ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܠܳܗܳܐ ܕܨܳܒܶܐ ܒܚܰܝ̈ܶܐ ܕܰܒܢܰܝ̈ܢܳܫܳܐ: ܠܗܰܘ̇ ܡܳܪܳܐ ܛܳܒܳܐ ܕܚܳܕܶܐ ܒܥܰܒ̈ܕܰܘܗ̱ܝ ܕܡܶܬܢܰܨܚܝ̣ܢ ܒܦܘ̣ܠܚܳܢܳܐ ܕܰܡܝܰܬܪ̈ܳܬܳܐ: ܠܚܰܕ ܝܳܗܘ̣ܒܳܐ ܛܳܒܳܐ ܕܦܳܪܰܥ ܛܳܒ̈ܳܬܳܐ: ܠܰܕܡܶܬܟܰܬܫܝ̣ܢ ܒܰܥ̈ܒܳܕܶܐ ܕܙܰܕܝ̣ܩܘ̣ܬܳܐ: ܗܰܘ̇ ܕܡ̣ܶܢ ܫܘ̣ܪܳܝܳܐ ܐܰܣܠܝ̣ ܠܝܰܥܢܘ̣ܬܳܐ ܐܶܡܳܐ ܕܰܪ̈ܓܝ̣ܓܳܬܳܐ: ܘܢܰܨܰܚ ܠܙܰܕܝ̣̈ܩܶܐ ܕܰܢ̣ܝܩܰܪܘ̣ܢܳܝܗ̱ܝ ܒܨܰܘܡܳܐ ܘܒܰܨܠܘ̣ܬܳܐ: ܘܝܳܗܶܒ ܐܰܓܪܳܐ ܡܫܰܡܠܝܳܐ ܠܕܰܡܝܰܩܪܝ̣ܢ ܠܶܗ ܒܩܰܕܝ̣ܫܘ̣ܬܳܐ: ܘܫܳܦܪܝ̣ܢ ܠܶܗ ܒܰܡܚܰܡܣܢܳܢܘ̣ܬܳܐ ܘܥܳܢܘܳܝܘ̣ܬܳܐ: ܘܙܰܡܰܪܘ̱ ܩܕܳܡܰܘܗ̱ܝ ܗܘ̣̈ܠܳܠܶܐ ܪ̈ܓܝ̣ܓܶܐ ܘܬܶܫܒ̈ܚܳܬܳܐ: ܕܠܶܗ ܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܰܚ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܡܳܪܝܳܐ ܐܰܠܳܗܳܐ ܪܳܚܶܡ ܐ̱ܢܳܫܳܐ: ܣܳܓܕܝ̣ܢܰܢ ܘܡܰܘܕܶܝܢܰܢ: ܠܰܫܡܳܟ ܩܰܕܝ̣ܫܳܐ ܡܫܰܒܚܝ̣ܢܰܢ: ܘܡܶܢܳܟ ܛܳܒܳܐ ܫܳܐܠܝ̣ܢܰܢ ܒܟܽܠܥܶܕܳܢ ܚܢܳܢܳܐ ܘܪ̈ܰܚܡܶܐ ܘܚܘ̣ܣܳܝܳܐ: ܘܠܳܟ ܡܩܰܪܒܝ̣ܢܰܢ ܒܳܥܘ̣ܬܳܐ ܘܬܰܟܫܶܦܬܳܐ ܒܠܶܒܳܐ ܫܚܝ̣ܩܳܐ: ܘܰܒܪܘ̣ܚܳܐ ܡܰܟܝ̣ܟܬܳܐ ܚܠܳܦ ܚܛܳܗ̈ܶܐ ܕܝ̣ܠܰܢ ܘܣܰܟ̈ܠܘܳܬܳܐ: ܘܡܶܢܳܟ ܝܺܚܝܕܳܝܳܐ ܒܪܳܐ ܕܰܐܠܳܗܳܐ: ܕܰܐܢܬ ܗ̱ܘ̣ ܐܝ̣ܬܰܝܟ ܩܕܘ̣ܫ̈ܩܘ̣ܕܫܝ̣ܢ ܡܒܰܪܟܳܐ: ܗܰܘ̇ ܕܡ̣ܶܢ ܚܰܝ̈ܠܰܘܳܬܳܐ ܝܰܕܘ̣ܥ̈ܬܳܢܶܐ ܘܥܝ̣ܪ̈ܰܝ ܫܡܰܝܳܐ ܦܰܐܝܘ̣ܬ ܐܰܠܳܗܳܐܝ̣ܬ ܥܰܡ ܐܰܒܳܐ ܘܪܘ̣ܚܳܐ ܩܰܕܝ̣ܫܳܐ ܕܠܳܐ ܫܶܠܝܳܐ ܡܶܣܬܓܶܕ ܐܰܢ̱ܬ ܘܡܶܫܬܰܒܰܚ: ܘܡܶܛܽܠ ܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܠܳܟ ܕܰܠܘܳܬܰܢ ܐܶܬ̣ܬܰܚܬܝ̣ܬ ܠܣܘ̣ܪܳܩܳܐ ܨܶܒܝܳܢܳܝܳܐ: ܟܰܕ ܓܶܝܪ ܚܰܝܠܳܐ ܘܚܶܟܡܬܳܐ ܕܰܐܒܳܐ ܡܬܘ̣ܡܳܐܝ̣ܬ ܐܝ̣ܬܰܝܟ: ܘܡܶܠܬܳܐ ܘܥܳܒܘ̣ܕܳܐ ܕܟܽܠܳܗ̇ ܒܪܝ̣ܬܳܐ ܡܶܬܚܰܙܝܳܢܝ̣ܬܳܐ ܘܡܶܬܝܰܕܥܳܢܝ̣ܬܳܐ ܠܒܶܫ̣ܬ ܒܚܘ̣ܒܳܟ ܡܶܛܽܠܳܬܰܢ ܕܡܘ̣ܬܳܐ ܕܥܰܒܕܳܐ ܕܰܒܟܽܠ ܡܶܕܶܡ ܬ̣ܶܬܪܰܥܶܐ ܠܰܢ: ܘܰܠܡܰܠܟܘ̣ܬܳܐ ܕܰܫܡܰܝܳܐ ܬ̣ܙܰܡܶܢ ܠܰܢ: ܘܰܕܪܰܫ̣ܬ ܠܰܢ ܐܘ̣ܪܚܳܐ ܡܥܰܠܰܝܬܳܐ ܕܡܰܣܩܳܐ ܠܰܫܡܰܝܳܐ: ܘܰܫܒܝ̣ܠܳܐ ܕܚܰܝ̈ܶܐ ܡܰܠܰܐܟܳܝ̈ܶܐ ܐܰܝܟܰܢܳܐ ܕܟܰܕ ܢܰܟܦܳܐܝ̣ܬ ܘܰܕܠܳܐ ܥܶܕܠܳܝ ܚܳܙܶܝܢܰܢ ܒܥܳܠܡܳܐ ܗܳܢܳܐ ܕܡܘ̣ܬܳܐ ܕܨܰܠܡܳܐ ܕܝ̣ܠܳܟ ܐܰܠܳܗܳܝܳܐ ܘܥܳܒܘ̣ܕܳܐ ܢ̣ܶܩܢܶܐ ܢܰܦܫܰܢ: ܘܰܕܠܳܐ ܛܘ̣ܠܫܳܐ ܢ̇ܶܛܰܪ: ܘܡܶܛܽܠ ܗܳܕܶܐ ܐܰܢ̱ܬ ܗ̱ܘ̣ ܡܳܪܝܳܐ ܣܳܝܘ̣ܡܶܗ ܕܰܐܓܘ̣ܢܳܐ ܗܳܢܳܐ: ܘܰܡܚܰܬܡܳܢܶܗ ܕܨܰܘܡܳܐ ܩܰܕܝ̣ܫܳܐ ܙܰܝܢܳܐ ܫܒܝ̣ܚܳܐ ܘܢܰܨܝ̣ܚܳܐ ܐܰܠܒܶܫ̣ܬ ܠܰܢ: ܠܥܘ̣ܕܪܳܢܳܐ ܘܰܠܢܘ̣ܛܳܪܳܐ ܕܚ̈ܰܝ݂ܰܝ݂ܢ ܘܚܰܝܠܳܐ ܠܳܐ ܡܶܙܕܰܟܝܳܢܳܐ: ܕܰܢ̇ܕܘ̣ܫ ܥܰܠ ܚܘܰܘ̈ܳܬܳܐ ܘܥܶܩܰܪ̈ܒܶܐ ܘܥܰܠ ܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ: ܘܒܰܡܚܰܡܣܢܳܢܘ̣ܬܳܐ ܕܡ̣ܶܢ ܪ̈ܓܝ̣ܓܳܬܳܐ ܒܶܣܪ̈ܳܢܳܝܳܬܳܐ ܢ̇ܶܙܟܶܐ ܠܗܰܘ̇ ܕܰܒܡܶܐܟܘ̣ܠܬܳܐ ܢܰܟܪܝ̣ ܠܰܢ: ܠܕܘ̣ܝܳܪ̈ܶܐ ܫܒܝ̣̈ܚܶܐ ܘܰܠܛܘ̣̈ܒܶܐ ܕܰܒܦܰܪܕܰܝܣܳܐ: ܘܟܰܕ ܬܘ̣ܒ ܒܚܰܕܘ̣ܬܳܐ ܕܢܰܦܫܳܐ ܘܒܰܦܨܝ̣ܚܘ̣ܬܳܐ ܕܪܘ̣ܚܳܐ: ܘܪܳܗܛܝ̣ܢܰܢ ܒܶܐܣܛܰܕܺܝܳܘܢ ܗܳܢܳܐ ܪܘ̣ܚܳܢܳܝܳܐ: ܘܩܰܕܝ̣ܫܳܐܝ̣ܬ ܡܫܰܡܠܶܝܢܰܢ ܠܨܰܘܡܳܐ ܗܳܢܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܠܗܳܢܳܐ ܕܰܚܠܳܦܰܝܢ ܐܰܢ̱ܬ ܠܳܐ ܣܢܝ̣ܩܳܐ ܨܳܡ̣ܬ ܘܫܰܡܠܝ̣ܬ: ܕܢ̇ܶܬܥܰܫܰܢ ܒܚܰܝܠܳܐ ܥܰܠ ܒܥܶܠܕܰܪܳܐ ܘܢ̇ܶܣܰܒ ܟܠܝ̣̈ܠܶܐ ܕܙܳܟܘ̣ܬܳܐ: ܡܦܝ̣ܣܝ̣ܢܰܢ ܠܳܟ ܗܳܟܝ̣ܠ ܡܳܪܝܳܐ ܪܳܚܶܡ ܐ̱ܢܳܫܳܐ: ܕܟܰܕ ܫܠܳܡܳܐ ܘܫܰܝܢܳܐ ܘܪ̈ܰܚܡܶܐ ܫܦܝ̣̈ܥܶܐ ܡܫܰܟܶܢ ܐܰܢ̱ܬ ܠܥܰܡܳܐ ܕܝ̣ܠܳܟ ܘܠܰܒ̈ܢܰܝܳܐ ܕܡܰܪܥܝ̣ܬܳܟ ܐܰܫܘܳܐ ܒܛܰܝܒܘ̣ܬܳܟ ܕܰܢ̇ܡܰܢܰܥ ܠܥܺܐܕܳܐ ܕܦܶܨܚܳܐ ܪܰܒܳܐ ܘܰܫܒܝ̣ܚܳܐ: ܐܰܝܟܰܢܳܐ ܕܥܰܡ ܚܰܝ̈ܠܰܘܳܬܳܐ ܩܰܕܝ̣̈ܫܶܐ ܘܰܫܡܰܝܳܢ̈ܶܐ: ܢ̇ܫܰܒܰܚ ܠܚܰܫܳܟ ܕܰܚܠܳܦܰܝܢ ܘܠܰܩܝܳܡܬܳܟ ܕܡ̣ܶܢ ܒܶܝܬ ܡܝ̣̈ܬܶܐ ܚܠܳܦ ܦܘ̣ܪܩܳܢܳܐ ܕܚ̈ܰܝ݂ܰܝ݂ܢ: ܡܫܝ̣ܚܳܐ ܦܳܪܘ̣ܩܳܐ ܘܰܡܟܰܠܠܳܢܳܐ ܕܥܺܕܬܳܐ ܩܰܕܝ̣ܫܬܳܐ: ܐܰܢ̱ܬ ܓܶܝܪ ܐܝ̣ܬܰܝܟ ܣܰܒܪܳܐ ܘܒܶܝܬ ܓܰܘܣܳܐ ܕܰܡܗܰܝ̈ܡܢܶܐ: ܘܰܡܥܰܕܪܳܢܳܐ ܘܰܡܚܰܝܠܳܢܳܐ ܠܘܳܬ ܟܽܠܗܶܝܢ ܛܰܝܒ̈ܘܳܬܳܟ ܘܠܳܟ ܦܰܐܝܳܐ ܬܶܫܒܘ̣ܚܬܳܐ ܘܺܐܝܩܳܪܳܐ: ܘܣܶܓܕܬܳܐ ܥܰܡ ܐܰܒܘ̣ܟ ܡܫܰܒܚܳܐ ܘܪܘ̣ܚܳܟ ܚܰܝܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀