ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܶܠܬܶܗ ܕܰܐܒܳܐ ܕܶܐܬ̣ܒܰܪܢܰܫ ܡܶܛܽܠ ܦܘ̣ܪܩܳܢܰܢ: ܘܶܐܬ̣ܥܰܢܘܝ̣ ܒܨܰܘܡܳܐ ܕܰܐܪܒܥܝ̣ܢ ܝܰܘ̈ܡܝ̣ܢ ܡܶܛܽܠ ܕܘ̣ܟܳܝܰܢ: ܘܰܐܫ̣ܶܦ ܗܽܘ̣ ܠܶܗ ܠܟܰܦܢܳܐ ܨܶܒܝܳܢܳܝܳܐ ܡܶܛܽܠ ܚܘ̣ܪܳܪܰܢ ܘܰܢܚ̣ܶܬ ܠܕܰܪܳܐ ܪܘ̣ܚܳܢܳܝܳܐ ܕܥܰܡ ܣܳܛܳܢܳܐ ܣܳܢܳܐܐ ܕܐ̱ܢܳܫܘ̣ܬܰܢ ܡܶܛܽܠ ܙܳܟܘ̣ܬܰܢ: ܘܰܒܫܘ̣ܠܳܡ ܐܰܓܽܘܢܶܗ ܬܗܝ̣ܪܳܐ ܘܡܳܪܢܳܝܳܐ ܙܰܝܢܳܐ ܚܰܝܠܬܳܢܳܐ ܝܰܗ̣ܒ ܠܰܢ: ܕܒܶܗ ܢ̇ܶܥܒܶܕ ܩܪܳܒܳܐ ܥܰܡ ܒܥܶܠܕܰܪܳܐ ܕܰܒܠܰܥܒܘ̣ܬܳܐ ܘܝܰܥܢܘ̣ܬܳܐ ܘܡܰܣܒܪܳܢܘ̣ܬܳܐ ܚܰܝܒ̣ܰܢ ܒܦܰܪܕܰܝܣܳܐ: ܕܠܶܗ ܝܳܐܶܐ ܫܘ̣ܒܚܳܐ ܕܥܰܠ ܣܰܒܪܶܗ ܫ̣ܰܪܝ̣ܢܰܢ ܒܨܰܘܡܳܐ: ܘܗܳܫܳܐ ܥܰܠ ܬܘ̣ܟܠܳܢܶܗ ܫܰܠܶܡ̣ܢܰܢ: ܕܗܽܘ̣ ܢ̣ܰܫܘܶܐ ܠܰܢ ܒܛܰܝܒܘ̣ܬܶܗ ܠܗܰܘ̇ ܫܘ̣ܘܕܳܝܳܐ ܕܰܡܠ̣ܰܟ ܠܰܢ ܒܰܣܒܰܪܬܶܗ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢܘ̣ ܡ̣ܶܢ ܠܒܺܝ̣̈ܫܰܝ ܒܶܣܪܳܐ ܡܶܫܟܰܚ ܦܳܪܰܥ ܒܪܶܬܡܳܐ ܕܣܶܦ̈ܘܳܬܳܐ ܕܝ̣ܠܶܗ ܬܶܫܒ̈ܚܳܬܳܐ ܕܙܳܕ̈ܩܳܢ ܠܚܘ̣ܒܳܟ ܐܰܠܳܗܰܢ ܫܰܪܝ̣ܪܳܐ ܝܶܫܘ̣ܥ ܡܫܝ̣ܚܳܐ: ܐܰܘ ܠܡܰܢ ܐܝ̣ܬ ܒܢ̈ܳܬ ܩ̈ܳܠܶܐ ܕܣܳܦ̈ܩܳܢ ܠܰܡܡܰܠܳܠܘ̣ ܬܰܘܕܝ̣ܬܳܐ ܕܫܳܘ̈ܝܳܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܐܰܠܳܗܰܢ ܣܓܝ̣ܕܳܐ: ܟܽܠ ܡ̈ܶܠܶܐ ܘܦܶܬܓ̈ܳܡܶܐ ܡܶܢܳܟ ܐܶܢܽܘܢ ܡܶܠܬܳܐ ܐܰܠܳܗܳܐ: ܘܟܽܠ ܩܘ̣̈ܠܳܣܶܐ ܘܪܘ̣ܡܪ̈ܳܡܶܐ ܕܝ̣ܠܳܟ ܐܶܢܽܘܢ: ܘܟܽܠ ܡܰܘ̈ܗܒܳܬܳܐ ܛܳܒ̈ܳܬܳܐ ܘܒܘ̣ܪ̈ܟܳܬܳܐ ܫܦܝ̣̈ܥܳܬܳܐ ܡܶܢܳܟ ܪܳܕܶܝܢ: ܘܡܶܛܽܠ ܗܳܕܶܐ ܚܢܰܢ ܗܳܢܽܘܢ ܕܰܒܨܰܠܡܳܟ ܚܰܝܳܐ ܒ̣ܪܰܝܬ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܡ̣ܶܢ ܫܘ̣ܪܳܝܳܐ: ܘܰܒܫܘ̣ܠܳܡ ܙܰܒ̈ܢܶܐ ܠܚܘ̣ܕܳܬܰܢ ܐܰܘܟܝ̣ܬ ܠܦܘ̣ܪܩܳܢܰܢ ܕܡ̣ܶܢ ܐܝ̣̈ܕܰܝ ܡܚܰܒܠܳܢܳܐ ܐܶܬ̣ܬܰܚܬܝ̣ܬ: ܘܐܘ̣ܪܚܳܐ ܕܡܰܘܒܠܳܐ ܠܰܐܬܪܰܢ ܩܰܕܡܳܝܳܐ ܒܰܩܢܘ̣ܡܳܟ ܠܰܢ ܚܰܘܝ̣ܬ: ܘܫܘ̣ܚܠܳܦܳܐ ܕܡ̣ܶܢ ܒܝ̣̈ܫܳܬܳܐ ܠܦܘ̣ܠܚܳܢ ܛܳܒ̈ܳܬܳܐ ܒܡܶܠܬܳܐ ܘܒܰܥܒܳܕܳܐ ܠܰܢ ܐܰܠܶܦ̣ܬ: ܡܶܟܝ̣ܠ ܐܰܝܟ ܕܠܰܥܒܳܕ ܛܳܒ̈ܳܬܰܢ ܒܟܽܠܙܒܰܢ ܒܳܥ̈ܘܳܬܳܐ ܘܬܰܟܫ̈ܦܳܬܳܐ ܡܩܰܪܒܝ̣ܢܰܢ ܠܡܳܪܘ̣ܬܳܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܝܰܘ̈ܡܳܬܳܐ ܗܳܠܶܝܢ ܐ̱ܚܪ̈ܳܝܶܐ ܘܰܠܩܝ̣̈ܫܳܝܶܐ ܕܨܰܘܡܳܐ ܩܰܕܝ̣ܫܳܐ: ܕܬ̣ܶܓܡܘ̣ܪ ܠܘܳܬܰܢ ܫܘ̣ܘ̈ܕܳܝܰܝܟ ܫܰܪܝ̣ܪ̈ܶܐ ܐܰܝܠܶܝܢ ܕܶܐܫ̣ܬܰܘܕܝ̣ܬ ܠܦܳܥ̈ܠܶܐ ܟܰܫܝ̣ܪ̈ܶܐ: ܕܰܣܒܰܪܬܳܟ ܡܰܥܒܕܰܬ݀ ܚܰܝ̈ܶܐ: ܒܫܘ̣ܠܳܡ ܨܰܘܡܰܢ ܡܳܪܝ̱ ܐܰܫܘܳܐ ܠܰܢ ܠܰܐܓܪܳܐ ܛܳܒܳܐ ܘܰܡܫܰܡܠܝܳܐ ܕܰܡܠ̣ܰܟܬ ܠܛܳܒ̈ܶܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܓܰܠܝܘ̣ܬ ܐܰܦ̈ܶܐ ܕܰܐܢ̱ܬ ܐܶܫ̣ܬܰܘܕܝ̣ܬ ܠܙܰܕܝ̣̈ܩܶܐ: ܒܫܘ̣ܠܳܡ ܨܰܘܡܳܐ ܕܝ̣ܠܰܢ ܡܳܪܝ̱: ܐܰܫܘܳܐ ܠܰܢ ܠܗܳܝ ܒܰܪ̱ܬ݀ ܩܳܠܳܐ ܕܩܳܪܝܳܐ ܠܟܺܐܢ̈ܶܐ ܠܒܶܝܬ ܡܰܠܟܘ̣ܬܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܐܘ̣ܪܥܳܐ ܦܨܝ̣ܚܳܐ ܘܡܰܦܨܚܳܢܳܐ ܕܓܶܠܝܳܢܳܟ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܰܟܠܝ̣̈ܠܶܐ ܕܢܰܨ̈ܝ̣ܚܶܐ ܓܳܡܪ̈ܰܝ ܨܶܒܝܳܢܳܟ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܒܘ̣ܣܳܡܳܐ ܕܰܚܫܳܡܝ̣ܬܳܐ ܐ̱ܪܳܙܳܢܳܝ̇ܬܳܐ ܘܪܘ̣ܚܳܢܳܝܬܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܰܚܠܘ̣ܠܳܟ ܪܰܒܳܐ ܘܠܳܐ ܡܰܘܦܝܳܢܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܦܶܨܚܳܟ ܚܰܝܳܐ ܘܠܳܐ ܡܶܬܟܰܡܪܳܢܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܚܰܕܘ̣ܬܳܐ ܥܦܝ̣ܦܬܳܐ ܕܰܩܝܳܡܬܳܐ ܕܝ̣ܠܳܟ ܡܰܥܒܕܰܬ݀ ܚܰܝ̈ܶܐ ܘܠܳܐ ܡܶܬܚܰܒܠܳܢܝ̣ܬܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܠܡܰܥܰܠܬܳܐ ܕܠܰܓܢܽܘܢܳܟ ܕܢܘ̣ܗܪܳܐ ܥܰܡ ܗܳܠܶܝܢ ܚܰܟܝ̣̈ܡܳܬܳܐ: ܒܫܘ̣ܠܳܡ ܨܰܘܡܰܢ ܡܳܪܝ̱: ܐܰܫܘܳܐ ܠܰܢ ܛܳܒ̈ܳܬܳܐ ܘܒܘ̣ܪ̈ܟܳܬܳܐ ܡ̣ܶܢ ܒܶܝܬ ܓܰܙܳܟ ܥܰܬܝ̣ܪܳܐ ܘܰܕܠܳܐ ܚܳܣܰܪ ܘܗܰܒ ܡܳܪܝܳܐ ܠܰܟܪ̈ܝ̣ܗܰܝ ܒܢܰܦܫܳܐ ܘܰܒܦܰܓܪܳܐ ܚܘ̣ܠܡܳܢܳܐ ܓܡܝ̣ܪܳܐ ܠܰܐܠܝ̣̈ܨܰܝ ܒܟܰܦܢܳܐ ܘܰܒܚܰܣܝ̣ܪܘ̣ܬܳܐ ܣܰܒܥܳܐ ܙܝܳܢܬܳܐ ܡܫܰܪܬܰܚܬܳܐ: ܘܠܰܐܣܝ̣ܪ̈ܰܝ ܡ̣ܶܢ ܒܝ̣ܫܳܐ ܚܘ̣ܪܳܪܳܐ ܘܰܓܗܳܝܬܳܐ: ܠܫܰܒ̈ܝ݂ܰܝ݂ ܡ̣ܶܢ ܚܰܫ̈ܶܐ ܘܡ̣ܶܢ ܐ̱ܢܳܫ̈ܳܐ ܒܝ̣̈ܫܶܐ ܦܘ̣ܨܳܝܳܐ ܠܰܚ̈ܒܝ̣ܫܰܝ ܒܰܡ̈ܓܰܠܶܐ ܘܰܒܒܶܝܬ ܐܰܣܝ̣ܪ̈ܶܐ ܦܘ̣ܪܩܳܢܳܐ: ܠܰܡܛܰܪ̈ܦܰܝ ܒܶܝܬ ܓܰܠ̱̈ܠܶܐ ܕܝܰܡ̱̈ܡܶܐ ܘܒܶܝܬ ܡܰܚ̈ܫܘ̣ܠܶܐ ܕܥܳܠܡܳܐ ܢܰܘܚܳܐ ܕܒܰܠܡܺܐܢܳܐ ܠܰܕܒܝ̣ܪ̈ܰܝ ܩܛܝ̣ܪܳܐܝ̣ܬ ܡ̣ܶܢ ܪ̈ܳܕܘ̣ܦܶܐ ܛܪ̈ܽܘܢܶܐ ܫܘ̣ܘܙܳܒܳܐ: ܠܰܕܛܳܥܶܝܢ ܒܐܘ̣ܪ̈ܚܳܬܳܐ ܩܰܫ̈ܝܳܬܳܐ ܦܽܘܢܳܝܳܐ ܠܕܰܦܟܝ̣ܪܝ̣ܢ ܒܫܝ̣ܫ̈ܠܳܬܳܐ ܕܥܘ̣ܬܪܳܐ ܫܪܳܝܳܐ ܘܺܐܝܕܳܐ ܡܪܰܚܡܳܢܝ̣ܬܳܐ: ܠܕܰܕܒܝ̣ܪܝ̣ܢ ܒܝ̣ܫܳܐܝ̣ܬ ܠܚܶܡܬܳܐ ܩܳܛܘ̣ܠܬܳܐ ܫܘ̣ܗܳܝܳܐ: ܠܰܐܝܠܶܝܢ ܕܰܡܫܰܥܒܕܝ̣ܢ ܠܟܰܪܣܳܐ ܛܳܠܘ̣ܡܬܳܐ ܚܘ̣ܪܳܪܳܐ: ܠܰܐܝܠܶܝܢ ܕܰܫܒܶܝܢ ܠܪܶܓܬܳܐ ܡܚܰܒܠܳܢܝ̣ܬܳܐ ܕܘ̣ܥܳܟܳܐ: ܠܰܐܝܠܶܝܢ ܕܣܰܪܝ̣ܟܝ̣ܢ ܒܪܶܚܡܰܬ݀ ܫܘ̣ܒܚܳܐ ܘܪܝ̣ܫܳܢܘ̣ܬܳܐ ܬܘ̣ܗܳܝܳܐ: ܠܰܐܝܠܶܝܢ ܕܫܰܦܠܝ̣ܢ ܚܘ̣ܝܳܠܳܐ: ܠܰܐܝܠܶܝܢ ܕܰܡܥܳܩܝ̣ܢ ܒܘ̣ܝܳܐܳܐ: ܠܰܐܝܠܶܝܢ ܕܢܰܦܝ̣ܠܝ̣ܢ ܬܘ̣ܪܳܨܳܐ: ܠܪ̈ܝ̣ܫܰܝ ܟܳܗ̈ܢܶܐ ܕܶܝܢ ܘܰܠܟܳܗ̈ܢܶܐ ܘܰܡܫܰܡ̈ܫܳܢܶܐ ܢܘ̣ܛܳܪܳܐ ܘܰܐܘܝܘ̣ܬܳܐ: ܠܣܳܒ̈ܶܐ ܘܠܰܥܠܰܝ̈ܡܶܐ ܘܰܠܓܰܕ̈ܘ̣ܕܶܐ ܫܘ̣ܘܫܳܛܳܐ ܕܒܰܡܝܰܬܪܘ̣ܬܳܐ: ܠܰܛܠܳܝ̈ܶܐ ܘܫܰܒܪ̈ܶܐ ܣܶܬܳܪܳܐ: ܠܕܰܝܪ̈ܳܝܶܐ ܘܝ̣ܚܝ̣̈ܕܳܝܶܐ ܘܰܡܛܰܪ̈ܦܶܐ ܚܘ̣ܡܣܳܢܳܐ: ܠܰܒ̈ܬܘ̣ܠܶܐ ܘܰܠܒܬܘ̣̈ܠܳܬܳܐ ܠܒܝ̣ܒܘ̣ܬܳܐ: ܠܚܰܛܳܝ̈ܶܐ ܫܘ̣ܒܩܳܢܳܐ: ܠܟܽܠܶܗ ܬܶܓܡܳܐ ܕܙܰܕܝ̣̈ܩܶܐ ܥܘ̣ܕܪܳܢܳܐ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܚܘ̣ܣܳܝܳܐ: ܘܰܠܗܰܘ̇ ܕܰܥܡ̣ܰܠ ܘܣ̣ܳܡ ܘܰܟ̣ܬܰܒ ܪ̈ܰܚܡܶܐ ܘܰܚܢܳܢܳܐ: ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀