ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܶܡܪܳܐ ܕܰܟܝܳܐ ܕܠܳܐ ܡܘ̣ܡܳܐ: ܕܕܰܒ̣ܪܘ̣ܗ̱ܝ ܒܝ̣̈ܫܶܐ ܠܢܶܟܣܬܳܐ: ܘܰܫܠܝ̣ ܘܰܫܬ̣ܶܩ ܒܡܰܟܝ̣ܟܘ̣ܬܶܗ: ܘܰܫܩ̣ܰܠ ܚܛܝ̣ܬܶܗ ܕܥܳܠܡܳܐ ܒܰܕܒܝ̣ܚܘ̣ܬܶܗ: ܐܰܫܘܳܐ ܠܰܢ ܕܢܶܠ̇ܒܰܫ ܕܡܘ̣ܬܶܗ ܕܚܰܫܳܟ ܘܰܕܡܰܘܬܳܟ ܡܰܥܒܶܕ ܚܰܝ̈ܶܐ: ܘܰܢ̇ܕܰܒܰܚ ܠܳܟ ܩܳܠܰܝ̈ ܬܰܘܕܝ̣ܬܳܐ: ܘܢܶܚ̇ܕܶܐ ܒܝܰܘܡܳܐ ܕܰܩܝܳܡܬܳܟ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܥܰܠܝܳܐ ܕܡ̣ܶܢ ܟܽܠ ܚܰܫ̈ܶܐ ܐܰܠܳܗܳܐܝ̣ܬ: ܘܰܒܛܰܝܒܘ̣ܬܶܗ ܣܒ̣ܰܠ ܒܰܒܣܰܪ ܚܰܫ̈ܶܐ ܡܶܛܽܠ ܦܘ̣ܪܩܳܢܰܢ ܡܕܰܒܪܳܢܳܐܝ̣ܬ: ܗܰܘ̇ ܕܕܳܐܶܢ ܛܘ̣ܗ̈ܡܶܐ ܘܫܰܪ̈ܒܳܬܳܐ ܟܺܐܢܳܐܝ̣ܬ ܕܐܶܬ̣ܬܕܝ̣ܢ ܐܰܝܟ ܚܰܝܳܒܳܐ ܚܠܳܦܰܝܢ ܪܶܚܡ̣ܰܬ݀ ܐ̱ܢܳܫܳܐܝ̣ܬ: ܗܰܘ̇ ܕܠܶܗ ܡܶܬ̣ܩܰܪ̈ܒܳܢ ܟܽܠ ܕܶܒܚ̈ܳܬܳܐ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ ܕܩܰܕܝ̣ܫܳܐܝ̣ܬ ܕܩ̣ܰܪܶܒ ܗܘ̣ ܠܶܗ ܚܠܳܦܰܝܢ ܕܶܒܚܬܳܐ ܥܰܠ ܪܰܘܡܳܐ ܕܓܳܓܘ̣ܠܬܳܐ: ܡܦܝ̣ܣܝ̣ܢܰܢ ܠܳܟ ܘܡܶܬܟܰܫܦܝ̣ܢܰܢ ܠܡܘ̣ܟܳܟܳܟ: ܘܫܳܐܠܝ̣ܢܰܢ ܡ̣ܶܢ ܪ̈ܰܚܡܰܝܟ ܕܰܬ̣ܩܰܒܶܠ ܡ̣ܶܢ ܐܝ̣̈ܕܰܝܳܐ ܕܝ̣ܠܰܢ ܚܰܛܳܝ̈ܶܐ ܥܰܒܕܰܝ̈ܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܚܠܳܦ ܚܘ̣ܣܳܝܳܐ ܕܚܰܘ̈ܒܰܝܢ ܘܫܘ̣ܒܩܳܢܳܐ ܕܰܚܛܳܗܰܝ̈ܢ: ܘܕܘ̣ܟܪܳܢܳܐ ܛܳܒܳܐ ܕܥܰܢܝ̣̈ܕܶܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܝܰܡܳܐ ܕܪ̈ܰܚܡܶܐ ܘܰܬܗܘ̣ܡܳܐ ܠܳܐ ܡܶܬ̣ܡܰܫܚܳܢܳܐ: ܕܰܚܢܳܢܶܗ ܐܰܪܟܢ̣ܶܗ ܥܕܰܡܳܐ ܠܚܰܫܳܐ ܕܰܨܠܝ̣ܒܳܐ ܦܳܪܘ̣ܩܳܝܳܐ: ܗܰܘ̇ ܕܰܒܝܰܕ ܚܰܫܳܐ ܘܡܘ̣ܟܳܟܳܐ ܦܘ̣ܪܩܳܢܳܐ ܡܫܰܡܠܝܳܐ ܫܰܟ̣ܶܢ ܠܰܢ ܘܚܰܝ̈ܶܐ ܕܠܳܐ ܚܒܳܠܳܐ ܥܰܬ̣ܶܕ ܠܰܢ: ܘܒܰܕܓܽܘܢ ܟܰܕ ܠܚܰܫܳܐ ܕܝ̣ܠܶܗ ܡܰܥܒܶܕ ܚܰܝ̈ܶܐ ܡܶܬܥ̱ܰܗܕܝ̣ܢܰܢ ܘܰܠܡܘ̣ܟܳܟܳܐ ܦܳܪܘ̣ܩܳܝܳܐ ܡܫܰܒܚܝ̣ܢܰܢ: ܘܠܰܨܠܝ̣ܒܳܐ ܡ̇ܠ̣ܶܐ ܟܽܠ ܐ̱ܪ̈ܳܙܝ̣ܢ ܩܰܕܝ̣̈ܫܶܐ ܣܳܓ̇ܕܝ̣ܢܰܢ ܒܙܘ̣ܡܳܪ̈ܶܐ ܕܪܘ̣ܚܳܐ ܩܰܕܝ̣ܫܳܐ ܒܰܪܘܳܙܳܐ ܡܰܙܥܩܝ̣ܢܰܢ ܘܐܳܡܪܝ̣ܢܰܢ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܐܰܡܝ̣ܬ ܐܶܢܽܘܢ ܠܚܰܫܰܝ̈ܢ ܒܚܰܫܰܘ̈ܗ̱ܝ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܒܶܗ ܦܰܢ̣ܝܢܰܢ ܠܦܰܪܕܰܝܣܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܓ̣ܠܳܐ ܠܙܺܐܦܶܗ ܕܝ̣ܗܘ̣ܕܳܐ ܣܟܰܪܝܘ̣ܛܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܕܰܝܳܢܳܐ ܕܕܰܝ̈ܳܢܶܐ ܒܶܗ ܐܶܬ̣ܬܕܝ̣ܢ ܐܰܝܟ ܚܰܝܳܒܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܗܰܕܺܝ̣ ܠܰܢ ܠܰܩܝܳܡܬܳܐ ܡܫܰܒܰܚܬܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܘܰܥ̣ܶܕ ܠܰܫܠܝ̣̈ܚܶܐ ܩܰܕܝ̣̈ܫܶܐ ܠܡܶܐܟܘ̣ܠܬܳܐ ܕܦܶܨܚܳܐ ܩܰܕܝ̣ܫܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܙܰܕܝ̣ܩܳܐ ܘܡܳܪܳܐ ܒܶܗ ܩܰܒ̣ܶܠ ܦܰܟܳܐ ܡ̣ܶܢ ܥܰܒܕܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܚܫܶܟ̣ܘ̱ ܢܰܗܝ̣ܪ̈ܶܐ ܒܰܪܩܝ̣ܥܳܐ ܡܶܛܽܠܳܬܶܗ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܛܰܝܒܘ̣ܬܳܐ ܐܰܠܳܗܳܝ̇ܬܳܐ ܐܫܬܰܟ̣ܢܰܬ݀ ܒܶܗ ܠܓܶܢܣܳܐ ܐ̱ܢܳܫܳܝܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܝܰܗ̣ܒܘ̱ ܒܶܗ ܨܳܠܘ̣̈ܒܶܐ ܠܦܳܪܘ̣ܩܳܐ ܡܪܳܪ̈ܶܐ ܘܰܠܡܰܚܝܳܢܳܐ ܚܰܠܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܟܽܠܗܽܘܢ ܐܶܣܛܘ̣̈ܟܣܶܐ ܕܰܒܪܝ̣ܬܳܐ ܠܙܰܘܥܳܐ ܫܪܶܟ݂ܘ̱ ܒܶܗ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܠܡܺܐܢܳܐ ܕܚܰܝ̈ܶܐ ܫܰܪܝ̣ܪ̈ܶܐ ܒܶܗ ܐܶܫ̣ܬܰܟܰܢ ܠܰܡܗܰܝ̈ܡܢܶܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܡܶܛܽܠ ܦܘ̣ܪܩܳܢܳܐ ܕܓܶܢܣܳܐ ܐ̱ܢܳܫܳܝܳܐ ܐܶܬܥ̣ܰܬܰܕ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܢ̣ܳܕܘ̱ ܒܶܗ ܟܝ̈ܳܢܶܐ ܫܰܬܝ̣̈ܩܶܐ ܕܰܚ̣ܙܰܘ ܠܒܳܪܘ̣ܝܳܐ ܒܰܨܠܝ̣ܒܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܣܥ̣ܰܘ ܒܶܗ ܕܺܐܒ̈ܶܐ ܥܰܠ ܪܳܥܝܳܐ ܛܳܒܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܥܰܠ ܩܰܝܣܳܐ ܕܰܨܠܝ̣ܒܳܐ ܐܶܬ̣ܬܠܝ̣ ܒܶܗ ܡܳܪܗܶܝܢ ܕܒܶܪ̈ܝܳܬܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܦ̣ܪܰܥܘ̱ ܒܶܗ ܒܝ̣ܫܬܳܐ ܚܠܳܦ ܛܳܒܬܳܐ ܥܰܒ̈ܕܶܐ ܠܡܳܪܳܐ ܘܐܰܠܳܗܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܰܨܠܘ̣ܬܳܐ ܩܰܪܶܒ̣ܘ̱ ܒܶܗ ܠܰܐܒܘ̣ܗ̱ܝ ܫܳܡܘ̣ܥܳܐ ܕܰܨܠܰܘ̈ܳܬܳܐ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܐ̱ܪ̈ܳܙܶܐ ܟܣ̈ܰܝܳܐ ܘܰܓܢܝ̣̈ܙܶܐ ܒܶܗ ܐܶܬܓܠܝ̣ܘܗ̱ܝ: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܫܘ̣̈ܥܶܐ ܒܶܗ ܐܶܨܛܰܪܝ̣ܘ: ܘܩܰܒܪ̈ܶܐ ܒܶܗ ܐܶܬܦܰܬܰܚܘ̱: ܗܳܢܰܘ ܚܰܫܳܐ ܦܳܪܘ̣ܩܳܝܳܐ: ܕܬܶܫܒܘ̣ܚܬܶܗ ܕܐܰܒܳܐ ܓܢܝ̣ܙܳܐ ܘܰܡܪܰܝܡܳܐ ܒܶܗ ܐܶܫܬܰܒܰܚ ܒܰܨܠܝ̣ܒܳܐ: ܕܠܶܗ ܘܰܚܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܟܰܕ ܝܰܘܡܳܢܳܐ ܡܫܰܡܠܝ̣ܢܰܢ ܥ̱ܘ̣ܗܕܳܢܳܐ ܕܚܰܫܶܗ ܪܰܒܳܐ: ܡܦܝ̣ܣܝ̣ܢܰܢ ܠܶܗ ܘܡܶܬ̣ܟܰܫܦܝ̣ܢܰܢ ܠܰܚܢܳܢܶܗ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܘܫܳܐܠܝ̣ܢܰܢ ܡ̣ܶܢ ܪ̈ܰܚܡܰܘܗ̱ܝ ܐܰܠܳܗ̈ܳܝܶܐ ܕܰܒܗܽܘܢ ܐܶܬܪܟ̣ܶܢ ܠܘܳܬ ܚܰܫܳܐ ܘܡܰܘܬܳܐ: ܕܠܰܚ̈ܛܳܗܶܐ ܘܠܳܐ ܢܳܡܘ̣̈ܣܳܝܘܳܬܳܐ ܕܝ̣ܠܰܢ ܢܶܫ̣ܒܘ̣ܩ ܘܰܢ̣ܚܰܣܶܐ ܘܨܰܘܡܰܢ ܘܰܨܠܰܘ̈ܳܬܰܢ ܢܩ̣ܰܒܶܠ: ܘܩܘ̣ܪܒܳܢܳܐ ܕܝ̣ܠܰܢ ܢ̣ܥܰܠܶܐ ܒܰܩܒܘ̣ܪܬܶܗ ܡܰܚܝܳܢܝ̣ܬܳܐ: ܘܠܰܢ ܘܰܠܥܰܢܝ̣̈ܕܰܝܢ ܡܗܰܝܡ̈ܢܶܐ ܢܰܫ̣ܘܶܐ ܕܢ̇ܰܣܶܩ ܠܶܗ ܫܘ̣ܒܚܳܐ ܐܡܝ̣ܢܳܐ ܘܢ̇ܶܬܶܠ ܬܰܘܕܝ̣ܬܳܐ ܕܠܳܐ ܫܶܠܝܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܦܝ̣ܪܡܳܐ ܕܥܺܕܬܳܟ ܦܪܝ̣ܩܰܬ݀ ܒܨܰܠܝ̣ܒܳܟ: ܘܐܶܬܪܰܥܳܐ ܒܥܶܛܪܳܐ ܕܡܰܪܥܝ̣ܬܳܟ ܙܒܝ̣ܢܰܬ݀ ܒܰܕܡܳܟ: ܘܨܘ̣ܬ ܬܰܟܫ̈ܦܳܬܳܐ ܕܥܳܢܳܟ ܚܬܝ̣ܪܰܬ݀ ܒܩܶܛܠܳܟ: ܘܰܫܡܰܥ ܨܠܰܘ̈ܳܬܳܐ ܕܰܡܟܝ̣ܪܬܳܟ ܡܥܰܦ̣ܩܰܬ݀ ܫܘ̣̈ܡܳܬܳܟ: ܘܢܰܛܰܪ ܠܝܳܪܬܘ̣ܬܳܟ ܡ̣ܶܢ ܟܽܠ ܚܰܫܳܐ ܕܡܰܪܚܶܩ ܡܶܢܳܟ: ܐܰܝܟܰܢܳܐ ܕܬܶܫ̣ܬܰܒܰܚ ܒܫܘ̣ܒܚܳܟ ܘܬܶܚ̣ܕܶܐ ܒܰܩܝܳܡܬܳܟ: ܘܬܰܣ̣ܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀