܕܰܢܟܝ̣ܠܘ̣ܬܶܗ ܪܘ̣ܚܳܢܳܐܝ̣ܬ: ܘܟܽܠ ܐܰܝܟܳܐ ܕܰܨܒ̣ܳܐ ܝܰܗ̣ܒ ܢܰܦܫܶܗ ܕܢ̣ܺܐܙܰܠ ܥܰܡܶܗ ܠܰܘ ܒܰܩܛܝ̣ܪܳܐ ܐܶܠܳܐ ܨܶܒܝܳܢܳܐܝ̣ܬ: ܗܳܝܕܶܝܢ ܠܛܘ̣ܪܳܐ ܪܳܡܳܐ ܐܰܣܩ̣ܶܗ ܡܳܪܘ̣ܕܳܐܝ̣ܬ: ܘܰܣ̣ܕܰܪ ܩܕܳܡܰܘܗ̱ܝ ܟܽܠܗܶܝܢ ܡܰܠ̈ܟܘܳܬܳܐ ܕܡܶܬܥܰܡܪܳܢܝ̣ܬܳܐ ܥܰܡ ܫܘ̣ܒܚܗܶܝܢ ܫܪܰܓܪܳܓܳܝܳܐܝ̣ܬ: ܘܨܳܪ ܕܶܡ̈ܘܳܬܳܐ ܕܰܡܕ̈ܝ̣ܢܳܬܳܐ ܘܰܐܬܪ̈ܰܘܳܬܳܐ ܪ̈ܰܚܝ̣ܩܳܬܳܐ ܛܶܠܳܢܳܐܝ̣ܬ: ܘܚ̣ܰܘܝܶܗ ܥܘ̣ܬܪܳܐ ܕܣܝ̣̈ܡܳܬܳܐ ܘܓܰܙ̈ܶܐ ܕܡܰܠ̈ܟܶܐ ܘܐܘ̣ܚ̈ܕܳܢܰܝܗܶܝܢ ܒܦܰܢܛܰܣܺܝܰܐ ܣܪܝ̣ܩܳܐܝ̣ܬ: ܘܶܐܡ̣ܰܪ ܗܳܠܶܝܢ ܕܚܳܙܶܐ ܐܰܢ̱ܬ ܠܝ̣ ܐܶܢܶܝܢ ܟܘ̣ܠܳܢܳܐܝ̣ܬ: ܘܠܳܟ ܐܶ݀ܬܶܠ ܐܶܢ ܬ̣ܶܦܶܠ ܬ̣ܶܣܓܘ̣ܕ ܠܝ̣ ܩܰܠܝ̣ܠܳܐܝ̣ܬ: ܗܳܝܕܶܝܢ ܡܳܪܰܢ ܟ̣ܶܪܝܰܬ݀ ܠܶܗ ܥܰܠ ܫܒܝ̣ܬܳܐ ܐ̱ܢܳܫܳܝܬܳܐ ܕܡܶܬܥܰܫܡܳܐ ܡܶܢܶܗ ܥܰܘܳܠܳܐܝ̣ܬ: ܘܶܐܬ̣ܥܰܙܰܙ ܠܩܘ̣ܒܠܶܗ ܘܶܐܬ̣ܬܦܝ̣ܪ ܘܒܶܗ ܘܶܐܡ̣ܰܪ ܙܥܝ̣ܦܳܐܝ̣ܬ: ܕܙܶܠ ܠܳܟ ܠܒܶܣܬܰܪܝ̱ ܣܳܛܳܢܳܐ ܕܰܐܥ̣ܠܝ̣ܬ ܘܰܡ̣ܪܰܕܬ ܥܰܠ ܐܰܠܳܗܳܐ ܡܶܫܬܰܥܠܝܳܢܳܐܝ̣ܬ: ܟܬܝ̣ܒ ܕܰܠܡܳܪܝܳܐ ܐܰܠܳܗܳܟ ܬ̣ܶܣܓܘ̣ܕ ܡܶܛܽܠ ܕܰܠܒܰܪ ܡܶܢܶܗ ܐ̱ܚܪܺܢܳܐ ܠܳܐ ܐܝ̣ܬ: ܗܳܝܕܶܝܢ ܢܦ̣ܰܠ ܒܰܕܡܘ̣ܬ ܒܰܪܩܳܐ ܣܳܛܳܢܳܐ ܪܗܝ̣ܒܳܐܝ̣ܬ: ܘܥܰܠ ܕܰܓܥ̣ܰܪ ܘܒܶܗ ܦܳܪܘ̣ܩܳܐ ܨܶܦܚ̣ܰܬ݀ ܥܠܰܘܗ̱ܝ ܚܰܝܳܒܘ̣ܬܳܐ ܘܥܰܦ̣ܶܩ ܡܰܦܘ̣ܠܬܳܐ ܠܝ̣ܓܳܐܝ̣ܬ: ܘܟܰܕ ܫܰܡ̣ܠܝ̣ ܕܰܪ̈ܰܘܗ̱ܝ ܡܳܪܰܢ ܡܰܟܝ̣ܟܳܐܝ̣ܬ: ܘܶܐܬ̣ܬܰܓܰܪ ܙܳܟܘ̣ܬܳܐ ܪܰܒܬܳܐ ܠܰܟܝܳܢܳܐ ܐ̱ܢܳܫܳܝܳܐ ܢܰܨܝ̣ܚܳܐܝ̣ܬ: ܗܳܝܕܶܝܢ ܡܰܠܰܐܟ̈ܶܐ ܒܬܶܗܪܳܐ ܪܰܒܳܐ ܗ̣ܘܰܘ ܟܰܕ ܚ̣ܙܰܘ ܠܰܡܪܰܚܡܳܢܳܐ ܕܰܚܠܳܦ ܥܰܒ̈ܕܶܐ ܡܳܪ̈ܘܽܕܶܐ ܩܳܡ ܒܰܐܓܽܘ̣ܢܳܐ ܠܒܝ̣ܒܳܐܝ̣ܬ: ܘܰܪܘܰܙܘ̱ ܒܙܳܟܘ̣ܬܳܐ ܕܢܰܨܚ̣ܶܗ ܘܫܰܡ̣ܶܫܘ̱ ܒܗܘ̣ܠܳܠܰܝ̈ܗܽܘܢ ܘܰܒܩܘ̣ܕܳܫܰܝ̈ܗܽܘܢ ܫܒܝ̣ܚܳܐܝ̣ܬ: ܘܩܰܒ̣ܶܠܘ̱ ܒܘ̣ܪ̈ܟܳܬܳܐ ܠܰܚ̈ܕܳܕܶܐ ܥܰܡ ܩܘ̣̈ܠܳܣܶܐ ܘܪܘ̣ܡܪ̈ܳܡܶܐ ܗܕܝ̣ܪܳܐܝ̣ܬ ܠܗܰܘ̇ ܕܰܒܨܰܘܡܶܗ ܩܰܕܝ̣ܫܳܐ ܫܰܦ̣ܶܠ ܠܥܘ̣ܫܢܶܗ ܕܰܢܟܝ̣ܠܳܐ ܚܰܝܠܬܳܢܳܐܝ̣ܬ: ܘܰܐܣ̣ܪܶܗ ܠܚܰܣܝ̣ܢܳܐ ܒܥܘ̣ܫܢܶܗ ܩܪܰܒܬܳܢܳܐܝ̣ܬ: ܘܰܠܟܽܠܶܗ ܥܘ̣ܬܪܳܐ ܘܣܝ̣̈ܡܳܬܳܐ ܘܡܰܪ̈ܓܳܢܝܳܬܳܐ ܝܰܩܝ̣ܪ̈ܳܬ݀ ܕܡܰܝ̈ܳܐ ܕܰܫܒ̣ܳܐ ܘܰܚܡ̣ܰܠ ܛܠܘ̣ܡܳܐܝ̣ܬ: ܐܰܦ̣ܶܩ ܘܒ̣ܰܙ ܘܬܰܒ̣ܰܪ ܦܰܚ̈ܰܘܗ̱ܝ ܘܰܡܨܺܝ̣̈ܕܳܬܶܗ ܓܡܝ̣ܪܳܐܝ̣ܬ: ܘܰܐܩܝ̣ܡ ܠܰܐܝܠܶܝܢ ܕܰܣܚܝ̣ܦܝ̣ܢ ܒܦܶܚܬܳܐ ܕܰܚܛܝ̣ܬܳܐ ܥܓܝ̣ܢܳܐܝ̣ܬ: ܘܰܐܓܥ̣ܶܠ ܨܰܘܡܶܗ ܠܦܳܪ̈ܘܽܫܶܐ ܕܢ̣ܶܥܡܠܽܘܢ ܘܒܶܗ ܙܰܕܝ̣ܩܳܐܝ̣ܬ ܘܠܘ̣ܩܒܰܠ ܚܰܫ̈ܶܐ ܕܰܚܛܝ̣ܬܳܐ ܢ̣ܺܐܪܥܽܘܢ ܩܺܐܪܣܳܐ ܚܠܝ̣ܨܳܐܝ̣ܬ: ܘܢ̣ܶܙܟܽܘܢ ܘܰܢ̣ܚܰܝܒܽܘܢܝܗ̱ܝ ܠܳܐܟܶܠܩܰܪܨܳܐ ܕܢܳܛܰܪ ܐܳܐܰܪ ܕܰܫܠܝ̣ܚ ܩܳܐܶܡ ܥܰܪܛܶܠܳܐܝ̣ܬ: ܘܒܳܥܶܐ ܕܢ̣ܰܩܪܶܒ ܥܰܡ ܨܰܝܳܡ̈ܶܐ ܕܢ̣ܶܪܕܽܘܢ ܒܐܘ̣ܪ̈ܚܳܬܶܗ ܥܩܰܠܩܠܳܐܝ̣ܬ: ܘܰܐܣ̣ܪܰܚ ܡܰܠܦܳܢܘ̣ܬܳܐ ܫܰܪܝ̣ܪܬܳܐ ܠܰܐܓܽܘܢܝ̣ܣ̈ܛܶܐ ܟܰܫܝ̣ܪ̈ܶܐ ܕܰܐܝܟܰܢ ܢ̣ܶܙܟܽܘܢܳܝܗ̱ܝ ܒܰܐܓܽܘܢܳܐ ܛܰܪܩܳܐܝ̣ܬ: ܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܡܶܬܚܰܢܳܢܳܐܝ̣ܬ ܒܝܰܘܡܳܐ ܗܳܢܳܐ ܕܫܘ̣ܠܳܡ ܨܰܘܡܳܐ ܗܳܢܳܐ ܩܰܕܝ̣ܫܳܐ ܕܰܐܪܒܥܝ̣ܢ ܝܰܘ̈ܡܝ̣ܢ ܡܫܰܡܠܝܳܐܝ̣ܬ: ܘܡܶܬܟܰܫܦܝ̣ܢܰܢ ܠܰܡܪܰܚܡܳܢܘ̣ܬܳܟ ܚܢܝ̣ܓܳܐܝ̣ܬ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܬܪܽܘܢܘ̣ܣ ܕܺܐܝܩܳܪܳܟ ܡܩܰܪܒܝ̣ܢܰܢ ܩܰܕܝ̣ܫܳܐܝ̣ܬ: ܩܰܒܶܠ ܨܰܘܡܰܢ ܒܨܝ̣ܪܳܐ ܘܰܨܠ̈ܰܘܳܬܰܢ ܕܰܠܝ̣̈ܠܳܬܳܐ ܗܰܢܺܝܳܐܝ̣ܬ: ܘܠܳܐ ܬ̣ܶܚܫܘ̣ܒ ܠܰܙ̈ܢܰܝܳܐ ܕܡܰܗܡܝܳܢܘ̣ܬܳܐ ܕܶܐܫ̣ܬܰܡܰܫܘ̱ ܡܶܢܰܢ ܕܳܘ̈ܰܝܳܐ ܡܚܝ̣ܠܳܐܝ̣ܬ: ܡܶܛܽܠ ܕܰܪܓܝ̣ܓ ܠܡܶܬܰܠ ܥܰܬܝ̣ܪܳܐܝ̣ܬ ܠܰܐܝܠܶܝܢ ܕܫܳܐܠܝ̣ܢ ܠܳܟ ܚܘܝ̣ܚܳܐܝ̣ܬ: ܘܠܳܐ ܡܰܗܡܶܐ ܐܰܢ̱ܬ ܡ̣ܶܢ ܐܰܝܠܶܝܢ ܕܩܳܪܶܝܢ ܠܳܟ ܠܰܘ ܠܳܐ ܠܶܒܳܢܳܐܝ̣ܬ: ܘܗܳܫܳܐ ܩ̣ܪܶܒ ܚܰܫܳܟ ܦܳܪܘ̣ܩܳܝܳܐ ܕܒܶܗ ܐܶܠܦܳܐ ܕܨܰܝܳܡ̈ܶܐ ܐܰܝܟ ܕܒܰܠܡܺܐܢܳܐ ܡܶܬܬܢܝ̣ܚܳܐ ܢܰܘܚܳܐܝ̣ܬ: ܐܰܫܘܳܐ ܠܰܢ ܕܥܰܡ ܒܬܘ̣̈ܠܳܬܳܐ ܚܰܟܝ̣̈ܡܳܬܳܐ ܡܛܰܝܒܳܐܝ̣ܬ: ܒܠܰܡ̈ܦܺܐܕܶܐ ܕܗܰܝܡܳܢܘ̣ܬܳܐ ܫܰܪܝ̣ܪܬܳܐ ܘܕܘ̣ܒܳܪ̈ܶܐ ܡܝܰܬܪ̈ܶܐ ܒܡܶܫܚܳܐ ܕܰܡܪܰܚܡܳܢܘ̣ܬܳܐ ܢ̇ܶܐܪܘ̣ܥ ܠܓܶܠܝܳܢܳܟ ܢܰܗܝ̣ܪܳܐܝ̣ܬ: ܘܢ̇ܶܥܘ̣ܠ ܥܰܡܳܟ ܠܰܓܢܘ̣ܢܳܐ ܦܨܝ̣ܚܳܐܝ̣ܬ: ܘܠܳܐ ܠܒܰܪ ܡ̣ܶܢ ܬܰܪܥܳܐ ܕܚܰܓܳܟ ܢ̇ܦܘ̣ܫ ܒܒܶܟܝܳܐ ܘܰܒܬܶܢܚ̈ܳܬܳܐ ܡܰܪܝ̣ܪܳܐܝ̣ܬ: ܘܥܰܬܶܕ ܠܰܢ ܠܡܶܬܒܰܣܳܡܘ̣ ܒܦܶܨܚܳܟ ܩܰܕܝ̣ܫܳܐ ܪܘ̣ܚܳܢܳܐܝ̣ܬ ܘܰܠܡܶܫܬܰܘܬܳܦܘ̣ ܒܦܰܓܪܳܟ ܘܰܕܡܳܟ ܡܚܰܣܝܳܢܳܐ ܩܰܕܝ̣ܫܳܐܝ̣ܬ: ܘܠܳܐ ܠܐ̱ܢܳܫ ܡܶܢܰܢ ܬ̣ܶܫܒܘ̣ܩ ܕܢ̣ܶܗܘܶܐ ܠܐ̱ܪ̈ܳܙܰܝܟ ܐܰ‌ܠܳܗܳܝ̈ܶܐ ܡܢܰܟܪܝܳܐܝ̣ܬ: ܘܗܰܒܠܰܢ ܕܢ̇ܶܚܰܫ ܒܚܰܫܳܟ ܕܰܚܠܳܦܰܝܢ ܟܰܫܝ̣ܪܳܐܝ̣ܬ: ܐܰܝܟܰܢܳܐ ܕܢ̇ܶܚܕܶܐ ܘܢ̇ܶܪܘܰܙ ܥܰܡܳܟ ܒܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ ܪܘ̣ܚܳܢܳܐܝ̣ܬ: ܘܰܥܒܶܕ ܠܰܢ ܚܕܘ̣ܓ̈ܶܐ ܒܡܶܫܬܘ̣ܬܳܟ ܪܘ̣ܚܳܢܳܝܬܳܐ ܕܢ̇ܶܬܦܨܰܚ ܒܳܟ ܚܳܕܝܳܐܝ̣ܬ ܘܢ̇ܶܚܕܶܐ ܒܳܟ ܐܰܡܝ̣ܢܳܐܝ̣ܬ: ܡܳܐ ܕܨܰܝܳܡ̈ܶܐ ܟܰܫܝ̣ܪ̈ܶܐ ܕܰܪܥܝܘ̣ܟ ܒܕܘ̣ܒܳܪ̈ܰܝܗܽܘܢ ܟܺܐܢܳܐܝ̣ܬ: ܡܩܰܪܒܝ̣ܢ ܪܘ̣ܡܝܳܢܳܐ ܕܰܡܝܰܬܪܘ̣ܬܗܽܘܢ ܦܳܪܘ̣ܫܳܐܝ̣ܬ: ܘܰܡܩܰܒܠܝ̣ܢ ܡܶܢܳܟ ܟܠܝ̣̈ܠܶܐ ܕܰܦܐܶܝܢ ܠܕܘ̣ܒܳܪ̈ܰܝܗܽܘܢ ܘܳܠܝܳܐܝ̣ܬ: ܢ̣ܚܰܣܶܐ ܚܰܘ̈ܒܶܐ ܘܰܚ̈ܛܳܗܶܐ ܕܝ̣ܠܰܢ ܟܢܝ̣ܫܳܐܝ̣ܬ: ܘܠܳܐ ܬ̣ܶܟܠܶܐ ܪ̈ܰܚܡܰܝܟ ܡܶܢܰܢ ܗܳܕܶܐ ܫܳܐܠܝ̣ܢܰܢ ܡܶܬܓܰܪܓܚܳܢܳܐܝ̣ܬ: ܘܢܰܛܰܪ ܠܰܢ ܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܠܳܐ ܡܶܨܛܰܠܝܳܢܳܐܝ̣ܬ: ܘܨܰܒܶܬ ܠܰܢ ܒܕܘ̣ܒܳܪ̈ܶܐ ܕܠܳܐ ܥܶܕܠܳܝ ܦܰܐܝܘ̣ܬ ܟܪܝ̣ܣܛܝܳܢܳܐܝ̣ܬ: ܘܫܰܟܶܢ ܠܰܢ ܕܰܒܕܰܟܝܘ̣ܬܳܐ ܕܢܰܦܫܳܐ ܘܰܒܩܰܕܝ̣ܫܘ̣ܬܳܐ ܕܦܰܓܪܳܐ ܘܒܰܚܠܝ̣ܡܘ̣ܬܳܐ ܕܗܰܘܢܳܐ ܡܫܰܪܪܳܐܝ̣ܬ: ܢ̇ܚܰܓܶܐ ܘܰܢ̇ܪܰܡܪܶܡ ܠܥܺܐܕ̈ܶܐ ܕܰܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ ܥܰܡ ܝܘ̣ܒܳܠܳܐ ܕܙܰܒ̈ܢܶܐ ܘܕܰܫ̈ܢܰܝܳܐ ܡܶܬܟܰܪܟܳܢܳܐܝ̣ܬ: ܘܶܐܡܰܬܝ̱ ܕܰܠܚܰܝ̈ܶܐ ܗܳܠܶܝܢ ܬܢܳܢܳܝ̈ܶܐ ܡܚܰܠܦܝ̣ܢܰܢ ܡܫܰܢܝܳܢܳܐܝ̣ܬ: ܐܰܫܘܳܐ ܠܰܢ ܕܢ̇ܶܬܩܰܒܰܠ ܡܶܢܳܟ ܒܰܐܦ̈ܶܐ ܓܰܠܝ̈ܳܬܳܐ ܡܫܰܝܢܳܐܝ̣ܬ: ܘܰܚܢܰܢ ܘܥܰܢܝ̣̈ܕܰܝܢ ܡܗܰܝ̈ܡܢܶܐ ܫܰܘܝܳܐܝ̣ܬ: ܢ̇ܶܫܬܘܶܐ ܠܩܰܘܡܳܐ ܝܰܡܝ̣ܢܳܝܳܐ ܥܰܡ ܩܪ̈ܰܝܳܐ ܕܡܶܫܬܘ̣ܬܳܟ ܓܰܒܝܳܐܝ̣ܬ: ܕܢ̇ܶܬܒܰܣܰܡ ܒܛܳܒ̈ܳܬܳܐ ܕܰܡܠܝ̣̈ܟܳܢ ܠܩܰܕܝ̣̈ܫܰܝܟ ܒܥܳܠܡܳܐ ܚܰܕܬܳܐ ܠܳܐ ܥܳܒܘ̣ܪܳܐܝ̣ܬ: ܘܥܰܠ ܟܽܠܰܢ ܬ݂ܪܰܚܶܦܝ̱ ܚܰܝܘ̣ܣܬܳܢܘ̣ܬܳܟ ܒܛܝ̣ܠܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܝ̣ܢ ܒܒܳܥܘ̣ ܡܶܢܳܟ ܡܳܪܝܳܐ ܐܰܠܳܗܳܐ ܒܰܣܝ̣ܡܳܐ ܘܥܳܒܶܕ ܛܳܒ̈ܬܳܐ ܗܰܘ̇ ܕܨܳܡ̣ܬ ܚܠܳܦ ܦܘ̣ܪܩܳܢܳܐ ܕܝ̣ܠܰܢ ܟܰܕ ܐܰܢ̱ܬ ܐܝ̣ܬܰܝܟ ܡܩܰܒܠܳܢܳܐ ܕܨܰܘ̈ܡܶܐ ܘܕܰܨ̈ܠܰܘܳܬܳܐ ܕܩܰܕܡܳܝ̈ܶܐ ܘܕܰܐ̱ܚܪ̈ܳܝܶܐ: ܩܰܒܶܠ ܡ̣ܶܢ ܐܝ̣̈ܕܰܝܳܐ ܕܝ̣ܠܰܢ ܚܰܠܳܫ̈ܳܬܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܠܳܟ ܒܝܰܘܡܳܐ ܗܳܢܳܐ ܕܦܘ̣ܪܩܳܢܳܐ ܘܰܕܙܳܟܘ̣ܬܳܐ: ܘܩܰܒܶܠ ܡ̣ܶܢ ܦܘ̣ܡܰܢ ܨܰܘܡܳܐ ܘܡ̣ܶܢ ܠܶܫܳܢܰܢ ܬܶܫܒܘ̣ܚܬܳܐ ܘܡ̣ܶܢ ܠܶܒܰܢ ܬܰܘܕܝ̣ܬܳܐ: ܘܗܰܒܠܰܢ ܚܠܳܦ ܗܳܠܶܝܢ ܚܰܝܠܳܐ ܘܥܘ̣ܫܢܳܐ ܥܰܠ ܣܳܛܳܢܳܐ ܒܥܶܠܕܒܳܒܰܢ: ܘܚܘ̣ܡܣܳܢܳܐ ܕܰܒܝܰܘ̈ܡܳܬܳܐ ܗܳܠܶܝܢ ܕܚܰܫܳܟ ܦܳܪܘ̣ܩܳܝܳܐ ܕܥܝ̣ܪܳܐܝ̣ܬ ܘܙܰܕܝ̣ܩܳܐܝ̣ܬ ܢ̇ܶܫܗܰܪ ܘܰܢ̇ܨܘ̣ܡ ܘܰܢ̇ܨܰܠܶܐ ܩܕܳܡܰܝܟ: ܐܰܫܘܳܐ ܠܰܢ ܠܰܢܘ̣ܗܪܳܐ ܕܡܰܠܟܘ̣ܬܳܐ ܕܝ̣ܠܳܟ ܘܰܠܫܘ̣ܒܚܳܐ ܕܡܳܪܘ̣ܬܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀