ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܟܰܕ ܡ̣ܶܢ ܐܘ̣ܪܚܳܐ ܒܝ̣ܫܬܳܐ ܐܰܘܟܝ̣ܬ ܦܘ̣ܠܚܳܢܳܐ ܕܥܳܒ̈ܕܰܝ ܥܰܘܠܳܐ ܡܶܬܪܰܚܩܝ̣ܢܰܢ: ܒܢܳܡܘ̣ܣܳܟ ܕܚܰܝ̈ܶܐ ܡܶܬܗܰܓܶܝܢܰܢ ܐܝ̣ܡܳܡܳܐ ܘܠܺܠܝܳܐ: ܟܰܕ ܡܶܬܕܰܡܶܝܢܰܢ ܒܐܝ̣ܠܳܢܳܐ ܗܰܘ̇ ܕܰܢܨܝ̣ܒ ܥܰܠ ܬܰܦܳܐ ܕܡܰܝ̈ܳܐ: ܕܡ̣ܶܢ ܦܺܐܪ̈ܰܘܗ̱ܝ ܛܳܒ̈ܶܐ ܢ̇ܶܬܒܰܣܰܡ ܗܳܪܟܳܐ ܘܒܰܢܝܳܚ̈ܳܬܳܐ ܕܬܰܡܳܢ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܨܰܦܪܳܐ ܦܨܝ̣ܚܳܐ ܘܐܝ̣ܡܳܡܳܐ ܡܚܰܕܝܳܢܳܐ: ܠܗܰܘ̇ ܕܶܢܚܳܐ ܫܒܝ̣ܚܳܐ ܘܨܶܡܚܳܐ ܠܳܐ ܡܶܬܕܰܪܟܳܢܳܐ: ܠܗܰܘ̇ ܫܶܡܫܳܐ ܪܰܒܳܐ ܕܙܰܕܝ̣ܩܘ̣ܬܳܐ ܘܢܘ̣ܗܪܳܐ ܡܚܰܕܝܳܢܳܐ: ܠܗܰܘ̇ ܙܝ̣ܘܳܐ ܦܰܐܝܳܐ ܘܫܘ̣ܒܚܳܐ ܠܳܐ ܡܶܫܬܰܬܩܳܢܳܐ: ܠܗܰܘ̇ ܫܘ̣ܦܪܳܐ ܬܗܝ̣ܪܳܐ ܘܠܳܐ ܡܶܬܦܰܫܩܳܢܳܐ: ܠܗܰܘ̇ ܟܝܳܢܳܐ ܡܥܰܠܝܳܐ ܘܠܳܐ ܡܶܣܬܰܝܟܳܢܳܐ: ܠܗܰܘ̇ ܐܝ̣ܬܝܳܐ ܡܬܘ̣ܡܳܝܳܐ ܘܠܳܐ ܡܶܬܥܰܩܒܳܢܳܐ: ܠܗܰܘ̇ ܟܰܣܝܳܐ ܘܰܓܢܝ̣ܙܳܐ ܘܠܳܐ ܡܶܬܒܰܨܝܳܢܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܢܘ̣ܗܪܳܐ ܢܰܗܝ̣ܪܳܐ ܘܡܰܢܗܪܳܢܳܐ ܕܒܶܪ̈ܝܳܬܳܐ ܗܰܘ̇ ܕܰܒܢܘ̣ܗܪܳܐ ܕܝ̣ܠܳܟ ܠܳܐ ܡܶܬܕܰܪܟܳܢܳܐ ܐܰܢܗ̣ܰܪܬ ܠܟܽܠܗܶܝܢ ܒܶܪ̈ܝܳܬܳܐ: ܘܚܰܕܝ̣ܬ ܘܰܐܦܨܰܚ̣ܬ ܠܟܠܳܗܿ ܬܺܒܶܝܠ ܒܢܘ̣ܗܪܳܟ ܫܰܪܝܪܳܐ: ܐܰܢ̱ܬ ܗ̱ܘ̣ ܗܰܘ̇ ܕܰܒ̣ܪܰܝܬ ܡ̣ܶܢ ܠܳܐ ܡܶܕܶܡ ܘܠܰܗܘܳܝܳܐ ܐܰܝܬܝ̣ܬ ܟܽܠܡܶܕܶܡ: ܗܰܘ̇ ܕܰܒܢܘ̣ܗܪܳܐ ܕܝ̣ܠܳܟ ܡܶܬܝܰܕܥܳܢܳܐ ܐܰܢ̣ܗܰܪܬ ܠܰܫܡܰܝܳܢ̈ܶܐ ܘܠܰܐܪ̈ܥܳܢܳܝܶܐ: ܗܰܘ̇ ܕܠܳܟ ܡܫܰܒܚܝ̣ܢ ܡܰܠܰܐܟ̈ܶܐ ܘܠܳܟ ܡܝܰܒܒܝ̣ܢ ܪ̈ܝ̣ܫܰܝ ܡܰܠܰܐܟ̈ܶܐ: ܟܪ̈ܘ̣ܒܶܐ ܠܳܟ ܡܒܰܪܟܝ̣ܢ: ܘܰܣܪ̈ܳܦܶܐ ܕܶܫܬܳܐ ܓܶܦܝ̣̈ܢ ܠܳܟ ܡܩܰܕܫܝ̣ܢ: ܚܰܝ̈ܠܰܘܳܬܳܐ ܠܳܟ ܙܳܡܪܝ̣ܢ ܫܘ̣ܒܚܳܐ: ܪ̈ܝ̣ܫܳܢܘܳܬܳܐ ܠܳܟ ܡܝܰܩܪܝ̣ܢ: ܦܳܠܰܚ̈ܘܳܬܳܐ ܡܠܝ̣̈ܠܳܬܳܐ ܘܰܫܡܰܝ̈ܳܢܝܳܬܳܐ ܠܳܟ ܡܩܰܠܣܝ̣ܢ: ܡܰܘܬܒ̈ܶܐ ܘܡܳܪ̈ܰܘܳܬܳܐ ܠܪܰܒܘ̣ܬܳܟ ܣܳܓܕܝ̣ܢ: ܠܳܟ ܡܫܰܒܚ ܝܰܡܳܐ ܒܓܳܙܪ̈ܳܬܳܐ ܕܝ̣ܠܶܗ: ܡܶܢܳܟ ܪܳܐܬܝ̣ܢ ܬܗܘ̣ܡ̈ܶܐ ܡܳܪܶܗ ܟܽܠ: ܠܳܟ ܦܳܠܚܝ̣ܢ ܡܥܝ̣̈ܢܶܐ ܥܰܒܕܘ̣ܬܳܐ ܡܳܪܳܐ ܡܪܰܚܡܳܢܳܐ: ܠܳܟ ܡܗܰܕܰܪ ܝܰܒܫܳܐ ܒܗܰܒܳܒ̈ܰܘܗ̱ܝ ܐܰܠܳܗܳܐ ܣܓܝ̣ܕܳܐ: ܕܰܒܢܘ̣ܗܪܳܟ ܫܰܪܝ̣ܪܳܐ ܐܰܦܪܰܓܬ ܐܶܢܽܘܢ: ܡܰܝ̈ܳܐ ܕܰܠܥܶܠ ܡ̣ܶܢ ܫܡܰܝܳܐ ܠܳܟ ܡܫܰܒܚܝ̣ܢ: ܐܝ̣ܢ ܡܳܪܝܳܐ ܐܰܠܳܗܳܐ ܡܳܪܳܐ ܕܪ̈ܘ̣ܚܳܬܳܐ ܘܰܕܟܽܠ ܒܣܰܪ: ܗܰܘ̇ ܕܡ̣ܶܢ ܠܺܠܝܳܐ ܥܰܡܘ̣ܛܳܐ ܘܚܶܫܘ̣ܟܳܐ ܕܰܚܛܝ̣ܬܳܐ ܫܰܢܝ̣ܬ ܠܰܢ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܪܳܚܶܡ ܐ̱ܢܳܫܳܐ: ܗܰܘ̇ ܕܡ̣ܶܢ ܠܺܠܝܳܐ ܠܨܰܦܪܳܐ ܦܨܝ̣ܚܳܐ ܐܰܝܬܝ̣ܬ ܠܰܢ: ܗܰܒܠܰܢ ܕܢ̇ܶܚܕܶܐ ܘܢ̇ܶܪܘܰܙ ܘܰܢ̇ܫܰܒܚܳܟ ܒܗܳܢܳܐ ܨܰܦܪܳܐ ܥܳܒܘ̣ܪܳܐ: ܕܒܶܗ ܡܫܰܒ̈ܚܳܢ ܠܳܟ ܟܽܠ ܢܶܫܡܳܐ ܒܨܰܦܪܳܐ: ܒܥܝ̣ܪܳܐ ܠܳܟ ܙܳܡܪܳܐ ܫܘ̣ܒܚܳܐ ܒܨܰܦܪܳܐ: ܚܰܝ̈ܘܳܬܳܐ ܠܘܳܬܳܟ ܡܩܰܕ̈ܡܳܢ ܘܓܳܥ̈ܝܳܢ ܕܬܶܬܶܠ ܠܗܶܝܢ ܡܶܐܟܘ̣ܠܬܳܐ ܥܰܘܦܳܐ ܕܰܫܡܰܝܳܐ ܠܳܟ ܠܳܥܙܝ̣ܢ ܫܘ̣ܒܚܳܐ: ܠܥ̈ܘ̣ܕܶܐ ܝܰܗ̣ܒܬ ܠܺܠܝܳܐ ܟܡܝ̣ܪܳܐ ܕܒܶܗ ܡܕܰܝܰܪ: ܘܠܰܣܢܽܘܢܝ̣ܬܳܐ ܨܰܦܪܳܐ ܦܨܝ̣ܚܳܐ ܕܫܘ̣ܒܚܳܐ ܒܶܗ ܠܳܟ ܙܳܡܪܳܐ: ܐܰܝ̈ܠܶܐ ܓܳܥܶܝܢ ܘܪܳܘܙܝ̣ܢ ܘܚܳܕܶܝܢ ܘܰܦܨܝ̣ܚܝ̣ܢ ܒܢܘ̣ܗܪܶܗ ܕܨܰܦܪܳܐ: ܥܪ̈ܳܕܶܐ ܕܰܒܕܰܒܪܳܐ ܠܢܘ̣ܗܪܶܗ ܕܨܰܦܪܳܟ ܡܣܰܟܶܝܢ: ܘܰܒ̈ܢܰܝ ܐ̱ܢܳܫܳܐ ܥܰܦܪ̈ܳܢܶܐ ܠܐܝ̣ܩܳܪܳܟ ܣܳܓܕܝ̣ܢ ܘܰܒܩܝ̣̈ܢܬܳܐ ܫܰܦ̈ܝܳܬܳܐ ܘܕܰܟ̈ܝܳܬܳܐ ܠܳܟ ܡܫܰܒܚܝ̣ܢ ܘܰܡܩܰܠܣܝ̣ܢ: ܡܳܪܳܐ ܛܳܒܳܐ ܠܳܟ ܡܫܰܒܚ ܫܶܡܫܳܐ: ܘܣܰܗܪܳܐ ܠܳܟ ܡܗܰܕܰܪ: ܟܰܘܟ̈ܒܶܐ ܠܳܟ ܡܝܰܒܒܝ̣ܢ ܥܢܳܢ̈ܶܐ ܠܳܟ ܝܳܗܒܝ̣ܢ ܫܘ̣ܒܚܳܐ: ܪ̈ܰܥܡܶܐ ܒܳܟ ܡܶܬܓܰܘܙܠܝ̣ܢ: ܒܰܪ̈ܩܶܐ ܢܰܗܝ̣ܪ̈ܶܐ ܒܨܶܡ̈ܚܰܝܗܽܘܢ ܠܳܟ ܦܳܪܥܝ̣ܢ ܬܰܘܕ̈ܝ̣ܬܳܐ: ܐܝܢ܇ ܡܳܪܰܢ ܝܶܫܘ̣ܥ ܡܫܝ̣ܚܳܐ ܢܘ̣ܗܪܳܐ ܫܰܪܝܪܳܐ ܘܪܳܥܝܳܐ ܛܳܒܳܐ ܘܰܢܓܝܪ ܪܘ̣ܚܳܐ: ܗܰܘ̇ ܕܪܳܥܶܐ ܘܰܡܕܰܒܰܪ ܠܓܶܢܣܳܐ ܕܝ̣ܠܰܢ ܥܰܦܪܳܢܳܐ ܒܰܡܪܰܚܡܳܢܘ̣ܬܶܗ ܚܘ̣ܣ ܘܪܰܚܶܡ ܥܰܠ ܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܦܪܝ̣ܩܰܬ݀ ܒܨܠܝ̣ܒܳܟ: ܘܥܰܠ ܟܽܠ ܚܘ̣ܣ ܘܥܰܠ ܟܽܠ ܪܰܚܶܡ: ܘܰܠܟܽܠ ܩܪܝ̣ ܘܰܐܝܬܳܐ ܠܐܘ̣ܪܚܳܐ ܕܦܘ̣ܪܩܳܢܳܐ ܘܰܠܟܽܠ ܕܰܒܢܶܣ̈ܝܽܘ̣ܢܶܐ ܡܫܰܚ̈ܠܦܶܐ ܪܡܶܝܢ ܦܪܘ̣ܩ ܘܫܰܘܙܶܒ: ܠܰܟܪ̈ܝ̣ܗܶܐ ܗܰܒ ܚܘ̣ܠܡܳܢܳܐ ܠܕܰܐܠܝ̣ܨܝ̣ܢ ܐܰܪܘܰܚ: ܘܰܠܗܳܢܽܘܢ ܕܰܫܪܰܥ̣ܘ̱ ܘܰܢܦ̣ܰܠܘ̱ ܒܦܰܚ̈ܶܐ ܕܰܚܛܝ̣ܬܳܐ ܕܰܠܳܐ ܘܰܐܩܝ̣ܡ ܐܶܢܽܘܢ ܒܰܡܪܰܚܡܳܢܘ̣ܬܳܟ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܕܡ̣ܶܢ ܚܰܝ̈ܶܐ ܗܳܠܶܝܢ ܚ̣ܙܰܩܘ̱ ܘܰܠܘܳܬܳܟ ܡܰܢ̣ܰܥܘ̱: ܐܰܢܝ̣ܚ ܐܶܢܽܘܢ ܒܰܐܘ̈ܘܳܢܶܐ ܕܝ̣ܠܳܟ ܫܡܰܝܳܢ̈ܶܐ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܝܳܐ ܐܰܠܳܗܳܐ ܒܳܪܘ̣ܝܳܐ ܘܝܳܨܘ̣ܦܳܐ ܕܟܽܠ: ܗܰܘ̇ ܕܰܒܨܶܒܝܳܢܳܟ ܡ̣ܶܢ ܠܳܐ ܡܶܕܶܡ ܒ̣ܪܰܝܬ ܠܰܢ: ܘܰܠܗܳܝ ܕܢ̇ܶܗܘܶܐ ܐܰܝܬܝ̣ܬ ܠܰܢ: ܠܳܐ ܠܒܰܪ ܡ̣ܶܢ ܐܘ̣ܪܚܳܟ ܬܰܪܦܶܐ ܠܰܢ ܕܰܢ̇ܗܰܠܶܟ: ܐܶܠܳܐ ܗܰܒܠܰܢ ܥܘ̣ܕܪܳܢܳܐ ܕܛܰܝܒܘ̣ܬܳܟ ܘܣܘ̣ܡܳܟܳܐ ܕܰܡܚܝ̣ܠܘ̣ܬܰܢ: ܘܥܰܡ ܦܝ̣ܪܡܳܐ ܗܳܢܳܐ ܕܰܒܫܘ̣ܪܳܝܶܗ ܕܐܝ̣ܡܳܡܳܐ ܡܩܰܪܒܝ̣ܢܰܢ ܢܰܦ̈ܫܳܬܰܢ ܢ̣ܶܗ̈ܘܳܝܢ ܠܳܟ ܥܶܛܪܳܐ ܗܰܢܺܝܳܐܐ ܕܒܰܣܝܡܘ̣ܬܳܟ ܒܪܝ̣ܚܳܐ ܕܰܥܒ̈ܳܕܶܐ ܛܳܒ̈ܶܐ: ܥܕܰܡܳܐ ܠܫܘ̣ܠܳܡܳܐ ܕܐܝ̣ܡܳܡܳܐ ܗܳܢܳܐ ܥܰܡ ܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀