ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܣܰܓܺܝ̈ܶܐܐ: ܘܒܐܘ̣ܫܰܥܢ̈ܶܐ ܕܫܘ̣ܒܚܳܐ ܢ̇ܫܰܒܚܳܟ ܒܡܶܐܬܝ̣ܬܳܟ ܕܬܰܪܬܶܝܢ ܕܡ̣ܶܢ ܫܡܰܝܳܐ: ܘܰܚܠܳܦ ܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܢ̇ܥܰܕܥܶܕ ܠܳܟ ܒܰܥܒܳܕ̈ܶܐ ܛܳܒ̈ܶܐ: ܘܟܰܕ ܡܚܰܪܪܝ̣ܢܰܢ ܡ̣ܶܢ ܟܽܠܳܗ̇ ܨܳܐܝܘ̣ܬܳܐ ܕܰܚܛܝ̣ܬܳܐ: ܒܢܰܚ̈ܬܶܐ ܫܒܝ̣̈ܚܶܐ ܕܰܡܝܰܬܪܘ̣ܬܳܐ ܢ̇ܩܰܠܶܣ ܥܰܡ ܟܽܠܶܗ ܟܶܢܫܳܐ ܕܰܓ̈ܒܰܝܳܐ ܕܝ̣ܠܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܝܰܠܕܳܐ ܕܰܐܒܳܐ ܕܰܗ̣ܘܳܐ ܒܰܪܢܳܫܳܐ ܟܰܕ ܐܝ̣ܬܰܘܗ̱ܝ ܐܰܠܳܗܳܐ: ܘܶܐܙ̣ܕܰܝܰܚ ܥܰܠ ܥܝ̣ܠܳܐ ܗܰܘ̇ ܕܥܰܠ ܡܰܪܟܰܒܬܳܐ ܡܶܙܕܰܝܰܚ: ܠܗܰܘ̇ ܕܡܰܠܰܐܟ̈ܶܐ ܡܫܰܡܫܝ̣ܢ ܠܪܰܒܘ̣ܬܶܗ ܒܙܰܘܥܳܐ: ܘܰܨܒ̣ܳܐ ܕܡ̣ܶܢ ܝܰܠ̈ܘ̣ܕܶܐ ܦܫܝ̣̈ܛܶܐ ܕܢ̣ܶܬܩܰܠܰܣ ܒܫܘ̣ܒܚܳܐ: ܗܰܒܠܰܢ ܕܰܒܚܰܕܘ̣ܬܳܐ ܘܒܰܦܨܝ̣ܚܘ̣ܬܳܐ ܢ̇ܪܰܡܪܶܡ ܒܗܳܢܳܐ ܝܰܘܡܳܐ ܕܡܰܥܰܠܬܳܟ ܕܠܐܘ̣ܪܫܠܶܡ ܘܢ̇ܶܪܘܰܙ ܘܰܢ̇ܕܘ̣ܨ ܘܢܶܚ̇ܕܶܐ ܩܕܳܡܰܝܟ ܟܰܕ ܡܫܰܒܚܝ̣ܢܰܢ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܚܰܝ̈ܠܰܘܳܬܳܐ ܩܰܕܝ̣̈ܫܶܐ: ܡܫܰܒܚܳܐ ܒܬܶܫܒ̈ܚܳܬܳܐ ܘܰܗܕܝ̣ܪ ܒܩܘ̣̈ܠܳܣܶܐ: ܗܰܘ̇ ܠܳܐ ܡܶܬܬܰܚܕܳܢܳܐ ܒܗܰܘܢܳܐ ܘܠܳܐ ܡܶܬܠܰܒܟܳܢܳܐ ܒܬܰܪܥܝ̣ܬܳܐ ܘܠܳܐ ܡܶܬܡܰܠܠܳܢܳܐ ܒܠܶܫܳܢܳܐ: ܗܰܘ̇ ܕܥܰܠ ܬܪܽܘܢܘ̣ܣ ܕܰܟܪ̈ܘ̣ܒܶܐ ܐܰܝܟ ܐܰܠܳܗܳܐ ܦܫܝ̣ܛܳܐ ܘܠܳܐ ܡܪܰܟܒܳܐ: ܪܰܒܘ̣ܬ ܡܥܰܠܝܳܐܝ̣ܬ ܡܶܙܕܰܝܰܚ ܐܰܢ̱ܬ ܒܚܰܪܬܳܐ ܕܶܝܢ ܕܙܰܒ̈ܢܶܐ ܒܰܐܬܪܰܢ ܬܰܚܬܳܝܳܐ ܐܰܝܟ ܐܰܠܳܗܳܐ ܡܒܰܣܪܳܐ ܕܡܰܥܒܶܕ ܗܳܠܶܝܢ ܕܐܰܠܳܗܳܐ ܡܶܬܗܰܦܰܟ ܗ̱ܘܰܝܬ ܡܕܰܒܪܳܢܳܐܝ̣ܬ ܘܰܒܟܽܠܗܽܘܢ ܗܳܠܶܝܢ ܕܝ̣ܠܰܢ ܐܰܟܘܳܬܰܢ ܐܶܬ̣ܕܰܒܰܪܬ ܣܛܰܪ ܡ̣ܶܢ ܚܛܝ̣ܬܳܐ ܐܰܝܟܰܢܳܐ ܕܰܠܫܘ̣ܪܰܥܬܳܐ ܡܚܰܒܠܳܢܝ̣ܬܳܐ ܬ̣ܚܰܒܶܠ ܘܬ̣ܶܥܛܶܐ ܡ̣ܶܢ ܓܶܢܣܰܢ: ܗܰܘ̇ ܕܰܫܡ̈ܰܝܳܐ ܘܰܫ̈ܡܰܝ ܫܡܰܝ̈ܳܐ ܠܳܐ ܡܣܰܝܟܝ̣ܢ ܠܶܗ ܘܰܡܠܶܝܢ ܡܶܢܶܗ ܘܠܳܐ ܡܰܘܦܶܝܢ ܠܶܗ: ܝܰܘܡܳܢܳܐ ܒܪܶܚܡܰܬ݀ ܐ̱ܢܳܫܘ̣ܬܶܗ ܒܥܺܐܕܳܐ ܗܳܢܳܐ ܕܰܙܡܝ̣ܪ̈ܳܬܳܐ ܟܰܕ ܢܚ̣ܶܬܬ ܡ̣ܶܢ ܛܘ̣ܪܳܐ ܗܰܘ̇ ܕܡܶܬܩܪܶܐ ܕܙܰܝ̈ܬܶܐ ܘܠܰܐܦܰܝ̈ ܐܰܪܥܳܐ ܕܐܘ̣ܪܫܠܶܡ ܡܕܝ̣ܢ̱ܬܳܐ ܨܳܠܘ̣ܒܬܳܐ ܡ̣ܛܰܝܬ ܐܰܝܟ ܡܰܠܟܳܐ ܡܥܰܠܝܳܐ ܘܪܰܒܳܐ ܕܰܒܪܰܒܘ̣ܬܳܐ ܝܺܕܝ̣ܥ: ܥܝ̣ܠܳܐ ܕܰܐܬܳܢܳܐ ܦܩ̣ܰܕܬ ܕܢ̣ܰܝܬܽܘܢ ܠܳܟ ܡܢܝ̈ܚܳܢܶܐ ܬܰܠܡܝ̣̈ܕܶܐ ܕܝ̣ܠܳܟ ܗܰܘ̇ ܕܠܳܐ ܡܟܰܒܫܳܐ ܐܝ̣ܬܰܘܗ̱ܝ ܗ̱ܘܳܐ ܘܳܐܦܠܳܐ ܢܝ̣ܪܳܐ ܕܫܘ̣ܥܒܳܕܳܐ ܐܶܬ̣ܬܣܝ̣ܡ ܥܠܰܘܗ̱ܝ: ܗܰܘ̇ ܕܰܠܥܰܡܳܐ ܡܶܫܬܰܡܥܳܢܳܐ ܕܝ̣ܠܳܟ ܕܡ̣ܶܢ ܣܰܓܺܝ̈ܶܐܐ ܡܛܰܦܰܣ: ܕܠܳܐ ܒܢܳܡܘ̣ܣܳܐ ܐܶܬ̣ܟܕܶܢ ܘܠܳܐ ܒܢܶܟܝܳܐ ܐܶܬ̣ܟܰܒܰܫ: ܘܟܰܕ ܐܶܬ̣ܬܰܝܬܝ̣ ܐܰܝܟ ܕܦܰܩܶܕܬ ܣܳܡ̣ܘ̱ ܥܠܰܘܗ̱ܝ ܡܳܐܢ̈ܶܐ ܐܰܘܟܝ̣ܬ ܠܒܘ̣̈ܫܶܐ ܘܬܰܟܣ̈ܝܳܬܳܐ ܕܝ̣ܠܗܽܘܢ ܫܠܝ̣̈ܚܰܝܟ ܩܰܕܝ̣̈ܫܶܐ: ܘܗܳܝܕܝܶܢ ܣܠܶܩ̣ܬ ܘܶܐܬ̣ܬܢܝ̣ܚܬ ܥܠܰܘܗ̱ܝ: ܘܥܰܠ̣ܬ ܠܘܳܬ ܥܰܡܳܐ ܗܰܘ̇ ܠܳܐ ܡܶܬܛܦܝ̣ܣܳܢܳܐ: ܘܐܰܝܟ ܕܰܠܡܰܠܟܳܐ ܗܕܝ̣ܪ ܒܩܘ̣̈ܠܳܣܶܐ ܢܰܨܝ̣̈ܚܶܐ: ܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܐܳܪܥܝ̣ܢ ܗ̱ܘܰܘ ܠܳܟ ܟܽܠܗܽܘܢ ܟܶܢ̈ܫܶܐ ܕܬܰܡܳܢ ܗܳܠܶܝܢ ܕܠܰܡܪܰܚܡܳܢܘ̣ܬܳܟ ܘܢܰܩܕܘ̣ܬܳܐ ܕܚܰܝ̈ܶܐ ܕܒܰܐܠܳܗܳܐ ܡܫܰܘܕܥܝ̣ܢ ܗ̱ܘܰܘ: ܛܠܳܝ̈ܶܐ ܕܶܝܢ ܫܦܰܝ̈ܳܐ ܘܝܰܠ̈ܘ̣ܕܶܐ ܒܪ̈ܝܪܶܐ ܡ̣ܶܢ ܟܶܢ̈ܦܳܬܳܐ ܕܶܐܡ̈ܗܳܬܗܽܘܢ ܠܳܟ ܡܩܰܠܣܝ̣ܢ ܗ̱ܘܰܘ ܒܕܶܐܫ̣ܬܰܘܕܰܥܘ̱ ܕܐܰܢ̱ܬ ܗ̱ܘ̣ ܡܳܪܗܽܘܢ ܟܰܕ ܐܳܡܪܝ̣ܢ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܫܠܳܡܳܐ ܒܰܫܡܰܝܳܐ ܘܫܰܝܢܳܐ ܥܰܠ ܐܰܪܥܳܐ ܘܫܘ̣ܒܚܳܐ ܒܰܡܪ̈ܰܘܡܶܐ ܘܰܒܪܝ̣ܟܳܐ ܗ̱ܝ ܡܰܠܟܘ̣ܬܳܐ ܕܳܐܬܝܳܐ ܕܰܐܒܽܘܢ ܕܰܘܝ̣ܕ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܣܳܒ̈ܶܐ ܕܶܝܢ ܣܰܟ̈ܠܶܐ ܘܟܳܗ̈ܢܶܐ ܕܙܺܐܦܳܐ ܟܰܕ ܫܡ̣ܰܥܘ̱ ܠܬܶܫܒܘܽܚܬܳܐ: ܟܳܐܶܝܢ ܗ̱ܘܰܘ ܒܗܽܘܢ ܕܢ̣ܶܫܬܩܽܘܢ ܗܳܝ ܕܠܳܐ ܥܰܣܩܳܐ ܕܐܶܠܘ̣ ܫܬܶܩ̣ܘ̱ ܠܟܺܐܦ̈ܶܐ ܚܰܪ̈ܫܳܬܳܐ ܦܳܩܶܕ ܗ̱ܘܰܝܬ ܘܗܳܢܶܝܢ ܡܡܰܠ̈ـܠܳܢ ܗ̱ܘܰܝ̈ ܠܳܗ̇: ܗܳܝܕܶܝܢ ܟܰܕ ܥܰܠ̣ܬ ܗ̱ܘܰܝܬ ܠܗܰܝܟܠܳܐ ܕܰܐܒܘ̣ܟ ܕܶܐܬ̣ܚܰܒܰܠ ܘܰܗ̣ܘܳܐ ܡܥܰܪܬܳܐ ܕܠܶܣ̈ܛܳܝܶܐ ܘܰܐܣܝ̣ܬ ܘܰܐܚܠܶܡ̣ܬ ܠܣܰܓܺܝ̈ܶܐܐ ܡ̣ܶܢ ܣܓ̈ܝ̣ܦܶܐ ܘܰܣܪ̈ܝ̣ܚܶܐ ܘܰܛܪܰܕܬ ܠܗܳܢܽܘܢ ܕܠܳܐ ܫܳܘܶܝܢ ܗ̱ܘܰܘ ܕܰܢ̣ܩܰܘܽܘܢ ܒܶܗ: ܘܰܐܙܝ̣ܥ ܘܰܫܓ̣ܰܫ ܚܰܝܠܳܟ ܠܟܽܠܳܗ̇ ܡܕܝ̣ܢ̱ܬܳܐ ܒܡܰܥܰܠܬܳܟ ܕܠܳܗ̇: ܘܝ̣ܕܰܥܘ̱ ܟܶܢ̈ܫܶܐ ܕܐܰܢ̱ܬ ܐܝ̣ܬܰܝܟ ܡܰܠܟܶܗ ܕܝ̣ܣܪܳܐܝܶܠ: ܚܢܰܢ ܡܳܪܝ̱ ܡܚܝ̣̈ܠܶܐ ܘܚܰܛܳܝ̈ܶܐ ܥܰܒ̈ܕܶܐ ܕܝ̣ܠܳܟ ܕܡ̣ܶܢ ܒܳܬܰܪ ܩܪܳܒܳܐ ܘܐܰܓܘ̣ܢܳܐ ܗܰܘ̇ ܕܶܐܬ̣ܟܰܬܰܫܢܰܢ ܥܰܡ ܣܳܛܳܢܳܐ ܐܶܫ̣ܬܘܝ̣ܢܰܢ ܕܰܠܥܺܐܕܳܐ ܗܳܢܳܐ ܩܰܕܝ̣ܫܳܐ ܕܰܙܡܝ̣ܪ̈ܳܬܳܐ ܘܕܰܙܡܝ̣ܪܰܬ݀ ܙܡܝ̣ܪ̈ܳܬܳܐ ܢ̇ܥܰܕܥܶܕ: ܗܰܘ̇ ܕܐ̱ܪܳܙܶܗ ܡܒܰܕܶܩ ܗ̱ܘܳܐ ܠܡܶܐܬܝ̣ܬܳܟ ܫܒܝ̣ܚܬܳܐ ܕܡ̣ܶܢ ܫܡܰܝܳܐ: ܗܳܝ ܕܒܳܗ̇ ܡܳܪܳܢܳܐܝ̣ܬ ܡܶܬܝܰܕܥܳܐ ܬܶܫܒܘ̣ܚܬܳܟ ܠܟܽܠܗܽܘܢ ܒܢܰܝ̈ܢܳܫܳܐ: ܘܡܶܬܗܰܝܡܰܢ ܐܰܢ̱ܬ ܕܐܰܢ̱ܬ ܗ̱ܘ̣ ܒܰܠܚܘ̣ܕܰܝܟ ܐܰܠܳܗܳܐ ܫܰܪܝ̣ܪܳܐ: ܒܳܥܶܝܢܰܢ ܡܶܢܳܟ ܕܰܬ̣ܫܰܡܠܶܐ ܥܰܡܰܢ ܩܰܕܝ̣ܫܳܐܝ̣ܬ ܒܘ̣ܪ̈ܟܳܬܳܗ̇ ܐܰܝܟ ܕܰܦ̇ܐܶܐ̣ ܠܺܐܝܩܳܪܳܟ: ܟܰܕ ܡܙܰܝܚܝ̣ܢܰܢ ܠܳܟ ܒܠܶܒ̈ܰܘܳܬܰܢ ܕܰܟܝܳܐܝ̣ܬ: ܐܰܝܟ ܛܘ̣ܦܣܳܐ ܕܥܝ̣ܠܳܐ ܗܰܘ̇ ܕܰܫ̣ܪܰܝܬܳܝܗ̱ܝ ܡ̣ܶܢ ܦܟܳܪ̈ܶܐ ܕܠܳܐ ܝܺܕܰܥܬܳܐ: ܘܰܡܪܰܡܪܡܝ̣ܢܰܢ ܒܣܰܘ̈ܟܶܐ ܕܙܰܝ̈ܬܶܐ ܗܳܢܶܝܢ ܕܬܰܪܥܘ̣ܬܳܐ ܘܰܕܒܰܣܝ̣ܡܘ̣ܬܳܐ ܐܝ̣ܬܰܝܗܝܢ ܘܰܡܩܰܠܣܝ̣ܢܰܢ ܠܳܟ ܒܠܶܒܰܘ̈ܳܬܳܐ ܘܛܰܪ̈ܦܶܐ ܕܕܶܩ̈ܠܶܐ ܪ̈ܳܡܶܐ ܘܰܫܒܝ̣̈ܚܶܐ ܕܰܠܪܰܘܡܳܐ ܕܰܠܥܶܠ ܡܰܦܪܚܝ̣ܢ: ܘܰܐܫܠܰܚ ܡܶܢܰܢ ܠܟܽܠܶܗ ܠܒܘ̣ܫܳܐ ܥܳܠܡܳܢܳܝܳܐ ܕܳܐܟܶܠܩܰܪܨܳܐ ܘܰܕܢ̇ܶܬܥܰܛܰܦ ܚܠܳܦܰܘܗ̱ܝ ܠܢܰܚ̈ܬܶܐ ܠܳܐ ܗܘ̣̈ܠܳܢܳܝܶܐ ܕܡܶܬܟܰܢܶܝܢ ܠܒܘ̣̈ܫܶܐ ܕܙܰܕܝ̣ܩܘ̣ܬܳܐ: ܘܫܰܟܶܢ ܠܰܢ ܕܢ̇ܶܗܘܶܐ ܕܟܰܝ̈ܳܐ ܘܰܕܫܰܦܝ̣ܪ ܢ̇ܶܗܘܶܐ ܡܫܰܒ̈ܚܳܢܶܐ ܘܣܳܓ̈ܘ̣ܕܶܐ ܫܰܪܝ̣ܪ̈ܶܐ ܒܬܰܪܥܝ̣ܬܳܐ ܫܦܝ̣ܬܳܐ ܘܰܚܠܝ̣ܡܬܳܐ ܕܪܰܚܝ̣ܩܳܐ ܡ̣ܶܢ ܟܽܠܶܗ ܗܘ̣ܦܳܟ ܘܚܘ̣ܫ̈ܳܒܶܐ ܥܳܠ̈ܡܳܢܳܝܶܐ ܘܰܣܪ̈ܝ̣ܩܶܐ: ܘܥܰܡ ܟܶܢ̈ܫܶܐ ܫܒܝ̣̈ܚܶܐ ܕܒܐܘ̣ܫܰܥܢ̈ܶܐ ܩܰܠ̣ܣܘ̣ܟ ܢ̇ܰܙܥܶܩ ܘܢ̇ܺܐܡܰܪ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܘܐܳܦ ܒܥܘ̣ܡ̈ܩܶܐ ܬܰܚ̈ܬܳܝܶܐ ܠܘܳܬܰܢ: ܡܒܰܪܟܳܐ ܓܶܝܪ ܐܝ̣ܬܰܝܟ ܘܰܒܪܝ̣ܟ ܐܝ̣ܩܳܪܳܟ ܡ̣ܶܢ ܐܰܬܪܳܟ ܘܡ̣ܶܢ ܐܰܬܪܰܢ ܕܶܐܬ̣ܬܰܚܬܝ̣ܬ ܘܰܦܪܰܩ̣ܬܳܢ ܒܚܰܫ̈ܶܐ ܨܶܒܝ̈ܳܢܳܝܶܐ ܘܠܳܐ ܥܕ̈ܝ̣ܠܶܐ ܡ̣ܶܢ ܡܰܘܬܳܐ ܘܰܚܒܳܠܳܐ ܘܬܘ̣ܒ ܡ̣ܶܢܕܪܝ̣ܫ ܐܳܬܶܐ ܐܰܢ̱ܬ ܡܶܛܽܠ ܢܘ̣ܚܳܡܰܢ ܘܰܩܝܳܡܬܰܢ ܘܚܘ̣ܕܳܬܰܢ ܘܡܰܥܰܠܬܰܢ ܕܰܠܡܰܠܟܘ̣ܬܳܟ: ܫܰܪܝ̣ܪܳܐܝ̣ܬ ܓܶܝܪ ܠܳܟ ܦܰܐܝܳܐ ܘܙܳܕܩܳܐ ܬܶܫܒܘ̣ܚܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܳܦ ܗܳܫܳܐ ܡܳܪܝܳܐ ܪܳܚܶܡ ܐ̱ܢܳܫܳܐ ܡܦܝ̣ܣܝ̣ܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ: ܒܝܰܘܡܳܐ ܗܳܢܳܐ ܕܚܘ̣ܕܳܬܳܐ ܕܥ̱ܘ̣ܗܕܳܢܳܐ ܕܐܘ̣ܫܰܥ̈ܢܶܐ ܐܘ̣ܪ̈ܫܠܶܡܳܝܶܐ: ܕܢ̣ܶܬܥܰܠ̈ܝܳܢ ܨܠܰܘ̈ܳܬܰܢ ܩܕܳܡܰܝܟ ܘܢ̣ܶܬܦܰܬܰܚ ܬܰܪܥܳܐ ܕܪ̈ܰܚܡܰܝܟ ܠܫܶܐܠ̈ܳܬܰܢ ܘܫܰܕܰܪ ܠܰܢ ܡ̣ܶܢ ܫܟܝ̣ܢܬܳܐ ܕܺܐܝܩܳܪܳܟ ܪ̈ܰܚܡܶܐ ܘܰܚܢܳܢܳܐ: ܘܚܘ̣ܣܳܝܳܐ ܕܰܚ̈ܛܳܗܶܐ ܘܳܐܣܝܘ̣ܬܳܐ ܠܟܽܠܗܽܘܢ ܟܪ̈ܝ̣ܗܶܐ ܘܰܐܠܝ̣̈ܨܶܐ: ܘܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ ܗܳܢܳܐ: ܘܕܘ̣ܟܪܳܢܳܐ ܛܳܒܳܐ ܠܰܐܒ̈ܳܗܰܝܢ ܘܰܐܚ̈ܰܝܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀