ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܣܝܳܐ ܘܩܰܕܝ̣ܫܳܐ ܘܠܳܐ ܡܶܬ̣ܡܰܠܠܳܢܳܐ: ܠܗܰܘ̇ ܠܳܐ ܚܳܫܘ̣ܫܳܐ ܘܠܳܐ ܡܳܝܘ̣ܬܳܐ ܘܠܳܐ ܡܶܬ̣ܚܰܒܠܳܢܳܐ: ܠܗܰܘ̇ ܕܰܒܨܶܒܝܳܢܶܗ ܚܰܫ̣ ܚܠܳܦ ܦܘ̣ܪܩܳܢܳܐ ܕܰܒܢܰܝ̈ܢܳܫܳܐ: ܘܐܰܚ̣ܶܫ ܠܚܰܫ̈ܶܐ ܕܝ̣ܠܰܢ ܒܚܰܫܶܗ: ܘܐܰܡܝ̣ܬ ܠܡܰܘܬܳܐ ܛܪܘ̣ܢܳܐ ܒܡܰܘܬܶܗ ܕܥܰܠ ܐܰܦܰܝ̈ܢ ܘܠܰܢ ܫܰܟ̣ܶܢ ܚܰܝ̈ܶܐ ܘܠܳܐ ܡܶܬܚܰܒܠܳܢܘ̣ܬܳܐ ܘܠܳܐ ܡܳܝܘ̣ܬܘ̣ܬܳܐ ܘܠܳܐ ܚܳܫܘ̣ܫܘ̣ܬܳܐ: ܡܦܝ̣ܣܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܬ̣ܰܫܘܶܐ ܠܟܽܠܰܢ ܕܢ̇ܶܚܰܫ ܒܚܰܫܳܟ ܐܰܝܟܰܢܳܐ ܕܥܰܡܳܟ ܢܶܫ̇ܬܰܒܰܚ: ܘܢ̇ܶܙܕܩܶܦ ܠܥܳܠܡܳܐ ܘܰܠܟܽܠܗܽܘܢ ܚܰܫܰܘ̈ܗ̱ܝ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܪܳܡܳܐ ܘܰܡܥܰܠܝܳܐ ܒܐܝ̣ܬܘ̣ܬܶܗ ܓܢܝ̣ܙܬܳܐ: ܣܓܝ̣ܕܳܐ ܘܰܡܫܰܒܚܳܐ ܒܰܐܠܳܗܘ̣ܬܶܗ ܡܪܰܝܰܡܬܳܐ: ܗܰܘ ܫ̇ܘܶܐ̣ ܒܐܘ̣ܣܺܝܰܐ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ: ܡܶܛܽܠ ܦܘ̣ܪܩܳܢܳܐ ܕܓܶܢܣܳܐ ܐ̱ܢܳܫܳܝܳܐ ܥܰܠ ܐܰܪܥܳܐ ܐܶܬܚܙܝ̣: ܘܥܰܡ ܒܢܰܝ̈ܢܳܫܳܐ ܡܕܰܒܪܳܢܳܐܝ̣ܬ ܐܶܬܗ̣ܰܦܰܟ ܐܰܝܟ ܕܰܠܚܘ̣ܕܳܬܳܐ ܕܰܓܒܝ̣ܠܬܶܗ ܕܒܰܚܒܳܠܳܐ ܕܡܰܘܬܳܐ ܘܕܰܚܛܝ̣ܬܳܐ ܐܰܥܬ̣ܩܰܬ݀ ܘܫܰܚ̣ܠܶܦ ܠܚܰܬܝ̣ܬܘ̣ܬܐ ܠܗܳܠܶܝܢ ܕܐܶܬ̣ܶܐܡܰܪ ܠܰܥܓܳܐܝ̣ܬ ܒܠܶܫܳܢ ܢܳܡܘ̣ܣܳܐ: ܘܫܰܢܝ̣ ܠܦܺܐܩܘ̣ܬܳܐ ܕܝ̣ܠܶܗ ܕܰܟܬܳܒܳܐ ܥܰܬܝ̣ܩܳܐ ܠܦܘ̣ܫܳܩܳܐ ܗܰܢܝ̣ ܠܫܶܡܥܳܐ: ܘܟܰܕ ܡ̣ܶܢ ܟܰܕܘ̣ ܣܰܓܺܝ̈ܶܐܐ ܥܒ̈ܳܕܶܐ ܛܳܒ̈ܶܐ ܒܰܐܪܥܳܐ ܕܝ̣ܗܘ̣ܕ ܚܰܘܺܝ̣: ܡ̣ܶܢ ܥܰܡܳܐ ܠܳܐ ܡܶܬܛܦܝ̣ܣܳܢܳܐ ܒܟܽܠܗܶܝܢ ܛܳܒ̈ܳܬܶܗ ܐܶܬ̣ܛܠܶܡ: ܘܥܰܠ ܐܳܣ̈ܘܳܬܳܐ ܬܡܝ̣̈ܗܳܬܳܐ ܘܬܶܕܡܪ̈ܳܬܳܐ ܫܰܦܝ̣ܪ̈ܳܬܳܐ ܠܘܳܬܗܽܘܢ ܣܥ̣ܰܪ ܡܰܓܳܢ ܣܢ̣ܰܐܘܽܘ̣ܗ̱ܝ ܘܣܰܩ̣ܪܘ̣ܗ̱ܝ ܚܰܣܳܡܳܐܝ̣ܬ: ܘܰܕܢܶܩ̣ܛܠܘ̣ܢܳܝܗ̱ܝ ܥܰܘܳܠܳܐܝ̣ܬ ܒܰܙܩܝ̣ܦܳܐ ܐܶܬ̣ܥܰܬܰܕܘ̱ ܡܰܪ̈ܳܚܶܐ ܘܕܰܢ̣ܨܘ̣ܕܘ̣ܢܳܝܗ̱ܝ ܚܳܪܥܳܐܝ̣ܬ ܒܡܶܠܬܳܐ ܐܶܬܚܰܫ̣ܰܒܘ̱ ܛܳܠܘ̣̈ܡܶܐ: ܓܒ̣ܰܠܘ̱ ܓܶܝܪ ܥܰܘܠܳܐ ܥܰܠ ܢܳܡܘ̣ܣܳܟ ܟܰܕ ܨܳܠܶܝܢ ܠܰܡ̣ܨܳܕ ܢܰܦܫܶܗ ܕܙܰܕܝ̣ܩܳܐ ܐܰܝܟܰܢܳܐ ܕܠܰܕܡܶܗ ܢܶܫ̣ܕܽܘܢ: ܘܥܰܠܗܳܕܶܐ ܨܢܝ̣ܥܳܐܝ̣ܬ ܒܢܶܟܠܳܐ ܫܘ̣̈ܐܳܠܶܐ ܠܶܗ ܐܶܬܦ̣ܰܪܰܣܘ̱ ܐܰܝܟܰܢܳܐ ܕܰܒܗܽܘܢ ܕܰܠܝ̣ܠܳܐܝ̣ܬ ܢ̣ܶܬܬܚܶܕ ܦܰܩܳܚ ܠܰܡ ܠܡ̣ܶܬܰܠ ܟܣܶܦ ܪܝ̣ܫܳܐ ܠܩܶܣܰܪ ܐܰܘ ܠܳܐ ܐܡ̇ܪܝ̣ܢ ܗ̱ܘܰܘ ܠܶܗ: ܐܰܟܡܰܢ ܕܰܒܗܳܕܶܐ ܦܫܝ̣ܩ ܢ̣ܶܬܩܰܛܪܰܓ: ܒܗܳܝ ܕܠܘ̣ܩܒܰܠ ܡܰܠܟܘ̣ܬܳܐ ܕܙܰܒܢܳܐ ܢܶܗܘܶܐ ܫܟܝ̣ܚ ܩܳܐܶܡ ܣܰܩܘ̣ܒܠܳܐܝ̣ܬ ܥܰܠ ܫܘ̣ܠܛܳܢܶܗ ܬܳܒܥܝ̣ܢ ܗ̱ܘܰܘ ܠܶܗ ܕܰܢ̣ܚܰܘܶܐ ܠܗܽܘܢ ܕܡܶܢ ܐܰܝܡܶܟܰܐ ܗ̱ܘ: ܠܗܰܘ ܕܟܽܠ ܫܘ̣ܠ̈ܛܳܢܝ̣ܢ ܕܒܰܫܡܰܝܳܐ ܘܒܰܐܪܥܳܐ ܡܶܢܶܗ ܐܝ̣ܬܰܝܗܽܘܢ: ܘܗܘ̣ ܐܝ̣ܬܰܘܗ̱ܝ ܡܰܠܟܳܐ ܕܡܰܠ̈ܟܶܐ ܘܡܳܪܳܐ ܕܡܳܪ̈ܰܘܳܬܳܐ ܘܩܳܛܰܪ ܬܳܓ̈ܶܐ ܠܫܰܠܝ̣̈ܛܳܢܶܐ: ܗܘ̣ ܕܶܝܢ ܡܳܪܝܳܐ ܡܶܛܽܠ ܕܝ̣ܕܰܥܬܳܐ ܗܰܘ ܘܨܶܢܥ̈ܳܬܳܐ ܩܕܳܡܰܘܗ̱ܝ ܬܳܩ̈ܢܳܢ: ܢܝ̣ܚܳܐܝ̣ܬ ܠܘ̣ܩܒܰܠ ܚܶܡܬܳܐ ܕܗܳܢܽܘܢ ܦܘ̣ܢܳܝܳܐ ܐܰܣ̣ܪܰܚ: ܘܚܰܟܝ̣ܡܳܐܝ̣ܬ ܠܘ̣ܩܒܰܠ ܥܪܝ̣ܡܘ̣ܬܗܽܘܢ ܒܡ̈ܰܬܠܶܐ ܐܶܬ̣ܚܰܫܰܚ ܘܐܰܗ̣ܦܶܟ ܥܠܰܝܗܽܘܢ ܥܰܘܠܗܽܘܢ ܘܫ̣ܰܬܶܩ ܐܶܢܽܘܢ ܒܒܝ̣ܫܘ̣ܬܗܽܘܢ: ܟܰܕ ܗܶܢܽܘܢ ܕܶܝܢ ܪ̈ܰܫܝ̣ܥܰܝ ܒܟܽܠ ܡܶܢ ܡܰܪܝ̣ܪܘ̣ܬܗܽܘܢ ܠܳܐ ܦܳܫ̣ܘ̱ ܐܶܠܳܐ ܪܰܘܒܳܐ ܐܡܝ̣ܢܳܐܝ̣ܬ ܡܩܝ̣ܡܝ̣ܢ ܗ̱ܘܰܘ: ܘܥܰܠ ܛܳܒ̈ܳܬܳܐ ܘܫܰܦܝ̣ܪ̈ܳܬܳܐ ܕܰܒܗܽܘܢ ܟܽܠܫܳܥ ܡܶܣ̣ܬܰܥܪ̈ܳܢ ܗ̱ܘܰܝ̈ ܡܒܰܓܢܝ̣ܢ ܗ̱ܘܰܘ: ܘܒܝ̣̈ܫܳܬܳܐ ܘܣܰܢ̈ܝܳܬܳܐ ܠܗܽܘܢ ܚܳܫ̇ܒܝ̣ܢ ܗ̱ܘܰܘ: ܘܥܰܠ ܗܳܕܶܐ ܠܛܳܒܘ̣ܬܶܗ ܒܰܚܣܳܡܗܽܘܢ ܡܩܰܛܪܓܝ̣ܢ ܗ̱ܘܰܘ: ܘܰܟܢܘ̣̈ܫܝܶܐ ܕܢܶܟܠܳܐ ܐܰܡܝ̣ܢܳܐܝ̣ܬ ܡܟܰܢܫܝ̣ܢ ܗ̱ܘܰܘ: ܘܙܰܒܢܳܐ ܕܥ̱ܳܗܶܢ ܠܩܶܛܠܳܐ ܪܰܒܳܐ ܢܳܛܪܝ̣ܢ ܗ̱ܘܰܘ: ܗܘ̣ ܕܶܝܢ ܒܛܰܝܒܘ̣ܬܶܗ ܘܢܰܓܝ̣ܪܘ̣ܬ ܪܘ̣ܚܶܗ ܠܟܽܠܗܶܝܢ ܣܰܝܒ̣ܰܪ: ܚܣܳܡܳܐ ܕܟܳܗ̈ܢܶܐ ܪܶܛܢܳܐ ܕܣܳܦܪ̈ܶܐ ܣܶܢܶܐܬܳܐ ܕܰܦܪ̈ܝ̣ܫܶܐ ܛܳܠܘ̣ܡܘ̣ܬܳܐ ܕܥܰܢ̈ܳܬܶܐ: ܘܠܘ̣ܩܒܰܠ ܡܰܘܬܳܐ ܕܰܙܩܝ̣ܦܳܐ ܡܛܰܝܒܳܐܝ̣ܬ ܣ̣ܳܡ ܐܰܦܰܘ̈ܗ̱ܝ ܐܰܝܟܰܢܳܐ ܕܰܠܟܽܠ ܓܡܝ̣ܪܳܐܝ̣ܬ ܢ̣ܶܦܪܘ̣ܩ: ܚܢܰܢ ܕܶܝܢ ܡܶܣ̈ܟܺܢܶܐ ܘܕܳܘ̈ܰܝܳܐ ܕܥ̱ܘ̣ܗܕܳܢܳܐ ܕܚܰܫܶܗ ܦܳܪܘ̣ܩܳܝܳܐ ܠܰܡ̣ܥܰܕܥܳܕܘ̣ ܐܶܬ̣ܰܝܢܰܢ ܘܐܶܫ̣ܬܘܝ̣ܢܰܢ ܒܛܰܝܒܘ̣ܬܶܗ ܘܰܠܕܘ̣ܟܪܳܢܶܗ ܪܰܒܳܐ ܠܰܡ̣ܥܰܕܥܳܕܘ̣ ܐܶܬܛܰܝܰܒ̣ܢܰܢ ܦܝܳܣܬܳܐ ܡܩܰܪܒܝ̣ܢܰܢ ܠܪ̈ܰܚܡܰܘܗ̱ܝ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܫܳܐܠܝ̣ܢܰܢ ܡܶܢ ܪܶܚܡܰܬ݀ ܐ̱ܢܳܫܘ̣ܬܶܗ: ܕܰܒܚܰܫܶܗ ܪܰܒܳܐ ܢ̣ܚܰܪܰܪ ܠܢܰܦ̈ܫܳܬܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܢܕܝ̣̈ܕܶܐ ܕܰܚܛܝ̣ܬܳܐ: ܘܰܢ̣ܫܰܟܶܢ ܠܰܢ ܕܡܰܘ̈ܕܝܳܢܶܐ ܚܰܬܝ̣̈ܬܶܐ ܕܛܰܝܒ̈ܘܳܬܶܗ ܢ̇ܶܗܘܶܐ: ܘܠܳܐ ܡܓܰܕ̈ܦܳܢܶܐ ܘܛܳܠܘ̣̈ܡܶܐ ܢܶܫ̇ܬܟܰܚ: ܘܢ̣ܰܫܘܶܐ ܠܰܢ ܕܕܰܟܝܳܐܝ̣ܬ ܢ̇ܶܬܩܰܪܰܒ ܠܫܰܘܬܳܦܘ̣ܬܳܐ ܩܰܕܝ̣ܫܬܳܐ ܘܡܰܚܝܳܢܝ̣ܬܳܐ ܕܦܶܨܚܶܗ ܪܰܒܳܐ ܘܰܩܝܳܡܬܳܐ ܕܝ̣ܠܶܗ ܡܰܠ̣ܝܰܬ݀ ܪܘܳܙܳܐ: ܘܚܳܕܝܳܐܝ̣ܬ ܘܰܦܨܝ̣ܚܳܐܝ̣ܬ ܢ̇ܰܣܶܩ ܠܶܗ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀