ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܕܽܘ̣ܒܳܪܳܐ ܓܡܝ̣ܪܳܐ ܘܠܳܐ ܡܶܫܬܰܚܠܦܳܢܳܐ: ܘܩܰܘܡܳܐ ܬܪܝ̣ܨܳܐ ܘܠܳܐ ܡܶܨܛܰܠܝܳܢܳܐ ܕܰܩܕܳܡܰܝܟ ܫܰܟܶܢ ܠܰܢ ܡܳܪܝܳܐ: ܐܰܝܟܰܢܳܐ ܕܟܰܕ ܢܰܨܝ̣ܚܳܐܝ̣ܬ ܡܥܰܙܶܝܢܰܢ ܒܰܩܪܳܒܳܐ ܕܠܘ̣ܩܒܰܠ ܪ̈ܘ̣ܚܶܐ ܕܒܝ̣ܫܘ̣ܬܳܐ ܢ̇ܰܨܠܰܚ ܒܰܐܓܘ̣ܢܳܐ: ܘܢ̇ܶܣܰܒ ܙܳܟܘ̣ܬܳܐ ܒܥܘ̣ܕܪ̈ܳܢܶܐ ܘܣܘ̣ܝܳܥܳܐ ܕܛܰܝܒܘ̣ܬܳܟ: ܘܰܒܚܰܝܠܳܐ ܕܝܰܡܝ̣ܢܰܟ ܡܰܨܝܰܬ݀ ܟܽܠ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܩܰܕܝ̣ܫܳܐ ܘܰܡܫܰܒܚܳܐ ܕܒܰܐܬܪ̈ܰܘܳܬܳܐ ܩܰܕܝ̣̈ܫܶܐ ܡܰܬܩܰܢ ܡܰܫܪܝܶܗ ܠܳܐ ܡܶܬܩܰܪܒܳܢܳܐ: ܡܳܪܝܳܐ ܟܽܠܗܽܘܢ ܥܘ̣ܕܪ̈ܳܢܶܐ ܡܶܢܶܗ ܢܳܒܥܝ̣ܢ ܠܚܰܛܳܝ̈ܶܐ ܕܡܶܬܩܰܪܒܝܢ ܠܶܗ: ܘܨܳܒܶܐ ܒܬܰܝܳܒ̈ܶܐ ܕܰܒܬܰܪܥܶܗ ܢܳܩܫܝ̣ܢ: ܐܰܢ̱ܬ ܡܳܪܝ ܒܛܰܝܒܘ̣ܬܳܟ ܚܰܕܶܬ ܠܟܰܣ̈ܝܳܬܰܢ: ܢܛܰܪ ܠܓܰܠ̈ܝܳܬܰܢ: ܘܰܐܠܒܶܫ ܠܒܰܪܢܳܫܰܢ ܢܘ̣ܗܪܳܐ ܕܠܳܐ ܚܳܫܶܟ: ܘܚܰܕܳܐ ܠܰܢ ܒܡܰܘܗ̈ܒܳܬܳܟ: ܕܢܰܘܕܶܐ ܠܛܰܝܒܘ̣ܬܳܟ ܡܰܠܝܰܬ݀ ܟܽܠ ܥܘ̣ܕܪ̈ܳܢܝܢ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰ‌ܠܳܗܳܐ ܫܡܳܐ ܦܰܐܝܳܐ ܘܰܪܓܝ̣ܓܳܐ: ܗܰܘ̇ ܕܡܶܬܝܰܐܝܒܝ̣ܢ ܠܶܗ ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ: ܗܰܘ̇ ܕܥܰܠ ܐܰܝܠܶܝܢ ܕܰܠܘܳܬܶܗ ܡܶܬܩܰܪܒܝ̣ܢ ܐܳܫܶܕ ܚܘ̣ܒܶܗ: ܘܡܰܫܦܰܥ ܛܳܒܘ̣ܬܶܗ ܘܥܳܒܶܕ ܠܗܽܘܢ ܒܢܰܝ̈ ܕܡܘ̣ܬܳܐ ܕܫܘ̣ܒܚܶܗ: ܗܰܘ̇ ܕܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢ̣ܺܚܽܘܢ ܘܢ̣ܺܐܬܽܘܢ ܠܝ̣ܕܰܥܬܶܗ ܫܰܪܝ̣ܪܬܳܐ: ܘܢ̣ܶܬܚܰܟܡܽܘܢ ܒܚܶܟܡܬܶܗ ܐܰ‌ܠܳܗܳܝܬܳܐ ܗܰܘ̇ ܕܠܳܐ ܚܳܣܶܡ ܥܰܠ ܐܰܝܠܶܝܢ ܕܢܳܩܫܝ̣ܢ ܒܬܰܪܥܳܐ ܕܪ̈ܰܚܡܰܘܗ̱ܝ ܡܪܰܚܶܡ: ܘܰܟܡܳܐ ܐܶܢ ܢܶܚ̇ܛܶܐ ܘܢ̇ܰܥܘܶܠ ܘܠܘܳܬܶܗ ܢ̇ܶܬܦܢܶܐ ܚܳܕܶܐ ܒܰܢ ܘܰܡܩܰܒܶܠ ܠܰܢ: ܘܥܰܠ ܐܝ̣̈ܕܰܘܗ̱ܝ ܩܰܕܝ̣̈ܫܳܬܳܐ ܡܙܰܝܰܚ ܠܰܢ ܘܰܠܘܳܬ ܐܰܒܘܗ̱ܝ ܓܢܝ̣ܙܳܐ ܡܩܰܪܶܒ ܠܰܢ: ܘܳܐܫܶܕ ܥܠܰܝܢ ܪܘ̣ܚܶܗ ܩܰܕܝ̣ܫܳܐ ܘܰܡܫܰܚܠܶܦ ܠܰܢ: ܘܡ̣ܶܢ ܗܳܝ ܕܐܝ̣ܬܰܝܢ ܗ̱ܘܰܝܢ ܒܢܰܝ̈ܳܐ ܕܰܚܛܝ̣ܬܳܐ ܘܰܡܫܰܥ̈ܒܕܶܐ ܠܳܐܟܶܠܩܰܪܨܳܐ: ܡܰܦܢܶܐ ܠܰܢ ܘܰܒ̈ܢܰܝܳܐ ܕܙܰܕܝ̣ܩܘ̣ܬܳܐ ܘܰܡܫܰܘ̈ܬܦܰܝ ܒܪܘ̣ܚܶܗ ܩܰܕܝ̣ܫܳܐ ܥܳܒܶܕ ܠܰܢ: ܐܶܢܗܘ̣ ܕܰܚܢܰܢ ܠܰܢ ܡ̣ܶܢ ܠܘܳܬܶܗ ܠܳܐ ܢ̇ܶܥܪܘ̣ܩ ܘܢ̇ܶܪܚܰܩ: ܠܳܟ ܗܳܟܝܠ ܕܐܝ̣ܬܰܝܟ ܥܰܬܝ̣ܪܳܐ ܘܛܳܒܳܐ ܫܦܝ̣ܥܳܐ ܘܝܳܗܘ̣ܒܳܐ ܒܰܣܝ̣ܡܳܐ ܘܚܰܢܳܢܳܐ: ܙܳܝܘ̣ܢܳܐ ܘܰܡܦܰܪܢܣܳܢܳܐ ܚܰܝܘ̣ܣܬܳܢܳܐ ܘܫܳܒܘ̣ܩܳܐ ܡܪܰܚܡܳܢܳܐ ܘܰܡ̇ܠܶܐ̣ ܚܘ̣ܒܳܐ: ܠܳܟ ܡܶܬܟܰܫܦܝܢܰܢ ܘܡܶܢܳܟ ܒܳܥܶܝܢܰܢ ܕܬ̣ܰܫܦܰܥ ܪ̈ܰܚܡܰܝܟ ܥܰܠ ܡܚܝ̣ܠܘ̣ܬܰܢ: ܘܰܬ̣ܚܰܣܶܐ ܚܰܘ̈ܒܰܝܢ ܒܰܚܢܳܢܳܟ: ܘܬ̣ܶܫܡܰܥ ܠܰܢ ܕܡܶܬܟܰܫܦܝ̣ܢܰܢ ܠܳܟ ܘܰܬ̣ܫܰܕܰܪ ܠܰܢ ܦܘ̣ܪܩܳܢܳܟ: ܘܰܬ̣ܫܰܘܙܶܒ ܠܰܢ ܡ̣ܶܢ ܚܛܳܗ̈ܶܐ: ܥܢܝ̣ ܠܰܢ ܡܳܪܝ̱ ܕܳܢܩܫܝ̣ܢܰܢ ܒܬܰܪܥܳܐ ܕܪ̈ܰܚܡܰܝܟ: ܘܠܳܐ ܢ̇ܶܗܦܘ̣ܟ ܡ̣ܶܢ ܠܘܳܬܳܟ ܒܰܗܝ̣̈ܬܶܐ: ܐܶܠܳܐ ܫܰܕܰܪ ܛܰܝܒܘ̣ܬܳܟ ܠܐܝܳܠܳܐ ܕܝ̣ܠܰܢ ܩܦܘ̣ܠ ܡܳܪܝ ܥܰܪܦܶܠܳܐ ܕܰܚ̈ܛܳܗܶܐ ܕܰܦܪܝ̣ܣܳܐ ܥܰܠ ܝ̣ܕܰܥܬܰܢ: ܐܰܫܘܳܐ ܠܰܢ ܕܰܢ̇ܨܰܠܶܐ ܩܕܳܡܰܝܟ ܨܠܘ̣ܬܳܐ ܚܰܝܠܬܳܢܝ̣ܬܳܐ: ܗܳܝ ܕܦܳܣܥܳܐ ܠܥܶܠ ܡ̣ܶܢ ܐܰܪ̈ܟܰܐܣ ܘܫܘ̣ܠ̈ܛܳܢܶܐ ܘܟܽܠܗܽܘܢ ܚܰܝ̈ܠܰܘܳܬܳܐ ܥܶܠܳܝ̈ܶܐ: ܐܝ̣ܢ ܐܰܠܳܗܳܐ ܫܳܒܘ̣ܩܳܐ ܫܒܘ̣ܩ ܠܰܢ ܠܡܰܣܟ̈ܠܳܢܶܐ: ܐܝ̣ܢ ܡܳܪܝܳܐ ܡܚܰܣܝܳܢܳܐ ܚܰܣܳܢ ܡ̣ܶܢ ܥܰܘܠܰܢ ܕܪܰܒ ܗ̱ܘ̣: ܚܰܣܳܢ ܡܶܛܽܠ ܫܡܳܟ ܩܰܕܝ̣ܫܳܐ ܡܳܪܝܳܐ ܓܳܒܘ̣ܠܰܢ: ܚܘ̣ܢܶܝܗܿ ܠܰܡܚܝ̣ܠܘ̣ܬܰܢ ܒܳܪܘ̣ܝܰܢ ܚܘ̣ܣ ܥܰܠ ܥܒܳܕܳܐ ܕܐܝ̈ܕܰܝܟ: ܐܝ̣ܢ ܡܳܪܝܳܐ ܥܳܒܘ̣ܕܳܐ ܕܰܐܦܶܩ̣ܬܳܢ ܠܢܘ̣ܗܪܳܐ ܗܳܢܳܐ ܙܰܒܢܳܝܳܐ: ܐܰܦܶܩ ܠܰܢ ܡ̣ܶܢ ܚܶܫܘ̣ܟܳܐ ܕܣܰܢܝ̈ܳܬܳܐ ܠܢܘ̣ܗܪܳܐ ܕܝ̣ܕܰܥܬܳܟ: ܡܳܪܝܳܐ ܚܰܘܳܐ ܠܰܢ ܐܘ̣ܪܚܳܟ ܕܚܰܝ̈ܶܐ: ܘܕܰܒܰܪܰܝܢ ܒܰܫ̈ܒܝ̣ܠܶܐ ܕܝ̣ܠܳܟ ܬܪ̈ܝ̣ܨܶܐ: ܚܰܛܳܝ̈ܶܐ ܚܢܰܢ ܡܳܪܝ̱ ܘܠܳܐ ܫܳܘܶܝܢܰܢ ܕܢ̇ܶܬܩܰܪܰܒ ܠܘܳܬ ܬܰܪܥܳܐ ܕܒܶܝܬ ܓܰܙܳܟ: ܐܶܠܳܐ ܡܦܝ̣ܣܝ̣ܢܰܢ ܠܰܐܠܳܗܘ̣ܬܳܟ ܕܢܶܫ̇ܬܘܶܐ ܒܛܰܝܒܘ̣ܬܳܟ ܠܫܘ̣ܚܠܳܦܳܐ ܕܡ̣ܶܢ ܒܝ̣̈ܫܳܬܳܐ ܠܘܳܬ ܛܳܒ̈ܳܬܳܐ: ܘܡ̣ܶܢ ܚܛܝ̣ܬܳܐ ܠܘܳܬ ܬܝܳܒܘ̣ܬܳܐ ܕܰܫܪܳܪܳܐ: ܘܡ̣ܶܢ ܡܚܝ̣ܠܘ̣ܬܳܐ ܠܘܳܬ ܚܰܝܠܬܳܢܘ̣ܬܳܐ: ܘܡ̣ܶܢ ܡܰܐܝ̣ܢܘ̣ܬܳܐ ܠܟܰܫܝ̣ܪܘ̣ܬܳܐ ܘܬܶܓܘ̣ܪܬܳܐ ܕܟܰܟܪ̈ܶܐ ܕܝ̣ܠܳܟ: ܘܢ̇ܰܝܬܶܐ ܠܳܟ ܒܰܐܥ̈ܦܶܐ ܕܳܫ̈ܢܶܐ ܕܝܘ̣ܠܦܳܢܳܐ ܘܰܕܚܶܟܡܬܳܐ ܕܝ̣ܠܳܟ ܐܰ‌ܠܳܗܳܝܬܳܐ: ܒܬܶܓܘ̣ܪܬܳܐ ܪܘ̣ܚܳܢܳܝܬܳܐ ܗܳܝ ܕܰܡܩܰܪܒܳܐ ܠܰܢ ܠܡܶܗܘܶܐ ܡܗܰܝ̈ܡܢܶܐ ܒܝܳܪܬܘ̣ܬܳܐ ܕܝ̣ܠܳܟ ܛܘ̣ܒܬܳܢܝ̣ܬܳܐ: ܚܽܘܢ ܠܰܢ ܒܪ̈ܰܚܡܰܝܟ ܘܕܰܟܳܐ ܠܰܢ ܡ̣ܶܢ ܟܽܠ ܛܘ̣ܠܫܳܐ ܕܒܶܣܪܳܐ ܘܰܕܪܘ̣ܚܳܐ ܫܰܘܙܶܒ ܠܰܢ ܡܶܛܽܠ ܫܡܳܟ ܡܳܪܝܳܐ: ܘܙܰܝܶܢ ܠܗܰܘܢܳܐ ܕܝ̣ܠܰܢ ܒܰܫܪܳܪܳܐ ܘܰܒܝܘ̣ܠ̈ܦܳܢܰܝܟ ܐܰ‌ܠܳܗ̈ܳܝܶܐ: ܘܰܓܠܝ̣ ܠܰܢ ܐܘ̣ܪܚܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ: ܘܫܰܟܶܢ ܠܰܢ ܝ̣ܕܰܥܬܳܐ ܕܰܕܠܳܐ ܛܘ̣ܥܝ݂ܰܝ݂ ܪܶܕܝܳܐ ܒܢܳܡ̈ܘ̣ܣܰܝܟ: ܩܰܕܶܫ ܠܰܢ ܩܰܕܝ̣ܫܳܐ ܕܢ̇ܶܗܘܶܐ ܗܰܝ̈ܟܠܶܐ ܩܰܕܝ̣̈ܫܶܐ ܕܰܡܩܰܕܫܝ̣ܢ ܠܰܐܠܳܗܘ̣ܬܳܟ: ܒܰܕܡܘ̣ܬܳܐ ܕܡܰܠܰܐܟܰܝ̈ܟ ܩܰܕܝ̣̈ܫܶܐ ܘܢ̇ܶܗܘܶܐ ܠܳܟ ܐܰܚ̈ܶܐ ܫܰܪܝ̣ܪ̈ܶܐ: ܘܰܒ̈ܢܰܝܳܐ ܠܰܐܒܘ̣ܟ ܛܘ̣ܒܬܳܢܳܐ ܥܰܡ ܟܽܠܗܽܘܢ ܡܫܰܘ̈ܬܦܰܝ ܒܪܘ̣ܚܳܐ ܩܰܕܝ̣ܫܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܗܰܒܠܰܢ ܡܳܪܝܳܐ ܕܢ̇ܶܬܥܰܒܕܰܕ ܠܳܟ ܠܳܐ ܡܰܬܥܰܘܟܳܢܳܐܝ̣ܬ: ܘܢ̇ܶܫܦܰܪ ܠܳܟ ܒܬܶܫ̈ܡܫܳܬܰܢ ܘܨܰܘܡܰܢ ܘܰܨܠܰܘ̈ܳܬܰܢ ܐܰܡܝ̣ܢܳܐܝ̣ܬ: ܘܰܡܡܰܪ̈ܝܳܢܶܐ ܢ̇ܶܗܘܶܐ ܕܚܰܝ̈ܠܰܘܳܬܳܐ ܠܳܐ ܗܘ̣ܠܳܢܳܝ̈ܶܐ: ܘܥܰܡܗܽܘܢ ܢ̇ܶܙܡܰܪ ܠܳܟ ܙܡܝ̣ܪ̈ܳܬܳܐ ܪ̈ܘ̣ܚܳܢܳܝܳܬܳܐ: ܘܠܳܐ ܡܶܬܡܰܠܠܳܢܝ̈ܳܬܳܐ ܘܢܶܫ̇ܬܰܡܠܶܐ ܒܰܢ ܨܶܒܝܳܢܳܟ ܛܳܒܳܐ: ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀