ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܰܒܽܘܥܳܐ ܕܚܰܝ̈ܶܐ ܘܰܡܥܺܝܢܳܐ ܕܪ̈ܰܚܡܶܐ ܕܠܐܴ ܓܳܝܙܳܐ: ܠܗܰܘ ܕܢܰܚܡܶܗ ܠܓܶܢܣܰܢ ܬܰܚܽܘܒܳܐ ܒܰܩܝܳܡܬܶܗ ܐܰܣܓܺܝ ܠܰܢ ܥܽܘܕܪ̈ܳܢܶܐ ܫܰܪܺܝܪ̈ܶܐ ܒܣܰܒܪܳܐ ܫܰܪܺܝܪܳܐ ܕܢܽܘܚܳܡܶܗ: ܠܗܰܘ ܓܰܢ̱ܒܳܪܳܐ ܕܩܳܡ ܡܶܢ ܩܰܒܪܳܐ ܒܬܶܫܒܽܘܚܬܳܐ: ܘܟܰܢܶܫ ܐܶܢܽܘܢ ܠܰܡܒܰܕܪ̈ܶܐ ܕܡܰܪܥܺܝܬܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܡܳܪܰܢ ܝܶܫܽܘܥ ܡܫܺܝܚܳܐ ܗܰܘ ܕܐܰܠܒ̣ܶܫܬܳܢ ܠܐܴ ܡܶܬܚܰܒܠܳܢܽܘܬܳܐ ܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ ܘܚ̣ܰܪܰܪܬ ܘܰܦ̣ܪܰܩܬ ܠܰܢ ܡܶܢ ܐܺܝ̈ܕܰܝ ܡܰܘܬܳܐ ܘܣܳܛܳܢܳܐ: ܐܰܢ̱ܬ ܡܳܪܝ̱ ܫܰܪܰܪܬܳܗ̇ ܠܰܩܝܳܡܬܳܟ ܡܫܰܒܰܚܬܳܐ ܒܙܰܒ̈ܢܳܬܳܐ ܣܰܓܺܝ̈ܳܐܬܳܐ ܘܰܣܒܺܝ̣̈ܣܳܬܳܐ ܒܠܶܒܰܘ̈ܳܬܳܐ ܕܬܰܠܡܺܝ̈ܕܰܝܟ ܕܟܰܝ̈ܳܐ ܘܩܰܕܺܝ̈ܫܶܐ: ܘܰܒܕܽܘܟ̈ܝܳܬܳܐ ܡܫܰܚܠܦ̈ܳܬܳܐ ܚܰܘܺܝܬ ܠܗܽܘܢ ܢܰܦܫܳܟ ܘܚܰܣ̣ܶܕܬ ܠܚܰܣܺܝܪܽܘܬ ܗܰܝܡܳܢܽܘܬܗܽܘܢ: ܒܗܳܝ ܕܠܐܴ ܗܰܝܡܶܢܘ̱ ܠܗܳܢܽܘܢ ܕܩܰܕܡܳܝ ܐܶܬܚܰܘܺܝ ܠܗܽܘܢ ܒܐ̱ܪܳܙܳܐ ܕܢܽܘܚܳܡܳܟ ܡܠܐܷ ܬܶܗܪܳܐ: ܘܛܽܘܒܳܐ ܝܰܗ̣ܒܬ ܠܐܱܝܠܶܝܢ ܕܠܐܴ ܚܙܰܐܘܽܘܟ ܘܗܰܝܡܶܢܘ̱ ܒܳܟ: ܚܢܰܢ ܕܶܝܢ ܡܳܪܝ̱ ܥܰܒ̣ܕܰܝ̈ܟ ܘܣܳܓܽܘ̈ܕܰܝܟ ܐܳܦܶܢ ܠܐܴ ܚ̣ܙܰܝܢܳܟ ܦܰܓܪܳܢܳܐܝ̣ܬ: ܐܶܠܐܴ ܟܽܠܝܽܘܡ ܠܰܢ ܡܶܬܚܙܶܝܬ ܪܽܘܚܳܢܳܐܝ̣ܬ ܥܰܠ ܡܰܕܒܚܳܐ ܐ̱ܪܳܙܳܢܳܐܝ̣ܬ ܘܫܰܪܺܝܪܳܐܝ̣ܬ ܘܠܐܴ ܡܶܬܦܰܠܓܳܢܳܐܝ̣ܬ: ܠܦܰܓܪܳܟ ܩܰܕܺܝܫܳܐ ܡܶܫܬܰܘܕܥܺܝܢܰܢ ܗܰܘ ܕܺܐܝܬܰܘܗ̱ܝ ܡܰܐܠܗܳܢܳܐ ܕܦܰܓܪ̈ܰܝܢ ܘܢܰܦ̈ܫܳܬܰܢ: ܘܒܶܗ ܠܳܟ ܚܳܙܶܝܢܰܢ ܘܰܡܗܰܝܡܢܺܝܢܰܢ ܕܰܐܢ̱ܬ ܗ̣ܽܘ ܒܰܫܪܳܪܳܐ ܡܳܪܰܢ ܘܰܐܠܳܗܰܢ ܐܳܦ ܡܰܚܝܳܢܰܢ ܣܓܺܝܕܳܐ: ܘܰܐܫܘܳܐ ܠܰܢ ܡܳܪܝ̱ ܠܛܽܘܒܳܟ ܗܰܘ ܡܳܪܳܢܳܝܳܐ ܘܰܠܦܶܓܥܳܐ ܕܒܳܟ ܡܚܰܕܝܳܢܳܐ ܘܡܰܦܨܚܳܢܳܐ: ܕܝܰܘܡܳܢܳܐ ܥ̱ܽܘܗܕܳܢܳܐ ܕܰܩܝܳܡܬܳܟ ܘܢܽܘܚܳܡܳܟ ܕܡܶܢ ܒܶܝܬ ܡܺܝ̈ܬܶܐ ܐܰܝܟ ܡܶܠܬܳܟ ܡܰܚܝܳܢܺܝܬܳܐ ܘܩܰܕܺܝܫܬܳܐ ܡܰܥ̱ܗܕܺܝܢܰܢ ܘܠܳܗ̇ ܒܚܰܕܽܘܬܳܐ ܡܢܰܨܪܺܝܢܰܢ ܘܳܐܡܪܺܝܢܰܢ: ܐܳܘ ܩܝܳܡܬܳܐ ܦܳܪܽܘܩܳܝܬܳܐ ܘܡܰܚܝܳܢܺܝܬܶܗ ܕܓܶܢܣܰܢ ܕܒܶܗ ܐܶܫܬܰܟܰܢܘ̱ ܚܰܝ̈ܶܐ ܚܰܕ̈ܬܶܐ ܠܰܒܪܺܝܬܳܐ: ܐܳܘ ܩܝܳܡܬܳܐ ܚܕܰܬܳܐ ܘܦܳܪܽܘܩܳܝܬܳܐ ܕܰܐܠܳܗܰܢ ܕܡܶܢ ܡܺܝܬܽܘܬܳܐ ܕܰܚܛܺܝܬܳܐ ܐܰܩܺܝܡܬ ܠܰܢ: ܐܳܘ ܩܝܳܡܬܳܐ ܡܰܚܝܳܢܺܝܬܳܐ ܕܐܰܠܳܗܰܢ ܕܒܳܗ̇ ܡܶܢ ܒܶܝܬ ܡܺܝ̈ܬܶܐ ܩܳܡ̣ܢܰܢ: ܐܳܘ ܩܝܳܡܬܳܐ ܡܰܚܝܳܢܺܝܬܶܗ ܕܓܶܢܣܰܢ ܕܰܠܝܳܪܬܽܘܬܰܢ ܗܳܝ ܩܰܕܡܳܝܬܳܐ ܕܰܐܘܒܶܕܢܰܢ ܒܰܥܒܳܪ ܦܽܘܩܕܳܢܳܐ ܙܰܡܢܰܬ݀ ܠܰܢ: ܐܳܘ ܩܝܳܡܬܳܐ ܒܪܺܝܟܬܳܐ ܕܐܰܠܳܗܰܢ ܕܽܐܘܪܚܳܐ ܠܡܰܠܟܽܘܬܳܐ ܕܰܫܡܰܝܳܐ ܬܰܪܨܰܬ݀ ܠܰܢ ܘܚܰܝ̈ܶܐ ܚܰܕ̈ܬܶܐ ܐܰܩܢܝܰܬ݀ ܠܰܢ: ܘܒܰܕܓܽܘܢ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܠܝܰܘܡܳܐ ܕܰܩܝܳܡܬܳܟ ܒܚܰܕܽܘܬܳܐ ܡܥܰܕܥܕܺܝܢܰܢ: ܕܰܠܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܒܰܦܨܺܝܚܽܘܬܳܐ ܣܳܘܚܺܝܢܰܢ ܘܒܳܥܶܝܢܰܢ ܘܡܶܬܟܰܫܦܺܝܢܰܢ: ܕܰܬܫܰܟܶܢ ܠܰܢ ܒܝܰܘܡܳܐ ܗܳܢܳܐ ܕܥܰܕܥܺܐܕܳܟ ܚܽܘܣܳܝܳܐ ܘܫܽܘܒܩܳܢܳܐ ܠܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܳܐ ܕܺܝܠܰܢ: ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܐܰܝܠܶܝܢ ܕܰܥܢ̣ܰܕܘ̱ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܐܰܢܺܝܚ ܐܶܢܽܘܢ ܒܰܐܘ̈ܳܢܶܐ ܛܽܘܒܬܳܢ̈ܶܐ ܕܺܝܠܳܟ: ܘܒܰܣܶܡ ܐܶܢܽܘܢ ܒܰܡ̈ܛܰܠ̱ܠܐܷ ܢܰܗܺܝܪ̈ܳܬܳܐ: ܘܫܽܘܒܚܳܐ ܡܢܰܟܪܰܝ ܡ̣ܶܢ ܗܽܘ̣̈ܠܐܷ ܢܰܣܶܩ ܠܳܟ ܡܫܺܝܚܳܐ ܡܚܰܕܬܳܢܶܗ ܕܓܶܢܣܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀