ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܚܰܬܢܳܐ ܫܡܰܝܳܢܳܐ ܕܠܳܐ ܥܳܒ̇ܪܳܐ ܡܶܫܬܘ̣ܬܶܗ: ܘܰܙܡܝ̣̈ܢܰܘܗ̱ܝ ܠܳܐ ܚܳܣ̇ܪܝ̣ܢ: ܠܗܰܘ̇ ܡܡܰܠܝܳܢܳܐ ܕܚܰܣܝ̣ܪ̈ܳܬܳܐ ܕܥܰܡ ܥܰܒܕܰܘ̈ܗ̱ܝ ܠܰܚܠܘ̣ܠܳܐ ܐܶܙܕܰܡܰܢ: ܘܰܠܚܰܣܝ̣ܪ̈ܘܳܬܶܗ ܕܚܰܬܢܳܐ ܨܪܝ̣ܟܳܐ ܘܚܰܣܝ̣ܪܳܐ ܡܰܠܝ̣: ܠܗܰܘ̇ ܕܰܒܡܶܠܬܶܗ ܒܳܪܝܰܬ݀ ܟܽܠ: ܦܰܩ̣ܶܕ ܠܶܐܣܛܘ̣ܟܣܳܐ ܫܰܪܝܳܐ ܕܡܰܝ̈ܳܐ ܘܚܰܡܪܳܐ ܪܝ̣ܫܳܝܳܐ ܘܰܚ̇ܠܶܐ̣ ܪܝ̣ܚܳܐ ܗ̱ܘܳܐ: ܙܰܡ̣ܶܢ ܠܟܽܠܰܢ ܡܳܪܰܢ ܒܛܰܝܒܘ̣ܬܳܟ ܠܰܚܠܘ̣ܠܳܐ ܕܝ̣ܠܳܟ ܗܰܘ̇ ܡܚܰܕܝܳܢܳܐ: ܘܰܠܦܶܨܚܳܐ ܗܰܘ̇ ܐ̱ܪܳܙܳܢܳܝܳܐ ܘܩܰܕܝ̣ܫܳܐ: ܘܢ̇ܰܘܕܶܐ ܘܰܢ̇ܫܰܒܚܳܟ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܠܟܳܐ ܚܰܝܠܬܳܢܳܐ ܐܰܠܳܗܳܐ ܡܶܠܬܳܐ: ܗܰܘ̇ ܨܰܠܡܳܐ ܚܰܝܳܐ ܕܰܐܒܳܐ ܘܨܶܡܚܳܐ ܫ̇ܘܶܐ̣ ܒܐܘ̣ܣܺܝܰܐ ܘܒܰܡܬܘ̣ܡܳܝܽܘ̣ܬܳܐ ܕܝܳܠܘ̣ܕܶܗ: ܗܰܘ̇ ܕܡ̣ܶܢ ܡܰܘ̈ܬܒܶܐ ܡܰܠ̈ܟܳܝܶܐ ܘܰܫܡܰܝ̈ܳܢܶܐ ܠܘܳܬ ܡܶܣܟܺܢܘ̣ܬܳܐ ܕܝ̣ܠܰܢ ܪܰܒܘ̣ܬܳܟ ܐܰܪܟܶܢ̣ܬ: ܟܰܕ ܠܳܐ ܫܰܢܝ̣ܬ ܡ̣ܶܢ ܥܘ̣̈ܒܶܐ ܐܰܒܳܗ̈ܳܝܶܐ: ܘܟܰܕ ܒܡܶܬܒܰܪܢܫܳܢܘ̣ܬܳܟ ܐܰܠܳܗܳܝܬܳܐ ܠܰܓܒܝ̣ܠܬܳܐ ܕܝ̣ܠܰܢ ܡ̣ܶܢܕܪܝ̣ܫ ܚ̣ܰܕܶܬܬ: ܘܫܰܘܝ̈ܰـܝ ܒܩܰܘܡܳܐ ܕܓܘ̣̈ܕܶܐ ܡܰܠܰܐܟܳܝ̈ܳܬܳܐ ܠܰܢ ܠܥܰܦܪ̈ܳܢܶܐ ܚܰܘܺܝ̣ܬ: ܐܰܫܘܳܐ ܠܰܢ ܕܰܒܬܶܫܒܘ̣ܚܬܳܐ ܘܰܐܘܝܘ̣ܬܳܐ ܕܪܘ̣ܚܳܐ ܡܡܰܠܠܘ̣ܬ ܬܶܫܒܘ̣ܚܬܳܐ ܕܦܰܐܝܳܐ ܠܳܟ ܢ̇ܰܣܶܩ: ܘܥܰܡ ܪ̈ܘ̣ܚܳܢܶܐ ܘܰܡܫܰܡ̈ܫܳܢܶܐ ܘܠܳܐ ܗܘ̣̈ܠܳܢܳܝܶܐ ܕܰܠܥܶܠ ܢ̇ܩܰܪܶܒ ܠܳܟ ܣܶܓ݂ܕܬܳܐ: ܘܦܘ̣ܠܚܳܢܳܐ ܪܘ̣ܚܳܢܳܝܳܐ: ܬܶܫܒ̈ܚܳܬܳܐ: ܒܘ̣ܪ̈ܟܳܬܳܐ: ܗܘ̣ܠ̈ܳܠܶܐ: ܪܘ̣ܡܪ̈ܳܡܶܐ: ܩܘ̣ܕ̈ܳܫܶܐ ܬܠܝ̣̈ܬܳܝܶܐ ܕܡ̣ܶܢ ܣܪ̈ܳܦܶܐ ܩܰܕܝ̣̈ܫܶܐ ܡܶܬܬܰܙܥܩܝ̣ܢ ܠܳܟ ܥܰܡ ܐܰܒܳܐ ܘܪܘ̣ܚܳܐ: ܘܠܰܘ ܡܶܛܽܠ ܠܳܐ ܢܳܡܘ̣ܣ̈ܳܝܘܳܬܳܐ ܕܰܥܒ̈ܳܕܰܝܢ ܒܝ̣̈ܫܶܐ ܬ̣ܰܗܡܶܐ ܡ̣ܶܢ ܫܰܦܝ̣ܪܘ̣ܬ ܣܳܥܘ̣ܪ̈ܘܳܬܳܐ ܕܥܘ̣ܕܪ̈ܳܢܰܝܟ ܕܰܠܘܳܬܰܢ: ܐܠܳܐ ܐܰܝܟ ܕܠܰܒ̈ܢܰܝ ܐܰܪܥܳܐ ܘܚܰܛܳܝ̈ܶܐ ܘܰܕܒܶܣܪܳܐ ܣܰܓܝ̣ ܚܰܫ̈ܶܐ ܠܒܝ̣ܫܝ̣ܢ: ܐܰܣܪܰܚ ܫܘ̣ܒܩܳܢܳܐ ܠܰܡܚܝ̣ܠܘ̣ܬܰܢ: ܕܰܟܳܐ ܠܶܒܰܘ̈ܳܬܰܢ: ܐܰܨܡܰܚ ܒܰܢ ܫܘ̣ܦܪܳܐ ܩܰܕܡܳܝܳܐ ܕܰܒܪܺܝ̣ܬܰܢ: ܐܳܦ ܓܶܝܪ ܡ̣ܶܢ ܩܕܝ̣ܡ ܟܰܕ ܚ̣ܙܰܝܬ ܕܛܳܥܶܝܢܰܢ ܡܶܢܳܟ ܘܰܠܦܘ̣ܠܚܳܢܳܐ ܕܫܺܐܕ̈ܶܐ ܐܶܬ̣ܬܰܩܒܰܠܢܰܢ: ܘܰܟܪܝ̣ܗܝ̣ܢ ܗ̱ܘܰܝܢ ܒܗܳܠܶܝܢ ܠܳܐ ܡܶܬܚܰܙܝ̈ܳܢܝܳܬܳܐ: ܠܘܳܬ ܓܶܢܣܳܐ ܕܝ̣ܠܰܢ ܐܶܬ̣ܬܰܚܬܝ̣ܬ: ܟܰܕ ܒܒܶܣܪܳܐ ܘܰܕܡܳܐ ܠܰܢ ܐܶܫ̣ܬܰܘܬܰܦܬ ܘܡ̣ܶܢ ܡܰܪܒܥܳܐ ܦܰܓܪܳܢܳܐܝ̣ܬ ܐܶܬ̣ܝ̣ܠܶܕܬ: ܘܒܰܪܶܟ̣ܬ ܠܡܰܥܰܠܬܰܢ ܕܰܠܥܳܠܡܳܐ: ܘܰܠܗܰܝܟܠܳܐ ܣܠ̣ܶܩܬ: ܠܡܘ̣ܠܳܝ ܐܰܪܒܥܺܝ̣ܢ ܝܰܘܡܝ̣̈ܢ ܐܰܝܟ ܢܳܡܘ̣ܣܳܐ ܕܥܶܒܪ̈ܳܝܶܐ: ܘܠܰܥܡܳܕܳܐ ܩܰܕܝ̣ܫܳܐ ܕܒܶܗ ܠܳܐܕܳܡ ܪܝ̣ܫ ܓܒܝ̣ܠܬܰܢ ܐܰܥܡ̣ܶܕܬ: ܩܕܳܡ ܝܽܘܚܰܢܳܢ ܟܳܪܘ̣ܙܳܟ ܒܝܽܘܪܕܢܳܢ ܢܰܗܪܳܐ ܪܝ̣ܫܳܟ ܐܰܪܟܶܢ̣ܬ: ܘܡ̣ܶܢ ܬܰܡܳܢ ܠܡܰܕܒܪܳܐ ܫܰܢܝ̣ܬ ܘܥܰܡ ܐܳܟܶܠܩܰܪܨܳܐ ܐܶܬ̣ܟܰܬܰܫܬ: ܘܡ̣ܶܢ ܒܳܬܰܪ ܕܰܪܳܐ ܕܥܰܡ ܡܪܰܡܝܳܢܳܐ ܚ̣ܙܳܟ ܝܽܘܚܰܢܳܢ ܘܰܢܩ̣ܶܦܘ̱ ܠܳܟ ܬܰܠܡܝ̣̈ܕܰܘܗ̱ܝ ܟܰܕ ܒܰܓܠܝ̣ܠܳܐ ܐܶܬ̣ܗ̣ܰܦܰܟܬ: ܐܶܫܟܰܚ̣ܬ ܠܦܝ̣ܠܝ̣ܦܳܘܣ: ܘܰܒܝܰܘܡܳܐ ܬܠܝ̣ܬܳܝܳܐ ܠܩܳܛܢܶܐ ܐܶܙܕܰܡܰܢ̣ܬ: ܗܳܝ ܕܒܳܗ̇ ܡܶܫܬܘ̣ܬܳܐ ܠܐ̱ܢܳܫܳܐ ܡܶܣܟܺܢܳܐ ܡܛܰܝܒܳܐ ܗ̱ܘܳܬ ܒܰܡܕܰܒܪܳܢܘ̣ܬܳܐ: ܕܬ̣ܶܬܝ̣ܕܰܥܝ̱ ܪܰܒܘ̣ܬܳܟ ܟܣܝ̣ܬܳܐ: ܘܟܰܕ ܗܳܢܽܘܢ ܣܡܝ̣̈ܟܶܐ ܘܚܰܬܢܳܐ ܥܰܡ ܫܰܘܫܒܝ̣ܢܳܐ ܘܰܙܡܝ̣̈ܢܶܐ ܟܽܠܗܽܘܢ ܒܰܚܠܘ̣ܠܳܐ ܥܳܒܘ̣ܪܳܐ ܡܶܬܦܰܨܚܝ̣ܢ: ܚܰܡܪܳܐ ܐܰܘܦܝ̣ ܠܶܗ ܕܐܶܬ̣ܡܙܰܓ݂ ܠܘ̣ܩܕܰܡ ܕܨܳܐܰܪ ܠܢܳܡܘ̣ܣܳܐ ܥܰܬܝ̣ܩܳܐ ܕܚܰܡܪܳܐ ܛܳܒܳܐ ܘܚܰܕܬܳܐ ܢ̣ܶܬܚܰܘܶܐ: ܡ̣ܶܢܫܶܝܠܝ̱ ܙܡܝ̣̈ܢܶܐ ܥܰܠ ܚܰܬܢܳܐ ܡܪܰܛܢܝ̣ܢ ܗ̱ܘܰܘ ܕܟܳܣܰܝ̈ܗܽܘܢ ܐܰܘܦܝ̣ܘ: ܘܰܚܠܳܦ ܩܘ̣ܒܳܠܛܰܝܒܘ̣ܬܳܐ ܒܬܰܚܡܶܨܬܳܐ ܘܒܶܗܬܬܳܐ ܠܚܰܬܢܳܐ ܘܒܰܝܬܳܝܰܘ̈ܗ̱ܝ ܪܳܫܶܝܢ ܗ̱ܘܰܘ: ܗܳܝܕܶܝܢ ܓܶܠܝܳܢܳܐܝ̣ܬ ܠܶܐܡܳܟ ܒܬܘ̣ܠܬܳܐ ܩܰܕܝ̣ܫܬܳܐ ܐܰܙܝ̣ܥܬ: ܘܰܐܝܟ ܐܶܡܳܐ ܟܢܝ̣ܟܬܳܐ ܕܦܰܪܶܗܣܺܝܰܐ ܩܰܢܝܳܐ ܠܘܳܬܳܟ: ܟܰܣܝܳܐܝ̣ܬ ܒܳܚܰܪ ܠܶܒܳܐ ܘܟܘ̣ܠ̈ܝܳܬܳܐ ܩܶܪܒ̣ܰܬ݀ ܘܒܰܦܝܳܣܳܐ ܠܘܳܬܳܟ ܐܶܡ̣ܪܰܬ݀ : ܐܳܘ ܒܶܪܝ̱ ܚܰܘܳܐ ܚܰܝܠܳܐ ܕܪܰܒܘ̣ܬܳܟ ܠܗܽܘܢ: ܐܳܘ ܒܶܪܝ̱ ܚܰܡܪܳܐ ܠܰܝܬ ܠܗܽܘܢ ܕܠܳܐ ܢ̣ܶܒܗܰܬ ܡܶܣܟܺܢܳܐ ܕܰܩ̣ܪܳܟ ܠܘܳܬܶܗ: ܐܰܢ̱ܬ ܕܶܝܢ ܛܳܒܳܐ ܕܠܳܐ ܐܳܠܶܡ ܙܥܝ̣ܦܳܐܝ̣ܬ ܠܘܳܬܳܗ̇ ܦܰܢܝ̣ܬ: ܕܡܳܐ ܠܝ̣ ܘܠܶܟܝ̱ ܐܰܢ̱ܬܬܳܐ: ܒܕܘ̣ܒܳܪܳܐ ܐ̱ܚܪܺܢܳܐ ܩܳܝܡܳܐ ܗ̱ܘܳܬ݀ ܡܰܪܝܰܡ ܘܰܒܕܘ̣ܒܳܪܳܐ ܐ̱ܚܪܺܢܳܐ ܝܶܫܘܽܥ: ܦܶܩ̣ܕܰܬ݀ ܠܶܗ ܐܰܝܟ ܡܫܰܠܰܛܬܳܐ: ܘܰܥܢܳܗ̇ ܝܶܫܘܽܥ ܐܰܝܟ ܒܰܪ ܚܺܐܪ̈ܶܐ: ܚܰܡܪܳܐ ܠܰܡ ܠܰܝܬ ܠܗܽܘܢ ܕܫܘ̣ܠܛܳܢܳܐ ܗ̱ܝ ܡܶܠܬܳܐ: ܘܰܐܝܟ ܐܶܡܳܐ ܒܦܘ̣ܩܕܳܢܳܐ ܡܡܰܠܠܳܐ: ܕܰܐܝܟ ܕܫܰܚܠ̣ܶܦܬ ܡܰܝ̈ܳܐ ܠܚܰܡܪܳܐ ܛܳܒܳܐ ܗܳܟܰܢܳܐ ܫܰܚܠܶܦ ܠܰܢ ܡ̣ܶܢ ܒܝ̣̈ܫܳܬܳܐ ܠܛܳܒ̈ܳܬܳܐ: ܗܳܫܳܐ ܡܦܝ̣ܣܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡܰܝܟ ܡܩܰܪܒܝ̣ܢܰܢ: ܒܗܳܢܳܐ ܝܰܘܡܳܐ ܕܥ̱ܘ̣ܗܕܳܢܳܐ ܕܛܳܒ̈ܳܬܳܟ ܘܣܳܥܘ̣ܪܘ̣ܬ ܬܶܕܡܪ̈ܳܬܳܟ ܕܰܬ̣ܫܰܚܠܶܦ ܡ̣ܶܢܢ ܠܙܰܒ̈ܢܶܐ ܒܝ̣̈ܫܶܐ ܘܡܰܪ̈ܕܘܳܬܳܐ ܩܰܫܝ̈ܳܬܳܐ ܕܪܘ̣ܓܙܳܐ: ܠܘܳܬ ܙܰܒܢ̈ܶܐ ܡܦܰܬܟ̈ܰܝ ܒܛܳܒ̈ܳܬܳܐ ܘܰܫܦܝ̣̈ܥܰܝ ܒܒܘ̣ܪ̈ܟܳܬܳܐ: ܘܰܡܨܰܒ̈ܬܰܝ ܒܚܰܕ̈ܘܳܬܳܐ ܣܒܝ̣̈ܣܳܬܳܐ: ܘܰܐܪܕܳܐ ܠܰܢ ܥܘ̣ܕܪ̈ܳܢܶܐ ܡ̣ܶܢ ܝܰܡܳܐ ܠܳܐ ܡܶܬܬܟܝ̣ܠܳܢܳܐ ܕܰܚܢܳܢܳܟ: ܘܰܕܚܘ̣ܩ ܡܶܢܰܢ ܠܡܰܡܠ̱ܠܳܐ ܠܳܐ ܡܛܰܟܣܳܐ ܐܰܝܟ ܕܗܳܝܕܶܝܟ ܡ̣ܶܢ ܙܡܝ̣̈ܢܶܐ ܕܩܳܛܢܶܐ: ܘܰܡܠܝ̣ ܠܦܘ̣̈ܡܰܝܢ ܡܡܰܠܠܘ̣ܬ ܬܶܫܒܘ̣ܚܬܳܐ ܕܝ̣ܠܳܟ ܐܰܠܳܗܳܝܬܳܐ: ܘܡ̣ܶܢ ܚܰܡܪܳܐ ܡܰܪܝ̣ܪܳܐ ܕܥܳܩ̈ܳܬܳܐ ܫܰܘܙܶܒ ܠܰܢ: ܘܥܰܠ ܐܰܓܳܢܳܐ ܗܳܝ̇ ܪܘ̣ܚܳܢܳܝܬܳܐ ܐܰܣܡܶܟ ܠܰܢ: ܘܐܰܝܟ ܡܶܠܬܳܟ ܘܫܽܘܘ̣ܕܳܝܳܟ ܕܰܠܘܳܬ ܫܠܝ̣̈ܚܰܝܟ: ܢ̇ܶܫܬܘܶܐ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܣܰܓܝ̈ܶܐܐ: ܘܰܕܢ̇ܶܫܬܶܝܘܗ̱ܝ ܚܰܕܬܳܐ ܒܰܣܡܳܟܳܟ ܗܰܘ̇ ܕܠܳܐ ܥܳܒܰܪ: ܘܰܚܢܰܢ ܘܥܰܢܝ̣̈ܕܰܝܢ ܡܗܰܝ̈ܡܢܶܐ ܢ̇ܶܬܒܰܣܰܡ ܒܪܰܘܳܝܽܘ̣ܬܳܐ ܗܳܝ ܕܛܳܥܝܳܐ ܠܚܰܝ̈ܶܐ ܦܰܓܪ̈ܳܢܳܝܶܐ ܘܚܘ̣ܫ̈ܳܒܶܐ ܢܰܦܫ̈ܳܢܳܝܶܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܺܝ̣ܬܳܐ ܚܰܬܢܳܐ ܫܡܰܝܳܢܳܐ ܡܫܝ̣ܚܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀