ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܕܥܰܠ ܬܪܽܘܢܘ̣ܣ ܕܪܰܒܘ̣ܬܳܐ ܠܥܶܠ ܡ̣ܶܢ ܟܽܠ ܒܰܫܡܰܝܳܐ ܡܶܬܓܰܝܶܐ: ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ ܡܕܰܒܪܳܢܳܐܝ̣ܬ ܡܶܛܽܠ ܦܘ̣ܪܩܳܢܰܢ ܒܚܰܪܬܳܐ ܕܙܰܒ̈ܢܶܐ ܝ̣ܬܶܒ: ܠܗܰܘ̇ ܡܰܠܟܳܐ ܫܡܰܝܳܢܳܐ ܕܡ̣ܶܢ ܦܳܠܰܚ̈ܘܳܬܳܐ ܢܘ̣ܪ̈ܳܢܳܝܳܬܳܐ ܕܠܳܐ ܓܫܘ̣ܡ ܒܰܒ̈ܢܳܬ ܩ̈ܳܠܶܐ ܕܠܳܐ ܫܶܠܝܳܐ ܒܫܘ̣ܒܚܳܐ ܡܶܬܗܰܕܰܪ ܘܡܶܬܪܰܡܪܰܡ: ܘܰܒܛܰܝܒܘ̣ܬܶܗ ܠܫܘ̣ܒܚܳܐ ܫܝ̣ܛܳܐ ܕܡ̣ܶܢ ܫܰܒܪ̈ܶܐ ܘܰܛܠܳܝ̈ܶܐ ܙܥܘ̣ܪ̈ܶܐ ܩܰܒܶܠ: ܘܒܶܣ̈ܡܶܐ ܘܗܶܪ̈ܘ̣ܡܶܐ ܡ̣ܶܢ ܢܶܫ̈ܶܐ ܩܰܕܝ̣̈ܫܳܬܳܐ ܠܶܗ ܐܶܬ̣ܩܰܪ̈ܰܒܝ̱: ܘܰܒܣܰܘ̈ܟܶܐ ܕܰܙܝ̈ܬܶܐ ܘܰܕܕܶܩ̈ܠܶܐ ܐܶܬ̣ܪܰܡܪܰܡ ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܥܰܡ ܣܰܘ̈ܟܶܐ ܕܰܥܒ̈ܳܕܶܐ ܛܳܒ̈ܶܐ ܘܩܘ̣̈ܠܳܣܶܐ ܫܒܝ̣̈ܚܶܐ ܕܡ̣ܶܢ ܪ̈ܶܥܝܳܢܶܐ ܦܫܝ̣̈ܛܶܐ ܘܬܰܡܝ̣̈ܡܶܐ ܢ̇ܶܦܘ̣ܩ ܠܐܘ̣ܪܥܳܐ ܕܡܶܐܬܝ̣ܬܳܟ ܒܗܳܢܳܐ ܝܰܘܡܳܐ ܕܥ̱ܘ̣ܗܕܳܢܳܐ ܕܡܰܥܰܠܬܳܟ ܕܠܐܘ̣ܪܫܠܶܡ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܰܒܚܰܝܠܳܐ ܕܝ̣ܠܶܗ ܠܳܐ ܡܶܬܚܰܣܢܳܢܳܐ ܟܽܠ ܡܶܕܶܡ ܩܳܐܶܡ: ܘܒܶܠܥܳܕܰܘܗ̱ܝ ܐܳܦ ܠܳܐ ܚܕܳܐ ܗ̱ܘܳܬ݀ : ܗܰܘ̇ ܕܰܡܥܰܠܰܝ ܘܰܡܪܰܡܪܰܡ ܡ̣ܶܢ ܟܽܠܗܽܘܢ ܟܝ̈ܳܢܶܐ ܕܰܥܒܝ̣̈ܕܶܐ ܘܰܒܪ̈ܰܝܳܐ: ܥܰܡ ܐܰܒܳܐ ܪܘ̣ܚܳܐ ܩܰܕܝ̣ܫܳܐ ܗܰܘ̇ ܕܟܽܠܗܽܘܢ ܚܰܝ̈ܠܰܘܳܬܳܐ ܡܶܬܗܰܘ̈ܢܳܢܶܐ ܘܰܕܠܳܐ ܓܫܘ̣ܡ ܦܳܝܫܝ̣ܢ ܡܶܢܶܗ: ܘܠܳܐ ܣܳܦ̇ܩܝ̣ܢ ܕܰܢ̣ܚܘ̣ܪܽܘܢ ܠܘܰܥܕܳܐ ܕܺܐܝܬܘ̣ܬܶܗ: ܒܗܳܝ ܕܠܳܐ ܡܶܬܕܪܶܟ ܠܗܰܘ̈ܢܶܐ ܥܶܠ̈ܳܝܶܐ ܘܰܕܬܰܚ̈ܬܳܝܶܐ ܗܰܘ̇ ܕܡܶܛܽܠ ܡܪܰܚܡܳܢܘ̣ܬܶܗ ܠܳܐ ܡܶܬܡܰܠܠܳܢܝ̣ܬܳܐ ܐܶܬ̣ܬܰܚܬܝ̣ ܠܘܳܬ ܡܘ̣ܟܳܟܳܐ ܨܶܒܝܳܢܳܝܳܐ ܘܶܐܬ̣ܒܰܣܰܪ ܘܶܐܬ̣ܒܰܪܢܰܫ ܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܘܰܒܬܘ̣ܠܰܬ݀ ܒܟܽܠ ܙܒܰܢ ܛܘ̣ܒܳܢܝ̣ܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܰܗ̣ܘܳܐ ܒܰܪܢܳܫܳܐ ܫܰܪܝ̣ܪܳܐܝ̣ܬ ܟܰܕ ܐܝ̣ܬܰܘܗ̱ܝ ܐܰܠܳܗܳܐ ܡܬܘ̣ܡܳܐܝ̣ܬ: ܘܰܒܟܽܠ ܡܶܕܶܡ ܐܶܬ̣ܕܰܡܝ̣ ܠܰܢ ܣܛܰܪ ܡ̣ܶܢ ܚܛܝ̣ܬܳܐ: ܘܟܰܕ ܣ̣ܳܡ ܐܰܦ̈ܰܘܗ̱ܝ ܕܢ̣ܺܐܬܶܐ ܠܚܰܫܳܐ ܘܠܰܙܩܝ̣ܦܳܐ ܘܰܠܡܰܘܬܳܐ: ܩ̣ܰܕܶܡ ܫܪܳܐ ܠܐܘ̣ܚܕܳܢܶܗ ܕܡܰܘܬܳܐ: ܟܰܕ ܐܰܩܝ̣ܡܶܗ ܠܠܳܥܳܙܳܪ ܡ̣ܶܢ ܒܳܬܰܪ ܐܰܪܒܥܳܐ ܝܰܘ̈ܡܝ̣ܢ ܕܰܚܒܝ̣ܫ ܗ̱ܘܳܐ ܒܥܘ̣ܒܳܗ̇ ܕܰܫܝܘ̣ܠ ܘܡ̣ܶܢ ܟܶܢܫܳܐ ܐܶܫ̣ܬܰܒܰܚ ܘܶܐܬ̣ܝ̣ܕܰܥ ܕܺܐܝܬܰܘܗ̱ܝ ܐܰܠܳܗܳܐ ܫܰܪܝ̣ܪܳܐ: ܘܟܰܕ ܡ̣ܶܢ ܛܘ̣ܪ ܙܰܝ̈ܬܶܐ ܠܐܘ̣ܪܫܠܶܡ ܡܕܝ̣ܢ̱ܬܳܐ ܥܳܐܶܠ ܗ̱ܘܳܐ ܒܪܶܗ ܕܰܐܒܪܳܗܳܡ ܘܰܒܪܶܗ ܕܕܰܘܝ̣ܕ ܡܶܫܬܰܡܰܗ ܗ̱ܘܳܐ: ܘܟܰܕ ܠܗܳܕܶܐ ܡܰܟܝ̣ܟܘ̣ܬܳܐ ܕܠܰܝܬ ܠܳܗ̇ ܣܳܟܳܐ ܐܶܬ̣ܬܰܚܬܝ̣ ܐܶܬ̣ܬܙܝ̣ܥܘ̱ ܟܽܠܗܽܘܢ ܐܶܣܛܘ̣ܟ̈ܣܶܐ ܕܰܒܪܝ̣ܬܳܐ ܕܢ̣ܶܬܠܽܘܢ ܠܶܗ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܘܕܳܫ̈ܢܶܐ ܘܺܐܝܩܳܪ̈ܶܐ ܩܰܪܶܒ̣ܘ̱ ܠܶܗ: ܡ̣ܶܢ ܚܰܝ̈ܘܳܬܳܐ ܥܝ̣ܠܳܐ: ܘܡ̣ܶܢ ܛܘ̣ܪ ܙܰܝ̈ܬܶܐ ܘܡ̣ܶܢ ܐܝ̣ܠ̈ܳܢܶܐ ܣܰܘ̈ܟܶܐ: ܘܡ̣ܶܢ ܬܰܠܡܝ̣̈ܕܶܐ ܫܘ̣ܒܚܳܐ: ܘܡ̣ܶܢ ܝܰܠ̈ܘ̣ܕܶܐ ܬܶܫܒܘ̣ܚܬܳܐ: ܘܬܶܩ̣ܢܰܬ݀ ܬܶܫܒܘ̣ܚܬܶܗ ܕܡܰܠܟܳܐ ܡܳܪܳܗ̇ ܕܬܶܫܒܘ̣ܚܬܳܐ: ܘܩܳܥܶܝܢ ܗ̱ܘܰܘ ܟܽܠܗܽܘܢ ܒܚܰܕܘ̣ܬܳܐ ܘܳܐܡܪܝ̣ܢ ܒܪܝ̣ܟ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܗܰܘ̇ ܕܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܝܳܬܶܒ ܒܰܫܡܰܝܳܐ: ܘܥܰܠ ܚܰܨܳܐ ܕܥܝ̣ܠܳܐ ܫܝ̣ܛܳܐ ܒܰܪ ܐܰܬܳܢܳܐ ܝ̣ܬܶܒ: ܗܰܘ̇ ܕܡ̣ܶܢ ܛܶܟ̈ܣܶܐ ܕܫܰܠܗܶܒܝ̣ܬܳܐ ܒܙܰܘܥܳܐ ܘܒܰܪܬܝ̣ܬܳܐ ܡܶܫܬܰܒܰܚ ܡ̣ܶܢ ܦܘ̣ܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܰܩܶܢ ܠܶܗ ܬܶܫܒܘ̣ܚܬܳܐ: ܗܰܘ̇ ܕܡ̣ܶܢ ܣܪ̈ܳܦܶܐ ܒܰܬܠܝ̣ܬܳܝܘ̣ܬ ܩܘ̣̈ܕܳܫܶܐ ܩܰܕܝ̣ܫܳܐܝ̣ܬ ܡܶܬܩܰܕܰܫ: ܘܶܐܬܢܰܚ̣ܰܬ ܒܛܰܝܒܘ̣ܬܶܗ ܠܬܶܫܒܘ̣ܚܬܳܐ ܕܡ̣ܶܢ ܒܪܝ̣ܪ̈ܶܐ: ܘܟܰܕ ܥ̣ܰܠ ܠܐܘ̣ܪܫܠܶܡ ܐܰܦ̣ܶܩ ܠܗܳܢܽܘܢ ܕܙܳܒ̇ܢܝ̣ܢ ܘܰܡܙܰܒܢܝ̣ܢ ܒܗܰܝܟܠܳܐ: ܘܣܰܚ̣ܶܦ ܦܳܬܘ̣ܪ̈ܶܐ ܕܰܡܥܰܪ̈ܦܳܢܶܐ: ܘܕܰܟ̣ܝܶܗ ܘܩܰܕܫ̣ܶܗ ܕܰܥܒܝ̣ܕ ܗ̱ܘܳܐ ܡܥܰܪܬܳܐ ܕܠܶܣ̈ܛܳܝܶܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܒܶܗ ܒܗܳܢܳܐ ܝܰܘܡܳܐ ܕܥܺܐܕܳܐ ܚܰܕܘ̣ܬܳܢܳܝܳܐ ܕܐܘ̣ܫܰܥ̈ܢܶܐ: ܕܰܬ̣ܕܰܟܶܐ ܠܰܢ ܘܬ̣ܶܡܪܘ̣ܩ ܢܰܦ̈ܫܳܬܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܣܢܺܝ̈ܶܐܐ ܘܡܰܪܝ̣ܪ̈ܶܐ ܘܰܠܙܝ̣̈ܙܶܐ ܕܰܪ̈ܓܝ̣ܓܳܬܳܐ ܥܳܠ̈ܡܳܢܝܳܬܳܐ: ܘܰܒܝܰܕ ܡܰܓܢܳܢܘ̣ܬܳܐ ܕܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܥܒܶܕ ܐܶܢܶܝܢ ܠܳܟ ܡܕܝ̣̈ܢܳܬܳܐ ܩܰܕ̈ܝ̣ܫܳܬܳܐ ܘܗܰܝܟ̈ܠܶܐ ܩܰܕܝ̣̈ܫܶܐ ܘܪ̈ܘ̣ܚܳܢܳܝܶܐ: ܘܰܡܠܝ̣ ܦܘ̣̈ܡܰܝܢ ܬܶܫܒܘ̣ܚܬܳܐ ܘܩܘ̣ܠܳܣܳܐ: ܐܰܝܟܰܢܳܐ ܕܥܰܡ ܝܰܠ̈ܘ̣ܕܶܐ ܘܬܰܠܡܝ̣̈ܕܶܐ ܕܝ̣ܠܳܟ ܢܶܩ̇ܥܶܐ ܠܳܟ ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ: ܒܪܝ̣ܟ ܗ̱ܘ̣ ܕܶܐܬ̣ܳܐ ܕܰܢ̣ܒܰܪܶܟ ܠܗܳܠܶܝܢ ܘܠܰܐܪܥܳܐ ܕܶܐܬܬ̣ܠܝ̣ܛܰܬ݀ : ܘܰܫ̣ܪܳܐ ܡܶܢܳܗ̇ ܚܰܘܒܬܳܐ ܕܰܚܛܝ̣ܬܳܐ: ܒܪܝ̣ܟ ܕܶܐܬ̣ܳܐ ܕܰܢ̣ܫܰܝܶܢ ܐܰܪ̈ܥܳܢܳܝܶܐ ܥܰܡ ܫܡܰܝܳܢ̈ܶܐ: ܒܪܝ̣ܟ ܗ̱ܘ̣ ܕܶܐܬ̣ܳܐ ܘܰܥܬܝ̣ܕ ܕܢ̣ܺܐܬܶܐ ܕܰܢ̣ܩܝ̣ܡ ܠܟܽܠܗܽܘܢ ܫܟܝ̣̈ܒܰܝ ܥܰܦܪܳܐ: ܒܪܝ̣ܟ ܘܰܡܫܰܒܰܚ ܘܰܡܪܰܡܪܰܡ ܪܰܘܡܳܐ ܕܬܶܫܒܘ̣ܚܬܶܗ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ ܡܫܰܟܢܳܢܳܐ ܕܚܰܝ̈ܶܐ ܛܘ̣ܒ̈ܬܳܢܶܐ: ܛܳܒܳܐ ܘܰܣܓܝ̣ܕܳܐ ܘܡܰܥܒܶܕ ܚܰܝ̈ܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀