ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܘܰܡܪܰܚܡܳܢܳܐ ܕܒܰܣܺܝܡܽܘܬܶܗ ܠܰܨܠܺܝܒܳܐ ܥܰܠܝܰܬܶܗ: ܘܛܳܒܽܘܬܶܗ ܠܚܰܫܳܐ ܘܰܠܚܶܣܕܳܐ ܘܫܽܘܩ̈ܳܦܶܐ ܘܰܙܩܺܝܦܳܐ ܡܰܢܰܥܬܶܗ: ܠܗܰܘ ܒܰܣܺܝܡܳܐ ܕܰܡܪܰܚܡܳܢܽܘܬܶܗ ܒܓܰܘ ܩܰܒܪܳܐ ܚܒܰܫ̣ܬܶܗ: ܘܫܽܘܠܛܳܢܶܗ ܥܰܡ ܡܰܘܬܳܐ ܥܰܪܙܠܶܗ: ܘܬܽܘܩܦܶܗ ܥܰܫܺܝܢܳܐ ܡܶܢ ܩܰܒܪܳܐ ܐܰܩܺܝܡܶܗ: ܘܰܕܪܳܥܶܗ ܩܰܕܺܝܫܳܐ ܒܙܳܟܽܘܬܳܐ ܪܰܡܪܡܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܠܳܟ ܐܰܠܳܗܳܐ ܡܶܠܬܳܐ ܕܡܶܢ ܐܰܒܳܐ ܡܩܰܕܡܺܝܢܰܢ ܘܟܰܕ ܣܳܓܕܺܝܢܰܢ ܘܡܰܘܕܶܝܢܰܢ: ܘܰܠܒܽܘܪܢܳܫܳܟ ܗܰܘ ܬܡܺܝܗܳܐ ܕܡܶܢ ܒܬܽܘܠܬܳܐ ܘܰܠܥܶܠ ܡܶܢ ܡܶܠܬܳܐ ܡܩܰܠܣܺܝܢܰܢ ܘܰܡܪܰܡܪܡܺܝܢܰܢ: ܘܠܺܝܠܺܝܕܽܘܬܳܟ ܗܳܝ ܐ̱ܢܳܫܳܝܬܳܐ ܕܡܶܢ ܒܰܪ̱ܬ݀ ܕܰܘܺܝܕ ܚܳܙܶܝܢܰܢ: ܘܟܰܕ ܓܶܝܪ ܒܡܽܘܟܳܟܳܟ ܕܠܐܴ ܣܳܟܳܐ: ܘܟܽܘܪܳܟܳܟ ܕܰܒܥܰܙܪܽܘܪ̈ܶܐ ܡܶܬܕܰܡܪܺܝܢܰܢ ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܥܰܠ ܐܰܦ̈ܰܝ ܗܳܠܶܝܢ ܟܽܠܗܶܝܢ ܡܰܣܩܺܝܢܰܢ: ܕܟܰܕ ܐܝ̣ܬܝܟ ܡܰܠܝܳܐ ܘܰܡܫܰܡܠܝܳܐ ܟܽܠܳܗ̇ ܡܕܰܒܪܳܢܽܘܬܳܟ: ܘܰܣܢܺܝܩܳܐ ܐܰܟܘܳܬܰܢ ܥܒ̣ܰܕܬ ܘܰܓܡ̣ܰܪܬ ܘܫܰܡܠܺܝܬ: ܐܰܢ̱ܬ ܕܺܐܝܬܰܝܟ ܠܐܴ ܣܢܺܝܩܳܐ ܘܠܐܴ ܚܰܣܺܝܪܳܐ: ܘܰܠܟܽܠ ܡܳܠܐܷ ܐܰܢ̱ܬ ܡܶܢ ܛܰܝܒ̈ܘܳܬܳܟ: ܘܟܽܠܳܗ̇ ܒܪܺܝܬܳܐ ܡܰܠܝܳܐ ܡܶܢܳܟ: ܘܠܐܴ ܡܣܰܝܟܳܐ ܠܳܟ ܫܡܰܝܳܐ ܘܰܐܪܥܳܐ ܘܰܙܥܽܘܪ̈ܝ̣ܢ ܠܳܟ: ܘܩܰܒܪܳܐ ܙܥܽܘܪܳܐ ܐܰܚ̣ܕܳܟ ܐܰܝܟ ܕܰܫܦ̣ܰܪ ܠܳܟ: ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܕܺܝܠܰܢ ܫܰܡܠܺܝܬ ܣܛܰܪ ܡܶܢ ܚܛܺܝܬܳܐ ܒܰܠܚܽܘܕ: ܘܰܐܝܬܺܝܬ ܠܰܢ ܡܶܢ ܠܘܳܬ ܐܰܒܽܘܟ ܥܽܘܬܪ̈ܶܐ ܟܣܰܝ̈ܳܐ: ܘܟܽܠ ܡܰܘܗ̈ܒܳܬܳܐ ܫܦܺܝ̣̈ܥܳܬܳܐ ܘܠܐܴ ܡܶܬܕܰܪ̈ܟܳܢܳܝܳܬܳܐ ܘܦܰܪܢܶܣ̣ܬ ܐܶܢܽܘܢ ܠܥܽܘܕܪ̈ܳܢܰܝܟ ܐܽܘܣܝ̈ܳܝܶܐ ܠܰܡܚܺܝܠܽܘܬܰܢ ܘܡܰܓܳܢ ܐܰܣܺܝܬ ܘܰܐܚܠ̣ܶܡܬ ܠܟܺܐܒܰܝ̈ܢ ܘܟܽܘܪ̈ܗܳܢܰܝܢ ܛܥܶܢܬ ܘܥܰܡܳܟ ܠܪܺܝܫܶܗ ܕܰܨܠܺܝܒܳܐ ܐܰܣܶܩ̣ܬ ܐܶܢܽܘܢ ܘܰܚܛܺܝܬܳܐ ܕܺܝܠܰܢ ܐܰܫܺܝܓܬ: ܘܡܽܘ̈ܡܰܝܢ ܡܪܰܩ̣ܬ: ܘܟܽܠܶܗ ܥܰܘܠܐܴ ܣܰܪܝܳܐ ܕܰܒܢܰܦ̈ܫܳܬܰܢ ܐܰܣܺܝܢ ܗ̱ܘܳܐ ܘܚܰܠܺܝܬ: ܠܰܐܚܪܳܝܰܬ݀ ܕܶܝܢ ܟܰܕ ܐܶܬܬܠܺܝܬ ܥܰܠ ܩܰܝܣܳܐ ܕܚܶܣܕܳܐ ܘܰܐܫܺܝܓܬ ܠܫܽܘܪܰܥܬܰܢ ܩܰܕܡܳܝܬܳܐ: ܗܳܝ ܕܒܰܥܒܳܪ ܦܽܘܩܕܳܢܳܐ ܐܶܬܬܰܓܰܪܢܰܢ ܠܰܢ: ܘܡܶܛܽܠܗܳܕܶܐ ܣܳܓܕܺܝܢܰܢ ܠܶܗ ܠܡܽܘܟܳܟܳܟ ܕܰܚܠܳܦܰܝܢ ܚܰܢܳܢܳܐ ܕܦܰܪܩܰܢ ܒܰܩܝܳܡܬܶܗ ܘܢܽܘܚܳܡܗ ܘܒܰܡܕܰܒܪܳܢܽܘܬܶܗ ܘܰܥ̣ܛܳܐ ܠܰܒܥܶܠܕ̈ܒܳܒܰܝܢ ܘܰܐܒ̣ܗܶܬ ܐܶܢܽܘܢ ܚܶܣܕܳܐ ܘܰܩܠܳܠܐܴ ܥܒ̣ܰܕ ܐܶܢܽܘܢ: ܘܬܰܒܰܪ ܪ̈ܺܝܫܰܝܗܽܘܢ ܒܡܰܝ̈ܳܐ ܡܶܬܝܰܕ̈ܥܳܢܶܐ: ܐܰܝܟ ܡܶܠܬܳܐ ܢܒܺܝܳܝܬܳܐ ܕܐܶܡܰܪܬ: ܕܱܐܰܢ̱ܬ ܪܰܨܶܨܬ ܪ̈ܝ̣ܫܰܝܗܘܢ̇ ܕܬܰܢܺܝ̣̈ܢܶܐ ܥܰܠ ܡܰܝ̈ܳܐ: ܘܰܐܢ̱ܬ ܫܚ̣ܰܩܬ ܠܠܶܘܝܳܬܳܢ ܛܰܪܟܳܢܳܐ ܘܰܥܩܰܠܩܠܐܴ ܗܰܘ ܣܰܓܺܝ ܪ̈ܺܝܫܶܐ ܘܰܥܒ̣ܰܕܬܳܝܗ̱ܝ ܕܝܳܫܳܐ ܠܰܡܗܰܝ̈ܡܢܶܐ ܕܰܦ̣ܪܰܩܬ ܐܶܢܽܘܢ ܒܩܶܛܠܳܟ: ܘܰܐܚܺܝܬ ܒܡܽܘܟܳܟܳܟ ܘܰܒܡܰܘܬܳܟ ܘܢܰܚܶܡ̣ܬ ܒܢܽܘܚܳܡܳܟ ܘܒܰܣܶܡ̣ܬ ܒܚܰܫ̈ܶܐ ܕܰܙܩܺܝܦܽܘܬܳܟ: ܡܶܛܽܠ ܗܳܕܶܐ ܡܰܘܕܶܝܢܰܢ ܠܳܗ̇ ܠܰܩܝܳܡܬܳܟ: ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ: ܕܝܰܗ̣ܒܬ ܫܽܘܒܚܳܟ ܥܰܠ ܫܡܰܝܳܐ: ܘܫܽܘܒܚܳܐ ܘܺܐܝܩܳܪܳܐ ܐܰܥܛܶܦܬܳܝܗ̱ܝ ܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܒܰܥܒܳܕܳܐ ܕܺܐܝ̈ܕܰܝܟ ܐܰܫܠܶܛܬܳܝܗ̱ܝ: ܘܟܽܠ ܣܳܡ̣ܬ ܬܚܶܝܬ ܪ̈ܶܓܠܰܘܗ̱ܝ: ܥܳܢ̈ܳܐ ܘܒܰܩܪ̈ܶܐ ܟܽܠܗܶܝܢ: ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܘܪ̈ܰܚܫܳܐ ܕܰܐܪܥܳܐ ܗܳܢܰܘ ܕܶܝܢ ܓܶܢܣܳܐ ܕܫܺܐܕ̈ܶܐ ܡܳܪ̈ܽܘܕܶܐ ܕܣܳܥܶܝܢ ܥܰܠ ܒܢܰܝ̈ܢܳܫܳܐ ܒܝܰܡܳܐ ܘܰܒܝܰܒܫܳܐ: ܘܡܶܛܽܠܗܳܕܶܐ ܡܫܰܒܚܺܝܢܰܢ ܠܳܟ ܐܳܘ ܡܳܪܳܐ ܕܟܽܠܐܴ ܕܰܦ̣ܪܰܩܬܳܢܝ̱ ܡܶܢ ܬܚܶܝܬ ܫܽܘܥܒܳܕܗܽܘܢ: ܘܦܰܨܺܝܬܳܢܝ̱ ܡܶܢ ܫܽܘܠܛܳܢܗܽܘܢ: ܘܒܰܩܝܳܡܬܳܐ ܕܺܝܠܳܟ ܝܰܗ̣ܒܬ ܠܰܢ ܫܽܘܠܛܳܢܳܐ ܕܢܶܫܚܽܘܩ ܪ̈ܺܝܫܰܝܗܽܘܢ ܒܗܳܝ: ܕܠܳܟ ܢܶܕܰܥ ܘܒܳܟ ܢܗܰܝܡܶܢ ܕܰܐܢ̱ܬ ܗ̣ܽܘ ܐܰܠܳܗܳܐ ܒܰܠܚܽܘܕܰܝܟ ܫܰܪܺܝܪܳܐܝ̣ܬ: ܕܩܳܡ̣ܬ ܡܶܢ ܩܰܒܪܳܐ ܓܰܢ̱ܒܳܪܳܐܝ̣ܬ ܘܰܐܩܺܝܡܬ ܠܰܢ ܥܰܡܳܟ ܒܫܽܘܒܚܳܐ ܡܪܰܡܪܡܳܐܝ̣ܬ: ܘܡܺܝ̈ܬܶܐ ܥܓܺܝ̣̈ܢܶܐ ܣܘܰܚ̣ܘ̱ ܠܐܘܪܥܳܟ ܥܰܠ ܥܰܦܪܳܗ̇ ܕܰܫܝܽܘܠ ܚܳܕܝܳܐܝ̣ܬ: ܘܰܐܣ̣ܶܩܘ̱ ܠܳܟ ܫܽܘܒܚܳܐ ܘܬܰܘܕܺܝܬܳܐ ܦܨܺܝܚܳܐܝ̣ܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܫܰܘܝܳܐܝ̣ܬ: ܗܳܫܳܐ܀