ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܛܰܠܳܐ ܡܶܬܝܰܕܥܳܢܳܐ ܗܰܘ̇ ܕܪܰܣܶܣ̣ܬ ܒܰܐܬܘ̣ܢܳܐ ܕܢܘ̣ܪܳܐ ܥܰܠ ܛܠܳܝ̈ܶܐ ܦܳܠܚ̈ܶܐ ܕܝ̣ܠܳܟ: ܗܳܢܽܘܢ ܕܰܒܨܰܘܡܳܐ ܘܒܰܨܠܘ̣ܬܳܐ ܙܟ̣ܰܐܘܽܘ̣ܗ̇ ܠܢܘ̣ܪܳܐ ܕܐܰܬܘ̣ܢܳܐ: ܪܘ̣ܣ ܡܳܪܝ̱ ܥܰܠ ܢܰܦ̈ܫܳܬܰܢ: ܘܒܰܛܶܠ ܡ̣ܶܢܢ ܠܫܘ̣ܠܗܳܒܳܐ ܕܰܚܛܝ̣ܬܳܐ: ܘܗܰܒܠܰܢ ܕܰܢ̇ܨܽܘܡ ܨܰܘܡܳܐ ܩܰܕܝ̣ܫܳܐ ܕܫܳܦܰܪ ܠܳܟ: ܘܰܡܪܰܥܶܐ ܠܡܳܪܘ̣ܬܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܫܰܦܝܳܐ ܘܰܗܕܝ̣ܪܳܐ ܘܩܘ̣ܠܳܣܳܐ ܡܥܰܠܝܳܐ ܘܰܬܗܝ̣ܪܳܐ: ܠܗܰܘ̇ ܐܝ̣ܬܝܳܐ ܕܡ̣ܶܢ ܐܝ̣ܬܝܳܐ ܘܢܘ̣ܗܪܳܐ ܕܡ̣ܶܢ ܢܘ̣ܗܪܳܐ: ܠܗܰܘ̇ ܨܶܡܚܳܐ ܕܡܰܢܗܰܪ ܥܳܠܡܳܐ: ܠܗܰܘ̇ ܕܶܢܚܳܐ ܡ̇ܠܶܐ̣ ܙܰܠ̈ܓܶܐ: ܕܰܨܡ̣ܰܚ ܡ̣ܶܢ ܐܰܒܳܐ ܕܠܳܐ ܐܶܡܳܐ: ܘܰܕܢܰܚ̣ ܡ̣ܶܢ ܐܰܒܳܐ ܕܠܳܐ ܐܶܡܳܐ: ܘܰܗ̣ܘܳܐ ܐ̱ܢܳܫܳܐ ܡܶܛܽܠ ܒܢܰܝ̈ ܐ̱ܢܳܫ̈ܳܐ: ܘܥܰܡ̣ܰܕ ܒܝܽܘܪܕܢܳܢ ܢܰܗܪܳܐ ܐܰܝܟ ܣܢܝ̣ܩܳܐ: ܘܨܳܡ̣ ܐܰܪܒܥܺܝ̣ܢ ܐܝ̣ܡܳܡ̈ܝ̣ܢ ܘܰܐܪܒܥܺܝ̣ܢ ܠܰܝ̈ܠܰܘܳܢ ܐܰܝܟ ܚܰܝܳܒܳܐ: ܘܶܐܬ̣ܟܰܬܰܫ ܥܰܡ ܒܥܶܠܕܰܪܳܐ ܘܰܣܠ̣ܶܩ ܙܰܟܳܝܳܐ: ܘܰܒܙܳܟܘ̣ܬܶܗ ܠܰܟܝܳܢܰܢ ܙܰܟܺܝ̣: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܛܳܒܳܐ ܒܰܟܝܳܢܳܐ ܘܣܰܓܺܝܳܐܐ ܒܥܘ̣ܕܪ̈ܳܢܶܐ: ܗܰܘ̇ ܕܳܐܣܝܘ̣ܬܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܫܰܟ̣ܶܢ ܠܥܺܕܬܶܗ ܨܰܘܡܳܐ ܕܒܶܗ ܐܶܬ̣ܢܰܨܰܚܘ̱ ܩܰܕ̈ܡܳܝܶܐ: ܘܶܐܙܕܰܗܺܝ̣ܘ ܡܶܨ̈ܥܳܝܶܐ: ܘܐܶܬ̣ܚܰܘܰܪ̈ܝ̱ ܟܘ̣ܬܡ̈ܳܬܳܐ ܕܚܰܛܳܝ̈ܶܐ: ܒܶܗ ܡܽܘܫܶܐ ܗܰܘ̇ ܪܝ̣ܫܳܐ ܕܰܢܒܺܝ̈ܶܐ ܐܶܫ̣ܬܘܺܝ̣ ܕܢܶܚ̣ܙܶܐ ܐܰܦܝ̣̈ܢ ܠܘ̣ܩܒܰܠ ܐܰܦܝ̣̈ܢ: ܐܰܢ̱ܬ ܐܝ̣ܬܰܝܟ ܠܳܐ ܡܶܬܚܰܙܝܳܢܳܐ ܟܡܳܐ ܡܰܨܝܳܐ ܕܢ̣ܶܚܙܶܐ ܒܰܪܢܳܫܳܐ ܠܰܐܠܳܗܳܐ ܘܒܶܗ ܐܶܫ̣ܬܘܺܝ̣ ܕܰܢ̣ܩܰܒܶܠ ܠܘ̣ܚ̈ܶܐ ܕܢܳܡܘ̣ܣܳܐ ܘܒܶܗ ܐܶܙ̣ܕܰܗܝ̣ ܐܰܝܟ ܫܶܡܫܳܐ ܦܰܪܨܽܘ̣ܦܶܗ: ܘܒܶܗ ܐܺܠܺܝܳܐ ܐܶܫ̣ܬܘܺܝ̣ ܕܢ̣ܶܣܰܩ ܠܰܫܡܰܝܳܐ: ܒܡܰܪܟܰܒܬܳܐ ܕܪ̈ܰܟܫܳܐ ܕܢܘ̣ܪܳܐ ܐܰܠܳܗܳܝܬܳܐ: ܒܶܗ ܕܳܢܺܝ̣ܐܝܶܠ ܗܰܘ̇ ܪܓܝ̣ܓܳܐ ܐܶܬ̣ܢܰܨܰܚ ܘܶܐܬ̣ܦܰܨܝ̣ ܡ̣ܶܢ ܓܘ̣ܒܳܐ ܕܐܰܪ̈ܝܰܘܳܬܳܐ: ܘܰܥܫܘ̣ܩܝܳܐ ܕܟܰܠ̈ܕܳܝܶܐ: ܒܶܗ ܛܠܳܝ̈ܶܐ ܕܒܶܝܬ ܚܰܢܰܢܝܳܐ ܐܶܙܕܰܗܺܝ̣ܘ ܘܐܶܬ̣ܪܣܶܣ ܠܗܽܘܢ ܛܰܠܳܐ ܫܡܰܝܳܢܳܐ: ܘܒܰܕܓܽܘܢ ܒܝܰܘܡܳܐ ܗܳܢܳܐ ܕܨܰܘܡܳܐ ܘܳܐܦ ܚܢܰܢ ܚܰܛܳܝ̈ܶܐ ܡܶܬܚܰܣܶܝܢܰܢ ܘܒܶܗ ܡܶܙܕܰܝܢܝ̣ܢܰܢ ܘܳܐܡ̇ܪܝ̣ܢܰܢ: ܒܨܰܘܡܳܐ ܐܶܬ̣ܢܰܨܰܚܘ̱ ܫܠܝ̣̈ܚܶܐ ܐܰܠܳܗ̈ܳܝܶܐ: ܘܒܶܗ ܐܶܬ̣ܚܰܝܰܠܘ̱ ܢܒܺܝ̈ܶܐ: ܒܨܰܘܡܳܐ ܕܰܐܪܒܥܝ̣ܢ ܒܳܣܪܝ̣ܢܰܢ ܠܪܶܚܡܰܬ݀ ܟܰܪܣܳܐ ܐܶܡܳܐ ܕܰܫܪܝ̣ܚܘ̣ܬܳܐ: ܘܒܶܗ ܒܳܥܶܝܢܰܢ ܫܘ̣ܒܩܳܢܳܐ ܕܰܚܛܳܗ̈ܶܐ: ܒܨܰܘܡܳܐ ܕܰܐܪܒܥܝ̣ܢ ܓܡܝ̣ܪ̈ܶܐ ܣܳܠ̇ܩܝ̣ܢ ܠܪܰܘܡܳܐ ܕܰܫܡܰܝܳܐ: ܘܒܶܗ ܓܳܡ̇ܪܝ̣ܢ ܗ̱ܘܰܘ ܠܦܘ̣ܩ̈ܕܳܢܶܐ ܐܰܠܳܗ̈ܳܝܶܐ: ܒܨܰܘܡܳܐ ܕܰܐܪܒܥܺܝ̣ܢ ܕܳܢܰܚ ܠܰܢ ܢܘ̣ܗܪܳܐ ܡ̣ܶܢ ܪܰܘܡܳܐ ܕܰܡܕܰܟܶܐ ܡܶܢܰܢ ܠܝܘ̣ܩܪܳܐ ܕܰܚܛܳܗ̈ܰܝܢ: ܒܨܰܘܡܳܐ ܕܰܐܪܒܥܝ̣ܢ ܗܳܘܶܝܢܰܢ ܡ̣ܶܢ ܚܰܛܳܝ̈ܶܐ ܬܰܝ̈ܳܒܶܐ: ܘܗܽܘ̣ ܗܳܘܶܐ ܠܰܢ ܬܰܪܥܳܐ ܕܰܬܝܳܒܘ̣ܬܳܐ: ܒܨܰܘܡܳܐ ܕܰܐܪܒܥܝ̣ܢ ܘܰܥܕܳܐ ܕܚܰܝ̈ܶܐ ܪ̈ܘ̣ܚܳܢܳܝܶܐ ܐܶܫ̣ܬܰܟܰܢ ܠܰܢ: ܘܳܐܦ ܡܘ̣ܠ̈ܟܳܢܶܐ ܫܰܪܝ̣ܪ̈ܶܐ ܐܶܬ̣ܡܠܶܟ݂ܘ̱ ܠܰܢ: ܒܨܰܘܡܳܐ ܕܰܐܪܒܥܝ̣ܢ ܙܟ̣ܳܐ ܦܳܪܘ̣ܩܰܢ ܠܰܒܥܶܠܕܰܪܳܐ ܙܰܝܢܳܐ ܗܰܘ̇ ܕܡܶܙܕܟܶܐ ܐܳܦ ܡܶܬܛܰܠܰܩ ܡܶܢܰܢ: ܒܨܰܘܡܳܐ ܕܰܐܪܒܥܺܝ̣ܢ ܚܳܕܶܝܢ ܨܰܝܳܡ̈ܶܐ ܟܰܫܝ̣ܪ̈ܶܐ ܚܰܕܘ̣ܬܳܐ ܕܰܟܠܝ̣̈ܠܶܐ ܪ̈ܘ̣ܚܳܢܳܝܶܐ ܕܰܒܗܽܘܢ ܡܶܬܟܰܠܠܝ̣ܢ: ܒܨܰܘܡܳܐ ܕܰܐܪܒܥܺܝ̣ܢ ܛܰܝܒܘ̣ܬܳܐ ܐܶܬ̣ܝܰܗܒܰܬ݀ ܠܓ݂ܶܢܣܳܐ ܐ̱ܢܳܫܳܝܳܐ ܛܘ̣ܒܬܳܢܘ̣ܬܳܐ ܕܦܘ̣ܩ̈ܕܳܢܶܐ ܐܰܠܳܗ̈ܳܝܶܐ: ܒܨܰܘܡܳܐ ܕܰܐܪܒܥܝ̣ܢ ܝܳܪܬܝ̣ܢ ܟܺܐܢ̈ܶܐ ܘܟܽܠܗܽܘܢ ܩܰܕܝ̣̈ܫܶܐ ܝܳܪܬܘ̣ܬܳܐ ܫܡܰܝܳܢܝ̣ܬܳܐ ܕܠܳܐ ܥܳܒܪܳܐ: ܒܨܰܘܡܳܐ ܕܰܐܪܒܥܝ̣ܢ ܟܽܠܗܽܘܢ ܕܬܳܝܒܝ̣ܢ ܬܝܳܒܘ̣ܬܳܐ ܫܰܪܝ̣ܪܬܳܐ ܟܠܝ̣̈ܠܶܐ ܫܒܝ̣̈ܚܶܐ ܕܬܰܝܳܒ̈ܶܐ ܡܩܰܒܠܝ̣ܢ: ܒܨܰܘܡܳܐ ܕܰܐܪܒܥܝ̣ܢ ܠܬܶܫܒܘ̣ܚܬܳܐ ܫܰܪܝ̣ܪܬܳܐ ܝ̣ܠܶܦܢܰܢ ܠܡܶܗܘܳܐ ܡܚܰܣܝܳܢܳܐ ܕܚܰܘܒ̈ܳܬܰܢ: ܒܨܰܘܡܳܐ ܕܰܐܪܒܥܝ̣ܢ ܡܶܙܕܰܗ̈ܝܳܢ ܢܰܦ̈ܫܳܬܳܐ ܕܨܰܝ̈ܳܡܶܐ ܡ̣ܶܢ ܛܰܝܒܘ̣ܬܳܐ ܕܢܘ̣ܗܪܳܐ ܪܰܒܳܐ ܕܝܳܗܶܒ ܡܫܝ̣ܚܳܐ ܠܨܰܝ̈ܳܡܶܐ: ܒܨܰܘܡܳܐ ܕܰܐܪܒܥܝ̣ܢ ܢܳܗܪܳܐ ܢܰܦܫܳܐ ܕܨܰܝ̈ܳܡܶܐ ܢܘ̣ܗܪܳܐ ܠܳܐ ܡܶܬܦܰܚܡܳܢܳܐ: ܒܨܰܘܡܳܐ ܕܰܐܪܒܥܝ̣ܢ ܣܳܛܳܢܳܐ ܘܚܰܝ̈ܠܰܘܳܬܶܗ ܡܶܣܬܰܚܦܝ̣ܢ ܠܚܶܫܘ̣ܟܳܐ ܒܰܪܳܝܳܐ ܕܰܐܒܕܳܢܗܽܘܢ: ܣܳܠܩܝ̣ܢ ܕܶܝܢ ܨܰܝ̈ܳܡܶܐ ܠܢܘ̣ܗܪܳܐ ܕܠܶܗ ܡܶܙܕܰܡܢܝ̣ܢ: ܒܨܰܘܡܳܐ ܕܰܐܪܒܥܝ̣ܢ ܥܳܐܠܝ̣ܢ ܨܰܝ̈ܳܡܶܐ ܫܰܪ̈ܝ̣ܪܶܐ ܠܝ̣ܕܰܥܬܳܐ ܕܐ̱ܪ̈ܳܙܶܐ ܥܰܠ ܕܰܪܚܶܡ̣ܘ̱ ܠܡܳܪܝܳܐ ܘܗܰܝܡ̣ܶܢܘ̱ ܠܡܶܠܬܶܗ: ܒܨܰܘܡܳܐ ܕܰܐܪܒܥܝ̣ܢ ܦܰܓܪ̈ܳܢܶܐ ܗܳܘܶܝܢ ܪ̈ܘ̣ܚܳܢܶܐ ܦܰܐܝܳܐܝ̣ܬ ܘܰܫܠܝ̣ܚܳܐܝ̣ܬ: ܒܨܰܘܡܳܐ ܕܰܐܪܒܥܝ̣ܢ ܨܰܝ̈ܳܡܶܐ ܦܳܪ̈ܘ̣ܫܶܐ ܡܶܬܢܰܨܚܝ̣ܢ ܘܨܶܡ̈ܚܶܐ ܕܬܶܫܒܘ̣ܚܬܳܐ ܒܶܗ ܡܩܰܒܠܝ̣ܢ: ܒܨܰܘܡܳܐ ܕܰܐܪܒܥܝ̣ܢ ܩܰܕܝ̣̈ܫܶܐ ܡܶܬܓܰܡܪܝ̣ܢ ܘܩܰܕܝ̣ܫܘ̣ܬܳܐ ܡ̣ܶܢ ܐܰܠܳܗܳܐ ܡܶܬܡܠܶܝܢ: ܒܨܰܘܡܳܐ ܕܰܐܪܒܥܝ̣ܢ ܪ̈ܰܚܡܶܐ ܡܶܫܬܰܟܢܝ̣ܢ ܪܶܚܡܰܬ݀ ܐ̱ܢܳܫܳܐܝ̣ܬ ܡ̣ܶܢ ܛܰܝܒܘ̣ܬܳܐ ܐܰܠܳܗܳܝܬܳܐ: ܒܨܰܘܡܳܐ ܕܰܐܪܒܥܝ̣ܢ ܫܳܡܰܥ ܒܳܥܘ̣ܬܰܢ ܘܦܳܪܶܩ ܠܰܢ ܐܰܠܳܗܳܐ: ܫܳܡܘ̣ܥܳܐ ܕܰܨܠܰܘ̈ܳܬܳܐ ܘܰܡܦܰܢܝܳܢܳܐ ܕܫܶܐܠ̈ܳܬܳܐ: ܒܨܰܘܡܳܐ ܕܰܐܪܒܥܝ̣ܢ ܬܶܫܒܘ̣ܚܬܳܐ ܕܰܐܠܳܗܳܐ ܡܶܙܕܰܡܪܳܐ ܬܡܝ̣ܗܳܐܝ̣ܬ ܒܝܰܕ ܦܘ̣ܡܳܐ ܕܨܰܝ̈ܳܡܶܐ ܚܠܝ̣̈ܨܶܐ ܟܰܫܝ̣ܪ̈ܶܐ: ܕܥܰܡܗܽܘܢ ܘܰܚܢܰܢ ܗܳܢܽܘܢ ܕܳܐܦܠܳܐ ܠܰܐܪܥܳܐ ܫܳܘܶܝܢܰܢ ܟܰܕ ܒܥܘ̣ܕܪܳܢܳܐ ܕܡ̣ܶܢ ܛܰܝܒܘ̣ܬܳܐ ܠܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ ܨܳܝܡܝ̣ܢܰܢ: ܫܳܐܠܝ̣ܢܰܢ ܡ̣ܶܢܟ ܡܳܪܝܳܐ ܣܥܘ̣ܪ ܠܰܢ ܒܰܚܢܳܢܳܟ ܘܚܰܣܳܐ ܒܪ̈ܰܚܡܰܝܟ: ܩܰܒܶܠ ܨܰܘܡܳܐ ܕܝ̣ܠܰܢ ܒܛܰܝܒܘ̣ܬܳܟ: ܘܰܐܫܘܳܐ ܠܰܢ ܕܥܰܡ ܨܰܝ̈ܳܡܶܐ ܕܰܫܦ̣ܰܪܘ̱ ܠܳܟ ܢ̇ܶܬܡܢܶܐ: ܘܰܢ̇ܫܰܒܚܳܟ ܘܰܢ̇ܪܰܡܪܡܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܝܳܗܽܘ̣ܒܳܐ ܕܫܘ̣̈ܟܳܢܶܐ ܐܰܠܳܗ̈ܳܝܶܐ ܡܳܪܝܳܐ: ܗܰܘ̇ ܕܫܰܟܶܢ ܠܰܢ ܝܰܘܡ̈ܳܬܳܐ ܗܳܠܶܝܢ ܩܰܕܝ̣̈ܫܶܐ ܕܨܰܘܡܳܐ: ܕܰܒܗܽܘܢ ܢ̇ܫܝ̣ܓ ܟܘ̣ܬܡ̈ܳܬܰܢ ܘܰܢ̇ܚܰܠܶܠ ܨܳܐܝܘ̣ܬܰܢ: ܘܢ̣ܶܫܒܘ̣ܩ ܘܢ̣ܶܡܪܘ̣ܩ ܚܛܳܗ̈ܰܝܢ: ܐܰܢ̱ܬ ܡܳܪܝܳܐ ܚܰܝܶܠ ܠܰܢ ܕܰܢ̇ܫܰܡܠܝ̣ܘܗ̱ܝ ܠܪܶܗܛܶܗ ܕܨܰܘܡܳܐ ܩܰܕܝ̣ܫܳܐ: ܘܰܠܘܳܬ ܦܶܨܚܳܐ ܫܒܝ̣ܚܳܐ ܢ̇ܶܬܡܰܢܰܥ: ܟܰܕ ܡܶܬܬܰܓܪܝ̣ܢܰܢ ܚܘ̣ܣܳܝܳܐ ܕܚܰܘܒܰܝ̈ܢ ܘܫܘ̣ܒܩܳܢܳܐ ܕܰܚܛܳܗܰܝ̈ܢ ܠܥܳܠܡܝ̣ܢ܀