ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܢܽܘ̣ܗܪܳܐ ܫܡܰܝܳܢܳܐ ܕܰܠܝܰܡܬܳܐ ܕܰܓܠܝ̣ܕܳܐ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܫܰܕܰܪ: ܘܰܟܠܝ̣̈ܠܶܐ ܐܰܪܒܥܝ̣ܢ ܕܒܺܐܝ̈ܕܰܝܗܽܘܢ ܕܰܠܪ̈ܝ̣ܫܶܐ ܕܣܳܗ̈ܕܶܐ ܐܰܪܒܥܝ̣ܢ ܢ̣ܟܰܠܠܘ̣ܢ: ܘܒܰܫܠܳܡܳܐ ܠܗܽܘܢ ܢ̣ܺܐܪܥܽܘܢ ܘܰܒܚܰܕܘ̣ܬܳܐ ܪܰܒܬܳܐ ܠܗܽܘܢ ܢ̣ܠܰܒܒܽܘܢ: ܐܰܢܗܰܪ ܐܳܦ ܠܰܢ ܡܳܪܝܳܐ ܒܢܘ̣ܗܪܳܐ ܕܝ̣ܕܰܥܬܳܟ ܐܰܠܗܳܝܬܳܐ: ܘܰܐܫܘܳܐ ܠܰܢ ܕܰܒܗܰܝܡܳܢܘ̣ܬܗܽܘܢ ܢ̇ܶܬܕܰܡܶܐ ܘܥܰܡܗܽܘܢ ܒܰܟܠܝ̣̈ܠܶܐ ܕܙܳܟܘ̣ܬܳܐ ܢ̇ܶܬܟܰܠܰܠ: ܘܰܒܓ̈ܘ̣ܕܰܝܗܽܘܢ ܘܰܒܣܶܕܪ̈ܰܝܗܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܣܓܝ̣ܕܳܐ ܘܰܡܫܰܒܚܳܐ ܥܰܡ ܐܰܒܳܐ ܘܪܘ̣ܚܳܐ ܩܰܕܝ̣ܫܳܐ ܦܰܐܝܘܽܬ ܐܰܠܳܗܳܐܝ̣ܬ ܡܶܣܬܓܶܕ ܐܳܦ ܡܶܫܬܰܒܰܚ: ܠܗܰܘ̇ ܠܳܐ ܡܶܬܕܰܪܟܳܢܳܐ ܒܗܰܘܢܳܐ ܕܡ̣ܶܢ ܒܬܘܽܠܬܳܐ ܩܰܕܝ̣ܫܬܳܐ ܝܳܠܕܰܬ ܐܰܠܳܗܳܐ ܐܶܬ̣ܒܰܣܰܪ ܐܰܝܟ ܕܗܽܘ̣ ܝܳܕܰܥ: ܠܗܰܘ̇ ܚܰܝܠܬܳܢܳܐ ܘܠܳܐ ܡܶܙܕܰܟܝܳܢܳܐ ܕܨܰܘܡܳܐ ܕܰܐܪܒܥܝ̣ܢ ܨܳܡ̣ ܚܠܳܦܰܝܢ ܘܰܙܟ̣ܳܝܗ̱ܝ ܠܡܳܪܘ̣ܕܳܐ ܘܰܐܠ̣ܶܦ ܠܰܢ ܕܰܐܪܒܥܝ̣ܢ ܝܰܘ̈ܡܝ̣ܢ ܢ̇ܨܘܽܡ: ܠܗܰܘ̇ ܕܰܒܛܰܝܒܘ̣ܬܶܗ ܠܟܽܠܳܗ̇ ܡܕܰܒܪܳܢܘ̣ܬܳܐ ܫܰܡܠܝ̣ ܐܰܝܟܰܢܳܐ ܕܡ̣ܶܢ ܨܳܡܰܪܬܳܐ ܢ̣ܕܰܠܶܐ ܘܢ̣ܰܣܶܩ ܠܰܢ ܠܘܳܬ ܐܰܒܘ̣ܗ̱ܝ ܡܫܰܒܚܳܐ: ܠܗܰܘ̇ ܕܰܒܗܳܠܶܝܢ ܝܰܘ̈ܡܳܬܳܐ ܕܰܐܪܒܥܝ̣ܢ ܕܨܰܘܡܳܐ ܫܰܟܶܢ ܠܰܢ ܐܰܪܒܥܝ̣ܢ ܣܳܗ̈ܕܶܐ ܩܰܕܝ̣̈ܫܶܐ: ܕܢܶܗܘܽܘܢ ܠܰܢ ܡܚܰܝ̈ܠܳܢܶܐ ܘܰܡܥܰܕܪ̈ܳܢܶܐ ܥܰܠ ܟܽܠܗܶܝܢ ܡܰܥܒ̈ܕܳܢܘܳܬܳܐ ܕܳܐܟܶܠܩܰܪܨܳܐ: ܠܗܰܘ̇ ܕܰܒܗܳܠܶܝܢ ܝܰܘ̈ܡܳܬܳܐ ܐܰܪܒܥܝ̣ܢ ܕܨܰܘܡܳܐ ܩܰܕܝ̣ܫܳܐ ܢ̣ܰܨܰܚ ܘܰܐܘܪܶܒ ܕܘ̣ܟܪ̈ܳܢܰܝܗܽܘܢ ܒܰܐܪ̈ܒܰܥܦܶܢܝܳܬܳܐ ܕܰܐܪܒܥܝ̣ܢ ܣܳܗ̈ܕܶܐ ܣܳܓ̈ܘ̣ܕܰܘܗ̱ܝ: ܗܳܢܽܘܢ ܕܰܐܒܗ̣ܶܬܘ̱ ܠܰܐܓܪܝ̣ܩܳܠܰܐܘܳܣ ܪܰܫܝ̣ܥܳܐ ܘܠܝ̣ܩܺܝܰܐܢܘܳܣ ܕܰܝܳܢ̈ܶܐ ܥܰܘ̈ܳܠܶܐ ܕܰܠܗܽܘܢ ܠܣܳܗ̈ܕܶܐ ܪܕܰܦܘ̱: ܠܗܰܘ̇ ܕܰܠܗܽܘܢ ܠܗܳܠܶܝܢ ܝܰܘ̈ܡܳܬܳܐ ܕܨܰܘܡܳܐ ܩܰܕܝ̣ܫܳܐ ܕܝ̣ܠܶܗ: ܣܚ̣ܰܦ ܠܳܐܟܶܠܩܰܪܨܳܐ ܬܚܶܝܬ ܪ̈ܶܓܠܰܝܗܽܘܢ ܕܢܰܨܝ̣̈ܚܰܘܗܝ ܒܓܰܘ ܝܰܡܬܳܐ ܘܠܰܢ ܐܰܠܶܦ ܕܰܒܝܰܕ ܨܰܘܡܳܐ ܕܝ̣ܠܶܗ ܢ̣ܶܙܟܶܐ ܠܨܶܢ̈ܥܳܬܶܗ ܕܒܝ̣ܫܳܐ: ܠܗܰܘ̇ ܕܰܒܗܳܠܶܝܢ ܝܰܘ̈ܡܳܬܳܐ ܐܰܪܒܥܝ̣ܢ ܕܨܰܘܡܳܐ ܐܰܚܕܰܪ ܠܥܺܕܬܶܗ ܫܘ̣ܪ̈ܶܐ ܠܳܐ ܡܶܬܟܰܒ̈ܫܳܢܶܐ ܣܳܗ̈ܕܰܘܗ̱ܝ ܐܰܪܒܥܝ̣ܢ: ܐܰܝܟܰܢܳܐ ܕܰܠܓܰܘ ܡ̣ܶܢܗܽܘܢ ܬ̣ܶܣܬܰܬܰܪܝ̱: ܠܗܰܘ̇ ܕܰܠܥܺܕܬܶܗ ܨܰܒ̣ܶܬ ܒܠܰܡܦܝ̣̈ܕܶܐ ܐܰܪܒܥܝ̣ܢ ܕܢܘ̣ܗܪܳܐ ܫܒܝ̣ܚܳܐ ܕܰܒܓܰܘ ܝܰܡܬܳܐ ܗܳܝ ܕܣܶܒܰܣܺܛܝܰܐ ܐܰܒܪܶܩ̣ܘ̱ ܒܰܕܡܘܽܬ ܟܰܘ̈ܟܒܶܐ ܨܰܡܘܽܚ̈ܬܳܢܶܐ: ܠܗܰܘ̇ ܕܰܒܗܳܠܶܝܢ ܝܰܘ̈ܡܳܬܳܐ ܕܰܐܪܒܥܝ̣ܢ ܕܨܰܘܡܳܐ ܫܰܟ̣ܶܢ ܠܰܢ ܣܢܺܐܓܪ̈ܶܐ ܪ̈ܚܝ̣ܡܶܐ ܐܰܪܒܥܝ̣ܢ ܐܰܝܟܰܢܳܐ ܕܒܰܕܡܳܐ ܕܨܰܘܪ̈ܰܝܗܽܘܢ ܡܒܰܕܩܝ̣ܢ ܨܠܰܘ̈ܳܬܰܢ ܘܒܳܥ̈ܘܳܬܰܢ ܩܕܳܡ ܬܪܘ̣ܢܘ̣ܣ ܕܡܰܠܟܘ̣ܬܶܗ ܠܳܐ ܡܶܫܬܰܪܝܳܢܝ̣ܬܳܐ: ܒܗܳܠܶܝܢ ܝܰܘ̈ܡܳܬܳܐ ܕܨܰܘܡܳܐ ܩܰܕܝ̣ܫܳܐ ܘܥܰܕܥܺܐܕܳܐ ܡܝܰܩܪܳܐ ܕܰܐܪܒܥܝ̣ܢ ܣܳܗ̈ܕܶܐ ܚܰܒܝ̣̈ܒܰܝܟ ܡܫܰܡܠܶܝܢܰܢ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܡܦܝ̣ܣܝ̣ܢܰܢ ܠܳܟ ܕܰܒܝܰܕ ܨܠܰܘ̈ܳܬܳܗ̇ ܕܝܳܠܶܕܬܳܟ ܒܬܘ̣ܠܬܳܐ ܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܕܰܐܪܒܥܝ̣ܢ ܣܳܗ̈ܕܶܐ ܩܰܕܝ̣̈ܫܶܐ ܡܢܝ̣̈ܚܳܢܶܐ ܕܡܳܪܘ̣ܬܳܟ ܘܰܕܟܽܠܗܽܘܢ ܩܰܕܝ̣̈ܫܰܝܟ ܘܰܟܢܰܘ̈ܬܗܽܘܢ: ܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܘܙܰܒ̈ܢܶܐ ܕܰܡ̇ܠܶܝܢ̣ ܒܘ̣ܪ̈ܟܳܬܳܐ ܘܰܡܨܰܒܬܝ̣ܢ ܒܰܥ̈ܒܳܕܶܐ ܕܙܰܕܝ̣ܩܘ̣ܬܳܐ: ܥܰܡ ܚܘ̣ܣܳܝܳܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܕܝ̣ܠܰܢ ܘܰܕܥܰܢܝ̣̈ܕܰܝܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܒܬܶܐܘܳܪܺܝܰܐ ܡܶܬܗܰܘܢܳܢܝ̣ܬܳܐ ܕܢܰܦܫܳܐ ܠܰܐܓܘܽܢܳܐ ܬܡܝ̣ܗܳܐ ܕܰܐܪܒܥܝ̣ܢ ܩܰܕܝ̣̈ܫܶܐ ܕܝ̣ܠܳܟ ܡܫܝ̣ܚܳܐ ܐܰ‌ܠܳܗܳܐ ܕܝ̣ܠܰܢ ܢܳܣ̇ܒܝ̣ܢܰܢ: ܬܳܗܪܝ̣ܢܰܢ ܘܡܶܬܕܰܡܪܝ̣ܢܰܢ ܘܡ̣ܶܢ ܡܰܐܨܕܳܢܘ̣ܬܳܐ ܕܒܰܚܠܝ̣ܨܘ̣ܬܗܽܘܢ ܚܰܝܳܒܝ̣ܢܰܢ ܘܡܶܬܡܰܚܠܝ̣ܢܰܢ: ܓܳܗܪܝ̣ܢ ܕܶܝܢ ܗܰܘ̈ܢܶܐ ܕܟܽܠ ܘܚܳܝ̈ܓܳܢ ܡܰܚ̈ܫܒܳܬܳܐ ܐ̱ܢܳܫ̈ܳܝܳܬܳܐ ܡ̣ܶܢ ܡܶܬܒܰܩܝܳܢܘ̣ܬܳܐ ܟܝ̣ܬ ܕܒܰܡܥܰܙܝܽܘܬܳܐ ܕܝ̣ܠܗܽܘܢ ܕܒܰܐܓܘܽܢܳܐ ܠܳܐ ܡܶܣܬܰܝܒܪܳܢܳܐ: ܡܰܢܘ̣ ܗܳܟܝ̣ܠ ܕܟܰܕ ܚܳܙܶܐ ܠܰܐܪܒܥܝ̣ܢ ܐܰܬܠܝ̣̈ܛܶܐ ܕܰܒܫܰܘܝܘܽܬ ܬܰܪܥܝ̣ܬܳܐ ܚܰܡܝ̣ܡܬܳܐ ܘܚܰܝܠܬܳܢܝ̣ܬܳܐ ܕܢܰܦܫܳܐ ܒܡܶܨܥܰܬ݀ ܥܰܪܝܳܐ ܘܰܓܠܝ̣ܕܳܐ ܕܝܰܡܬܳܐ ܩܳܝܡܝ̣ܢ ܥܰܪܛܶܠܳܐܝ̣ܬ: ܢ̣ܶܫܟܰܚ ܠܰܡܝܰܩܳܢܘ̣ ܫܘ̣ܦܪ̈ܶܐ ܪ̈ܳܡܶܐ ܕܰܚܠܝ̣ܨܘ̣ܬܗܽܘܢ ܕܒܰܐܓܘ̣ܢܳܐ ܠܳܐ ܡܶܬܡܰܠܠܳܢܳܐ: ܐܰܪܒܥܝ̣ܢ ܐܶܣܛܰܪ̈ܰܛܝ̣ܓܶܐ ܠܳܐ ܡܶܙܕܰܟ̈ܝܳܢܶܐ ܕܟܰܕ ܡ̣ܶܢ ܛܰܝܒܘ̣ܬܳܐ ܕܣܝ̣ܡܰܬ ܒܢ̈ܰܝܳܐ ܒܰܚܕܳܝܘ̣ܬܳܐ ܪܘ̣ܚܳܢܳܝܬܳܐ ܐܶܬ̣ܐܣܰܪܘ̱ ܐܰܟܚܕܳܐ ܢܰܦܫܳܐ ܒܦܰܓܪܳܐ ܡܦܰܠ̈ܓܶܐ ܐܶܬ̣ܠܰܚܰܡܘ̱ ܫܰܘ̈ܝ݂ܰܝ݂ ܒܬܰܪ̈ܥܝܳܬܳܐ ܫܰܘ̈ܝ݂ܰܝ݂ ܒܫܰܦܝ̣ܪܘ̣ܬ ܛܘ̣ܗܡܳܐ ܕܢܰܦܫܳܐ: ܫܰܘ̈ܝ݂ܰܝ݂ ܒܩܝ̣̈ܢܕܘ̣ܢܘ̣ ܕܰܚܠܳܦ ܗܰܝܡܳܢܘ̣ܬܳܐ: ܫܰܘ̈ܝ݂ܰܝ݂ ܒܰܟܠ̈ܝ̣ܠܶܐ ܡܰܦܪ̈ܓ̥ܶܐ ܕܬܶܫܒܘ̣ܚܬܳܐ: ܥܝ̣ܪ̈ܰܝ ܪܰܘܡܳܐ ܬܗ̣ܰܪܘ̱ ܒܰܠܒܝ̣ܒܘ̣ܬܗܽܘܢ ܟܰܕ ܫܰܘܝܘܽܬ ܒܰܪ̱ܬ ܩܳܠܳܐ ܚܰܝܠܬܳܢܝ̣ܬܳܐ ܒܰܠܒܝ̣ܒܘ̣ܬ ܬܰܪܥܝ̣ܬܳܐ ܠܳܐ ܡܶܬܡܰܠܠܳܢܝ̣ܬܳܐ ܐܰܙܥܶܩ̣ܘ̱ ܕܰܟܪ̈ܝ̣ܣܛܝܳܢܶܐ ܐܶܢܽܘܢ: ܐܳܟܶܠܩܰܪܨܳܐ ܕܶܝܢ ܥܰܡ ܚܰܝ̈ܠܰܘܳܬܳܐ ܐܶܫ̣ܬܰܦܰܕܘ̱ ܐܶܡܰܬܝ̱ ܕܰܚ̣ܙܰܘ ܕܰܠܒܝܺܫܘ̣ܬ ܡܕܰܪܡܘܽܬܶܗ ܕܰܐܓܪܝ̣ܩܳܘܠܰܐܘܳܣ ܥܰܘܳܠܳܐ ܐܰܒ̣ܗܶܬܘ̱: ܐܶܡܰܬܝ̱ ܕܰܠܬܰܩܝ̣ܦܘܽܬ ܪܘ̣ܫܥܶܗ ܕܠܝ̣ܩܺܝܰܐܢܳܘܣ ܪܰܫܝܺܥܳܐ ܡܰܟ̣ܟ̥ܶܘ̱: ܐܶܡܰܬܝ̱ ܕܰܠܫܘ̣ܥܠܳܝܶܗ ܕܠܘ̣ܩܒܰܠ ܝܺܕܰܥܬܳܐ ܫܰܦܶܠܘ̱: ܐܶܡܰܬܝ̱ ܕܰܠܚܶܫܘ̣ܟܳܐ ܗܰܘ̇ ܕܛܳܥܝܘܽܬܳܐ ܕܕܶܚܠܰܬ݀ ܫܺܐܕ̈ܶܐ ܦܰܠܗܶܕܘ̱ ܕܰܠܟܺܐܡܘ̣ܢܳܐ ܣܰܬܘܳܝܳܐ ܕܠܘ̣ܩܒܰܠ ܥܰܡܳܐ ܡܫܝܺܚܳܝܳܐ ܐܶܬ̣ܒܰܥܪܰܪ ܕܰܥܶܟܘ̱: ܐܶܡܰܬܝ̱ ܕܰܠܗܰܝܡܳܢܘ̣ܬܳܐ ܪܕܝ̣ܦܬܳܐ ܕܒܰܡܫܝ̣ܚܳܐ ܐܰܟܪܶܙܘ̱: ܐܶܡܰܬܝ̱ ܕܰܠܓܰܒܳܐ ܕܰܬܪ̈ܝ̣ܨܰܝ ܫܘ̣ܒܚܳܐ ܚܰܝܶܠܘ̱: ܬܗܰܪܘ̱ ܟܝ̣ܬ ܘܶܐܬܕܰܡܰܪܘ̱ ܟܽܠ ܓܶܢܣܳܐ ܘܩܰܘܡܬܳܐ ܕܰܒܢܰܝ̈ܢܳܫܳܐ ܟܰܕ ܐܰܨܶܕܘ̱ ܒܰܠܒܝ̣ܒܘ̣ܬܗܽܘܢ: ܟܰܕ ܠܝܰܡܬܳܐ ܕܰܓܠܝ̣ܕܳܐ ܐܰܝܟ ܕܰܠܩܰܝܛܘ̣ܢܳܐ ܡܰܠܟܳܝܳܐ ܪܳܗܛܝ̣ܢ ܗ̱ܘܰܘ ܘܰܚܘܝ̣ܚܝ̣ܢ: ܟܰܕ ܒܩܘ̣ܪܳܐ ܡܶܣܬܰܝܛܝ̣ܢ ܘܰܦܨܝ̣ܚܝ̣ܢ: ܟܰܕ ܒܰܓܠܝ̣ܕܳܐ ܡܶܬܢܰܬܫܝ̣ܢ ܘܰܡܕܰܝܨܝ̣ܢ: ܟܰܕ ܒܥܰܪܝܳܐ ܡܶܬܦܰܣܩܝ̣ܢ ܘܰܡܚܰܡܣܢܝ̣ܢ: ܟܰܕ ܒܡܰܫ̈ܒܶܐ ܥܰܙܝ̣̈ܙܶܐ ܕܪܘ̣ܚܳܐ ܡܶܬܟܰܦܦܝ̣ܢ ܘܰܡܣܰܝܒܪܝ̣ܢ: ܟܰܕ ܡܶܫܬܰܠܗܒܝ̣ܢ ܘܠܳܐ ܡܶܬܚܰܪܟܝ̣ܢ ܟܰܕ ܒܓܽܘ̣ܙܳܠܳܐ ܕܫܰܠܗܶܒܝ̣ܬܳܐ ܡܶܬܢܰܝܪܝ̣ܢ ܘܠܳܐ ܡܶܬܩܰܡܛܝ̣ܢ: ܟܰܕ ܒܢܘ̣ܗܪܳܐ ܡܶܙܕܰܪܩܝ̣ܢ ܘܠܳܐ ܡܶܬܛܰܠܩܝ̣ܢ: ܟܰܕ ܒܡܰܝ̈ܳܐ ܡܶܬܛܰܡܪܝ̣ܢ ܘܡܶܬܬܰܙܠܓܝ̣ܢ: ܟܰܕ ܒܺܐܝ̈ܕܰܝܳܐ ܚܰܣ̈ܝܳܬܳܐ ܡܶܬܟܰܢܫܝ̣ܢ: ܘܠܰܒܢܰܝ̈ܢܳܫܳܐ ܫܘ̣ܪ̈ܶܐ ܡܚܰܣ̈ܢܳܢܶܐ ܡܶܬܝܰܗܒܝ̣ܢ: ܐܰܪܒܥܝ̣ܢ ܐܰܓܘܽܢܝ̣ܣ̈ܛܶܐ ܚܰܝ̈ܠܬܳܢܶܐ ܕܰܒܚܰܡܝ̣ܡܘܽܬܳܐ ܕܗܰܝܡܳܢܘ̣ܬܳܐ ܕܝܺܠܗܽܘܢ ܠܝܰܡܬܳܐ ܕܰܓܠܝ̣ܕܳܐ ܐܰܚܶܡ̣ܘ̱: ܐܰܪܒܥܝ̣ܢ ܒܶܣ̈ܡܶܐ ܡܶܬܝܰܕ̈ܥܳܢܶܐ ܘܒܰܣܝ̣̈ܡܰܝ ܪܝ̣ܚܳܐ ܕܰܒܡܶܨܥܰܬ݀ ܥܰܪܝܳܐ ܘܰܓܠܝ̣ܕܳܐ ܝܰܬܝ̣ܪ ܡ̣ܶܢ ܢܰܪܕܝ̣ܢ ܪܝ̣ܫܳܝܳܐ ܒܰܣܝ̣ܡܘܽܬ ܪܝ̣ܚܳܐ ܐܰܥ̣ܛܰܪܘ̱: ܐܰܪܒܥܝ̣ܢ ܓܰܢ̱ܒܳܪ̈ܶܐ ܚܰܝܠ̈ܬܳܢܶܐ ܕܰܒܝܰܡܬܳܐ ܕܰܓܠܝ̣ܕܳܐ ܥܰܪܛܶܠܳܐܝ̣ܬ ܩܪܳܒܳܐ ܣ̣ܕܰܪܘ̱ ܘܰܠܪܝ̣ܫܶܗ ܕܬܰܢܝ̣ܢܳܐ ܡܶܬܝܰܕܥܳܢܳܐ ܪܰܨܶܨܘ: ܐܰܪܒܥܝ̣ܢ ܕܶܩ̈ܠܶܐ ܪ̈ܳܡܶܐ ܕܩ̣ܰܕܶܡ ܘܛܰܦ̣ܶܣ ܢܒܺܝܳܐ ܚܰܙܩܺܝ̣ܐܝܶܠ ܕܥܰܠ ܣܶܦܬܳܐ ܕܰܪܓܶܠܬܳܐ ܣܕܝ̣ܪܝ̣ܢ ܘܒܰܣܝ̣ܡܘܽܬ ܪܝ̣ܚܳܐ ܕܩܝ̣ܢܳܘܡܘܳܢ ܪܘ̣ܚܳܢܳܝܳܐ ܪܳܣܡܝ̣ܢ: ܐܰܪܒܥܝ̣ܢ ܗܡܰܝܪ̈ܶܐ ܕܬܰܪܥܘ̣ܬܳܐ ܕܫܰܝܢܳܐ ܘܰܫܠܳܡܳܐ ܡ̣ܶܢ ܡܰܠܟܳܐ ܫܡܰܝܳܢܳܐ ܢܳܓܕܝ̣ܢ ܠܰܐܝܠܶܝܢ ܕܰܒܗܽܘܢ ܡܶܬܓܰܘܣܝ̣ܢ: ܐܰܪܒܥܝ̣ܢ ܘܺܝ̣̈ܠܶܐ ܡܕܰܗ̈ܒܳܬܳܐ ܙܩܝ̣ܪ̈ܳܬ݀ ܒܚ̈ܘܽܛܶܐ ܦܬܝ̣̈ܟܶܐ ܕܡܰܪ̈ܓܳܢܝܳܬܳܐ ܕܰܒܗܶܝܢ ܡܶܣܬܰܬܪܳܐ ܟܰܠܰܬ݀ ܢܘ̣ܗܪܳܐ ܡ̣ܶܢ ܓܰܠ̱̈ـܠܶܐ ܘܟܺܐܡ̈ܘ̣ܢܶܐ ܘܚܺܐܦ̈ܶܐ ܕܪ̈ܘ̣ܚܶܐ ܫܰܩܳܪ̈ܳܬܳܐ: ܐܰܪܒܥܝ̣ܢ ܙܰܝ̈ܬܶܐ ܗܕܝ̣ܪ̈ܶܐ ܐܰܝܟ ܕܰܒܬܰܦܳܐ ܕܡܰܥܡܘ̣ܕܝ̣ܬܳܐ ܐܶܫܬ̣ܬ̥ܶܠܘ̱ ܘܰܠܢܰܦ̈ܫܳܬܳܐ ܢܰܚܘ̣̈ܒܳܬܳܐ ܒܫܰܦܝ̣ܪܘ̣ܬ ܕܘܽܗܳܢܗܽܘܢ ܪܘ̣ܚܳܢܳܝܳܐ ܒܰܣܶܡ̣ܘ̱: ܐܰܪܒܥܝ̣ܢ ܚܕܘܽܓ̈ܶܐ ܪ̈ܚܝ̣ܡܶܐ ܕܟܰܠܰܬ݀ ܡܰܠܟܳܐ ܕܩܰܪܶܒ̣ܘ̱ ܩܢܘ̣ܡܗܽܘܢ ܪܘ̣ܡܝܳܢܳܐ ܠܚܰܬܢܳܐ ܫܡܰܝܳܢܳܐ: ܐܰܪܒܥܝ̣ܢ ܛܰܒ̈ܥܶܐ ܛܘ̣ܒ̈ܬܳܢܶܐ ܕܰܒܝܰܡܬܳܐ ܕܰܓܠܝ̣ܕܳܐ ܐܶܬ̣ܚܫܶܠܘ̱ ܘܰܒܛܰܒܥܳܐ ܠܳܐ ܡܶܬܦܰܚܡܳܢܳܐ ܕܪܝ̣ܫ ܬܰܦܢܟܳܐ ܐܶܬ̣ܠܰܚܰܡܘ̱: ܐܰܪܒܥܝ̣ܢ ܝܘ̣ܩ̈ܢܶܐ ܢܰܨܝ̣̈ܚܶܐ ܪ̈ܨܝ̣ܦܰܝ ܒܟܺܐܦ̈ܶܐ ܝܘ̣ܩܰܢ̈ܬܝ̣ܢܳܝܳܬܳܐ ܕܡ̣ܶܢ ܦܶܕܬܳܐ ܟܳܗܢܳܝܬܳܐ ܕܰܡܨܰܒܬܳܐ ܒܰܪܒܝ̣ܥܘ̣ܬ ܣܶܕܪ̈ܶܐ ܣܒܝ̣̈ܣܰܝ ܓܰܘܢܳܐ ܡܰܨܡܚܝ̣ܢ ܘܢܘ̣ܗܪܳܐ ܥܰܠ ܚܰܙܳܝ̈ܶܐ ܐܳܫܕܝ̣ܢ: ܐܰܪܒܥܝ̣ܢ ܟܰܘܟ̈ܒܶܐ ܨܰܡܘܽܚ̈ܬܳܢܶܐ ܘܒܰܦܢܝ̣ܬܳܐ ܓܰܪܒܝ݂ܳܝ݂ܬܳܐ ܐܰܨܡ̣ܰܚܘ̱ ܘܰܒܙܰܠ̈ܝ̣ܩܶܐ ܕܢܘ̣ܗܪܗܽܘܢ ܠܥܰܡܛܳܢܳܐ ܕܕܶܚܠܰܬ݀ ܦܬܰܟܪ̈ܶܐ ܪܕܰܦ̣ܘ̱: ܐܰܪܒܥܝ̣ܢ ܠܰܡܦܺܐܕ̈ܶܐ ܢܰܗܝ̣ܪ̈ܰܝ ܕܰܠܩܳܐ ܕܰܒܝܰܡܬܳܐ ܕܣܶܒܰܣܺܛܝܰܐ ܐܶܬܢܰܒ̣ܪܰܫܘ̱ ܘܰܠܥܳܡܰܪܬܳܐ ܟܽܠܳܗ̇ ܢܘ̣ܗܪܳܐ ܢܰܨܝ̣ܚܳܐ ܡܠ̣ܰܘ: ܐܰܪܒܥܝ̣ܢ ܡܰܓ̈ܕܠܶܐ ܪ̈ܳܡܶܐ ܕܡ̣ܶܢ ܟܺܐܦ̈ܶܐ ܓܰܒ̈ܝܳܬܳܐ ܕܰܒܝܰܡܬܳܐ ܕܰܓܠܝ̣ܕܳܐ ܐܶܫ̣ܬܰܬܰܐܣܘ̱ ܘܡ̣ܶܢ ܚܺܐܦܳܐ ܕܡܶܠܶܐܝܳܐ ܕܛܰܘܦܳܢܳܐ ܕܰܪܓܶܠܬܳܐ ܕܩ̣ܰܕܶܡ ܛܰܦ̣ܶܣ ܢܒܺܝܳܐ ܐܶܪܰܡܝܳܐ ܠܳܐ ܐܶܙܕܰܥ̣ܙܰܥܘ̱: ܐܰܪܒܥܝ̣ܢ ܢܰܗܪ̈ܰܘܳܬܳܐ ܥܕ̈ܶܢܳܝܶܐ ܕܰܒܝܰܘ̈ܡܳܬܳܐ ܐܰܪܒܥܝ̣ܢ ܕܨܰܘܡܳܐ ܒܡܶܨܥܰܬ݀ ܝܰܡܬܳܐ ܕܰܓܠܝ̣ܕܳܐ ܓܳܚ̣ܘ̱ ܘܰܠܦܰܪܕܰܝܣܳܐ ܡܶܬܗܰܘܢܳܢܳܐ ܕܥܺܕܬܳܐ ܒܫܶܦ̈ܥܶܐ ܕܟܰܝ̈ܳܐ ܕܥܘ̣ܕܪ̈ܳܢܶܐ ܡܦܰܬ̈ܟܶܐ ܡܪܰܒܶܝܢ: ܐܰܪܒܥܝ̣ܢ ܣܡܳܕܪ̈ܶܐ ܚܰܠ̈ܰܝ݂ܝ݂ ܪܝ̣ܚܳܐ ܕܡ̣ܶܢ ܣܰܬܳܐ ܒܪܝ̣ܟܬܳܐ ܘܪܳܣܡܰܬ ܡܘ̣ܪܽܘܢ ܐܰ‌ܠܳܗܳܝܳܐ ܫܘܰܚ̣ܘ̱: ܐܰܪܒܥܝ̣ܢ ܥܰܡܘ̣ܕ̈ܶܐ ܚܰܝ̈ܠܬܳܢܶܐ ܕܰܥܠܰܝܗܽܘܢ ܡܚܝ̣ܠܘ̣ܬܳܗ̇ ܕܰܒܪܝ̣ܬܳܐ ܐܶܣ̣ܬܰܡܟܰܬ݀ : ܐܰܪܒܥܝ̣ܢ ܦܘ̣ܠܝ̣̈ܛܘ̣ܡܳܢܘ̣ ܡܫܰܒ̈ܚܶܐ ܕܰܒܡܰܠܟܘ̣ܬܶܗ ܕܠܝ̣ܩܺܝܰܐܢܳܘܣ ܒܰܙܰܚ̣ܘ̱ ܘܒܰܦܪܰܟܣܝ̣ܘܽܢܝ̣̈ܛܰܘܗ̱ܝ ܕܰܡܠܶܟ ܡܰܠܟܳܐ ܫܡܰܝܳܢܳܐ ܐܶܬܛܰܟܰܣ̣ܘ̱: ܐܰܪܒܥܝ̣ܢ ܨܶܡ̈ܚܶܐ ܡܶܬܝܰܕ̈ܥܳܢܶܐ ܕܡ̣ܶܢ ܢܘ̣ܗܪܳܐ ܠܳܐ ܡܶܬܦܰܚܡܳܢܳܐ ܕܫܶܡܫܳܐ ܕܙܰܕܝ̣ܩܘ̣ܬܳܐ ܒܓܰܘ ܝܰܡܬܳܐ ܐܶܬܢܰܒ̣ܪܰܫܘ̱ ܘܰܒܪܶܬܚܳܐ ܕܚܰܡܝ̣ܡܘ̣ܬܗܽܘܢ ܠܥܘ̣ܙܳܐ ܕܰܓܠܝ̣ܕܳܐ ܦܰܫ̣ܰܪܘ̱: ܐܰܪܒܥܝ̣ܢ ܩܺܝܰܐܕܰܪ̈ܘ̣ ܩܰܦܰܕܘܽܩܳܝ̈ܳܬܳܐ ܕܰܠܪܝ̣ܫܳܗ̇ ܕܟܰܠܬܳܐ ܫܠܶܝܡܘ̣ܢܳܝܬܳܐ ܗܰܕܰܪܘ̱: ܐܰܪܒܥܝ̣ܢ ܪ̈ܰܒܰܝ ܚܰܝ̈ܠܰܘܳܬܳܐ ܚܰܝ̈ܠܬܳܢܶܐ ܕܰܠܡܰܫܪܝ̣ܬܶܗ ܚܶܫܘ̣ܟܳܝܬܳܐ ܕܳܐܟܶܠܩܰܪܨܳܐ ܣ̣ܰܬܰܪܘ̱: ܐܰܪܒܥܝ̣ܢ ܫܘ̣ܪ̈ܶܐ ܠܳܐ ܡܶܬܟܰܒ̈ܫܳܢܶܐ ܡܣܰܬܪ̈ܰܝ ܠܢܰܦ̈ܫܳܬܳܐ ܡܛܰܪ̈ܦܳܬܳܐ ܡ̣ܶܢ ܓܰܠ̱̈ـܠܶܐ ܘܟܺܐܡ̈ܘ̣ܢܶܐ ܕܰܚܛܝ̣ܬܳܐ: ܐܰܪܒܥܝ̣ܢ ܬܰܦ̈ܶܐ ܪ̈ܘܽܚܳܢܳܝܶܐ ܕܡ̣ܶܢ ܝܰܡܬܳܐ ܕܰܓܠܝ̣ܕܳܐ ܢܶܣ̈ܟܶܐ ܕܫܶܩܝܳܐ ܪܘ̣ܚܳܢܳܝܳܐ ܛܥ̣ܶܢܘ̱: ܘܥܰܠ ܢܰܦ̈ܫܳܬܳܐ ܨܰܗ̈ܝܳܬܳܐ ܫܶܦ̈ܥܶܐ ܕܒܘ̣ܪ̈ܟܳܬܳܐ ܬܰܦܶܦ̣ܘ̱: ܗܳܠܶܝܢ ܕܕܘ̣ܟܪ̈ܳܢܰܝܗܽܘܢ ܘܰܫܡܳܗܰܝ̈ܗܽܘܢ ܪܫܝ̣ܡܝ̣ܢ ܒܥܺܕܬܳܐ ܕܒܘ̣ܟܪ̈ܶܐ ܕܒܰܫܡܰܝܳܐ: ܘܗܳܠܶܝܢ ܐܝ̣ܬܰܝܗܽܘܢ ܩܕܳܡܰܝܗܽܘܢ: ܕܘ̣ܡܰܐܛܝܺܢܳܘܣ ܐܰܠܶܟܣܰܢܕܪܳܘܣ ܩܽܘ̣ܪܺܠܠܽܘܣ ܦܠܰܐܒܺܝܳܘܣ ܣܡܰܐܪܓܕܳܘܣ ܟܣܰܢܬܺܝ̣ܘܳܣ ܣܝ̣ܣܺܝܰܐܢܳܘܣ ܠܶܐܘܰܢܛܺܝܽܘܣ ܣܶܐܘܶܝ̣ܪܺܝܰܐܢܳܘܣ ܦܝ̣ܠܘ̣ܩܶܛܝ̣ܡܳܘܢ ܐܰܓܰܐܓܺܝܽܘܣ ܐܝ̣ܪܰܩܠܺܝܽܘܣ ܐܰܩܕܝ̣ܩܺܝܽܘܣ ܩܘ̣ܪܺܝܘܳܣ ܘܰܐܠܺܝܳܘܣ ܐܽܘܛܘ̣ܟܺܝܽܘܣ ܐܝ̣ܣܘ̣ܟܺܝܽܘܣ ܐܰܘܢܘ̣ܩܺܝܳܘܣ ܐܝ̣ܠܝܺܐܢܳܘܣ ܐܰܩܰܐܩܺܝܳܘܣ ܐܶܐܰܛܺܝܳܘܣ ܐܰܬܰܐܢܰܐܣܺܝܳܘܣ ܢܰܝܩܺܘܠܰܐܘܳܣ ܡܝ̣ܠܝ̣ܛܳܘܢ ܩܰܐܢܕܝ̣ܕܺܝܳܘܣ ܕܘܽܡܰܐܢܰܘܳܣ ܒܝ̣ܒܺܝܰܐܢܳܘܣ ܟܰܘܕܺܝܳܘܢ ܓܰܐܝܺܘܳܣ ܣܰܐܩܰܪܕܳܘܢ ܓܽܘ̣ܪܓܽܘ̣ܢܺܝ̣ܘܳܣ ܦܪܺܝܣܩܳܘܣ ܬܶܐܘܳܕܳܠܳܘܳܣ ܐܰܢܰܐܛܳܘ̣ܠܺܘܳܣ ܡܶܠܰܐܛܺܝܽܘܢ ܠܘ̣ܣܝ̣ܡܰܐܟܳܘܣ ܐܝ̣ܘܰܐܢܢܝ̣ܣ ܩܝ̣ܠܛܽܘ̣ܕܺܝܽܘܣ ܐܝ̣ܠܺܝܰܐܢܽܘܣ ܬܶܐܘܳܦܝ̣ܠܘܳܣ ܗܳܠܶܝܢ ܕܡܶܛܠܳܬܗܽܘܢ ܡܙܰܡܰܪ ܢܒܺܝܳܐ ܕܰܘܝ̣ܕ ܟܰܕ ܐܳܡܰܪ ܕܰܐܥܶܠ̣ܬܳܢ ܒܢܘ̣ܪܳܐ ܘܰܒܡܰܝ̈ܳܐ ܘܗܳܐ ܒܰܪܘܳܚܬܳܐ ܚܢܰܢ: ܬܰܪ̈ܥܶܐ ܕܰܫܡܰܝ̈ܳܐ ܐܶܬܦ̣ܰܬܰܚܘ̱ ܠܗܽܘܢ ܓܘܽܕ̈ܶܐ ܕܡܰܠܰܐܟ̈ܶܐ ܠܐܘܽܪܥܗܽܘܢ ܢܦܰܩ̣̈ܝ̱: ܪ̈ܘ̣ܚܳܬܳܐ ܕܩܰܕܝ̣̈ܫܶܐ ܠܗܽܘܢ ܣܘܰܚ̣̈ܝ̱: ܘܟܰܕ ܒܕܰܘ̈ܨܶܐ ܡܰܠܰܐܟܳܝ̈ܶܐ ܠܗܽܘܢ ܐܰܟܚܕܳܐ ܫܰܘܝܳܐܝ̣ܬ ܪܦܳܣܳܐ ܩ̣ܛܰܪܘ̱: ܒܰܫܦܝ̣ܥܘ̣ܬ ܠܶܥܙܳܐ ܪܘ̣ܚܳܢܳܐ ܠܘܳܬܗܽܘܢ ܐܰܙܥܶܩ̣ܘ̱: ܬܰܘ ܒܰܫܠܳܡܳܐ ܡܢܰܨ̈ܚܳܢܶܐ ܕܣܳܗܕܘܽܬܳܐ: ܬܰܘ ܒܰܫܠܳܡܳܐ ܡܨܰܒ̈ܬܳܢܶܐ ܕܰܐܬܠܝ̣ܛܘ̣ܬܳܐ: ܬܰܘ ܒܰܫܠܳܡܳܐ ܡܗܰܕܪ̈ܳܢܶܐ ܕܰܐܬܠܝ̣ܣܘ̣ܬܳܐ: ܬܰܘ ܒܰܫܠܳܡܳܐ ܡܪܰܡܪ̈ܡܳܢܶܐ ܕܢܰܚܫܝ̣ܪܬܳܢܘ̣ܬܳܐ: ܬܰܘ ܒܰܫܠܳܡܳܐ ܣܳܬܘܽܪ̈ܶܐ ܕܛܳܥܝܘܽܬܳܐ: ܬܰܘ ܒܰܫܠܳܡܳܐ ܡܛܰܠܩ̈ܳܢܶܐ ܕܰܦܬܰܟܪܘ̣ܬܳܐ: ܬܰܘ ܒܰܫܠܳܡܳܐ ܡܒܰܛܠܳܢ̈ܶܐ ܕܕܰܓܳܠܘ̣ܬܳܐ: ܬܰܘ ܒܰܫܠܳܡܳܐ ܡܫܰܪ̈ܪܳܢܶܐ ܕܗܰܝܡܳܢܘ̣ܬܳܐ: ܘܰܡܫܰܡ̈ܠܝܳܢܶܐ ܕܰܢܒܺܝܽܘܬܳܐ: ܘܡܶܛܽܠ ܗܳܕܶܐ ܚܢܰܢ ܡܚܝ̣̈ܠܶܐ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܕܰܠܕܘ̣ܟܪ̈ܳܢܰܝܟܽܘܢ ܒܬܶܫ̈ܒܚܳܬܳܐ ܘܰܙܡܝ̣ܪ̈ܳܬܳܐ ܕܪܘ̣ܚܳܐ ܩܰܕܝ̣ܫܳܐ ܡܫܰܡܠܶܝܢܰܢ ܬܚܶܝܬ ܟܶܢܦܰܝ̈ܟܽܘܢ ܢ̇ܶܣܬܰܬܰܪ ܬܟܝ̣ܠܳܐܝ̣ܬ ܒܟܽܘܢ ܢ̇ܶܬܓܰܘܰܣ: ܫܰܝܢܳܐ ܐܰܡܝ̣ܢܳܐ ܒܟܽܘܢ ܢ̣ܶܬܦܰܬܶܐ: ܫܠܳܡܳܐ ܒܟܽܘܢ ܢ̣ܶܬܬܰܘܣܰܦ ܪܰܘܒܳܐ ܒܟܽܘܢ ܢ̣ܶܫܬܰܗܶܐ: ܪܘ̣ܓܙܳܐ ܒܟܽܘܢ ܢ̣ܶܫܬܰܬܰܩ: ܩܪ̈ܳܒܶܐ ܒܟܽܘܢ ܢ̣ܶܬܒܰܛܠܽܘܢ: ܩܺܐܪ̈ܣܶܐ ܒܟܽܘܢ ܢ̣ܶܫܬܰܚܩܽܘܢ: ܨܠܰܘ̈ܳܬܳܐ ܒܟܽܘܢ ܢ̣ܶܙܕܰܗ̈ܝܳܢ: ܨܳܐܝ̈ܘܳܬܳܐ ܒܟܽܘܢ ܢ̣ܶܬܚܰܠܠܽܘܢ: ܦܳܠܰܓ̈ܘܳܬܳܐ ܒܟܽܘܢ ܢ̣ܶܫ̈ܬܰܟܢܳܢ: ܥܰܘ̈ܳܠܶܐ ܒܟܽܘܢ ܢ̣ܶܬܟܰܢܟܽܘܢ: ܥܳܫ̈ܘܽܩܶܐ ܒܟܽܘܢ ܢ̣ܶܬܒܰܛܠܽܘܢ: ܣܳܩܘ̣ܪ̈ܶܐ ܒܟܽܘܢ ܢ̣ܶܬܚܰܠܦܽܘܢ: ܣܳܢ̈ܶܐܐ ܒܟܽܘܢ ܢ̣ܶܬܚܰܝܕܽܘܢ: ܢܶܣܝ̈ܘܽܢܶܐ ܒܟܽܘܢ ܢ̣ܶܥܒܪܽܘܢ: ܢܶܟ̈ܝܳܢܶܐ ܒܟܽܘܢ ܢ̣ܶܬܪܰܚܩܽܘܢ: ܡܰܚ̈ܘܳܬܳܐ ܒܟܽܘܢ ܢ̣ܶܙܕܰܓܪ̈ܳܢ: ܡܰܪ̈ܕܘܳܬܳܐ ܒܟܽܘܢ ܢ̣ܶܬܒܰܛ̈ܠܳܢ: ܠܘ̣ܚ̈ܳܡܶܐ ܒܟܽܘܢ ܢ̣ܶܫܬܰܗܽܘܢ: ܠܘ̣ܬܳܟ̈ܶܐ ܒܟܽܘܢ ܢ̣ܶܬܥܰܩܪܽܘܢ: ܟܺܐܒ̈ܶܐ ܒܟܽܘܢ ܢ̣ܶܬܰܐܣܽܘܢ: ܟܘ̣ܪ̈ܗܳܢܶܐ ܒܟܽܘܢ ܢ̣ܶܬܚܰܠܡܽܘܢ: ܝܰܩܝ̣ܪ̈ܶܐ ܒܟܽܘܢ ܢ̣ܶܬܢܰܛܪܽܘܢ: ܝܰܬ̈ܡܶܐ ܒܟܽܘܢ ܢ̣ܶܬܪܰܒܽܘܢ: ܛܰܡ̈ܶܐܐ ܒܟܽܘܢ ܢ̣ܶܬܩܰܕܫܽܘܢ: ܛܳܥܰܝ̈ܳܐ ܒܟܽܘܢ ܢ̣ܶܬܦܢܽܘܢ: ܚܰܛܳܝ̈ܶܐ ܒܟܽܘܢ ܢ̣ܶܬܚܰܣܽܘܢ: ܚܰܝܳܒ̈ܶܐ ܒܟܽܘܢ ܢ̣ܶܬܚܰܪܪܽܘܢ: ܙܰܕܝ̣̈ܩܶܐ ܒܟܽܘܢ ܢ̣ܶܬܢܰܨܚܽܘܢ: ܙܰܠܝ̣̈ܠܶܐ ܒܟܽܘܢ ܢ̣ܶܬܟܰܢܟܽܘܢ: ܘܰܐܣܝ̣ܪ̈ܶܐ ܒܟܽܘܢ ܢ̣ܶܫܬܪܽܘܢ: ܘܰܐ‌ܠܝ̣̈ܨܶܐ ܒܟܽܘܢ ܢ̣ܶܬܦܰܪܩܽܘܢ: ܗܶܪ̈ܬܶܐ ܒܟܽܘܢ ܢ̣ܶܫ̈ܬܰܬܩܳܢ: ܕܰܝܪ̈ܳܬܳܐ ܒܟܽܘܢ ܢ̣ܶܬܢܰܛܪ̈ܳܢ: ܓܙܳܪ̈ܰܝܗܶܝܢ ܒܟܽܘܢ ܢ̣ܶܬܒܰܪܟܽܘܢ: ܒܳܥ̈ܘܳܬܗܶܝܢ ܒܟܽܘܢ ܢ̣ܶܬܥܰܠ̈ܝܳܢ ܐܳܦ ܘܰܒܟܽܘܢ ܥܰܢܝ̣̈ܕܰܝܢ ܕܰܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܡ̣ܶܢ ܚܰܝ̈ܶܐ ܙܰܒܢܳܝ̈ܶܐ ܫܰܢܝ̣ܘ ܢ̣ܶܬܚܰܣܽܘܢ ܘܰܚܢܰܢ ܘܗܶܢܽܘܢ ܥܰܡܟܽܘܢ ܘܒܰܝܢܳܬܟܽܘܢ ܢ̇ܶܚܕܶܐ ܘܢ̇ܶܪܘܰܙ ܐܰܡܝ̣ܢܳܐܝ̣ܬ: ܘܗܳܪܟܳܐ ܘܬܰܡܳܢ ܢ̇ܫܰܒܰܚ ܠܰܐ‌ܠܳܗܳܐ ܘܰܐܒܳܐ ܕܟܰܠܶܠܟܽܘܢ: ܘܠܰܒܪܳܐ ܣܓܝ̣ܕܳܐ ܕܢܰܨܰܚ̣ܟܽܘܢ ܘܰܠܪܘ̣ܚܳܐ ܩܰܕܝ̣ܫܳܐ ܕܰܫ̣ܪܳܐ ܚܰܝܠܶܗ ܒܓܰܪ̈ܡܰܝܟܽܘܢ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܥܶܛܪܳܐ

ܐܰܪܒܥܝ̣ܢ ܥܶܛܪ̈ܶܐ ܕܰܥ̣ܛܰܪܘ̱ ܒܥܺܕܬܳܟ ܡܳܪܝܳܐ ܒܰܐܪܒܥܝ̣ܢ: ܘܰܐܪܒܥܝ̣ܢ ܢ̣ܶܬܩܰܒܠܽܘܢ ܐܰܪܒܥܝ̣ܢ ܕܩܰܪܶܒ̣ܢܰܢ ܩܕܳܡ ܡܳܪܘ̣ܬܳܟ: ܕܨܳܡ̣ܬ ܐܰܪܒܥܝ̣ܢ ܒܡܶܬܒܰܪܢܫܳܢܘ̣ܬܳܟ ܕܰܚܠܳܦܰܝܢ ܘܚܰܣܳܐ ܠܰܢ ܕܠܳܐ ܫܦ̣ܰܪܢܰܢ ܐܰܝܟ ܨܶܒܝܳܢܳܟ ܒܰܐܪܒܥܝ̣ܢ ܕܨܳܡ̣ܢܰܢ: ܐܶܠܳܐ ܚܰܣܳܐ ܠܰܢ ܒܝܰܕ ܐܰܪܒܥܝ̣ܢ ܕܰܫܦ̣ܰܪܘ̱ ܠܳܟ ܒܝܰܘ̈ܡܳܬܳܐ ܐܰܪܒܥܝ̣ܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܳܟ ܡܳܪܳܐ ܕܰܐܪܒܥܝ̣ܢ: ܘܰܐܪܒܥܝ̣ܢ ܕܰܒܝܰܕ ܨܠܰܘ̈ܳܬܗܽܘܢ ܢ̇ܶܦܓܰܥ ܒܳܟ ܒܫܘ̣ܠܳܡ ܐܰܪܒܥܝ̣ܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀