ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܙܰܝܶܢ ܡܳܪܝܳܐ ܐܰܠܳܗܳܐ ܠܦܰܓܪ̈ܰܝܢ ܒܩܰܕܝ̣ܫܘ̣ܬܳܐ ܘܰܠܢܰܦ̈ܫܳܬܰܢ ܒܗܰܝܡܳܢܘ̣ܬܳܐ: ܘܗܰܘ̈ܢܰܝܢ ܒܡܶܠܬܳܐ ܕܬܶܐܘܳܠܳܓܺܝܰܐ: ܘܗܰܒܠܰܢ ܕܰܒܢܶܥ̈ܡܳܬܳܐ ܕܡܰܠܰܐܟ̈ܶܐ: ܘܰܒܩܝ̣̈ܢܳܬܳܐ ܕܰܟܪ̈ܘ̣ܒܶܐ ܘܰܒܩܘ̣̈ܕܳܫܶܐ ܕܰܣܪ̈ܳܦܶܐ: ܘܥܰܡ ܟܶܢ̈ܫܶܐ ܕܰܢܒܺܝ̈ܶܐ: ܘܓܘ̣̈ܕܶܐ ܕܰܫܠܝ̣̈ܚܶܐ ܘܰܐܝܟ ܫܰܒܪ̈ܶܐ ܘܝܰܠ̈ܘ̣ܕܶܐ ܢܶܩ̇ܥܶܐ ܠܳܟ: ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܪܳܡܳܐ ܕܡܶܬܪܰܡܪܰܡ ܐܰܠܳܗܳܐܝ̣ܬ ܡ̣ܶܢ ܟܽܠܗܽܘܢ ܟܝ̈ܳܢܶܐ ܘܶܐܬ̣ܳܐ ܠܡܘ̣ܟܳܟܳܐ ܨܶܒܝܳܢܳܝܳܐ: ܘܰܠܫܝ̣ܛܘ̣ܬܳܐ ܐ̱ܢܳܫܳܝܬܳܐ ܠܗܰܘ̇ ܨܰܝܳܪܳܐ ܡܗܝ̣ܪܳܐ ܕܰܒܝܰܕ ܦܘ̣ܩܕܳܢܶܗ ܐܶܬ̣ܬܨܝ̣ܪܘ̱ ܝܰܠ̈ܘ̣ܕܶܐ ܒܟܰܪ̈ܣܳܬܳܐ: ܘܰܒܡܶܠܬܶܗ ܐܶܬܓܠܶܦ̣ܘ̱ ܘܶܐܬ̣ܬܰܩܰܢܘ̱ ܠܶܫܳܢܰܝ̈ܗܽܘܢ ܕܰܢ̣ܩܰܠܣܽܘܢ ܠܶܗ: ܐܰܫܘܳܐ ܠܰܢ ܕܢ̇ܶܥܘ̣ܠ ܥܰܡܳܟ ܠܐܘ̣ܪܫܠܶܡ ܫܡܰܝܳܢܝ̣ܬܳܐ ܥܺܕܬܳܐ ܕܒܘ̣ܟܪ̈ܶܐ ܕܰܟܬܝ̣ܒܝ̣ܢ ܒܰܫܡܰܝܳܐ: ܘܥܰܡ ܥܰܡ̱̈ܡܶܐ ܕܰܣܥ̣ܰܪܬ ܒܡܶܐܬܝ̣ܬܳܟ ܢ̇ܰܣܶܩ ܫܘ̣ܒܚܳܐ ܠܺܐܝܬܘ̣ܬܳܟ ܡܥܰܠܝܰܬ݀ ܡ̣ܶܢ ܟܽܠ: ܒܗܳܢܳܐ ܥܶܕܳܢܳܐ ܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܚܰܝ̈ܠܰܘܳܬܳܐ ܥܶܠ̈ܳܝܶܐ ܘܠܳܐ ܡܶܬܚ̈ܰܙܝܳܢܶܐ: ܗܰܘ̇ ܕܠܳܐ ܡܶܬܡܰܠܠܳܢܳܐܝ̣ܬ ܘܐܰܝܟ ܕܠܰܝܬ ܠܗܰܘܢܳܐ ܕܢ̣ܶܕܰܥ ܐܰܘ ܢ̣ܶܣܬܰܟܠ ܕܰܟܡܳܐ ܪܳܡ ܘܰܡܥܰܠܰܝ ܗܰܘ̇ ܕܚܘ̣ܕܪܳܢܳܐܝ̣ܬ ܡ̣ܶܢ ܟܶܢ̈ܫܶܐ ܕܰܟܪ̈ܘ̣ܒܶܐ ܡܶܬܒܰܪܰܟ ܘܡܶܙܕܰܝܰܚ ܘܡܶܬܩܰܠܰܣ ܘܡܶܫܬܰܒܰܚ ܘܡ̣ܶܢ ܣܪ̈ܳܦܶܐ ܠܳܐ ܡܶܬܕܰܪܟܳܢܳܐܝ̣ܬ: ܘܐܰܝܟ ܕܡܶܫܟܰܚ ܟܝܳܢܗܽܘܢ ܪܘ̣ܚܳܢܳܐ ܗܰܘ̇ ܕܡܶܬܪܰܡܪܰܡ ܠܳܐ ܡܶܬܥܰܩܒܳܢܳܐܝ̣ܬ: ܡ̣ܶܢ ܟܽܠܗܶܝܢ ܐܘ̣ܣܺܝ̈ܰܐܣ ܡܶܬܝܰܕ̈ܥܳܢܝܳܬܳܐ ܘܰܦܫܝ̣̈ܛܳܬܳܐ: ܗܳܠܶܝܢ ܐܰܝܠܶܝܢ ܕܰܠܥܶܠ ܒܰܫܡܰܝܳܐ ܡܕܰܝܪ̈ܳܢ ܗܰܘ̇ ܕܳܐܦ ܨܒ̣ܰܝܬ ܘܰܗ̣ܘܰܝܬ ܒܰܪܢܳܫܳܐ ܒܝܰܘ̈ܡܳܬܳܐ ܐ̱ܚܪ̈ܳܝܶܐ ܒܚܰܪܬܳܐ ܕܙܰܒ̈ܢܶܐ: ܘܰܒܫܘ̣ܠܳܡܳܐ ܕܰܡܕܰܒܪܳܢܘ̣ܬܳܟ ܘܣܘ̣ܪܳܩܳܟ ܨܶܒܝܳܢܳܝܳܐ: ܥܰܠ ܥܝ̣ܠܳܐ ܕܰܐܬܳܢܳܐ ܡܰܪܟܰܒܬܳܐ ܡܶܕܶܡ ܒܶܣܪܳܢܳܝܬܳܐ ܘܰܪܟܘ̣ܒܳܐ ܒܰܣܝܳܐ ܢܶܙܕܰܝܰܚ: ܐܰܝܟ ܕܥܰܠ ܚܰܨܳܐ ܕܰܟܪ̈ܘ̣ܒܶܐ ܘܰܒܗܳܕܶܐ ܫ̣ܰܘܕܰܥ ܕܠܰܟܝܳܢܳܐ ܕܪܳܡܘ̣ܬܳܐ ܒܝ̣ܫܬܳܐ ܢ̣ܶܥܩܘ̣ܪ ܡܶܢܰܢ ܨܳܒܶܐ: ܘܰܠܡܶܛܥܰܢ ܘܠܰܡܡܰܪܳܝܘ̣ ܒܡܘ̣ܟܳܟܶܗ ܬܗܝ̣ܪܳܐ ܡܢܳܚ: ܘܰܒܗܳܝ ܕܒܐܘ̣ܪܫܠܶܡ ܐܶܫ̣ܬܰܒܰܚ ܡ̣ܶܢ ܫܰܒܪ̈ܶܐ: ܚ̣ܰܘܝ̣ ܠܬܶܫܒܘ̣ܚܬܳܐ ܕܥܰܡܳܐ ܚܰܕܬܳܐ ܘܰܕܡ̣ܶܢ ܥܰܡ̱̈ܡܶܐ ܗܰܘ̇ ܕܰܚܠܳܦܰܘܗ̱ܝ ܡܝ̣ܬ ܕܰܥܬܝ̣ܕ ܕܢ̣ܶܦܘ̣ܩ ܠܐܘ̣ܪܥܶܗ ܒܡܶܐܬܝ̣ܬܶܗ ܗܳܝ ܕܬܰܪܬܶܝܢ ܒܫܘ̣ܒܚܳܐ: ܘܰܚܠܳܦ ܕܶܩ̈ܠܶܐ ܡܰܢ ܠܪܰܘܡܳܐ ܕܝ̣ܕܰܥܬܳܐ ܕܗܰܝܡܳܢܘ̣ܬܳܐ ܕܒܶܗ ܛܥܝ̣ܢܝ̣ܢ: ܘܰܚܠܳܦ ܕܶܝܢ ܣܰܘ̈ܟܶܐ ܕܙܰܝ̈ܬܶܐ ܠܫܰܦܝ̣ܪܘ̣ܬ ܦܺܐܪ̈ܶܐ ܕܰܥ̈ܒܳܕܶܐ ܛܳܒ̈ܶܐ ܠܥܶܠ ܡܪܝ̣ܡܝ̣ܢ ܘܰܚܠܳܦ ܢܰܚ̈ܬܶܐ ܡܰܢ ܡܰܪ̈ܛܘ̣ܛܶܐ ܕܶܐܬ̣ܩܰܪܰܒܘ̱ ܠܺܐܝ̣ܩܳܪܶܗ ܚܘ̣ܫ̈ܳܒܶܐ ܦܫܝ̣̈ܛܶܐ ܘܠܳܐ ܡܥܰܪ̈ܩܠܶܐ ܕܪܰܚܝ̣ܩܝ̣ܢ ܡ̣ܶܢ ܟܽܠ ܙܩܘ̣ܪܳܐ ܘܗܰܒ̈ܳܒܶܐ ܕܨܶܒ̈ܘܳܬܳܐ ܡܶܕܶܡ ܐܰܪ̈ܥܳܢܝܳܬܳܐ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܕܟܽܠ ܘܰܐܠܳܗܳܐ ܫܰܪܝ̣ܪܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܝ̣ܫܳܐ ܘܥܺܐܕܳܐ ܪܰܒܳܐ ܘܚܘ̣ܕܳܬܳܐ ܕܐܘ̣ܫܰܥ̈ܢܶܐ ܐܘ̣ܪ̈ܫܠܶܡܳܝܶܐ ܗܳܠܶܝܢ ܕܰܒܝܰܕ ܩܰܘܡܬܳܐ ܫܰܒܪܳܝܬܳܐ ܥܰܠ ܒܢ̈ܳܬ ܩ̈ܳܠܶܐ ܕܬܶܫܒܘ̣ܚܬܳܐ ܕܝ̣ܠܳܟ ܐܶܣ̣ܬܥܰܪܘ̱: ܕܰܬ̣ܫܰܟܶܢ ܠܓܶܢܣܳܐ ܕܝ̣ܠܰܢ ܟܽܠܶܗ ܥܘ̣ܬܪܳܐ ܘܪ̈ܰܚܡܶܐ ܕܰܚܢܳܢܳܐ ܕܝ̣ܠܳܟ ܘܥܰܡ ܗܳܠܶܝܢ ܐܳܦ ܚܘ̣ܠܡܳܢܳܐ ܕܦܰܓܪܳܐ ܘܳܐܣܝܘ̣ܬܳܐ ܕܢܰܦܫܳܐ: ܟܰܕ ܡܰܥܒܰܪ ܐܰܢ̱ܬ ܡܶܢܰܢ ܟܽܠ ܫܚܳܩܳܐ ܟܝ̣ܬ ܘܕܘ̣̈ܘܳܢܶܐ ܘܟܽܠ ܪܘ̣ܥܳܡܳܐ ܘܟܰܪܝܘ̣ܬܳܐ: ܘܟܽܠ ܢܶܟܠܳܐ ܘܰܚܣܳܡܳܐ ܘܟܽܠ ܡܶܐܟܰܠܩܰܪܨܳܐ ܘܰܥܫܘ̣ܩܝܳܐ: ܘܟܽܠ ܚܰܫܳܐ ܕܰܒܢܰܦܫܳܐ ܘܰܒܦܰܓܪܳܐ ܓܳܕܶܫ ܟܰܕ ܡܕܰܟܶܐ ܐܰܢ̱ܬ ܬܰܪܥܝ̣ܬܳܐ ܕܝ̣ܠܰܢ ܡ̣ܶܢ ܟܽܠ ܚܘ̣ܫ̈ܳܒܶܐ ܡܥܰܪ̈ܦܳܢܶܐ ܕܥܰܘܠܳܐ ܘܕܰܚܛܝ̣ܬܳܐ: ܘܰܐܟܣܘ̣ܪ̈ܝܣܬܝ̣ܢܶܐ ܥܳܒܶܕ ܐܰܢ̱ܬ ܠܗܽܘܢ ܡ̣ܶܢ ܢܰܦܫܰܢ ܐܰܝܟ ܕܠܰܡܥܰܪ̈ܦܳܢܶܐ ܕܝܘ̣̈ܕܳܝܶܐ ܡ̣ܶܢ ܗܰܝܟܠܳܐ ܕܝ̣ܠܳܟ ܩܰܕܝ̣ܫܳܐ: ܘܟܰܕ ܣܳܥܰܪ ܐܰܢ̱ܬ ܠܰܟܪ̈ܝ̣ܗܶܐ ܒܚܘ̣ܠܡܳܢܳܐ ܠܰܡܛܰܪ̈ܦܶܐ ܕܶܝܢ ܒܰܢܝܳܚܳܐ: ܠܰܐܣܝ̣ܪ̈ܶܐ ܒܰܫܪܳܝܳܐ ܠܰܡܩܰܦ̈ܚܰܝ ܡ̣ܶܢ ܪ̈ܘ̣ܚܶܐ ܛܰܡ̈ܳܐܬܳܐ ܒܰܓܗܳܝܬܳܐ ܕܡ̣ܶܢ ܗܳܠܶܝܢ: ܠܰܫ̈ܒܰܝܳܐ ܡܰܢ ܒܦܘ̣ܪܩܳܢܳܐ: ܠܗܳܢܽܘܢ ܕܒܰܐܟܣܘ̣ܪܝܳܐ ܒܦܽܘܢܳܝܳܐ: ܠܡܶܣ̈ܟܺܢܶܐ ܒܣܰܒܥܳܐ: ܠܚܰܛܳܝ̈ܶܐ ܒܫܘ̣ܒܩܳܢܳܐ ܠܰܐܪ̈ܡܠܳܬܳܐ ܒܒܘ̣ܝܳܐܳܐ ܠܝܰܬܡ̈ܶܐ ܒܬܰܪܒܝ̣ܬܳܐ ܛܳܒܬܳܐ ܘܐܰܒܳܗܳܝܬܳܐ ܕܝ̣ܠܳܟ: ܠܥܰܢܝ̣̈ܕܶܐ ܒܚܘ̣ܣܳܝܳܐ ܘܕܘ̣ܟܪܳܢܳܐ ܫܰܦܝ̣ܪܳܐ ܐܳܦ ܠܰܢ ܐܰܫܘܳܐ ܕܰܢ̇ܩܰܠܣܳܟ ܒܥܰܕܥܺܐܕܳܐ ܪܰܒܳܐ ܗܰܘ̇ ܕܰܥܬܝ̣ܕ ܒܐܘ̣ܫܰܥܢ̈ܶܐ ܠܳܐ ܡܶܬܡܰܠ̈ܠܳܢܶܐ ܘܣܰܘ̈ܟܶܐ ܠܳܐ ܥܳܒܘ̣ܪ̈ܝܳܬܳܐ ܡܫܝ̣ܚܳܐ ܡܰܠܟܳܐ ܕܬܶܫܒܘ̣ܚܬܳܐ ܘܒܺܐܝ̈ܕܰܝܟ ܘܥܰܡܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܦܽܪܘ̣ܩ ܡܳܪܝ̱ ܠܥܳܢ̈ܳܟ ܡܠܝ̣ܠܬܳܐ ܗܳܕܶܐ ܕܥܰܡ ܙܰܘܚܳܐ ܕܙܰܝ̈ܬܶܐ ܘܫܰܪܟܳܐ ܕܣܰܘ̈ܟܶܐ: ܘܥܰܡ ܬܶܫܒ̈ܚܳܬܳܐ ܘܰܙܡܝ̣ܪ̈ܳܬܳܐ ܕܪܘ̣ܚܳܐ ܩܰܕܝ̣ܫܳܐ ܢܶܦ̣ܩܰܬ݀ ܠܐܘ̣ܪܥܳܟ ܐ̱ܪܳܙܢܳܐܝ̣ܬ: ܘܩܰܒܶܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܒ̣ܰܬ݀ ܠܳܟ ܒܨܝ̣ܪܘ̣ܬܰܢ ܒܗܳܢܳܐ ܝܰܘܡܳܐ ܩܰܕܝ̣ܫܳܐ: ܘܫܰܘܙܶܒܝ̣ܗ̇ ܡ̣ܶܢ ܐܳܟܶܠܩܰܪܨܳܐ ܕܺܐܒܳܐ ܡܶܬܝܰܕܥܳܢܳܐ ܘܰܐܟܪܶܟ ܠܳܗ̇ ܡܰܫܪܝ̣ܬܳܐ ܕܡܰܠܰܐܟ̈ܶܐ ܕܝ̣ܠܳܟ ܩܰܕܝ̣̈ܫܶܐ: ܐܰܝܟܰܢܳܐ ܕܰܕܠܳܐ ܚܛܳܗ̈ܶܐ ܘܰܫܓ̈ܘ̣ܫܝܶܐ ܬܶܪܥܰܡܝ̱ ܒܬܶܫܒ̈ܚܳܬܳܐ ܕܝ̣ܠܳܟ ܩܰܕ̈ܝ̣ܫܳܬܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀