ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܠܶܦ ܠܰܢ ܡܳܪܝܳܐ ܐܘ̣ܪܚܳܐ ܕܦܘ̣ܩ̈ܕܳܢܰܝܟ ܘܢܳܛܘ̣ܪܘ̣ܬܳܐ ܕܢܳܡܘ̣̈ܣܰܝܟ: ܘܝ̣ܕܰܥܬܳܐ ܕܗܰܝܡܳܢܘ̣ܬܳܐ ܕܝ̣ܠܳܟ: ܘܗܰܒܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢܶܬܕܰܒܰܪ ܩܕܳܡܰܝܟ ܒܰܐܓܘ̣ܢܳܐ ܗܳܢܳܐ ܪܘ̣ܚܳܢܳܝܳܐ ܕܨܰܘܡܳܐ ܩܰܕܝ̣ܫܳܐ: ܘܢ̇ܶܫܟܰܚ ܥܘ̣ܬܪܳܐ ܡܰܘܪܬܳܢܳܐ ܕܚܰܝ̈ܶܐ ܪ̈ܘ̣ܚܳܢܳܝܶܐ: ܘܣܳܝܽܘ̣ܥܳܐ ܕܡܶܢܳܟ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܳܪܳܐ ܡܪܰܚܡܳܢܳܐ ܘܰܐܠܳܗܳܐ ܒܰܣܝ̣ܡܳܐ: ܕܡܶܛܽܠܳܬܰܢ ܨܰܘܡܳܐ ܠܒ̣ܰܟ: ܘܒܶܗ ܙܰܟܝ̣ ܠܚܰܝܳܒܘ̣ܬܰܢ: ܠܗܰܘ̇ ܕܰܒܨܰܘܡܳܐ ܕܠܶܫܳܢܳܐ ܚܳܕܶܐ: ܘܠܰܨܠܘ̣ܬܳܐ ܕܚܘ̣ܒܳܐ ܡܩܰܒܶܠ: ܘܒܰܡܪܰܚܡܳܢܘ̣ܬܳܐ ܟܣܝ̣ܬܳܐ ܡܶܬܬܢܝ̣ܚ: ܘܰܒܕܶܡ̈ܥܶܐ ܚܢܝ̈ܓܳܬܳܐ ܕܬܰܝ̈ܳܒܶܐ ܡܶܫܬܰܝܰܢ: ܛܳܒܳܐ ܕܠܶܗ ܢ̇ܶܬܕܟܰܪ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܥܰܠ ܟܽܠ ܡܪܰܚܡܳܢܳܐ ܘܦܳܪܘ̣ܩܳܐ ܕܓܶܢܣܳܐ ܕܝ̣ܠܰܢ ܚܰܠܳܫܳܐ ܘܐ̱ܢܳܫܳܝܳܐ: ܗܰܘ̇ ܕܗ̣ܰܕܝ̣ ܠܰܢ ܠܘܳܬ ܝܰܘܡ̈ܳܬܳܐ ܩܰܕܝ̣̈ܫܶܐ ܕܨܰܘܡܳܐ ܐܰܝܟ ܕܠܳܐܣܝܽܘܬܳܐ ܕܢܰܦܫܰܢ ܡܟܰܪܗܰܬ݀ ܒܚܰܫ̈ܶܐ ܕܰܚܛܝ̣ܬܳܐ: ܕܠܶܗ ܠܗܳܢܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ ܡܝܰܩܪܝ̣ܢ ܗ̱ܘܰܘ ܐܰܒܳܗ̈ܳܬܳܐ ܩܰܕܝ̣̈ܫܶܐ ܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ: ܘܡܳܪܳܐ ܕܰܢܒܺܝ̈ܶܐ ܘܕܰܫܠܝ̣̈ܚܶܐ ܒܗܽܘܢ ܙܟ̣ܳܐ ܠܳܐܟܶܠܩܰܪܨܳܐ ܕܰܐܛܥܝ̣ ܠܰܐܒܽܘܢ ܐܳܕܳܡ ܒܦܰܪܕܰܝܣܳܐ ܥܕܶܝܢܳܝܳܐ: ܘܒܰܕܓܽܘܢ ܒܪ̈ܘ̣ܡܪܳܡܶܐ ܕܪܘ̣ܚܳܐ ܩܰܕܝ̣ܫܳܐ ܡܝܰܩܪܝ̣ܢܰܢ ܠܶܗ ܠܨܰܘܡܳܐ ܩܰܕܝ̣ܫܳܐ ܟܰܕ ܐܳܡܪܝ̣ܢܰܢ: ܒܨܰܘܡܳܐ ܩܰܕܝ̣ܫܳܐ ܐܶܬ̣ܟܰܫܰܪܘ̱ ܦܳܪ̈ܘ̣ܫܶܐ ܐܰܡܝ̣ܢܳܐܝ̣ܬ: ܒܨܰܘܡܳܐ ܩܰܕܝ̣ܫܳܐ ܒܥܰܘ ܠܡܳܪܝܳܐ ܘܶܐܬܚܰܝܰܠܘ̱ ܟܽܠܟܽܘܢ ܨܰܝ̈ܳܡܶܐ ܟܰܫܝ̣ܪ̈ܶܐ: ܒܨܰܘܡܳܐ ܩܰܕܝ̣ܫܳܐ ܓܡܝ̣ܪ̈ܶܐ ܗܳܘܶܝܢܰܢ ܘܰܠܪܰܘܡܳܐ ܕܰܫܡܰܝܳܐ ܡܶܬܥܰܠܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܕܘ̣ܟܳܝ̈ܶܐ ܡܫܰܠ̈ܡܳܢܶܐ ܡܶܫܬܰܟܢܝ̣ܢ ܠܰܢ ܒܰܬܝܳܒܘ̣ܬܳܐ: ܒܨܰܘܡܳܐ ܩܰܕܝ̣ܫܳܐ ܗܰܝܟ̈ܠܶܐ ܠܪܘ̣ܚܳܐ ܩܰܕܝ̣ܫܳܐ ܗܳܘܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܘܳܠܝܳܐܝ̣ܬ ܪܳܕܶܝܢܰܢ ܒܥܶܩ̈ܒܳܬܳܐ ܕܙܰܕܝ̣̈ܩܶܐ: ܒܨܰܘܡܳܐ ܩܰܕܝ̣ܫܳܐ ܙܳܟܶܝܢܰܢ ܠܰܪ̈ܓܝ̣ܓܳܬܳܐ ܡܣܰܓ̈ܦܳܢܝܳܬܳܐ ܕܢܰܦܫܳܐ ܘܰܕܦܰܓܪܳܐ: ܒܨܰܘܡܳܐ ܩܰܕܝ̣ܫܳܐ ܡܶܢ ܥܰܬܝ̈ܩܶܐ ܠܚܰܕ̈ܬܶܐ ܡܶܫܬܰܚܠܦܝ̣ܢܰܢ ܘܰܐܝܟ ܢܶܫܪ̈ܶܐ ܠܪܰܘܡܳܐ ܡܶܬܥܰܠܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܛܰܝܒܘ̣ܬܶܗ ܕܡܳܪܰܢ ܝܶܫܘ̣ܥ ܡܫܝ̣ܚܳܐ ܡܰܓܢܳܐ ܥܰܠ ܡܚܝ̣ܠܘ̣ܬܰܢ: ܒܨܰܘܡܳܐ ܩܰܕܝ̣ܫܳܐ ܝܳܪܬܝ̣ܢܰܢ ܡܶܕܶܡ ܕܰܡܠ̣ܰܟ ܐܰܠܳܗܳܐ ܠܪ̈ܳܚܡܰܘܗ̱ܝ: ܒܨܰܘܡܳܐ ܩܰܕܝ̣ܫܳܐ ܠܰܐܬܪܰܢ ܩܰܕܡܳܝܳܐ ܡܶܬܦܢܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܡܶܫܬܰܒܩܝ̣ܢ ܚܛܳܗ̈ܶܐ ܕܰܐܝܠܶܝܢ ܕܬܳܝܒܝ̣ܢ: ܒܨܰܘܡܳܐ ܩܰܕܝ̣ܫܳܐ ܢܳܗܪ̈ܳܢ ܢܰܦܫ̈ܳܬܳܐ ܕܰܐܝܠܶܝܢ ܕܕܰܟܝܳܐܝ̣ܬ ܨܳܝܡܝ̣ܢ: ܒܨܰܘܡܳܐ ܩܰܕܝ̣ܫܳܐ ܣܶܓܕܬܳܐ ܫܰܪܝ̣ܪܬܳܐ ܠܗܰܘ̇ ܡܰܠܟܳܐ ܕܨܳܡ̣ ܚܠܳܦܰܝܢ ܣܳܓܕܝ̣ܢܰܢ: ܒܨܰܘܡܳܐ ܩܰܕܝ̣ܫܳܐ ܥܰܒܕ̈ܶܐ ܛܳܒ̈ܶܐ ܘܰܡܗܰܝܡ̈ܢܶܐ ܠܰܐܠܳܗܳܐ ܗܳܘܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܦܳܥ̈ܠܶܐ ܚܰܝܠ̈ܬܳܢܶܐ ܒܟܰܪܡܶܗ ܕܰܡܫܝ̣ܚܳܐ ܡܶܬܚܙܶܝܢܰܢ: ܒܨܰܘܡܳܐ ܩܰܕܝ̣ܫܳܐ ܨܠܰܘ̈ܳܬܰܢ ܡܶܬܥܰܠ̈ܝܳܢ ܠܰܩܕܘ̣ܫܩܘ̣̈ܕܫܝ̣ܢ ܥܶܠ̈ܳܝܶܐ: ܒܨܰܘܡܳܐ ܩܰܕܝ̣ܫܳܐ ܩܪ̈ܳܒܰܘܗ̱ܝ ܕܣܳܛܳܢܳܐ ܕܳܥܟܝ̣ܢ ܡܶܢܰܢ: ܒܨܰܘܡܳܐ ܩܰܕܝ̣ܫܳܐ ܫܳܪܶܝܢܰܢ ܘܦܳܣܩܝ̣ܢܰܢ ܠܩܶܛܪ̈ܶܐ ܕܰܚܛܝ̣ܬܳܐ ܡܶܢ ܪ̈ܶܥܝܳܢܰܝܢ: ܒܨܰܘܡܳܐ ܩܰܕܝ̣ܫܳܐ ܬܰܪ̈ܥܶܐ ܕܰܫܡܰܝܳܐ ܡܶܬܦܰܬܚܝ̣ܢ: ܘܫܶܐܠ̈ܳܬܰܢ ܫܰܦܝ̣ܪ̈ܳܬܳܐ ܡܶܬܦܰܢ̈ܝܳܢ: ܘܗܳܫܳܐ ܠܳܟ ܡܦܝ̣ܣܝ̣ܢܰܢ ܡܳܪܝܳܐ ܐܰܠܳܗܳܐ ܕܝ̣ܠܰܢ ܕܰܬܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ: ܘܰܬܚܰܣܶܐ ܚܰܘܒܰܝ̈ܢ ܘܬܶܫܒܘ̣ܩ ܠܰܢ ܚܛܳܗ̈ܰܝܢ: ܘܰܐܫܘܳܐ ܠܰܢ ܘܰܠܥܰܢܝ̣̈ܕܰܝܢ ܠܩܰܘܡܳܐ ܕܡܶܢ ܝܰܡܝ̣ܢܳܟ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܒܳܥܶܝܢܰܢ ܡܶܢܳܟ ܡܳܪܳܐ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ: ܕܰܬ̣ܩܰܒܶܠ ܠܒܶܣ̈ܡܶܐ ܗܳܠܶܝܢ ܡܶܢ ܐܝ̣ܕܰܝ̈ܢ ܚܰܛܳܝ̈ܳܬܳܐ: ܒܗܳܠܶܝܢ ܝܰܘܡ̈ܳܬܳܐ ܡܝܰܩܪ̈ܶܐ ܘܩܰܕܝ̣̈ܫܶܐ ܕܨܰܘܡܳܐ ܘܘܰܥܶܕ ܠܰܢ ܡܳܪܝܳܐ ܠܘܳܬ ܡܘ̣ܠ̈ܟܳܢܶܐ ܛܘ̣ܒ̈ܬܳܢܶܐ ܕܰܡܠܰܟ̣ܬ ܠܟܽܠܗܽܘܢ ܨܰܝ̈ܳܡܶܐ ܪ̈ܘܚܳܢܳܝܶܐ: ܘܟܰܠܶܠ ܠܰܢ ܒܰܟܠܝ̈ܠܶܐ ܡܫܰܒ̈ܚܶܐ ܕܰܒܗܽܘܢ ܡܟܰܠܶܠ ܐܰܢ̱ܬ ܠܨܰܝ̈ܳܡܶܐ ܪ̈ܘ̣ܚܳܢܳܝܶܐ: ܟܰܕ ܒܥܳܠܡܳܐ ܗܳܢܳܐ ܡܶܫܬܰܪܝܳܢܳܐ ܡܰܫܘܶܐ ܐܰܢ̱ܬ ܠܰܢ ܕܰܒܨܰܘܡܳܐ ܘܒܰܨܠܘ̣ܬܳܐ ܢ̇ܶܫܦܰܪ ܩܕܳܡܰܝܟ: ܘܰܒܗܰܘ̇ ܕܠܳܐ ܥܳܒܰܪ ܡܩܝ̣ܡ ܐܰܢ̱ܬ ܠܰܢ ܒܓܰܒܳܐ ܕܝܰܡܝ̣ܢܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀