ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܐ̱ܪܳܙܳܐ ܟܰܣܝܳܐ ܘܠܳܐ ܡܶܬܡܰܠܠܳܢܳܐ ܕܐܶܬ̣ܓܠܝ̣ ܒܰܒܣܰܪ: ܘܐܶܬ̣ܟܪܶܙ ܘܐܶܬ̣ܗܰܝܡܰܢ ܒܥܳܠܡܳܐ: ܘܡܶܢ ܥܰܡ̱̈ܡܶܐ ܐܶܬ̣ܩܰܒܰܠ ܘܐܶܬ̣ܡܰܠܰܠ ܡܶܢ ܬܰܠܡܝ̣̈ܕܶܐ: ܘܶܐܬ̣ܚܰܘܝ̣ ܡ̣ܶܢ ܫܠܝ̣ܚ̈ܶܐ: ܘܠܶܗ ܚܢܰܢ ܟܽܠܰܢ ܒܢܰܝ̈ ܐ̱ܪܳܙܳܐ ܕܗܰܝܡܳܢܘ̣ܬܳܐ: ܢ̇ܰܘܕܶܐ ܘܢܶܣ̇ܓܘ̣ܕ ܘܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܰܒܚܺܝ̣ܢܰܢ ܠܳܟ ܡܳܪܳܐ ܕܐ̱ܪ̈ܳܙܶܐ ܡܫܝ̣ܚܳܐ ܦܳܪܘ̣ܩܳܐ ܕܝ̣ܠܢ: ܕܐ̱ܪܳܙܳܢܳܐܝ̣ܬ ܐܶܬ̣ܡܰܠܰܠܬ ܡܶܢ ܢܒܺܝ̈ܶܐ ܘܛܘ̣ܦܣܳܢܳܐܝ̣ܬ ܐܶܬ̣ܚܙܰܝܬ ܠܡܰܐ̱ܪ̈ܙܳܢܶܐ: ܘܓܰܠܝܳܐܝ̣ܬ ܐܶܬ̣ܒܰܕܰܩܬ ܒܝܰܕ ܛܘ̣̈ܦܣܶܐ ܕܚܰܙܳܝ̈ܶܐ: ܗܰܘ̇ ܕܰܠܝܰܘܡܳܟ ܣܰܟܝ̣ ܐܰܒܪܳܗܳܡ ܕܢܶܚ̣ܙܶܐ ܘܰܚ̣ܙܳܐ ܘܰܚ̣ܕܝ̣: ܟܰܕ ܥܰܠ ܪܝ̣ܫ ܛܘ̣ܪܳܐ ܓܶܠܝܳܢܳܟ ܫܒܝ̣ܚܳܐ ܠܶܗ ܐܶܬ̣ܚܰܘܝ̣: ܒܶܐܡܪܳܐ ܗܰܘ̇ ܕܰܗ̣ܘܳܐ ܕܶܒܚܳܐ ܚܠܳܦ ܐܝ̣ܣܚܳܩ: ܠܶܗ ܡܶܢ ܣܰܟܝ̣ܢܳܐ ܦ̣ܪܰܩ: ܘܰܠܡܘ̣ܫܶܐ ܬܘ̣ܒ ܢܰܗܝ̣ܪܳܐܝ̣ܬ ܐܶܬܝ̣ܕܰܥ: ܒܐ̱ܪܳܙܶܗ ܕܐܶܡܪܳܐ ܗܰܘ ܕܡܶܬܢܟܶܣ ܗ̱ܘܳܐ ܒܶܝܬ ܪ̈ܰܡܫܶܐ: ܘܡܶܬܝ̣ܗܶܒ ܗ̱ܘܳܐ ܒܶܗ ܦܘ̣ܪܩܳܢܳܐ ܠܒܘ̣ܟܪ̈ܶܐ ܐܝ̣ܣܰܪ̈ܠܳܝܶܐ: ܐܰܢ̱ܬ ܕܶܝܢ ܐܶܡܪܶܗ ܕܐܰܠܳܗܳܐ ܗܰܘ̇ ܕܰܫܩܰܠ̣ܬ ܒܰܙܩܝ̣ܦܳܟ ܚܛܝ̣ܬܶܗ ܕܥܳܠܡܳܐ: ܟܰܕ ܠܶܐܡܪܳܐ ܗܰܘ̇ ܢܳܡܘ̣ܣܳܝܳܐ ܥܰܡ ܬܰܠܡܝ̣̈ܕܰܝܟ ܐܶܟܰܠ̣ܬ: ܘܰܠܦܶܨܚܳܐ ܗܰܘ̇ ܐ̱ܪܳܙܳܢܳܝܳܐ ܫܰܡܠܝ̣ܬ ܘܫ̣ܰܘܕܰܥ̣ܬ ܠܗܽܘܢ ܕܗܰܘ̇ ܛܘ̣ܦܣܳܐ ܐܶܫܬ̣ܠܶܡ: ܘܛܶܠܳܠܳܐ ܐܶܬ̣ܓܡܰܪ: ܡܶܟܝ̣ܠ ܫܪܳܪܳܐ ܙܳܕܶܩ ܕܢ̣ܶܬܚܰܘܶܐ: ܐ̱ܪܳܙ ܠܝ̣ ܐ̱ܪܳܙ ܠܝ̣ ܘܠܰܒܢܰܝ̈ ܒܰܝܬܝ̱ ܘܐ̱ܪܳܙܳܐ ܚ̣ܰܕܬܳܐ ܡܶܬ̣ܚܰܘܶܐ ܠܗܽܘܢ: ܠܰܚܡܳܐ ܢܣܰܒ̣ܬ ܥܰܠ ܐܝ̣̈ܕܰܝܟ ܩܰܕܝ̣̈ܫܳܬܳܐ ܘܒ̣ܰܪܶܟ݂ܬ ܘܰܩ̣ܨܰܝܬ ܘܝܰܗ̣ܒܬ ܠܰܫܠܝ̣̈ܚܶܐ ܒܢܰܝ̈ ܐ̱ܪܳܙܳܟ: ܘܐܶܡ̣ܰܪܬ ܗܳܢܰܘ ܦܰܓܪܝ̱ ܕܰܚܠܳܦ ܣܰܓܺܝ̈ܶܐܐ ܡܶܬ̣ܩܨܶܐ ܘܰܚܠܳܦ ܚܛܳܗܰܘ̈ܗ̱ܝ ܕܥܳܠܡܳܐ ܡܶܬܝ̣ܗܶܒ: ܡܙܰܓ̣ܬ ܡܶܢ ܚܰܡܪܳܐ ܘܡܰܝ̈ܳܐ ܘܰܠܗܽܘܢ ܐܰܫܩܝ̣ܬ ܘܐܶܡ̣ܰܪܬ: ܕܗܳܢܳܐ ܟܳܣܳܐ ܕܕܺܝܰܬܝ̣ܩܺܝ̣ ܚ̇ܕܰܬܳܐ ܒܕܶܡܝ̱: ܣܰܒܘ̱ ܐܶܫܬܰܘ ܡܶܢܶܗ ܟܽܠܟܽܘܢ ܘܠܳܐ ܬܶܬ̣ܦܰܠܓܽܘܢ ܕܐܶܢܳܐ ܠܝ̣ ܕܶܒ̇ܚܶܬ: ܘܥܰܠ ܐܰܦܰܝ̈ܟܽܘܢ ܡܩܰܕܶܫ ܐ̱ܢܳܐ ܢܰܦܫܝ̱ ܡܶܢ ܗܳܫܳܐ ܥܰܬܝ̣̈ܩܳܬܳܐ ܥܒ̣ܰܪ̈ܝ̱ ܠܗܶܝܢ: ܘܟܽܠ ܡܶܕܶܡ ܗ̣ܘܳܐ ܚ̣ܰܕܬܳܐ: ܗܳܟܰܢܳܐ ܗ̣ܘܰܝܬܽܘܢ ܥܳܒܕܝ̣ܢ ܠܕܘ̣ܟܪܳܢܝ̱: ܐܳܘ ܠܐܪܳܙܳܐ ܚܰܝܳܐ ܘܡܰܚܝܳܢܳܐ ܕܬܶܕܡܘ̣ܪܬܳܐ: ܐܳܘ ܠܶܐܡܪܳܐ ܕܫܳܩܶܠ ܚܛܝ̣ܬܶܗ ܕܥܳܠܡܳܐ ܕܒܶܗ ܗ̣ܘܳܐ ܠܰܢ ܦܘ̣ܪܩܳܢܳܐ: ܐܳܘ ܠܦܶܨܚܳܐ ܪܰܒܳܐ ܕܐܰܦ̣ܨܰܚ ܠܥܰܡ̱̈ܡܶܐ ܒܩܶܛܠܶܗ: ܐܳܘ ܠܕܶܒܚܳܐ ܕܰܕܒ̣ܰܚ ܗܘ̣ ܠܶܗ ܘܚܰܘܝ̣ ܕܰܒܨܶܒܝܳܢܶܗ ܡܶܬ̣ܕܒܰܚ ܐܰܝܟ ܐܶܡܪܳܐ ܡ̣ܶܢ ܩܳܛܘ̣̈ܠܶܐ: ܪܰܒ ܗ̱ܘ̣ ܐ̱ܪܳܙܳܐ ܠܦܳܪ̈ܘ̣ܫܶܐ: ܬܡܝ̣ܗ ܗ̱ܘ̣ ܫܰܪܒܳܐ ܡܶܢ ܝܳܕܘ̣̈ܥܶܐ: ܥܺܕܬܳܐ ܩܰܒܶܠ̣ܬܳܗ̇ ܠܗܳܕܶܐ ܡܰܫܠܡܳܢܘ̣ܬܳܐ: ܟܢܘ̣ܫܬܳܐ ܕܡܶܢ ܥܰܡ̱̈ܡܶܐ ܢܣܰܒ̣ܬܶܗ ܠܐ̱ܪܳܙܳܐ ܒܗܰܝܡܳܢܘ̣ܬܳܐ: ܗܳܐ ܢܳܛܪܳܐ ܠܶܗ ܘܡܶܬ̣ܢܰܛܪܳܐ ܒܶܗ ܡܶܢ ܟܽܠ ܡܰܥܒܕܳܢܘ̣ܬܳܐ ܣܰܩܘ̣ܒܠܳܝܬܳܐ: ܒܐ̱ܪܳܙܳܐ ܐܳܟ̇ܠܳܐ ܦܰܓܪܶܗ ܚܰܝܳܐ ܘܠܳܐ ܡܶܬܦܰܠܓܳܐ: ܒܚܘ̣ܒܳܐ ܫܳܬܝܳܐ ܠܟܳܣܳܐ ܡܰܚܝܳܢܳܐ ܘܠܳܐ ܡܥܰܩܒܳܐ: ܘܒܶܗ ܡܳܪܝ̱ ܒܐ̱ܪܳܙܳܟ ܩܰܕܝ̣ܫܳܐ ܡܶܢ ܚܣܳܡܶܗ ܕܒܝ̣ܫܳܐ ܬܶܬ̣ܢܰܛܰܪܝ̱: ܘܒܰܨܠܝ̣ܒܳܟ ܡܶܢ ܙܺܐܦܶܗ ܕܬܰܠܡܝ̣ܕܳܐ ܢܟܝ̣ܠܳܐ ܬܶܬ̣ܚܰܪܰܪܝ̱: ܒܛܰܝܒܘ̣ܬܳܟ ܬܶܥ̣ܬܰܪܝ̱: ܘܰܒܝܘ̣ܠܦܳܢܳܐ ܕܐ̱ܪ̈ܳܙܰܝܟ ܐܰܝܟ ܝܽܘܚܰܢܳܢ ܕܰܢܦ̣ܰܠ ܥܰܠ ܚܰܕܝܳܟ ܒܰܚܫܳܡܝ̣ܬܳܐ ܬܶܬ̣ܚܰܦܰܛܝ̱ ܠܡܶܕܰܥܝ̱ ܫܘ̣ܘܕܳܥܳܐ ܕܡܶܠܰܝ̈ܟ: ܐܰܝܟ ܫܶܡܥܽܘܢ ܕܝ̣ܠܶܦ ܕܡܰܢܘ̣ ܗܰܘ̇ ܕܡܰܫܠܶܡ ܠܳܟ ܒܰܢܟܝ̣ܠܘ̣ܬܳܐ ܕܬܶܬ̣ܫܝ̣ܓܝ̱ ܡ̣ܶܢ ܟܽܠ ܟܘ̣ܬܡܳܐ ܘܨܳܐܬܳܐ: ܘܐܰܝܟ ܓܘ̣ܕܳܐ ܪܚܝ̣ܡܬܳܐ ܕܬܰܠܡܝ̣ܕܘ̣ܬܳܐ ܩܰܕܝ̣ܫܬܳܐ: ܬܶܩ̣ܢܶܐ ܡܶܢ ܛܘ̣ܦܣܳܐ ܕܝܰܗ̣ܒܬ ܠܳܗ̇: ܡܰܟܝ̣ܟܘ̣ܬܳܐ ܘܐܰܘܝܘ̣ܬܳܐ ܘܚܘ̣ܒܳܐ ܘܒܰܣܝ̣ܡܘ̣ܬܳܐ: ܘܥܰܡܳܟ ܬܶܚ̣ܕܶܐ ܘܬܶܪܘܰܙܝ̱ ܚ̣ܰܕܬܳܐܝ̣ܬ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܘܬ̣ܰܣܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܳܐ ܫܰܪܝ̣ܪܳܐ ܕܐܰܟ݂ܪܶܙܘ̱ ܟܝ̈ܳܢܶܐ ܡܳܪܘ̣ܬܶܗ: ܘܐܶܫ̣ܬܰܥܝ̣ܘܗ̱ܝ ܥܳܠ̈ܡܶܐ ܪܰܒܘ̣ܬܶܗ ܘܐܰܘܪܶܒ̣ܘ̱ ܡܥܰܠܝܘ̣ܬܶܗ: ܘܐܰܪܗ̣ܶܒ ܠܰܒܪܝ̣ܬܳܐ ܒܝܰܕ ܩܶܛܠܶܗ ܘܐܰܙܝ̣ܥ ܐܶܣܛܘ̣̈ܟܣܶܐ ܒܡܘ̣ܟܳܟܶܗ: ܩܰܒܶܠ ܐܳܦ ܗܳܫܳܐ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܠܳܟ: ܘܐܰܙܝ̣ܥ ܒܰܢ ܡܳܪܝ̱ ܥܶܠܬܶܗ ܕܡܘ̣ܟܳܟܳܟ ܘܬܶܗܪܶܗ ܕܣܘ̣ܪܳܩܳܟ ܘܬܘ̣ܩܦܶܗ ܕܰܙܩܝ̣ܦܳܟ ܘܪܰܒܘ̣ܬܶܗ ܕܡܰܘܬܳܟ ܐܰܝܟܰܢܳܐ ܕܰܚܠܳܦ ܟܝ̈ܳܢܶܐ ܚܰܪ̈ܫܶܐ ܚܢܰܢ ܡܚܝ̣̈ܠܶܐ ܘܪ̈ܳܓܘ̣ܫܶܐ ܢܶܫ̇ܬܰܥܶܐ ܡܳܪܘ̣ܬܳܟ ܘܢ̇ܰܟܪܶܙ ܪܰܒܘ̣ܬܳܟ: ܘܰܢ̇ܫܰܒܰܚ ܠܛܰܝܒܘ̣ܬܳܟ ܘܢܶܣ̇ܓܘ̣ܕ ܘܢܰܘܕܶܐ ܠܰܡܪܰܚܡܳܢܘ̣ܬܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀