ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܪܳܚܶܡ ܐ̱ܢܳܫ̈ܳܐ: ܕܰܢ̇ܩܘ̣ܡ ܩܕܳܡܰܝܟ ܕܠܳܐ ܡܶܨܛܰܠܝܳܢܳܐܝ̣ܬ ܒܝܰܘܡ̈ܳܬܳܐ ܗܳܠܶܝܢ ܡܝܰܩܪ̈ܶܐ ܘܩܰܕܝ̣̈ܫܶܐ ܕܨܰܘܡܳܐ: ܘܗܰܒܠܰܢ ܚܰܝܠܳܐ ܘܥܘ̣ܕܪܳܢܳܐ ܕܰܒܗܽܘܢ ܢ̇ܶܬܟܰܬܰܫ ܠܘ̣ܩܒܰܠ ܐܳܟܶܠܩܰܪܨܳܐ ܒܥܶܠܕܰܪܰܢ: ܗܰܘ̇ ܕܰܙܟ̣ܰܝܬܳܝܗ̱ܝ ܒܨܰܘܡܳܟ ܩܰܕܝ̣ܫܳܐ: ܘܠܳܐ ܬܘ̣ܒ ܢ̇ܶܙܕܟܶܐ ܡܶܢ ܦܰܚ̈ܰܘܗ̱ܝ ܘܰܡܨܺܝ̈ܕܳܬܶܗ ܡܰܘܒ̈ܕܳܢܝܳܬܳܐ: ܘܠܳܟ ܐܰܠܳܗܳܐ ܕܝ̣ܠܰܢ ܢ̇ܫܰܒܰܚ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܬܰܪܥܳܐ ܕܪ̈ܰܚܡܶܐ ܕܰܦܬܝ̣ܚ ܠܚܰܛܳܝ̈ܶܐ ܕܢܳܩܫܝ̣ܢ ܒܶܗ ܬܟܝ̣ܠܳܐܝ̣ܬ: ܠܗܰܘ̇ ܙܘ̣ܦܳܐ ܡܕܰܟܝܳܢܳܐ ܕܰܡܕܰܟܶܐ ܠܛܰܡ̈ܶܐܐ ܕܡܶܬܩܰܪܒܝ̣ܢ ܠܶܗ ܘܓܳܥܶܝܢ ܒܚܰܫܳܐ ܪܰܥܘ̣ܡܳܐܝ̣ܬ: ܠܗܰܘ̇ ܡܩܰܕܫܳܢܳܐ ܕܬܰܝ̈ܳܒܶܐ ܕܡܶܬܦܢܶܝܢ ܠܘܳܬܶܗ ܘܬܳܝ̇ܒܝ̣ܢ ܒܰܫܪܳܪܳܐ: ܘܡܰܫܦܰܥ ܪ̈ܰܚܡܰܘܗ̱ܝ ܥܰܠ ܐܰܝܠܶܝܢ ܕܡܶܬܓܰܘܣܝ̣ܢ ܒܶܗ ܫܦܝ̣ܥܳܐܝ̣ܬ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܘ̣ܒܚܳܐ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܝܰܠܕܳܐ ܡܬܘ̣ܡܳܝܳܐ ܕܰܐܒܳܐ ܡܬܘ̣ܡܳܝܳܐ: ܗܰܘ̇ ܕܟܰܕ ܐܝ̣ܬܰܝܟ ܦܫܝ̣ܛܳܐ ܘܠܳܐ ܡܪܰܟܒܳܐ ܘܰܫ̇ܘܶܐ̣ ܒܰܡܬܘ̣ܡܳܝܽܘ̣ܬܳܐ ܘܒܐܘ̣ܣܺܝܰܐ ܠܰܐܒܳܐ ܘܰܠܪܘ̣ܚܳܐ ܩܰܕܝ̣ܫܳܐ: ܣܰܪܶܩ̣ܬ ܐܰܢ̱ܬ ܠܳܟ ܡܶܛܽܠ ܦܘ̣ܪܩܳܢܰܢ ܨܶܒܝܳܢܳܐܝ̣ܬ: ܘܰܗ̣ܘܰܝܬ ܒܰܪܢܳܫܳܐ ܠܳܐ ܡܶܫܬܰܚܠܦܳܢܳܐܝ̣ܬ: ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܩܰܒܶܠ̣ܬ ܥܠܰܝܟ ܘܫܰܡܠܝ̣ܬ ܣܛܰܪ ܡܶܢ ܚܛܝ̣ܬܳܐ ܡܕܰܒܪܳܢܳܐܝ̣ܬ: ܘܰܥܒ̣ܰܕܬܳܢ ܒܢܰܝ̈ܳܐ ܠܰܐܒܘ̣ܟ ܒܛܰܝܒܘ̣ܬܳܐ ܘܰܐܚ̈ܶܐ ܘܒܰܝ̈ܬܳܝܶܐ ܕܝ̣ܠܳܟ: ܘܫܰܘܬܳܦ̈ܶܐ ܕܪܘ̣ܚܳܟ ܩܰܕܝ̣ܫܳܐ: ܘܕܰܢ̇ܫܰܢܶܐ ܠܘܳܬ ܚܰܝ̈ܶܐ ܡܥܰܠܰܝ̈ܳܐ: ܘܢ̇ܶܬܕܰܒܰܪ ܡܶܢ ܪܘ̣ܚܳܐ ܘܠܰܘ ܡܶܢ ܨܶܒܝܳܢܳܐ ܕܒܶܣܪܳܐ ܢܳܡܘ̣ܣܳܐ ܪܘ̣ܚܳܢܳܝܳܐ ܣܳܡ̣ܬ ܠܰܢ: ܗܰܘ̇ ܕܐܝ̣ܬܰܘܗ̱ܝ ܨܰܘܡܳܐ ܩܰܕܝ̣ܫܳܐ ܘܰܐܝܟ ܐܳܣܝܽܘ̣ܬܳܐ ܕܣܰܓܝ̣ ܛܳܒ ܐܳܠܨܳܐ ܥܠܶܝܗ̇ ܝܰܗ̣ܒܬܳܝܗ̱ܝ ܠܰܢ: ܕܰܟܪܝ̣ܗܝ̣ܢܰܢ ܒܣܰܓܺܝܽܐܘ̣ܬ ܙܢܰܝ̈ܳܐ ܕܰܚܛܳܗ̈ܶܐ ܘܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ: ܟܳܕ ܐܳܡܰܪ ܐܰܢ̱ܬ ܘܡܰܠܶܦ ܐܰܢ̱ܬ ܐܰܝܟܰܢܳܐ ܙܳܕܶܩ ܕܰܢ̇ܨܽܘܡ: ܐܰܢ̱ܬ ܕܶܝܢ ܡܳܐ ܕܨܳܐܶܡ ܐܰܢ̱ܬ ܡܫܘ̣ܚ ܪܝ̣ܫܳܟ ܘܰܐܫܝ̣ܓ ܐܰܦܰܝ̈ܟ ܘܠܳܐ ܬܶܗ̣ܘܶܐ ܟܡܝ̣ܪܳܐ ܐܰܝܟ ܢܳܣ̈ܒܰܝ ܒܰܐܦ̈ܶܐ: ܟܰܕ ܒܡܰܠܦܳܢܘ̣ܬܳܐ ܗܳܕܶܐ ܡܰܪܚܶܩ ܐܰܢ̱ܬ ܠܰܢ ܡܶܢ ܫܘ̣ܒܚܳܐ ܣܪܝ̣ܩܳܐ: ܘܰܠܘܳܬ ܬܰܪܥܝ̣ܬܳܐ ܗܳܝ ܕܐܝ̣ܬܶܝܗ̇ ܐܰܠܳܗܳܝܬܳܐ ܡܰܣܶܩ ܐܰܢ̱ܬ ܠܰܢ: ܘܦܳܩܶܕ ܐܰܢ̱ܬ ܠܰܢ ܠܡܶܡܫܰܚ ܘܰܠܡܰܦܨܳܚܽܘ̣ ܒܨܰܘܡܳܐ: ܠܪܝ̣ܫܳܐ ܗܰܘ̇ ܕܡ̣ܶܢ ܠܓܰܘ ܗܰܘ̇ ܕܐܝ̣ܬܰܘܗ̱ܝ ܪܝ̣ܫܳܢܳܝܳܐ ܕܢܰܦܫܳܐ: ܘܠܰܡܫܳܓܽܘ̣ ܠܦܰܪܨܘ̣ܦܳܐ ܡܶܬܗܰܘܢܳܢܳܐ ܕܒܰܪܢܳܫܰܢ ܓܰܘܳܝܳܐ: ܘܰܒܝܰܕ ܨܰܘܡܳܐ ܘܥܰܡܠܳܐ ܕܰܡܝܰܬܪܘ̣ܬܳܐ ܠܗܰܘܢܳܐ ܪܝ̣ܫܳܢܳܝܳܐ ܢ̇ܕܰܟܶܐ: ܘܰܠܥܰܝ̈ܢܶܐ ܕܬܰܪܥܝ̣ܬܳܐ ܢ̇ܰܢܗܰܪ ܒܬܶܐܘܳܪ̈ܺܝܰܐܣ ܕܗܳܠܶܝܢ ܕܰܡܝܰܬܪ̈ܳܢ ܘܛܳܒ ܡܥܰܠܶܝܢ ܠܘܳܬ ܡܶܬܒܰܩܝܳܢܘ̣ܬܳܐ ܕܝ̣ܠܶܗ ܕܰܐܠܳܗܳܐ: ܘܡܶܛܽܠ ܕܥܶܠܬܳܐ ܕܚܰܝ̈ܶܐ ܕܰܠܥܳܠܰܡ ܐܝ̣ܬܰܘܗ̱ܝ ܨܰܘܡܳܐ ܘܚܰܓܳܐ ܐܰܠܳܗܳܝܳܐ ܘܡܶܫܬܘ̣ܬܳܐ ܐܰܠܳܗܳܝܬܳܐ: ܘܗܰܒ ܘܫܰܟܶܢ ܠܰܢ ܡܳܪܰܢ ܝܶܫܽܘܥ ܕܕܰܟܝܳܐܝ̣ܬ ܢ̇ܨܽܘܡܝ̣ܘܗ̱ܝ ܘܢ̇ܶܫܦܰܪ ܠܳܟ ܒܟܰܣ̈ܝܳܬܰܢ ܘܰܒܓܰܠ̈ܝܳܬܰܢ: ܘܠܳܐ ܢ̇ܶܬܚܙܶܐ ܒܡܶܫܬܘ̣ܬܳܟ ܪܘ̣ܚܳܢܳܝܬܳܐ ܕܰܥܛܝ̣ܦܝ̣ܢܰܢ ܡܳܐܢ̈ܶܐ ܨ̈ܳܐܶܐ ܘܰܚܛܝ̣̈ܬܳܢܳܝܶܐ ܥܰܠ ܩܢܘ̣̈ܡܰܝܢ: ܐܶܠܳܐ ܒܰܠܒܘ̣̈ܫܶܐ ܕܟܰܝ̈ܳܐ ܘܢܰܩܕ̈ܶܐ ܕܠܰܝܬ ܒܗܽܘܢ ܛܘ̣ܠܫܳܐ: ܐܰܫܘܳܐ ܕܢ̇ܰܦܪܶܓ ܩܕܳܡܰܝܟ ܒܚܰܓܳܟ ܛܘ̣ܒܬܳܢܳܐ: ܘܡܶܢ ܗܳܪܟܳܐ ܩܰܒܶܠ ܨܠܰܘ̈ܳܬܰܢ ܕܰܠܝ̣̈ܠܳܬܳܐ ܘܨܰܘܡܰܢ ܙܥܘ̣ܪܳܐ: ܘܠܳܐ ܬܶܚܫܘ̣ܒ ܠܰܙܢܰܝ̈ܳܐ ܕܡܰܗܡܝܳܢܘ̣ܬܳܐ ܕܡܶܢܰܢ ܐܶܫܬܰܡ̣ܰܫܘ̱ ܘܠܰܡܡܰܢܳܥܽܘ̣ ܠܦܶܨܚܳܟ ܩܰܕܝ̣ܫܳܐ ܥܰܬܶܕ ܠܰܢ: ܘܰܠܡܶܫܬܰܘܬܳܦܽܘ̣ ܒܦܰܓܪܳܟ ܘܰܕܡܳܟ ܩܰܕܝ̣ܫܳܐ ܐܰܫܘܳܐ ܠܰܢ: ܘܥܰܡ ܨܰܝ̈ܳܡܶܐ ܟܰܫܝ̣ܪ̈ܶܐ ܘܬܰܝ̈ܳܒܶܐ ܫܰܪ̈ܝ̣ܪܶܐ ܕܪܰܥܝܽܘ̣ܟ ܒܨܰܘܡ̈ܰܝܗܽܘܢ: ܘܰܫܦ̣ܰܪܘ̱ ܠܳܟ ܒܰܐܡܢܰܝ̈ܗܽܘܢ: ܘܛܰܝܶܒ ܠܰܢ ܘܰܠܥܰܢܝ̣̈ܕܰܝܢ ܠܩܰܘܡܳܐ ܕܡܶܢ ܝܰܡܝ̣ܢܳܟ: ܘܰܠܫܘ̣ܒܚܳܐ ܕܪܰܒܘ̣ܬܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܡܝ̣ܢܳܐܝ̣ܬ ܢ̇ܩܰܪܶܒ ܠܡܳܪܘ̣ܬܳܟ ܦܝ̣ܪܡܳܐ ܡܶܬܝܰܕܥܳܢܳܐ ܕܰܨܠܘ̣ܬܳܐ ܕܟܝ̣ܬܳܐ: ܘܢ̇ܰܥܛܰܪ ܩܕܳܡ ܪܰܒܘ̣ܬܳܟ ܪܝ̣ܚܳܐ ܒܰܣܝ̣ܡܳܐ ܕܨܰܘܡܳܐ ܩܰܕܝ̣ܫܳܐ: ܘܢ̇ܰܣܶܩ ܠܐܝ̣ܩܳܪܳܟ ܦܺܐܪ̈ܶܐ ܡܪ̈ܰܥܝܳܢܶܐ ܕܰܥܒܳܕ̈ܶܐ ܛܳܒ̈ܶܐ: ܘܢ̇ܕܰܒܰܚ ܠܐܝ̣ܬܘ̣ܬܳܟ ܬܰܘܕ̈ܝܳܬܳܐ ܦܰܐܝ̈ܳܬܳܐ ܘܪܘ̣ܡܪ̈ܳܡܶܐ ܗܕܝ̣ܪ̈ܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀