ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܨܰܦܪܳܐ ܠܘܳܬܳܟ ܡܩܰܕܡܝ̣ܢܰܢ ܡܳܪܝܳܐ: ܒܳܪܽܘ̣ܝܳܐ ܘܥܳܒܘ̣ܕܳܐ ܕܢܘ̣ܗܪܳܐ: ܘܪ̈ܰܚܡܶܐ ܘܰܚܢܳܢܳܐ ܡ̣ܶܢ ܛܰܝܒܘ̣ܬܳܟ ܫܳܐܠܝ̣ܢܰܢ: ܟܰܕ ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܕܬ̣ܰܕܢܰܚ ܢܘ̣ܗܪܳܟ ܒܡܰܚ̈ܫܒܳܬܰܢ: ܘܬ̣ܶܕܚܘ̣ܩ ܡ̣ܶܢܢ ܠܚܶܫܘ̣ܟܘ̣ܬܳܐ ܕܰܚܛܝ̣ܬܳܐ: ܘܬ̣ܶܬܪܘ̣ܨ ܗܰܠ̈ܟܳܬܰܢ ܒܰܫܒܝ̣̈ܠܶܐ ܕܙܰܕܝ̣ܩܘ̣ܬܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܛܳܒܳܐ ܘܪܳܚܶܡ ܐ̱ܢܳܫ̈ܳܐ: ܕܨܶܒܝܳܢܶܗ ܨܶܝܕ ܟܽܠ ܐ̱ܢܳܫ ܐܰܪܟܢ̣ܶܗ: ܠܗܰܘ̇ ܡܥܰܠܝܳܐ ܕܡ̣ܶܢ ܟܽܠ ܓܢܝ̣ܙ ܗ̱ܘ̣ ܒܰܟܝܳܢܶܗ: ܠܟܽܠ ܕܰܒܥ̣ܳܝܗ̱ܝ ܐܶܫ̣ܬܟܰܚ ܒܰܚܢܳܢܶܗ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܫܶܡܫܳܐ ܪܰܒܳܐ ܕܙܰܕܝ̣ܩܘ̣ܬܳܐ ܕܢ̣ܰܚ ܠܰܢ ܡ̣ܶܢ ܥܘ̣ܒܶܗ ܕܰܐܒܳܐ ܝܳܠܘ̣ܕܶܗ: ܗܰܘ̇ ܕܰܒܚܰܠܝܘ̣ܬܳܐ ܕܡܶܠܰܝ̈ܟ ܐܶܬ̣ܒܰܣܰܡ ܠܓܶܫܬܳܐ ܕܰܒܣܳܥܘ̣ܪܘ̣ܬ ܛܳܒ̈ܳܬܳܐ ܐܶܬ̣ܟܰܫܰܪ: ܐܳܦ ܠܪ̈ܶܓܫܶܐ ܡܶܬܝܰܕ̈ܥܳܢܶܐ ܠܘܳܬ ܓܒܝ̣ܠܘ̣ܬܳܐ ܕܒܰܪܢܳܫܳܐ ܗܰܘ̇ ܕܒܰܐܠܳܗܳܐ ܐܶܬ̣ܒܪܝ̣: ܒܙܰܕܝ̣ܩܘ̣ܬܳܐ ܘܰܒܚܰܣܝܘ̣ܬܳܐ ܢ̣ܶܗܦܘ̣ܟ ܢ̣ܰܣܶܩ ܠܗܰܘܢܳܐ ܡܰܢ ܣܰܟ݂ܘ̣ܠܬܳܢܳܐܝ̣ܬ ܢ̣ܶܬܕܰܒܰܪ: ܠܡܶܠܬܳܐ ܕܶܝܢ ܕܰܒܝܘ̣ܠܦܳܢܳܟ ܬ̣ܶܬܡܰܕܰܟܝ̱ ܐܳܦ ܝ̣ܕܰܥܬܳܐ ܕܥܰܡܳܟ ܬ̣ܶܬܥܢܶܐ: ܠܬܰܪܥܝ̣ܬܳܐ ܕܰܒܚܘ̣ܒܳܐ ܕܝ̣ܠܳܟ ܬ̣ܶܬܶܐܣܰܪܝ̱: ܠܶܗ ܪ̈ܳܓܳܢ ܘܣܘ̣ܟܳܠܰܢ ܠܗܳܠܶܝܢ ܕܰܠܥܶܠ ܢ̇ܶܒܥܶܐ: ܘܗܳܠܶܝܢ ܕܰܠܥܶܠ ܢ̇ܶܬܪܰܥܶܐ: ܘܡ̣ܶܢ ܐܰܪܥܳܐ ܘܐܰܪܥܳܢܳܝܬܳܐ ܓܡܝ̣ܪܳܐܝ̣ܬ ܢ̇ܰܗܦܶܟ ܐܰܦܰܝ̈ܢ: ܘܟܽܠܶܗ ܒܰܪܢܳܫܰܢ ܓܰܘܳܝܳܐ ܢ̣ܶܬܩܰܕܰܫ ܘܰܢ̣ܫܰܡܠܶܐ: ܠܗܳܠܶܝܢ ܝܰܘܡ̈ܳܬܳܐ ܡܝܰܩܪ̈ܶܐ ܘܩܰܕܝ̣̈ܫܶܐ ܕܨܰܘܡܳܐ: ܒܥܝ̣ܪܘ̣ܬܳܐ ܘܒܰܡܨܰܠܠܘ̣ܬܳܐ ܕܢܰܦܫܳܐ ܐܳܦ ܒܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܕܦܰܓܪܳܐ: ܘܰܗܘܺܝ̣ ܠܰܢ ܙܰܝܢܳܐ ܠܳܐ ܡܶܙܕܰܟܝܳܢܳܐ: ܘܫܘ̣ܪܳܐ ܚܰܣܝ̣ܢܳܐ ܥܰܠ ܟܽܠܗܽܘܢ ܚܰܫ̈ܶܐ ܒܝ̣̈ܫܶܐ ܘܨܶܢܥ̈ܳܬܶܗ ܕܰܒܥܶܠܕܒܳܒܳܐ: ܘܰܐܫܘܳܐ ܠܰܢ ܕܨܰܘܡܳܐ ܗܳܢܳܐ ܩܰܕܝ̣ܫܳܐ ܘܟܽܠܶܗ ܫܰܪܟܳܢܳܐ ܕܚܰܝܰܝ̈ܢ ܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܨܽܘܡ ܘܰܢ̇ܫܰܡܠܶܐ: ܘܰܠܫܰܘܬܳܦܘ̣ܬܳܐ ܕܦܶܨܚܳܐ ܩܰܕܝ̣ܫܳܐ ܘܕܰܩܝܳܡܬܳܐ ܒܚܰܕܘ̣ܬܳܐ ܢ̇ܡܰܢܰܥ: ܘܥܰܡ ܟܽܠܗܽܘܢ ܩܰܕܝ̣̈ܫܰܝܟ ܠܛܳܒ̈ܳܬܳܐ ܕܡܘ̣ܠ̈ܟܳܢܰܝܟ ܢ̇ܶܫܬܘܶܐ ܚܢܰܢ ܘܥܰܢܝ̣̈ܕܰܝܢ: ܘܢ̇ܶܫܬܰܘܕܥܳܟ ܕܐܶܢ ܒܰܪܢܳܫܳܐ ܐܝ̣ܬܰܝܟ ܫܚܝ̣ܡܳܐ ܢ̣ܩܰܪܒܳܟ ܠܣܶܓܕܬܶܗ: ܘܕܶܐܢ ܒܪܶܗ ܐܰܢ̱ܬ ܕܰܐܠܳܗܳܐ ܟܝܳܢܳܐܝ̣ܬ: ܠܳܐ ܬܘ̣ܒ ܢܶܣ̣ܥܶܐ ܥܠܰܝܟ ܒܰܚܕܳܐ ܡ̣ܶܢ ܨܶܢܥ̈ܳܬܶܗ: ܐܰܢ̱ܬ ܕܶܝܢ ܡܶܛܽܠ ܕܰܐܠܳܗܳܐ ܐܝ̣ܬܰܝܟ: ܘܕܰܒܨܶܒܝܳܢܳܟ ܗ̣ܘܰܝܬ ܒܰܪܢܳܫܳܐ ܕܠܳܐ ܫܘ̣ܚܠܳܦܳܐ: ܡ̣ܶܢ ܟܬܳܒ̈ܶܐ ܢܦܝ̣̈ܚܰܝ ܒܪܘ̣ܚܳܐ ܥܒ̣ܰܕܬ ܠܶܗ ܦܘ̣ܢܳܝܳܐ ܐܰܝܟ ܡܩܰܕܡܘ̣ܬ ܝ̣ܕܰܥܬܳܟ: ܘܰܫ̣ܪܰܝܬܳܝܗ̱ܝ ܡܚܰܝܒܳܐ ܟܰܕ ܠܳܐ ܐܶܫ̣ܬܰܘܕܥܳܟ ܕܡܰܢܘ̣ ܐܝ̣ܬܰܝܟ ܒܩܘ̣ܫܬܳܐ ܥܕܰܡܳܐ ܕܰܢܓ̣ܰܕܬܳܝܗ̱ܝ ܠܰܙܩܝ̣ܦܳܐ: ܘܬܰܡܳܢ ܬܘ̣ܒ ܥܒ̣ܰܕܬܳܗ̇ ܠܡܰܦܘ̣ܠܬܳܐ ܕܰܠܥܳܠܰܡ: ܘܰܠܗܳܢܳܐ ܕܰܪܳܐ ܪܘ̣ܚܳܢܳܝܳܐ ܐܰܫܠܶܡ̣ܬ ܠܥܺܕܬܳܟ ܩܰܕܝ̣ܫܬܳܐ ܕܨܰܘܡܳܐ ܕܡ̣ܶܢ ܠܰܚܡܳܐ ܘܡܰܝ̈ܳܐ ܐܳܦ ܨܰܘܡܳܐ ܕܡ̣ܶܢ ܪ̈ܓܝ̣ܓܳܬܳܐ ܬ̣ܨܽܘܡܝ̱: ܗܳܠܶܝܢ ܕܗܶܢܶܝܢ ܐܝ̣ܬܰܝܗܶܝܢ ܥܶܩܳܪ̈ܶܐ ܕܟܽܠܗܶܝܢ ܒܝ̣̈ܫܳܬܳܐ: ܚܢܰܢ ܕܶܝܢ ܡܳܪܝ̱ ܟܰܕ ܠܗܳܕܶܐ ܡܰܫܠܡܳܢܘ̣ܬܳܐ ܐܰܠܳܗܳܝܬܳܐ ܩܰܒܶܠ̣ܢܰܢ: ܘܥܰܡ ܨܰܘܡܳܐ ܕܡ̣ܶܢ ܠܰܚܡܳܐ ܐܳܦ ܡ̣ܶܢ ܒܝ̣̈ܫܳܬܳܐ ܟܡܳܐ ܕܡܰܨܝܳܐ ܠܰܡܚܝ̣̈ܠܶܐ ܨܳܡ̣ܢܰܢ: ܘܦܘ̣ܩܕ̈ܳܢܶܐ ܡܳܪ̈ܳܢܳܝܶܐ ܟܡܳܐ ܕܣܶܦ̣ܩܰܬ݀ ܥܘ̣ܕܪ̈ܳܢܶܐ ܕܛܰܝܒܘ̣ܬܳܟ ܘܣܘ̣ܝܳܥܳܐ ܕܝܰܡܝ̣ܢܳܟ ܠܘܰܥܕܳܐ ܕܰܐܪܒܥܝ̣ܢ ܝܰܘܡ̈ܳܬܳܐ ܕܨܰܘܡܳܐ ܩܰܕܝ̣ܫܳܐ ܡܰܠ̈ܝܰـܝ ܐ̱ܪ̈ܳܙܶܐ ܕܦܘ̣ܪܩܳܢܳܐ ܕܝ̣ܠܰܢ ܐܶܬ̣ܡ̣ܰܢܰܥܢܰܢ: ܡܶܟܝ̣ܠ ܒܳܥܶܝܢܰܢ ܡ̣ܶܢܟ ܕܰܬ̣ܩܰܒܠܝ̣ܘܗ̱ܝ ܨܰܘܡܳܐ ܕܝ̣ܠܰܢ ܡܚܝ̣ܠܳܐ ܐܰܝܟ ܨܰܘܡܳܐ ܕܟܺܐܢ̈ܶܐ ܘܙܰܕܝ̣̈ܩܶܐ: ܡܶܨ̈ܥܳܝܶܐ ܘܰܐ̱ܚܪ̈ܳܝܶܐ ܕܪܰܥܝܘ̣ܟ ܒܨܰܘܡ̈ܰܝܗܽܘܢ: ܘܰܐܫܘܳܐ ܠܰܢ ܕܢ̣ܶܗ̣ܘܶܐ ܨܰܘܡܰܢ ܦܝ̣ܪܡܳܐ ܡܪܰܥܝܳܢܳܐ ܠܡܳܪܘ̣ܬܳܟ: ܘܰܨܠܰܘ̈ܳܬܰܢ ܥܶܛܪܳܐ ܒܰܣܝ̣ܡܳܐ ܠܰܐܠܳܗܘ̣ܬܳܟ: ܘܒܳܥܘ̣ܬܰܢ ܩܘ̣ܪܒܳܢܳܐ ܡܩܰܒܠܳܐ ܠܘܳܬܳܟ: ܚܰܣܳܐ ܠܥܰܡܳܟ: ܘܒܰܪܶܟ ܠܝܳܪܬܘ̣ܬܳܟ: ܘܪܰܚܶܡ ܥܰܠ ܟܽܠܳܗ̇ ܓܒܝ̣ܠܬܳܐ ܕܐܝ̣ܕ̈ܰܝܟ ܩܰܕܝ̣̈ܫܳܬܳܐ: ܘܡ̣ܶܢ ܦܘ̣ܡܰܝ̈ܢ ܘܠܶܫܳܢܰܝ̈ܢ ܬܶܫܒܘ̣ܚܬܳܐ ܬ̣ܶܣܰܩܝ̱ ܠܡܳܪܘ̣ܬܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀